1. Bõe yĩng t’a Zeova mak a meng ne pag sẽn tar biig sẽn yẽsemde?

“PAG tõe n yĩma biig ning a sẽn yẽsemdã yell sɩda?” No-rɛɛs a Ezayi wakatẽ wã la a Zeova ra sok woto. A wẽneg n leokame yaa: “Baa yẽnda sã n tõe n yĩm a yelle, mam kõn tol n yĩm fo yell ye.” (Eza. 49:15) A Zeova pa wae n makd a meng ne biig ma ye. La so-kãnga wã, a maana woto. A rɩka makr ne nonglem la yĩn-sidg ning sẽn be biig ne a ma sʋkã, n na n sõng a nin-buiidã tɩ b bãng yẽ sẽn nong-b to-to wã. Saam-bi-poak yʋʋr sẽn boond t’a Yasmin yeelame: “F sã n yẽgd f biiga, nonglem la yĩn-sidg ning sẽn be foo ne biigã sʋkã wat n lebga bũmb sẽn kaoosd f yõor tɛka.” Ma-rãmbã fãa la bal wʋmda a gomdã võore.

2. Baa yaa ned a ye bal n lak a meng ne tigingã, a Zeova tagsg yaa wãna?

² Baa yaa ned a ye bal n wa n bas n pa le tigimd ne a tẽed-n-taasã, la a pa le moond koɛɛgã, a Zeova miime. D tags n ges a sũur sẽn sãamd to-to, a sẽn ne tɩ yʋʋmd fãa, neb sõor sẽn waoog n basd koɛɛgã mooneg * la tigissã kẽndã.

3. Bõe la a Zeova rata?

³ Wʋsg sẽn da bas tigissã kẽnd la koɛɛgã mooneg wat n le sɩnga tigissã waoongo, tɩ d reeg-b ne sũ-noogo! A Zeova ratame tɩ b lebg n wa a nengẽ. Tõnd me raab yaa woto. (1 Pɩy. 2:25) La bõe la d tõe n maan n sõng-ba? Nand tɩ d leok sok-kãnga, yɩta sõma tɩ d reng n bãng bũmb nins sẽn mi n kɩt tɩ kẽer wa bas n pa le wat tigissã, la b pa le moond koɛɛgã.

4. Wãn to la neb kẽer tʋʋm wa n kɩt tɩ b bas a Zeova tũubu?

⁴ Kẽer nengẽ, b wa n basame tɩ b tʋʋmã rɩ b sẽkã fasɩ. Saam-biig a ye sẽn be Aazi t’a yʋʋr boond t’a Hung * yeela vẽeneg yaa: “M wa n basame tɩ lebg m tʋʋmã n dɩt m sẽkã la m pãngã fãa. M belga m meng n da tẽed tɩ m sã n paam ligd la teed wʋsgo, rẽ la m na n tõog n tũ a Zeova sõma. Kɩtame tɩ m da tʋmd n kaoosdẽ. M wa n sɩnga tigissã vaalg bilf-bilfu, n wa vaand wʋsg-wʋsgo, hal n wa tolg n base. Dũniyã sẽn lebg to-to wã, wõnda yaa sẽn na n belg nebã bilf-bilf tɩ b bas Wẽnnaam tũubu.”

5. A Ann zu-loeesã wa n kɩtame t’a maan bõe?

⁵ D tẽed-n-taas sãnda me nengẽ, yaa yɛlã n loog-ba. A Ann kibarã wilgda rẽ. A bee Gãrãnd Bertayn. Yaa kamb a nu ma. Ad a sẽn yeele: “Mam biig a ye n dog ne komslem. B wa n yiisa m bi-pugl a ye me tigingã pʋgẽ. Sẽn paase, mam bi-ribl n wa n yik nen-yilinga. Sãama m sũurã wʋsgo, hal tɩ m bas tigissã kẽnd la koɛɛgã moonego. Wa n kaoosame tɩ m pa le kẽnd tigissã, la m pa le moond koɛɛgã me ye.” D kʋmda a Ann ne a zakã rãmba, la d tẽed-n-taas nins fãa sẽn maood ne zu-loees a woto buudã.

6. Ned sã n pa tũ saglg ning sẽn be Kolos rãmb 3:13, wãn to la tõe n wa kɩt t’a zãag a meng ne a Zeova nin-buiidã?

⁶ Karm-y Kolos rãmb 3:13. Kẽer me n bas a Zeova tũubu, b tẽed-n-taag sẽn maan bũmb tɩ zabd-b yĩnga. Tʋm-tʋmd a Poll meng wilgame tɩ wakat ninga, d tõe n sɩd ‘wa tara yell’ ne d tẽed-n-taaga. Tõeeme meng tɩ b maan-d-la kɛgre. Wakat kãng tɩ d sã n pa gũusi, d wat n talla sũ-kẽka. Sũ-toog sã n tar neda, tõe n wa kɩtame t’a lak a meng ne a Zeova nin-buiidã. A Pablo kibarã wilgda rẽ. Yaa d tẽed-n-taag sẽn be Amerikdisiid. B rõd-a lame t’a maana sẽn pa segde, tɩ rẽ kɩt tɩ b reeg tʋʋmd a sẽn da tar tigingã pʋgẽ. A manesem yɩɩ wãna? Ad a sẽn yeele: “Yika m sũur wʋsgo. Bilf-bilfã, m wa n zãaga m meng ne tigingã.”

7. Ned sũur-kaset sã n ningd-a taale, tõe n wa kɩtame t’a maan bõe?

⁷ Nina me sã n da maana yel-wẽn-kãsenga, a sũur-kasetã tõe n ket n namsd-a lame, hal t’a tagsdẽ tɩ Wẽnnaam pa tõe n le nong yẽ ye. Baa a sã n da teka yam n kos sugr tɩ b sɩd kõ-a sugri, a tõe n ket n tagsdame t’a pa le yaa nin-tɩrg n sek a na naag Wẽnnaam nin-buiidã ye. A buud paama d tẽed-n-taag yʋʋr sẽn boond t’a Fãrãnsisko. Ad a sẽn yeele: “Mam yoome, tɩ b kibl-ma. Sɩngrẽ wã, m da ket n kẽnda tigissã, la m sũurã wa n sãama zãnga, tɩ m da getẽ tɩ m pa segd meng n le naag a Zeova nin-buiidã ye. M sũur-kasetã ra ningd-m-la taale, tɩ rẽ kɩt tɩ m da kɩs sɩd t’a Zeova pa kõ-m sugr ye. M wa n basa koɛɛgã mooneg la tigissã kẽnde.” Yãmb tagsg yaa wãn ne d tẽed-n-taas nins sẽn be yell a woto pʋgẽ wã? Yãmb kʋmda b nimbãaneg bɩ? La sẽn yɩɩd fãa, a Zeova tagsg yaa wãn ne nin-kãensã?

8. Ned sã n da tũud a Zeova n wa base, a Zeova yĩmda a yell bɩ? Wilg-y y leoorã võore.

⁸ Ned sã n da tũud a Zeova n wa base, a Zeova pa yĩmd a yell ye. A pa yĩmd bũmb nins a soabã sẽn da maan a tũudmã yĩngã me ye. (Ebre. 6:10) No-rɛɛs a Ezayi da rɩka makr sẽn wilgd a Zeova sẽn get a nin-buiidã yell sõma to-to wã. A yeelame: “Bãmb dɩlgda b nebã wa pe-kɩɩm sẽn wãbenegd a rũmsi, bãmb na n tẽega b nug n tigim b piisã, n kãag-b n mobg  b menga.” (Eza. 40:11) A Zeova sẽn yaa tõnd pe-kɩɩm-kãsengã tagsg yaa wãna, d tẽed-n-taag sã n wa pa le naagd a nin-buiidã n tũud-a? Bũmb la a Zeezi ra sok a karen-biisã, tɩ sõngd tõnd tɩ d bãng rẽ. A ra sok-b lame yaa: “Yãmb tagsg yaa bõe ne yãoã? Rao sã n tar piis koabg t’a yembr meneme, a pa na n bas pis-wɛ la a wɛ wã tãensã zutu, la a kẽng n tɩ gẽes sẽn menem-a wã sɩda? La mam yeta yãmb sɩd t’a sã n wa yã-a, a na n kɩdma sũ-noog pe-kãng yĩnga, n yɩɩg pis-wɛ la a wɛ nins sẽn da pa menemã.”—Mat. 18:12, 13.

9. Pe-kɩɩm-sõng geta a piis yell wãn-wãna? (Ges-y sebrã pipi neng fotã.)

⁹ B sẽn mak a Zeova ne pe-kɩɩmã sɩd zemsame. Bõe yĩnga? Bala, pe-kɩɩm-sõng geta a piis yell sõma. Wala makre, a Davɩɩd pãba gɩgemd la rigd-n-yĩidg n kʋ, n na n fãag a rũmsã. (1 Sãm. 17:34, 35) Baa yaa a pesg a ye n meneme, pe-kɩɩm-sõng pa tõe n pa bãng ye. (Zã 10:3, 14) A na n sak n basa a piis pis-wɛ la a wɛ wã ne pe-kɩɩmb a taaba, n tɩ gẽes pesg a ye wã sẽn menemã. A Zeezi rɩka makrã, n na n sõng tõnd tɩ d bãng bũmb sẽn tar yõod wʋsgo. Ad a sẽn yeele: “M Ba sẽn be saasẽ wã pa rat tɩ baa kom-bõon-kãensã nin-yend sãam ye.”—Mat. 18:14.

10. Wa Ezekɩyɛll 34:11-16 sẽn wilgdã, a Zeova pʋlmame t’a na n maana bõe n sõng a piis nins sẽn menemã?

¹⁰ A Zeova nonga tõnd ned kam fãa, baa a neb nins sẽn pa le naagd a nin-buiidã n tũud-a, tɩ d tõe n mak-b ne ‘kom-bõoneg’ sẽn menemã. A ra kɩtame tɩ no-rɛɛs a Ezekɩyɛll togs bũmb a sẽn na n maane. A yeelame t’a na n gẽesa a piis nins sẽn menemã, n sõng-b tɩ b le paam zood sõma ne-a. Sẽn paase, a wilga bũmb nins takɩ a sẽn na n maan n sõng pe-kãense. Yaa woto me la Israyɛll ned sẽn yaa pe-kɩɩm ra na n maane, a pesg sã n meneme. (Karm-y Ezekɩyɛll 34:11-16.) Pipi, pe-kɩɩmã na n deng n gẽesa pesgã. Rẽ rɩta sẽk wʋsgo, la wat ne yaamse. A sã n gẽes pesgã n wa yã-a, a na n  tall-a lame n wa bãgrẽ wã. Sã n mik tɩ pesgã poglame, wall yaa kom n namsd-a, pe-kɩɩmã na n gesa a yelle, n tɩp-a la a kõ-a rɩɩbo. Kãsem-dãmbã sẽn yaa “Wẽnnaam bãgrã” pe-kɩɩmbã me segd n maana woto, n sõng sẽn lak-b n bas a Zeova nin-buiidã. (1 Pɩy. 5:2, 3) B rengd n gẽes-b lame, n sõng-b tɩ b lebg n wa tigingã pʋgẽ, la b teel-b ne nonglem tɩ b le paam zood sõma ne a Zeova. *

11. Pe-kɩɩm-sõng miime tɩ bõe n tõe n paam pesgo?

¹¹ Pe-kɩɩm-sõng miime tɩ pesg tõe n wa menemame. Rẽ n so tɩ pesg sã n meneme, pe-kɩɩmã na n gũusame n da maan bũmb sẽn na n nams-a n paas ye. Pĩnd wẽndẽ, neb n da maand a Zeova raabã n wa base, la a sõng-b lame tɩ b le tõog n maan a raabã. D ges a sẽn maan to-to n sõng-bã, la yam ning d sẽn tõe n dɩk rẽ pʋgẽ.

12. A Zeova manesem yɩɩ wãn ne a Zonaase?

¹² A Zeova ra wa n tʋma no-rɛɛs a Zonaase, t’a zãgs tʋʋmdã n zoe. Baa ne rẽ, a Zeova pa yɩ tao-tao n bas-a ye. A sõng-a-la wa pe-kɩɩm-sõng sẽn sõngd a pesg to-to wã. A fãag-a lame, la a kõ-a raood t’a tõog n tɩ maan bũmb ning a sẽn tʋm-a t’a tɩ maanã. (Zon. 2:8; 3:1, 2) A wa n pʋd n tũnuga ne tɩɩg n sõng a Zonaas t’a bãng t’a nanda ned buud fãa yõor hal sõma. (Zon. 4:10, 11) Yam-bʋg la d tõe n dɩk rẽ pʋgẽ? Kãsem-dãmbã pa segd n yɩ yãg-yãg n bas ned sẽn pa le moond koɛɛgã, la a pa le wat tigissã ye. B pʋd n na n bao n bãnga bũmb ning sẽn kɩt t’a lak a meng ne Wẽnnaam nin-buiidã. A soab sã n wa lebg n wa a Zeova nengẽ, kãsem-dãmbã na n ket n wilgd-a lame tɩ b nong-a lame la b nand-a.

13. A Zeova sẽn tall manesem ning ne sẽn gʋls-a Yɩɩn-sõamyã 73 soabã kõta tõnd yam-bʋgo?

¹³ Sẽn gʋls-a Yɩɩn-sõamyã 73 soabã ra wa n komsa raoodo, a sẽn ges tɩ wõnd yaa nin-wẽnsã yɛl n ne wã yĩnga. Kɩtame t’a ra sokd a meng a sẽn maand Wẽnnaam raabã sã n pa zaalem. (Yɩɩn. 73:12, 13, 16) A Zeova manesem yɩɩ wãn ne-a?  A pa ning-a taal ye. A pʋd n kɩtame tɩ b gʋls yɩɩn-gʋlsdã sẽn yeel bũmb ningã Biiblã pʋgẽ. Yɩɩn-gʋlsdã wa n bãngame tɩ bũmb kae t’a yõod le ta d sẽn na n paam n tar zood sõma ne a Zeova ye. (Yɩɩn. 73:23, 24, 26, 28) Woto kõta tõnd yam-bʋgo? Ned sã n wa tar sãmbs ne a Zeova tũubã sã n sɩd tara yõodo, kãsem-dãmbã pa segd n yɩ tao-tao n kao a soab bʋʋd ye. B pa segd n ning-a taal ye. B pʋd n segd n bao n wʋma a sẽn tagsd woto wã võore, la a manesmã me võore. Rẽ poor masã la b tõe n karem Biiblã vɛrse-rãmb sẽn na n keng a raoodo.

14. Bõe yĩng t’a Eli ra rat sõngre, la wãn to la a Zeova sõng-a?

¹⁴ Wakat n zĩnd tɩ na-pag a Zezabɛll ra baood no-rɛɛs a Eli n dat n kʋ, t’a zoe. (1 Rĩm. 19:1-3) Sasa kãnga, a Eli ra tagsdame tɩ yaa yẽ sẽn yaa no-rɛɛsã bal n da tũud a Zeova, la t’a tʋʋmdã yɩɩ zaalem. Sãama a sũurã hal t’a ra rat meng n ki tɩ sa. (1 Rĩm. 19:4, 10) La a Zeova pa ning a Eli taal ye. A pʋd n sõnga a Eli t’a bãng t’a pa a yembr n ket n tũud-a, t’a tõe n teega yẽ a Zeova pãngã, la t’a rat n kõ-a-la tʋʋm a taaba. A Zeova maana sũ-mar n kelg a Eli t’a togs-a a zu-loeesã. Rẽ poore, a kõ-a-la tʋʋm a taab n paase. (1 Rĩm. 19:11-16, 18) A Zeova sẽn maan woto wã kõta tõnd yam-bʋgo? Tõnd ned kam fãa, la sẽn yɩɩd fãa kãsem-dãmbã segd n maana sũ-mar ne d tẽed-n-taasã. D saam-biig sẽn lak n bas a Zeova nin-buiidã sã n yeel bũmb sẽn wilgd tɩ sũ-toog n tar-a, wall a tagsdẽ tɩ pa segd t’a Zeova kõ-a sugri, kãsem-dãmbã na n kelg-a lame t’a togs sẽn be a sũurẽ wã  fãa. Rẽ poor masã la b na n mao n sõng-a t’a bas a yam t’a Zeova nand-a lame.

15. Wa Zã 6:39 wã sẽn wilgdã, a Zeezi manesem da yaa wãn ne sẽn tũud-b a Ba wã?

¹⁵ A Zeova ratame tɩ d tall manesem bʋg ne d tẽed-n-taas nins sẽn lak n bas a nin-buiidã? Rẽ wɛɛngẽ, a Zeezi kõo tõnd mak-sõngo. A ra miime tɩ ned sã n tũud a Zeova, a Zeova nanda a soab wʋsgo. Rẽ n so t’a Zeezi ra maand a sẽn tõe fãa n na n sõng “Israyɛll neb nins sẽn wõnd piis sẽn menemã” tɩ b lebg n wa a Zeova nengẽ. (Mat. 15:24; Luk 19:9, 10) Sẽn paase, a Zeezi sẽn yaa d pe-kɩɩm-sõngã, a maanda a sẽn tõe fãa sẽn na yɩl tɩ sẽn tũud-b a Zeova wã ned baa a yembr ra menem ye.—Karm-y Zã 6:39.

16-17. Sõng sẽn lak-b n bas tigingã tɩ b lebg n wa wã wɛɛngẽ, kãsem-dãmbã tagsg segd n yɩɩ wãna? (Ges-y zĩ-gũbrã: “ Sẽn pa le tũud-b a Zeova wã tagsg sẽn tõe n yɩ to-to.”)

¹⁶ Tʋm-tʋmd a Poll ra sagla Efɛɛz tigingã kãsem-dãmbã, tɩ b rɩk a Zeezi togs-n-taare. Ad a sẽn yeel-bã: “Mam wilga yãmb bũmb fãa pʋgẽ tɩ y tog n wɩsga y mens n tʋm woto n tõog n sõng sẽn ka-b pãngã, la tɩ y segd n tẽegda Zu-soab a Zeezi goama. Bãmb mengã yeelame yaa: ‘Kũun wata ne sũ-noog n yɩɩd reegre.’” (Tʋʋ. 20:17, 35) Vɛrse-kãngã wilgda vẽeneg tɩ Wẽnnaam nebã yell gesgã yaa tʋʋmd sẽn zao kãsem-dãmbã n tɩ yɩɩda. A Salvadoor yaa Ɛspayn tiging a ye kãsem-soaba. A yeelame: “M sã n tags n ges piis nins sẽn menemã yell sẽn pak a Zeova to-to wã, kɩtame tɩ m dat n maan m sẽn tõe fãa n sõng-ba. M kɩsa sɩd t’a Zeova ratame tɩ m sõng nin-kãensã.”

¹⁷ Neb nins yell d sẽn gom sõs-kãnga pʋgẽ, n wilg tɩ b ra lak n basa a Zeova nin-buiidã paama sõngre, n lebg n wa a nengẽ. Sẽn be-b yel-kãnga pʋgẽ rũndã-rũndã wã fãa la bal me ratame n maan woto. Sõsg ning sẽn pʋgdã pʋgẽ, d na n maneg n goma d sẽn tõe n maan to-to, n sõng-b tɩ b lebg n wa a Zeova nengẽ.