1. Ngu kutxani Jehohva a txi ti fananisa ni mame wu a mamisako?

“INA wamsikati a nga sikota kudivalisa eto mwanana wu a m’wunjako?” Atxiya njiwotiso txi Jehovha a nga wotisa ka masiku a mprofeti Isaya. Jehovha a gete vathu vakwe to khene: “Hambi i diku o m’divala, ani koko kha na mbi kudivala.” (Isaya 49:15) Kha ta toloveleka ti to Jehovha e ti fananisa ni mame wu a mamisako. Hambi keto ahawa a ti fananisile. Jehovha a thumisile wuxaka wu wu kuho hagari ka mame ni limenzana lakwe ti to e kombisa ati a ti pfisako tona ngu malanda akwe. Vamame vo tala va womba to fana ni ti mwanathu wu a dhanwako ku i Jasmin a nga womba, ene a ti khene: “Mbimo yi u mamisako mwanana u aka wuxaka wo sawuleka nayo.”

2. Jehovha a ti pfisa kutxani ngako mmweyo wa vathu vakwe va txi ema ku mu thumela?

² Jehovha wa ti wona mbimo yi vathu vakwe va emako ku ta mitshangano ni ku ema kutxhumayela hambi i do ko va mmweyo. Se hi nga alakanya kupanda aku Jehovha a ku pfako a txi wona mazana-zana a vanathu va va holako ngu didhawa da moya * dilembe ni dilembe.

3. Ngu tihi ti Jehovha a ti navelelako vale va nga hola?

³ Vo tala ava va holako ngu didhawa da moya va tshumela ve wuyela dibanzani, ni ku mbimo yi va wuyako ha va hoyozela ngu manza mambidi! Jehovha a va navelela ku ve wuyela  dibanzani, se nathu hi tsakela toneto. (1 Pedro 2:25) Hi nga va vhunisa kutxani? Na hi si se xamula txiwotiso txonetxo, hi na khata ngu kubhula ngu sivangelo si si mahako vamwani ve leka ku ya mitshanganoni ni kutxhumayela.

4. Ku nga maheka txani ngako hi txi ti ningetela ngutu ka mthumo?

⁴ Vamwani va lekile mthumo wawe wu teka wukhalo wa Jehovha. Mwanathu Hung * wa Ásia a womba tiya: “Ni ti heta mbimo ngu kutshwala ngu kuthuma ni txi pimisa ti to ngako ni di ni male ya yingi ti na ni hehukela kuthumela Jehovha. Se ni ti thuma mawora a mangi. Ngu toneto, ni khatile kulovha mitshanganoni ngu kutsimbila ka mbimo ni to ema. Ti woneka nga mafu a Sathani ma mahetwe kutsulupeta vathu kudotho-kudotho ti to va si thumeli Jehovha.”

5. Mwanathu Anne a mahile txani mbimo yi a nga manana ni sikarato?

⁵ Vanathu vamwani va manana ni sikarato asi si va thelako dikhodho. Mwanathu Anne wa Grã-Bretanha a ni 5 wa vanana. Ene a womba tiya: “Mmweyo wa vanana vangu a velekilwe i di txilima, ngu kutsimbila ka mbimo mwanana wangu wa dihorana a thavisilwe dibanzani, mmwani wu wa mfana a to khata kulwala ngu lihuhe. Ni khatile kujujeka mapimo a ha ko za ni lovhetela mitshanganoni. Ni gwitisa kuhola ngu didhawa da moya.” Ha dila nayo mwanathu Anne kumweko ni vamwani va va mananako ni sikarato so fana ni soneso!

6. Kungava yihi wuyelo ya kwa mbi thumisa mapswi ya ma ku ka Vakolosa 3:13? Ngu kutxani?

⁶ Lera Vakolosa 3:13. Vamwani va nga hola ngu didhawa da moya ngu kuhenyiswa ngu vanathu. Mpostoli Paulo a ti ti ziva to mbimo yimwani hi nga va ni “txisolo ka mmwani.” Ti nga maha hi di ñotwe ngu nzila ya tshofu. Ngako hi si ti woneli hi nga thuka hi henya. Kuhenya ku nga maha m’thu e ti hambanisa ni dibanza kudotho-kudotho. Wona txikombiso txa Pablo wa América do Sul. Ene a singetilwe kuva a di mahile txionho, se e luza malungelo dibzanzani. A mahile txani? Pablo a khene: “Ni henyile ngutu, se kudotho-kudotho ni lekile ku ti tshanganisa ni vanathu.”

7. Ku nga maheka txani ngako m’thu a txi zumbela kutipfa mnando ngu sionho si a nga maha?

⁷ Ngako m’thu a txi khala kumaha txionho txa hombe, a nga zumbela kupekwa ngu livhalo e hokela ha koza e ti wona a si faneleki kudhundwa ngu Jehovha. Hambi i di ti to a tisote e tshumela e divalelwa, a nga tiwona nga kha dingani kuva dilanda da Jehovha. Mwanathu wu a dhanwako ku i Francisco a tipfite ngu nzila yi yi fanako. Ene a womba tiya: “Ni txi tisola ngu kuva ni di mahile wugango. Makhatoni ni simamile ni ya mitshanganoni, kambe ni gwitisile kudyeka mapimo ni tipfa ni si faneleki kuva hagari ka vathu va Jehovha. Ni ti pekwa ngu livhalo se ni tigela to Jehovha kha ni divalela. Ngu kutsimbila ka mbimo ni emile kuya mitshanganoni.” Awe u tipfisa kutxani ngu vanathu va va mananako ni sikarato asi hi nga bhula ngu sona? Ina u ni wumbilu navo? Kambe txa lisima ngutu ngu ti to Jehovha a ti pfisa kutxani ngu vona?

8. Ina Jehovha wa divala m’thu wu a nga khala ku mu thumela? Txhamusela.

⁸ Jehovha kha va divali vale va nga mthumela ve gwita ve ema ku ya mitshanganoni. Nem kha wu divali mthumo wu va nga mu mahela. (Vaheb. 6:10) Mprofeti Isaya a bhate  txifananiso txi txi kombisako to Jehovha wa khatala ngutu ngu vathu vakwe. Ene a bhate tiya: “A na dyisa txhambi wakwe kufana ni m’dyisi; a na sengeleta sinvutana mawokoni kwakwe, e si khutarela hakhana kwakwe.” (Isaya 40:11) Jehovha kota M’dyisi wa Hombe a ti pfisa kutxani ngako nvuta yakwe yi txi ti hambanisa ni mtxhambi? Jesu a xamute mbimo yi a nga wotisa vagondiswa vakwe to khene: “Se mi khanu txani kani? Ngako m’thu a di ni 100 wa tinvuta, se yimweyo ya tona yi txi mwalala, ina kha siyi ti ta mtxhanu ni mune wa magumi ni mtxhanu wa tinvuta ni mune mimangoni, e tsimbila a txi lava ayi yi nga mwalala kani? Kungako a txi yi mana, kha ditshuri ni khani kwanu, wa tsaka ngutu ngu yona, kupinda tile ta mtxhanu wa magumi ni mune ni mtxhanu wa tinvuta ni mune, ti nga ti sa mwalala.”—Mat. 18:12, 13.

9. Vadyisi va timbimo ta kubhalwa ka Bhiblia va ti ti ñola njani tinvuta? (Wona mfota wa kapa)

⁹ Ngu kutxani hi txi fananisa Jehovha ni m’dyisi? Nguko vadyisi va tinvuta va timbimo ta kubhalwa ka Bhiblia va ti khatala ngutu ngu tinvuta tawe. Ngu txikombiso Dhavhidha a lwite ni ngonyamo atxi vhikela tinvuta takwe. (1 Sam. 17:34, 35) M’dyisi wa mnene wa tiwona ngako ku txi txhota tinvuta hambi i di yimweyo. (Joh. 10:3, 14) Ene a nga siya tinvuta ta 99 dithangani mwendo ni mmwani m’dyisi e tsimbila e lava ya yimweyo yi yi txhotako. Jesu a thumisile txifananiso txonetxo ti to e gondisa mhaka yiya ya lisima, ene a ti khene: “Tate wanu wa nzumani kha ti lavi ti to ni mmweyo wa va vavadotho e mwalala.”—Mat. 18:14.

10. Ngu kuya ngu Ezekhiyele 34:11-16, ngu ti hi ati Jehovha a thembisako ku timaha ngu tinvuta ti ti nga mwalaleka?

¹⁰ Jehovha wa dhunda mmwani ni mwani wathu, kupata ni “mmweyo wa va vavadotho” ava va nga ti hambanisa ni mtxhambi. Ngu kuthumisa mprofeti Ezekhiyele, Jehovha a thembisile ti to a ndi na xota tinvuta takwe a tile ti nga mwalaleka, e ti vhuna ti  wuseta wuxaka wa tona ni nene. Jehovha a wombile ati a ndi no maha ti to e wuyisa tinvuta takwe, i ku ti vadyisi va timbimo ta Vaisrayeli va nga ti fanete kumaha ngako nvuta yi txi txhota. (Lera Ezekhiyele 34:11-16.) Txo khata, vadyisi va ti fanete kuxota nvuta, eto ti txi lava mbimo ni mizamo ya hombe. Se ngako m’dyisi a txi mana nvuta yi yi nga mwalaleka, a ti fanete ku yi wuyisa mtxhambini. Ngu magwito, ngako nvuta yi di dawisilwe mwendo yi di ni nzala, m’dyisi a ti fanete ku yi khatalela ngu lirando ngu ku yi khutarela, e yi thuma silonda ni ku yi dyisa. Kota ‘vadyisi va mtxhambi wa Txizimu’, madhota ma fanete kumaha ti ti fanako ti to me vhuna ava va nga ti hambanisa ni dibanza. (1 Pedro 5:2, 3) Madhota ma va xota, me va wuyisa dibanzani ni ku va komba lirando ngu ku va khatalela ngu didhawa da moya. *

11. Ngu tihi ati m’dyisi wa mnene a ti pfisisako?

¹¹ M’dyisi wa mnene wa tipfisisa ti to nvuta yi nga thuka yi mwalaleka. Se ngako nvuta yi di ti hambanisile ni mtxhambi ene kha yi khawulisi. Wona txikombiso txa Jehovha txa nzila yi a nga khatalela ngu yona malanda akwe a kale mbimo yi ma nga ema ku mu thumela.

12. Jehovha a mu ñolisile kutxani Jona?

¹² Mprofeti Jona a pfhukile ngu kuthava txiavelo txakwe. Hambi keto Jehovha kha mu tsukula. Kufana ni m’dyisi wa mnene Jehovha a mu lavile e m’vhuna ngu ku mu ninga mtamo wu wu nga txi laveka ti to e hetisisa txiavelo txakwe. (Jona 2:7; 3:1, 2) Ngu magwito Jehovha a thumisile txikombiso txa thanga ti to e vhuna Jona e pfisisa lisima la wutomi wa vathu. (Jona 4:10, 11) Hi gonda txani? Madhota kha ma fanela kukuluveta me tsukula vanathu va va nga hola ngu didhawa da moya. Hahanze keto ma fanete kuzama kupfisisa ati ti nga maha mwanathu e ti hambanisa ni dibanza. Se ngako mwanathu a txi wuyela dibanzani, madhota ma fanete kusimama me mu ñola ngu lirando.

13. Hi nga gonda txani ka ti Jehovha a nga vhunisa tona m’bhali wa Masalmo 73?

 ¹³ M’bhali wa Masalmo 73 a godhote mbimo yi a nga wona vabihi va txi nga vo humelela. Ene a si tsaniseki ti to kumaha kudhunda ka Txizimu ta vhuna. (Mas. 73:12, 13, 16) Jehovha a mu vhunisile kutxani? Ene kha mu sola. Hahanze keto a mahile ti to mapswi akwe me bhalwa mu ka Bhiblia. Ngu kutsimbila ka mbimo m’bhali wuwa wa masalmo a ti woni ti to kha txi ngaho txa txinene ngutu kupala kuva ni wungana ni Jehovha. (Mas. 73:23, 24, 26, 28) Hi gonda txani? Madhota kha ma fanela kukuluveta me sola a va va kanakanako ti to kuthumela Jehovha ndinene. Hahanze ko va sola, madhota ma fanete kuzama kupfisisa ti to ngu kutxani va txi maha toneto. Se ngu kona madhota ma nga sawulako M’bhalo awu wu nga tsanisako vanathu vonevo.

14. Ngu kutxani Elija a di lavile txivhuno? Jehovha a mu vhunisile kutxani?

¹⁴ Mprofeti Elija a tutumile ngu kuthava Jezabheli. (1 Vafu. 19:1-3) Ene a ti pimisa ti to ku si na mmwani mprofeti wa Jehovha hahanze kwakwe ni ku a ti wona nga mthumo wakwe i si nga wa txilo. Elija a gumile mtamo aha koza e navela ni kufa. (1 Vafu. 19:4, 10) Jehovha kha sola Elija, hahanze keto ene a mu tsanisekisile ti to a si nga ekha ni to a ti fanete e themba mtamo wa Txizimu e tshumela e mu tsanisekisa ti to mthumo wakwe i ti wa lisima. Jehovha a mu engisete kwati Elija a txi ti phofula e tshumela e mu ninga txiavelo tximwani. (1 Vafu. 19:11-16, 18)  Hi gonda txani? Hotshethu, ngutu-ngutu madhota, hi fanete kuñola malanda a Jehovha ngu wunene. Hambi mwanathu a txo henya mwendo kutipfa a si dhundwi ngu Jehovha, madhota ma fanete ku mu engisela kha kwati mbimo yi a wombako ti a ti pfisako tona. Se ngu kona ma nga mu tsanisekisako ti to Jehovha wa mu randa.

15. Ngu kuya ngu Johani 6:39, Jesu a ti ñolisile kutxani tinvuta ta Tate wakwe?

¹⁵ Jehovha a lava hi ti pfisa kutxani ngu tinvuta takwe ti ti nga mwalaleka? Jesu a hi vekete txikombiso. Ene a ti ti ziva ti to totshe tinvuta nda lisima ka Jehovha se ene a mahile totshe ti to e vhuna “tinvuta ti ti nga mwalala ta nyumba ya ka Israyeli” to ti wuya ka Jehovha. (Mat. 15:24; Luka 19:9, 10) Jesu kota m’dyisi wa mnene a mahile totshe ti a nga ti kota ti to a si luzekelwi nem ngu nvuta ya yimweyo ya Jehovha.—Lera Johani 6:39.

16-17. Madhota ma nga va vhunisa kutxani ava va nga ti hambanisa ni dibanza? (Wona dibhokiso di di ku “ Nvuta yo mwalala yi ti pfisa kutxani?”)

¹⁶ Mpostoli Paulo a kuzetile madhota a dibanza ti to me etetela txikombiso txa Jesu. Ene a ti khene: “Hi fanela kuvhuna ava i ku sisiwana, na hi txi alakanya mapswi a Mkoma Jesu, a nga khene: ‘Kuha i kateko ya hombe ngutu kupinda kuhiwa.’” (Mith. 20:17, 35) Ti hakubasani ti to ni nyamsi madhota ma ni mthumo wo sawuleka wo khatalela tinvuta. Salvador wa Espanha awu i ku didhota a womba tiya: “Ni txi pimisa ngu nzila yi Jehovha a khatalelako ngu yona tinvuta takwe, ti ni maha ni lava kumaha totshe ti ni nga ti kotako ti to ni ti vhuna. Kota m’dyisi ngu didhawa da moya, na tiziva ti to Jehovha a lava ku ni khatalela tinvuta takwe.”

¹⁷ Votshe va hi nga bhula ngu vona ka msungo wuwa ava va nga ti godhote va vhunwi ve tshumelela ka Jehovha. Ni nyamsi ava va ti hambanisako ni dibanza ni vona va lava kuvhunwa. Ka msungo wu wu londiselako hi na ta bhula ngu tinzila to tala to vhuna ava va nga hola ngu didhawa da moya ku ve thumela Jehovha.