1. Yehova oniviladdanihedha nni na mambali?

“NGANI, mayi gani onwodha omudduwala mwanaye wanyenye?” Nivuzo ntti okosile ddi Yehova nsaka na namavuhulela Izaiya. (Iza. 49:15) Mulugu wahiloga dhahi na nlogo naye “Agakalawo onimudduwala mwanaye, miyo txipo kaddinodduwale.” Yehova kaniviladdanihetxa vaddiddi na mambali. Masiki dhawene wahiviladdaniha mudhidhi walogiliye mazu aba. Yehova wahilabihedha wiwanana olivo wa mambali na mwanaye wi aziwihe mukalelo wakweliye nlogo naye. Amambali enjene anorumela mazu aba alogile murogora Jasmin, “Ogamwamwihaga mwanawo, onokala wofiyedheya vaddiddi na iyene.

2. Yehova oniwamo dhavi akala mudhari waye onottiya omulabela?

² Yehova onoziwa akala mudhari waye onottiya odhowa omatugumanoni Okristu vina odhowa omabasani olaleya. Kobuwela mukalelo oniwamo iyene ogawonaga adhari aye matxikwi na matxikwi va yakani * attiyaga omulabela.

3. Txini enfuna Yehova?

³ Enji wa abalihu vina arogorihu okweleya akumuwile ageyelela mmulogoni iyo ninowawakela na mada meeli! Yehova onowafuna wi eyelele mmulogoni, iyo vina ninfuna yakakene. (1 Ped. 2:25) Iyo ninakamihedhe dhavi? Nihinatti wakula nivuzo ntti, ninofwanyela oziwa enattukulela ottiya odhowa omatugumanoni vina mmabasani olaleya.

4. Txini yapadduwele attu ena sabwa ya mabasa?

⁴ Ena anottiya mabasa awa okala amakamaka mwigumini mwawa. Mbali w’ogusini wa Ásia oniliwa Hung *, ohiloga “Miyo ddanonga mudhidhi na guru sabwa ya mabasa aga. Ddahivipela malago ddubuwelaga wi ddigakana kobiri gwè ddinele owodha omulabela Yehova deretu. Venevo ddahiroma olaba mudhidhi mwinjene. Miyo ddahiroma oyelela matugumano menjene osogorhowa ddahittiya otugumana na mulogo. Satana onolabihedha elabo wila azuzumihena attu, wi vang’ono-vang’ono attiye omulaba Mulugu.”

5. Murogora dhahi opattiwe dhavi makattamiho ofarelana?

⁵ Abali na arogora ena anofwanyiwa makattamiho anawobaniha. Anne wo Bretanha onalela aima atanu ohiloga “Mwanaga mmodha obaliwe woragalene. Vasogorhova, mwanaga wamuyana oburutxiwa mmulogoni oku mwina ohikana eredda y’ottamaga musorho. Sabwa ya ejuwene ddankala wodhugudheyene ofiyedha ottiya odhowa omatugumanoni vina mabasa olaleya. Omamalelowa ddahittiya omulabela Yehova.” Iyo ninomweddela ttagaraga Anne vamodha na amudhaye vina na abale anfanyiwa makattamiho akakene!

6. Ohivirihamo nlebo na Kolosi 3:13 enimuttukulela dhavi muttu okala wolapela na nlogo na Yehova?

⁶ Kengesa Kolosi 3:13. Adhari ena a Yehova anonyonyeya sabwa ya okoseliwa elobo yabure na abali a mmulogoni. Murumiwi Paulo wahinonelamo wi masaka mena ninokaana ‘sabwa ya omusumela’ mbali obe murogora. Mudhidhi mwina ninodha weddihiwa na mukalelo wohifanyela. Nigahikale pasope ninodha okoya ntxiga. Osilidhiwa onomuttukulela muttu vang’ono-vang’ono okala wolapela na nlogo na Yehova. Koona yotagiya ya mbali Pablo, onkala Ogusini wa Amerika. Iyene wahimageedhiwa wi ohittega, edhile opadduwa jawi, wahiyelela ettomo yaye mmulogoni. Iyene wewilemo dhavi? Pablo ohiloga, “Miyo ddahisilidhiwa, vina vang’ono-vang’ono ddahittihaya otugumana.”

7. Mubuwelo wokubanyiha onwodha dhavi ompatta muttu?

⁷ Mubuwelo onowodha omukubanyiha muttu wavonyile wale nlamulo na Mulugu, ofiyedha wubuwela wi kafwanyela okweliwa na Yehova. Masiki agamalile otxinuwa vina weddeliwa ttagaraga, iyene onodha ovyona wi kafwanyela okala vamodha na nlogo na Mulugu. Mbali oniliwa Francisco wavyona dhawene. Iyene ohiloga. “Miyo ddahisaddeyiwa sabwa ya okosa mararuwo, vamaromo ddandowa omatugumanoni, masiki dhawene ddakala wokubanyene vina ddanvyona wi kaddifwanyela okala na nlogo na Yehova. Mubuwelo waga wanddidhugudha, mbwenye ddobuwela wi Yehova kaddilevelele. Na mudhidhiya ddahittiya otugumana.” Ononamo dhavi ogawonaga abali na arogora agumanilena makattamiho oligana na aba alogiwe omaromo? Weyo onowaweddela ttagaraga? Yehova oniwamo dhavi ogawonaga abali abo?

8. Yehova onowadduwala abale amulabela? Katapulela.

⁸ Yehova kanadduwala abale amulabela, abuwene attiyele otugumana na nlogo naye. Iyene kandduwala mabasa amukoselani. (Aheb. 6:10) Namavuhulela Izaiya oleba nladdaniho napama ninoniha mukalelo onkoya  Yehova nlogo naye. Iyene ohiloga wi Yehova olí “Ninga mukumbuzi onsapiha mabilaye, onathukula na mada aye ana-mabila, onadhowana amayi awayá mburo wawithuwa.” (Iza. 40:11) Mukumbuzi Munddimuwa oniwamo dhavi okala nibila naye ninorimela? Yezu wahawaddela anamasunza aye mukalelo oniwamo Yehova mwavuzeliye dhahi: “Munonamo dhavi? Muthu agakana mabila zana, nidhá orimelavo nimodha, kanathiye mena makumatanu na manayi na matanu na manayi venevo valani, adhowa otamela-tamela nirimelilevo? Miyo ddinowaddelani wi agafwanya, onohagalalela nthi namurimelile opitha abale makumatanu na manayi na matanu na manayi alivi na iyene.”​—Mt. 18:12, 13.

9. Masaka a Bibilia akumbuzi apama abarela dhavi mabila awa? (Kang’ana foto ya kapa.)

⁹ Ekaleli nni yamakamaka omuladdaniha Yehova na mukumbuzi? Sabwani masaka a Bibilia akumbuzi ambarela vaddiddi mabila awa. Ninga motagiha, mudhidhi wasapiha David mabila wahimpa poddogoma na nikurukumwa wi abarele mabilaye. (1 Sam. 17:34, 35) Mukumbuzi wapama onotamela oziwa akala nibila nimodha nihirimelavo. (Jo. 10:3, 14) Mukumbuzi wapama onowodha ottiya mabila 99 muttangani obe wattiyedha akumbuzi akwaye badhowa otamela nttile nirimelile. Yezu ohiloga nladdaniho ntti wi anisunzihena ebaribari eji yamakamaka: “Vamodhavi Babinyu, oli wirimu, kanfuna wi arimelevo nne mmodha wa athu aba añgono-ñgono.”​—Mt. 18:14.

10. Mowiwanana na Ezekiyel 34:11-16, txini epikirele Yehova okosa na mabilaye abalaleyile?

¹⁰ Yehova onomukwela muttu-muttu wa iyo, vamodha na ‘abale’ ambudduwa muttangani mwaye. Mulugu wahimwaddela namavuhulela Ezekiyel, wi agahitamela mabilaye arimelile vina agahakamihedha okana wili egumi yomuyani. Iyene vina wahiloga ttarho dhigattukuliye wi avunena abale abalaleyile, ttarho dhakakene dhattukula mukumbuzi wa mw’Izrayel agafuna ovuna nibila nirimelile.  (Kengesa Ezekiyel 34:11-16.) Voroma, mukumbuzi wantamela nibilana, wi afwanye yanfuneya guru vina mudhidhi. Agafwanya, wanttukulela muttanganimwa. Ottiya ejo, nibila napiwa dala wanjiya, nttile navoreheya wansasanyedha viloddadha vina nttile nobana wankamihedha. Anddimuwa a mmulogoni, ansapiha ‘mabila, a Mulugu’ anofwanyela ottukula ttarho esi wi amukamihedhe oddule ottiyile otugumana. (1 Ped. 5:2, 3) Anddimuwa a mmulogoni anomutamela, anomukamihedha wi eyeyelele mmulogoni, vina anomulagiha okwela mwa omukamihedha mpaddi w’omuyani. *

11. Txini ennonelamo mukumbuzi wapama?

¹¹ Mukumbuzi wapama onoziwa akala nibilanaye ninfuna orimela. Vina akala nibilana ninovenyamo muttanganimwa, nanda niyela mukumbuziya kanttabutxa. Katanalela yotagiha ya Mulugu vaganiliye wakamihedha adhari aye, ali wolapelana na Yehova.

12. Yehova omweddihile dhavi Jona?

¹² Namavuhulela Jona wahittiya omwiwelela Yehova mwa okoodda odhowa o Ninive. Masiki dhawene Yehova kamunyanyalile. Ninga mukumbuzi wapama, wahinvuna vina wahimukamihedha okana guru wi akwanihe mabasa amuttomeliye. (Jona 2:7; 3:1, 2) Vasogorhova, Mulugu wahimusunziha Jona ttima enna egumi ya muttu ddi muttu opitta mukura. (Jona 4:10, 11) Ninsunzavo nni? Anddimuwa a mmulogoni kamaguvele wanyanyala abale akumule omulabela Yehova. Ottiya ejo, anddimuwa a mmulogoni onotamela onononelamo ettukulele nibila obudduwa muttangani. Vina nibilana nigamwiyelela Yehova, anddimuwa a mmulogoni anodhowavi atanalaga na okwela.

13. Txini ensunzavo iyo na mukalelo omweddihile Yehova namaleba Salmo 73?

¹³ Namaleba Salmo 73 wahikukumuwa vawoniye avuti ahikanaga makattamiho. Iyene wahinyonyeya obuwelaga wi weddelana yovi magano a Mulugu. (Masal. 73:12, 13, 16) Nanda Yehova wewilemo dhavi?  Iyene kamusisigulile mulobwana oddule. Vowi ohittiya mazu aye olebiwa mBibiliani. Munasalmo wahinonelamo wi kuli elobo yattima mwigumini empitta okala marho wa Yehova. (Masal. 73:23, 24, 26, 28) Ninsunzavo nni? Anddimuwa a mmulogoni kamaguvele wattonga abale anroma wubuwela wi omulabela wawa Yehova kuna ttima. Ottiya wattonga, awene anotamela onononelamo mwaha onattukulela ologa dhahene vina wubuwelaga dhawene. Agakosa dhawene panawodhani wakamihedha amulabihedhaga Bibilia.

14. Sabwaya jani yafunela Eliya nikamihedho, vina Yehova wamukamihedhe dhavi?

¹⁴ Namavuhulela Eliya wahimuttawa Jezabel. (1 Amwe. 19:1-3) Iyene wobuwela wi kaliwo muttu mwina wamulabela Yehova, vina wobuwela wi mabasa aye ali ebewene. Eliya wahidhugudheya ofiyedha okumbirha okwa. (1 Amwe. 19:4, 10) Ottiya omusisigula Eliya, Yehova wahimulibiha na mazu awi iyene kali yeka, ahikalawo attu enjene amulabela, nona Eliya wanfwanyeela okuluvela guru dha Mulugu. Yehova wahivuruwana na ttagaraga makattamiho a Eliya vina wahimuttomela mabasa mena. (1 Amwe. 19:11-16, 18) Ninsunzavo nni? Iyo notene, makamaka anddimuwa a mmulogoni, anofwanyela weddiha mabila a Yehova na ttagaraga. Akala muttu onologa dhinimudhugudha obe onowubuwela wi kafwanyela ttagaraga ya Yehova, anddimuwa a mmulogoni anofwanyela omvuruwana agalogaga dhili mmurimani mwaye. Ottiya ejo awene anolibiha nibilana nirimeelile sabwani Yehova onovaha ttima.

15. Mowiwanana na Joau 6:39, Yezu wewamo dhavi sabwa ya mabila a Yehova?

¹⁵ Txini ennifunana Yehova wi nikose akala nibilanaye ninorimela? Yezu ohinittiyedha yotagiha wi nifware. Iyene wanziwa wi mabila otene a Yehova ahikana ttima vamentoni va Mulugu, nona, Yezu wahikosa muli mwetemwene wi akamihedhe “mabila orimela a nlogo na Izrayel” omwiyelela Yehova. (Mt. 15:24; Luka 19:9, 10) Ninga mukumbuzi wapama, Yezu wahikosa muli mwetemwene wi ahittiye orimela nibila na Yehova.​—Kengesa Joau 6:39.

16-17. Anddimuwa a mulogo aniwamo dhavi sabwa ya wakamihedha abale apupuruwile? (Kona kasha “ Nibila Nirimelile Niniwamo Dhavi.”)

¹⁶ Murumiwi Paulo wahakokomeza anddimuwa a mulogo wa Éfeso wi afware yotagiha ya Yezu. “Enofuneya othidda mabasa, owakamihedhana ahawi, nubuwelaga mazu a Nabuya Yezu anloga: ‘Ovaha onothabiha opitha ovahiwa.’” (Mer. 20:17, 35) Nlebo ntti ninowoniha wi anddimuwa a mmulogoni ahikana muttorho wozuzumela mabila a Yehova. Salvador oli munddimuwa wa mulogo wa Espanha ohitapulelamo dhahi “Ddigobuwela mukalelo onzuzumela Yehova mabilaye arimelile, ddittukuleleya okosa muli mwetemwene wi ddikamihedhe. Ninga mukumbuzi wa omuyani, Miyo ddinoziwa wi Yehova onddifunana wi ddakamihedhe.”

¹⁷ Otene alogiwe mu nsunzoni ntti akalile wolapelana na Yehova ahikamihedhiwa omwiyelela. Na mudhidhiya enjene akumuwele omulabela Mulugu ahisakula okosa yakakene. Nsunzo nifwarela ninele osekeserha mowakwana-mwene mukalelo onawodhihu wakamihedha omwiyelela Yehova.