XNAQʼTZBʼIL 25
«Ax qine chin xeʼle jyolte kye qe nẍneʼle»
«Ax qine chin xeʼle jyolte kye qe nẍneʼle ex che okel nkwentine» (EZEQ. 34:11).
BʼITZ 105 At tkʼujlabʼil Dios
AJU KʼELEL QNIKʼ TIʼJ *
1. ¿Tiquʼn ok tmojbʼan tibʼ Jehová tukʼil jun txubʼaj?
TOJ ambʼil tej tanqʼin profeta Isaías, tqʼama Jehová jlu kye tmajen: «¿Jakupe tzikʼ tnaʼl tuʼn jun txuybʼaj tuʼn miʼn tkʼujlante tal? Bʼalo jaku tzikʼ tnaʼl tuʼn, atzun weye, mlay tzikʼ kynaʼle wuʼne» (Is. 49:15). Nya toj tkyaqil ambʼil ok tmojbʼan tibʼ Jehová tukʼil jun txubʼaj, pero toj ambʼil aju, ok tqʼon tibʼ ik tzeʼn jun txubʼaj. Yolin tiʼj tkʼujlabʼil jun txubʼaj at tiʼj jun tal tuʼntzun tyolin tiʼj tkʼujlabʼil at kyiʼj tmajen. Chʼixmi ax kyximbʼetz kykyaqil txubʼaj at ik tzeʼn te ermana Jasmín, aju tqʼama jlu: «Aj in xi tqʼoʼna tchʼuʼ moqa tmiʼẍ tala, in xi tzyet tuʼn tten tmojbʼabʼil tibʼa tukʼil ex in ten te jumajx».
2. ¿Tiʼ in kubʼ tnaʼn Jehová aj tok tkeʼyin qa ma chewix jun tkʼwal toj tokslabʼil?
2 In nel tnikʼ Jehová tiʼj qa ya mintiʼ in pon jun tkʼwal toj chmabʼil moqa ya mintiʼ in nex pakbʼal. Tuʼntzunju, in tzaj nim tbʼis aj tok tkeʼyin qa tkyaqil abʼqʼi in che chewix nim mil tmajen toj kyokslabʼil. *
3. ¿Tiʼ taj Jehová?
3 Ateʼ nim erman in che meltzʼaj toj ttnam Jehová ex in che oktz qkʼamoʼn tukʼil tzalajbʼil. Taj Jehová tuʼn kymeltzʼaj ex ax ikx qe (1 Ped. 2:25). ¿Tzeʼn jaku qo onin kyiʼj? Naʼmxtoq t-xi qqʼoʼn tzaqʼwebʼil tiʼj xjel lu, tbʼanel tuʼn tel qnikʼ tiʼj tiquʼn in kyaj kytzaqpiʼn junjun tuʼn kyex pakbʼal ex tuʼn kyxiʼ kyoj chmabʼil.
¿TIQUʼN IN CHE CHEWIX JUNJUN ERMAN TOJ KYOKSLABʼIL?
4. ¿Tiʼ jaku tzaj kyiʼj junjun tuʼn aqʼuntl?
4 Ateʼ junjun erman in nok bʼaj kywiʼ tiʼj aqʼuntl. Tqʼama ermano Hung jlu, * aju in nanqʼin atz sureste te Asia: «Ok nqʼoʼne nim ambʼil tiʼj aqʼuntl. Kubʼ nximane qa mas jaku chin ajbʼene te Jehová qa ma kanet mas npwaqe. Tuʼntzunju, ok tilil wuʼne tuʼn waqʼunane mas ambʼil ex chebʼe chebʼe kyaj ntzaqpiʼne tuʼn nxiʼye kyoj chmabʼil. Yajxitl, el npan wibʼe tiʼj ttnam Jehová. In che ajbʼen qe tiʼchaq te twitz txʼotxʼ tuʼn Satanás tuʼntzun kyel tpaʼn erman tiʼj Jehová».
5. ¿Tiʼ tzaj tiʼj jun ermana tej tok weʼ twitz nim nya bʼaʼn?
5 Atzun junjuntl erman in che ok weʼ twitz nim nya bʼaʼn ex in tzaj bʼaj kykʼuʼj tuʼn. Qo yolin tiʼjju bʼaj tiʼj ermana Anne te Gran Bretaña ex at jweʼ tal. Tqʼama jlu: «Nya tzʼaqlitoq jun wale tej tul itzʼj. Tej tikʼ ambʼil, ex lajoʼn jun wale toj ttnam Jehová, atzun juntl el nikʼbʼaj tiʼj qa otoq tzaj jun yabʼil toj twiʼ. Tzaj nim nbʼise tuʼn jlu ex ya mintiʼ in xiʼye kyoj chmabʼil, ex ya mintiʼ in nexe pakbʼal. Tuʼn jlu in chewixe toj wokslabʼile». In kux choʼn toj qanmi aj kyikʼ junjun erman twitz nim nya bʼaʼn ik tzeʼn bʼaj tiʼj Anne.
6. ¿Tiʼ jaku bʼaj qa mintiʼ ma txi qbʼiʼn nabʼil tkuʼx toj Colosenses 3:13?
6 (Kjawil uʼjit Colosenses 3:13). Ateʼ junjun erman in kubʼ kynaʼn qa o tzʼok bʼinchaʼn jun nya bʼaʼn kyiʼj kyuʼn junjuntl erman. Tuʼntzunju, tqʼama apóstol Pablo qa at maj toj tumel tuʼn qyolin kyiʼj txqantl. Bʼalo o tzʼok bʼinchaʼn jun nya bʼaʼn qiʼj tuʼn juntl. Pero qa mintiʼ ma tzʼok qxqʼuqin qibʼ, jaku txi qkʼuʼn qʼoj toj qanmi ex tuʼn jlu jaku tzʼel qpan qibʼ tiʼj ttnam Jehová. Qo yolin tiʼjju bʼaj tiʼj ermano Pablo te Sudamérica. Xi qʼamaʼn qa otoq kubʼ tbʼinchaʼn jun nya bʼaʼn ex nyatoq ax tok jlu, tuʼntzunju el qʼiʼn jun toklen toj kʼloj okslal. ¿Tiʼ bʼant tuʼn? Tqʼama jlu: «Tzaj nim nqʼoje ex tuʼn jlu el npan wibʼe tiʼj ttnam Jehová».
7. Qa o kubʼ qbʼinchaʼn jun il toj ambʼil ojtxe, ¿tiʼ jaku bʼaj qiʼj qa kukx in kubʼ qnaʼn nya bʼaʼn?
7 Ax ikx, bʼalo ateʼ junjun kukx in kubʼ kynaʼn nya bʼaʼn tuʼnju kubʼ kybʼinchaʼn jun il toj ambʼil ojtxe, ex in kubʼ kyximen qa mintiʼ kyoklen tiʼj tkʼujlabʼil Jehová. Axpe ikx qa otoq tzʼajtz tiʼj kyanmi ex otoq kubʼ tyekʼin Jehová qʼaqʼbʼil tkʼuʼj kyiʼj, jakulo kubʼ kyximen qa ya mlay che ajbʼen te Jehová. Atzun jlu kubʼ tnaʼn ermano Francisco. Tqʼama jlu: «In tzaj kawine tuʼnju in yaẍine. Tnejel, kukx in bʼete kyoj chmabʼil, pero yajxitl tzaj nim nbʼise ex kubʼ nnaʼne qa mintiʼ woklene tuʼn ntene toj ttnam Jehová. Kubʼ nximane qa mintiʼ otoq kubʼ tnajsaʼn Jehová wile. Tej tikʼ ambʼil, ya mintiʼ in nexe pakbʼal ex ya mintiʼ in xiʼye toj Ja te Chmabʼil». ¿Alkye qximbʼetz at kyiʼj erman in che ok weʼ twitz nya bʼaʼn ik tzeʼn qeju ma qo yolin kyiʼj? ¿In tzajpe qʼaqʼin qkʼuʼj kyiʼj? Ex aju mas nim toklen, ¿tiʼ t-ximbʼetz Jehová at kyiʼj?
KʼUJLAʼN QE T-ẌNEʼL JEHOVÁ TUʼN
Toj ojtxe tnam Israel, in tzajtoq bʼaj tkʼuʼj jun xqʼuqil ẍneʼl aj tel tzpet jun tal t-ẍneʼl. (Qʼonka twitza tiʼj taqikʼ 8 ex 9). *
8. ¿Tzeʼn in nel qnikʼ tiʼj qa kukx in che tzaj tnaʼn Jehová qeju o che ajbʼen te?
8 Kukx in che tzaj tnaʼn Jehová qeju o che ajbʼen te maske o tzʼel kypan kyibʼ tiʼj ex kukx in tzaj tnaʼn kyaqʼun bʼant (Heb. 6:10). Ajbʼen jun tbʼanel techel tuʼn profeta Isaías tuʼntzun tel qnikʼ tiʼj tzeʼn in che ok tkʼujlaʼn ex tzeʼn in che ok t-xqʼuqin Jehová qe tmajen. Tqʼama jlu: «Tzul ik tzaʼn jun pastor kwentin qe t-ẍneʼl tuʼn, in che jaw tchleʼn qe tal t-ẍneʼl tuj tqʼabʼ, qʼiʼn qe tuʼn ttzi t-xuʼk» (Is. 40:11). Tuʼnju a Jehová mas tbʼanel Xqʼuqil Ẍneʼl, ¿tiʼ in kubʼ tnaʼn aj tel tpan tibʼ jun tmajen tiʼj? Tqʼama Jesús tiʼ in kubʼ tnaʼn Jehová tej tqʼama jlu kye t-xnaqʼtzbʼen: «¿Chi tok kyuʼne? Qa at jun xjal at jun syent t-ẍneʼl, ex qa ma kyaj tzpet jun, ¿mlaypelo che kyaj tqʼoʼn qeju 99 twi witz, ex kxeʼl jyolte aju otoq kyaj tzpet? Ex qatzun ma knet tuʼn, ax tok kxel nmaʼne kyeye, mas ktzalajel tiʼj ju tal ẍneʼl lu kywitz qeju 99, aqeju mintiʼ e kyaj tzpet» (Mat. 18:12, 13).
9. ¿Tzeʼn in nok t-xqʼuqin jun tbʼanel pastor qe t-ẍneʼl? (Qʼonka twitza tiʼj tilbʼilal tok tiʼj t-xkʼomil).
9 ¿Tiquʼn toj tumel aj tok qmojbʼaʼn Jehová tukʼil jun xqʼuqil ẍneʼl? Tuʼnju at tkʼujlabʼil kyiʼj t-ẍneʼl. Jun techel, qʼojin David tukʼil jun oso ex tukʼil jun león tuʼntzun tkolin kyiʼj t-ẍneʼl (1 Sam. 17:34, 35). Qa tok twitz jun xjal kyiʼj t-ẍneʼl, kʼelel tnikʼ tiʼj aj tel tzpet jun (Juan 10:3, 14). ¿Tiʼ jaku bʼant tuʼn? Jaku che kyaj tqʼoʼn qe 99 toj kyja moqa jaku txi tqanin te juntl xjal tuʼn kyok t-xqʼuqin akux in jyon tiʼjju otoq tzʼel tzpet. Ajbʼen tbʼanel techel lu tuʼn Jesús tuʼntzun tel qnikʼ tiʼj tmod Jehová. Tqʼama jlu: «Aju Kymane at tuj kyaʼj myatzun tajbʼil tuʼn tnaj jun kye qeju tal chʼin lu» (Mat. 18:14).
In nok tqʼanin jun aj Israel jun tal t-ẍneʼl otoq tzʼel tzpet. (Qʼonka twitza tiʼj taqikʼ 9).
IN JYON JEHOVÁ KYIʼJ T-ẌNEʼL
10. Ik tzeʼn in tzaj tqʼamaʼn Ezequiel 34:11 a 16, ¿tiʼ kyaj ttziyen Jehová tuʼn tbʼant tuʼn kyiʼj t-ẍneʼl?
10 Teyele junjun qe kʼujlaʼn qoʼ tuʼn Jehová, axpe ikx qeju «tal chʼin» o che el oq tiʼj. Ajbʼen profeta Ezequiel tuʼn Jehová tuʼntzun ttzaj ttziyen qa kjyol kyiʼj tal t-ẍneʼl otoq che el tzpet ex qa kʼoniltoq kyiʼj tuʼn tten kyamiwbʼil tukʼil juntl maj. Tqʼama Jehová tiʼtoq tuʼn tbʼant tuʼn tuʼn tonin kyiʼj. Kʼoniltoq kyiʼj ik tzeʼn bʼant tuʼn jun xqʼuqil ẍneʼl te ojtxe tnam Israel qa ma txi naj jun t-ẍneʼl (kjawil uʼjit Ezequiel 34:11-16). Tnejel, iltoq tiʼj tuʼn tjyon xjal tiʼj t-ẍneʼl ex in xitoq tiʼn ambʼil ex tipumal. Yajxitl, aj tkanet tal ẍneʼl tuʼn, in xi tiʼn juntl maj kyxol txqantl. Ex qa otoq kʼixbʼi tal ẍneʼl, kʼokel tqʼanin, kxel tqʼoʼn twa ex kjawil tchleʼn tukʼil kʼujlabʼil. Ax jlu kbʼantel kyuʼn ansyan aj kyonin kyiʼj «qe t-ẍneʼl Dios» o che el laqʼeʼ tiʼj ttnam (1 Ped. 5:2, 3). In cheʼx ansyan jyol kye, in che onin kyiʼj tuʼn kymeltzʼaj toj ttnam Jehová, ex in kubʼ kyyekʼin kykʼujlabʼil aj kyonin kyiʼj tuʼn tten juntl maj kyamiwbʼil tukʼil Jehová. *
11. ¿Tiʼtoq ojtzqiʼn tuʼn jun tbʼanel xqʼuqil ẍneʼl?
11 Ojtzqiʼntoq tuʼn jun tbʼanel xqʼuqil ẍneʼl qa jaku che el tzpet t-ẍneʼl. Tuʼntzunju, qa ma bʼaj jlu, mintiʼtoq in che bʼaj tbʼyoʼn. Qo xnaqʼtzan tiʼjju bʼant tuʼn Jehová tej mintiʼ e nimen junjun tmajen te.
12. ¿Alkye tmod Jehová ten tukʼil Jonás?
12 El oq profeta Jonás twitz Jehová tuʼntzun miʼn tjapun toklen. Pero mintiʼ kubʼ t-ximen Jehová qa ya mlay tzʼajbʼen te. Ik tzeʼn in bʼant tuʼn jun tbʼanel xqʼuqil ẍneʼl, onin Jehová tiʼj tuʼn miʼn tel oq ex xi tqʼoʼn tipumal tuʼntzun tjapun toklen (Jon. 2:7; 3:1, 2). Tibʼajxi jlu, ajbʼen jun tal kʼum tuʼn tuʼntzun t-xi tyekʼin te qa nim toklen tchwinqlal teyele junjun xjal toj twitz (Jon. 4:10, 11). ¿Tiʼ xnaqʼtzbʼil in nel qiʼn tiʼj jlu? Qa mintiʼ tuʼn tkubʼ kyximen naj ansyan qa ya mlay che meltzʼaj erman juntl maj tukʼil Jehová. Sino bʼaʼn tuʼn tok tilil kyuʼn tuʼn tel kynikʼ tiʼj tiquʼn el kypan kyibʼ tiʼj. Ex aj tmeltzʼaj jun erman, nim toklen tuʼn kukx kyonin tiʼj tukʼil kʼujlabʼil.
13. ¿Tiʼ xnaqʼtzbʼil jaku tzʼel qiʼn tiʼj tmod Jehová kubʼ tyekʼin tiʼjju tqʼama aj tzʼibʼil tiʼj Salmo 73?
13 Tzaj tbʼis aj tzʼibʼil te Salmo 73 tej tok tkeʼyin qa in che tzalaj xjal mintiʼ in che ajbʼen te Jehová. Kubʼ t-ximen qa nya il tiʼj tuʼn tkubʼ tbʼinchaʼn tajbʼil Jehová (Sal. 73:12, 13, 16). ¿Tiʼ tmod Jehová kubʼ tyekʼin tukʼil? Mintiʼ kubʼ tqʼoʼn tkastiw. Axpe ikx, tzaj tqʼoʼn ambʼil tuʼn kykyaj tzʼibʼin qe tyol salmista toj Xjan Uʼj. Tej tbʼet ambʼil, el tnikʼ salmista tiʼj qa mas tbʼanel tuʼn tten qamiwbʼil tukʼil Jehová twitz alkyexku juntl tiʼ (Sal. 73:23, 24, 26, 28). ¿Tiʼ xnaqʼtzbʼil in nel qiʼn tiʼj jlu? Qa mintiʼ tuʼn kyok ten naj ansyan yolil kyiʼj qeju in kubʼ kyximen qa nya il tiʼj tuʼn kyajbʼen te Jehová. Twitzju tuʼn kyok ten ansyan yolil kyiʼj erman, il tiʼj tuʼn tok tilil kyuʼn tuʼn tel kynikʼ tiʼj tiquʼn in tzaj kyqʼamaʼn moqa in kubʼ kybʼinchaʼn junjun tiʼchaq. Iktzun tten jaku tzʼajbʼen Tyol Dios kyuʼn tuʼn kyonin kyiʼj.
14. ¿Tiquʼn tajtoq Elías onbʼil ex tzeʼn onin Jehová tiʼj?
14 El oq profeta Elías twitz reina Jezabel (1 Rey. 19:1-3). Kubʼ t-ximen qa ya mintiʼtoq mas tprofeta Jehová ex qa mintiʼtoq tajbʼen aju in bʼanttoq tuʼn. Tzaj nim tbʼis ex kubʼ t-ximen tuʼn tkyim (1 Rey. 19:4, 10). Mintiʼ kubʼ tqʼoʼn Jehová tkastiw Elías. Sino xi tqʼamaʼn te qa nya tjunalxtoq at, qa jakutoq tzʼok qeʼ tkʼuʼj tiʼj ex qa atxtoq nim aqʼuntl tuʼn tbʼant. Ok tqʼoʼn Jehová twiʼ tiʼj Elías tej t-xi tqʼamaʼn qe tbʼis te ex xi tqʼoʼn junjuntl toklen (1 Rey. 19:11-16, 18). ¿Tiʼ xnaqʼtzbʼil jaku tzʼel qiʼn tiʼj jlu? Qa qkyaqilx il tiʼj tuʼn tkubʼ qyekʼin tbʼanel qmod kyiʼj t-ẍneʼl Jehová, pero mas kbʼantel jlu kyuʼn ansyan. Qa in qʼojin jun erman aj ttzaj tqʼamaʼn qe tbʼis moqa aj tkubʼ t-ximen qa mlayx kubʼ tnajsaʼn Jehová til, kʼokel kyqʼoʼn ansyan kywiʼ tiʼj tyol. Tibʼajxi jlu, kxel kyqʼamaʼn ansyan te erman qa nim toklen toj twitz Jehová.
¿TIʼ QXIMBʼETZ KTEL KYIʼJ T-ẌNEʼL JEHOVÁ O CHE EL TZPET?
15. Ik tzeʼn in tzaj tqʼamaʼn Juan 6:39, ¿tiʼ t-ximbʼetz Jesús ten kyiʼj t-ẍneʼl Jehová?
15 ¿Alkye qximbʼetz taj Jehová tuʼn tten kyiʼj t-ẍneʼl o che el tzpet? Kyaj tqʼoʼn Jesús jun tbʼanel techel qwitz. Ojtzqiʼntoq tuʼn qa nim kyoklen kykyaqil tmajen Jehová toj twitz. Tuʼntzunju ok tilil tuʼn tuʼn kymeltzʼaj aj Israel tukʼil Jehová, aqeju otoq che el tzpet ik tzeʼn qe ẍneʼl (Mat. 15:24; Luc. 19:9, 10). Tuʼnju ax ikx ok Jesús te jun tbʼanel xqʼuqil ẍneʼl, ok tilil tuʼn tuʼn miʼn tel tzpet jun t-ẍneʼl Ttat (kjawil uʼjit Juan 6:39).
16, 17. ¿Tiʼ kyximbʼetz ansyan ktel tiʼj kyoklen tuʼn kyonin kyiʼj erman o che chewix toj kyokslabʼil? (Qʼonka twitza tiʼj recuadro « ¿Tiʼ jaku kubʼ tnaʼn jun t-ẍneʼl Jehová aj tel tzpet?»).
16 Tqʼama apóstol Pablo kye ansyan te Éfeso qa iltoq tiʼj tuʼn tel kykanoʼn tiʼj Jesús. Xi ttzʼibʼin jlu kye: «Ma txi nyekʼune kyeye tuʼn kyaqʼnane ikju, ex tuʼn kyonine kye qeju mintiʼ kye, ex tuʼn ttzaj kynaʼne aju tyol Qajaw Jesús chi o tma: Mas at tzalajbʼil kyeye qa at chʼin ma txi kyqʼoʼne te juntl, ex mya aqeye tuʼn kykʼmonteye chʼin ktzajel qʼoʼn kyeye tuʼn juntl» (Hech. 20:17, 35). Ik tzeʼn in nel qnikʼ tiʼj, nim toklen aqʼuntl in tbʼant kyuʼn ansyan. Tqʼama ermano Salvador jlu, jun ansyan te España: «Aj nximane tiʼj qa in che ok tkʼujlaʼn Jehová qe t-ẍneʼl o che el tzpet, in nonin jlu wiʼje tuʼn tok tilil wuʼne tuʼn wonine kyiʼj. Qʼuqli nkʼuʼje tiʼj qa taj Jehová tuʼn nxqʼuqine tiʼj teyele junjun t-ẍneʼl».
17 Aqeju erman ma qo yolin kyiʼj toj xnaqʼtzbʼil lu, e chewix toj kyokslabʼil, noqtzun tuʼnj, xi qʼoʼn onbʼil kye ex e meltzʼaj tukʼil Jehová. Pero toj ambʼil jaʼlo, ax ikx ateʼ nim tmajen Jehová kyaj tuʼn kymeltzʼaj tukʼil. ¿Tzeʼn jaku qo onin kyiʼj? Toj juntl xnaqʼtzbʼil, kʼelel qnikʼ tiʼj tiʼ jaku bʼant quʼn tuʼn qonin kyiʼj.
BʼITZ 139 Ximana tiʼj tanqʼibʼila toj akʼaj twitz Txʼotxʼ
^ taqik' 5 ¿Tiquʼn in che el laqʼeʼ junjun tmajen Jehová tiʼj ttnam maske o tzikʼ nim ambʼil in che ajbʼen te? ¿Tiʼ t-ximbʼetz Jehová at kyiʼj? Kxel qqʼoʼn tzaqʼwebʼil kyiʼj xjel lu toj xnaqʼtzbʼil lu. Ax ikx, kʼelel qnikʼ tiʼj tzeʼn o tzʼonin Jehová kyiʼj junjun tmajen mintiʼ xi kybʼinchaʼn qe tiʼchaq ik tzeʼn xi tqʼamaʼn kye ex tiʼ xnaqʼtzbʼil jaku tzʼel qiʼn tiʼj jlu.
^ taqik' 2 YOL NIM TOKLEN: Aj tchewix jun pakbʼal toj tokslabʼil, atz in qo yolin tiʼj jun erman ma tzikʼ qaq xjaw moqa mas ambʼil ya mintiʼ in nex pakbʼal ex ya mintiʼ in qʼon xnaqʼtzbʼil. Maske o chewix toj tokslabʼil, kukx in nok qqʼoʼn te qerman ex kukx at qkʼujlabʼil tiʼj.
^ taqik' 4 Ma che kubʼ chʼixpet junjun bʼibʼaj.
^ taqik' 10 Toj juntl xnaqʼtzbʼil, kʼelel qnikʼ tiʼj tiʼ jaku bʼant kyuʼn ansyan tuʼn kyok lepeʼ kyiʼj nabʼil lu.
^ taqik' 60 TQANIL TIʼJ TILBʼILAL: In jyon jun aj Israel tiʼj jun tal t-ẍneʼl otoq tzʼel tzpet tuʼntzun tmeltzʼaj kyxol txqantl. Ax jlu in bʼant kyuʼn ansyan toj ambʼil jaʼlo.
^ taqik' 64 TQANIL TIʼJ TILBʼILAL: Tokx jun ermana o chewix toj tokslabʼil toj jun kamionet ex in nok tqʼoʼn twitz kyiʼj kabʼe erman in che tzalaj akux in che pakbʼan jatumel ateʼ nim xjal.
