1. Ngatta nikumpara ni Jehova i baggina ta mappasusu nga yena?

“MAKATTAMAN kari na yena i massusu nga anana?” Niyavu yatun ni Jehova ta kaggawan ni profeta Isaias. Kinagi na Dios ta totolena, “maski nu makakattam i tadday nga yena, ariattakamu vuluvuga kattaman.” (Isa. 49:15) Ari kanayun nga ikumpara ni Jehova i baggina ta tadday nga yena. Ngem taw nga situasion, kingnguana yatun. Nikumpara ni Jehova i mataga-tagenona para ta aripanna ira ta monag nga aya na yena ta anana megafu ta kayàna nga mammuan na aripanna ira nga kuruga iddeddukanna ira. Matageno na aru nga yena i gittana kinagi ni sister Jasmin, “Nu mappasusu ka ta ana mu, mapeggakkamu tu espesial nga relasion nga ari vuluvuga nga mawawan.”

2. Anni i matageno ni Jehova nu egga i tadday ta ánana nga nagimmang nga makistudy anna mallayyagayya?

² Ammu ni Jehova maski nu egga i tadday nga nagimmang ta ánana nga makistudy anna mallayyagayya. Nonopan ngana laman gafu nu kunnasi kataki ta nisa nga masingan i rinivu nga aripanna nga mabbalin tu inactive * ta kada dagun.

3. Anni i ikaya ni Jehova?

³ Aru ta meddu nga wawwaragi tam nga nabbalin tu inactive i manoli ta kongregasion anna magayayya ittam nu kuadda yatun! Ikaya ni Jehova nga manoli ira, kunne nittam gapa. (1 Ped. 2:25) Kunnasi tam ira moffunan? Nige tam matabbag yatun, ammuattam labbi nu ngatta nagimmang ira nga makistudy anna mallayyagayya.

4. Anni i efekto na trabahu ta karuan?

⁴ Nabbalin tu okupadu i karuan ta trabahuda. Inamin ni Hung * nga tadday nga brother nga taga-Southeast Asia: “Inufu ku i oras anna sikakku ta trabahu. Nelogo ngà megafu ta abbo ku nga nu mas aru i kuartù, mas makapasserbi ngà kani Jehova. Yatutta inammungakku i oras na trabahù. Sisinu nga ariakku ngana maka-study adde ta interamente nga nagimmang ngà ngana ta pagatende ta study ira. Talaga dinisenio ni Satanas i mundo tapenu sisinu nga iyarayyu i totolay ta passerbi ta Dios.”

5. Anni i efektona ta tadday nga sister na ngamin nga problemana?

⁵ Egga ira i wawwaragi nga napakaru i problemada nga namakkafi ta nonoda. Angngariganna, si Anne nga taga-Britain ay egga i lima nga anana. “Tadday ta ana ku nga lalaki ay neyana nga egga i pisikal nga diferensiana,” kunni Anne. “Turi kua, tadday gapa ta ana ku nga babay i nadisfellow tapus nattaki ta uto i tadday paga ta ana ku nga lalaki. Kuruga nadepres ngà yatutta nagimmang ngà ngana nga makistudy anna mallayyagayya adde ta nabbalin ngà ngana nga inactive.” Makipaddaddam ittam kani Anne anna ta familiana kunne na gapa turi ira ta meparubang ta kunnatun ira nga problema!

6. Ngatta umarayyu i tadday nga tolay ta kongregasion nu arianna meyaplika i Colosas 3:13?

⁶ Bibbigan i Colosas 3:13, NW. Natakitan i karuan nga aripan ni Jehova megafu ta kingngua na kapangngurugda. Ammu ni apostol Pablo nga nu mittan, egga ira i “rason na tadday nga marreklamo kontra ta tanakuan” nga brother onu sister. Baka ari paga lagu tu patas i nikatratu tam. Nu ariattam magimmugug, baka mangipappan ittam tu taki na nono. Yatun nga taki na nono i mangiyarayyu ta tadday nga tolay ta kongregasion. Nesimmu yatun kani brother Pablo nga taga-South America. Egga i nangakusa nisa tu mali. Nangurug i elder ira nga nakaliwa yayya yatutta nawawanna i pribilehiona ta kongregasion. Anni i reaksionna? “Talaga napporay ngà,” kunni Pablo, “anna sisinu nga minarayyu ngà ta kongregasion.”

7. Anni i puede nga mesimmu ta tolay nga makokkonsensia?

⁷ Nu nakaliwa tu madammo i tadday nga tolay ta nappasa, baka mabayag nga makokkonsensia yayya. Baka abbona nga ari ngana yayya nga mepangngo ta aya na Dios. Maski nu nabbabawi yayya anna nepasingannan tu allo, baka matagenona nga ari ngana yayya mepangngo nga mabbalin tu tadday ta Saksi ni Jehova. Kunnatun i natageno na brother nga si Francisco. “Nadisiplina ngà megafu ta seksual nga imoralidad,” kunna. “Maski nu tulu-tuloy ngà lagapa nga nakistudy, nadepres ngà anna natageno ku nga ari ngà ngana nga mepangngo nga mebilang ta totolay ni Jehova. Nakokkonsensia ngà anna kumbinsidu ngà nga ariannà paga napakoma ni Jehova. Adde ta nagimmang ngà ngana nga mallayyagayya anna makistudy.” Anni i matageno mu ta wawwaragi nga meparubang ta situasion ira nga nagigiammu tam? Egga kari i empatiam para nira? Anni tamma i matageno ni Jehova nira?

8. Makattaman kari ni Jehova danuri dati nga nasserbi nisa? Ipakanawag.

⁸ Ari nga kattaman ni Jehova danuri dati nga masserbi nisa ngem temporario nga nagimmang anna arianna gapa kattaman i kingnguada para nisa. (Heb. 6:10) Kakkasta i nitura ni profeta Isaias nga ilustrasion tapenu ipasingan nu kunnasi tattangngallan ni Jehova i totolena. “Gittana tadday nga pastor,  tangngawanna i karneruna ira,” nitura ni Isaias. “Gukaban na limana ay pattaraddayanna i kordero ira, anna ta gakona ay akkatanna ira.” (Isa. 40:11) Anni i matageno na Dakal nga Pastor nga si Jehova nu egga i tadday ta aripanna nga magimmang ngana nga masserbi? Masingan yatun nga panageno ni Jehova ta kinagi ni Jesus turi ta niyavuna ta disipulosna ira: “Ta nono nu, anni i kuan na tadday nga tolay nu mawawan na i tadday ta magatu nga karneru na? Magga panawan na i siam-ma-fulu-siam ta appastoran, anna en-na nga aleran i tadday nga nawawan. Ay sangaw nu maleran na ngana, kagiak-ku nikamu, mas dakal i pagayaya na megafu toye ta tadday anne ta siam-ma-fulu-siam nga ari nga nawawan.”​—Mat. 18:12, 13.

9. Ta tiempo na Biblia, kunnasi nga tratuan na malalaki ira nga gumappastor i karneruda? (Innan i letratu ta vungun.)

⁹ Ngatta mepangngo nga ikumpara si Jehova ta tadday nga gumappastor? Megafu ta ta tiempo na Biblia, tangngallan tu mapia na tadday nga gumappastor i karneruna ira. Angngariganna, pinatay ni David i tadday nga leon anna oso tapenu protektan i karneruna ira. (1 Sam. 17:34, 35) Siguradu gapa nga mapansin na tadday nga malalaki nga pastor nu egga i tadday nga nawawan ta karneruna. (Juan 10:3, 14) Ipena i 99 nga karneruna ta kural onu ikiddona ta kavvuluna nga gumappastor nga tangngalladda labbi i 99 nga karneru tapenu arayyu ira ta peligro. Kabalinna, umena nga alegan i tadday nga nawawan. Inusa ni Jesus yatun nga ilustrasion tapenu ituddu nittam i importante nga kinakurug: ‘Ari nga ikaya na Yama nu ta langi tu mawawan i maski tadday laman toye ta abbing ira.’​—Mat. 18:14.

10. Segun ta Ezekiel 34:11-16, anni i nipromesa ni Jehova nga kuanna para ta nawawan nga karneruna?

¹⁰ Ayatan ni Jehova i kada tadday nittam nelagum danuri “abbing ira” nga nawawan ta kuralna. Gukaban ni profeta Ezekiel, nipromesa na Dios nga aleganna i nawawan nga karneruna anna uffunanna ira tapenu metoli i makasta nga relasiodda nisa. Kinagina gapa nu anni i kuanna tapenu ipaliag ira. Negitta i kuanna ta kukukuan na tadday nga gumappastor nga Israelita nu egga i tadday  nga nawawan nga karneru. (Bibbigan i Ezekiel 34:11-16.) Ollu, alegan na gumappastor i nawawan nga karneru. Magawag yatun tu tiempo anna sikan. Tapus, sonu naleganna ngana i nawawan, itolina yatun ta kural. Kunne na gapa, nu nabigaran onu mabising i karneru, uffunan yayya na gumappastor, babbagganna i bigagna ira, akkatanna i karneru, anna pakananna. Mawag tu kunnatun gapa i kuan na elder ira, i gumappastor na “karneru ira na Dios” tapenu uffunan i maski sinni nga neyarayyu ta kongregasion. (1 Ped. 5:2, 3) Ollu, alegan labbi ira na elder, tapus uffunadda ira nga makatoli ta kongregasion anna ipasingadda i pangayada nira gukaban na pangiyawa ta kawagan ira nga espiritual nga uffun. *

11. Anni i malippawa na tadday nga malalaki nga pastor?

¹¹ Malippawa na tadday nga malalaki nga gumappastor nga awayyana nga mawawan i karneru. Oras tu manaw ta kural i tadday nga karneru, ari yayya nga pala-palukan na gumappastor. Ikonsidera i angngarigan na pinanguffun ni Jehova ta karuan ira nga aripanna nga temporario nga neyarayyu nisa.

12. Kunnasi i pinattratu ni Jehova kani Jonas?

¹² Sinammangngan ni profeta Jonas i annunganna. Maski kunna, ari insigida nga nawanan tu iddanama si Jehova ta nisa. Megitta si Jehova ta tadday nga malalaki nga gumappastor nga nangipaliag nisa anna nanguffun nisa tapenu manoli i sikan nga kawaganna tapenu ituppal i annunganna. (Jon. 2:7; 3:1, 2) Inusa paga ni Jehova i tadday nga kandul tapenu ipalippawa kani Jonas i balor na inango na kada tolay. (Jon. 4:10, 11) Anni i magigiammu tam tatun? Ari nakuan nga insigida nga mawanan tu iddanama i elder ira turi ira ta nabbalin tu inactive. Lallagu, alippawatan nakuan na elder ira nu ngatta neyarayyu i karneru ta kongregasion. Sonu manoli ngana yatun nga karneru kani Jehova, tulu-tuloy nga mangipasingan i elder ira tu aya anna pangikavurung nisa.

13. Anni i magigiammu tam ta reaksion ni Jehova ta kinagi na nattura ta Salmo 73?

¹³ Nakkafi i nono na nattura ta Salmo 73 turi ta nasinganna nga gittana makasta i pattolay danuri marake. Kinuestionna nu sulit kari i  pangngua ta uray na Dios. (Sal. 73:12, 13, 16) Anni i reaksion ni Jehova? Arianna nga kinondena i lalaki. Kakuruganna, nipetura na Dios ta Biblia i kinagi na salmista. Nalippawa gabbalaman na salmista nga awan ngana tu mas makasta ta pattolay anne ta pabbalin tu kofun ni Jehova. (Sal. 73:23, 24, 26, 28) Anni i magigiammu tam tatun? Ari nakuan nga insigida nga husgan na elder ira danuri madduda nu sulit kari i passerbi kani Jehova. Imbes nga kondenan ira na elder, alippawatadda nakuan nu ngatta kunnari i paguvovug anna agguyu-guyuda. Kabalinna, meyusa ngana na elder ira i Biblia tapenu pagaramman ira.

14. Ngatta kawagan ni Elias i uffun, anna kunnasi yayya inuffunan ni Jehova?

¹⁴ Sinammangngan ni profeta Elias si Reyna Jezebel. (1 Pat. 19:1-3) Abbona nga awan ngana tu tanakuan nga profeta nga massesserbi kani Jehova anna abbona nga awan tu kuenta na kukukuanna. Fermi nga nakkafi i nono ni Elias adde ta punto nga kayàna ngana i matay. (1 Pat. 19:4, 10) Imbes nga kondenan ni Jehova si Elias, nipasiguraduna nisa nga ari yayya magitetadday anna makapattalo yayya ta pakapangngua na Dios. Kunne na gapa, nipasiguradu ni Jehova nisa nga aru paga i ipakuana nisa. Nagginna gapa tu mapia si Jehova ta pakavurungan ira ni Elias anna niddanna yayya tu bagu ira nga annungan. (1 Pat. 19:11-16, 18) Anni i magigiammu tam tatun? Ngamin ittam nakuan, netallugaring ta elder ira, mawag tu tratuattam tu masippo i karneru ni Jehova. Maski nu makaporay i tadday nga tolay onu kagianna nga ari ngana yayya vuluvuga pakoman ni Jehova, magginna lagapa i  elder ira nisa nu ivuvvuna i mataga-tagenona. Tapus, ipasiguraduda ta nawawan nga karneru nga tagibaloran yayya ni Jehova.

15. Segun ta Juan 6:39, anni i matageno ni Jesus ta karneru na Yamana?

¹⁵ Anni i kayà ni Jehova nga matageno tam meyannung ta nawawan nga karneruna? Nangiyawa si Jesus tu makasta nga ehemplo para nittam. Ammuna nga tagibaloran ni Jehova i ngamin nga karneruna, yatutta kingnguana i ngamin nga mawayyana tapenu uffunan nga manoli kani Jehova i “totolay na Israel nga neyarig ta karneru nga nakkawawan.” (Mat. 15:24; Luc. 19:9, 10) Bilang “mapia nga minappastor,” kingngua ni Jesus i ngamin nga mawayyana tapenu awan vuluvuga tu mawawan ta karneru ni Jehova.​—Bibbigan i Juan 6:39.

16-17. Anni nakuan i matageno na elder ira ta panguffudda ta nabbalin tu inactive? (Innan i kahon nga “ Nu Anni i Panageno na Nawawan nga Karneru.”)

¹⁶ Pinagaram ni apostol Pablo i mannakam ira ta kongregasion ta Efeso nga parigadda si Jesus. ‘Uffunannu i mazziga-riga ira. Daddammannu i uvovug na Yafu Jesus nga yayya mismu i nakkagi, “Mas dakal i pagayayya ta pangiyawa anne ta pangalawa.”’ (King. 20:17, 35) Ipasingan natun nga teksto nga importante i responsibilidad na elder ira ta panangngal ta totolay ni Jehova. “Kada manono ku nu kunnasi kadakal i pangikavurung ni Jehova ta nawawan nga karneruna, mapaguyu ngà nga kuakku i ngamin nga mawayyà tapenu uffunan ira,” kunni Salvador, tadday nga elder ta Spain. “Bilang espiritual nga gumappastor, kumbinsidu ngà nga kayà ni Jehova nga uffunakku ira.”

¹⁷ Ngamin danuri nabbalin tu inactive taw nga artikulo ay noffunan nga makatoli kani Jehova. Ta maddaggun, aru paga nga nakkawawan nga karneru i maya nga manoli. Gigiammuattam tu mas detalyadu ta tumunug nga artikulo nu anni paga i makua tam tapenu moffunan ira nga manoli kani Jehova.