SIRONGWA SELIRONGO 25
“Nyamwange ngani papara nonzwi dange”
“Nyamwange ngani papara nonzwi dange, ni di pakere mbili.”—HES. 34:11.
RUSUMO 105 “Karunga yige eharo”
ETWAROMO *
1. Morwasinke Jehova ga lihetakanesera mwene kwazinya?
“MUKADI kuvhura kudivara mukeke gwamwene ndi?” Olyo kuna kara epuro eli ga pulire Jehova momazuva gomuporofete Jesaya. Karunga kwa tanterere vantu vendi asi: “Nampili pa kare nye ngano zinya gokudivara munwendi, ame narumwe si kukudivara.” (Jes. 49:15) Jehova kapi a lihetakanesa mwene kwazinya, nye age ga yi rugene posikando esi. Jehova kwa ruganesere sifanekeso sa zinya ogu ga hara munendi, mokulikida eharo eli ga kara nalyo kovakareli vendi. Sinzi sovazinya kulizuvha ngwendi munazinyetu Jasmin ogu ga tanta asi: “Kukara namunoge kukuninkisa o tunge po elikwatakano lyokukarerera kumwe nage.”
2. Ngapi a lizuvhu Jehova apa vana vendi ava tengura monyima?
2 Jehova kuyidiva apa munwendi gumwe a hageke kuza mokuzuvhisa ndi komapongo. Yipo nye, ayo kumuguvisa apa vakareli vendi wovanzi ava tengura monyima * nkenye mvhura.
3. Yisinke ana hara Jehova?
3 Sinzi sovanavazinyetu ava va tengura monyima, konyima kutameka kuwiza komapongo ntani ose kuvatambura nomawoko gavali. Jehova ntani nose kuna hara vanavazinyetu owo va tengure kwendi. (1 Pet. 2:25) Ngapi omu natu va vatera yipo va tengure? Komeho tu limburure epuro olyo, tu zogereni tanko eyi ayi ninkisa vamwe va hageke kuwiza komapongo ntani nokuza moyirugana yokuzuvhisa.
YISINKE AYI NINKISA VAMWE VA HAGEKE KUKARERA JEHOVA?
4. Ngapi omu yirugana ayi kundama vanavazinyetu vamwe?
4 Vanavazinyetu vamwe kutura yirugana yawo komeho kupitakana kukarera Jehova. Munazinyetu Hung * ogu ga tunga moAsia kwa tanta asi: “Ame ngani rugana siruwo sosire koyirugana. Ame kwa litanterere nyamwange asi, nsene ni kara noyimaliva yoyinzi ame ngani karera Jehova nawa, nye alyo kwa kere egano lyepuko. Ame ngani rugana novili dononzi. Ano eyi ngayi ninkisa nge ni dire kuza komapongo nagenye ntani konyima ame na ya hagekere kuza komapongo. Ayo kumoneka asi Satana kuruganesa uzuni yipo a ninkise vantu va hageke kukarera Jehova.”
5. Ngapi omu maudigu ga kundamene munazinyetu gumwe?
5 Vanavazinyetu vamwe kuligwanekera nomaudigu aga aga va dompesa. Munazinyetu gomukadi Anne, kwa tunga moBritania ntani age kwa kara novana vatano. Age kwa tanta asi: “Munange gumwe kwa mu hampurukire age sirema, ano konyima zosiruwo munange gumwe gomukadona kwa mu gusire mombunga. Ntani munange gumwe gomumati kwa zarukire. Eyi kwa guvisire nge sili unene ntani ame kwa hagekere kuza moyirugana yokuzuvhisa nokomapongo. Ame kwa tengwire monyima.” Ayo kutuguvisa sili pokuzuvha eyi ya horokera Anne nepata lyendi ntani navamwe ava vana kuligwanekera nomaudigu ngwendi googo.
6. Ngapi omu kudira kutura pasirugana etjangwa lyomoVakorosi 3:13, ayi ninkisa vamwe va hageke kuza komapongo nomoyirugana yokuzuvhisa?
6 Resa Vakorosi 3:13. Vanavazinyetu vamwe kwa va handukisa vapuli vakwawo womombungakriste. Mupositoli Paurusa kwa tente asi poyiruwo yimwe vapuli vakwetu kuvhura va tu ‘zonene.’ Kuvhura hena va tu tekure momudona. Ano nsene kapi tuna kutakamesa, eyi kuvhura yi tu ninkise tu kare nonkoko. Konyima zosiruwo, kuvhura yi tu ninkise tu liguse ko kombunga zaJehova. Koneka eyi ya horokerere munazinyetu gomugara Pablo ogu ga tunga moSouth Amerika. Age kwa mu rundilire asi ana rugana yininke yoyidona, yipo va mu gusire yitumbukira yendi yomombungakriste. Ngapi omu ya mu kundamene? Pablo kwa tanta asi: “Ame kwa handukire ntani na hagekere kuza moyirugana yokuzuvhisa nokomapongo.”
7. Yisinke ayi horokere muntu ogu a lizuvhu unzoni?
7 Nsene gumwe kwa rugene yininke yoyidona nare, konyima kuvhura kuyalizuvha simpe unzoni. Age kuvhura a lizuvhe asi Karunga kapi ta vhuru kumuhara. Nampili yi kare asi age ga litezurura nare ntani va mu gusira po, age kuvhura kulizuvha ngwendi kapi ana wapere kukara movantu vaKarunga. Eyi yiyo ya horokerere Munazinyetu gedina Francisco. Age kwa tanta asi: “Ame kwa gwene episuro morwa kwa lihamekere moruhonda. Nampili ngomu ngani twikire kuza komapongo, ame kwa guvire sili unene ntani kwa lizuvhire asi kapi nina wapere kukara mokatji kovantu vaJehova. Ezwi lyange lyokomutjima kwa twikilire kupa nge usima ntani ame kwa lizuvhire asi Jehova kapi ga gusira nge po. Eyi kwa ninkisire nge ni hageke kuza komapongo ntani nokulihameka moyirugana yokuzuvhisa.” Ngapi omu o lizuvhu kuhamena vanavazinyetu ava ava ligwanekere nomaudigu ngwendi gaga tuna zogere? Maudigu ogo kuna kukuguvisa ndi? Unene po, ngapi omu a lizuvhu Jehova kuhamena vanavazinyetu ava vana kuligwanekera nomaudigu ogo?
JEHOVA KWA HARA NONZWI DENDI
Musita goMuisraeli kwa pakerere mbili nzwi zendi zokuzumbana (Tara paragarafu 8-9) *
8. Jehova kudivara vantu ava ngava mu karere nare ndi? Faturura.
8 Jehova kapi a divara vantu ava va tengura monyima ava ngava mu karere nare. Ntani age kapi a divara eyi va mu ruganena. (Heb. 6:10) Muporofete Jesaya kwa tjenge sifanekeso sosiwa esi asi likida omu Jehova ga hara vantu vendi. Age kwa tente asi: “Siunda sendi nga si lisa ngwendi musita. Nga pongaika nonzwigona mokuwoko kwendi a di simbire ponturo zendi.” (Jes. 40:11) Ngapi omu Jehova, Musita goMunene po a lizuvhu apa gumwe govakareli vendi a hageke kumukarera? Jesus kwa likidire omu a lizuvhu Jehova apa ga pulire varongwa vendi asi: “Omu muna kugazara hena ngapi? Nsenesi muntu ga weka nonzwi efere limwe, makura pa zumbane po zimwe, kapi na siga edi nomurongo ntano-nane ponondundu, a ze a ka hara-hare zokuzumbana? Nsenesi a ka zi gwana, yosili nina kumutantera, yilyo sa ehafo lyomu na ka hafera nzwi zimwe ozo kupitakana omu na hafera odo nomurongo ntano-nane nantano-nane, edi da dira kuzumbana.”—Mat. 18:12, 13.
9. Ngapi omu vasita wovawa ngava tekura nonzwi dawo posiruwo sanare? (Tara efano lyopontunda.)
9 Morwasinke Bibeli za fanekesera Jehova komusita? Morwa posiruwo sanare musita gomuwa nga pakere mbili nonzwi dendi. Pasihonena, Ndafita kwa dipagere nyime ntani nasimbungu yipo a popere nonzwi dendi. (1 Sam. 17:34, 35) Musita gomuwa age kuyidimburura nampili apa azi zumbana nzwi zendi zimwe. (Joh. 10:3, 14) Musita gwangoso nga siga nonzwi dendi 99 mosinyongo ndi a di sigire mukwawo, yipo a ka papare ezi zina zumbana. Jesus kwa ruganesere sifanekeso oso, yipo a tu ronge sitwa somulyo. Age kwa tente asi: “Naguhyeni gemeguru yimo ngorooro ga hara asi potunona otu ngano paha kana kamwe.”—Mat. 18:14.
Musita gononzwi gomosiruwo sanare kuna kupakera mbili nzwi zokuzumbana (Tara paragarafu 9)
JEHOVA KUPAPARA NONZWI DENDI
10. Kuliza naHesekiyeli 34:11-16, yisinke ga tumbwidira Jehova kononzwi dendi edi da zumbana?
10 Jehova kwa tu hara natuvenye kukwatera mo nava va siga siunda sendi. Kupitira momuporofete Hesekiyeli, Karunga kwa tumbwidilire asi nga papara nonzwi dendi edi da zumbana nokudivatera di kare hena nelikwatakano nendi. Ntani age kwa tumbwire eyi nga rugana yipo adi popere. Eyi ya lifana neyi ngava rugana vasita woVaisraeli apa ngadi zumbana nonzwi dawo. (Resa Hesekiyeli 34:11-16.) Pomuhowo, musita goMuisraeli nga papara nzwi zendi ntani eyi kwa hepere siruwo nelituromo lyenene. Konyima zokugwana nzwi ezi za zumbana, musita ogo nga zi gusa nokuzitwara kononzwi nonkwawo. Ntani hena, nsene asi nzwi ozo zina remana ndi kuna kufa nzara, musita ogo ngazi gusa nokuzivatera pokudinga yironda yazo nokuzidamuna ntani nokuzipa nondya. Vakuronambunga ndi “vasita wosiunda saKarunga” nawo va hepa kurugana yininke yokulifana mokuvatera ava va tengura monyima. (1 Pet. 5:2, 3) Awo va hepa kupapara ava va tengura monyima nokuvavatera va tengure kombungakriste ntani nokuvalikida eharo pokuvavatera va tulise po hena elikwatakano naJehova Karunga. *
11. Posiruwo sanare, yisinke ga divire musita gomuwa?
11 Posiruwo sanare, musita gomuwa ga yi divire asi nonzwi dendi kuvhura kuzumbana. Yipo nye, apa nonzwi dendi ngadi zumbana age kapi nga di tengeke ndi a di tekure nonyanya. Koneka sihonena esi ga tulire po Jehova, apa ga vaterere vakareli vendi ava va dilire kuhara kurugana eyi ga here.
12. Ngapi omu Jehova ga tekwire Jona?
12 Muporofete Jona kapi ga limburukwire Jehova ntani kapi ga zire koNinivhe. Nampili ngoso, Jehova kapi ga sigilire Jona. Ngwendi musita gomuwa, Jehova kwa mu paparere nokumuvatera yipo a gwane nonkondo edi ga hepa mokusikisa mo situmbukira sendi. (Jona 2:7; 3:1, 2) Konyima, Karunga kwa ruganesere simeno mokuvatera Jona a kwate egano asi vantu navenye kwa kara nomulyo kwaJehova. (Jona 4:10, 11) Yisinke natu lirongera ko? Vakuronambunga kapisi va hageke kuvatera vantu ava va tengura monyima. Nye awo va hepa kuhetekera ko kukwata egano eyi ayi ninkisa vanavazinyetu va tengure monyima. Ntani nsene munazinyetu ana tengura kwaJehova, vakuronambunga va hepa kutwikira kumulikida eharo nokumuvatera.
13. Yisinke natu lirongera ko monkedi omu Jehova ga tekwire mutjangi gEpisarome 73?
13 Mutjangi gEpisarome 73, kwa guvire apa ga mwene vadinikarunga kuna kuvatompoka yininke meparu. Age kwa lipulire nsene poyili nga gwanena mo pokulimburukwa Karunga. (Epis. 73:12, 13, 16) Yisinke ga rugene ko Jehova? Age kapi ga handukilire mugara ogo. Nye age kwa tura nonkango domutjangi ogo moBibeli. Konyima, mutjangi ogo kwa ya dimbwilire asi kwato eyi ya kara nomulyo unene kupitakana kukara nelikwatakano naJehova. (Epis. 73:23, 24, 26, 28) Yisinke natu lirongera ko? Vakuronambunga kapisi va genderere kupangura vantu ava ava singanyeke nsene awo kuna kugwanena mo uwa mokukarera Jehova. Mevango lyokuvapangura, awo va hepa kuhetekera ko kukwata egano eyi yina kuninkisa vanavazinyetu owo va kare nomasinganyeko. Konyima zokuyirugana oyo, awo ntani nye nava vhura kugava mapukururo gomoBibeli aga naga vhura kuvakorangeda.
14. Morwasinke Eliya ga heperere evatero ntani ngapi omu Jehova ga mu vaterere?
14 Muporofete Eliya kwa tjwayukire morwa kwa tjilire hompakadi Jesebeli. (1 Vah. 19:1-3) Age kwa gazarere asi gelike ga kere muporofete gwaJehova ntani asi sirugana sendi kapi sa kere nomulyo. Eliya kwa guvire unene ntani age kwa here asi ngano a fe. (1 Vah. 19:4, 10) Mevango lyokuhandukira Eliya, Jehova kwa mu vaterere a dimburure asi kapisi gelike ga kere ntani nga mu vatera. Jehova kwa vaterere hena Eliya a dimburure asi simpe yirugana yinzi ga hepere kurugana. Age kwa purakenene apa Eliya ga mu tanterere yinka yendi ntani age kwa mu pere situmbukira sosipe. (1 Vah. 19:11-16, 18) Yisinke natu lirongera ko? Natuvenye unene po vakuronambunga, twa hepa kutekura nonzwi daJehova neharo. Nampili muntu a pwagese runyengenyo rwendi ndi a lizuvhe asi kapi ga fira kumulikida eharo, vakuronambunga va hepa kumupurakena nawa ngomu ana kupwagesa malizuvho gendi. Konyima awo kuvhura va vatere muntu ogo yipo a kwate egano omu Jehova ga mu hara.
NGAPI TWA HEPA KULIZUVHA KUHAMENA NONZWI DAJEHOVA DOKUZUMBANA?
15. Kuliza naJohanesa 6:39, ngapi omu Jesus ga tere nonzwi daJehova?
15 Ngapi ana tu harere Jehova tu lizuvhe kuhamena nonzwi dendi dokuzumbana? Kuvhura tu lirongere ko kweyi ga rugene Jesus. Age ga yi divire asi Jehova kwa hara nonzwi dendi nadinye. Yipo nye, Jesus kwa litulire mo unene yipo a vatere ‘nonzwi dokuzumbana momuhoko gwaIsraeli’ di tengwire kwaJehova. (Mat. 15:24; Ruk. 19:9, 10) Ntani ngwendi musita gomuwa, Jesus kwa litulire mo unene yipo a dire kuzumbanesa nonzwi daJehova.—Resa Johanesa 6:39.
16-17. Ngapi omu vakuronambunga va hepa kulizuvha kuhamena kuvatera ava va tengura monyima? (Tara kakende “ Omu ava lizuvhu vanavazinyetu vamwe ava va tengura monyima.”)
16 Mupositoli Paurusa kwa korangedere vakuronambunga womombungakriste zomoEfeso va honene Jesus. Age kwa tente asi: “Omu kwafe vankundi, oku tatu diworokeni hena nonkango daHompa Jesus edi ga tente asi, ‘Kugava kwa kara nerago, kwa pitakana kutambura.’” (Yirug. 20:17, 35) Vakuronambunga neina kwa kara nositumbukira sokupakera mbili nonzwi daJehova. Mukuronambunga gedina Salvador kwa tanta asi: “Apa ani gazara omu Jehova ga hara nonzwi dendi dokuzumbana, ayo kutumangeda nge ni rugane unene yipo ni di vatere. Ame nayi diva asi Jehova ana hara ni pakere mbili nonzwi dendi.”
17 Naveneye ava tuna tumbura mosirongwa esi ava va tengwire monyima, vava vatera yipo va tengure kwaJehova. Ntani ngesi sinzi sovantu ava va tengura monyima, vana hara kutengura kwaJehova. Sirongwa sokukwama ko ngasi ka zogera momunene eyi twa hepa kurugana yipo tu va vatere va tengure kwaJehova.
RUSUMO 139 Gazara asi mouzuni woupe ono kara
^ para. 5 Yisinke ayi ninkisa vanavazinyetu vamwe ava va karera Jehova siruwo sosire va tengure monyima? Ngapi omu Karunga a lizuvhu kuvahamena? Sirongwa esi tasi ka gava malimbururo komapuro ogo. Ta si ka zogera hena eyi natu lirongera ko monkedi omu Jehova ga vaterere vantu vamwe ava va tumbura moBibeli ava va dilire kuhara kurugana eyi ga va pangerere Karunga.
^ para. 2 EFATURURO LYONKANGO: Muzuvhisi ogu ga tengura monyima kuna kara muzuvhisi ogu ga dira kulihameka moyirugana yokuzuvhisa ure womakwedi ntazimwe ndi kupita opo. Nye nampili ngoso vazuvhisi owo simpe vanavazinyetu ntani ose twa va hara.
^ para. 4 Madina gamwe kwa ga rundumuna.
^ para. 10 Sirongwa sokukwama ko ngasi ka zogera omu vakuronambunga nava vhura kurugana yininke oyo yitatu.
^ para. 60 EFANO Epenuno 20-21: Musita goMuisraeli ogu ga zumbanesere nzwi zendi, ngazi papara nokuzivatera yipo zi tengure kononkwawo. Vasita wosiunda saKarunga nawo kurugana yokulifana neina.
^ para. 64 Epenuno 22: Ngomu Munazinyetu gomukadi ogu ga tengura monyima ana kundindira mbesa zi katuke, age kuna kumona Nombangi mbali edi dina kara positoroli ntani awo kuna kuzuvhisa noruhafo.
