CHIBAABA CHAKUDIZA 25
“Yami Nakakeñakeña Nyikoku Yami”
“Yami nakakeñakeña nyikoku yami nakatalatala nakamoni kwaduwu [nawa nakayakamenaña].”—EZEK. 34:11.
KAMINA 105 “Nzambi hiKukeña”
NSAÑU YIDI MUCHIBAABA *
1. Yehova wekala ñahi neyi mama yawantu wunakwamwisha?
“MUMBANDA [alalameni] mwanindi wuchidi kwamwa?” Ilu dilu lwihu lwehwiliyi Yehova mumafuku akaprofwetu Isaya. Dichi Nzambi walejeli antu jindi nindi: “Eña awa kwiji akulalamena hakwila ami hinakakulalamenaku.” (Isa. 49:15) Havula kudesekeja namama yawantuku. Ilaña haniyi mpinji wadesekejeli. Yehova wazatishili kukeña kwekala hakachi kamama yawantu namwanindi kulonda yayilumbulwili ambuña indi chayikeñayi. Amama jawantu amavulu anateli kwiteja mwahosheli muhela Jasmin nindi: “Neyi mama yawantu yamwisha mwanindi, adikundaña chikupu chahaya nyaaka.”
2. Yehova watiyaña ñahi neyi kambuña indi aleka kupompa nikushimwina?
2 Yehova welukaña neyi mwanindi yaleka kupompa nikushimwina. Waneñaña hakumona makombakaji awambuña indi anakuzeya * chaaka nichaaka.
3. Chumanyi chinakukeñayi Yehova?
3 Awa amanakwetu niahela azeya afuntaña muchipompelu nawa twatiyaña kuwaha neyi anafunti. Yehova nakukeña nindi afunti, ninetu dichitunakukeña. (1 Pet. 2:25) Tukuyikwasha ñahi kulonda afunti? Henohu kanda twakuli ilu lwihu, twatela ntahi kwiluka chakojejaña awa antu kuleka kupompa nikushimwina.
MULOÑADI ANTU AMAKWAWU CHALEKELAÑAWU KUMUKALAKELA YEHOVA?
4. Mudimu wakumujimba wunateli kuluwañesha ñahi muntu?
4 Amakwawu nyidimu yakumujimba diyayileteshaña. Manakwetu Hung * wakuAsia wahosheli nindi: “Nashili nankashi maana kumudimu wakumujimba. Nadidimbilileña nami neyi nikala namali amavulu chikumpelelaña kumukalakela Yehova. Dichi nazatileña maora amavulu. Natachikili kujiñajiña kukupompa nichinalekeli chikupu kupompa. Satana wazatishaña kaayi kulonda yafumisheña antu chovu-chovu kudi Nzambi.”
5. Kukala kwamboka-mboka kwamweniyi muhela wumu kwamuzeyesheli ñahi?
5 Amanakwetu niahela amakwawu anakuhita mukukala kwakuvulu. Muhela Anne wakuBritain wukweti anyana atanu. Wahosheli nindi: “Mwanami wumu wavwalikili nawufwayi. Mukuhita kwampinji, mwanami mukwawu wamumbanda amuhañili muchipompelu nawa weyala wakatili chikatu chamuwoñu. Naneñeli chakwila nalekeli kupompa nikushimwina. Nkumininaku nazeyeli.” Tunamutiyili wushona muhela Anne nichisaka chindi niamanakwetu ejima anakumona kukala kwokumu!
6. Muntu nateli kufuma ñahi muchipompelu neyi nakuzatisha wanyi kufumba kudi haAkolosi 3:13?
6 Tañenu Akolosi 3:13. Ambuña aYehova amakwawu ayineñesheli kudi amanakwawu niahela. Kapostolu Pawulu welukili nindi mpinji yikwawu hakachi ketu hanateli kumwekana muntu wudi “namuloña namukwawu.” Hadaha atwilili chatama. Neyi tubula kusoñama, tunateli kudihilila. Kuhila kunateli nikumuleñela muntu kuleka kumukalakela Yehova. Talenu chuma chamumwekeneni manakwetu Pablo wakuSouth America. Muntu wumu wamutwambilili nindi nakoñi chuma chatama chakwila amutambwili kukooleka muchipompelu. Welili ñahi? Pablo wahosheli nindi: “Nahilili nawa natachikili kufuma chovu-chovu muchipompelu.”
7. Chumanyi chinateli kumwekana kudi muntu wunakudinka nyiloña?
7 Neyi muntu wakoñeli nshidi kunyima, nateli kutwalekahu kudinka nyiloña nawa nateli kumona nindi Nzambi hamukeñaku. Hela chakwila wabalumukili mumuchima nawa amwanakeneni, nateli kutoñojoka nindi hashikilamu kwikala hakachi kawantu jaNzambiku. Dichatoñojokeleñayi nimanakwetu Francisco. Wahosheli nindi: “Anzuwilili muloña nelili wuvumbi. Hela chakwila hakusambila natwalekelihu kupompa, naneñeli nawa natoñojokeli nami hinashikilamu kwikala hakachi kawantu jaYehovaku. Chinleji chami chankabishileña nawa nelukili chikupu nami Yehova hañanakeneniku. Mukuhita kwampinji, nalekeli kupompa.” Mwatiyaña ñahi hadi amanakwetu niahela anakumona kukala neyi kutunashimuni? Mwayitiyilaña wushona? Indi Yehova watiyaña ñahi?
YEHOVA WAKEÑA NYIKOKU YINDI
Kabiña wamumpinji yawaIsarela wadiña nakushaku maana neyi mukoku windi najimbali (Talenu maparagilafu 8-9) *
8. Komana Yehova wayivulamenaña antu amukalakeleleña? Lumbululenu.
8 Yehova havulamena ambuña indi azeya adiña nakumukalakelaku. Nawa havulamena nyidimu yamukalakeleliwuku. (Heb. 6:10) Kaprofwetu Isaya wasonekeli chakutalilahu chachiwahi chamwekeshaña Yehova chakamenañayi antu jindi. Isaya wasonekeli nindi: “Wakadiisha mukanka windi wanyikoku neyi kabiña, wakakuñwila anyana muchikasa chindi, wakayisendela hantulu yindi.” (Isaya 40:11) Indi Kabiña Muneni watiyaña ñahi neyi mukoku windi yafuma hamukanka? Yesu wamwekesheli chatiyañayi Yehova hayihwiliyi atumbanji twindi nindi: “Mukutoñojokahu nenudi? Neyi muntu wukweti anyikoku 100 nawa wumu yajimbala, komana kwila yashiya anyikoku 99 hamapidi nakuya nakukeñakeña owu mukoku wunajimbali nehi? Inakuyileja chalala nami, wukuzañalala nankashi neyi yamuwana owu mukoku kubadika chikuzañalalayi nawanyikoku 99 anabuli kujimbala.”—Mat. 18:12, 13.
9. Atubiña amawahi mumpinji yakunyima akameneneña ñahi nyikoku yawu? (Talenu mwevulu wudi hakava.)
9 Muloñadi chitwatela kumwesekejela Yehova nakabiña? Muloña kunyima atubiña akameneneña chikupu nyikoku yawu. Chakutalilahu, Davidi wazuñili namutupa niBera kulonda yakiñi nyikoku yindi. (1 Sam. 17:34, 35) Kabiña wamuwahi welukaña neyi chakwila mukoku wumu najimbali. (Yow. 10:3, 14) Kabiña wamuchidiwu wukushiya nyikoku yindi 99 mwiyinda hela mumakasa amukwawu kabiña kulonda yayi nakukeña mukoku wunajimbali. Yesu wazatishili chakutalilahu chamukoku wajimbala kulonda yatuleji ichi chikuma chalema nindi: “Tata yami wekala mwiwulu niyena hakeñaña wumu hadi awa akehelamu kujilumukaku.”—Mat. 18:14.
Kabiña wamumafuku awaIsarela nakwakamena mukoku wajimbeli (Talenu paragilafu 9)
YEHOVA WAKEÑAKEÑAÑA NYIKOKU YINDI
10. Kwesekeja naEzekeli 34:11-16, Yehova wakanini nindidi kutalisha hadi nyikoku yindi yajimbala?
10 Yehova watukeña wejima wetu, kushilahu tuhu niantu “akehelamu” anafumi hamukanka wanyikoku yindi. Kuhitila mudi kaprofwetu Ezekeli, Yehova wakanini nindi wakakeñakeña nyikoku yindi yajimbala nawa wakayikwasha cheñi kwikala nawumbwambu nayena. Nawa washimwini yuma yakelayi hakuyamwina, yuma yelileñayi kabiña wamuIsarela neyi mukoku najimbali. (Tañenu Ezekeli 34:11-16.) Chatachi, kabiña wadiña nakukeñakeña mukoku, chuma chakeñekeleña mpinji niñovu. Dichi neyi nawani dehi mukoku wajimbala, kabiña wamufuntishileña hamukanka. Cheñi, neyi mukoku nadikatishi hela nazeyi, kabiña wadiña nakumukwasha iwu mukoku wunazeyi kuhitila mukumukasa hayilonda, kumweleka nikumudisha. Akulumpi, enu atubiña ‘anyikoku yaNzambi,’ mwatela kulondela iyi yuma kulonda mukwashi ejima anafumi muchipompelu. (1 Pet. 5:2, 3) Akulumpi akeñakeñaña nyikoku, ayikwashaña kufunta cheñi muchipompelu nikuyimwekeshela kukeña kuhitila mukuyikwasha cheñi kwikala nawubwambu naYehova. *
11. Kabiña wamuwahi welukileña nindidi?
11 Kabiña wamuwahi welukileña nindi mukoku nateli kujimbala. Nawa neyi mukoku nafumi hamukanka, kabiña hadiña nakumubabeshaku. Shinshikenu chelileñayi Nzambi hakukwasha ambuñidi afumini kudi Yehova hakapinji kantesha.
12. Yehova wamukwashili ñahi Yona?
12 Kaprofwetu Yona watemukili mudimu wamwinkeliwu. Hela chochu, Yehova hamukanini Yonaku. Kufwana kabiña wamuwahi, Yehova wamupulwishili Yona nawa wamukwashili kwikala cheñi nañovu mumudimu wamwinkeliyi. (Yona 2:7; 3:1, 2) Kuhiñahu, Nzambi wazatishili mutondu watandalaña kulonda yamukwashi Yona kwiluka nindi wumi wamuntu walema. (Yona 4:10, 11) Chumayi chitunakudizilaku? Akulumpi hiyatela kuleka kukwasha antu azeyaku. Ilaña atela kwiluka chuma chaletesheli mukoku kufuma hamukanka. Nawa neyi iwu mukoku yafunta kudi Yehova akulumpi atela kutwalekahu kumukeña nikumwakamena.
13. Yumanyi yitwatela kudizilaku cheliliyi Yehova nansoneki yaMasamu 73?
13 Nsoneki yaMasamu 73 waneñeli chelili yamoni antu atama anakuhanda chachiwahi. Watachikili kujinoka neyi chakwila kukalakela Nzambi munateli kufuma yuma yayiwahi. (Mas. 73:12, 13, 16) Yehova welili ñahi? Hamuzuwilili iwu iyalaku. Dichi Nzambi wetejeli mazu indi kuyisoneka muBayibolu. Nkumininaku, ñimbi yamasamu wenjili nakwiluka nindi kwikala ibwambu daYehova dichuma chabadika yuma yejima muchihandilu. (Mas. 73:23, 24, 26, 28) Chumanyi chitunakudizilaku? Akulumpi hiyatela kunyakalaña kusompesha antu ajinokaña neyi chakwila mukumukalakela Yehova mwafumaña yuma yayiwahiku. Chatatela ayizuwili, akulumpi atela kwiluka ntahi chinaleteshi ahosheña hela kwila munoyu njila. Kufumahu dinu, akulumpi anateli kuzatisha Bayibolu kulonda ayikoleshi.
14. Muloñadi Elija chakeñekeleñayi wukwashu, nawa Yehova wamukwashili ñahi?
14 Kaprofwetu Elija wamutemukili Mwadi Yezebeli. (1 Anya. 19:1-3) Watoñojokeli nindi yena diyi kaprofwetu kaYehova wadiñaku hohu nawu nindi nyidimu yazatileñayi yadiña yamukunkulwayi. Elija waneñeli nankashi chakwila wakeñeleña nindi yafwi. (1 Anya. 19:4, 10) Yehova hamuzuwilili Elijaku, ilaña wamulejeli nindi hadiña nkawindiku, wamulejeli kukuhwelela muñovu yaNzambi nawa nindi kwadiña nyidimu yikwawu yatela kuzatayi. Yehova watiyilili nakanañachima kukukala kweElija nawa wamwinkeli mudimu wukwawu. (1 Anya. 19:11-16, 18) Chumanyi chitunakudizilaku? Wejima wetu, sweje-e akulumpi atela kukwasha nyikoku yaYehova munjila yayiwahi. Hela muntu nakuhosha mukuhila hela nakutoñojoka nindi Yehova hakamwanakenaku, akulumpi atela kumutiyilila nakanañachima chinakulumbululayi. Nkumininaku atela kukwasha mukoku wunajimbali nawu Yehova wamukeña.
TWATELA KUMONA ÑAHI NYIKOKU YANZAMBI YAJIMBALA?
15. Kwesekeja naYowanu 6:39, Yesu wamweneña ñahi nyikoku yaTata yindi?
15 Yehova wakeñaña tuyimoneña ñahi nyikoku yindi yajimbala? Yesu watushilili njila yakulondela. Welukili nindi nyikoku yaYehova yejima yalema kumesu aNzambi. Dichi Yesu wazatili nañovu kulonda yakwashi “antu amwitala daIsarela adi neyi anyikoku ajimbala” afunti kudi Yehova. (Mat. 15:24; Luka 19:9, 10) Chineli hikabiña wamuwahi, Yesu wazatili nañovu kulonda yabuli kujimbesha mukoku waYehova hela wumu.—Tañenu Yowanu 6:39.
16-17. Akulumpi atela kumona ñahi mudimu wakukwasha antu anafumi hamukanka? (Talenu chikasha chinakuhosha nawu “ Chinateli Kutiyawu Anyikoku Ajimbala.”)
16 Kapostolu Pawulu wayikonkomweneni akulumpi muchipompelu chamuEfwesesa kumwimbujola Yesu. Wahosheli nindi: “[Mwatela kukwasha] antu azeya nawa mwatela kwanuka mazu aMwanta Yesu, chahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’” (Yilw. 20:17, 35) Dichi, akulumpi makonu akweti mudimu walema wakukwasha azeya. Salvador mukulumpi wakuSpain wahosheli nindi: “Neyi nitoñojoka chakamenañayi Yehova nyikoku yindi yajimbala, chansañumunaña kuzata nañovu kulonda niyikwashi. Chineli nindi kabiña wakuspiritu, neluki chikupu nami Yehova nakukeña nindi niyakameneña.”
17 Antu ejima anateniwu muchinu chibaaba afumini hamukanka ayikwashili kufunta cheñi kudi Yehova. Niyinu mpinji, antu amavulu afuma hamukanka anakukeñeka kuyikwasha kulonda afunti. Chibaaba chinalondelihu chikashimuna yuma yitwatela kwila hakwila nawu tuyikwashi kulonda afunti kudi Yehova.
KAMINA 139 Difwikijenu Mudi Mwituña Dadiha
^ para. 5 Muloñadi antu amavulu anamukalakeli Yehova nakashinshi chafuminawu muchipompelu? Nzambi wayimonaña ñahi? Achinu chibaaba chinakwakula awa malwihu. Chinahoshi cheñi Yehova chakwashiliyi ambuñindi kunyima azeyeli hadi mpinji yantesha.
^ para. 2 MWATALISHA IDI IZU: Mukwakushimwina wazeya himuntu wunabuli kushimwina hadi tukweji 6 hela kubadikahu. Hela chochu, awa antu azeya hiyamanakwetu niahela nawa twayikeña.
^ para. 4 Majina amakwawu anayihimpi.
^ para. 10 Chibaaba chinalondelihu chikashimuna njila jatela kulondelawu akulumpi hakwila eli iyi yuma yisatu.
^ para. 60 KULUMBULULA NYEVULU: Kunyima neyi mukoku najimbali, kabiña wayileña nakumukeñakeña nikumukwasha kulonda yafunti hamukanka. Atubiña akuspiritu niwena dichelañawu makonu.
^ para. 64 KULUMBULULA NYEVULU: Hampinji yinakuhembelalayi basi munakandamiyi kunyamuka muhela wazeya, namoni aYinsahu ayedi anakushimwina kwiluña kwawanikaña antu amavulu.
