1. Ka uagu layanuha Heowá luougua kamá hamuga aban úguchuru?

LIDAN meha lidaani profeta Isaíasi ariñagati Heowá houn lumutuniña: “Rédeiti funagia tínsiñehabu aban úguchuru houn tirahüñü odi bulíei tumutiña? Íbini hamuga tabulieiduniña, au, mabulieidun nubadibu” (Isa. 49:15). Mama súnwandan layanuha Heowá luougua kamá hamuga aban úguchuru, lau sun lira, adüga lumuti lidan kesi le. Góubaguagüda lumuti Heowá ínsiñeni le lasandirubei hawagu lubúeingu luma ínsiñeni le tasandirubei aban úguchuru luagu tisaani, ladüga busenti meha lun hasuburudiruni lubúeingu weiri lan hínsiñe lun. Hiibe-agei úguchurugu sandí hamuti le tasandirubei aban íbiri to gíriboun Jasmín: “Dan le tátagüdüni aban úguchuru tisaani aban ñein lan aban ínsiñeni le aduraruti lun sun ibagari”.

2. Ida liña lasandiragun Heowá lungua dan le hadisedun aban hádangiñe lisaanigu luéi?

² Ruti Heowá fe dan le mapurichihaali lan aban hádangiñe lisaanigu madamuridagun ligía. Ligíati gáriti lun lau larihin sagü irumu saragu lubúeingu ha máfuriduhaña apurichiha madamuridagun hagía. *

3. Ka labusenrunbei Heowá?

³ Saragu hádangiñe íbirigu ha giributiña lidoun damuriguaü ani resibi wamutiña lau sun wagundan. Dandu Heowá kei wagía busentiwa lun hagiribudun (1 Fe. 2:25). Ida luba wíderaguniña? Lubaragiñe wóunabuni álügüdahani le, buítimati lun wasubudiruni  ka lan uéigiñe madamuridagunhaña lubéi fiu íbirigu ani mapurichihan hagía.

4. Ka gayaraabei ladügüni wadagimanu houn gürigia?

⁴ Añahein hádangiñe aba hetenirun saragu lun wadagimanu. Ariñagati aban íbiri gíriti Hung, * le awinwandubei suru libiti Asia: “Aba nígiraguagüdün nungua lun wadagimanu. Marufuduntina lichú au, ladüga aban nasaminarun buídutimabei lan neseriwidun lun Heowá ánhana gaseinsun saragu. Ábati nagumeserun awadigimarida saragu oura ani aba giñe eferidireina nani nadamuridagun darí lun madamuridagunhadina lan. Genegeti yusu lani Satanási ubóu le lun hadisedun gürigia luéi Bungiu murusun murusun”.

5. Ka asuseredubei tun aban íbiri ladüga burí turobuli le úmabei tagagibudagua?

⁵ Añahein amu íbirigu hageindaguña luma turobuli le adügübei lun hadiheridun. Ariha waméi le asuseredubei tun Anne, aban íbiri Gürán Büretáñana ani séingüñanu tisaanigu. Ariñagatu: “Danimati lagüriahóun aban hádangiñe nisaanigu. Dan lárigiñe, aba tabugún aban hádangiñe lídangiñe damuriguaü ani le aban, aba lasandirun luéigiñe lichügü. Aba nírudun saragu darí lun máfuriduna apurichiha madamuridagun”. Gáritu wanigi dan le warihin íbirigu ítara kei Anne hama tiduheñu ásügüra lídangiñe sügǘ hénrenguti.

6. Ka gayaraabei lasuseredun anhein mafalarun wamá adundehani le lídanbei Kolosana 3:13?

⁶ (Aliiha huméi Kolosana 3:13). Añahein lubúeingu Heowá ha asandirubaña charaali lan aban íbiri houn. Subudi lumuti meha apostolu Pábulu luagu aniheinbei lan dan wekeheruba lan luagu aban íbiri. Háfuga óusera láadiwa lan lau marichaü. Ánhawa móunigi, gayaraabei wareidahan igarihabu tidan wanigi darí lun wadisedun tuéi lóundarun Heowá. Ariha waméi likesin aban íbiri lídangiñeti Suedi Meriga gíriti Pablo. Aba líridahoun madurunga adügaali lan somu katei wuribati, ani adügati lira lun leferidirun aban lídangiñe lidaasin lidan damuriguaü. Kati ladügübei? Ariñagati: “Ábati nagañidun saragu ani aba adisedeina nan luéi damuriguaü”.

7. Ka gayaraabei lasuseredun lun aban gürigia le asandirubei duru luougua?

⁷ Másiñati giñe ha lan adügaañabaña figóu wéiriti luagu aban dan háfuga añahagua lan asandiragua houngua lau duru ani samina hagía madüna hamani línsiñehabu Bungiu. Íbini meha asakürihaaña lan, arufudúa ligía gudemehabu houn, másiñati hasandirun madüna hamá lun hádangiñe hamá lubúeingu Bungiu. Ítara liña meha lasandiragun aban íbiri gíriti Francisco lungua. Ariñagati: “Ererehóuati nun ani gidawa ligía nidasin nuéi ladüga néiguadun lidoun magíaguni. Lau sun sigitina lan abasiha lidoun adamuridaguni, aba nírudun saragu ani sanditina madüna nan lun hádangiñe nan lubúeingu Heowá. Wuribati meha nasandiragun nungua ani chouru numuti meha úagili lan feruduna lánina Heowá. Lau lásügürün dan, aba mupurichihaadina lan midin au adamuridagua”. Ka wasaminarubei hawagu íbirigu ha ásügürübaña lídangiñe sügǘ le ariha wamaalibei? Ariha wamutiña san lau gudemehabu? Ani le súdinitimabei, ka funa san lasandirubei Bungiu hawagu?

8. Ida liña wasubudiruni mabulieidun lumutiña lan Heowá ha meha eseriwidubaña lun?

⁸ Mabulieidun lumutiña Heowá ha meha eseriwidubaña lun luagu aban dan ani madügün hamaali ani mabulieidun lumuti giñe úaraguni le harufudubei lidan heseriwidun lun (Ebü. 6:10). Arufuda lumuti profeta Isaíasi ida liña lan larufudun Heowá ínsiñeni houn lumutuniña luma lóunigiruniña lau layusurun aban  lubuidun hénpulu: Abürühati: “Liabin kei aban hóuniri mudún le óunigirutiña lánigu; budá lumutiña harahüñü mudún larünarugu, aba lanügüniña laniguagu” (Isa. 40:11). Ida liña san lasandiragun Heowá lungua, Hóuniri Mudún le Wéirigutimabei, dan le ladisedun aban hádangiñe lubúein luéi? Arufuda lumuti Hesusu furangu ida liña lan lisaminan Heowá lau lálügüdüniña lani disipulugu: “Ida liña harihin lun? Anhein añahein lubéi san mudún luma aban wügüri, teferidira aban hádangiñe, ma lígirubaña híbiri luagu wübü, ábame lidin áluahoun to ayuridaguboun? Ánhounti ladarira, chóuruti luagu gúndaabei lan tau sügǘ hau ha mayuridagunbaña” (Mat. 18:12, 13).

9. Ida liña lóuseruniña aban hóuniri mudún le buiti lilügüniña mudún? (Ariha huméi dibuhu le luágubei tidáü).

⁹ Ka uagu buidu lubéi lun wagoubaguagüdüni Heowá luma aban hóuniri mudún? Ladüga aban hóuniri mudún le buiti, sanditi aban óunwenbu ínsiñeni hawagu lilügüniña mudún. Kei hénpulu, ageindaguati Dawidi dandu luma aban liñún kei luma aban osu lun lóunigiruniña lilügüniña mudún (1 Sam. 17:34, 35). Dan le teferidirun aban mudún, chóuruti líchuguba lan aban hóuniri mudún le buiti fe (Huan 10:3, 14). Lígirubaña 99 mudún séfuñu lidan fárüga o lamuriahan luma aban hóuniri mudún lun lóunigiruniña sunme anihán lan áluahoun to eferidiruboun. Yusu lumuti Hesusu hénpulu le lun larufudahan aban inarüni súdiniti woun: “Mabusenrunti Húguchi Bungiu le siélubei lun leferidirun ni aban hádangiñe ǘnabugutiña ha” (Mat. 18:14).

10. Según Esekiéli 34:11-16, ka füramase lubéi Heowá ladügün hawagu lilügüniña mudún ha féridihañabaña?

¹⁰ Hínsiñetiwa kada aban wádangiñe lun Heowá, íbini ha adisedubaña luéi. Füramaseti Bungiu lau lídehan profeta Esekiéli láluahabaña lan lilügüniña mudún ha féridihañabaña ani líderagubaña lan lun habuiduragüdüni hamadagua luma. Ani ariñaga lumuti kaba lan ladüga lun lesefuruniña. Ladügübei ligiaméme katei le ladügübei aban hóuniri mudún ísüraelina dan le teferidirun aban mudún luéi (aliiha huméi Esekiéli 34:11-16). Furumiñe, aban láluahanu hóuniri mudún lilügün mudún, ani másiñati lanügüba  lan katei le saragu dan luma áfaaguni. Lárigiñe ladarirunu, aba lanügünün tárigoun lidoun fárüga. Lanwoun lira, anhein meha buleseiharu lubéi o lamaaru lan, lóunigiruboun meha lau ínsiñehabuni, lagüragubei meha buleseiti le tuágubei, lanügüboun meha larünarugu ru ligía teigin. Kei “hóuniri mudún” lani Bungiu, lunti hadügüni wéiyaaña lidan afiñeni ligiaméme katei dan le híderaguniña ha adisedubaña luéi damuriguaü (1 Fe. 5:2, 3). Áluaha hamutiña wéiyaaña lidan afiñeni ha adisedubaña luéi damuriguaü, íderagua hamutiña agiribuda lidoun damuriguaü ani arufudatiña ínsiñehabu houn lau híderaguniña abuiduragüdei hamadagua luma Heowá. *

11. Ka meha lasubudirubei aban hóuniri mudún le buiti?

¹¹ Subuditi meha lun aban hóuniri mudún le buiti gayara lan teferidirun somu mudún. Anhein meha asusereda lira, móuserun lubóun lau furundei. Ariha waméi le ladügübei Heowá dan le madügün habalin fiu lubúeingu le lagurabubei hámagiñe.

12. Ida liña lóuseruni Heowá Honasi?

¹² Anurahati profeta Honasi luéi lagunfuliruni lidasin. Íbini ítara, móufudahati Heowá arihei kei aban gürigia le máraninaali luáguti. Kei aban hóuniri mudún le buiti, sefu lumuti Heowá Honasi ani ru lumuti erei le lemegeirubei lun lun lagunfuliruni lidasin (Hon. 2:7; 3:1, 2). Yúsuti Heowá aban híduru lun larufuduni lun Honasi gebegi lan libagari kada gürigia lun (Hon. 4:10, 11). Ka wafurendeirubei? Moun lumuti lan hasaminarun wéiyaaña lidan afiñeni máraninaali lan luáguti aban íbiri le mapurichihanhaali madamuridagun ligía. Lubaragiñe lira, lunti háfaagun lun gunfuranda hamani ka lan uagu ladiseda luéi damuriguaü. Ani dan le hagiribudun íbirigu ha lun Heowá, lunti hasigirun wéiyaaña lidan afiñeni óuseraña lau ínsiñeni, berese hagíame hau.

13. Ka wafurendeirubei lídangiñe ligaburi lóuseruni Heowá abürühati Sálumu 73?

¹³ Aba leferidiruni abürühati Sálumu 73 liguraasun dan le larihinbalin genege lan buidu lan lidin houn ha wuribabaña. Darí lun lasaminarun manügün lan láhudurawaguniwa lun Bungiu  buiti (Sal. 73:12, 13, 16). Kati ladügübei Heowá? Mébechun lumuti. Lubaragiñe lira, adügati lun labürüdǘn le lariñagubei abürühati Sálumu tidan Bíbülia. Lau lásügürün dan, aba gunfuranda lani abürühati Sálumu úati lan ni kata buídutimati lidan wabagari kei wamadagua luma Heowá (Sal. 73:23, 24, 26, 28). Ka wafurendeirubei? Moun lumuti hóufudahan wéiyaaña lidan afiñeni asaminara wuriba hawagu íbirigu ha adügübaña álügüdahani anhein barǘ lubéi buiti leseriwidúniwa lun Heowá. Lubaragiñe híchugun hadurun, lunti háfaagun lun gunfuranda hamani ka lan uagu hayanuha, óusera hagía íbirigu ha lidan somu igaburi. Ábameti hayusurunu wéiyaaña Bíbülia lun híchugun gurasu houn.

14. Ka meha uagu megei lubéi Elíasi ídemuei ani ida liña líderaguni Heowá?

¹⁴ Aba lanuraha profeta Elíasi tuéi urúei Hesawéli (1 Uru. 19:1-3). Saminati yebe úaaña lan amu lani Heowá profetagu ani mebegi lan le ladügübei lun ni kata. Aba ladagarun aban lanarime íruni luagu darí lun labusenrun lun lounwen (1 Uru. 19:4, 10). Mébechun lumuti Heowá Elíasi. Ariñagarügüti lun mama lan lábuguarügüñein ani gayara lan lafiñerun luagu lubafu Bungiu ani anihagua lan saragu katei lun ladügüni. Ruti Heowá arigei lun le lariñagubei dan le labahüdagunbalin lidiheri lun, ru ligía iseri dasi lun lun ladügüni (1 Uru. 19:11-16, 18). Ka wafurendeirubei? Sun wagía mosu wóuseruniña lubúeingu Bungiu lau lubuidun, wéiyaañatima lidan afiñeni. Anhein ayanuha aban gürigia lau igarihabu o sandigua lan lungua madüna lani lugudemehabu Heowá, haganbubei wéiyaaña lidan afiñeni lidan anihán lan adaaroun lanigi abahüdaguei lidiheri houn. Lárigiñe  harufudubei lun gürigia le mapurichihaalibei madamuridagun ligía weiri lan lebegi lun Heowá.

15. Según Huan 6:39, ida liña larihiniña Hesusu lubúeingu Lúguchi?

¹⁵ Ida liña labusenrun Heowá lun warihiniña lubúeingu ha féridihañabaña? Ru lumuti Hesusu hénpulu woun. Subudi lumuti meha Hesusu gebegi hamá sun lubúeingu Bungiu lun. Adüga lumuti sun liyaraati lun líderaguniña “gürigia Ísüraelina ha féridihaña” lun hagiribudun lun Heowá (Mat. 15:24; Luk. 19:9, 10). Kei Hesusu lan hóuniri mudún le buídutimabei, adüga lumuti sun liyaraati lun meferidirun lan ni aban hádangiñe ha líchugubaña Lúguchi lun (aliiha huméi Huan 6:39).

16, 17. Ida luba harihini wéiyaaña lidan afiñeni dasi le ichugúbei houn lun híderaguniña íbirigu ha mapurichihañabaña madamuridagun hagía? (Ariha huméi rekuáduru “ Ligaburi hasandiragun lubúeingu Bungiu ha féridihañabaña houngua”).

¹⁶ Ariñagati apostolu Pábulu houn wéiyaaña lidan afiñeni ha lídanbaña damuriguaü Éfesu lunti lan háyeihani Hesusu. Ariñagati: “Súnwandan narufudahan hun luagu ítara liña lan luadigimaríniwa lun híderawagun ha aniheinbei hemegeirun, luagu giñe lunti lan laritawagún luagu dimurei le lariñagubei Wabureme Hesusu dan le lariñagunbei: ‘Fuleseiwatimati [o gúndaatimati] le íchugubei sügǘ lau le eresibirubei’” (Adü. 20:17, 35). Kei aubei warihei, súdiniti hadasin wéiyaaña lidan afiñeni. Ariñagati aban wéiyaali lidan afiñeni Esüpáñana gíriti Salvador: “Dan le nasaminarun luagu lueirin hínsiñe lubúeingu Heowá ha féridihañabaña lun, ínchaha lumutina katei le lun nadügüni sun niyaraati lun níderaguniña. Chouru numuti busén lan Heowá lun nóunigiruniña”.

¹⁷ Sun íbirigu ha mapurichihañabaña madamuridagun hagía, ha uágubei layanuhóua lidan arütíkulu le, resibitiña ídemuei lun hagiribudun lun Heowá. Uguñe weyu, añahein saragu íbirigu ha giñe busenbaña hagiribudun lun Heowá. Ida luba wíderaguniña? Warihibei lidan leweñegua arütíkulu.