1. Pirang’o Yehova uporere ku mego m’utie ku nyathin ma dhoth?

“NYO wi dhaku copo wil kum nyathin pare ma dhothi?” Eno tie penji ma Yehova upenjo i rundi pa jabila Isaya. I ng’eye, eyero ni dhanu pare kumae: “Wi [dhaku] copo wil, ento wia biwil piri ngo.” (Isa. 49:15) I andha, Yehova beporere ngo akeca ku mego. Re kakeni, ewacu nia etie ve mego. Yehova uwacu nia emaru jutic pare lee dit, tap calu ma mego maru ko nyathin pare. Mego ma pol gitie ku paru ma rom ku pa nyamego Jasmin m’uyero kumae: “Kinde ma nyathin ubedhoth i kor min, eno ketho kindgi doko ceng’ini mandha giku min pi kwo migi zoo.”

2. Yehova winjere nenedi ka jatic pare acel uweke?

² Ka jatic pa Yehova acel uweko nicidho i coko man nirweyo lembanyong’a, Yehova neno lembe maeno. Dong’ kepar nia Yehova copo winjere nenedi kan ebeneno jutic pare ma dupa gibekwio i tipo * kubang’ oro.

3. Yehova ubemito ang’o?

³ Ju ma pol m’i kind umego ku nyimego maeno ma gikwio i tipo, gidog gidwogo kendo i cokiri, man ka gidwogo, wajologi ku yaw yaw. Yehova ubemito gidwogi, wan de wabemito gidwogi. (1 Pet. 2:25) Dong’ wacopo konyogi nenedi kara gidwogi? I wang’ nidwoko wang’ penji maeno, ukwayu wakeng’ei nia pirang’o jumoko gibed gijigo nicidho i coko man nirweyo lembanyong’a.

4. Tic mi kum ukelo matoke ma kani iwi Jukristu wadwa moko?

⁴ Jumoko giweko tic migi mi kum udoko ni lembe ma pire tek lee mandha i kwo migi. Ku lapor, umego Hung * ma kwo i ng’om mir Asia ma yo piny uyero kumae: “Abed atimo tic para mi kum pi saa ma lee mandha, man awodho tego para zoo i tije. Abed aparu paru mi kasegu yor i ia nia kan alony re m’acopo timo ni Yehova cuu. Eno uketho agam amiara nitimo tic para mi kum pi saa ma lee. Acaku koso coko wang’ ma pol; tokcen ne, agam ajigo nicidho dong’ magwei. Ubenen nia Sitani ubetio ku ng’om pi niketho wi dhanu uwil, kara nok nok giwek nitimo ni Mungu.”

5. Peko ma tung’ tung’ ma nyamego mwa moko unwang’ere ko ubedo ku matoke ma kani i wie?

⁵ Umego ku nyimego mwa moko gibenwang’iri ku peko dupa m’ubeturo cwinygi. Nyamego Anne ma tie kud awiya abic, man ma kwo i ng’om mi Grande-Bretagne ukoro kumae: “Nyathin para acel unyolere ku goro ma lee mandha. I ng’eye, jukoyo nyaku para acel kud i cokiri, man woda acel ke wie ucaku remo lee mandha. Lembe maeno ugam uturo cwinya magwei, e ajigo nicidho i coko man nirweyo lembanyong’a. Pieno, agam akwio i tipo.” Watie ku can lee i cwinya i kum Anne ku juruot pare, man i kum jumange bende ma gibenwang’iri ku kit peko ma kumeno!

6. Lembang’o ma copo ketho ng’atini koyere ku dhanu pa Yehova kan ebetio ngo ku juk ma nwang’ere i Jukolosai 3:13?

⁶ Som Jukolosai 3:13. Jutic pa Yehova moko lundo ng’ecwiny umondo i igi ni kum lembe m’umego kunoke nyimego moko mi cokiri utimo igi. Jakwenda Paulo uyero nia andha saa moko, umego kunoke nyamego mwa copo timo iwa gin moko ma ketho wabedo ku ‘lembe i iwa i kume.’ Bende, nyo jugam jutimo iwa lembe i ayi m’atira ngo. Pieno ka wabedo ngo ku wang’wa, lembuno copo royo adegi i iwa. Kan adegi umondo i ng’atini ke, eromo jigo nidikere ku dhanu pa Yehova. Wakewec iwi lapor p’umego Pablo ma kwo i Amerika ma yo piny. Juloko lembe i wie nia etimo lembe moko ma rac, uketho ebayu rwom m’ebino ko i cokiri. Pablo ugam utimo ang’o? Eyero kumae: “Lembuno uroyo ng’ecwiny i ia, e nok nok agam aweko cokiri.”

7. Lembang’o ma romo timo ng’atu ma pidocwiny pare ubesende?

⁷ Ka ng’atini ugam utimo dubo moko ma pek con, pidocwiny pare copo sende pi nindo ma dupa. Eromo paru nia Mungu copo mare ngo nyanok de. Kadok nwang’u dong’ edaru yewo dubo pare man Mungu udaru timo ire kisa de, re asu ecopo paru nia eromo ngo nibedo dhanu pa Mungu. Umego moko ma nyinge Francisco de unwang’ere ku lembe maeno. Ewacu kumae: “Jugam jujuka kinde m’apodho i dubo mi tarwang’. I acaki, akeabed acidho i coko de, re i ng’eye cwinya gam utur. Anwang’u nia aromo ngo nibedo i kind dhanu pa Yehova. Pidocwiny para ubed usenda asu, man anwang’u nia Yehova utimo ngo ira kisa. E nok nok, agam aweko nirweyo lembanyong’a man nicidho i coko.” Lembe m’utimo umego ku nyimego ma waai waweco pigi uketho ibewinjiri nenedi? Nyo kisagi ubenegi de? Ka dong’ Yehova ke ubewinjere nenedi pigi?

8. Nyo wi Yehova uwil pir umego ku nyimego ma gikegitimo ire? Kekor.

⁸ Wi Yehova uwil ungo kud umego ku nyimego ma gikegitimo ire, ma re kawoni giweko nidikiri ku dhanu pare. Wiye uwil ungo bende ku tic ceke ma gitimo ire. (Ebr. 6:10) Jabila  Isaya utio ku lapor moko ma ber mandha m’unyutho kite ma Yehova dieng’ ko ku dhanu pare. Ekiewo kumae: “Ebikwayu udul rombe pare calu jakwac, ebicoko nyithi rombe i bote, man ebiting’ogi i kore.” (Isa. 40:11) Yehova ma tie Jakwac ma dit winjere nenedi kan acel m’i kind rombe pare uwok kud i kind juwagi? Pi ninyutho kite ma Yehova winjere ko, Yesu upenjo julub pare kumae: “Wuparu ang’o? Ka ng’atu acel ubedo ku rombe dak acel, man acel m’i kindgi rwinyo, ebiweko rombe pyer abung’wen wi abung’wen ungo wi gudi, kara ecidh eyeny acel m’urwinyo ca? Andha abewacu iwu, tek enwang’e, mutoro nege i kume masagu mutoro m’ebedo ko kum pyer abung’wen wi abung’wen ma girwinyo ngo.”​—Mat. 18:12, 13, B.L.L.

9. I rundi ma con, jakwac ma cuu ubed udieng’ ku rombe pare nenedi? (Nen cal m’i ng’eye.)

⁹ Pirang’o juporo Yehova ku jakwai rombe? Pilembe i rundi ma con, jakwac ma cuu ubed udieng’ akeca ku rombe pare. Ku lapor, Daudi ugam unyego kud umvor man urudi pi nigwoko rombe pare. (1 Sam. 17:34, 35) Kadok rombe acel kende urwinyo kud i kind juwagi de, jakwac ma ber ng’eyo. (Yoh. 10:3, 14) E eweko rombe pare 99 mange gidong’ agwoka i dwol, kunoke ewekogi i bang’ jukwac wadi kara udong’ unen wigi, en ke ecidho nisayu acel m’urwinyo. Yesu utio ku lapor maeno pi niponjowa ku lemandha ma e ma pire tek: “En e yeny ma Wegwu ma ni i polo yenyo ngo, nia acel m’i kind ju ma thindho maeni urwiny.”​—Mat. 18:14.

10. Nimakere kud Ezekiel 34:11-16, Yehova ung’olo nia ebitimo ang’o ni rombe pare m’urwinyo?

¹⁰ Yehova umaru wan ceke, kadok “ju ma thindho” ma girwinyo kud i kind udul rombe pare. Nikadhu kud i bang’ jabila Ezekiel, Mungu ung’olo nia ebisayu rombe pare m’urwinyo, man ebikonyogi kara winjiri m’i kindgi kude udok kakare. Enyutho lembe m’ebitimo pi nibodhogi; lembe m’enyuthone urombo ku ma jakwac mir Israel ubed utimo ka rombe  pare moko urwinyo. (Som Ezekiel 34:11-16.) Mi kwong’o, jakwac miere pi saa ma lee pi nisayu rombe m’urwinyo. I ng’eye, kan enwang’u rombene, edwoke i kind juwagi. M’umedo maeno, ka rombene unwang’u ret kunoke ka kec ubenege, jakwac ting’e i kore, eweyo kume, etwio wang’ rem pare, man emio ire cam. Judong cokiri ma gitie jukwac mir “udul [rombe] pa Mungu,” de ukwayu gitim kumeno pi nikonyo ju ceke ma giweko nidikiri ku cokiri. (1 Pet. 5:2, 3) Judong cokiri gisayu rombene, gikonyogi nidwogo i kind juwagi, man ginyutho igi mer nwang’u gibekonyogi kara giyik mer m’i kindgi ku Yehova. *

11. Jakwac ma ber ng’eyo lembang’o?

¹¹ Jakwac ma ber ng’eyo nia saa moko rombe copo rwinyo. Pieno ka rombe urwinyo, emio ngo ire matira. Wakenen kite ma Yehova ukonyo ko jutic pare moko mi rundi ma con, ma pi saa moko gigam gitimo tung’ ku lembe m’ekwayu i bang’gi.

12. Yehova utimo ang’o ni Yona?

¹² Yona m’ubino jabila pa Yehova ugam uringo tic ma Yehova umio ire. Re kadok kumeno de, Yehova uol ungo kude. Ento calu jakwac ma ber, Yehova ubodhe man ekonye ninwang’u tego m’etie ku yenyne pi nitimo tic m’emio ire. (Yon. 2:7; 3:1, 2) I ng’eye, Mungu uketho vombo utwii pi nikonyo Yona kara enyang’ nia kwo pa dhanu utie gin ma pire tek. (Yon. 4:10, 11) Lembuno ubemio iwa ponji ma kani? Judong cokiri gicikiri ngo niol pio pio kud umego ku nyimego ma gikwio i tipo. Ento ukwayu gitim tego ninyang’ nia girang’o m’uketho rombe uwok kud i kind juwagi. Kinde ma ka rombene dwogo i bang’ Yehova, gimediri ninyutho ire mer man gidieng’ kude.

13. Lembe ma Yehova utimo ni jagor Zaburi mi 73 ubemio iwa ponji ma kani?

¹³ Cwiny jagor Zaburi mi 73 ugam utur kinde m’eneno jutimrac gibekwo ma ber. Epenjere nia dong’ ebesendere nedi ke nitimo yeny pa Mungu! (Zab. 73:12, 13, 16) Yehova  utimo ang’o? Enene ngo ni ng’atu ma rac, ento eketho jukiewo wec parene i Biblia. I ng’eye jagor Zaburi maeno udog unyang’ nia gin moko mbe acel de i kwo pa ng’atini m’usagu bedo ku mer ma ceng’ini ku Yehova. (Zab. 73:23, 24, 26, 28) Lembuno ubemio iwa ponji ma kani? Judong cokiri gicikiri ngo nipoko lembe pio pio iwi umego kunoke nyamego m’ucaku benwang’u nia bero mi timo ni Yehova umbe. Kakare nipoko lembe i wie, ukwayu judong cokiri gitim kero ninyang’ nia ang’o m’uketho ecaku beparu lembe ma kumeca. Ka gidaru nyang’ ma ber, e gibitio ku Biblia pi nitielo cwinye.

14. Pirang’o Eliya ubedo ku yeny mi kony, man Yehova ukonye nenedi?

¹⁴ Jabila Eliya ugam uringo Yezebel m’ubino ci ubimo. (1 Ub. 19:1-3) Eparu nia i kind jubila pa Yehova zoo edong’ kende, man nia egam esendere de mananu nitimo tic pa Yehova. Cwiny Eliya utur ma rac mandha uketho emito etho cen. (1 Ub. 19:4, 10) Kakare nipoko lembe iwi Eliya, Yehova utielo cwinye nia edong’ ungo kende, nia ebimio ire tego, man nia fodi tic utie lee m’ebitimo. Yehova uwinjo Eliya kilili kinde m’ebekoro ire adieng’acwiny pare, man emio ire tic mange. (1 Ub. 19:11-16, 18) Lembuno ubemio iwa ponji ma kani? Wan ceke, asagane judong cokiri, wacikara ninyutho bero ni rombe pa Yehova. Kadok ng’atini ubekoro ni judong cokiri nia lembe moko uton lee i ie, kunoke ebekoro igi nia Yehova copo timo ngo ire kisa pi dubo moko m’egam etimo, judong cokiri gicikiri niwinje kilili. I ng’eye, gibitimo kero nitielo  cwiny rombe maeno m’urwinyo nia pire tie tek lee i Yehova.

15. Nimakere ku Yohana 6:39, Yesu ubedo ku nen ma kani iwi rombe pa Won?

¹⁵ Yehova ubemito wabed ku nen ma kani iwi rombe pare m’urwinyo? Yesu uweko iwa lapor ma cuu m’ukwayu walubi. Eng’eyo nia Yehova neno rombe pare ceke nia pigi tek i wang’e, pieno eii lee mandha nikonyo “rombe m’urwinyo m’i ot pa Israel” kara gidwog i bang’ Yehova. (Mat. 15:24; Lk. 19:9, 10) Calu ma Yesu tie jakwac ma ber, egam etimo kero pare ceke kara rombe pa Yehova acel de kud urwiny ire.​—Som Yohana 6:39.

16-17. Judong cokiri gicikiri nibedo ku paru ma kani kinde ma gibekonyo rombe m’urwinyo? (Nen sanduku ma thiwie tie, “ Kite ma rombe m’urwinyo copo winjere ko.”)

¹⁶ Jakwenda Paulo ukwayu judong cokiri mir Efeso nia gilub lapor pa Yesu. Ekiewo kumae: “Maku wukony ju ma ng’ic, wupoi de kum lembe pa Rwoth Yesu, nia ewacu en kumae, mio en e mugisa ma sagu gamu.” (Tic. 20:17, 35) Giragora maeno ubenyutho kamaleng’ nia judong cokiri gitie ku tic ma pire tek mandha mi gwoko rombe pa Mungu. Umego Salvador ma tie jadit cokiri i ng’om mi Espagne ukoro kumae: “Kan abeparu pi kite ma Yehova dieng’ ko pi rombe pare m’urwinyo, lembuno cwalu an de nitimo tego para ceke kara akonygi. Calu m’atie jakwac i thenge mi tipo, ang’eyo andhandha nia Yehova ubemito agwok rombe pare.”

¹⁷ Umego ku nyimego ceke ma waai waweco pigi i thiwiwec maeni, ma pi nindo moko gikegijigo nidikiri ku cokiri, ginwang’u kony, man gidwogo i bang’ Yehova. Kawoni ma wabeweco eni de, umego ku nyimego ma dupa ma giweko Yehova gibemito gidwog i bang’e. Thiwiwec m’ulubo bikoro cuu mandha lembe ma wacopo timo pi nikonyogi kara gidwog i bang’ Yehova.