MUTWE WAKULILONGESA 25
“Yami Mwene Mungufupa Mapanga Jami”
“Yami mwene mungukahengula hali mapanga jami ni kuafupa.”—EZE. 34:11.
MWASO 105 “Zambi Iye Zango”
CHIKUMA CHILEMU *
1. Mumu liaka Yehova alitesele ni umwe mama?
SHINA pwo “mahasa kuvulama mwana akwamwisa?” Chihula chino, che Yehova ahulile ha matangwa ja profeta Izaia. Yakolweza atu jenyi ngwenyi, chipwe o mavulama “hindu ami chichi kavulama yena.” (Iza. 49:15) Yehova keshi kulitesa ni umwe mama mashimbu eswe, alioze hano che alingile. Yehova yatongola zango lize umwe mama akwete hali mwanenyi hanga asolole zango lize apwile nalio hali tuvumbi twenyi. Amama eswe mahasa kutayiza yize ndumbu Jasmim ambile ngwenyi: “Muze umwe mama akusema mwana, zango lienyi hali mwana liakupwa likolo chinji.”
2. Kuchi Yehova akwiva muze umwe wa kuli ana jenyi akulitwamina kumuwayila?
2 Yehova kakunyingika muze umwe wa kuli ana jenyi akulitwamina kuya ku kukunguluka ni kwambujola, chino chakumuvwisa chinyengo. Achinyonga ha yikola yize Yehova akwiva hakumona ana jenyi anji kanazeya ku spiritu * ha miaka yeswe.
3. Yika Yehova anazange?
3 Anji a kuli mandumbu jacho akokoloka ku ufulielo kakufuna mu chikungulwila, muze akufuna twakwatambula kanawa! Yehova kanazange hanga ayo ahiluke, ni yetu che tunazange. (1 Petu. 2:25) Mba kuchi mutusa kukwasa mandumbu waze hanazeya ku ufulielo hanga ahiluke mu chikungulwila? Shimbu kanda tuchikumbulula chihula chino, chitangu tunyingikenu mumu liaka mandumbu amwe akulitwamina kuya ku kukunguluka ni kwambujola.
MUMU LIAKA MANDUMBU AMWE AKULITWAMINA KUWAYILA YEHOVA?
4. Yika yakulingiwa kuli amwe hamukunda wa mulimo?
4 Mandumbu amwe kakwecha hanga mulimo wo wa ku musunya upwe chuma chilemu chinji ku mwono wo. Hung, * umwe ndumbu wa ku Ásia yamba ngwenyi: “Napwile ni kukalakala chinji ku mulimo wami wa ku musunya. Yingunyonga ngwami, mungulingila kanawa Yehova nyi napwa ni mbongo jinji. Hachino, yinguputuka kulihana chinji ku mulimo wami. Hakehe-hakehe yingwecha kukunguluka, kulutwe yingulitwamina lume kukunguluka. Yuma ya hano hashi ha Satana, yakutuhandununa hakehe-hakehe kuli Zambi.”
5. Yika yalingiwile kuli umwe ndumbu wa pwo hamukunda wa yipikalo?
5 Mandumbu amwe kakuhonga chinji hamukunda wa yipikalo. Ana, umwe ndumbu wa ku Grã-Bretanha uli ni ana atano yamba ngwenyi: “Mwanami umwe kasemukine ni umwe musongo ukalu chinji. Hakupalika cha mashimbu, mwanami wa pwo yamusosolola mu chikungulwila, mukwo, yaputuka kupwa ni mahesu-hesu. Nahongele chinji mu mbunge, chocho yingulitwamina kuya ku kukunguluka ni kwambujola. Hachino, yinguzeya ku spiritu.” Chakupiha chinji kunyingika ngwo, ndumbu Ana ni usoko wenyi ni mandumbu akwo kakupalika mu yipikalo yino.
6. Mumu liaka mutu yoze keshi kukaula chiyulo chili ha A-Kolosu 3:13, mahasa kulihandununa ni atu ja Yehova?
6 Tanga A-Kolosu 3:13. Tuvumbi amwe a Yehova, kakwivwa yinyengo ha yize mandumbu akwo akwamba hanji kwalinga. Postolo Paulu yanyingika ngwenyi, ha mashimbu amwe mutuhasa kupwa ni chitela chakuvwila uli umwe ndumbu. Muchihasa kupwa nawa hanji umwe ndumbu matulinga yuma ya uhenge. Kashika, nyi kutwakanyamine mutuhasa kutulika toto mu mbunge. Hakupalika cha mashimbu, toto liacho mulihasa kutuhandununa ni atu ja Yehova. Tutalenu yize yalingiwile kuli Paulu, umwe ndumbu wa ku América ya ku Sule. Yamuliongela ngwo, kalinga chimwe chuma, alioze kakachilingile, chocho yamuchiza yiteli yize apwile nayo mu chikungulwila. Yika Paulu alingile? Iye yamba ngwenyi: “Nevwile uli unji, hakehe-hakehe yingukatuka mu chikungulwila.”
7. Yika mutu akunyonga muze mbunge yenyi yinamusopesa?
7 Mandumbu amwe, kakulemewa mu mbunge hamukunda wa shili yize alingile. Kakunyonga ngwo, katelele kupwa ni zango lia Zambi. Chipwe ngwe Yehova hanaakonekena, nihindu ayo kakunyonga ngwo katelele kupwa mukachi ka atu ja Zambi. Chenacho umwe ndumbu avuluka ngwo, Francisco apwile ni kwivwa. Iye yamba ngwenyi: “Kanguhele fumbo hamukunda wakulinga utanji. Ku uputukilo, te nakuyaya kukunguluka, alioze, hakupalika cha mashimbu yingulitwamina lume. Yingunyonga ngwami, chatelele kupwa mukachi ka atu ja Yehova. Mbunge yami yapwile ni kungusopesa chinji, nawa te kuchishi kutayiza ngwami, Yehova kangukonekena. Hakupalika cha mashimbu, yingulitwamina kuya ku kukunguluka.” Kuchi wakwivwa ha kunyingika ngwo, mandumbu anji kakupalika mu yipikalo ngwe yino twatongola? Shina muhasa kulisa mu chihela cho? Nawa yika Yehova akunyonga hali ayo?
YEHOVA KAKUZANGA MAPANGA JENYI
Umwe kafunga wa ha mashimbu ja A-Izalele kanafungu panga yoze watokanga (Tala maparagrafu 8-9) *
8. Shina Yehova kakuvulama waze hanamulingila? Lumbununa.
8 Yehova keshi kuvulama tuvumbi twenyi waze hanazeye ku spiritu. Keshi kuvulama yuma yeswe yize mandumbu jacho hanamulingila. (Hepre. 6:10) Profeta Izaia kahanyine chilweza chipema chinasolola chize Yehova akuzanga atu jenyi. Iye yasoneka ngwenyi: “Kumakalisa chendo chenyi ngwe kafunga, kumakakunga ana-mapanga mu moko jenyi, kumakaambata mukondo.” (Iza. 40:11) Kuchi Yehova kafunga munene akwivwa, muze umwe panga akusosoloka mu chendo chenyi? Yesu kasolwele chize Yehova akwivwa muze ahulile tumbaji twenyi ngwenyi: “Kuchi nunashinginyeka? Nyi kachi umwe mutu mapwa ni kulakaji lia mapanga, mba umwe mapianguka, keshi kuhichika makumi livwa ni livwa, akaye ha milundu, akafupe yoze unapianguka, nyi? Nyi kachi mamuwana, pundu ngunambe kuli yenu ngwami, Mawahilila hali yoze umuwika kuhiana hali makumi livwa ni livwa waze kapiangukileko.”—Mateu 18:12, 13.
9. Kuchi kafunga mupema apwile ni kufunga mapanga jenyi ku mashimbu akunyima? (Tala chizulie ha chifukilo.)
9 Mumu liaka kutesa Yehova ni kafunga chinalite? Mumu ku mashimbu akunyima, kafunga mupema kapwile ni kulihulumba chinji hali mapanga jenyi. Chakutalilaho, Ndawichi kashihile ndumba ni ursu hanga afunge mapanga jenyi. (1 Samue. 17:34, 35) Kafunga mupema kakunyingika chipwe muze umwe panga akutoka. (Yoa. 10:3, 14) Kafunga mupema mahasa kuhichika mapanga 99 mu limba lienyi hanji kuli kafunga mukwo hanga afupe panga yoze watoka. Yesu katongwele chilweza chino hanga atulongese umwenemwene ulemu, iye yamba ngwenyi: “Hi upale wa Tatenu ko yoze uli mu malilu, umwe wa wano akepe akatoke.”—Mateu 18:14.
Kafunga mapanga wa ku mashimbu ja A-Izalele, kapwile ni kulihulumba chinji hali panga yoze watoka (Tala maparagrafu 9)
YEHOVA KAKUFUPA MAPANGA JENYI
10. Kulita ni Ezekiele 34:11-16, yika Yehova hanalakenya kulinga hali mapanga waze hanatoko?
10 Yehova kakuzanga tuvumbi jenyi eswe, chipwe waze “akepe hanatoko.” Kupalikila muli profeta Ezekiele, Zambi hanalakenya kufupa mapanga jenyi eswe waze hanatoko ni kwakwasa hanga afune mu chendo chenyi. Iye yasolola yuma yize te malinga hanga aakwase kufuna mu chendo chenyi, yuma yacho yinalifu ni yize kafunga wa ku mashimbu akunyima apwile ni kulinga hanga awane panga yoze watoka. (Tanga Ezekiele 34:11-16.) Chitangu, kafunga kapwile ni kusa tachi hanga afupe panga yoze watoka. Muze mamuwana, mamumbata hanga amutwale kuze kuli mapanga akwo. Nyi panga wacho kali ni chilonda hanji ni zala, kafunga kapwile ni kumusa mukondo, kufuka chilonda chenyi ni kumwaha kulia. Tufunga waze akufunga “mapanga a Zambi,” chekwamba, makulwana a mu chikungulwila, no che atamba kulinga hanga akwase mandumbu waze hanalitwamina kukunguluka. (1 Petu. 5:2, 3) Makulwana a mu chikungulwila kakufupa mapanga wano, kakwakwasa hanga ahiluke mu chikungulwila, kakwasolwela zango ha kwakwasa ku ufulielo. *
11. Kafunga mupema yika te akunyingika?
11 Kafunga mupema kananyingika ngwenyi, mapanga mahasa kutoka. Ku mashimbu akunyima, muze kafunga apwile ni kuwana panga yoze watoka, te keshi kumulamba. Tutalenu chilweza chize Yehova atuhichikilile muze akwashile tuvumbi twenyi waze apalikile mu lamba.
12. Kuchi Yehova akwashile Yona?
12 Profeta Yona, kachinyine chiteli chenyi. Alioze Yehova kakamwehukile. Yamulamwina ni kumukwasa hanga amanunune chiteli chenyi. Hachino, Yehova yasolola ngwenyi, kali kafunga mupema. (Yona 2:7; 3:1, 2) Hakupalika cha amwe mashimbu, Zambi yomisa lwitwi hanga alongese Yona ngwenyi, mwono wa atu uli ulemu chinji. (Yona 4:10, 11) Yika yino yinatulongesa? Twalilongesa ngwetu, makulwana a mu chikungulwila katambile kulitwamina kukwasa mandumbu waze hanazeye ku ufulielo. Shimbu alinge chino, ayo kakufupa kunyingika mumu liaka panga anazeye ku ufulielo. Muze panga wacho akufuna kuli Yehova, makulwana kakununga ni kumusolwela zango.
13. Yika mutuhasa kulilongesa ha chize Yehova akwashile mukwa kusoneka Samu 73?
13 Mukwa kusoneka Samu 73, kapwile ni kunenganyana hakumona yingulungulu kanawahilila ku mwono. Kapwile ni kulihula nyi chili lume chilemu kulingila Zambi. (Samu 73:12, 13, 16) Kuchi Yehova amukwashile? Iye kakamutenukinyine, alioze yecha hanga sango jenyi ajisoneke mu Mbimbiliya. Mba mukwa kwimba Masamu yanyingika ngwenyi, kupwa ni usepa ukolo ni Yehova che chuma chilemu ku mwono. (Samu 73:23, 24, 26, 28) Yika twalilongesa? Nyi umwe ndumbu mu chikungulwila makakajana ha kuwayila Yehova, makulwana a mu chikungulwila katambile kulipupula ha kumupatwila. Shimbu amwambe yuma yipi, makulwana katamba kunyingika mumu liaka anakakajana. Chino che muchikwasa makulwana hanga akolweze mutu wacho kupalikila mu Mbimbiliya.
14. Mumu liaka Eliya afupile ukwaso, kuchi Yehova amukwashile?
14 Profeta Eliya kachinyine Mwazovu Jezebele. (1 Mia. 19:1-3) Kanyongene ngwe maprofeta eswe a Yehova kaashihile, iye wika mwe wasalile ni mwono, nawa ngwe mulimo wenyi wapwile wa ngwaza. Eliya kahongele chinji mu mbunge, kashika azangile kufwa. (1 Mia. 19:4, 10) Yehova kakatenukinyine Eliya. Alioze, yamulweza ngwenyi, keshi ukawenyi, nawa mahasa kujikijila ha ndundo ja Zambi, mumu milimo yinji alinayo hanga alinge. Yehova yapanjika kanawa Eliya ni kumwaha mulimo waha. (1 Mia. 19:11-16, 18) Yika twalilongesa? Yetu eswe, chipi-chipi makulwana a mu chikungulwila twatamba kutwama kanawa ni mapanga ambala a Yehova. Muze umwe ndumbu mamba ngwenyi, kanevu uli unji hanji ngwenyi, Yehova keshi kumukonekena, makulwana a mu chikungulwila katamba kumupanjika kanawa muze anahanjika. Muze mahwisa kuhanjika mba mamukwasa hanga anyingike ngwo, Yehova kakumulemesa chinji.
NYONGA LIKA TWATAMBA KUPWA NALIO HALI MAPANGA JA ZAMBI WAZE HANATOKO?
15. Kulita ni Yoano 6:39, nyonga lika Yesu apwile nalio hali mapanga ja Tato?
15 Kuchi Yehova anazange hanga tumone mapanga jenyi waze hanatoko? Yesu katuhichikilile chilweza chipema. Kanyingikine ngwenyi, mapanga eswe kali ni ulemu kumeso ja Yehova. Kashika asele tachi jinji hanga akwase “mapanga a kuzuwo lia Izalele waze atokele” hanga ahiluke kuli Yehova. (Mateu 15:24; Luka 19:9, 10) Yesu kapwile kafunga mupema, kashika asele tachi hanga mapanga eswe ja Yehova ahone kutoka.—Tanga Yoano 6: 39.
16-17. Nyonga lika makulwana atamba kupwa nalio muze anakwase waze hanazeya ku ufulielo? (Tala mushete unambe ngwo, “ Chize Panga Yoze Hanatoko Mahasa Kwivwa”)
16 Postolo Paulu, kakolwezele akwa-Kristu a mu chikungulwila cha Efwesu hanga embulule chilweza cha Yesu. Yasoneka ngwenyi: “Chanutamba kukwasa waze keshi tachi, nikwiwuluka maliji a Mwene Yesu, iye mwene wambile ngwenyi, Chinawaha kutambula alioze shinaho kuhana.” (Yili. 20:17, 35) Kwamba pundu, makulwana a mu chikungulwila no kali ni chiteli chino. Salvador umwe mukulwana wa mu chikungulwila ku Espanha yamba ngwenyi: “Muze nakunyonga ha chize Yehova akulemesa chinji mapanga jenyi waze hanatoko, chino chakungukolweza hanga ngupwe ni tachi ja kwakwasa. Ngunanyingika ngwami, Yehova kanazange hanga ngwafunge.”
17 Mandumbu waze twatongola hano akokolokele ku ufulielo, hanaakwase kuhiluka kuli Yehova. Chipwe musono, mandumbu waze echele kulingila Yehova kanazange kuhiluka kuli iye. Yika mutuhasa kulinga hanga twakwase? Ha mutwe muuhataho mutulilongesa chikuma chino.
MWASO 139 Nyonga Uli Mu Chifuchi Chaha
^ kax. 5 Mumu liaka mandumbu waze apwile ni kulingila Yehova ha miaka yinji ni ushishiko weswe, ha kupalika cha mashimbu akulitwamina kumuwayila? Yika Zambi akunyonga hali mandumbu jacho? Mutwe uno muukumbulula yihula yino. Nawa mutumona yize mutuhasa kulilongesa ha chize Yehova akwashile tuvumbi twenyi ha mashimbu a lamba.
^ kax. 2 ULUMBUNWISO WA AMWE MALIJI: Mukwa kwambujola wazeya ku spiritu, kali yoze wakulitwamina kwambujola ha tukweji asambano hanji kuhiana. Chipwe chocho, achili mandumbu jetu nawa twakwazanga chinji.
^ kax. 4 Majina amwe kapwa kwalumuna.
^ kax. 10 Mutwe muhataho muusolola chize makulwana mahasa kukaula usongwelo uno.
^ kax. 60 ULUMBUNWISO WA YIZULIE: Ha mashimbu ja A-Izalele, kafunga kapwile ni kulihulumba chinji muze panga akutoka. Kafunga kapwile ni kumufupa hanga amukwase kuhiluka hali akwo. Chipwe musono, makulwana a mu chikungulwila ni ayo che akulinga.
^ kax. 64 ULUMBUNWISO WA YIZULIE: Umwe ndumbu wa pwo wa kokoloka ku ufulielo kali mu kalela, kanamono Yela ja Yehova aali anawahilila hakwambujola ha mbunga.
