STADI 25
“Bambae Mi Go Lukaot Ol Sipsip Blong Mi”
“Bambae mi go lukaot ol sipsip blong mi gogo mi faenem olgeta, mo bambae mi stap lukaot gud long olgeta.”—ESIK. 34:11.
SINGSING 105 “God i Stamba Blong Lav”
BIGFALA TINGTING *
1. ?From wanem Jehova i talem se hem i olsem wan mama?
‘?OLSEM WANEM? ?Woman i save fogetem pikinini blong hem?’ Jehova i askem kwestin ya long taem blong profet Aesea. God i talem long ol man blong hem se: “Maet i gat woman we i save mekem olsem, be mi bambae mi no save mekem olsem long yufala samtaem.” (Aes. 49:15) I no plante taem we God i talem se hem i olsem wan mama. Be long taem ya, hem i tokbaot lav we mama i gat long pikinini blong hem, blong soemaot olsem wanem hem i lavem ol man blong hem. Ol mama oli agri wetem samting we wan sista, nem blong hem Jasmin, i talem. Hem i talem se taem yu gat wan pikinini, “yu gat wan spesel lav long hem we bambae i stap olwe.”
2. ?Jehova i harem olsem wanem taem wan pikinini blong hem i gowe long hem?
2 Nating se wan nomo long ol man blong Jehova i no moa joen long kongregesen mo i no moa prij, * be Jehova i luk. Tingbaot olsem wanem hem i mas harem nogud taem hem i luk we evri yia, plante taosen man blong hem oli gowe long hem.
3. ?Wanem samting we Jehova i wantem?
3 Plante gudfala brata mo sista we oli no moa joen long kongregesen, biaen oli kambak. !Mo yumi glad tumas blong welkamem olgeta! Jehova i wantem se oli kambak long hem, mo yumi tu yumi wantem olsem. (1 Pita 2:25) ?Olsem wanem blong givhan long olgeta? Bifo we yumi ansarem kwestin ya, i gud yumi tokbaot from wanem oli no moa joen long kongregesen.
?FROM WANEM SAMFALA OLI NO MOA WOSIPIM JEHOVA?
4. ?Wok blong winim mane i mekem wanem long sam brata mo sista?
4 Sam brata mo sista oli letem wok blong winim mane i kam moa impoten i bitim ol narafala samting. Wan brata long Saotis Esia, nem blong hem Hung, * i talem se: “Mi spenem tumas taem long wok blong mi. Mi gat wan krangke tingting se, sipos mi gat moa mane, bambae mi mekem moa long wok blong Jehova. Taswe mi wok bitim mak. Sloslo mi no moa go long miting. Setan i stap yusum wol ya blong pulum yumi sloslo, nao yumi gowe long God.”
5. Taem wan sista i kasem plante problem, ?hem i mekem wanem?
5 Sam brata mo sista oli kasem plante problem. An we i stap long Inglan mo i gat faef pikinini, i talem se: “Wan pikinini blong mi i handikap taem hem i bon. Kongregesen i putumaot gel blong mi, mo wan boe blong mi i kasem wan sik long tingting blong hem. Mi harem nogud tumas, tingting blong mi i foldaon, nao mi lego ol miting mo wok blong prij. Sloslo, mi no moa joen long kongregesen.” Yumi sore tumas long An mo famle blong hem, mo ol narafala tu we oli fesem plante problem olsem.
6. Sipos yumi no folem Kolosi 3:13, ?wanem i save hapen?
6 Ridim Kolosi 3:13. Sam man blong Jehova oli harem nogud from we wan long kongregesen i spolem olgeta. Aposol Pol i talem se samtaem yumi save “gat poen agens” long wan brata o sista we i mekem i no stret long yumi. Sipos yumi no lukaot gud, yumi save kam kros, mo sloslo, yumi save gowe long kongregesen. Traem tingbaot samting we i hapen long Pablo, wan brata long Saot Amerika. Wan narafala i giaman se hem i mekem wan nogud samting, nao Pablo i lusum wok blong hem long kongregesen. ?Biaen, wanem i hapen? Hem i talem se: “Mi kam kros, mo sloslo mi lego kongregesen.”
7. ?Wanem i save hapen long wan brata o sista sipos tingting blong hem i stikim hem longtaem?
7 Taem wan brata o sista i mekem wan bigfala sin, tingting blong hem i save stikim hem longtaem. Hem i save harem se God i no moa lavem hem. Nating se hem i tanem tingting blong hem, maet hem i harem yet se hem i nogud, mo i no stret we hem i stap wetem ol man blong God. Wan brata we nem blong hem Fransisko, i harem olsem. Hem i talem se: “Ol elda oli stretem mi from we mi mekem doti fasin blong seks. Fastaem mi gohed blong joen long ol miting, be tingting blong mi i foldaon, mo mi harem se i no stret blong mi joen wetem ol man blong Jehova. Tingting blong mi i stap stikim mi, mo mi ting se Jehova i no save fogivim mi. Biaen, mi no moa prij mo mi lego ol miting.” ?Wanem tingting blong yu long ol brata mo sista we oli fesem ol trabol we yumi tokbaot finis? ?Yu yu kasem save long filing blong olgeta? Samting we i moa impoten se, ?wanem tingting blong Jehova long olgeta?
JEHOVA I LAVEM OL SIPSIP BLONG HEM
Man blong lukaot long sipsip long Isrel, i wari bigwan long sipsip we i lus(Haf 8-9) *
8. ?Jehova i fogetem olgeta we oli no moa mekem wok blong hem? Eksplenem.
8 Jehova i no save fogetem olgeta we oli no moa mekem wok blong hem. Mo tu, hem i no save fogetem ol wok we oli mekem bifo. (Hib. 6:10) Profet Aesea i raetemdaon wan gudfala pijatok blong soemaot olsem wanem Jehova i kea long ol man blong hem, i se: “Hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Man olsem i stap holem ol pikinini blong sipsip, i stap karem olgeta i kam wanples.” (Aes. 40:11) ?Bigfala Man Blong Lukaot Long Sipsip i harem olsem wanem taem wan sipsip blong hem i lus? Jisas i tokbaot filing blong Jehova, taem hem i talem long ol disaepol blong hem se: “Sipos wan man i gat wan handred sipsip blong hem, mo wan long olgeta i lus, ?yufala i no ting se bambae hem i livim ol naenti naen sipsip ya long hil, nao i go lukaot hemia we i lus? Mi talem tru long yufala, sipos hem i faenem, bambae hem i glad moa long sipsip ya i bitim we hem i glad long ol naenti naen sipsip we oli no lus.”—Mat. 18:12,13.
9. ?Wan gudfala man blong lukaot long sipsip long taem bifo, i mekem olsem wanem long ol sipsip blong hem? (Yu luk pija long fran pej.)
9 ?I stret blong talem se Jehova i olsem man blong lukaot long sipsip? Yes, wan man blong lukaot long sipsip long taem bifo i kea gud long ol sipsip blong hem. Deved i faet wetem wan laeon mo wan bea blong protektem ol sipsip blong hem. (1 Saml. 17:34, 35) Wan gudfala man blong lukaot long sipsip bambae i luksave sipos wan sipsip i lus. (Jon 10:3, 14) Bambae hem i lego 99 narafala sipsip oli stap sef long yad o long han blong narafala, nao hem i go lukaot sipsip we i lus. Jisas i yusum pijatok ya blong tijim yumi long wan impoten trutok, i se: “Papa blong mi long heven i no wantem se wan long ol smolwan ya i lus.”—Mat. 18:14.
Man blong lukaot long sipsip long Isrel i wari long sipsip we i lus (Haf 9)
JEHOVA I LUKAOT OL SIPSIP BLONG HEM
10. Folem Esikel 34:11-16, ?Jehova i promes blong mekem wanem?
10 Jehova i lavem yumi wanwan, wetem “ol smolwan ya” tu we oli lus. Folem profet tok blong Esikel, God i promes blong lukaot ol sipsip we oli lus, mo givhan long olgeta blong oli fren gud bakegen wetem hem. Mo hem i talem ol samting we bambae hem i mekem blong sevem olgeta. Hemia ol semfala samting we ol man blong lukaot long sipsip long Isrel bifo oli mekem. (Ridim Esikel 34:11-16.) Fastaem, oli go lukaot sipsip we i lus. Hemia i tekem taem mo i hadwok tu. Taem oli faenem, oli karem i kam blong i joen wetem ol narafala sipsip bakegen. Mo tu, sipos sipsip ya i gat kil mo i hanggri, oli fasem ol soa blong hem, karem hem, mo fidim hem. Ol elda we oli man blong lukaot long ‘ol sipsip blong God,’ oli mekem sem mak long olgeta we oli gowe long kongregesen. (1 Pita 5:2, 3) Oli lukaot olgeta, oli givhan long olgeta blong oli joen bakegen long kongregesen, mo oli soemaot lav blong sapotem olgeta taem oli stap kambak. *
11. ?Wan gudfala man blong lukaot long sipsip i save wanem?
11 Wan gudfala man blong lukaot long sipsip i save se maet sam sipsip oli lusum rod. Be sipos i olsem, hem i no panisim olgeta. Traem tingbaot fasin blong Jehova taem hem i halpem sam man blong hem, blong oli kambak long hem.
12. ?Jehova i givhan olsem wanem long Jona?
12 Profet Jona i ronwe long wok we Jehova i givim long hem. Be Jehova i no lego hem. Olsem wan gudfala man blong lukaot long sipsip, Jehova i sevem hem mo i halpem hem blong i kam strong bakegen mo i finisim wok blong hem. (Jona 2:7; 3:1, 2) Biaen, God i yusum wan kasroel tri, blong mekem Jona i kasem save se laef blong ol man i impoten. (Jona 4:10, 11) ?Yumi lanem wanem? Ol elda oli no mas kwik blong lego olgeta we oli no moa joen long kongregesen. Be oli mas traehad blong kasem save from wanem oli gowe. Taem oli kambak long Jehova, ol elda oli gohed blong soemaot lav mo kea gud long olgeta.
13. ?Fasin we Jehova i mekem long man blong raetem Sam 73, i tijim yumi long wanem?
13 Taem man blong raetem Sam 73 i luk se ol rabis man oli stap win long laef blong olgeta, tingting blong hem i foldaon. Hem i ting se i blong nating nomo we hem i stap mekem samting we God i wantem. (Sam 73:12, 13, 16) ?Jehova i mekem wanem? Hem i no jajem man ya, be hem i putum ol toktok blong man ya long Baebol. Sloslo, man we i raetem Sam ya i luksave se i no gat wan samting we i gud moa, i bitim we hem i fren gud wetem Jehova. (Sam 73:23, 24, 26, 28) ?Yumi lanem wanem? Ol elda oli no mas jajem wan brata o sista we i ting se i blong nating nomo we hem i wosipim Jehova. Oli mas traem kasem save from wanem hem i tingting olsem. Nao oli save yusum ol stret vas blong Baebol blong leftemap tingting blong hem.
14. ?Wanem i hapen long Elaeja, mo olsem wanem Jehova i halpem hem?
14 Profet Elaeja i ronwe, from we hem i fraet long Kwin Jesebel. (1 King 19:1-3) Hem i ting se i no gat wan narafala profet blong Jehova long taem ya. Mo hem i harem se i blong nating nomo we hem i wok had. Tingting blong hem i foldaon mo hem i wantem ded nomo. (1 King 19:4, 10) Be Jehova i no jajem Elaeja. Hem i mekem tingting blong Elaeja i strong, i talem se i no hem nomo we i stap mekem wok blong profet. Hem i talem se Elaeja i save trastem paoa blong hem, mo i talem tu se hem i gat plante moa wok yet blong givim long Elaeja. Jehova i kaen long hem, i lesin long ol wari blong hem, mo i givim sam niufala wok long hem. (1 King 19:11-16, 18) ?Yumi lanem wanem? Yumi evriwan, antap moa ol elda, yumi mas kaen long ol man blong Jehova. Taem wan sipsip we i lus i talemaot evri samting long hat blong hem, ol elda oli mas lesin gud, nating se hem i tok kros o i ting se i no stret we Jehova i sore long hem. Afta, oli mas givhan long hem, blong i kasem save se Jehova i lavem hem.
?YUMI MAS GAT WANEM TINGTING LONG SIPSIP WE I LUS?
15. Folem Jon 6:39, ?wanem tingting we Jisas i gat long ol sipsip blong Papa blong hem?
15 ?Jehova i wantem se yumi gat wanem tingting long sipsip we i lus? Jisas i soemaot gudfala eksampol long yumi. Hem i save se long tingting blong Jehova, evri sipsip i impoten. Taswe Jisas i traehad blong halpem ‘ol sipsip long ol laen blong Isrel,’ blong oli kambak long Jehova. (Mat. 15:24; Luk 19:9, 10) Jisas i gudfala man blong lukaot long sipsip, taswe hem i no wantem se wan sipsip blong Jehova i lus.—Ridim Jon 6:39.
16-17. ?Wanem tingting we ol elda oli mas gat long olgeta we oli lusum rod? (Yu luk bokis ya “ ?Sipsip We i Lus i Harem Olsem Wanem?”)
16 Aposol Pol i pulum ol elda long Efesas, blong oli folem fasin blong Jisas, i se: ‘Yufala i mas givhan long olgeta we oli no strong. Mo yufala i mas stap tingbaot tok ya we Masta Jisas i talem, se: “Man i harem gud moa taem hem i givim samting long narafala, i bitim we hem i kasem samting.”’ (Wok 20:17, 35) I klia se ol elda oli gat wan impoten wok blong mekem tede. Wan elda long Spen, nem blong hem Salvado, i talem se: “Taem mi tingbaot olsem wanem Jehova i lavem ol sipsip blong hem we oli lus, mi harem se mi wantem mekem evri samting we mi naf blong mekem, blong givhan long olgeta. Mi mi save se Jehova i wantem we mi lukaot gud long ol sipsip blong hem.”
17 Ol brata mo sista we yumi tokbaot long stadi ya, oli gowe long Jehova be oli kasem help blong kambak. Mo i gat plante moa yet we oli wantem mekem sem mak. Long nekis stadi, bambae yumi tokbaot ol samting we yumi save mekem blong halpem olgeta.
SINGSING 139 Yu Tingbaot Laef Long Niufala Wol
^ par. 5 ?From wanem samfala we oli mekem wok blong Jehova plante yia finis, oli no moa joen long kongregesen? ?Wanem tingting blong God long olgeta? Long stadi ya, bambae yumi tokbaot ansa blong tufala kwestin ya. Mo tu, bambae yumi tokbaot olsem wanem Jehova i givhan long sam man blong hem long taem bifo we oli gowe long hem, mo samting we yumi lanem from.
^ par. 2 MINING BLONG TOKTOK: Yumi stap tokbaot ol pablisa we oli no moa joen long kongregesen o prij blong bitim sikis manis. Olgeta oli brata mo sista blong yumi yet, mo yumi lavem olgeta.
^ par. 4 Mifala i jenisim sam nem.
^ par. 10 Long nekis stadi, bambae yumi tokbaot olsem wanem ol elda oli mekem trifala samting ya.
^ par. 60 PIJA: Man blong lukaot long sipsip long Isrel i wari long sipsip we i lus, i lukaot hem, mo i halpem hem blong i joen bakegen wetem ol narafala sipsip. Tede, ol elda oli mekem sem mak.
^ par. 64 PIJA:Wan sista we i no moa joen long kongregesen i stap wet blong bas i aot, nao hem i luk tu Witnes we tufala i prij long pablik ples
