TANE MEKUN 25
“Qange Kö Troa Thele La Hnënge Mamoeng”
“Qange kö troa thele la hnënge mamoenge me wai nyuden.”—EZEK. 34:11.
NYIMA 105 “Akötesieti La Ihnim”
MEKUN KA TRU *
1. Pine nemene matre hnei Iehova hna aceitunë Nyidrë me ketre thin?
AME ngöne lo ijine i Isaia perofeta, hnei Iehova hna hnying kowe la nöje i Nyidrë ka hape: “Hape u, tro la fö’ a thëthëhmine la nekö i nyido hna iji thin?” Nge öni Nyidrë: “Maine tro angat’ a thëthëhmin, loi pe tha tro jë kö ni a thëthëhmi ’ö.” (Is. 49:15) Tha hnei Iehova kö hna majemine aceitunë Nyidrë me ketre thin. Ngo Nyidrëti e celë a qaja la aqane imelekeu ne la thin me nekön, matre troa amamane la etrune la ihnimi Nyidrë kowe la itre hlue i Nyidrë. Maine jë caasi hi la mekuna ne la itre thin me Jasmine, ketre trejin, ngöne la kola hape: “Ka cile hut la aqane imelekeu ne la thin me medreng hna iji thin.”
2. Nemene la aliene hni Iehova ngöne la kola iananyi me Nyidrë hnene la ketre nekö i Nyidrë?
2 Öhne hi Iehova la ketre nekö i Nyidrëti a nuetrij la itre icasikeu me huliwa ne cainöj. Nge drei la etrune la akötre i Nyidrë ngöne la Nyidrëti a öhn la itre thauzan lao hlue i Nyidrë ka nanazij * e nöjei macatre!
3. Nemene la aja i Iehova?
3 Alanyimu la itre trejin ka nanazij ka bëeke hmaca troa sine la itre icasikeu. Nge easa madrin troa kepe angatr! Aja i Iehova tro angatr a bëeke hmaca koi Nyidrë, nge ketre tu së fe. (1 Pet. 2:25) Nemene la aqane tro sa xatua angatr? Qëmekene troa sa la hnying celë, tro sa pane ce wang la kepin matre tha sine hmaca kö itre xan la itre icasikeu me cainöj.
KEPIN MATRE THA NYIHLUE I IEHOVA HA HNEI ITRE XAN
4. Nemene la aqane ajolë itre xan hnene la huliwa i angatr?
4 Ame itre xan, angatr a wangatrune palaha la huliwa i angatr. Celë hi hna melën hnei Hung, * ketre trejin qa Asie du Sud-Est. Öni angeic: “Tru la hnenge hna nue traem me trengecatr kowe la huliwang. Ame koi ni, maine tru la manieng, tha jole hë koi ni troa nyihlue i Iehova. Tha sine hmaca kö ni la itre icasikeu uti hë la eni a nue palua itre ej. Ame la fen celë, tre, kola aiananyi së me Iehova.”
5. Nemene la aliene hni ne la ketre trejin ngöne la kola traqa itrai la itre jol?
5 Nyimutre la itre jol hna cile kowe hnene la itre xaa trejin. Hane hi la ka traqa koi Anne, ketre trejin qa Agele ka faifi lao nekönatr. Öni eahlo: “Ka sinatr la ketre neköng. Nge hna upetröneë la ketre neköng jajiny. Ketre, hna tith la ketre neköng trahmany hnei mec, matre nyipiewekë troa thupë angeic. Hace catr la meleng matre tha sine hmaca kö ni la itre icasikeu me cainöj. Nanyi hë ni qaathei Iehova.” Easa utipi Anne me hnepe lapa i angeic, memine la itre xaa trejin ka cil kowe la itre jol.
6. Maine tha trongëne kö ketre la hna qaja ngöne Kolose 3:13, nemene hë la thangane koi angeic?
6 E jë la Kolose 3:13. Ame la itre xaa hlue i Iehova, tre, hna akötrë angatr hnene la itre trejin ne la ekalesia. Celë hi matre hnei Paulo hna qaja ka hape, ijije hi ‘troa ngazo koi së’ hnene la ketre trejin. Maine jë, hna kuca la ketre ewekë ka tha meköti kö koi së. Maine tha hmeke kö së, tro hë sa lapa fë trenge hni. Ame itre xan, tru catr palaha la elëhni angatr, matre hnei angatr hna trotrij la nöje i Iehova. Hanawang la ka traqa koi Pablo, ketre trejin qa Amérique du Sud. Hna silitrengathoi angeic, matre hna ami angeic qa ngöne la itre hnëqa ne la ekalesia. Nemene la aqane ujë i angeic? Öni angeic: “Tru catr la elëhning, matre hnenge hna trotrij la ekalesia.”
7. Nemene la ethan kowe la ketre trejin ngöne la kola huliwa la mekuthetheu i angeic?
7 Ame itre xan, hnei angatr hna ena la wathebo i Akötresie ekö, ngo kolo palahi a huliwa la mekuthetheu i angatr. Celë hi matre ame koi angatr, tha ijiji angatre kö troa kapa la ihnimi Iehova. Ngacama hnei angatre hë hna ietra, ngo ame koi angatr, tha ijiji angatre kö troa hane sine la lapa i Akötresie. Celë hi ka traqa koi Francisco. Öni angeic: “Hnenge hna kuca la itre huliwa ka sis, matre hna haji ni. Hnenge hna sine la itre icasikeu ngöne la xötrei. Ngo kucakuca catre ni, matre ame koi ni, tha ijijinge kö troa sine la nöje i Iehova. Ame koi ni, tha hnei Iehova kö hna nue la ngazong. Thupene lai, tha hnenge hmaca kö hna sine la itre icasikeu me cainöj.” Nemene la mekuna së göne la itre trejin ka cile kowe la itre jol tui Francisco? Hapeu, easë kö a utipi angatr? Nge nemene la mekuna i Iehova?
IEHOVA A HNIM LA ITRE MAMOE I NYIDRË
Itre atre thupë mamoe e Isaraela a thupëne hnyawa la itre mamoe ka paatr (Wange ju la paragarafe 8-9) *
8. Hapeu, Iehova kö a thëthëhmine la itre trejin ka nanazij? Qejepengöne jë.
8 Tha thëthëhmine kö Iehova la itre trejin ka nanazij, nge ka trotrije la nöje i Nyidrë. Ketre tha thëthëhmine kö Nyidrë la itre huliwa hnei angatr hna kuca koi Nyidrë. (Heb. 6:10) Hnei Isaia perofeta hna hamën la ketre ceitun ka amamane la aqane thupëne Akötresieti la itre hlue i Nyidrë. Öni Isaia: “Tro nyidëti a hiane la hnënge mamoe i nyidë tune la ate thupë mamoe; tro nyidëti a hatupe la ite nekö i mamoe i nyidë ngöne la lue ime i nyidë, me xepi nyudeni ngöne la imano i nyidë.” (Is. 40:11) Nemene la mekuna ne la Atre thupë mamoe ka tru ngöne la kola paatre la ketre mamoe? Öni Iesu kowe la itretre drei nyidrë: “Tune kaa la mekuna i nyipunie, e tro la ketre atr a hetrenyi la 100 lao mamoe, nge paatre ju hi la ketre, hapeu, tha tro kö angeice lai a pane nue lai ala 99 ngöne la wetr, matre thele la ka paatr? Nge e öhne hë angeic, eni a qaja hnyawa koi nyipunie laka, tru catre hmaca kö la madrine i angeic kowe la ka paatr, hune lo ala 99 ka lapa pe.”—Mat. 18:12, 13.
9. Nemene la aqane thupën ekö la itre mamoe? (Wange ju la pane iatr.)
9 Pine nemene matre ijije hi tro sa aceitunë Iehova memine la ketre atre thupë mamoe? Pine laka, ame la atr thupë mamoe ekö, tre, angeic a thupën me nyihnyawan la itre mamoe. Tui Dravita, hnei angeic hna humuth la liona me bea. (1 Sam. 17:34, 35) Ketre, öhne hi la atre thupë mamoe la kola paatre la ketre mamoe. (Ioane 10:3, 14) Maine 100 lao mamoe i angeic, nge kola paatre la ketre, angeic a pane umëne la 99 maine upe la itre xan troa thupën itre ej. Thupene lai, angeic a ithel. Hnei Iesu hna xom la ceitune celë matre troa hamë së la ketre ini ka tru: “Tha aja i Kakati kö e hnengödrai troa paatre la ketre ka co celë.”—Mat. 18:14.
Ketre atre thupë mamoe e Isaraela a nyihnyawane la eatr ne la neköi mamoe ka paatr (Wange ju la paragarafe 9)
IEHOVA A THELE LA MAMOE KA PAATR
10. Thenge la hna qaja ngöne Ezekiela 34:11-16, nemene la hna qaja hnei Iehova göne la itre mamoe ka paatr?
10 Iehova a hnimi së isa ala caas, tune la itre ka iananyi memine la itre xaa mamoe i Nyidrë. Hnei Iehova hna qaja jëne Ezekiela perofeta ka hape, tro Nyidrëti a thel la itre mamoe ka paatr, me xatua angatr troa easenyi hmaca koi Nyidrë. Hnei Iehova mina fe hna qaja la aqane tro Nyidrëti a amele angatr. Eje hi, tune lo atre thupë mamoe ekö e Isaraela, tro Nyidrëti a thel me xatuane la mamoe ka paatr. (E jë la Ezekiela 34:11-16.) Ame la hnapan, tru la traem me trengecatr hna nue hnene la atre thupë mamoe, matre troa thele la mamoe ka paatr. Ame la hnaaluen, angeic a bëeke fë la mamoe koi itre xan. Nge ame la hnaakönin, maine ka eatr maine pi xen la mamoe, angeic a nyihnyawan me hnime ej. Angeic a nyihnyawane la itre eatre ne la mamoe, me xep acon ej, me thuan. Ame la itre qatre thup ne la ekalesia, tre, angatre hi la ka thupëne “la hnënge mamoe” i Akötresie. (1 Pet. 5:2, 3) Celë hi köni aqane tro angatr a nyihnyawane la mamoe ka paatr. Loi e tro angatr a pane ithel, me xatua angeic troa bëeke koi Iehova, me xatua angeice fe troa acatrene hmaca la aqane imelekeu i angeic me Iehova. *
11. Nemene la hna atre hnene la atre thupë mamoe?
11 Atre hnyawa hi la atre thupë mamoe laka, ijije hi troa paatr la ketre mamoe. Ngo tha hnei angeice kö hna qanangazon ej. Tro sa ce wang la aqane xatuane Akötresie la itre xaa hlue i Nyidrëti ekö ka iananyi me Nyidrë.
12. Nemene la aqane xatua Iona hnei Iehova?
12 Hnei Iona ekö hna kötrene la hnëqa i angeic qaathei Iehova. Ngo tha hnei Nyidrëti kö hna nuetriji angeic. Tune la atre thupë mamoe, hnei Iehova hna xatua angeic me hamë angeic la trengecatr ka ijij matre eatrëne la hnëqa i angeic. (Iona 2:7; 3:1, 2) Thupene lai, hnei Nyidrëti hna aciane la ketre feja matre xatua Iona troa trotrohnine laka, ka sisitria la mele ne la atr. (Iona 4:10, 11) Nemene la ini? Loi e tro palahi la itre qatre thup a xatuane la itre ka nanazij. Loi e tro angatr a thele la itre kepin matre kola nanazij la itre xaa trejin. Nge maine kola bëeke koi Iehova hnene la ketre, loi e tro palahi la itre qatre thup a xatuan me hnimi angeic.
13. Nemene la ini hne së hna xom qa ngöne la aqane ujë i Iehova kowe la atre cinyihan la Salamo 73?
13 Hace catre la hni ne la atre cinyihane la Salamo 73 ngöne la angeic a öhn la kola mele madrin la itre atr ka ngazo. Ame koi angeic, kösë tha ka nyipiewekë hmaca kö troa kuca la aja i Akötresie. (Sal. 73:12, 13, 16) Nemene la hna kuca hnei Iehova? Tha hnei Nyidrëti kö hna amekötin la hlue i Nyidrë. Ame la aja i Nyidrë, tre, troa cinyihan e hnine la Tusi Hmitrötr la itre trengewekë i angeic. Trotrohnine hë la atre cinyihan la Salamo laka, sisitria catre kö la troa ketre sinee i Iehova. (Sal. 73:23, 24, 26, 28) Nemene la ini? Tha tro kö la itre qatre thup a canga amekötin la ketre trejin ka luelue troa nyihlue i Iehova. Loi e tro pe angatr a thele la kepin matre angeic a luelu me mekun tune lai. E cili, angatr a xom la itre xötr ka troa ithuecatre koi angeic.
14. Pine nemene matre Elia a aja ixatua, nge nemene la aqane xatua angeic hnei Iehova?
14 Hnei Elia perofeta hna kötre Iezebela joxu. (1 Ite jo. 19:1-3) Ame koi Elia, angeic hmekuje hi la perofeta i Iehova nge ka gufa la itre hnei angeic hna kuca. Kucakuca catre angeic, matre angeic a ajane troa mec. (1 Ite jo. 19:4, 10) Tha hnei Iehova kö hna nuetriji Elia. Hnei Nyidrëti pe hna akeukawane la hni Elia me qaja ka hape, hetre itre xaa hlue i Nyidrë. Ijije hi tro Elia a mejiune kowe la trengecatr qaathei Iehova. Hnei Iehova hna drei Elia hnyawa ngöne la angeic a fe la hni angeic. Nge hnei Nyidrëti hna ahnith koi Elia la itre xaa hnëqa ka tru. (1 Ite jo. 19:11-16, 18) Nemene la ini? Loi e tro la itre qatre thup a nyihnyawane la itre mamoe i Iehova, ketre tu së fe. Maine jë, tro ketre a mekun ka hape, tha ijije kö troa nue la ngazo i angeic hnei Iehova, nge catrehnine la itre trengewekë i angeic. Haawe, loi e tro la itre qatre thup a drei angeic hnyawa ngöne la kola fe la hni angeic. Nge tro fe angatr a amamane laka, ka nyipiewekë catr angeic koi Iehova.
AQANE TRO SA GOEËNE LA ITRE MAMOE KA PAATR
15. Thenge la Ioane 6:39, nemene la aqane goeëne Iesu la itre mamoe ne la Keme i nyidrë?
15 Thenge la aja i Iehova, nemene la aqane tro sa goeëne la itre mamoe ka paatr? Hnei Iesu hna amamai tulu koi së. Atre hnyawa hi Iesu laka, ka sisitria catr koi Iehova la itre mamoe i Nyidrë. Celë hi matre hnei nyidrëti palahi hna xatuane la “itre mamoe ka paatr ne Isaraela” troa bëeke kowe la Keme i nyidrë. (Mat. 15:24; Luka 19:9, 10) Pine laka, Iesu la atre thup ka lolo, hnei nyidrëti hna kuca asë la hnei nyidrëti hna atrein matre tha tro kö a paatr la ketre mamoe i Iehova.—E jë la Ioane 6:39.
16-17. Nemene la nyine tro la itre qatre thup a mekun ngöne la angatr a xatuane la itre ka nanazij? (Wange ju la hna eköhagen hna hape, “ Aliene Hni Ne La Mamoe Ka Paatr.”)
16 Hnei Paulo aposetolo hna ithuecatr kowe la itre qatre thup ne la ekalesia ne Efeso troa nyitipu Iesu. Öni nyidrë: “Tro nyipunie a huliwa catr göi troa xatuane la itre ka kucakuca, me mekune pala hi la itre trengewekë i Iesu Joxu, lo öni nyidrë: ‘Sisitria catre kö la madrine ne la atre ham, hune la atre kapa.’ ” (Itre hu. 20:17, 35) Kola mama ngöne la xötre celë laka, ka sisitria la hnëqa ne la itre qatre thup. Öni Salvador, ketre qatre thup e Espagne: “Ame la eni a mekun la etrune la ihnimi Iehova kowe la itre mamoe ka paatr, kola upi ni troa catre xatua angatr. Eni la ketre atre thupë mamoe, matre nyipiewekë tro ni a thupë angatre hnyawa. Celë hi aja i Iehova.”
17 Bëeke hmaca la itre trejin ka nanazij hna qaja ngöne la tane mekun celë pine laka, hna xatua angatr. Ngo hetre itre xan palakö ka ajane troa bëeke koi Iehova! Tro sa ce wang ngöne la ketre tane mekun la aqane tro fe sa hane xatua angatr.
NYIMA 139 Mekune Jë La Mele i ’ö Ngöne La Fene Ka Hnyipixe
^ Pine nemene matre itre xan a trotrije la ekalesia ngacama nyimu macatre ne nyihlue i Iehova angatr? Tune kaa la aqane goeë angatr hnei Iehova? Troa sa la lue hnying celë ngöne la tane mekun. Tro fe sa xomi ini qa ngöne la aqane xatuane Iehova la itre hlue i Nyidrëti ekö ka iananyi me Nyidrë.
^ GÖI TROA TROTROHNIN: Ame la trejin ka nanazij ke, sikisi lao treu ne tha cainöje hmaca kö angeic me hamë ini. Ngo ketre trejin palahi angeic, matre easa hnimi angeic.
^ Hna saze la itre ej.
^ Tro sa ce wang ngöne la ketre tane mekun la aqane tro la itre qatre thup a trongëne hnyawa la köni mekun cili.
