Obheasacho Lekh 25
‘Hanv Khaxa Mhojea Hinddank Sodun Kaddtolom’
“Hanv khaxa Mhojea hinddacho samball korunk vetam, ani dekhun tankam sodun kaddtolom.”—EZ. 34:11.
GIT 105 “Dev Mhunnttlear Mog”
KITEM XIKTOLIM *
1. Jehova apnnank eka dudachea ballkachea avoik kiteak sor korta?
“KONN-EK bail aplea dudachea ballak visrot kai?” Ho prosn Jehovan provadi Izaiasachea disamnim vicharlolo. Devan aplea lokank sanglem, “ti porian visrot zalear, Hanv tuka kodinch visorcho na!” (Iz. 49:15) Choddxe pavtt, Jehova apleak eka avoi sangata sor korina. Punn hanga tannem toxem kelam. Aplea sevokam sangata aplem natem kitlem ghott asa tem dakhounk, tannem eka avoi ani dudachea bhurgea modem aslolea nateak sor kelam. Choddxea avoi-ank Jasmin nanvachea bhoinnik dislem toxem dista. Tinnem sanglem, “Tujea bhurgeak tum dud dita tednam tum sodanch urta toslem ek khas natem tachea sangata zoddtta.”
2. Aplo ek sevok aplea thaun pois voita tednam Jehovak koxem dista?
2 Aplo ek sevok pasun mittingek ani porgottnnek vochop bond korta tednam Jehova dhean dita. Tor dor vorsak tache hozaramnim sevok, seva bond kelole porgottnnar * zatat tednam taka kitlem dukh zata astolem tea vixim chintat.
3. Jehovak kitem zai?
3 Seva bond kelolim oslim mogall bhav-bhoinnam, choddxe pavtti sobhent porot ietat ani tednam ami khuxal zatat. Tim porot ailolim Jehovak zai ani amkam-i zai. (1 Ped. 2:25) Tor tim porot ieunk zai zalear ami tankam koxi modot korunk zata? Hea prosnacho zobab zannam zaunchea poilim, thoddim mittingek ani porgottnnek vochop kiteak bond kortat tem zannam zaum-ia.
THODDIM ZANNAM JEHOVACHI SEVA KOROP KITEAK BOND KORTAT?
4. Aplea kamacho thoddeancher koslo probhav poddla?
4 Thoddim zannam aplea jivitant aplea kamak sogleam-von chodd mhotv ditat. Aziachea Dokxinn Udente vatten ravtolo ek bhav Hung * oso mhunntta, “Hanv mhojea kamant chodduch vell ani takot ghaltalom. Mhoje lagim chodd poiso asa zalear hanv Jehovachi seva borea toren korunk xokta mhunn hanv chintalom. Punn hem mhojem pixemponn aslem. Hanv chodd voram kam korunk laglom. Chodd ani chodd mitting chukounk laglo ani xevttak hanvem mittigek vochop sarkench bond kelem. Mhaka dista, Soitan ho sonvsar uzar korun lokanchem dhean oddun gheta ani hea toren te hollu-hollu Devachi seva korop bond kortat.”
5. Eka-fattlean-ek somosiancho fuddo korcho poddlo tednam eka bhoinnicher tacho koslo porinnam zalo?
5 Thoddea bhav-bhoinnank nirax kortat tosleo zaiteo somsia asat. Britain-ant asloli panch bhurgeanchi avoi Anne oxi mhunntta, “Mhozo ek put opong zolmolo. Uprant mhojea eka dhuvek sobhe thaun bhair ghatli ani mhojea anik eka putak mansik duens zalem. Hanv ekdom nirax zaun mittigek ani sevek vochop bond kelem. Xevttak, hanv ek seva bond keloli porgottnnar zali.” Anne ani tachea famili sarkim zaitim bhav-bhoinnam oslea somosiancho fuddo kortat ani amkam tanchem khub churchure dista.
6. Koloskarank 3:13-ant sanglolo sol’lo eklo apnnaina tednam to Jehovachea lokam thaun koso pois soronk xokta?
6 Koloskarank 3:13 vachat. Sobhentlea eka bhavan vo bhoinnin kitem tori kelem dekhun, thoddea Jehovachea sevokank dukh zata. Thodde pavtti eka bhava vo bhoinni add amkam “garannem korunk nimit” asonk xokta mhunn apostl Paulun sanglem. Vo amchea sangata on’neai ghoddla astolo. Tea vellar ami amchea chintpacher tabo dovornant zalear ami ragar zaunk xoktat. Ani jednam eklo rag gheun bosta, to xevttak Jehovachea lokam thaun pois vochonk xokta. Dokxinn Amerikent aslolo ek bhav Pablo-cho onnbhov polloum-ia. Tannem ek chuk keli mhunn konnem tori tacher khotto arop ghatlo ani taka lagon taka sobhent asloli ek zobabdari hogddaunchi poddli. Tannem kitem kelem? Pablo mhunntta, “hanv ragar zalo ani hollu-hollu sobhe thaun pois sorlo.”
7. Ekleak apunn guneanvkari asa mhunn dista zalear tacher koslo porinnam poddonk xokta?
7 Vo eklean adim ek gombir patok adarlam zalear taka zaito temp porian apunn guneanvkari mhunn disonk xokta. Jehova aplo mog anik kednanch korcho na mhunn taka disonk puro. To pochatap korun, taka doia dakhoilea uprant pasun Jehovachea lokam modem asonk apunn favo na mhunn taka disonk puro. Francisco navachea eka bhavak koxem dislem tem to sangta, “Hanvem loingik pozoddponn kelem mhunn mhaka xist mell’lli. Survatek hanv mittingek hajir zatalo. Punn uprant hanv nirax zalo. Jehovachea lokam modem asunk hanv favo na, hanv guneavkari asa ani Jehovan mhaka bhogsunk na mhunn mhaka disonk laglem. Ani uprant hanvem mittigek ani sevek voichem bond kelem.” Ami atam meren, veg-vegllea poristhitincho fuddo kel’lea bhav-bhoinnam vixim bhasabhas keli. Tumkam tanchea vixim koxem dista? Tanchea kallzant bhogta tem dukh tumi tumchea kallzant bhogunk proitn kela kai? Chodd mhotvachem mhunnttlear, Jehovak tanchea vixim koxem dista?
JEHOVA APLEA SEVOKANCHO MOG KORTA
Ek Israelit gonvlli aplea sanddlolea xelliechi khub kallji gheta (Peregraf 8-9 polloiat) *
8. Apli seva poilim kortalim, punn atam thoddo vell bond kelolea sevokank Jehova visorta kai? Somzaiat.
8 Apli seva poilim kortalim punn atam thoddo vell bond kelolea sevokank Jehova kednanch visorna. (Heb. 6:10) Tea bhair tannim kel’li seva pasun to kednanch visorna. Jehova aplea lokanchi kallji koxi gheta tem dakhounk provadi Izaiasan ek sobit udharonn dilem. Tannem boroilem: “Menddram-rakhnno koso To Aplea hinddak choroita, Aplea hatamnim menddurleank vengoita, tankam Aple khankek marun vhorta.” (Iz. 40:11) Aplo ek menddro aplea hindda thaun pois voita tednam, Vhodd Gonvlli aslolea Jehovak koxem dista? Jehovak koxem dista tem Jezun aplea xisank vicharlolea hea prosna udexim kollon ieta: “Tumkam kitem dista? Konneklea monxa kodde xembor xellio asleo, ani tantuntli ek sanddli zalear, nnoian’nnoi dongrancher soddun, hinddantli koddsorun gelea tika to sodunk vecho na kai? Ani hanv tumkam khorench sangta: ti mell’lli zalear, sanddunk naslolea nnoian’nnoi xelliam poros, hiche vixim to odik khuxal zata”—Mt. 18:12, 13.
9. Bible kallar bore gonvlli aplea xellianchi kallji koxe ghetale? (Masikachem fuddlem chitr polloiat.)
9 Jehovak eka gonvllea sangata kiteak sor korunk zata? Karonn Bible-achea kallar, ek boro gonvlli aplea xellianchi bori kallji ghetalo. Udharonnak, David aplea hinddank rakhunk, ek xinv ani vanxela sangata zhuzlo. (1 Sam. 17:34, 35) Apela hinddantli ek xelli pasun na zalear eka borea gonvlleak tem kollon ieta. (Juanv 10:3, 14) Oslo ek gonvlli aple 99 xelliank eka gotteant vo dusrea eka gonvllea lagim soddun tea eke xelliek sodhunk voitalo. Sanddlolea xelliechi vopar uzar korun, Jezun ek mhotvachem lisanv xikoilem: “Tech porim hea dhakttuleam bhitorlo eklo-i ibaddlolo sorgar astea tumchea Bapak naka.”—Mt. 18:14.
Adlea tempa voilo ek Israelit gonvlli aplea eka sanddlolea xelliechi kallji gheta (Peregraf 9 polloiat)
JEHOVA APLEA XELLIEK SODHTA
10. Ezekiel 34:11-16-a pormonnem, aplea sanddlolea xelliam pasot Jehova kitem kortolo mhunn bhasaita?
10 Jehova amcho sogleancho mog korta. Aplea hindda thaun pois sorlolea ‘dhakttuleancho’ pasun. Apunn aplea xelliek sodhtolo ani taka aplea sangata porot ixttagot zoddunk modot kortolo mhunn Devan provadi Ezekiel-a udexim bhasailolem. Ani tankam vachounk kitem kortolo tem pasun tannem sanglem. Sanddlolea xelliek sodhtolea ek Israelit gonvllea sarko to pavlam ghetolo mhunn sanglem. (Ezekiel 34:11-16 vachat.) Poilem, to gonvlli khub vell ghalun ani proitn korun aplea xelliek sodhtolo. Magir, ti xelli mell’llea uprant to tika aplea hinddant portun gheun voita ani fuddem zor tea xelliek ghavo zala vo ti bhukelea zalear, to tichea ghaveak pott’tti bandtolo, tika ukholtolo ani tika bhoroitolo. Hea toren, to gonvlli tea xelliek modot korun mog dakhoita. Sobhe thaun pois sorloleank modot korunk, ‘Devachea hinddache gonvlli’ mhunnche vhoddilamnim hinch pavlam gheunk zai. (1 Ped. 5:2, 3) Hea toren vhoddil tankam sodhtat, hinddant porot ieunk modot kortat ani porot Jehovache ixtt zaunk modot korun mog dakhoitat. *
11. Eka borea gonvlleak kitem khobor asta?
11 Xelli sanddunk xokta mhunn eka borea gonvlleak khobor asta. Tor ek xelli hindda thaun pois voita tednam, ek gonvlli tika marina. Aple thodde sevok aplea thaun pois gele tednam tankam modot korunk Jehovan kitem kelem tem polloum-ia.
12. Jehova Jonasa sangata koso vaglo?
12 Provadi Jonasan apleak dilolem kam korunk na. Punn Jehovan taka rokddoch soddun diunk na. Eka borea gonvllea sarko, Jehovan taka vanchoilo ani aplem kam korunk goroz ti xokti melloun gheunk modot keli. (Jonas 2:8; 3:1, 2) Uprant, ek dudiachi val uzar korun munxacho jiv kitlo valoracho tem Jonasak somzonk modot keli. (Jonas 4:10, 11) Hantunt kitem lisanv asa? Seva bond kortat toslea porgottnnarank, vhoddilamnim rokddench soddun diunk nozo. Tachea bodlek, khoinchea karonnak lagon ti xelli hindda thaun pois sorun geli tem zannam zaunk vhoddilamnim proitn korunk zai. Ani ti xelli Jehova lagim porot ieta tednam tannim tika mog ani kallji dakhoit ravonk zai.
13. Stotr 73 boroupea sangata Jehova jea toren vaglo tantuntlean ami kitem xiktat?
13 Stotr 73 boroilolo stotrkar, noxttea munxank mell’llole ies polloun nirax zalo. Devachi khuxi korun kainch faido na mhunn taka disonk laglem. (St. 73:12, 13, 16) Jehovan kitem kelem? Tannem tea stotrkachi nit korchea bodlek tachim utram Bible-ant boroun dovorlim. Punn uprant, Jehovacho ixtt zaunchea poros anik kainch valorachem na mhunn stotrkarak kollon ailem. (St. 73:23, 24, 26, 28) Hantunt kitem lisanv asa? Jehovachi seva korun kitem faido asa mhunn jim prosn vichartat tosleanchi vhoddilamnim rokddich nit korunk nozo. Tanchi nit korchea bodlek, tim toxem kiteak mhunnttat ani vagtat tem zannam zaunk vhoddilamnim proitn korunk zai. Toxem kelearuch vhoddil tankam Bible-antlean urba diunk xoktat.
14. Elijak modotichi goroz kiteak asli, ani Jehovan taka ti koxi dili?
14 Provadi Elija, Jezebel Rannie thaun pollon gelo. (1 Raz. 19:1-3) Jehovacho provadi mhunn konnuch seva korina ani aplem kam kainch valorachem na mhunn taka dislem. Elija itlo nirax zalo ki taka moronk dislem. (1 Raz. 19:4, 10) Elijachi nit korchea bodlek to ekloch na, aplea xokticher tannem bhorvonso dovrunk zata ani zaitem kam tachea pasot asa mhunn Jehovan taka khatri dili. Jehovan Elijache uske bore toren aikole ani taka novi zobabdari dili. (1 Raz. 19:11-16, 18) Hantunt kitem lisanv asa? Ami sogleamnim khas korunk vhoddilamnim, Jehovachea xelliam sangata doiallien vagonk zai. Jehovacho ek sevok ragar zata zalear vo Jehova apnnak kednanch bhogxicho na mhunn sangta zalear, vhoddilamnim kan diun tachem aikonk zai. Ani uprant tea sanddlolea xelliek Jehova valor korta mhunn tannim khatri diunk zai.
JEHOVACHEA SANDDUN GEL’LEA XELLIAM VIXIM AMKAM KOXEM DISONK ZAI?
15. Juanv 6:39-a pormonnem, aplea Bapaichea xelliam vixim Jezuk koxem dislem?
15 Jehovak aplea sanddun gel’lea xelliam vixim koxem dista?Jezuchea udharonnantlean ami xikonk zata. Jehovachea nodren tachi dor ek xelli moladik mhunn Jezu zannam aslo. Taka lagon, ‘Israelachea Ghoranneachea sanddlolea xelliank’ Jehova lagim porot ieunk, Jezun aplea lagim zata tem soglem kelem. (Mt. 15:24; Lukas 19:9, 10) Jezu boro gonvlli zal’lean, Jehovachi ek xelli pasun tannem sanddunk diunk na.—Juanv 6:39 vachat.
16-17. Jehova thaun pois gel’leank modot kochea vixim vhoddilank koxem disonk zai? (“ Eka Sanddlolea Xelliek Koxem Disonk Puro,” hem boks polloiat.)
16 Apostl Paulun Efez sobhentlea vhoddilank Jezuchi dekh gheunk urba dili. Tannem mhunnttlem: “Dusream koddchem gheunche poros dusreank divop odik vhodd bhag hea Somia Jezuchea khaxa utrancho ugddas dhorun, koxtt korun osoktank adar diunk zai mhonn soglle bhaxen hanvem tumkam dakhoilam.’” (Itihas 20:17, 35) Jehovachea lokanchim kallji gheunchi ek mhotvachi zobabdari, vhoddilank asa mhunn hea versantlean kolltta. Salvador nanvacho Spain desantlo ek vhoddil oso mhunntta, “Jehova aplea sanddlolea xelliachi kitli kallji gheta tea vixim hanv chinta tednam tankam modot korunk mhojean zata tem soglem korunk mhaka urba melltta. Hanvem tanchi kallji ghetloli Jehovak zai mhunn hanv zannam.”
17 Jehova thaun pois gelolim soglim zanchea vixim ami hea lekhant bhasabhas kelea tim Jehova lagim portun ailim. Ani atam pasun tachea lagim portun ieunk zaitim zannam toiar asat. Tor osleank Jehova lagim porot ieunk ami kitem korunk zata, tea vixim fuddlea lekhant ami anik bariksannen bhasabhas kortolim.
GIT 139 See Yourself When All Is New
^ per. 5 Zaitim vorsam visvaxiponnim Jehovachi seva kelea uprant thoddim tachea thaun kiteak pois voitat? Tanchea vixim Jehovak koxem dista? Hea lekhant hea prosnanche zobab mellttole. Tea bhair, Bible kallar Jehova thaun pois geloleank tannem koxi modot keli, tantuntlean ami kitem xikonk zata, tacher pasun ami bhasabhas kortolim.
^ per. 2 UTRACHI MAHITI: Ek porgottnnar sov mhoine vo tachea poros chodd porgottnnechea ani xis korchea kamant bhag gheina zalear, to ek seva bond kelolo porgottnnar zata. Tori astana he porgottnnar amchim bhav-bhoinnam zaun asat ani ami tancho mog kortat.
^ per. 4 Thoddim nanvam bodol’leant.
^ per. 10 Vhoddilamnim him tin pavlam koxim gheunk zata tea vixim ami fuddlea lekhant bhasbhas kortolim.
^ per. 60 CHITRANCHI MAHITI: Aplea sanddlolea xelliechi kallji aslolo ek Israelitkar gonvlli tika sodhtalo ani hinddant porot handdunk modot kortalo. Aiz vhoddil pasun toxech kortat.
^ per. 64 CHITRANCHI MAHITI: Seva bond keloli ek bhoinn, apli bos suttchea poilim khuxalkaien jahir zagear porgottnni kortolea don Sakxeank polloita.
