ZIR TUR THUZIAK 25
“Keimah Ngei Hian Ka Berâmte Ka Zawng Ang”
“Keimah ngei hian ka berâmte ka zawng ang a, ka zawng chhuak ang.”—EZEK. 34:11.
HLA 105 “Pathian Chu Hmangaihna A Ni”
THLIR LAWKNA *
1. Engvângin nge Jehova chu nu nau pawm nên a inkhaikhin?
“HMEICHHIAIN . . . a nau a hnute hne lai chu a theihnghilh thei em ni?” He zawhna hi zâwlnei Isaia hun laia Jehova zawhna a ni a. A mite hnênah: “Chûngte chuan an theihnghilh a ni thei e; nimahsela, kei chuan ka theihnghilh lo vang che,” tiin a hrilh a ni. (Is. 49:15) Pathian chu nu nau pawm nên a inkhaikhin zen zen lo va. Mahse, hemi ṭumah hian a inkhaikhin a ni. Jehova chuan nu leh a fa inkâra inlaichînna chu a chhiahhlawhte a hmangaih tak zetzia târ lan nân a hmang a ni. Nu a tam zâwkte chuan unaunu Jasmin-i thusawi, “Fa i neih hian, dam chhûng daih inlaichîna danglam tak i siam a ni,” tih hi an ṭâwmpui ngei ang.
2. Jehova chu a fate zînga pakhatin a kal bosan hian engtin nge a awm?
2 Jehova chuan a fate zînga pakhat pawhin Kristian inkhâwmna leh thu hrilh rawngbâwlna a bânsan hian a hria a. Chuti a nih chuan, kum tin hian a chhiahhlawh sâng tam takte chu rawngbâwlnaah an tel tawh lo * tih a hmuh huna a rilru nat dân tûr chu han ngaihtuah teh.
3. Jehova’n eng nge a duh?
3 Rawngbâwlnaa tel tawh lo kan unau tam tak chu kohhranah an lo kîr leh a, chutianga an rawn kîr leh chuan kan hlim tak zet a. Jehova’n lo kîr leh tûra a duh ang bawkin, keini pawhin kan duh a ni. (1 Pet. 2:25) A nih leh, anni chu engtin nge kan ṭanpui theih? Chu zawhna kan chhân hmain, mi ṭhenkhatin inkhâwm leh thu hrilh rawngbâwlna an bânsan chhan hriat chu a ṭha ang.
ENGVANGIN NGE MI ṬHENKHATIN JEHOVA RAWNGBAWL AN BANSAN?
4. Eizawnna hnain mi ṭhenkhat chu engtin nge a nghawng theih?
4 Mi ṭhenkhat chuan an eizawnna hna chu an nuna thil pawimawh berah an dah a. Asia Chhim-chhak lama awm unau Hung-a * chuan: “Ka hun leh tha tam tak chu hnathawh nân ka hmang ral a. Atthlâk takin, sum leh pai tam tak ka neih chuan tam lehzuala Jehova rawng ka bâwl theih ka lo ring a. Chuvângin, hnathawh nân ka inhmang lehzual ta a. Inkhâwmte chu ka ṭhulh ngun telh telhin, a tâwpah ka bânsan ta hial a. Setana chuan mite’n zawi zawia Pathian rawngbâwlna an bânsan theih nân khawvêl hi a hmang a ni,” tiin a sawi.
5. A harsatna tawhte chuan unaunu chu engtin nge a nghawng?
5 Unau ṭhenkhat chuan anmahni tilunghnualtu harsatna tam tak an hmachhawn a. Britain rama unaunu Anne-i chuan fa panga a nei a. Ani chuan: “Ka fa naupang ber chu ramtuileilovin a piang a. A hnuah, ka fanute zînga pakhat chu hnawh chhuah a ni a, ka fapa upa zâwk chuan rilru lama harsatna a nei bawk. Ka rilru a hah êm avângin inkhâwm leh thu hrilh rawngbâwlna chu ka bânsan ta a. A tâwpah, rawngbâwlnaa tel tawh lovin ka awm ta a ni,” tiin a sawi. Anne-i leh a fate bâkah, chutiang harsatna tawngtu unau dangte chu kan va lainat tak êm!
6. Kolossa 3:13-na thu nunpui lohna chuan mi chu Jehova mite lakah engtin nge a inlâk hrantîr theih?
6 Kolossa 3:13 chhiar rawh. Jehova chhiahhlawh ṭhenkhat chu an Kristian unaute thiltih avângin an rilru a na hle a. Tirhkoh Paula pawhin unaute chungah ‘thupawi kan neih’ châng a awm thei tih a hria a ni. Dik lo taka cheibâwl kan tâwk pawh a ni mai thei. Kan fîmkhur loh chuan, kan thinrim hle thei a. Chu chuan Jehova mite laka inlâk hran duhna min neihtîr thei a ni. South America rama awm unau Pablo-a thiltawn hi han ngaihtuah teh. Ani chu dik lo taka thil sual tia puh a ni a, chu chuan kohhrana a chanvo hlute a chântîr a ni. Engtin nge a chhân lêt? Pablo-a chuan: “Ka thin a rim hle a; tichuan, kohhran chu ka hlat ta hret hret a ni,” tiin a sawi.
7. Mahni inthiam lohna chuan mi chungah eng nghawng nge a neih theih?
7 A nih loh leh, mahni inthiam lohna chuan mi chu tûn hmaa Pathian dân a bawhchhiat avânga a hmangaihna dawng tlâk lo nia inngaiin, a tihrehawm mai thei a. Ani chu inlamlêtin, ngaihdam ni tawh mah se, Pathian mite zînga mi ni tlâk tawh lo angin a inngai thei a ni. Unau Francisco-a chu chutiang chuan a inngai a. Ani chuan: “Nungchang bawlhhlawhnaa ka inhnamhnawih avângin zilh ka ni a. A tîr chuan ka inkhâwm chhunzawm zêl a; mahse, ka rilru a hahin, Jehova mite zînga mi ni tlâk tawh lo nia inngaihna ka nei a ni. Ka chhia leh ṭha hriatna chuan min tibuai hle a; tichuan, Jehova’n min ngaidam lo niin ka ring a. A hnuah, kohhran inkhâwma tel chu ka bânsan ta a ni,” tiin a sawi. Kan sawiho tâk unaute thiltawn ang tawngtu unau dangte chu engtin nge i thlîr? Anni chu i lainat em? Chu aia pawimawh zâwk chu, Jehova’n anni chu engtin nge a thlîr?
JEHOVA CHUAN A BERAMTE A HMANGAIH
Israel berâm vêngtu chuan a berâm bo chu a ngaihsak tak zet (Paragraph 8-9-na en rawh) *
8. Jehova chuan a rawng lo bâwl tawh ṭhîntute chu a theinghilh em? Hrilhfiah rawh.
8 Jehova chuan a rawng lo bâwl tawh ṭhîn; mahse, hun engemawti chhûng chawlhsantute chu a theihnghilh lo va. A rawng an bâwl laia an thawhrimnate pawh a theihnghilh hek lo. (Heb. 6:10) Zâwlnei Isaia chuan Jehova’n a mite a ngaihsak dân chu entîrna inâwm tak hmangin a târ lang a. “Ani chuan berâm vêngtu angin a pâwl chu a châwm ang a, berâm note chu a bânin a pawm khâwm ang a, a ângchhûnga dahin a kalpui ang,” tiin a ziak a ni. (Is. 40:11) Berâm Vêngtu Ropui tak chuan a berâm rual zînga pakhat a vah bo hian engtin nge ngaih? Isua chuan a zirtîrte hnêna: “Engtin nge in ngaih? Mi tu pawhin berâm za nei sela, an zînga pakhat vâk bo sela, sawmkua leh pakuate chu hnutchhiaha, tlângah han kalin, a bo chu a zawng lo vang em ni? Tih tak meuhvin ka hrilh a che u, a hmuh leh hlauh chuan, sawmkua leh pakua vâk bo lote chungah ai chuan, a chungah a lâwm zâwk ang,” tia a sawi khân, Jehova rilru put hmang chu a târ lang a ni.—Mt. 18:12, 13.
9. Engtin nge Bible hun laia berâm vêngtute chuan an berâmte chu an enkawl? (A kâwma milem en rawh.)
9 Engvângin nge berâm vêngtu nêna Jehova khaikhin chu inâwm tak a nih? Bible hun laia berâm vêngtu ṭha chuan a berâmte chu a ngaihsak tak zet vâng a ni. Entîr nân, Davida chuan a berâm rual vênhim nân sakeibaknei leh savawm a bei a. (1 Sam. 17:34, 35) Berâm vêngtu ṭha chuan berâm rual zînga pakhat kim lo pawh a hre ngei ang. (Joh. 10:3, 14) Chutiang berâm vêngtu chuan berâm dang 99-te chu a huanga him taka khungin, a nih loh leh berâm vêngtu dangte kuta hnutchhiahin a bo chu a zawng ngei bawk ang. Isua chuan chu tehkhin thu chu: “Hêng mi tête zînga pakhat boral pawh hi in Pa vâna mi duh zâwng a ni lo ve,” tih thu dik pawimawh tak min zirtîr nân a hmang a ni.—Mt. 18:14.
Hmân lai Israel rama berâm vêngtu chuan a berâm bo chu a ngaihsak (Paragraph 9-na en rawh)
JEHOVA CHUAN A BERAM A ZAWNG
10. Ezekiela 34:11-16-naa sawi angin, Jehova’n a berâm bote tân eng nge tih a tiam?
10 Jehova chuan a berâm rual zîng ata vâk bo “mi tête” pawh tiamin, kan zavaiin min hmangaih ṭheuh va. Pathian chuan a berâm bote chu a zawng ang a, amah nêna inlaichînna ṭha nei leh tûrin a ṭanpui ang tih zâwlnei Ezekiela hmangin a tiam a ni. Chu bâkah, anmahni a chhan chhuah dân tûr pawh a sawi a, chu chu Israel berâm vêngtute tih dân ang chiah a ni. (Ezekiela 34:11-16 chhiar rawh.) A hmasain, berâm vêngtu chuan berâm bo chu a zawn a ngai a, chumi atân chuan hun leh tha tam tak a sên a ngai thei a. Tichuan, a hmuh veleh berâm rual zînga a hruai kîr leh a ngai a ni. Chu bâkah, berâm chu a hliam emaw, a ril a ṭâm emaw a nih chuan, berâm vêngtu chuan duat taka ṭanpuiin a hliamte chu a tuamsak ang a, a pawmin, ei tûr a pe bawk ang. “Pathian berâmte” vêngtu kohhran upate pawhin kohhran aṭanga kal bote an ṭanpuinaah chutiang bawk chuan an ti tûr a ni. (1 Pet. 5:2, 3 C.L. Re-edited) Upate chuan berâmte chu an zawng a, berâm rual zînga kîr leh tûra an ṭanpui bâkah, an mamawh thlarau lam ṭanpuinate pein hmangaihna an lantîr a ni. *
11. Berâm vêngtu ṭhain eng nge a hriat?
11 Berâm vêngtu ṭha chuan berâm chu a bo thei tih a hria a. Berâm rual zînga pakhat a vâk bo a nih pawhin, ani chuan râwng takin a cheibâwl lo vang. Hun engemawti chhûng A hnên ata kal bo a chhiahhlawh ṭhenkhat a ṭanpui dân kawnga Jehova entawn tûr siam hi han ngaihtuah teh.
12. Jehova’n Jona chu engtin nge a cheibâwl?
12 Zâwlnei Jona chuan a chanvo chu a tlânchhiatsan a. Chuti chung pawhin, Jehova chu Jona chungah a beidawng mai lo. Berâm vêngtu ṭha angin, Jehova chuan ani chu chhan chhuakin, a chanvo hlen thei tûra a mamawh chakna pein a ṭanpui a. (Jon. 2:7; 3:1, 2) A hnuah, Pathianin mi tin nunna a hlutzia Jona’n a hriatthiam theih nân ûm hmangin a ṭanpui a ni. (Jon. 4:10, 11) Kan zir tûr chu eng nge ni? Upate chu rawngbâwlnaa tel tawh lote chungah an beidawng mai tûr a ni lo. Chu aiin, anni chuan berâm rual zîng ata berâm vah bo chhan hriat chu an tum zâwk a. Chu bâkah, chu berâm chu Jehova hnêna a lo kîr leh hunah, upate’n duat takin an ngaihsak chhunzawm zêl a ni.
13. Jehova’n Sâm 73-na ziaktu a chhân lêt dân aṭangin eng nge kan zir theih?
13 Sâm 73-na ziaktu pawh mi suaksualte vânneihzia a hmuhin a lunghnual a. Pathian duh zâwng tihnain a thlen theih hlâwknate chu a ringhlel a ni. (Sâm 73:12, 13, 16) Engtin nge Jehova’n a chhân lêt? Ani chu a dem mai lo. Dik tak chuan, Pathianin a thusawite chu Bible-ah a chhinchhiah a. A tâwpah, chu fakna hla phuahtu chuan nunah hian Jehova nêna inlaichînna ṭha neih aia ṭha zâwk engmah a awm lo tih a hre ta a ni. (Sâm 73:23, 24, 26, 28) Kan zir tûr chu eng nge ni? Upate chuan Jehova rawngbâwlnain a thlen hlâwknate ringhlel ṭantute chu an sawisêl nghâl mai tûr a ni lo. Chu aiin, chutianga rinhlelhna an neih chhante chu hriat an tum zâwk tûr a ni. Chutianga an tih chauhvin, an mamawh tak Bible chângte hmangin an fuih thei ang.
14. Engvângin nge Elija chuan ṭanpuina a mamawh a, engtin nge Jehova’n a ṭanpui?
14 Zâwlnei Elija chu Lalnu Jezebeli lak ata a tlânchhia a. (1 Lal. 19:1-3) Ani chu Jehova zâwlnei awmchhun nia inhriain, a rawngbâwlna chu awmze nei lo angin a ngai a. Thih duh hial khawpin a beidawng a ni. (1 Lal. 19:4, 10) Elija dem mai aiin, Jehova chuan amah chauh a ni lo tih leh a thiltihtheihna a rinchhan thei tih a hriat chiantîr bâkah, a tân thawh tûr tam tak a la awm thute a hrilh a. Elija thusawite chu ngun taka ngaihthlâksakin, chanvo tharte a pe a ni. (1 Lal. 19:11-16, 18) Kan zir tûr chu eng nge ni? Kan zavai hian, a bîk takin upate chuan Jehova berâmte chu ngilnei takin an chebâwl tûr a ni. Mi chuan a lungnih lohna a sawi chhuak emaw, Jehova khawngaihna dawng tlâk lo tûrah a inngai emaw a nih pawhin, upate chuan a ngaih dân a sawi chhuahte chu an ngaihthlâksak ang a. Tichuan, berâm bo hnênah Jehova’n ani chu a ngaihlu tak zet tih hriatchiantîr an tum ang.
PATHIAN BERAM BOTE CHU ENGTIN NGE KAN THLIR ANG?
15. Johana 6:39-naa sawi angin, engtin nge Isua’n a Pa berâmte chu a thlîr?
15 Jehova’n a berâm bote chu engtin nge thlîr tûra min duh? Isua chuan kan tân entawn tûr a siam a. Ani chuan Jehova’n a berâm zawng zawngte chu a ngaihlu vek tih a hriat avângin, “Israel hnam berâm bo” chu Jehova hnêna an kîr leh theih nân a tih theih apiang a ti a ni. (Mt. 15:24; Lk. 19:9, 10) Berâm vêngtu ṭha angin, Isua pawhin Jehova berâm pakhat chauh pawh bo lo tûrin a tih theih apiang a ti a ni.—Johana 6:39 chhiar rawh.
16-17. Upate chuan berâm bote ṭanpuina chu engtin nge an thlîr ang? (“ Berâm Bovin A Ngaihtuah Mai Theih Dân,” tih bâwm chu en rawh.)
16 Tirhkoh Paula chuan Ephesi khuaa kohhran upate chu Isua entawn tûr siam zui tûrin a fuih a. “Lalpa Isua thu hre reng chungin mi chak lote in ṭanpui tûr a ni; amah ngeiin, ‘Englo lâk aiin pêkin lukhâwng a nei zâwk,’ a tih kha,” tiin. (Tirh. 20:17, 35) Tûn laia kohhran upate pawhin hemi chungchângah hian mawhphurhna pawimawh tak an nei tih a chiang hle. Spain rama awm kohhran upa unau Salvador-a chuan, “Jehova’n a berâm bote a ngaihsakzia ka ngaihtuah hian, chu chuan anmahni ṭanpui tûra ka tih theih apiang ti tûrin min chêttîr a. Ani chuan chutianga ti tûrin min duh tih ka hria a ni,” tiin a sawi.
17 He thuziaka kan târ lan tâk, Jehova hnên aṭanga kal bo zawng zawngte chu a hnêna kîr leh tûra ṭanpui an ni a. Tûn laiah pawh, Jehova hnên aṭanga kal bo mi tam tak chuan chutianga kîr leh chu an duh a ni. A dawta thuziakah chuan, Jehova hnêna kîr leh tûra chûng mite kan ṭanpui theih dân chiang lehzualin kan sawiho vang.
HLA 139 Engkim A Thar Hun Chu Mitthla Rawh
^ par. 5 Engvângin nge kum tam tak chhûng rinawm taka Jehova rawng lo bâwl tawh mi ṭhenkhat chu kohhran aṭanga an tawlh bo? Engtin nge Pathianin anni chu a thlîr? He thuziakah hian chûng zawhnate chu chhân a ni ang a. Bible hun laia hun engemaw tichhûng a laka kal bo mi ṭhenkhatte Jehova’n a ṭanpui dân aṭanga kan zir theihte kan sawiho bawk ang.
^ par. 2 ṬAWNGKAM HRILHFIAHNA: Rawngbâwlnaa tel tawh lo thuchhuahtu chu thla ruk emaw, chu aia tam emaw chhûnga thu hrilh leh zirtîr siamnaa tel tawh lo hi a ni a. Chutichung pawhin, rawngbâwlnaa tel tawh lote chu kan unaute an la ni reng a, kan la hmangaih reng bawk a ni.
^ par. 4 Hming ṭhenkhat chu thlâk a ni.
^ par. 10 Upate’n chûng thil pathumte an tih theih dân chu a dawta thuziakah sawiho a ni ang.
^ par. 60 MILEM HRILHFIAHNA: Berâm bo ngaihven êm êmtu Israel berâm vêngtu chuan a berâm bo chu zawngin, berâm rual zîngah a hruai kîr leh ngei ang. Tûn laia thlarau lam berâm vêngtute pawhin chutiang chuan an ti a ni.
^ par. 64 MILEM HRILHFIAHNA: Rawngbâwlnaa tel tawh lo unaunuin a chuanna bus chhuah hun a nghah laiin vântlâng hmuna thuhrilhnaa hlim taka tel Thuhretu pahnih chu a hmu.
