1. Mase ipausih Jahowa diri-Ni songon sada inang?

“MINTOR tarhalupahon puang-puang ma anakni na inuman?” Ai ma na ongga isungkun Jahowa marhitei nabi Jesaya. “Porini pe tarhalupahonsi sidea, anggo Ahu seng tarhalupahon Ahu ho,” Nini Naibata hubani juakjuak-Ni. (Jes. 49:15) Hassi pe lang gati ipausih Jahowa diri-Ni songon sada inang, tapi ibahen Ia do sonai ase ibotoh juakjuak-Ni holong tumang do uhur-Ni bani sidea. Tontu bahat do inang na sarupa pangahapni songon sada botou na margoran si Jasmin na mangkatahon, “Holong tumang do uhur ni sada inang bani dakdanakni sanggah painumkonsi.”

2. Sonaha ma pangahap ni Jahowa anggo adong sada niombah-Ni na mandaoh hum Bani?

² Ipardiateihon Jahowa do anggo adong sada niombah-Ni na lang be marbarita ampa martumpu. Tiap tahun, dong marribu juakjuak-Ni na lang aktif. * Tontu pusok tumang uhur-Ni mangidah ai.

3. Aha do harosuh ni Jahowa?

³ Sihol do Jahowa ase sanina botounta na lang aktif roh use martumpu. Ai do homa harosuhta. Tontu malas uhurta anggo ibahen sidea sonai! (1 Ptr. 2:25) Tapi, dong ope sanina botou na lape mulak. Sonaha hita boi mangurupi sidea? Paima ibalosi hita sungkun-sungkun ai, ulas hita ma lobei aha do na mambahen sidea lang be marbarita anjaha martumpu.

4. Sonaha ma ujungni anggo parhorjaan na gabe sipontingan ibagas goluhta?

⁴ Dong piga-piga sanina botou na mambahen parhorjaan gabe sipontingan. Si Hung, * sada sanina na tading i Asia mangkatahon, “Bahat do bois gogoh ampa panorangku laho marhorja. Huagan do anggo bahat duitku gabe boi ma ahu lambin ringgas mangidangi Jahowa. Jadi, gati ma ahu lembur. Halani ai, ra do salisali lang martumpu ahu. Tapi ujungni lang be martumpu ahu. Igunahon Sibolis do hape dunia on laho padaohkon halak humbani Naibata.”

5. Gabe sonaha ma sada botou halani borat sitarononni?

⁵ Dong piga-piga sanina botou na maretek ni uhur halani borat ni sitarononni. Si Anna hun Inggris, lima niombahni. Ia mansaritahon, “Sada anakku cacat humbani tubuh. Dob ai, dong borungku na ipecat, anjaha dong anakku na gabe podouan. Halani pusok tumang uhurhu, lang be marbarita ampa martumpu ahu. Ujungni, lang be aktif ahu.” Tontu holong atei mangidah si Anna pakon kaluargani, sonai homa sanina botounta na sonai sitarononni.

6. Sonaha ma ujungni anggo sasahalak lang mandalankon podah na dong bani Kolosse 3:13?

⁶ Basa Kolosse 3:13. Apostel Paulus mambotoh sipata ra do borit uhurta halani pambahenan ni sanina botou i kuria. Ra do adong na mambahen na lang adil hubanta. Anggo totap borit uhurta, ra do gabe mardomdom hita. Ujungni, gabe mandaoh ma hita humbani Jahowa ampa sanina botou. Pardiateihon ma pangalaman ni si Pablo, sanina hun Amerika Selatan. Dong halak na mangkatahon anggo si Pablo domma mangkorjahon na lepak. Hape lang dong ibahen ia sonai. Tapi porsaya do sintua janah ipinsang ma ia. Sonaha pangahap ni si Pablo? Ia mangkatahon, “Manggila ma ahu. Ujungni, gabe mandaoh do ahu hun kuria.”

7. Sonaha ma ujungni anggo lalab ganggu panggora ni uhur ni sasahalak?

⁷ Halak na ongga mangkorjahon dousa, ra do lalab ganggu panggora ni uhurni. Ra do pangahapni lang be ihaholongi Naibata ia. Hassi pe domma mambahen hamubahon janah domma isalpuhon hasalahanni ai, ra do ninuhurni lang be sosok ia gabe juakjuak ni Naibata. Sonai ma pangahapni si Fransisko. Ia mangkatahon, “Ongga do ahu ipinsang halani mangkorjahon parriah-riahon. Mungkahni, totap do ahu martumpu. Tapi, lalab do ganggu panggora ni uhurhu. Huahap lang sosok ahu marsaor pakon sanina botou, janah lang ra Jahowa manasap hasalahanku. Ujungni, lang be marbarita ampa martumpu ahu.” Jadi, sonai ma situasi ni piga-piga hasomanta. Ai holong do uhur ni nasiam bani sidea? Na sipontingan, sonaha ma pangahap ni Jahowa mangidah sidea?

8. Ai ihalupahon Jahowa do juakjuak-Ni na lang aktif? Patorang.

⁸ Lang ihalupahon Jahowa juakjuak-Ni na lang aktif. Sai idingat Ia do pambahenan ni sidea ibagas pangidangion. (Heb. 6:10) Ibahen nabi Jesaya ma sada limbaga laho patuduhkon isarihon  Jahowa do juak-juak-Ni. Nini do, “Parmahanon-Ni do hulanan-Ni songon parmahan, marhitei tangan-Ni ipatumpu sidea; iusung do anak ni biribiri ibagas abingan-Ni.” (Jes. 40:11) Sonaha ma pangahap ni Naibata anggo adong juakjuak-Ni na lang aktif? Ipatugah Jesus do hubani susianni sonaha pangahap ni Jahowa. Ia mangkatahon, “Sonaha do ninuhurnima? Anggo adong biribiri ni sada halak 100, anjaha kahou sada hunjai, ai lang tadingkononni ma na 99 ai i dolog, laho mangindahi na magou ai? Anjaha anggo jumpahsi ma ai, tongon huhatahon ma bennima, malasan do uhurni mangidah na sada ai marimbang na 99, na so ongga kahou.”​—Mat. 18:12, 13.

9. Aha ma na ibahen parmahan na madear hubani biribirini? (Tonggor ma gambar sampul.)

⁹ Mase Jahowa ipausih songon parmahan na madear? Halani anggo parmahan na madear, isarihon do biribirini. Songon si Daud, italuhon so singa pakon gipul laho paluahkon biribirini. (1 Sam. 17:34, 35) Sahalak parmahan na madear, ibotoh do anggo adong biribirini na magou, age pitah sada. (Joh. 10:3, 14) Itadingkon ia ma biribirini na 99 ai. Atap isuruh ia ma hasomanni parmahan manjaga sidea ase boi ia mangindahi biribiri na magou ai. Marhitei limbaga ai, Jesus sihol mangajarhon hubanta, ‘Seng marosuh uhur ni Bapangku na i nagori atas ai anggo magou sada humbani na etek-etek on.’​—Mat. 18:14.

10. Domu bani Hesekiel 34:11-16, aha ma na ijanjihon Jahowa hubani biribiri-Ni na magou?

¹⁰ Ihaholongi Jahowa do ganupan hita, tarmasuk ma sidea na mandaoh hun Bani. Marhitei nabi Hesekiel marjanji ma Jahowa ipindahi Ia do biribiri-Ni na magou janah iurupi do sidea ase toguh use. Ipatugah do homa aha na laho bahenon-Ni laho paluahkon sidea. Ipausih do ai songon aha na ibahen sahalak  parmahan sanggah dong biribirini na magou. (Basa Hesekiel 34:11-16.) Parlobei, marusaha do ia mangindahi biribirini na magou. Dob jumpahsi ai, iboan ma mulak. Anggo adong ugahni, itambari ma ai, ibaluti lanjar ibere mangan. Sintua na gabe ‘parmahan ni hulanan ni Naibata’ pe porlu do mambahen na sisonai laho mangurupi sanina botou na mandaoh hun kuria. (1 Ptr. 5:2, 3) Marusaha do sintua mangindahi sidea, janah iurupi ase boi mulak use. Isarihon do sidea janah iurupi ase boi use marhasoman pakon Jahowa. *

11. Aha do na iarusi sahalak parmahan na madear?

¹¹ Sahalak parmahan na madear mangarusi dong do na mambahen biribiri ai kahou. Jadi, dob jumpahsi biribiri na kahou ai, tontu lang ilonsing biribiri ai. Pardiateihon ma sitiruon na ibahen Jahowa sanggah mangurupi juakjuak-Ni na sompat lang ra mandalankon tugas hun Bani.

12. Sonaha Jahowa mangurupi si Jona?

¹² Lang ra nabi Jona manangihon Jahowa janah lang ra ia laho hu Ninive. Usih songon parmahan na madear iurupi Jahowa do si Jona ase toguh use janah boi mandalankon tugasni. (Jona 2:8; 3:1, 2) Dob ai igunahon Naibata ma tabu laho mangajarhon bani si Jona harga tumang do hosah ni jolma Bani. (Jona 4:10, 11) Aha ma parlajaranni hubanta? Anggo adong sanina botou na lang aktif, ulang ma mintor mandolei sintua laho mangurupi sidea. Tapi maningon marusaha ma sidea mangarusi aha do na mambahen ia sonai. Dob ai, anggo ra ia mulak use hubani Jahowa maningon torus ma ipardiateihon sintua ia.

13. Sanggah holsohan panurat Psalmen 73, lang igilai Jahowa ia. Hunjai parlajaran aha ma na dapot hita?

¹³ Contoh na legan ai ma panurat Psalmen 73. Ongga do iahap ia lang dong  gunani mangidangi Jahowa halani pangahapni martuahan do halak parjahat. Halani ai gabe maretek ni uhur ma ia. (Ps. 73:12, 13, 16) Ai manggila do Jahowa hu bani? Lang. Isuratkon do hatani ai ibagas Bibel. Ujungni, gabe iarusi ia do lang adong na siharganan marimbangkon parhasomanan pakon Jahowa. (Ps. 73:23, 24, 26, 28) Aha ma parlajaranni hubanta? Anggo adong sanina botou na mangahap lang dong gunani mangidangi Jahowa, ulang ma mintor manggila sintua. Tapi maningon marusaha ma sidea mangarusi mase sonai pangahapni. Dob ai, gabe ibotoh sidea ma sonaha patoguhkon sanina botou ai marhitei ayat-ayat ni Bibel.

14. Mase si Elias porlu ipatoguh, janah sonaha Jahowa mangurupisi?

¹⁴ Lintun do nabi Elias humbani Ratu Isebel. (1 Raj. 19:1-3) Pangahapni lang dong be halak na mangidangi Jahowa, janah soya-soya ma ganup pangidangionni sadokah on. Halani gulut pingkiranni, iahap ia rahanan ma ia matei. (1 Raj. 19:4, 10) Hassi pe sonai, lang isalahkon Jahowa ia. Tapi iurupi do ia ase mambotoh banggal do kuasa ni Jahowa janah sai ihasomani do ia. Sanggah ipatugah ia holsoh ni uhurni, dear do itangihon Jahowa ia. Ibere do homa tugas na baru hu bani. (1 Raj. 19:11-16, 18) Aha ma parlajaranni hubanta? Ganupan hita, tarlobih ma sintua maningon bujur hubani  hasoman. Anggo adong na patugahkon holsoh ni uhurni, atap pe mangkatahon anggo Jahowa lang ra manasap hasalahanni, maningon dear ma sintua manangihon. Janah marusaha ma sintua mangurupisi ase porsaya ia holong tumang do Jahowa hu bani.

15. Domu bani Johannes 6:39, sonaha ma pangahap ni Jesus bani biribiri ni Naibata?

¹⁵ Sonaha ma namin pangahapta hubani biribiri ni Jahowa na magou? Tiru hita ma Jesus. Ibotoh Jesus do harga tumang do ganup biribiri ni Jahowa. Halani ai, torus do ia marusaha laho mangurupi “biribiri na magou humbani ginompar ni halak Israel” ase mulak use hubani Jahowa. (Mat. 15:24; Luk. 19:9, 10) Halani Jesus pe parmahan na madear, marusaha do ia ase ulang adong biribiri ni Jahowa na magou.​—Basa Johannes 6:39.

16-17. Sonaha ma pangahap ni sintua hubani biribiri ni Jahowa na magou? (Tonggor ma kotak “ Pangahap ni Sidea na Lang Aktif”.)

¹⁶ Apostel Paulus mangojur ganup sintua i Epesus ase maniru Jesus. Ia mangkatahon, “Maningon sonai do hita laho mangurupi halak na so margogoh, mardingat hata ni Tuhan Jesus, ai ia do mangkatahon, ‘Martuahan do na mambere ase na manjalo.’” (Lah. 20:17, 35) Tangkas ma, ronsi sonari pe ai do homa tugas ni sintua. Si Salvador sahalak sintua i Spanyol mangkatahon, “Halani parduli tumang do Jahowa hubani biribiri-Ni na magou, gabe tarojur ma ahu mangurupi sidea. Halani ahu pe parmahan ibagas kuria, tontu marosuh do Jahowa anggo husarihon sidea.”

¹⁷ Ganup sanina botou na magou na ipatugah bani artikel on, ujungni mulak do use hubani Jahowa. Sonari, bahat nari ope sanina botou na magou, sihol mangkorjahon na sisonai. Bani artikel na mangihut, iulas hita ma lambin tangkas sonaha hita boi mangurupi sidea ase mulak use hubani Jahowa.