1. Amu jé Yéhôva a ve’e émien a nyia mon?

YÉHÔVA a nga sili bone b’Israël nsili wu melu me nkulu mejô Ésaïe: “Ye minga a ne vuane mone wé a nyañ?” Ane a nga beta jô be na: “Balé bete be ne vuan, ve ma ma ye bo te vuane wo.” (És. 49:15) Yéhôva a ne teke dañe ve’ émien a nyia mone Kalate Zambe. Ve a nga bo de éyoñ éte. A nga belane ngul élat é ne zañe nyia ba mon asu na a liti abim avé a nyane bebo bisaé bé. Abui benyia e ne tyiñ a mejô me Sita Jasmin ma: “Éyoñe minga a nyia mone wé, nalé a bo na élat é ne zañe jap é libi ngum ényiñ.”

2. Yéhôva a wô’ôtan aya éyoñ a yene bebo bisaé bé be mane voé nsisim?

² Yéhôva a yem éyoñ ése mbo ésaé wé a telé bisulan a ésaé nkañete. Tame ñhe ve’ele simesan aval mintaé a ne wôk éyoñ a yene mintete bebo bisaé bé be mane voé nsisim * mbu ôse ya yôp.

3. Nkômbane Yéhôva ô ne ôvé?

³ Abui bobejañ a besita e maneya voé nsisim e wô’ô beta bulan akônda, a bi wô’ô nyoñe be a mevak. Ane Yéhôva, bia fe bia yi na bobejañ bete be bulan abemba. (1 P. 2:25) Jé ñhe bi ne bo asu dap? Ôsusua na bia bi éyalane ya nsili ôte, e ne mfi na bi taté yem jôm ja bo bo na bobejañe béziñ be telé bisulan a ésaé nkañete.

4. Jé e wô’ô kui bobejañe ba telé ésaé jap ôsu?

⁴ Bobejañe béziñ ba kôlô Yéhôva amu asu ésaé dap da nyoñe be abui éyoñ. Hung *, mojañe ya Asie a meme na: “Asu ésaé dam nde me mbe me telé’ ôsu ényiñe jam. Me nga bi angôndô ya akute mfasan, me nga simesane na nge me bi abui akum, nalé a ye volô ma na me bo ésaé Yéhôva nya mboane. Ane me nga taté na ma saé ane me tii. Me taté fe na ma bu’i bisulan mone jôme mone jôm, akekui me nga su’ulane telé telé, teke beta ke. Satan a belane fo’o émo jé na a bo na bi kandan a Yéhôva ôte’ete’e ôte’etek.”

5. Aval avé minju’u mi nga te’elane sita éziñ?

⁵ Bobejañ béziñ ba bili atek amu ba tôban abui minjuk. Anne a ne sita ya Grande-bretagne, a bili bone betan, a jô na: “Mone mesu’ulane wom a nga bialé ntutuñ, ngo jame jia é nga tebe feñ, ntôle mona fame ki me nga biaé ô wô’ô so’o étyi. Jam ete e nga te’elane ma aval e mbe na, me nga telé nkeane bisulan a ésaé nkañete. Ane me nga mane voé nsisim.” Bia wô’ô sita Anne a nda bôte jé a ba bese ba tôban aval minju’u ete éngôngol angôndô.

6. Aval avé môt a bo te tôñe melebe bia koone me kalate Becolossien 3:13 a ne mane voé nsisim?

⁶ Lañe’e Becolossien 3:13. Bebo bisaé be Yéhôva béziñ be nga kolé ôbak amu jam mojañ éziñe ya akônda a nga bo. Nlômane Paul ô nga meme na e ne kui biyoñ biziñe na mojañ a bi nya amuu ya wô’ô nyô mbo’ ôlun. E ne fe kui kui na bi tôban ékotekot akônda été. Nge bi teke tabe ntyel, bi ne taté na bia ba’ale bobejañ ôviti’i ziñ. Nalé ki a ne su’ulane bo na bi viane lume Yéhôva mvus. Bi tame yen jam e nga kui Pablo, mojañe ya Amérique du Sud. Môt éziñ a nga vañe bôte nye ajô, ane bemvendé be nga buni môt ate a vaa Pablo mimbe’e a mbe a be’e akônda. Nde Pablo a nga bo aya? A jô na: “Me nga wô’ô ôlun, ane me nga taté na ma voé nsisim.”

7. Jé é ne kui éyoñe mone môte ya nlem a bôme bia?

⁷ Nge môt a nga bo mbia nsem melu mvus, mone môte ya nlem a ne taté na a bôme nye, a bo na a simesane na Zambe a nji nye’e nye. To’o Zambe a jaméya nye amu a nga jôban abé dé, môt ate a ne ke ôsu a wô’ ôsone ya sulan a bebo bisaé be Yéhôva bevok. Jam ete e nga kui Mojañ Francisco. A jô na: “Me nga bi fonos amu me nga bo mvite mame ya bisôk. Me nga ke fo’o ôsu a tabe bisulan, ve mvuse mon éyoñ, me nga bili atek amu me nga simesane na me ne mvite mise me Yéhôva. Mone môte ya nlem a nga ke ôsu a bôme ma, a bo na me buni na Yéhôva a nji jamé ma. Nde me nga telé fo’o nkeane bisulan a ésaé nkañete.” Ye wo yeme bobejañe béziñe be tele avale bité bia te yene mone nlô ajô nyi? Wo yen avale bobejañe ete aya? Ye wo wô’ô fo’o be éngôngo? Yéhôva ki a yene be aya?

8. Ye Yéhôva a ne vuane ba be nga bo nye ésaé môs éziñe nga? Timi’in.

⁸ Yéhôva a ne étyi teke vuane mbo ésaé wé. To’o a maneya voé nsisim, a ke ôsu a simesan ésaé ése a nga bo asu Dé. (Beh. 6:10) Nkulu mejô Ésaïe  a nga belane mbamba éve’ela asu na a liti abim avé Yéhôva a nyane bôte bé. A nga jô na: “A ye ve mbame wé bidi aval ane mba’ale mintômba, a ye kôane bone mintômba mo mé, a be’e be tôé.” (És. 40:11) Beta mba’ale mintômba wongan a wô’ôtan aya éyoñe mone ntômba wé wua a jemban abemba? Mejô me Yésus ma ma volô bia na bi yeme de: “Mia simesan aya? Nge môt a ne mintômba ntet, wua ô dimiya fé, ke a li’i mewôm ébul a ébu, a ke minkô, a jeñe wu ô dimiya? Nge a yeneya wô, ma jô fo’o mia na, a dañe vak amu ntômba ôte, sa amu mewôm ébul a ébu mi nga bo te dimi.”​—Mt. 18:12, 13.

9. Jé mbamba mba’ale mintômba ya melu mvus a mbe a bo’ok? (Fombô’ô fôtô ya ékô’ôla.)

⁹ Amu jé da yiane na bi ve’e Yéhôva a mba’ale mintômba? Amu melu mvus, mbamba mba’ale mintômba a mbe a nyoñe’e ngab a mintômba mié. David a ne wua ya été. A nga wosane ngbwengbwem a ours asu na a kamane biyeme bié. (1 Sa. 17:34, 35) Mbamba mba’ale mintômba a yemelane fe éyoñ ntômba wua wo jembane mbam. (Jean 10:3, 14) A ne ngule ya li’i mintômba 99 abemba a ke jeñe wu wo te jañ, nge ke jô beba’ale mintômba befe na be li’i be nyoñe ngab a mintômba mié nté a ne momo. Yésus a nga belan éve’ela éte mfa’a ya ve bia beta ñye’elane nyi: “Nalé fe Éso wônan ya yôp a nji nye’e na mone wua ya avale bone di a jañ.”​—Mt. 18:14.

10. Ézéchiel 34:11-16 a liti na Yéhôva a ye bo jé asu mintômba mié mi nga jañ?

¹⁰ Yéhôva a nye’e môt ase ya be bia, to’o “ba be ne tyôtyoé,” ba be nga kôlô abemba. Yéhôva a nga jô nkulu mejô Ézéchiel na a kate bebo bisaé bé na émien a ye jeñe mintômba mié, a volô mie na mi beta tebe ne bip. A nga kate fe nye mam méziñ a ye bo asu na a volô mie. Mba’ale mintômba ya melu mete a mbe ve kôme wô’ô de, amu nne émiene a mbe a bo’o nalé éyoñ ntômba wé wo jañ.  (Lañe’e Ézéchiel 34:11-16.) Jam ôsu, a mbe a yiane jeñe ntômba wo te jañ, a jam ete e mbe ve sili nye abui ngul a abui éyoñ. Éyoñ a yeneya wô, a mbe a bula’ane wô abemba. Nge a koone ki na wo te balé nge juk? A mbe a nyoñe’ éyoñe ya saé wô, a tiñeti wô bandas aveñ, a voñôlô wô, a ve wô jôme ya di. Nne fe bemvendé ba yiane bo nalé éyoñ ba kômbô volô bobejañ be voéya nsisim, amu be be’e mbe’e ya nyoñe ngab a “mbam mintômba Zambe.” (1 P. 5:2, 3) Ba jeñ avale bôt ete a volô be na be bulan akônda, ba liti fe be nye’an éyoñ ba kate be avale be ne beta lat a Yéhôva. *

11. Jam avé mbamba mba’ale mintômba a kôme yem?

¹¹ Mbamba mba’ale mintômba a yeme na ntômba ô ne kôlô abemba a jañ. Éyoñe jam ete da kui, mba’ale mintômba a taté ki ve na a bôme wô. Bi tame zu yen avale Yéhôva a nga bo éyoñe bebo bisaé bé béziñe ya melu mvus be nga te’e nsisim mone nté.

12. Yéhôva a nga bo aya éyoñe Jonas a nga bene ke nye nlôman?

¹² Nkulu mejô Jonas a nga bo Yéhôva melo a bene ke Ninive. Ve to’o nalé Yéhôva a nji lume nye mvus. Aval ane mbamba mba’ale mintômba, Yéhôva a nga nyii nye, a ve fe nye ngul é mbe é sili’i na a bo jam A nga jô nye. (Jonas 2:7; 3:1, 2) Mvuse ya valé, a nga belane zezé mon élé asu na a liti nye abim avé binyiñe bi bôt bi ne édima mise mé. (Jonas 4:10, 11) Jé nkañete ôte wo ye’ele bia? Bemvendé be nji yiane ji’a tek éyoñe be bili na ba volô bobejañ be maneya voé nsisim. Ve ba yiane jeñe na be yeme jam da te bo na mbo ésaé Yéhôva a kôlô abemba. To’o éyoñe mojañ ate a bulaneya be Yéhôva, bemvendé ba yiane ke ôsu a liti nye nye’an.

13. Jé bi ne yé’é éyoñ bia yen avale Yéhôva a nga volô ntili Besam éziñ?

¹³ Môt a nga tili Sam 73 a nga bili atek  éyoñ a nga yen ane mbia môt a fôn. Ane a nga sili émiene mfi môt a bi bi éyoñ a wu nju’u na a bo Zambe ésaé. (Bs. 73:12, 13, 16) Nde Yéhôva a nga bo aya? A nji ve nye bijô. A nga bo bo na be tili mejô me môt ate Bible. Ntili Besam ate a nga su’ulane yemelane na, teke jôm éziñ é ne mfi ényiñe môt a dañe na a bi mbamba élat a Zambe. (Bs. 73:23, 24, 26, 28) Jé nkañete ôte wo ye’ele bia? Nge bisô bia bi mojañ éziñ, bemvendé be nji yiane ji’a tyi’i nye ajô. A lôte na be ve nye bijô, ba yiane jeñe na be yemelan amu jé a kobô nalé. Mvuse ya valé nje be ne belane Kalate Zambe na be ve nye ngule nyul.

14. Amu jé e mbe e sili’i Élie mvolane nlem, a aval avé Yéhôva a nga su’u nye?

¹⁴ Nkulu mejô Élie a nga koo Jézabel woñ ane a nga tup. (1 Bb. 19:1-3) A nga simesane na bekulu mejô bevo’ bese be maneya lume Yéhôva mvus, a na ésaé ése a nga bo é mbe zezé. Ane nlem ô nga bo nye abé, a taté na a nyamete awu. (1 Bb. 19:4, 10) Ye Yéhôva a nga ve nye bijô? Momo. A nga bôé nye nleme si a jô nye na a nji bo étam. A nga kate fe nye na a ngenan a bili abui ésaé ya ve nye, a na a ye ve nye ngule ya bo ésaé éte. Yéhôva a nga nyoñe fe éyoñe ya tu’a vô’ôlô nye, mvuse ya valé a nga ve nye mimfefé mimbe’e. (1 Bb. 19:11-16, 18) Jé nkañete ôte wo ye’ele bia? Bia bese bia yiane nyoñe mintômba mi Yéhôva a mbamba nlem, e dañe dañ bemvendé. Ye mojañ éziñ a wô’ô ôlun? Ye sita éziñ a simesane na Yéhôva a vo’o jamé nye? Bemvendé ba  yiane kôme nyoñ éyoñe ya vô’ôlô nye nté a yooé be nleme wé. Mvuse ya valé, ba yiane liti nye na a ne nya édimaa mise me Yéhôva.

15. Kalate Jean 6:39 a liti na Yésus a mbe a yene’e mintômba mi Ésaa aya?

¹⁵ Yéhôva a yi na bi yene bobejañe be voéya nsisim aya? Yésus a nga li’i bia mbamba éve’ela mfa’a ôte. Mbôl a mbe a yeme’e abim avé Yéhôva a nyane bone mintômba mié, Yésus a nga ve ngul ése na a jeñe “mintômba ya nda Israël mi dimiya,” a bo na mi beta bulane be Yéhôva. (Mt. 15:24; Luc 19:9, 10) Aval ane mbamba mba’ale mintômba, a nji yi a zen éziñe na a dimili môte wua ya ba Yéhôva a nga ve nye.​—Lañe’e Jean 6:39.

16-17. Aval avé bemvendé ba yiane yen ésaé ya volô bobejañ be maneya voé nsisim? (Fombô’ô nka’ale ô ne nlô ajô na: “ Ntômba wo te jañ wo wô’ôtan aya?”)

¹⁶ Nlômane Paul ô nga lebe bemvendé ya Éphèse na be vu éve’ela Yésus. A nga jô be na: “Mia yiane bo ésaé a volô bôte be ne atek, a simesane mejô me Tate Yésus ane émien a nga jô na, Môt a ve, a nyô a nyoñ, nyô a ve a dañe yen ébotan.” (Mam. 20:17, 35) Éfus éte ja kôme liti na bemvendé be be’e mbe’e ya nyoñe ngab a mintômba mi Yéhôva. Salvador, mvendé ya Espagne, a jô na: “Éyoñ ma simesan abim avé Yéhôva a nyane bone mintômba mié, ma bi éva’a ya bo mam mese me ne ngule ya bo asu na me volô mie. Ma yeme na nkômbane Yéhôva ô ne na me nyoñe ngab a mie.”

¹⁷ Bobejañe bese bia te jôô be ayé’é di be nga su’ulane bulane be Yéhôva. Awolo bia kobô di, abui bobejañ afe da kômbô bo avale da. Ayé’é da zu, bia ye yene bone be mam bi ne bo asu na bi volô ba be maneya voé nsisime na be beta bulane be Yéhôva.