Cacekiwen Lalakaw 25
‘Kakoto ko Mamikilim to Siri Ako’
Kakoto ko mamikilim to siri Ako, misongilaˈ a midimokos camiraan.—ICIKIL 34:11.
RADIW 105 O Olah ko Kawas
KALIMLAAN NO LALAKAW *
1. Hano palinien ni Yihofa ko Niyah to wina hani?
“IRA ko mitawalay a ina to wawa ningra haw? Ira ko caay ka olah to nisofocan ningra a wawa haw?” O mihadakan ni Yihofa to lintaday ni Isaya a Israil tamdaw a salicay konini. Sanay ko dotoc a sowal ni Yihofa: “Ano iraira ko mitawalay a ina to wawa ningra i, caay ko mamatawal Ako kiso.” (Isaya 49:15) Cowa ka rarid ci Yihofa palini to Niyah to wina, kawra toniya sinael, saka dademakan ni Yihofa ko siniˈadaay a olah no wina mitadtad to kaolah Ningra to sikawdan no Niyah. ˈAlomanay a wina malecaday ko harateng to salikaka ci Ciyaseminan, sanay koniya salikaka: “Ano pacoco kiso to wawa, mifekaday ko mikiriwiˈay a olah, o hatiniay a olah padadotocay i hakelong nokaˈorip.”
2. O sikawdan no Kawas ano ecato pirienang to saˈopo ato mitosil, samaan ko piharateng no Kawas hani?
2 O cecay sikawdan no Kawas ano ecato pirienang to saˈopo ato mitosil, masinanotay no Kawas. Haratengen, maˈaraw Ningra to mihecahecaan ˈalomanay ko mihawaday mitosil a sikawdan *, hakowaay ko adada no falocoˈ Ningra!
3. Makalimay ci Yihofa to mihawaday mitosil a salikaka samaan ko demak hani?
3 O ˈalomanay kaolahan ita a salikaka soˈlin na mihawaday a mitosil, miliyas to kasakopang, kawra ikorto patikolay i kasakopang, mahemekay ko ˈalomanay pakaˈaraw cangranan a minokay. Makalimay ci Yihofa patikol i tihi Ningra ko hatiniay a salikaka, kitato malecaday. (1 Pitiro 2:25) Wa ngaˈay kita samaan padama cangranan hani? ˈAyaw no pacaˈof toniya salicay, salakatho kita cipinang to hano mihawad cangra midoko ci Yihofaan.
HANO MIHAWAD KO ROMA TAMDAW MIDOKO CI YIHOFAAN?
4. O roma tamdaw samanay mafiyor no kamawmahan no niyah hani?
4 O roma tamdaw pakidemay misamacay to katayalan no niyah. Itiniay i Tongnanya salikaka ci Ahong * sanay: “Adihayay ko mapalakay ako a toki ato ˈicel i kamawmahan. Tada maapaay kako itiya, ano adihay ko payci, wa ngaˈayto ko pidoko ci Yihofaan saan ko harateng, mansa koˈedawkoˈedaway ko katayalan a toki. Misatapangayto milawa to saˈopo, ikor hawad sanayto micawmaˈ to kasakopang. O hekal ni Satan o mamikalisanga to falocoˈ ita, hato miraay miraayay kita ci Yihofaan.”
5. Cecay fafahiyan salikaka tatootoor sanay ko pasangaray, samanayto ko teloc?
5 O roma salikaka tada adihayay ko malifaay pasangaray, cowato ka tomeseng. Itiniay Ikok ci Anni limaay ko wawa, sanay cingra: “O cecay wawa ako hofochan pakidemay ko samoˈ, ikor mafalahay no kasakopang ko cecay fafahiyan wawa, o cecay wawa ciadadaay tono singki adada. Tada masomaday kako, cowato ka sapisaˈopoaw ato mitosil, salikor hawad sanayto micawmaˈ to kasakopang.” O roma salikaka malecaday ci Anniay ato paro no lomaˈ ningra, tatootoor sanay ko pasangaray, tada siniˈadaay kita to malifaay nangra.
6. O tamdaw ano caka pidoedo to limoˈot no Kolosay 3:13, hano mamiliyas to finawlan no Kawas alatek?
6 ˈOsien ko Kolosay 3:13. O roma salikaka pakayniay kararaw no tao a madokaˈ. Sowal no tarokos ci Pawlo latekay ‘iraay ko katatiihan to tao.’ Roma i, cowa ka sadafdaf ko macadaay ita alatek. Ano caka pinaˈon kita, wa kaketer saan, telocto miliyas to finawlan no Kawas. Nengnengen ko tinakoan no itiniay Katimol Amilika ci Papolo. Na mapakokotay cingra, orato malahdaway ko toki matayal i kasakopang. Samanay ko harateng ningra hani? Sanay: “Tada maketeray kako, ikorto palidlid sanay a miliyas to kasakopang.”
7. Pakidem ko katoled no falocoˈ samanay mifiyor to tamdaw hani?
7 Cecay tamdaw wa pakayni pakidemay raraw i salakat padadotoc a matoled ko falocoˈ, awaay ko tatodong no niyah malo finawlan no Kawas saan miharateng. Cecay faˈinayan salikaka ci Franciske mahaenay ko harateng, sanay cingra: “Samanen madadiˈiyay kako to tao marikecay no kasakopang. Soˈlin satapang aca misarocoday kako mirienang to saˈopo, kawra ikorto tada matoleday kako, awaay ko tatodong malacafay to finawlan no Kawas sanay miharateng. Tangongolay ko raraw ako, cowa ko sasododen ni Yihofa saan miharateng. Ikor, sawad sanayto kako a micawmaˈ to kasakopang.” ˈAlomanay salikaka tahalifaay to hatiniay pakayraan, wa samaan ko pinengneng iso cangranan hani? Wa siniˈada kiso cangranan han? Sakakaay i, wa samaan ko pinengneng ni Yihofa cangranan hani?
TANGONGOLAY KO OLAH NI YIHOFA TO LOPAYˈAY SIRI NINGRA
O pakaenay no Israil tada ciharatengay to moraraway a lopayˈay siri (Nengnengen ko 8-9 fatac) *
8. Wa mapawan ci Yihofa toya mihawaday mitosil a tamdaw han? Tadtaden.
8 Cowa ko mamapawan ci Yihofa to mihawaday mitosil a tamdaw, cowa ko mamapawan to nano demak nangra i Cingranan i salakat. (Hipray 6:10) Misaka dademakan ni Isaya ko mitemeray to falocoˈ a sapatinako mitadtad to maolahay ci Yihofa to finawlan Ningra, sanay cingra: “O mamatiya o pidipot no pakaenay to masafelaway a siri ko nipidipot no Kawas to finawlan Ningra. O sasaˈopoen Ningra ko tofor a siri a miˈafofo.” (Isaya 40:11) O kasapaan a pakaenay ci Yihofa, ano miliyas ko cecay siri Ningra to masafelaway siri, wa samaan ko harateng Ningra hani? Pasowalan ni Yis ko nisawawaan to nafalocoˈan ni Yihofa, sanay cingra: ‘Samaan ko harateng namo? Ano ira ko cisiriay to semoˈot a siri i, ano moraraw ko cecay nonini, caay ka siday han Ningra itira i lotok koya 99 a siri, ta tayra a mikilim toya cecay a moraraway a siri? Sowalen Ako kamo, ano makilim ningra konini a siri i, ikaka no lipahak ningra a miharateng toya 99 a caay ka moraraw a siri.’— Matay 18:12, 13.
9. O ngaˈayay pakaenay samanay midimokos to lopayˈay siri? (Nengnengen ko potalay coka)
9 Palinien ci Yihofa to pakaenay tamdaw hano matatodongay hani? Samanen o ngaˈayay pakaenay tada ciharatengay to lopayˈay siri no niyah. Tinakoen, pakayni sapidipotaw to siri na mipatayay ci Tafiti to layong ato tomay. (1 Samuil 17:34, 35) Ano moraraw ko cecay siri, maedeng mafanaˈay ko ngaˈayay pakaenay. (Yohani 10:3, 14) O mahaenay a pakaenay wa terek han koya 99 cowa ka moraraw a siri i kasafelaw no siri ato papihimaw to roma pakaenay, ikor mikilim toya moraraway a siri. Saka dademakan ni Yis koniya sapatinako mitadtad to cecay kalimlaan a kimad, ci Yihofa ‘caay kaolah malaˈafo ko cecay misapoeneray a tamdaw.’—Matay 18:14.
Nolitengan a pakaenay no Israil ciharatengay ato midimokosay to na moraraway a lopayˈay siri (Nengnengen ko 9 fatac)
MIKILIMAY CI YIHOFA TO LOPAYˈAY SIRI NINGRA
10. Pakayni Icikil 34:11-16, mikiˈokay ci Yihofa samaan Cingra padama to moraraway a lopayˈay siri hani?
10 Tangongolay ko olah ni Yihofa kitaanan o kahacecay tamdaw, mahawpay ko miliyasay to cecay liyad to kasakopang a salikaka. Itini Icikil, mikiˈokay ko Kawas to Cingra ko mamikilim to moraraway a lopayˈay siri, padama cangraanan miliyaw a malawidang Cingraanan. Ihkalay ko pitadtad Ningra to sasamaan Cingra malecad o pakaenay a mikilim to lopayˈay siri, milidong to finawlan Ningra. (ˈOsien ko Icikil 34:11-16.) Salakat, ano hakowato ko mapalakay a toki ato ˈicel, talacowacowaay ko pakaenay a mikilim to moraraway a lopayˈay siri. Dotoc, mahela no pakaenay ko lopayˈay siri i, panokayan i masafelaway a siri. Ano madokaˈay ko lopayˈay siri anca macahiway, wa damsay ko pakaenay a midimokos ciraan, padama a mitafo to dokaˈ, miˈafofo i falohang, pacoma ciranan to kakaenen. O malohemay malitengay o midimokosay to siri no Kawas a pakaenay, o tatano malecaday a waywayan ko pipadama nangra toya miliyasay to cecay liyad to kasakopang a salikaka. (1 Pitiro 5:2, 3) O kakilimen no malohemay malitengay cangra, mikayat cangranan minokay i kasakopang, halo padama cangranan miliyaw a malawidang ni Yihofa, ho macada nangra ko kaciharateng ato olah. *
11. Cipinangay ko ngaˈayay a pakaenay to maanan hani?
11 Cipinangay ko ngaˈayay a pakaenay, moraraway ko lopayˈay siri nolatekay. Mihaenay, ano moraraw ko lopayˈay siri, cowa ko papakidem ko pisayfang no pakaenay ciraan. Itini nolitengan, o roma sikawdan ni Yihofa na cowa pidoedo to saali Ningra a midemak, nengnengen samanay ci Yihofa padama cangranan.
12. Samanay ko picada ni Yihofa ci Yonaan?
12 O pairasolay ci Yona cowa picada to sapatorod ni Yihofa cingranan a ˈinorong, ao milaliway cingra. Kawra, cowa ka sawaden ni Yihofa cingra. Mahecaday o ngaˈayay a pakaenay, milidongan ni Yihofa ci Yona, halo pafeli to ˈicel cingranan milaheci to ˈinorong. (Yona 2:7; 3:1, 2) Ikorto, misakadademakan ni Yihofa ko sapatinako no katawaay padama ci Yonaan a cipinang, o ˈorip no cecacecay a tamdaw o masaka limlaan. (Yona 4:10, 11) O manan ko mananamay ita hani? O malohemay malitengay cowa ko mamisawad to mihawaday mitosil a salikaka, ao mamisaˈicel cipinang to hano mahaen ko demak nangra. Ano patikol cangra itihi ni Yihofa, o malohemay malitengay wa padadotoc a ciharateng ato midimokos cangranan.
13. Mikitini picada ni Yihofa to mitiliday to ˈOlic a pakayraan, wa ngaˈay mananam ita ko maanan?
13 Maˈaraw no mitiliday to ˈOlic saka 73 fedengan sinowayay ko kaˈorip no tatiihay tamdaw i, tada matoleday ko falocoˈ, mitoor to saali no Kawas a maˈorip awaay ko epoc sanay ko harateng. (ˈOlic 73:12, 13, 16) Samanay ko picada ni Yihofa toniya mitiliday hani? Cowa ka kapoˈiyen Ningra cingra, mitilidanho ko sowal ningra i Fangcalay Cudad. Ikorto, mahapinangay noniya mitiliday, o kalawidang noniyah aci Yihofa ko sakakaay ciepoc i nokaˈorip. (ˈOlic 73:23, 24, 26, 28) Mananamay ita ko maanan hani? Ano ira ko salikaka cisasaay to ciepocay ko pidoko to Kawas hokira, aka tangsol ko malohemay malitengay a mikapoˈi cangranan, o sasarocoden a cipinang to hano mahaen ko harateng nangra. Edengan mihaen ko demak, ngaˈ makilim no malohemay malitengay ko matatodongay a sinael pakalalok cangranan.
14. Hano misaali ci Iliya to sapadama? Samanay ci Yihofa padama ci Iliyaan?
14 Matalaway ci Iliya patayen ni Yicipil, milaliway cingra. (1 Hongti 19:1-3) Harateng ningra edenganto cingra cecay ko pairasolay ni Yihofa, awaay ko epoc no tayal no niyah sanay cingra miharateng. Tada matoleday ci Iliya, sakapatayaw sanay. (1 Hongti 19:4, 10) Cowa ka kapoˈiyen ni Yihofa ci Iliya, ao mikiˈokay cingraanan, cowa ko cecayay aca cingra, o taˈangayay ˈicel no Kawas, o papadama cingraanan, hanaca adihayayho ko tayal mitalaay cingraanan. Mihadidiay ci Yihofa mitengil to nafalocoˈan ningra, pafeli cingranan to faelohay ˈinorong. (1 Hongti 19:11-16, 18) Mananamay ita ko maanan? Kita maemin, mikiriwiˈay ko malohemay malitengay, o caciharateng to sikawdan ni Yihofa. Ano caka rihaday ko cecay tamdaw, anca awaay ko tatodong no niyah micada to sasodod no Kawas saan miharateng, o mamihadidi ko malohemay malitengay a mitengil to nafalocoˈan ningra, ikorto misarocod a padama cingranan mihapinang, misaaretengay ci Yihofa minengneng cingraanan.
SASAMAAN KO PINENGNENG ITA TO MORARAWAY A LOPAYˈAY SIRI NO KAWAS?
15. Mikitini Yohani 6:39, samanay ko pinengneng ni Yis to lopayˈay siri no kakarayan Wama hani?
15 Tokel ni Yihofa kitaanan samaan ko pinengneng to moraraway a lopayˈay siri Ningra hani? Patirengay ci Yis to taˈarawan ita, mafanaˈay cingra to misalimlaan ni Yihofa ko kahacecay no siri, mansa misarocod ci Yis a padama to ‘moraraway a lopayˈay siri no finacadan no Israil’ minokay i tatihi ni Yihofa. (Matay 15:24; Luka 19:9, 10) O ngaˈayay a pakaenay ci Yis, misarocoday cingra hoeca ka malahdaw ko cecacecay a siri ni Yihofa.—ˈOsien ko Yohani 6:39.
16-17. Pakayni sapadamaaw to moraraway a lopayˈay siri, o malohemay malitengay pairaen ko masamanay a waywayan hani? (Nengnengen ko sapatongal lalakaw “ Nafalocoˈan no Moraraway a Lopayˈay Siri.”)
16 Palimoˈotan no tarokos ci Pawlo ko Ifisoay a malohemay malitengay mitodong ci Yisan. Sanay ci Pawlo: “Papadamaen ko malonayay a tamdaw, haratengen ko sowal ni Yis, sanay: ‘O paladaˈay ikakaay ko hemek to milayapay.’” (Dmak 20:17, 35) Mitadtaday koniya sinael, iraay ko ˈinorong no malohemay malitengay midimokos to finawlan no Kawas. Cecay itiniay Sipanya malohemay malitengay ci Saewato, sanay: “Maharateng ako tada ciharatengay ci Yihofa to moraraway a lopayˈay siri Ningra, makalimay sapadamaaw cangraanan. Mafanaˈay kako mitokelay ci Yihofa takowanan misongilaˈ a midimokos cangraanan.”
17 O masowalay noniya lalakaw a mihawaday mitosil a salikaka, ikorto minokayay i tatihi ni Yihofa. Nohatini, ˈalomanay miliyasay ci Yihofaan a salikaka makalimay sapiliyawaw miingid Cingraanan. Dotoc a lalakaw wa misongilaˈ a milengo, wa ngaˈay kita samaan padama cangraanan.
RADIW 134 Nengnengen, Kiso ato Kako Faelohayto ko Kihecod
^ 5段 Roma tamdaw na halafinayto madimadi midoko ci Yihofaan, kawra ikorto miliyasay to kasakopang, hano mahaen hani? Samanay ko piharateng ni Yihofa cangranan hani? Oniya lalakaw wa pacaˈof toniya salicay. Wa milengoho ko lalakaw, samanay ci Yihofa padama to nolitengan na miliyasay Cingraanan a sikawdan, ato o maanan ko mamananam ita tonini.
^ 2段 SAPITADTAD A SOWAL: Cecay mihawaday mitosil a tamdaw o mataˈlifay ko 6 folad cowa pihadak to sahokok mitosil a tamdaw. Kawra, o mihawaday mitosil a tamdaw kamayan o salikaka ita, kamayanho a maolah kita cangraanan.
^ 4段 Mifalican ko ngangan no tamdaw itini toni lalakaw.
^ 10段 Dotoc a lalakaw wa mitadtad to samaan ko malohemay malitengay a midemak.
^ 60段 TATODONG NO COKA: O pakaenay no Israil ciharatengay to moraraway a lopayˈay siri, misarocoday cingra mikilim toniya siri, panokay i masafelaway a siri. Anini, malecaday ko pakaenay no kasakopang.
^ 64段 TATODONG NO COKA: O cecay mihawaday mitosil a fafahiyan salikaka mitalaay to faso, maˈaraway ko tatosa salikaka matawaay ko pising, itini kaˈalomanan a misawacay.
