1. Yehowa gaw shi hkum shi chyu jaw ai kanu hte hpa majaw shingdaw wa ai kun?

‘NUMSHA gaw chyu chyu ai ma hpe malap kau lu na rai ni?’ Myihtoi Esaia prat hta, Yehowa san wa ai ga san re. Numsha gaw “gaja wa malap kau ti mung, ngai nang hpe malap kau lu na n rai” ngu shi tsun wa ai. (Esa 49:15) Yehowa gaw shi hkum shi, ma kanu hte nau n shingdaw ga tim, ya kalang gaw shingdaw wa ai. Yehowa gaw shi a mayam ni hpe kade daram tsawra ai lam, kanu hte kasha a lapran na tsawra myit hte shingdaw dan ai. Kanu law malawng gaw nauna Hasamen zawn hkamsha ma ai. Shi ndai hku tsun ai: “Ma hpe chyu jaw ai gaw hku hkau lam prat tup ngang kang shangun ai.”

2. Yehowa gaw kasha langai shi kaw na tsan mat wa ai shaloi gara hku hkamsha ai kun?

² Yehowa gaw shi a kasha langai nawku zuphpawng ni, hkaw tsun bungli ni n sa ai hpe chye ai. Hkying hku law ai shi a mayam ni shaning shagu wenyi lam hta katsi mat ai * hpe mu ai shaloi shi grai yawn ai.

3. Yehowa hpa hpe ra sharawng ai kun?

³ Katsi mat ai hpunau nauna ni nawku hpung de bai wa ai shaloi, anhte grai kabu ai. Yehowa gaw shanhte hpe bai wa shangun mayu ai zawn anhte mung wa shangun mayu ai. (1 Pe 2:25) Gara hku karum ya na kun? Mahtai n jaw shi yang, shanhte gaw zuphpawng ni hte hkaw tsun bungli ni hpa majaw n sa mat ai hpe chye ra ai.

4. Kan bau bungli a majaw masha nkau hpa byin mat ai kun?

⁴ Nkau gaw kan bau bungli hpe sha ahkyak shatai ma ai. “Nye a aten hte n-gun hpe bungli kaw sha shama kau ai. Gumhpraw law law lu yang Yehowa a magam hpe grau nna gun lu na re ngu myit wa ai. Dai majaw bungli grau galaw ai. Zuphpawng n lu sa ai aten ni law wa ai. Hpang hta tsep kawp n lu sa mat ai. Satan gaw mungkan hpe akyu jashawn nna, Karai a magam n lu gun hkra galaw nga ai” ngu Sinpraw Dingda Asha kaw nga ai hpunau Hang * tsun ai.

5. Nauna langai manghkang ni hkrum ai majaw gara hku byin wa ai kun?

⁵ Hpunau nauna nkau gaw manghkang ni hte hpring nga ai. Britin kaw na nauna An hta ma 5 nga ai. Shi ndai hku tsun ai: “Ma Naw gaw shangai ai kaw nna n kung n kang re ai. Ma Roi gaw hpung kaw na shapraw hkrum ai. Ma Gam gaw myit hkamja lam n nga ai. Grai myit htum ai majaw zuphpawng ni, hkaw tsun bungli ni n sa mat ai. Wenyi lam hta katsi mat ai.” Nauna An a dinghku hte dai zawn manghkang ni hkrum nga ai kaga ni hpe mung anhte grai matsan dum ga ai.

6. Kolose 3:13 hpe n hkan sa ai wa gaw Yehowa a masha ni hte gara hku tsan mat chye ai kun?

⁶ Kolose 3:13 hpe hti u. Nkau mi gaw, hpunau nauna ni a majaw hkra machyi ai. Shada da mara shagun shara kalang lang nga chye ai hpe kasa Pawlu chye ai. N tara ai lam ni pyi hkrum chye ai. N sadi yang, masin n si hkraw ai baw byin chye ai. Masin pawt ai wa gaw Yehowa a masha ni hte tsan mat chye ai. Dingda Amerika kaw na hpunau Pabalo a mabyin hpe yu yu ga. Shi gaw n jaw ai hku mara shagun hkrum nna, magam lit ni sum mat ai. Gara hku bai htang wa ai kun? “Ngai grai masin pawt ai majaw, nawku hpung hte angwi ngwi tsan mat wa ai” ngu Pabalo tsun ai.

7. Mara nga ai ngu hkamsha ai myit gaw marai langai hpe gara hku byin shangun ai kun?

⁷ Shing nrai, Karai a tara ni hpe tawt lai ga ai wa gaw, mara nga ai ngu nna hkamsha chye ai. Karai a tsawra myit hte n ging dan ai ngu nna mung hkamsha chye ai. Myit malai lu nna matsan dum hkrum sai raitim, Yehowa Sakse langai byin na matu atsam n hpring ai ngu hkamsha chye ai. Hpunau Hpransitsako dai zawn hkamsha wa ai. “Hpye ai amu galaw ai majaw ngai sharin shaga hkrum ai. Zuphpawng ni matut lung tim, myit daw wa ai majaw Yehowa a masha ni hta n nga ging ai ngu hkamsha ai. Myit nsam gaw ngai hpe dingbai dingna jaw nna, Yehowa mara raw ya na n re ngu hkamsha ai. Hpang hta nawku hpung hte n kanawn mat sai” ngu shi tsun ai. Dai zawn hkrum nga ai hpunau nauna ni hte seng nna nang gara hku hkamsha ai kun? Shanhte hpe matsan dum ai kun? Yehowa gara hku hkamsha ai kun?

8. Yehowa gaw shi hpe nawku daw jau ga ai ni hpe malap kau ai kun? Sanglang dan u.

⁸ Yehowa hpe nawku daw jau wa tim, chyahkring mi katsi mat wa ai ni hpe shi n malap ai. Shi a magam gun wa ai hpe mung galoi n malap ai. (Heb 6:10) Yehowa lanu lahku ai lam madun ai ga shadawn langai hpe myihtoi Esaia ndai hku ka wa ai: “Shi gaw sagu rem ai wa zawn shi a sagu hpung hpe lanu lahku na ra ai; shi gaw sagu kasha  ni hpe shinggyin la nna dai ni hpe shi a lata lahpum hta pawn da na ra ai.” (Esa 40:11, JCLB) Sagu langai dam mat ai shaloi, Yehowa gara hku hkamsha ai kun? Yesu gaw sape ni hpe ga san san nna, Yehowa a hkamsha lam hpe ndai hku tsun dan wa ai: “Nanhte kaning ngu myit da mu ta? masha langai ngai sagu latsa lu nna, dai hta na langai mi dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam ga ai, n rai ni? Dai hpe mu hkrup jang, n dam ai sagu jahku shi jahku a matu kabu gara ai hta, dai langai sha a matu grau nna kabu gara nga ai.”​—Mat 18:12, 13.

9. Chyum Laika prat na sagu rem ni gaw shanhte a sagu ni hpe gara hku yu lakawn ai kun? (Makawp sumla hpe yu u.)

⁹ Yehowa hpe sagu rem wa hte shingdaw ai gaw hpa majaw htap htuk ai kun? Chyum Laika prat na sagu rem ni gaw sagu ni hpe atsawm yu lakawn ai majaw re. Ga shadawn, Dawi gaw sagu hpung hpe makawp maga na matu, hkanghkyi hte tsap hpe gasat wa ai. (1 Sa 17:34, 35) Kaja ai sagu rem wa gaw, sagu langai mat yang pyi sadi hkrup ai. (Yhn 10:3, 14) Shi gaw sagu 99 hpe shim ai shara hta tawn da nna (sh) kaga sagu rem wa hpe ap da nna mat mat ai sagu hpe hkan tam ai. Yesu gaw dai ga shadawn hte ndai ahkyak ai lam hpe sharin ya ai: “Ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai.”​—Mat 18:14.

10. Ezekela 34:11-16 hku nga yang Yehowa gaw mat ai sagu ni hpe hpa galaw ya na ngu ga sadi jaw da ai kun?

¹⁰ Sagu hpung kaw na dam mat ai sagu hte hpawn, anhte yawng hpe Yehowa tsawra ai. Karai Kasang gaw mat ai sagu ni hpe hkan tam nna, wenyi lam bai kaja hkra karum ya na ngu myihtoi Ezekela hku nna ga sadi jaw da ai. Sagu langai dam mat ai shaloi sagu rem wa galaw ai zawn, shi mung Israela ni hpe hkye la na lam tsun da ai. (Ezekela 34:11-16 hpe hti u.) Sagu rem wa gaw aten hte n-gun shadat nna, mat ai sagu hpe hkan tam ai. Mu ai shaloi, sagu hpung de bai woi wa ai. Sagu gaw ningma lu nga yang, tsawra myit  hte yu lakawn nna, ningma hpe kayawp ya na, pawn ba wa na, malu masha jaw sha na re. “Karai Kasang a sagu hpung” kaw na sagu rem ni re ai myitsu salang ni gaw nawku hpung hte tsan mat wa ai ni hpe karum ya na matu dai zawn galaw ra ai. (1 Pe 5:2, 3) Shanhte hpe tam nna, bai wa na matu karum ya ra ai. Wenyi lam hta madi shadaw ya nna, tsawra myit madun ra ai. *

11. Kaja ai sagu rem wa gaw hpa hpe chye na ai kun?

¹¹ Kaja ai sagu rem wa gaw sagu ni lam dam chye ai hpe chye na ai. Sagu langai dam mat ai shaloi, sagu rem wa gaw shi hpe n kayat ai. Yehowa gaw shi hte tsan mat ai mayam nkau mi hpe gara hku karum ya wa ai lam yu yu ga.

12. Yehowa gaw Yona hpe gara hku karum ya ai kun?

¹² Myihtoi Yona gaw shi a lit gun na matu hprai wa ai. Raitim, Yehowa gaw shi hpe alawan asum n jaw ai. Kaja ai sagu rem wa zawn, shi hpe hkye la nna, lit hpe ngut kre hkra gun hpai lu na matu n-gun atsam jaw ai. (Yon 2:8; 3:1, 2) Masha langai hpra a asak gaw manu dan ai hpe tauba ru ga shadawn hte Yona chye na hkra karum ya ai. (Yon 4:10, 11) Hpa sharin la lu ai kun? Wenyi lam hta katsi mat ai ni hpe myitsu salang ni alawan asum n mai jaw ai. Sagu langai hpa majaw dam mat ai hpe myitsu salang ni chye hkra shakut ra ai. Yehowa hpang de bai wa ai sagu hpe myitsu salang ni tsawra myit matut madun ra ai.

13. Shakawn 73 hpe ka ai wa hpe Yehowa bai htang ai lam kaw nna hpa sharin la lu ai kun?

¹³ Shakawn Kungdawn 73 hpe ka ai wa gaw, nhkru ai ni awng dang nga ai hpe mu ai shaloi myit daw wa ai. Karai a myit ra ai hpe galaw ai gaw hpa akyu nga ai kun? ngu nna shi myit wa ai. (Shk 73:12, 13, 16) Yehowa gara hku bai htang ai kun? N jahpoi ai sha, shi tsun ai ga hpe Chyum Laika hta ka shalawm da ai. Yehowa hte hku hkau lam gaw, kaga yawng hta na kaja htum re ai hpe shi chye wa ai. (Shk 73:23, 24, 26, 28) Hpa sharin la lu ai kun? Yehowa a magam gun ai gaw akyu nga ai kun? ngu nna myit ai ni hpe myitsu salang ni alawan mara n shagun ging ai. Jahpoi na  malai, hpa majaw dai hku tsun ai, galaw ai hpe chye na hkra shakut ra ai. Chyum Laika hte n-gun jaw mai ai.

14. Elia gaw hpa majaw karum shingtau lam ra ai kun? Yehowa shi hpe gara hku karum ya ai kun?

¹⁴ Myihtoi Elia gaw Hkawhkam jan Yezebela kaw na hprawng wa ai. (1 Hk 19:1-3) Yehowa a myihtoi kadai n nga sai ngu shi myit ai. Magam gun ai mung hpa akyu n nga ai ngu hkamsha ai. Grai myit daw nna, si pyi si mayu ai. (1 Hk 19:4, 10) Yehowa gaw Elia hpe jahpoi na malai, shi langai sha n re ai lam, Karai a atsam hpe kamhpa mai ai lam, galaw na lit ni naw nga ai lam tsun dan ai. Elia a myit tsang ai lam hpe madat ya nna, lit nnan jaw wa ai. (1 Hk 19:11-16, 18) Hpa sharin la lu ai kun? Anhte yawng hte laksan hku nna myitsu salang ni gaw, Yehowa a sagu ni hpe tsawra myit hte kanawn mazum ging ai. Masin pawt ai lam (sh) Yehowa a matsan dum myit hte n ging dan ai ngu hkamsha ai lam hpe marai langai ngai sa tsun dan ai shaloi, myitsu salang ni madat ya mai ai. Mat ai sagu ni hpe Yehowa manu shadan ai lam tsun dan mai ai.

15. Yawhan 6:39 hku nga yang Yesu gaw kawa a sagu ni hpe gara hku mu mada ai kun?

¹⁵ Dam mat ai sagu hte seng nna, anhte hpe Yehowa gara hku hkamsha shangun mayu ai kun? Anhte a matu Yesu kasi madun wa ai. Sagu yawng gaw Yehowa a matu manu dan ai hpe shi chye ai majaw, “Israela nta na dam mat wa ai sagu ni” Yehowa hpang de bai wa na matu, dang lu ai daram karum ya wa  ai. (Mat 15:24; Luk 19:9, 10) Yesu gaw kaja ai sagu rem wa hku nna, Yehowa a sagu langai mi mung n mat hkra galaw wa ai.​—Yawhan 6:39 hpe hti u.

16-17. Wenyi lam hta katsi mat wa ai ni hpe karum ya ai hte seng nna myitsu salang ni gara hku hkamsha ging ai kun? (“ Dam Mat Ai Sagu A Hkamsha Lam” ngu ai lawk hpe yu u.)

¹⁶ Kasa Pawlu gaw Ehpesu hpung na myitsu salang ni hpe Yesu a kasi hkan sa na matu ndai hku n-gun jaw ai: “Gawngkya ai ni hpe shadaw mai ai lam mung, Hkam sha ai hta jaw ya ai mahtang grau a nga ai, nga nna Madu Yesu nan tsun ai ga dum ga.” (Kas 20:17, 35) Ya aten na myitsu salang ni hta mung dai lit nga ai. Saping mung kaw na myitsu salang Sabedaw ndai hku tsun ai: “Yehowa gaw mat ai sagu ni hpe lanu lahku ai lam myit yu ai shaloi, ngai mung dang lu ai daram karum ya mayu wa ai. Shanhte hpe lanu lahku na matu, Yehowa ra sharawng ai hpe ngai chye ai.”

¹⁷ Ndai sumhpa hta lawm ai tsan mat wa ai ni yawng gaw, Yehowa hpang de bai wa na matu karum shingtau lam lu la ai. Ya aten hta, Yehowa hpang de bai wa mayu ai ni law law nga ai. Hpang na sumhpa hta, Yehowa hpang de shanhte bai wa lu na matu, karum ya lu ai lam hkaja lu na re.