EMHUOGHAẠPH ITUUGHẠ PHỌ 25
“Mị R’aloor Amhị Kawạ Ni Iyool Phọ Amhị”
“Mị r’aloor amhị kawạ ni iyool phọ amhị, aḅilhẹ amaạr apogh bidị.”—EZEK. 34:11.
AḌUỌR PHỌ 105 “God Is Love”
OGHAẠPH OOKARAGH *
1. Ika kụ idị aZihova aghịgh onhiin dị rangọ obumoọny mamaạm?
“ONHIIN katue ni abula moọny odị dị ramaạm ḍughụm?” AZihova kụ apuru ḍipuru phọ aḍiẹn phọ siiḍio oyil phọ Aizaya. Enhaạn iḅenhị we phọ odị mọ “ghalhamọ onhiin kabula ni moọny odị, mị inyinha ki/wula.” (Isa. 49:15) Odị o/gbor ghan otomaạm loor odị onhiin. Kuolọ toroboiperolbọ, odị aḍighi ni iduọn phọ mem mọ amuphẹ phọ. AZihova asighẹ muḅọph phọ ratọl ghan bọ igbo onhiin r’oọny kụ agananamhiom odọ ephomhoghiạn phọ odị amhoọgh bọ aghị esi arebenhẹ phọ odị. Ogbogh opol aburunhiin omeeraam aani idị oniin onyọ umarani dị oghol mọ Jasmin aḅẹm, odị aḅẹm mọ, “mem dị nạ kụ aakonhom obumoọny anạ, nạ kamoọgh ni siya dị egbatanhaạn r’oọny phọ, dị ketọl oomo adọl aghuḍum mọ anyinha.”
2. AZihova raloghoma ghan ika mem dị oniin obumoọny odị aḍuraan aḍuạ esi odị?
2 AZihova ralegheri ghan ni ghalhamọ r’amem dị oniin obumoọny odị awilhẹ oru ghan ituughạ ḅilhẹ r’oghị epẹ erugh phọ. Kụ agbiom nuụn olhoghi odọ idị repin ghan esi odị, omhiịn dị asimuonịr arebenhẹ odị roophoọm ghan * lhạ lhạ lhạ.
3. Eeghe kụ reḅeraạn ghan aZihova?
3 Ibadị abuuḅi abumor r’abumarani phọ abuẹn moophoọm bọ, oḅilhẹ ghan ni roḅula siẹn ookpomhoghan phọ, kụ olhoghi ayira raḅaạl ghan ni mem dị bidị oḅula! AZihova rawạ mọ bidị oḅula, kụ yira phọ kẹn ni. (1 Pit. 2:25) Ika kụ idị yira kotue ologhonhaạn bidị ḍighaạgh oḅula? Tutụ yira kopagharanhaạn ḍipuru phọ aḍiphẹ phọ, kenighẹ ni dị yira kopụr olegheri raraạr phọ rekọm ghan bọ idị abuniin kobilhẹ ituughạ ḅilhẹ r’omite epẹ erugh phọ.
EEGHE KỤ IḌIGHI KỤ ABUNIIN AWE OBILHẸ BỌ OKUMU AZIHOVA?
4. Ika kụ idị oḍighi owạ kụ olhe matir buniin?
4 Abuniin omaghamhị maạr oḍighi owạ kụ olhe abidị opuemhi torobọ iyaạr. Onyọ umor dị oghol mọ Hung * dị arugh epẹ Asia, aḅẹm mọ “mị ulhọgh ghan muboom amem epẹ oḍighi phọ amhị, mị u/legheri, mị uutughiạn ghan mọ amem lọ mị amhoọgh ikpoki kụ edị mị katue akuamhị akumu aZihova. Kụ iḍighi kụ mị ulhọgh ghan muboom amem epẹ oḍighi phọ, dị tutụ mị amhiigh owilhẹ yogh ituughạ, esighẹ rekị bịn mị alhegheri awilhẹ ookpomhoghan phọ. Ekịgh mudị opighi aḅirinhi phọ ophọn eten dị koḍaạm we osighẹ ḍighaạgh Enhaạn enụm enụm.”
5. Ika kụ idị iiḅaghamhị kirokirọ etir oniin onyọ umarani?
5 Abuniin abumor r’abumarani osoman iiḅaghamhị dị mekọm oḅonyonhu ozuan engọ. Esi omaạm, oniin onyọ umarani dị oghol mọ Anne epẹ Britain dị amhạr oogh anmụny, aḅẹm mọ. “Oniin obumoọny amhị umarạm egbagarạ e/moon k’eghoroghọr, kụ esighẹ rekị bịn ophorogh oniin onyanhị amhị siẹn ookpomhoghan phọ ḅilhẹ kẹn emhụ oniin oọny amhị emhiigh owalhawalhạ. Mị umhoọgh ni ooḅaghamhiạn aloor dị tutụ mị awilhẹ oghị ghan ituughạ ḅilhẹ r’omite epẹ erugh phọ. Esighẹ rekị bịn mị aaphoọm.” Yira rosenyạn ni Anne r’eghunotu phọ odị, ḅilhẹ r’abunhọn abumor r’abumarani dị osoman aani iniin phọ iiḅaghamhị phọ!
6. Ika kụ idị oye katue aḍuraan aḍuạ esi awe phọ aZihova eḍighi maạr dị u/sighẹ uḍighinhom Kolosị 3:13?
6 Bạl Kolosị 3:13. Abuniin arebenhẹ aZihova rologhoma ghan ophin olhoghi loor esi iyaạr dị onyọ umor obobọ onyọ umarani aḍighi bidị. Otelhedom mọ aPọl alhọgh ni elhegh mọ onyọ umor obobọ onyọ umarani atue ni uḍighi iyira “ikarạph”. Eeni amem otue ni uzoọm iyira eten dị ii/leeny, eḍighi maạr dị yira u/gona loor, yira kokạgh ni olhoghi. Ophin olhoghi katue ni akọm idị oye kaḍuraan aḍuạ esi awe phọ aZihova. Ooḅeghiọn idị emitenhaan oniin onyọ umor dị oghol mọ Pablo epẹ South America, ugbaanhaạn nyodị iyaạr dị i/tu inẹ, bịn odị aroph roopoogh phọ odị siẹn ookpomhoghan phọ. Odị azọ ika? APablo aḅẹm mọ, “iphin ni olhoghi amhị, bịn enụm enụm mị amhiigh oḍuraan oḍuạ isiẹn ookpomhoghan phọ.”
7. Ika kụ idị ooruẹn olhoghi dị ragụr katue atir oye?
7 Obobọ oye dị maḍighi ghan ikarạph igbaany, ooruẹn olhoghi phọ katue ni aaḅaghamhị bịn ekọm idị kaloghoma mọ onọ o/kpeanhaạn mun dị Enhaạn keḍeenhaan ephomhoghiạn. Ghalhamọ odị makiton ni oḍeenhaan nyodị onmạ ighirigiir, eeni odị atue ni aloghoma mọ onọ o/kpeanhaạn mun orọl igbo awe phọ Enhaạn. Onyọ umor dị oghol mọ Francisco alhoghoma ni eten phọ epẹ phọ. Odị aḅẹm mọ, “Mị ulhe emhạ kụ uḅaạm imhị, obọ eḅẹl amem mọ mị ughị ghan ni ituughạ, esighẹ rekị bịn olhoghi amhị aphụ, mị ulhoghoma mọ mị u/kpeanhaạn mun orọl igbo awe phọ aZihova. Ooruẹn olhoghi amhị uuḅaghamhị ni imhị iboom, mị ulhoghoma mọ aZihova imhị ku/sạr uwilhenhaạn, esighẹ rekị bịn mị awilhẹ oghị ituughạ.” Nạ aloghoma ika ilọ abumor r’abumarani phọ abuẹn osoman bọ sidọl phọ iphẹn phọ? Nạ raseenyạn ni bidị ḍughụm? Edị ekạr emhạn maạr, aZihova aloghoma ika ilọ abidị?
AZIHOVA APOMOGHIẠN NI IYOOL PHỌ ODỊ
Oye olọ Izrạl dị aḍighi opoghom ramaạr ghan k’aphogh oyool odị dị aphe (Miịn siikpịgh phọ 8-9) *
8. AZihova rabula ghan ni buphẹ mokumu ghan bọ nyodị ḍughụm? Gbạ.
8 AZihova ra/bula ghan buphẹ okumu ghan bọ nyodị mem dị eten kụ mowilhẹ bọ ooḍikuan awe phọ odị esi ekulha amem, ḅilhẹ ra/bula ghan iiḍighi phọ abidị. (Hib. 6:10) Oyil phọ Aizaya agẹ ni imạ oghaạph omaaniọm dị aḍeenhaan ipẹ aZihova rapogh ghan bọ we phọ odị. Odị agẹ mọ “Idiphọ opoghom, odị kapogh ni iyool phọ odị, kụ aaḅakị iyool phọ akuraam, ḅilhẹ odị kaḅerion ni bidị.” (Isa. 40:11) Ika kụ idị Ogbogh Opoghom mọ raloghoma ghan mem dị oniin oyool odị aphe? AZizọs agananami ni ipẹ aZihova raloghoma ghan bọ mem mọ odị apuru bọ bumatuạn phọ odị mọ: “Eru maạr dị oye amoọgh [oniin okuron] iyooI igạ kụ oniin aphe, nyina regbi mọ odị kaḍighi ika? Odị kabilẹ [esugha-dị r’esugha phọ] epẹ araaḅarạph phọ, akị awạ nyopọ aphe bọ. Odị amiịn, mị akạr riḅenị ghan inyina mọ odị kabo ni ibo ogạ phọ opọ apuemi [esugha-dị r’esugha phọ] epẹ i/pe aani bọ.”—Mat. 18:12, 13.
9. Ika kụ idị abugey abupoghom iyool simem aBaibul phọ ozoọm ghan iyool phọ abidị? (Miịn afoto oḅẹl opoḍi phọ.)
9 Eeghe kụ iḍighi kụ ekpẹ bọ ni otomaạm aZihova idiphọ opoghom? Loor esi dị simem aBaibul phọ ogey opoghom aḍeenhaan ghan agey ogbolhomaam aghị esi iyool phọ odị. Esi omaạm, aDevid, eenan ni idimini-ḅuagụ r’ebẹny oghoph iyool phọ odị. (1 Sam. 17:34, 35) Ogey opoghom kalegheri ni ghalhamọ r’amem dị oniin oyool odị aphe. (Jọn 10:3, 14) Opoghom dị arọl iduọn phọ kabilhẹ ni 99 iyool odị egey esi oghoph obobọ aḅọgh alọgh ḍighaạgh onhọn opoghom bịn anyeenhe oghị owạ opọ aphe bọ. AZizọs angọ oghaạph omaaniọm mọ ophọn phọ otughemhiọm igey dị emhạn maạr, kụ aḅẹm mọ: “i/ḅeraạn Odẹ phọ anyina odi bọ k’akẹ phọ lọ oniin ephurukpu onyọ abuẹn phọ kaphe.”—Mat. 18:14.
Opoghom iyool igạ olọ Izrạl iḍiodi phọ dị amhaạr rapogh ghan oyool odị dị aphe (Miịn ekpịgh phọ 9)
AZIHOVA RAWẠ GHAN NI IYOOL PHỌ ODỊ
10. Odaphạn Ezekiel 34:11-16, aZihova aguanhaan oḍighinhaan eeghe iyool phọ abuphẹ mophe bọ?
10 AZihova apomoghiạn ni torobọ onyọ ayira ghalhamọ ‘r’ibạm anmụny’ phọ abuphẹ mophe bọ siphẹ aḍita iyool phọ. Dị eego esi oyil phọ Ezekiel, Enhaạn aguanhaan ni mọ onọ kawạ ni iyool phọ odị mophe bọ, aḅilhẹ aloghonhaạn bidị ḍighaạgh oḅilhẹ omhoọgh asiya r’odị. Odị amaaghị ni radạ dị odị kagbariọn orue otagharạn abidị, radạ dị opoghom iyool olọ Izrạl kagbariọn orue owạ omhiịn oyool odị. (Bạl Ezekiel 34:11-16.) Eḅẹl edạ phọ pọ, opoghom mọ rawạ ghan oyool phọ aphe bọ, iphẹn phọ emoghi ni olhọgh amem r’inyaạm. Kụ mem dị opoghom mọ amhiịn oyool phọ, kapạm ni aḅulemi siphẹ ipheriphọ edi bọ. Ḅilhẹ eḍighi maạr lọ oyool phọ aḍighima iyaạr obobọ okoọny rasiph, r’eten ephomhoghiạn opoghom mọ kaloghonhaạn ni ḍighaạgh akoroghị esi phọ, aḅeton, aḅilhẹ angọ eḍien. Ewạ dị ikumor awe phọ ropogh bọ “iyool igạ phọ Enaạn,” kogbariọn ghan radạ phọ iphẹn phọ orue olhoghonhaạn aḍighaạgh torobọ oyool lọ aphe. (1 Pit. 5:2, 3) Ikumor awe phọ owạ bidị, olhoghonhaạn ḍighaạgh oḅula isiẹn ookpomhoghan phọ, oḍeenhaan bidị ephomhoghiạn esi olhoghonhaạn abidị ḍighaạgh oḅilhẹ omhoọgh imạ asiya r’aZihova. *
11. Ogey opoghom ralegheri ghan mọ eeghe kụ ketue ni emite?
11 Ogey opoghom ralegheri ghan mọ oyool odị katue ni ape. Iloni iloni kụ oniin aphe, opoghom mọ amhiịn ka/zoọm egbagarạ eten. Ooḅeghiọn eḍeenhaan idị Enhaạn alhoghonhaạn ḍighaạgh buniin arebenhẹ odị dị owilhẹ ooḅereghị odị esi ekulha amem.
12. AZihova azoọm ika Jona?
12 Oyil phọ aJona aghiilhaan oḍighi dị ongọ nyodị bịn asuma. Ghalhamọ r’iduọn phọ ni aZihova o/ghel Jona. Idiphọ ogey opoghom, aZihova atagharạn ni nyodị aḅilhẹ alhoghonhaạn ḍighaạgh omhoọgh inyaạm mọ ewạ bọ orue omhunhenhi oḍighi phọ odị. (Jonah 2:7; 3:1, 2) Onyebel roten, Enhaạn asighẹ ni oreeny ote aḍighinhom olhoghonhaạn aJona ḍighaạgh olhegheri idị aghuḍum atorobọ oye amhạn maạr. (Jonah 4:10, 11) Yira otuughạ eeghe siẹn phọ? Ikumor awe phọ ku/nuụn ghan u/kel oye dị maaphoọm, kparipẹ ghụn bidị okparaghạ ghan olhegheri iyaạr phọ ekọm bọ kụ oyool phọ amheel bọ aḍuạ. Mem dị oyool phọ aḅilhẹ aḅula ḍighaạgh aZihova, ikumor awe phọ oghiọm ghisigh oḍeenhaan ephomhoghiạn r’aḍiḅeraạn.
13. Eeghe iyaạr kụ edị yira kotue otuughạ esi eten phọ epẹ aZihova amhegheron bọ aghị esi okọ suọr phọ agẹ bọ Psalm 73?
13 Okọ suọr phọ agẹ bọ Psalm 73 aḅonyonhu ni bịn azuan mem dị amhiịn dị abukarạph awe phọ ghụn kụ roḍum. Odị amhoọgh ni iikia mughumọ asuọ akạr ri odi oḍighi ogbi phọ Enhaạn. (Ps. 73:12, 13, 16) AZihova amhegheron ika? Odị o/ghel okọ suọr phọ, Enhaạn aḍighi ghụn idị ogẹ ikpo onhụ okọ suọr phọ siẹn aBaibul phọ. Mem emhạn mem okọ suọr phọ aru ni alhọgh elhegh mọ omhoọgh igey asiya r’aZihova kụ imhạn maạr epu torobọ iyaạr siẹn aghuḍum mọ. (Ps. 73:23, 24, 26, 28) Yira otuughạ eeghe siẹn phọ? Ikumor awe phọ ku/nuụn ghan usoph ooruẹn ungọ oye dị r’amoọgh iikia ilọ asuọ phọ odi bọ okumu aZihova. Kparipẹ r’oghel odị, ikumor awe phọ okparaghạ onhaghanhạn iyaạr phọ eḍighi bọ kụ odị rakaạph bọ kaḅilhẹ azọ eten phọ epẹ phọ. Opọ kụ amem dị ikumor awe phọ kotue osighẹ esi aBaibul okparamhiọm oye phọ.
14. Eeghe kụ iḍighi kụ Ilaiza amhoghi bọ olhoghonhaạn aḍighaạgh, kụ ika kụ idị aZihova alhoghonhaạn nyodị aḍighaạgh?
14 Oyil phọ Ilaiza aghiilhaan ni Ukueni phọ Jezebel bịn asuma. (1 Ki. 19:1-3) Odị aatughiạn ghan mọ oye o/lho mun dị rakumu aZihova idiphọ oyil, kụ alhoghoma mọ ipẹ odị makumuan bọ i/moọgh emhụ. Ilaiza aḅonyonhu ni azuan dị tutụ aḅẹm mọ onọ amhugh. (1 Ki. 19:4, 10) AZihova o/ghel Ilaiza, angọ ghụn nyodị okuphom owol mọ ogina odị kụ o/lho, mọ odị aḍuomolhoghi iikpọ phọ Enhaạn, ḅilhẹ kẹn mọ odị amoọgh ni iboom arukumuan okumuanhaan odị. AZihova alher ri rurụ anhaghanhạn ogbolhomaam mọ Ilaiza aḅilhẹ angọ nyodị imhoom iiḍighi. (1 Ki. 19:11-16, 18) Yira otuughạ eeghe? Oomo phọ ayira ekạr ekpaariọm ikumor awe phọ, ozoọm ghan iyool phọ aZihova eyoghoyoghọ eten. Mughumọ oye phọ aghaạph raraạr ophin olhoghi obobọ alhoghoma mọ onọ o/kpeanhaạn mun dị aZihova kaḍeenhaan onmạ ighirigiir, ikumor awe phọ omhiigha loor olher rurụ ongọ ipẹ oye phọ kakaạph bọ, kụ ongọ nyodị okuphom owol mọ odị amạn ni maạr esi aZihova.
IKA KỤ IDỊ YIRA KOLOGHOMA ILỌ IYOOL PHỌ ENHAẠN MEPHE BỌ?
15. Odaphạn Jọn 6:39, ika kụ idị aZizọs asighẹ iyool Odẹ phọ odị?
15 AZihova rawạ mọ yira omhoọgh eeghe olhoghoma kụ oghị esi iyool phọ odị mophe bọ? AZizọs uphighinhaan ni iyira emạ eḍeenhaan odạph. Odị alhegheri ni mọ oomo iyool phọ aZihova omoọgh ni maạr oḍighinhom ghisigh Enhaạn, kụ iḍighi kụ aZizọs aḍighi ni oomo ipẹ odị katue bọ omhiịn mọ odị aloghonhaạn ni ḍighaạgh “we Izrạl dị oghịgh iyool igạ dị ephe eten” oḅula aḍighaạgh aZihova. (Mat. 15:24; Luk 19:9, 10) Idiphọ ogey opoghom, aZizọs aḅilhẹ kẹn aḍighi oomo ipẹ odị katue bọ omhiịn mọ odị o/roph r’oniin oyool aZihova.—Bạl Jọn 6:39.
16-17. Ikumor awe phọ kologhoma ika, ilọ ipẹ bidị kologhonhaạn bọ ḍighaạgh buphẹ ophe bọ? (Miịn igbe phọ “ Idị Oyool Lọ Aphe Raloghoma Ghan Eeni Amem.”)
16 Otelhedom mọ aPọl aromha ni ikumor awe ookpomhoghan phọ Efesọs mọ bidị otuughaạny eḍeenhaan phọ aZizọs, mem mọ odị aḅẹm bọ mọ, “ekpeanaạn ni okumuan ghan ologhonaạn aḍighaạgh buphẹ inyaạm mọ i/Io bọ, r’oghiọm ghan ologhi ikpo onhụ Omoọgh-we phọ idiphọ odị r’aIoor odị aḅẹm bọ mọ, ‘Ibo k’Enaạn edianaan buphẹ rongọ bọ epu buphẹ roboọr bọ.’” (Iiḍighi 20:17, 35) Esi aBaibul phọ epẹ phọ eḍeenhaan mọ ikumor awe phọ ḍio arodon omoọgh oḍighi dị amhạn maạr iboom, oḍighi ophogh iyool phọ aZihova. Oniin onyọ umor dị oghol mọ Salvador dị aḍighi okumor oye epẹ Spain aḅẹm mọ, “mem dị mị aatughiạn ipẹ aZihova raḍeenhaan ghan bọ ogbolhomaam iyool phọ odị abuphẹ ophe bọ, r’inyu ghan ni imhị oḍighi oomo ipẹ mị katue bọ olhoghonhaạn aani abidị ḍighaạgh, ḅilhẹ kẹn idiphọ opoghom mị akuphom ni owol mọ aZihova rawạ ni mọ mị upogh aani bidị.”
17 Oomo awe phọ oogholhogh bọ siẹn emhuoghaạph phọ ephẹn, oḍuraan bọ oḍuạ ḍighaạgh aZihova esi ekulha amem, ulhoghonhaạn ni ḍighaạgh oḅilhẹ oḅula esi aZihova. Nyiidiphọ, ibadị dị mophe rowạ ni oḍighi aani iniin phọ. Emhuoghaạph phọ etum bọ siẹn, keeḅeghiọn ni k’anhị k’alhe ipẹ yira kotue bọ ologhonaạn bidị ḍighaạgh oḅula esi aZihova.
AḌUỌR PHỌ 139 See Yourself When All Is New
^ par. 5 Eeghe kụ iḍighi kụ abuniin dị mokumu ni aZihova ibadị asiạ eten dị ekpẹ oḍuomolhoghi oḍuraan bọ oḍuạ siẹn ookpomhoghan phọ? Enhaạn raloghoma ghan ika ilọ abidị? Emhuoghaạph phọ ephẹn phọ eeḅeghiọn ophanyanhaạn asipuru phọ iphẹn phọ. Eḅilhẹ kẹn ekaạph iyaạr dị yira kotue otuughạ esi eten phọ epẹ aZihova alhoghonhaạn bọ ḍighaạgh buniin dị owilhẹ okumu odị esi ekulha amem simem aBaibul phọ.
^ par. 2 IKPO ONHỤ DỊ OGBẠ: Okaaphọm dị maaphoọm pọ oye dị k/ongọ iiḍighi epẹ erugh phọ obobọ k/oghị epẹ erugh phọ esi odiiny unwanyụ obobọ idị epel siphẹ. Ghalhamọ r’iduọn phọ ni, buẹn moophoọm bọ oḍighi ni bumor r’abumarani ayira, ḅilhẹ yira opomhoghiạn ni bidị.
^ par. 4 Iniin asiḍien monmeeghi.
^ par. 10 Emhuoghaạph phọ etum bọ siẹn kekaạph ilọ areten phọ ipẹ ikumor awe phọ kotue bọ ogbariọn radạ phọ iphẹn phọ.
^ par. 60 ILỌ AFOTO: Opoghom olọ Izrạl dị amhoọgh ogbolhomaam oyool odị dị aphe, kakị ni awạ kụ aloghonhaạn ḍighaạgh apạm aḅulolhom siphẹ aḍita ipheriphọ iyool phọ. Abupoghom ḍio arodon roḍighi aani ghan iniin phọ kẹn.
^ par. 64 ILỌ AFOTO: Onyọ umarani dị maaphoọm dị aḍigh moto rawạ oghị esi, amiịn iyạl aBugbaanhaạn dị rongọ ogbaanhaạn esi ogbo r’oḅaạl olhoghi.
