1. Ebɛnadze ntsi na Jehovah dze noho totoo ɔbaa a ɔma enumfo ho?

“ASO ɔbaa no werɛ befir no numfoanoba?” Dɛm asɛm yi na Jehovah bisae wɔ nkɔnhyɛnyi Isaiah n’aber do. Nyankopɔn kãa kyerɛɛ no nkorɔfo dɛ: “Nyew, annyɛ a woyinom hɔn werɛ befir, na emidze mo werɛ nnkefir wo da.” (Isa. 49:15) Nyankopɔn nntaa mmfa noho nntoto nã ho. Naaso, ha dze, ɔyɛɛ dɛm. Nna Jehovah pɛ dɛ n’asomfo hu dɛ ɔdɔ hɔn papaapa. Dɛm ntsi, ɔdze mbrɛ osi tse nka ma hɔn no totoo ɔdɔ a no mu yɛ dzen a nã wɔ ma ne ba ho. Nanom dodow no ara nye hɛn akyerɛbaa a wɔfrɛ no Jasmin bɛyɛ adwen. Ɔkãa dɛ, “Sɛ ema wo ba enumfo a, enye no nya ebusuabɔ soronko a ɔtsena hɔ no nkwa nda nyina.”

2. Sɛ Jehovah n’asomfo mu kor twe noho fi noho a, ɔtse nka dɛn?

² Sɛ Jehovah n’asomfo mu kor mpo gyaa asafo nhyiamu na asɛnka kɔ a, ohu. Ntsi, ɔyɛ no yaw papaapa dɛ afe biara, n’asomfo mpempem pii gyaa asafo nhyiamu na asɛnka kɔ. *

3. Ebɛnadze na Jehovah pɛ?

³ Hɛn nuanom mbarimba na mbaa a wogyaa asafo nhyiamu na asɛnka kɔ no, ɔyɛ a hɔn mu piinara san ba asafo no mu. Sɛ wɔsan ba a, ɔma hɛn enyi gye papaapa! Jehovah pɛ dɛ wɔsan ba asafo no mu, dɛmara na hɛn so yɛpɛ dɛ wɔsan ba. (1 Pet. 2:25) Yebesi dɛn aboa hɔn ma wɔaasan aba? Ansaana yebobua dɛm asɛmbisa yi, ɔbɛyɛ papa dɛ yebohu siantsir a hɛn nuanom binom gyaa asafo nhyiamu na asɛnka kɔ.

4. Osian honam afamu edwuma ntsi, ebɛn asɛm ato enuanom binom?

⁴ Enuanom binom ama hɔn honam afamu edwuma abɛyɛ adze a ohia hɔn kyɛn biribiara wɔ hɔn asetsena mu. Hung * yɛ hɛn nua a ɔtse Asia. Ɔkãa dɛ, “Memaa m’edwuma gyee m’adwen nyinara fae. Mannyɛ m’adze nyansa mu. Mekãa kyerɛɛ moho dɛ, sɛ minya sika pii a, mubotum asom Jehovah yie. Ntsi, nna medze ndɔnhwer pii yɛ edwuma. Afei, nna menntaa nnkɔ asafo nhyiamu, na ewiei koraa no, migyaa asafo nhyiamu kɔ. Satan nam wiadze no do twetwe nkorɔfo hɔn adwen mbrɛ ɔbɛyɛ a nkakrankakra no, wobegyaa dɛ wɔbɔsom Nyankopɔn.”

5. Ebɛn kwan do na ɔhaw ahorow kaa hɛn akyerɛbaa kor?

⁵ Hɛn nuanom mbarimba na mbaa binom so hyia ɔhaw ahorow a ɔma hɔn abaw mu bu. Anne yɛ hɛn akyerɛbaa a ofi Britain. Ɔwɔ mba beenum, mbaa baasa na mbanyin beenu. Anne kãa dɛ: “Mowoo me kaekyir no, nna oedzi dzɛm koraa. Ekyir yi, wotuu me mbabaa no mu kor fii asafo no mu, na me babanyin a odzi kan no so nyaa adwenmuhaw. M’abaw mu bui araa ma afei dze nna monnkɔ asafo nhyiamu na asɛnka. Ewiei koraa no, migyaa asafo nhyiamu na asɛnka kɔ koraa.” Yɛtse nka papaapa ma Anne na n’ebusua nye enuanom afofor a worihyia ɔhaw a ɔtse dɛm!

6. Sɛ obi ammfa asɛm a ɔwɔ Colossaefo 3:13 no aannyɛ edwuma a, ebɛn kwan do na iyi botum ama ɔaatwe noho efi Jehovah no nkorɔfo ho?

⁶ Kenkan Colossaefo 3:13. Jehovah n’asomfo binom ama hɔn abaw mu ebu, osian dza onua bi anaa akyerɛbaa bi a ɔwɔ asafo no mu yɛe ntsi. Ɔsomafo Paul hun dɛ, ɔtɔ da a, yebotum enya hɛn nua anaa hɛn akyerɛbaa bi “ho asɛm bi.” Bi mpo a nna wɔnye hɛn enndzi no yie. Sɛ yɛannyɛ ahwɛyie a, yɛdze obi noho ebufuw bɛhyɛ hɛn mu. Sɛ obi dze biribi ho ebufuw hyɛ no mu a, obotum egyaa dɛ ɔnye Jehovah no nkorɔfo bɔsom. Hom mma yensusu Pablo n’asɛm no ho nhwɛ. Ɔyɛ hɛn nua a ɔwɔ South America. Obi twaa ator too Pablo do dɛ ɔayɛ adzebɔn bi. Nna Pablo nnyim asɛm no ho hwee. Naaso, nna asafo mu mpanyimfo no gye dzi dɛ odzi fɔ, ntsi wɔgyee ɔsom ho kwan a ɔwɔ no fii ne nsamu. Pablo yɛɛ n’adze dɛn wɔ asɛm yi ho? Ɔkãa dɛ, “Mo bo fuuw papaapa, na nkakrankakra no, migyaa asafo nhyiamu na asɛnka kɔ.”

7. Sɛ obi ne tsibowa bu no fɔ a, obotum aka no dɛn?

⁷ Sɛ obi yɛɛ bɔn a enyiber wɔ mu mber bi a etwa mu a, bi a ne tsibowa bobu no fɔ akyɛr. Bi a ɔbɛtse nka dɛ Nyankopɔn runntum nndɔ no bio. Sɛ onuu noho na wɔdaa ehumbɔbɔr edzi kyerɛɛ no mpo a, bi a ɔbɛtse nka dɛ ɔnnda ho mmfata dɛ ɔbɛyɛ Nyankopɔn no nkorɔfo no mu kor. Onua bi a wɔfrɛ no Francisco tsee nka dɛm. Ɔkãa dɛ, “Mobɔɔ edwaman, ntsi wɔkaa m’enyim. Ahyɛse no dze, nna mokɔ asafo nhyiamu, naaso ekyir yi, m’abaw mu bui na metsee nka dɛ memmfata dɛ mebɛka Jehovah no nkorɔfo ho. Me tsibowa buu me fɔ, na metsee nka dɛ Jehovah mmfaa mo bɔn nnkyɛɛ me. Ewiei koraa no, migyaa asafo nhyiamu na asɛnka kɔ.” Enuanom mbarimba na mbaa a worihyia ɔhaw ahorow a ɔtse dɛ dza yɛakã ho asɛm yi no, etse nka dɛn wɔ hɔnho? Ana ewɔ ayamuhyehye ma hɔn? Dza ɔkyɛn dɛm no, Jehovah tse nka dɛn wɔ hɔnho?

8. Aso Jehovah no werɛ fir hɔn a nkyɛ mber bi mu no nna wɔsom no no? Kyerɛkyerɛ mu.

⁸ Hɔn a nkyɛ mber bi mu nna wɔsom Jehovah naaso woegyaa ɔsom no kakra no, Jehovah no werɛ mmfir hɔn. Dɛmara so na no werɛ mmfir edwuma a wɔyɛe wɔ no som mu no. (Heb. 6:10) Nkɔnhyɛnyi Isaiah yɛɛ mfatoho  kama bi a ɔma yehu mbrɛ Jehovah si dwen no nkorɔfo ho. Isaiah kyerɛɛw dɛ: “Ɔbɛnyɛn no nguankuw dɛ oguanhwɛfo, ɔbɔboaboa no nguambaa ano wɔ n’abaw mu, na oetur hɔn no bo mu.” (Isa. 40:11) Sɛ Jehovah, Oguanhwɛfo Kɛse no, no nguan no mu kor twe noho fi nguankuw no ho a, ɔtse nka dɛn? Jesus bisaa n’esuafo no asɛm bi, na iyi ma yehu mbrɛ Jehovah si tse nka. Jesus bisaa dɛ: “Hom dwen dɛn? Sɛ nyimpa bi wɔ nguan ɔha, na hɔn mu baako tɔ gon a, ana onngyaa eduokron akron no hɔ, na ɔnnkɔ nkokwaa do nnkɔhwehwɛ dza ɔatɔ gon? Na sɛ ɔba dɛ ohu no a, nokwar mese hom dɛ odzi dɛw wɔ no ho kyɛn eduokron akron no a wɔanntɔ gon no.”​—Matt. 18:12, 13.

9. Bible mber mu no, nna nguanhwɛfo pa si dɛn hwɛ hɔn nguan? (Hwɛ mfonyin a ɔwɔ Ɔweɔn-Aban yi enyim no.)

⁹ Ebɛnadze ntsi na yebotum dze Jehovah atoto oguanhwɛfo ho? Osiandɛ Bible mber mu no, nna oguanhwɛfo dwen no nguan ho papaapa. Dɛ nhwɛdo no, David kum gyata na osisi dze bɔɔ no nguan ho ban. (1 Sam. 17:34, 35) Oguanhwɛfo pa no, sɛ no guan kortsee mpo yew a, ohu. (John 10:3, 14) Dɛm oguanhwɛfo no begyaa no nguan 99 no egu buw mu anaa ɔdze hɔn bɛhyɛ oguanhwɛfo fofor nsa, na ɔaakɔ akɔhwehwɛ oguan a ɔayew no. Jesus dze dɛm mfatoho yi dzii dwuma dze kyerɛkyerɛɛ hɛn nokwasɛm bi a ohia. Ɔkãa dɛ: “Ɔnnyɛ hom Egya a ɔwɔ sor ne pɛ dɛ mbofra nkakraba yi mu baako bɛyew.”​—Matt. 18:14.

10. Dɛ mbrɛ Ezekiel 34:11-16 ma yehu no, ebɛnadze na Jehovah bɔɔ anohoba dɛ ɔbɛyɛ ama no nguan a wɔayew no?

¹⁰ Jehovah dɔ hɛn mu biara. Dɛmara so na ɔdɔ “mbofra nkakraba” a wɔatwe hɔnho efi no nguankuw ho no. Nyankopɔn nam nkɔnhyɛnyi Ezekiel do bɔɔ anohoba dɛ, ɔbɔhwehwɛ no nguan a wɔayew no, na ɔaaboa hɔn ma wɔnye no aasan enya ebusuabɔ a no mu yɛ dzen. Afei, ɔkyerɛɛ akwan pɔtsee a ɔbɛfa do ahwehwɛ hɔn. Nna kwan a ɔtse dɛm do na Israelnyi a ɔyɛ oguanhwɛfo no bɛfa do ahwehwɛ no guan a ɔayew no. (Kenkan Ezekiel 34:11-16.) Odzi kan, oguanhwɛfo no bɔhwehwɛ no guan no. Iyi botum agye mber na ahoɔdzen pii. Sɛ  oguanhwɛfo no hu oguan no a, ɔdze no bɛba nguankuw no mu. Afei so, sɛ oguan no epira anaa nsukɔm nye ɔkɔm adze no a, oguanhwɛfo no befi ɔdɔ mu aboa oguan no. Ɔbɛkyekyer ne pirakur, ɔaama no do, na ɔaama no edziban. Asafo mu mpanyimfo yɛ nguanhwɛfo a wɔhwɛ “Nyankopɔn nguankuw” no do. Iyi ntsi, ɔsɛ dɛ wɔyɛ dza yɛakã ho asɛm yi dze boa hɔn a woegyaa asafo nhyiamu na asɛnka kɔ no. (1 Pet. 5:2, 3) Ɔsɛ dɛ asafo mu mpanyimfo hwehwɛ hɔn, wɔboa hɔn ma wɔsan ba asafo no mu, na wɔda ɔdɔ edzi kyerɛ hɔn dze nam boa a wɔbɔboa hɔn ma wɔaabɛyɛ Jehovah n’anyɛnkofo no do. *

11. Oguanhwɛfo pa no, ebɛnadze na onyim?

¹¹ Oguanhwɛfo pa nyim dɛ no nguan botum ayew. Sɛ oguan bi twe noho fi nguankuw no ho kɛnenam beebi a, oguanhwɛfo no ronnhwe no anaa ɔremmfa adze mmbɔ no. Bible mber mu no, Nyankopɔn n’asomfo binom annyɛ dza Jehovah kãa kyerɛɛ hɔn dɛ wɔnyɛ no. Hom mma yɛnhwɛ mbrɛ Nyankopɔn sii boaa hɔn nye dza yebotum esũa efi mu.

12. Ebɛn kwan do na Jehovah nye Jonah dzii?

¹² Ber a Jehovah somaa nkɔnhyɛnyi Jonah dɛ ɔnkɔ Nineveh no, ɔannkɔ. Naaso, Jehovah ammpɛ ntsɛm annkã dɛ ɔapow Jonah. Dɛ mbrɛ oguanhwɛfo pa biara bɛyɛ no, Jehovah gyee no na ɔboaa no ma onyaa ahoɔdzen a ohia no dze yɛɛ edwuma a nna ɔdze ahyɛ ne nsa no. (Jonah 2:7; 3:1, 2) Ekyir yi, Nyankopɔn dze efer dzii dwuma dze boaa Jonah ma ohun dɛ nyimpa biara no nkwa som bo. (Jonah 4:10, 11) Ebɛn esuadze na ɔwɔ mu ma hɛn? Onnyi dɛ asafo mu mpanyimfo pa abaw ntsɛm wɔ hɔn a woegyaa asafo nhyiamu na asɛnka kɔ no ho. Mbom, ɔsɛ dɛ wɔbɔ mbɔdzen hu adze a ɔmaa nyimpa no gyaa asafo nhyiamu na asɛnka kɔ no. Na sɛ nyimpa no san ba Jehovah nkyɛn a, ɔsɛ dɛ wɔkɔ do da ɔdɔ edzi kyerɛ no.

13. Sɛ yɛhwɛ mbrɛ Jehovah sii yɛɛ n’adze wɔ asɛm a Ndwom 73 ne kyerɛwfo no kãe ho a, ebɛnadze na yesũa fi mu?

¹³ Ber a Ndwom 73 ne kyerɛwfo no hun dɛ ndzɛmba rokɔ yie ma ndzebɔnyɛfo no, n’abaw  mu bui. Ɔkãa dɛ mfaso nnyi do dɛ ɔbɔkɔ do ayɛ Nyankopɔn n’apɛdze. (Ndw. 73:12, 13, 16) Jehovah yɛɛ n’adze dɛn wɔ asɛm yi ho? Jehovah ammpow no. Nokwasɛm nye dɛ, Nyankopɔn maa wɔkyerɛɛw ɔdwontofo no ne nsɛm no wɔ Bible no mu. Ewiei koraa no, ɔdwontofo no bohun dɛ biribiara nnyi wiadze yi mu a ɔyɛ papa kyɛn dɛ ebɛyɛ Jehovah ne nyɛnko. (Ndw. 73:23, 24, 26, 28) Ebɛn esuadze na ɔwɔ mu ma hɛn? Sɛ enuanom binom kã dɛ mfaso nnyi do dɛ wɔbɔsom Jehovah a, onnyi dɛ asafo mu mpanyimfo per hɔnho bu hɔn atsɛn. Ɔsɛ dɛ asafo mu mpanyimfo bɔ mbɔdzen hu siantsir a wɔkekã nsɛm a ɔtse dɛm nye siantsir a wɔyɛ hɔn adze wɔ dɛm kwan no do kyɛn dɛ, wobeyi hɔn tokyen. Sɛ asafo mu mpanyimfo yɛ dɛm nkotsee dze a, wobotum dze Bible no ahyɛ hɔn nkuran.

14. Nna ebɛnadze ntsi na Elijah hia mboa, na ebɛn kwan do na Jehovah maa no mboa a ohia no?

¹⁴ Nkɔnhyɛnyi Elijah guanee fii Ɔhembaa Jezebel n’enyim. (1 Ahe. 19:1-3) Nna osusu dɛ nankotsee nye Jehovah no nkɔnhyɛnyi a wɔaka. Afei so, nna ɔtse nka dɛ edwuma a ɔyɛe no ayɛ gyan. Elijah n’abaw mu buu araa ma nna ɔpɛ dɛ owu. (1 Ahe. 19:4, 10) Dɛ nkyɛ Jehovah bɔpow Elijah no, ɔmaa no awerɛhyɛmu dɛ ɔnnkaa nankotsee. Nkyii so, ɔkãa kyerɛɛ no dɛ obotum dze noho ato Nyankopɔn no tum do, na ndwuma pii da n’enyim a ɔwɔ dɛ ɔyɛ. Jehovah fii ayamuyie mu tsiee nsɛm a Elijah kãe no, na ɔmaa no dwumadzi afofor. (1 Ahe. 19:11-16, 18) Ebɛn esuadze na ɔwɔ mu ma hɛn? Ɔsɛ dɛ hɛn nyina, nkanka asafo mu mpanyimfo, nye Jehovah no nguan dzi wɔ ayamuyie mu. Sɛ onua bi kã dɛ no bo efuw anaa ɔtse nka dɛ Jehovah  remmfa no bɔn nnkyɛ no a, ɔsɛ dɛ asafo mu mpanyimfo yɛ aso tsie no ber a ɔkã n’akoma mu nsɛm no. Afei, ɔsɛ dɛ wɔbɔ mbɔdzen dɛ wɔbɛma oguan a ɔayew no enya awerɛhyɛmu dɛ Jehovah dɔ no.

15. Dɛ mbrɛ John 6:39 kyerɛ no, nna Jesus bu n’Egya no nguan no dɛn?

¹⁵ Jehovah pɛ dɛ yɛtse nka dɛn wɔ no nguan a wɔayew no ho? Yebotum esũa biribi efi nhwɛdo a Jesus yɛe no mu. Nna onyim dɛ Jehovah no nguan nyina som bo wɔ Nyankopɔn n’enyi do. Dɛm ntsi, Jesus yɛɛ dza obotum biara boaa “Israel fie nguan a wɔayew no” ma wɔsanee baa Jehovah nkyɛn. (Matt. 15:24; Luke 19:9, 10) Jesus nye oguanhwɛfo pa no. Dɛm ntsi, ɔyɛɛ dza obotum biara dɛ ɔremma Jehovah no nguan no mu kor mpo nnyew.​—Kenkan John 6:39.

16-17. Ɔsɛ dɛ asafo mu mpanyimfo tse nka dɛn wɔ boa a wɔbɔboa hɔn a woegyaa asafo nhyiamu na asɛnka kɔ no ho? (Hwɛ adakaba a wɔato dzin “ Mbrɛ Oguan A Ɔayew Botum Atse Nka.”)

¹⁶ Ɔsomafo Paul tuu mpanyimfo a nna wɔwɔ Ephesus asafo no mu no fo dɛ wonsũasua Jesus no nhwɛdo no. Ɔkãa dɛ: “Ɔsɛ dɛ hom yɛ edwuma dze hwɛ hɔn a wɔyɛ mberɛw no, na hom kaa Ewuradze Jesus asɛm a ɔkãa dɛ, ɔma yɛ nhyira kyɛn ɔgye.” (Andw. 20:17, 35) Kyerɛwsɛm yi ma yehu dɛ asafo mu mpanyimfo wɔ asodzi kɛse dɛ wɔhwɛ Jehovah no nkorɔfo. Salvador yɛ asafo mu panyin a ɔwɔ Spain. Ɔkãa dɛ, “Sɛ mohwɛ mbrɛ Jehovah si dwen no nguan a wɔayew no ho a, okenyan me ma meyɛ dza mubotum biara dze boa hɔn. Minyim papaapa dɛ Jehovah pɛ dɛ mohwɛ no nguan no.”

¹⁷ Enuanom a yɛakã hɔnho asɛm wɔ adzesua yi mu dɛ ber bi wogyaa asafo nhyiamu na asɛnka kɔ no, wɔaboa hɔn nyina ma wɔasan aba Jehovah nkyɛn. Ndɛ, nyimpa pii a woegyaa asafo nhyiamu na asɛnka kɔ no pɛ dɛ wɔsan ba. Adzesua a odzi hɔ mu no, yɛbɔhwɛ dza yebotum ayɛ dze aboa hɔn ma wɔaasan aba Jehovah nkyɛn no ho nsɛm pii.