ARTIKEL PELAJAREN 25
‘Aku kap si Ndarami Biri-BiriKu’
‘Aku kap si ndarami biri-biriKu ras si ngasuhisa.’—ESEK. 34:11.
LAGU 105 Jahwe Kekelengen Kap
SI IBAHAS *
1. Engkai maka ibandingken Jahwe diriNa ras sekalak nande?
BAS jaman Nabi Jesaya, pernah bagenda penungkunen Jahwe man umatNa, “Banci kin nande ngelupaken anakna?” Kenca si e nina Jahwe, “Aminna pe nande ngelupaken anakna, tapina Aku la ndigan pe ngelupaken kam kerina.” (Jes. 49:15) Biasana la ibandingken Jahwe diriNa ras sekalak nande. Tapi paksa si e, ibandingkenNa diriNa ras sekalak nande. Ibuktiken Jahwe maka keleng kel ateNa umatNa, bali bagi sekalak nande si keleng kel atena anakna. Enterem pernanden seri perasanna ras kai si ikataken turang seninata si gelarna Jasmin, nina, “Sanga iasuh sekalak nande anakna, iban kalak e sada iketen si seh kel paguhna, si ertahan segedang geluhna.”
2. Uga perasan Jahwe sanga idahNa anak-anakNa ndauh arah Ia?
2 Iteh Jahwe adi lit salah sada arah anakNa lanai erberita ntah pe lanai reh ku perpulungen. Jadi, ukuri uga sedihna iakap Jahwe sanga idahNa nterem umatNa lanai aktif. *
3. Kai nge si iarapken Jahwe arah kalak si la aktif?
3 Enterem turang seninata si la aktif dungna mulihken ku runggun janah meriah kel ukurta ngalo-ngalo kalak e. Mulih ate Jahwe kalak e, janah kita pe bage ka perasanta. (1 Pet. 2:25) Kai si banci silakoken guna nampati kalak e gelah mulih ku runggun? Ope sijawap penungkunen e, perlu siteh kai alasenna maka lanai kalak e reh ku perpulungen ras erberita.
ENGKAI MAKA PIGA-PIGA KALAK JADI LA AKTIF?
4. Perban sibuksa erdahin, kai si ialami piga-piga turang seninata?
4 Piga-piga kalak lanai aktif perban sibuksa erdahin. Sekalak turang seninata si gelarna Hung * si tading i Asia Tenggara ngataken, “Mbuesa waktu ras gegeh si kupake erdahin. Mbarenda kuakap adi melala senku, banci kulayani Jahwe alu mehuli. Emaka kutambahi jamku erdahin. Bas pudi wari nggo jarang aku reh ku perpulungen, janah dungna lanai pernah reh. Kuakap igunaken Setan doni enda guna erban kalak lanai fokus janah dungna lanai ngelayani Jahwe.”
5. Kai si iadapi sekalak turang seninata, janah kai akibatna?
5 Piga-piga turang seninata tertekan perban melala masalah si iadapina. Perdiateken pengalamen sekalak turang seninata si gelarna Anne arah Inggris nari. Lit lima anakna. Nina, “Anakku si nguda nggo cacat lahir nari. Bas pudi wari, anakku si diberu si nomor telu ipecat, janah salah sada anakku si dilaki lit sakit mentalna. Tertekan kel aku, lanai aku reh ku perpulungen, lanai erberita, janah dungna lanai aku aktif.” Pasti sedih siakap sanga sibegi pengalamen e bage pe pengalamen turang seninata si ngadapi situasi si seri.
6. Adi lit kalak la ngelakoken kai si ikataken bas Kolose 3:13, ngkai maka e banci erban ia ndauh arah umat Jahwe nari?
6 Baca Kolose 3:13. Piga-piga umat Jahwe kitik ukurna perban turang seninana. Ikataken Rasul Paulus maka mon-mon ‘lit alasenta megelut’ perban turang seninata. Janah banci saja la adil perbahanen kalak e man banta. Adi la kita hati-hati, banci terus nembeh ateta kalak e. Reh dekahna, e banci erban kita ndauh arah umat Jahwe nari. Perdiateken pengalamen sekalak turang seninata si gelarna Pablo i Amerika Selatan. Ituduh ia ngelakoken perbahanen si salah, janah dungna lanai ia ibere tugas bas runggun. Uga tanggapen Pablo? Nina, “Merawa kel aku janah dungna ndauh aku arah runggun.”
7. Kai nge si banci terjadi adi terus iakap kalak salah bana?
7 Adi pernah ilakoken kalak kesalahen si serius, banci saja terus salah iakapna bana aminna pe nggo ndekah e terjadi. Banci saja, lanai akapna keleng ate Dibata ia. Aminna pe nggo robah ia, lanai iakapna cocok ia jadi umat Dibata. Bage me si igejapken sekalak turang seninata si gelarna Francisco. Nina, “Mbarenda, pernah aku idisiplin perban kulakoken perbahanen seks si salah. Tangtangna, reh denga aku ku perpulungen, tapi bas pudi wari tertekan aku janah lanai kuakap aku cocok ngelayani Jahwe ras turang senina. Terus kuakap salah bangku janah lenga kuakap iampuni Jahwe aku. Dungna lanai aku reh ku perpulungen janah lanai erberita.” Adi itandaindu piga-piga turang senina si keadanna bali bagi si nggo sibahas ndai, uga nge perasanndu nandangi kalak e? Sedih nge kam ngidah kalak e? Janah si pentingna, uga nge perasan Jahwe nandangi kalak e?
KELENG ATE JAHWE BIRI-BIRINA
Keleng kel ate permakan bas Israel biri-birina si bene (Nen paragrap 8-9) *
8. Ilupaken Jahwe nge kalak si pernah ngelayani Ia? Jelasken.
8 La pernah ilupaken Jahwe kalak si pernah ngelayani Ia si dungna lanai aktif. Janah la ka pernah ilupakenNa pelayanen kalak e. (Heb. 6:10) Icatat Jesaya sada perumpaman si seh kel jilena si ncidahken uga ermediatena Jahwe man umatNa. Nina, “Desken sekalak permakan, ipekena-kenaNa rarasenNa, alu tanna jine, ipepulungNa kerina. Anak biri-biri iangkipNa.” (Jes. 40:11) Selaku permakan si Mbelin, uga nge perasan Jahwe adi lit biri-biriNa si papak?Jawapenna banci siteh arah kata-kata Jesus man murid-muridna, “Uga menurut kena? Adi lit sekalak jelma 100 biri-birina janah bene sada, la kin itadingkenna si 99 e i deleng jenari lawes ia ndarami si bene e? Janah adi idatna, pasti riahen ukurna kerna si sada e asangken si 99 si la bene e.”—Mat. 18:12, 13.
9. Uga nge perbahanen sekalak permakan si mehuli man biri-birina? (Nen gambar sampul.)
9 Engkai maka Jahwe cocok ibandingken ras sekalak permakan? Perban sekalak permakan si mehuli ermediate kel man biri-birina. Misalna, sanga Daud jadi permakan, pang ia ngelawan singa ras beruang guna ngelindungi biri-birina. (1 Sam. 17:34, 35) Sekalak permakan si mehuli pasti itehna adi bene sada biri-birina. (Joh. 10:3, 14) Adi lit si bene, ikarangkenna biri-birina si deban ntah pe isuruhna permakan si deban njaga biri-birina. Kenca si e, lawes ia ndarami biri-birina si bene e. Ibereken Jesus perumpaman e guna ngajarken kebenaren si penting enda, “Bapakku si i surga la ateNa bene sada pe i bas kalak si kitik enda.”—Mat. 18:14.
Sekalak permakan i Israel ngurus biri-birina si papak (Nen paragrap 9)
IDARAMI JAHWE BIRI-BIRINA
10. Menurut Esekiel 34:11-16, kai si ilakoken Jahwe man biri-biriNa si bene?
10 Keleng ate Jahwe kerina umatNa, termasuk “kalak si kitik” si papak. Erjanji Dibata arah Nabi Esekiel maka idaramiNa kari biri-biriNa si bene janah isampatiNa kalak e gelah banci rembak mulihi ras Ia. IkatakenNa ka kai saja si ilakokenNa guna nelamatken kalak e. Si ilakokenNa bali bagi si ilakoken sekalak permakan adi bene biri-birina. (Baca Esekiel 34:11-16.) Si pertama, idarami permakan e me biri-birina si bene. Banci saja melala keri waktuna ras gegehna ndaramisa. Kenca idatna biri-biri e, ibabana ku rarasen. Banci saja lemah biri-biri e perban melihe ntah pe perban lit lukana. Emaka, alu lembut itambari permakan e lukana, iangkipna, janah iberena man. Pertua-pertua eme permakan arah “rarasen biri-biri Dibata.” (1 Pet. 5:2, 3) Emaka, bage ka me si arus ilakoken kalak e adi lit kalak si ipedauhna dirina arah runggun. Perlu idaramina kalak si bage, isampatina gelah mulihken ku rarasen, janah alu perkeleng isampatina gelah rembak mulihi ras Jahwe. *
11. Kai si arus iangkai sekalak permakan si mehuli?
11 Sekalak permakan si mehuli, iangkaina maka sada biri-biri banci saja papak. Emaka, adi lit biri-biri si mpedauh dirina arah rarasen, labo kari iukum permakan e biri-biri e. I bas jaman Pustaka, isampati Jahwe piga-piga umatNa si pernah mpedauh dirina arah Ia nari. Mari sibahas uga kita banci ngusih Jahwe.
12. Kai si ilakoken Jahwe man Juna?
12 Sanga isuruh Jahwe Nabi Juna lawes ku Niniwe, la ikutkenna perentah e. Aminna pe bage, la mis itulak Jahwe ia. Bali bagi sekalak permakan si mehuli, iselamatken Jahwe Juna janah isampatiNa ia gelah ngasup ndalanken tugasna. (Jun. 2:7; 3:1, 2) I bas pudi wari, igunaken Jahwe batang gundur guna nampati Juna ngangkai maka meherga kel kegeluhen tiap manusia. (Jun. 4:10, 11) Kai pelajarenna man banta? Ula min pertua-pertua mis nyerah sanga nampati kalak si la aktif. Tapi, perlu iusahaken kalak e ngangkai kai saja alasenna ngkai maka lit kalak si mpedauh dirina arah runggun. Janah sanga lit kalak si mulihken ku Jahwe, pertua-pertua arus terus ermediate janah mehuli man bana.
13. Kai si banci sipelajari arah tanggapen Jahwe nandangi penulis Masmur 73?
13 Kitik ukur penulis Masmur 73 sanga idahna kalak jahat tempa-tempa la pernah susah geluhna. Dilaki e pe mulai ka sangsi lit nge gunana ngelayani Jahwe ntah lang. (Msm. 73:12, 13, 16) Uga tanggapen Jahwe? La irawaiNa dilaki e. Malahen kata-kata dilaki e itulis bas Pustaka. Dungna isadari penulis Masmur maka hubungenna ras Jahwe me si pentingna. (Msm. 73:23, 24, 26, 28) Kai pelajarenna man banta? Adi lit kalak si mulai sangsi maka erguna nge ngelayani Jahwe ntah lang, ula mis ihakimi pertua-pertua ia. Tapi, arus iusahaken pertua-pertua ngangkai kai alasenna maka kalak e mulai sangsi. Kenca si e me maka banci igunaken pertua-pertua ayat-ayat arah Pustaka nari guna mpegegehi ia.
14. Engkai maka Elia perlu isampati, janah uga Jahwe nampati ia?
14 Sanga kiam Nabi Elia arah Ratu Isebel nari, tertekan kel ia janah mate saja atena. Engkai? Perban iakapna maka ia nari ngenca nabi si nggeluh, janah sia-sia iakapna pelayanenna sedekah enda. (1 Raj. 19:1-4, 10) Aminna pe bage, la merawa Jahwe man Elia. Tapi ipetetap Jahwe ukur Elia maka labo ia si sada. Ipetetap Jahwe ka ukur Elia maka banci iandalkenna kuasa Jahwe, janah melala denga dahin si perlu ilakokenna. Tutus ate Jahwe megiken Elia sanga iturikenna isi pusuhna. Kenca si e, ibere Jahwe tugas-tugas si mbaru. (1 Raj. 19:11-16, 18) Kai pelajarenna man banta? Kerina kita, khususna pertua-pertua arus mehuli man biri-biri Jahwe. Kalak si la aktif banci saja cerita man pertua-pertua maka kitik ukurna. Ntah pe banci saja ikatakenna maka la iakapna ia cocok iampuni Jahwe. Kai pe si iceritakenna arus tutus ate pertua-pertua mbegikenca. Kenca si e, arus ka iusahakenna mpetetap ukur biri-biri si bene e maka keleng ate Jahwe ia.
UGA ARUSNA PERASANTA NANDANGI BIRI-BIRI DIBATA SI BENE?
15. Menurut Johanes 6:39, uga perasan Jesus man biri-biri Bapakna?
15 Uga nge ate Jahwe perasanta nandangi biri-biriNa si bene? Ate Jahwe meherga min siakap kalak e. Ibereken Jesus usihen si mehuli kerna si e. Perban itehna maka meherga kel iakap Jahwe kerina biri-biriNa, emaka iusahaken Jesus kel nampati ‘kalak Israel si bali bagi biri-biri si nggo papak’ gelah rembak mulihi ras Jahwe. (Mat. 15:24; Luk. 19:9, 10) Selaku permakan si mehuli, iusahaken Jesus ka gelah la sada pe bene biri-biri Jahwe.—Baca Johanes 6:39.
16-17. Uga arusna perasan pertua nandangi kalak si la aktif? (Nen kotak “ Si Banci Saja Igejapken Biri-Biri si Bene.”)
16 Iiahken Rasul Paulus pertua-pertua bas Epesus gelah ngusih Jesus. Nina, “Arus isampati kena kalak si lemah janah arus inget kena kata-kata Tuan Jesus eme, ‘Riahen kap i bas mere asangken i bas ngalo.’” (Perb. 20:17, 35) Ayat enda ncidahken maka penting kel tanggung jawap pertua-pertua guna njaga umat Jahwe. Sekalak pertua si gelarna Salvador i Spanyol ngataken, “Sanga kuukuri maka ermediate kel Jahwe man biri-biriNa si bene, tersuruh ukurku nampati kalak e asa ngasupku. Tek aku maka pasti iarapken Jahwe gelah ermediate aku man kalak e.”
17 Kerina kalak si iceritaken bas artikel enda nggo isampati gelah mulihken ku Jahwe. Gundari pe nterem turang seninata si la aktif merhat ka mulihken ku Jahwe. Bas artikel seterusna, sibahas kari terbuen kerna uga carana kita banci nampati kalak e mulihken ku Jahwe.
LAGU 139 Bayangken Kita Nggo bas Pardis
^ par. 5 Engkai maka lit piga-piga kalak si nggo setia ngelayani Jahwe ertahun-tahun dekahna dungna ipedauhna dirina arah runggun? Uga perasan Jahwe man kalak e? Bas artikel enda, sibahas kari penungkunen-penungkunen enda. Ibahas ka kari kai si banci sipelajari arah cara Jahwe nampati kalak bas jaman Pustaka, si pernah ndauh arah Jahwe nari.
^ par. 2 PENJELASEN: Perberita si la aktif eme perberita si la mereken laporen dinas sedekah enem bulan ntah lebih. Aminna pe bage, kalak si la aktif e turang seninata denga, janah keleng ateta kalak e.
^ par. 4 Piga-piga gelar nggo iganti.
^ par. 10 Bas artikel seterusna, sibahas kari uga pertua-pertua banci ngelakoken si telu enda.
^ par. 60 KETERANGEN GAMBAR: Adi lit sada biri-biri si bene, idarami permakan me biri-biri e janah ibabana ku rarasen. Gundari pe, bage ka nge si ilakoken permakan-permakan bas runggun.
^ par. 64 KETERANGEN GAMBAR: Sanga nimai bus si inangkihina berkat, idah sekalak turang senina si la aktif dua kalak Saksi si semangat kel erberita.
