CILONGESA 25
“Yange Babenya Njikashakezeka Bimanga Bange”
“Yange babenya njikashakezeka bimanga bange, co njikabanyunga.”—EZEKI. 34:11.
MWASO 105 “Mulimu ki Lilato”
BILI MUNO MU CILONGESA *
1. Mwafwa bika Yehova walyesekesele ku cisemi wa munakazi?
MU SIMBU ya kapolofweto Isaya, Yehova wehwile banu bendi ngwendi: “Kuma munakazi [asa] kwibala munendi uje ajamwa ndi?” Co wabalekele ngwendi: “Nameme nga baina ya munu bebala munabo, oloni yange kunjikamibala.” (Isaya 49:15) Kakangi, Yehova kesi kulyesekesa ku cisemi wa munakazi. Oloni ha simbu ije walingile ngoco. Yehova wendekele bya cizemo cakala naco munakazi kuli munendi mangana akwase bangamba bendi bamone mwabazemena. Bisemi babanakazi babangi bakalizibi ngwe mwalizibile ndokazi Jasmin uje wendekele ngwendi: “Cisemi wa munakazi mwajamwesa munendi, cizemo cikakala mukati kabo cikakolo manene.”
2. Yehova akalizibi bati nga munendi azeya ku sipilitu?
2 Yehova akazibuka nga munendi alikela kukunguluka nambe kuya mu lihya. Ngeci, Yehova akazibi manene kubabala ku mbunge mwakamono bana bendi babangi bazeya ku sipilitu. *
3. Yehova atonda ngwendi baje banazeye ku sipilitu balinge bika?
3 Bwingi bwa bandolome na bandokazi baje bakazeye ku sipilitu, bakalikwatasana lalo na cikungulukilo, co tukabwahelela manene. Yehova atonda ngwendi balikwatasane lalo na cikungulukilo, co netu bikebyo bitutonda. (1 Petu 2:25) Twasa kubakwasa bati mangana balikwatasane lalo na cikungulukilo? Simbu kanda tukumbulule eci cihula, tunapande kuzibuka byuma bili na kulingisa banu bamo becele kukunguluka na kwambulula.
BIKA BILI NA KULINGISA BANU BAMO BAZEYE KU SIPILITU?
4. Bika bibakalingi banu bamo mwafwa ya bipangi bya ku mubila?
4 Banu bamo bali na kubiisila simbu yaingi ku bipangi byabo bya ku mubila. Ndolome Hung * wa ku Asia wendekele ngwendi: “Njakele na kubiisila simbu yaingi ku bipangi. Njakele na kulikwisa ngwange nga njikala na byuma byabingi bya ku mubila, co njipangela mwamubwa Yehova. Ngeci, njakele na kupanga simbu yaingi. Kamandondo-kamandondo, njecelele kukunguluka, co mu kwita kwa simbu, njalikelele kulikwatasana na cikungulukilo. Satana ali na kupangesa byuma bya mu kaye mangana ongumune banu na kubatundisa kuli Njambi.”
5. Bika byalingile ndokazi Anne mwaliwanene na bukalu bwakama?
5 Bandolome na bandokazi bamo bali na kuliwana na bukalu bwakama. Ndokazi Anne wa ku Britain uje ali na bana batanu wendekele ngwendi: “Munange umo wasemukile na buyanga. Co mu kwita kwa simbu, munange wa munakazi bamutundisile mu cikungulukilo. Co lalo munange wa mukwenje washangumukile kubinja mu bwongo. Njazeyele manene, co njalikelele kukunguluka na kwambulula.” Tuli na kuzibila ngozi ndokazi yetu Anne, mwafwa ya bukalu bwali na kuliwana nabwo. Co lalo tuli na kuzibila ngozi bandolome na bandokazi betu boshe baje bali na kulifwita na bukalu.
6. Bika twendekela ngwetu nga munu kapangesa cinangulo cili ku Kolose 3:13, co asa kuzeya ku sipilitu?
6 Tandeni Kolose 3:13. Bandolome na bandokazi bamo bakalubala mwafwa ya byuma byanabalingi mukwabo muka-Kilistu. Kapositolo Paulu wazibukile ngwendi twasa “kulinyenga” hali bandolome na bandokazi betu. Bisimbu bimo, basa kutulinga mwamubi. Oshe kutunyanyama twasa kukala na likitikiti ku mbunge. Kulubala kwasa kulingisa munu azeye ku sipilitu. Tusimutwiyeni hali ndolome Pablo wa ku South America. Munu umo wamubangeyeye ngwendi nalingi bubi. Ngeci, Pablo bamwecelesele kupanga bipangi bya mu cikungulukilo. Bika byalingile Pablo? Wendekele ngwendi: “Njalubalele manene, co njashangumukile kulikela kukunguluka na kwambulula.”
7. Bika byasa kutundamo nga munu atwalelelaho kuliziba ngwendi ali na mulonga?
7 Munu uje walingile bubi bwakama kunima, asa kutwalelelaho kuliziba kukala na mulonga na kuliziba ngwendi Njambi kamukonekelele. Nameme watengulukile, co lalo bamukonekelele, oloni asa kuliziba ngwendi kasa kupwa kabusamba ka Njambi. Ndolome Francisco nendi walizibile ngoco. Wendekele ngwendi: “Banjendekelele mwafwa njalingile bukwizi. Kutunda ha kunjendekela, njatwaleleleho kukunguluka. Oloni mu kwita kwa simbu, njazeyele, co njamwene ngwange kunjasa kupangela Yehova. Citakutaku cange cakele na kunjipaya, co njamwene ngwange Yehova kanjikonekelele. Mu kwita kwa simbu, njalikelele kukunguluka na kwambulula.” Muli na kuliziba bati mwafwa ya bukalu bubali na kuliwana nabwo bandolome na bandokazi batunasimutwiya? Kuma muli na kubazibila mema ku mbunge ndi? Yehova ikeye akalizibi bati?
YEHOVA WAZEMA BIMANGA BENDI
Kanyungi wa Kaisalele wakele manene mbunge ku manga wa kuzimbala (Taleni palagilafu 8-9) *
8. Kuma Yehova asa kwibala bangamba bendi baje banazeye ku sipilitu ndi? Lumbununeni.
8 Yehova acili na kwanuka bangamba bendi baje banazeye ku sipilitu. Kebalele bipangi byabo. (Heve 6:10) Yehova wapangesele cakumwenako cacibwa mangana amwese ngwendi wazema manene banu bendi. Walekele kapolofweto Isaya asoneke ngwendi: “Akanyunga butanga bwendi mwamubwa ngwe kanyungi, akakungulwila hamolika bana ba bimanga, na kubambata mu maboko endi.” (Isaya 40:11) Yehova uje wapwa Kanyungi Wakama akalizibi bati nga manga yendi umo atunda ha butanga? Yesu wamwesele mwakalizibila Yehova omwo wehwile bandongesi bendi ngwendi: “Muyongola bati? Nga munu umo ali na bimanga 100, co azimbalesaho umo, kuma kakaseza baje [99] baje bali na kulila kumukulo wa lilundu aye na kushakezeka uje manga umo nazimbala ndi? Co nga namuwana, mwa busunga njimileka ngwange ikeye akabwahelela manene hali uje nazimbalele kutubakana baje [99] baje kubazimbalele.”—Mateo 18:12, 13.
9. Bika bibakele na kulinga tunyungi ba kusañulu? (Taleni cikupulo cili ha liputa lya kulibanga.)
9 Mwafwa bika kunapande kwesekesa Yehova kuli kanyungi? Mwafwa tunyungi bababwa ba kusañulu bakele manene mbunge ku kunyunga bimanga babo. Cakumwenako, Ndabiti walwisile ndumba na mbeya mangana anyungilile bimanga bendi. (1 Samwe 17:34, 35) Kanyungi wamubwa wakele na kuzibuka nameme manga umo nazimbala. (Yowa 10:3, 14) Ou kanyungi, wakele na kwaka bimanga 99 mu limba nambe kubaseza kuli mukwabo mangana aye na kutonda uje nazimbala. Yesu wapangesele eci cakumwenako mangana atulongese simpi yakama. Wendekele ngwendi: “Keti cizango ca Ishweni ali mwilu ngeci umo wamundondo akanyonge.”—Mateo 18:14.
Kanyungi wa mu Isalele wakele manene mbunge ku manga wa kuzimbala (Taleni palagilafu 9)
YEHOVA ALI NA KUSHAKEZEKA BIMANGA BENDI
10. Ku Ezekiyele 34:11-16, bika byanakulahesa Yehova ku bimanga bendi baje banazimbala?
10 Yehova wazema umo na umo wetu, kwambateselela na baje banatundu ha butanga bwendi. Ezekiyele wapolofwetele ngwendi Njambi akashakezeka bimanga bendi baje banazimbala, co akabakwasa mangana bakanyamese lalo busamba bwabo nendi. Wendekele byuma byakalinga Yehova mangana abelwise ha butanga. Byuma byendekele bikebyo bibakele na kulinga tunyungi ba mu Isalele nga manga umo nazimbala. (Tandeni Ezekiyele 34:11-16.) Kanyungi wakele na kuya na kushakezeka manga. Oloni kutonda manga capwile cipangi cakama. Nga nawana uje manga, co amwilwisa ha butanga. Oshe uje manga nabetwa, co amukuta ha mbandu. Umona natsi njala, co amwana byakulya. Kutundaho, amujundula na kwiluka nendi. Bakulunu nabo banapu tunyungi ba ‘butanga bwa Njambi.’ Ngeci, banapande kulinga ebi byuma mangana bakwase baje banazeye ku sipilitu. (1 Petu 5:2, 3) Ca kulibanga, banapande kuya na kubashakezeka. Ca mu cibali, banapande kubakwasa beluke mu butanga. Co ca mu citatu, banapande kubakwasa balikute lalo busamba na Yehova. *
11. Bika byazibukile kanyungi wamubwa?
11 Kanyungi wamubwa wazibukile ngwendi manga asa kuzimbala. Ngeci, mwakele na kuwana manga uje watundile ha butanga kakele na kumulinga mwamubi. Tusimutwiyeni byalingile Njambi omwo bangamba bendi bamo bazeyele ku sipilitu.
12. Yehova wakwasele bati Yona?
12 Kapolofweto Yona watewele kuya kuje kwamutumine Yehova. Oloni Yehova kalikelele kumupangesa. Ngwe mubalingile tunyungi bababwa, Yehova wobwele Yona na kumwana nzili mangana apange cipangi camwanene. (Yona 2:7; 3:1, 2) Njambi wapangesele intwi mangana akwase Yona amone ngwendi buyoye bwa munu bwapwa bwa seho. (Yona 4:10, 11) Bika bitulilongesako? Bakulunu kubapandele kulikela bwasi kukwasa munu uje nazeye ku sipilitu. Oloni banapande kuzibisisa byuma binamulingisa azeye ku sipilitu. Nga ashangumuka lalo kupangela Yehova, co banapande kutwalelelaho kumuzema na kumwaka mbunge.
13. Bika bitulilongesa ku byuma byalingile Yehova kuli uje wasonekele mukanda wa Myaso 73?
13 Uje wasonekele mukanda wa Myaso 73, wazeyele mwamwene banu bababi basholoka ngwe bali na kuyoya mwamubwa. Co wamwene ngwendi kupangela Yehova kukwesi na seho. (Myaso 73:12, 13, 16) Yehova walingile bika? Kamumwene ngwendi wapwile munu wamubi embwe. Watabesele majwi endi bawasoneke mu Mbimbiliya. Mu kwita kwa simbu, wamwene ngwendi kupangela Yehova kwa seho manene kutubakana cuma coshe-coshe. (Myaso 73:23, 24, 26, 28) Bika bitulilongesako? Bakulunu kubapandele kuzambwila kupaya munu uje ashangumuka kumona ngwendi kupangela Njambi kukwesi na seho. Oloni banapande kuzibuka byuma binamulingisa akale na biyongola byakufwa ngoco. Nga balinga ngoco, co basa kwangula mwamubwa Bisoneka bije byasa kumutakamesa.
14. Bukalu muka bwaliwanene nabwo Elinja, co Yehova wamutakamesele bati?
14 Kapolofweto Elinja watewele Lishano Njezebele. (1 Vimye 19:1-3) Wasinganyekele ngwendi ikeye lika wapwile kapolofweto wa Yehova, co wamwene ngwendi cipangi cendi kucapwile ca seho. Elinja wazeyele manene, co watondele ngwendi atse. (1 Vimye 19:4, 10) Yehova kamwene ngwendi Elinja wapwile munu wamubi. Wamulekele ngwendi kakele likalyendi. Wamukwasele amukulahele, co lalo wamulekele ngwendi kwakele bipangi byabingi byapandele kupanga. Yehova watolililile ku biyongola bya Elinja, co wamwanene bipangi bikwabo. (1 Vimye 19:11-16, 18) Bika bitulilongesako? Bakulunu banapande kulikwatasana mwamubwa na bimanga ba Yehova. Keti bakulunu lika, oloni tubaboshe. Nga ndolome nambe ndokazi endeka oku nalubala nambe endeka ngwendi Yehova kasa kumukonekela, bakulunu anga banapande kumutolilila mwamubwa. Co lalo banapande kukwasa uje manga amone ngwendi Yehova wamuzema.
TUNAPANDE KUMONA BATI BIMANGA BA YEHOVA BAJE BANAZIMBALA?
15. Kwesekesa na Yowano 6:39, Yesu wamwene bati bimanga ba Ishe?
15 Yehova atonda ngwendi tumone bati bimanga bendi baje banazimbala? Yesu watumwesele mwanja utunapande kukabangeya. Wazibukile ngwendi Yehova wamona bimanga bendi boshe kupwa ba seho. Ngeci, walingile mwoshe mwaselele mangana akwase “bimanga ba kuzimbala ba ku banu Baisalele” beluke kuli Yehova. (Mateo 15:24; Luka 19:9, 10) Ha kupwa kanyungi wamubwa, Yesu wapangele na nzili mangana keti kuzimbale nameme manga umo wa Yehova.—Tandeni Yowano 6:39.
16-17. Bakulunu banapande kumona bati baje banazeye ku sipilitu? (Taleni cipalo ca “ Baje Banazeye ku Sipilitu Bakalizibi Bati?”)
16 Kapositolo Paulu washongangeyeye bakulunu ba cikungulukilo ca Efeso ngwendi batembwinine Yesu. Wendekele ngwendi: “Tunapande kukwasa baka-kuzeya [na] kwanuka majwi aje Mwene Yesu babenya wendekele ngwendi, ‘Muli kujolela kwakama manene mu kwana kutubakana mu kutambula.’” (Vili 20:17, 35) Ou mukanda umwesa ngwawo bakulunu bali na cipangi cakama ca kukwasa banu ba Yehova. Mukulunu umo wa ku Spain wa lizina lya Salvador wendekele ngwendi: “Njizibuka ngwange Yehova wazema bimanga bendi baje banazimbala, ngeci njikalingi mwoshe munjasela mangana njibakwase. Njizibuka ngwange Yehova ashaka ngwendi njinyunge bimanga bendi.”
17 Banu boshe batunendeka muno mu cilongesa baje bazeyele ku sipilitu, banabakwasa, co banashangumuka lalo kupangela Yehova. Co kucili bakwabo lalo baje banazeye ku sipilitu, oloni bashaka kushangumuka kumupangela. Mu cilongesa cinatako, tusimutwiya mutwasa kubakwasela mangana bashangumuke lalo kupangela Yehova.
MWASO 139 Muipone Kuli mu Mwa Lifasi Lelinca
^ par. 5 Bika bili na kulingisa banu bamo baje banapangela Yehova ha simbu yailaha bazeye ku sipilitu? Njambi akabamono bati? Ebi bihula tubikumbulula muno mu cilongesa. Co lalo tulilongesa byuma byalingile Yehova kuli bangamba bendi baje bazeyele ku sipilitu.
^ par. 2 LIJWI LIBANALUMBUNUNA: Muka-kwambulula uje nazeye ku sipilitu napu munu uje kanenele bipangi byendi bya mu lihya ha bingonde 6 nambe kutubakana. Nameme ngoco, baje banazeye ku sipilitu anga bacilli bandolome na bandokazi betu, co lalo twabazema.
^ par. 4 Mazina amo banawatengulula.
^ par. 10 Ebi byuma bitatu tubisimutwiya mu cilongesa cinatako mangana tumone mubanasa kubipangesela bakulunu.
^ par. 60 KULUMBUNUNA CIKUPULO: Kanyungi wa Kaisalele uje wakele mbunge ku manga wa kuzimbala, wakele na kumushakezeka na kumwilwisa ha butanga. Ano matangwa bakulunu nabo bakalingi ngoco.
^ par. 64 KULUMBUNUNA CIKUPULO: Ndokazi uje nazeye ku sipilitu ali na kubandamena mbasi ikatuke, co namono Bakaleho babali oku bali na kwambulwila ku mbunga.
