1. Sa unsang paagi si Jehova samag nagpasuso nga inahan?

“MALIMOT ba ang usa ka inahan sa iyang masuso”? Gipangutana kana ni Jehova sa panahon ni propetang Isaias. “Bisag kini nga mga babaye makalimot, ako dili gayod makalimot kanimo,” giingnan niya ang iyang katawhan. (Isa. 49:15) Sagad dili niya itandi ang iyang kaugalingon sa usa ka inahan. Pero nianang panahona, iya kanang gihimo. Gigamit ni Jehova ang dako kaayong gugma sa inahan ngadto sa anak niini aron ipakita kon unsa ka dako ang iyang gugma sa iyang mga alagad. Ang kadaghanang inahan parehas ug gibati sa sister nga ginganlag Jasmin, kinsa miingon, “Dihang pasusohon nimo ang imong bata, mobati kag espesyal nga kasuod kaniya nga magpabilin sa tibuok nimong kinabuhi.”

2. Unsay bation ni Jehova dihang ang usa sa iyang mga anak mopalayo kaniya?

² Si Jehova nahibalo kon ang usa sa iyang mga anak dili na motambong ug tigom ug dili na mosangyaw. Busa hunahunaa kon unsa ka sakit para kang Jehova nga makita ang libolibo niya ka alagad nga mahimong dili aktibo * kada tuig.

3. Unsay gusto ni Jehova?

³ Daghan niining minahal nga mga igsoon nga nahimong dili aktibo ang mibalik sa kongregasyon, ug nalipay kaayo ta niana. Gusto ni Jehova nga mobalik sila, ug mao pod nay atong gusto. (1 Ped. 2:25) Sa unsang paagi makatabang ta? Sa dili pa nato nâ tubagon, maayong mahibaloan nato kon nganong ang uban mohunong sa pagtambong sa tigom ug pagsangyaw.

4. Sa unsang paagi ang sekular nga trabaho nakaapektar sa uban?

⁴ Nahimong prayoridad sa uban ang ilang sekular nga trabaho. “Na-busy kaayo ko sa trabaho,” miingon si Hung, * brader nga nagpuyo sa Southeast Asia. “Sayop ang akong desisyon. Naghunahuna ko nga kon moarang-arang ko sa materyal, mas makaalagad ko kang Jehova. Busa pirme kong mag-obertaym. Nagsige kog palta sa tigom, hangtod nga wâ na gyod ko motambong. Makaingon ko nga ang kalibotan gidisenyo aron ang mga tawo anam-anam nga malayo sa Diyos.”

5. Sa unsang paagi ang sunodsunod nga mga problema nakaapektar sa usa ka sister?

⁵ Ang ubang igsoon nabug-atan sa daghang problema. Si Anne nga taga-Britain may lima ka anak. Siya miingon: “Usa sa akong mga anak natawo nga may grabeng depekto. Sa ngadtongadto, ang usa sa akong mga anak nga babaye na-disfellow, ug ang usa nako ka anak nga lalaki nag-antos sa sakit sa utok. Na-depress kaayo ko mao nga miundang ko sa pagtambong sa tigom ug pagsangyaw. Sa ulahi, nahimo kong dili aktibo.” Matandog gyod ang atong kasingkasing sa kahimtang ni Anne ug sa iyang pamilya ug sa ubang igsoon nga nakaatubang ug ingon niana nga mga problema.

6. Sa unsang paagi ang usa mahilayo sa katawhan ni Jehova kon dili niya ipadapat ang Colosas 3:13?

⁶ Basaha ang Colosas 3:13. Dunay mga alagad ni Jehova nga nasakitan sa gihimo sa ubang igsoon. Si apostol Pablo miingon nga usahay, duna tingali tay katarongan nga ‘moreklamo’ batok sa usa ka igsoon. Tingali mobati pa gani ta nga mora tag giyatakan. Kon dili ta magbantay, basin magdumot ta. Tingali sa ngadtongadto, mopalayo na ta sa katawhan ni Jehova. Matikdi ang eksperyensiya ni Pablo nga taga-South America. Giakusahan siya nga nakahimog sala, mao nga gitangtangan siyag pribilehiyo sa kongregasyon. Unsay iyang reaksiyon? Si Pablo miingon: “Nasuko ko ug anam-anam nga mipalayo sa kongregasyon.”

7. Unsa tingali ang mahitabo sa usa ka tawo nga gihasol sa iyang konsensiya?

⁷ O kaha, kon ang usa nakahimog seryosong sala kaniadto, hasolon tingali siya sa iyang konsensiya sulod sa taas nga panahon, ug mobati siya nga dili na siya higugmaon sa Diyos. Bisag mahinulsolon siya ug gipakitaan nag kaluoy, tingali mobati siya nga dili na siya angayng mahimong bahin sa katawhan sa Diyos. Mao nay gibati sa brader nga si Francisco. Siya miingon: “Gibadlong ko kay nakahimo kog seksuwal nga imoralidad. Bisag sa primero tigtambongan gihapon kog tigom, na-depress ko ug mibati nga dili na ko angayng mahimong bahin sa katawhan ni Jehova. Gihasol ko sa akong konsensiya, ug naghunahuna ko nga wala ko pasayloa ni Jehova. Sa ngadtongadto, mipalayo ko sa kongregasyon.” Unsay imong gibati sa mga igsoon nga naa sa mga situwasyon nga atong gihisgotan? Nasabtan ba nimo ang ilang gibati? Labaw sa tanan, unsay gibati ni Jehova kanila?

8. Kalimtan ba ni Jehova kadtong nag-alagad niya kaniadto? Ipatin-aw.

⁸ Si Jehova dili malimot niadtong nag-alagad kaniya kaniadto pero karon temporaryong mipalayo sa iyang katawhan. Dili sab niya kalimtan ang ilang gihimo kaniadto sa pag-alagad kaniya. (Heb. 6:10) Si propetang Isaias naggamit ug nindot nga ilustrasyon aron ipakita kon unsa ka dako ang pagmahal ni Jehova sa iyang katawhan. Siya misulat: “Samag magbalantay sa karnero, iyang atimanon ang iyang panon. Pinaagi sa iyang bukton iyang tapokon ang mga nating  karnero, ug iya silang kugoson.” (Isa. 40:11) Unsay bation ni Jehova, ang Kinalabwang Magbalantay, kon ang usa moundang sa pag-alagad kaniya? Gipadayag ni Jesus kon unsay pagbati ni Jehova dihang iyang gipangutana ang iyang mga tinun-an: “Unsay inyong hunahuna? Kon ang usa dunay 100 ka karnero ug ang usa niini masaag, dili ba niya biyaan sa kabukiran ang 99 ug pangitaon ang usa nga nasaag? Ug kon makaplagan niya kini, sultihan ko kamo, mas dako ang iyang kalipay labot niining usa kay sa 99 nga wala masaag.”​—Mat. 18:12, 13.

9. Sa kapanahonan sa Bibliya, giunsa pagtratar sa maayong mga magbalantay ang ilang mga karnero? (Tan-awa ang hulagway sa atubangan sa magasin.)

⁹ Nganong ikakomparar nato si Jehova sa usa ka magbalantay? Tungod kay ang maayong magbalantay sa kapanahonan sa Bibliya nag-atiman pag-ayo sa iyang mga karnero. Pananglitan, gipatay ni David ang usa ka leyon ug ang usa ka oso aron panalipdan ang iyang mga karnero. (1 Sam. 17:34, 35) Ang maayong magbalantay makamatikod gyod bisag usa lang ka karnero ang mawala. (Juan 10:3, 14) Biyaan niya ang iyang 99 ka karnero diha sa toril o ipaatiman kini sa ubang magbalantay aron pangitaon ang usa nga nawala. Si Jesus naggamit niana nga ilustrasyon sa pagtudlo kanato niining importanteng kamatuoran: “Dili gayod buot sa akong Amahan nga anaa sa langit nga malaglag bisan usa lang niining ubos nga mga tawo.”​—Mat. 18:14.

10. Sumala sa Ezequiel 34:11-16, unsay gisaad ni Jehova nga iyang himoon sa iyang mga karnero nga nawala?

¹⁰ Gimahal ni Jehova ang matag usa kanato, apil ang “ubos nga mga tawo” nga mipalayo sa iyang kongregasyon. Pinaagi kang propetang Ezequiel, ang Diyos nagsaad nga iyang pangitaon ang iyang mga karnero nga nawala ug tabangan sila nga mabalik ang ilang maayong relasyon kaniya. Ug iyang gisulti kon unsay iyang himoon sa pagluwas kanila. Ang iyang himoon parehas sa himoon sa Israelinhong magbalantay dihang mawala ang usa ka karnero. (Basaha ang Ezequiel 34:11-16.) Una, pangitaon sa magbalantay ang karnero, ug kini nagkinahanglag  dakong panahon ug paningkamot. Dihang iya na kining makit-an, iya kining dad-og balik sa panon. Ug kon ang karnero nasamdan o gigutom, tabangan sa magbalantay ang naluya nga karnero, bugkosan ang samad niini, kugoson kini, ug pakan-on. Ang mga ansiyano, nga maoy magbalantay sa “panon sa Diyos,” kinahanglan sab nga mohimo niini aron tabangan si bisan kinsa nga mipalayo sa kongregasyon. (1 Pedro 5:2, 3) Pangitaon sila sa mga ansiyano, tabangan nga makabalik sa kongregasyon, ug pakitaag gugma pinaagi sa pagtabang kanila nga masuod pag-usab kang Jehova. *

11. Unsay nasabtan sa maayong magbalantay?

¹¹ Ang maayong magbalantay nakasabot nga ang karnero puwede gyong mawala. Ug kon mahitabo nâ, dili silotan sa magbalantay ang karnero. Konsideraha ang ehemplo nga gihatag sa Diyos sa pagtabang sa pipila niya ka alagad nga temporaryong mibiya kaniya.

12. Giunsa pagtratar ni Jehova si Jonas?

¹² Si propetang Jonas wala motuman sa iyang asaynment. Bisan pa niana, si Jehova wala maghunahuna nga dili na tabangan si Jonas. Samag maayong magbalantay, giluwas ni Jehova si Jonas ug gitabangan siya nga makabaton sa kusog nga iyang gikinahanglan sa pagtuman sa iyang asaynment. (Jon. 2:7; 3:1, 2) Sa ulahi, ang Diyos naggamit ug tanom nga upo aron tabangan si Jonas nga makasabot nga bililhon ang kinabuhi sa matag tawo. (Jon. 4:10, 11) Unsay leksiyon? Ang mga ansiyano dili maghunahuna nga dili na tabangan ang mga igsoon nga nahimong dili aktibo. Maningkamot hinuon sila sa pagsabot kon nganong ang karnero mipalayo sa kongregasyon. Ug dihang ang maong karnero mobalik kang Jehova, atimanon siya sa mga ansiyano ug pakitaag gugma.

13. Unsay atong makat-onan sa reaksiyon ni Jehova sa giingon sa nagsulat sa Salmo 73?

¹³ Ang nagsulat sa Salmo 73 nawad-ag gana sa pag-alagad dihang iyang nakita nga morag malamposon kaayo ang mga daotan. Naghunahuna siya kon duna ba gyoy kaayohan ang  paghimo sa kabubut-on sa Diyos. (Sal. 73:12, 13, 16) Unsay reaksiyon ni Jehova? Wala siya maghunahuna nga daotan ang maong tawo. Gani, ang giingon sa maong tawo giparekord sa Diyos diha sa Bibliya. Sa ulahi, nasabtan sa salmista nga sa kinabuhi, wala nay mas maayo pa kay sa pagkahimong higala ni Jehova. (Sal. 73:23, 24, 26, 28) Unsay leksiyon? Ang mga ansiyano dili dayon maghunahuna nga daotan ang usa ka tawo nga nagduhaduha kon duna bay kaayohan ang pag-alagad kang Jehova. Sabton hinuon nila kon nganong nasulti o nabuhat kadto sa igsoon. Dayon, gamiton sa mga ansiyano ang Bibliya sa pagdasig kaniya.

14. Nganong si Elias nagkinahanglag tabang, ug giunsa kini paghatag ni Jehova?

¹⁴ Si propetang Elias miikyas gikan kang Rayna Jezebel. (1 Hari 19:1-3) Naghunahuna siya nga wala nay laing propeta si Jehova, ug mibati siya nga walay pulos ang iyang pag-alagad. Na-depress pag-ayo si Elias ug gusto na niyang mamatay. (1 Hari 19:4, 10) Imbes hukmang daotan si Elias, gipasaligan siya ni Jehova nga wala siya mag-inusara, nga siya makasalig sa gahom sa Diyos, ug duna pay daghang buluhaton nga ipahimo kaniya. Si Jehova naminaw pag-ayo sa mga kabalaka ni Elias ug naghatag kaniyag bag-ong mga asaynment. (1 Hari 19:11-16, 18) Unsay leksiyon? Kitang tanan, ilabina ang mga ansiyano, kinahanglang buotan sa mga karnero ni Jehova. Dihang ang usa mopahayag sa iyang kasuko o mobati nga dili na angayng kaluy-an ni Jehova, ang mga ansiyano maminaw samtang ibubo niya ang iyang kasingkasing. Dayon pasaligan nila siya nga gimahal siya ni Jehova.

15. Sumala sa Juan 6:39, unsay gibati ni Jesus sa mga karnero sa iyang Amahan?

¹⁵ Unsay gusto ni Jehova nga bation nato sa iyang mga karnero nga nawala? Makakat-on ta sa ehemplo ni Jesus. Nahibalo siya nga gipabilhan ni Jehova ang tanan Niyang karnero, maong gibuhat ni Jesus ang tanan niyang maarangan sa pagtabang sa “nawalang mga karnero sa nasod sa Israel” nga makabalik kang Jehova. (Mat. 15:24; Luc. 19:9, 10) Ingong maayong magbalantay, gihimo sab ni Jesus ang tanan niyang maarangan aron dili siya mawad-an ug bisan usa sa mga karnero ni Jehova.​—Basaha ang Juan 6:39.

16-17. Unsay angayng bation sa mga ansiyano bahin sa pagtabang niadtong mipalayo sa kongregasyon? (Tan-awa ang kahong “ Kon Unsa Tingali Gibati sa Nawalang Karnero.”)

¹⁶ Gidasig ni apostol Pablo ang mga ansiyano sa kongregasyon sa Efeso nga sundogon ang ehemplo ni Jesus. Siya miingon: “Kinahanglang tabangan ninyo kadtong mga luya ug hinumdoman ang mga pulong ni Ginoong Jesus, dihang siya miingon: ‘Dunay labaw nga kalipay sa paghatag kay sa pagdawat.’” (Buh. 20:17, 35) Klarong gipakita niini nga ang mga ansiyano karon dunay importanteng responsibilidad sa pag-atiman sa katawhan ni Jehova. Si Salvador, nga ansiyano sa Spain, miingon: “Dihang maghunahuna ko kon unsa ka dako ang pagmahal ni Jehova sa iyang nawalang mga karnero, madasig ko sa paghimo sa tanan nakong maarangan sa pagtabang kanila. Ingong magbalantay sa espirituwal, kombinsido ko nga gusto ni Jehova nga atimanon nako sila.”

¹⁷ Ang tanang igsoon nga gihisgotan niining artikuloha nga mipalayo sa kongregasyon natabangan nga mahibalik kang Jehova. Sa pagkakaron, daghan pa ang gustong mohimo niana. Hisgotag dugang sa sunod nga artikulo kon unsay atong mahimo sa pagtabang kanila nga mobalik kang Jehova.