ARTÍCULO ÑA̱ KAʼVIYÓ 25
“Yi̱ʼi̱ nandukúi̱ ndikachi sa̱na̱i̱”
“Yi̱ʼi̱ nandukúi̱ ndikachi sa̱na̱i̱ ta kundai̱rí” (EZEQ. 34:11).
YAA 105 “Ndióxi̱ ma̱níra miíyó”
ÑA̱ KA̱ʼA̱NYÓ XA̱ʼA̱ *
1. ¿Nda̱chun chi̱táʼan Jehová miíra xíʼin iin ñaʼá ñá íyo se̱ʼe?
TÁ TIEMPO ña̱ ni̱xi̱yo ta̱ profeta Isaías, Jehová ni̱ka̱ʼa̱nra ña̱yóʼo xíʼin na̱ ñuura: “¿Á kivi nandósó iin ñá ñaʼá xa̱ʼa̱ se̱ʼe loʼoñá [...]? Ni ná nandósó ná ñaʼá yóʼo xa̱ʼa̱ se̱ʼená, soo yi̱ʼi̱ va̱ása nandósó-inii̱ xa̱ʼún” (Is. 49:15). Va̱ása ku̱a̱ʼá yichi̱ chítáʼan Jehová miíra xíʼin iin ñaʼá ñá íyo se̱ʼe, soo ke̱ʼévaraña. Xi̱niñúʼura ña̱ va̱ʼaní kítáʼan iin ñá ñaʼá xíʼin se̱ʼe loʼoñá, ña̱ va̱ʼa ka̱ʼa̱nra xa̱ʼa̱ ña̱ kúʼvi̱ní-inira xínira na̱ káchíñu nu̱úra. Ku̱a̱ʼání ná ñaʼá ná íyo se̱ʼe ndóʼoná nda̱a̱ táki̱ʼva ni̱ka̱ʼa̱n iin ñá hermana ñá naní Jasmín: “Tá sáchichíún se̱ʼe loʼún, va̱ʼaníka xáún kítaʼún xíʼin se̱ʼún ta ña̱yóʼo ndiʼi tiempo íyoña”.
2. ¿Ndáaña ndóʼo Jehová tá kúxíka iin se̱ʼera nu̱úra?
2 Jehová kíʼinra kuenta tá sándakoo iin se̱ʼera ña̱ ku̱ʼu̱nna natúʼunna xa̱ʼa̱ra á ña̱ ku̱ʼu̱nna reunión. Tá saá, ¿á ndákanixi̱níyó ña̱ kúsuchíní-ini Jehová, tá xítora ña̱ ku̱a̱ʼání na̱ káchíñu nu̱úra sándakoona ña̱ keʼéna ña̱yóʼo ndiʼi ku̱i̱ya̱? *
3. ¿Ndáaña kúni̱ Jehová?
3 Ku̱a̱ʼání na̱ hermano yóʼo ndándikóna ti̱xin congregación ta kúsi̱íní-iniyó ndákiʼinyóna. Jehová kúni̱níra ña̱ ná ndikóna nu̱úra, ta saátu miíyó kúni̱yó ná ndikóna (1 Ped. 2:25). ¿Ndáa ki̱ʼva kivi chindeétáʼanyó xíʼinna? Tá kúma̱níka ndakuiinyó ña̱ pregunta yóʼo, siʼnaka ná kunda̱a̱-iniyó nda̱chun sándakoo savana ña̱ ku̱ʼu̱nna reunión ta saátu ña̱ ku̱ʼu̱nna natúʼunna xa̱ʼa̱ Ndióxi̱.
¿NDA̱CHUN KÚXÍKA SAVA NA̱ HERMANO NU̱Ú JEHOVÁ?
4. ¿Ndáaña ndóʼo savana xíʼin chiñu ña̱ kúúmiína?
4 Savana ndíʼi̱níka-inina xa̱ʼa̱ chiñuna. Iin ta̱ hermano ta̱ naní Hung, * ta̱ íyo chí Asia, káchira: “Ku̱a̱ʼání tiempo xi̱kachíñui̱. Chi xi̱ndakanixi̱níi̱ ña̱ tá ku̱a̱ʼáka xu̱ʼún ná kuumiíi̱, va̱ʼaka kachíñui̱ nu̱ú Jehová. Ña̱kán ku̱a̱ʼáka hora ki̱xáʼíi̱ káchíñui̱, ta va̱ása níxixa̱ʼa̱n ni̱ʼikai̱ reunión. Tasaá, ku̱xíka va̱ʼi̱ nu̱ú na̱ congregación. Ñuyǐví yóʼo nda̱a̱ táki̱ʼva íyo ña̱ na̱kuva̱ʼa ña̱ sakúxíkaña na̱ yiví nu̱ú Ndióxi̱ saá íyoña”.
5. ¿Ndáaña ndo̱ʼo iin ñá hermana xa̱ʼa̱ ña̱ ni̱xi̱yoní tu̱ndóʼo nu̱úñá?
5 Ta inkaka na̱ hermano xíniñúʼu kundeé-inina ya̱ʼana nu̱ú tu̱ndóʼo ña̱ sándi̱ʼi̱ní-inina. Ná kotoyó ña̱ ndo̱ʼo ñá Anne, ñá íyo chí Gran Bretaña, ta íyo u̱ʼu̱n se̱ʼeñá. Ñáyóʼo káchiñá: “Iin ta̱ loʼo se̱ʼi̱ va̱ása va̱ʼa níkakura chi kúúmiíra kue̱ʼe̱. Tá ni̱ya̱ʼa tiempo, iin ñá loʼo se̱ʼi̱ ki̱tañá ti̱xin congregación, ta inka ta̱ loʼo se̱ʼi̱ ni̱ka̱ʼa̱nna ña̱ ndíka̱a̱ iin kue̱ʼe̱ xi̱níra. Xa̱ʼa̱ ña̱yóʼo, nda̱kavaní-inii̱ ta sa̱ndákoi̱ ña̱ ku̱ʼi̱n reunión ta saátu ña̱ ku̱ʼi̱n natúʼi̱n xa̱ʼa̱ Ndióxi̱”. Kúsuchíní-iniyó tá xítoyó ña̱ yáʼa na̱ hermano nu̱ú tu̱ndóʼo táʼan ña̱ yáʼa ñá Anne xíʼin na̱ veʼeñá nu̱ú.
6. ¿Ndáaña kivi kundoʼoyó tá va̱ása ndíku̱nyó consejo ña̱ va̱xi nu̱ú Colosenses 3:13?
6 (Kaʼvi Colosenses 3:13). * Sava na̱ káchíñu nu̱ú Jehová túvina ña̱ sa̱xóʼvi̱ iin na̱ hermano inina. Ta̱ apóstol Pablo ni̱ka̱ʼa̱nra ña̱ sava yichi̱ koo iin xa̱ʼa̱ ña̱ sa̱a̱yó xíʼin inkana. Ta sana nda̱a̱ ke̱ʼéna iin ña̱ va̱ása va̱ʼa xíʼinyó. Soo tá va̱ása kíʼinyó kuenta xíʼin ña̱yóʼo, kivi ndakundeéyó sa̱a̱yó xíʼinna ta loʼo tá loʼo kuxíkayó nu̱ú na̱ ñuu Jehová. Ná kotoyó ña̱ ndo̱ʼo iin ta̱ hermano ta̱ naní Pablo ta̱ íyo chí Sudamérica. Ni̱ka̱ʼa̱nna ña̱ ke̱ʼéra iin ña̱ va̱ása va̱ʼa soo iin ña̱ vatá xi̱kuuña, ta xa̱ʼa̱ ña̱yóʼo ki̱ndaana chiñu ña̱ xi̱kuumiíra ti̱xin congregación. ¿Ndáaña ndo̱ʼora? Ta̱yóʼo káchira: “Ni̱sa̱a̱níi̱, tasaá ku̱xíkai̱ nu̱ú na̱ congregación”.
7. ¿Ndáaña kivi kundoʼoyó tá ná ndakanikaxi̱níyó xa̱ʼa̱ ku̱a̱chi ña̱ ni̱ki̱ʼviyó?
7 Saátu sava na̱ ni̱ki̱ʼvi iin ku̱a̱chi ndeé tá ya̱chi̱, túvina ña̱ kúúmiíkana ku̱a̱chi ta ndákanixi̱nína ña̱ va̱ása xíniñúʼu kuʼvi̱-ini Ndióxi̱ kunirana. Ni xa̱a̱ nda̱ndikó-inina ta i̱xakáʼnu-ini Ndióxi̱ xa̱ʼa̱na, túvina ña̱ va̱ása xíniñúʼu kookana táʼan na̱ ñuura. Táʼan ña̱yóʼo kúú ña̱ ndo̱ʼo iin ta̱ hermano ta̱ naní Francisco, ta̱yóʼo káchira: “Ta̱xina iin consejo ña̱ ndeéní ndaʼíi̱ xa̱ʼa̱ ña̱ ke̱ʼíi̱ ña̱ kini. Ni xi̱xa̱ʼa̱nkavai̱ reunión, soo xi̱ndakavaní-inii̱ ta xi̱ndakanixi̱níi̱ ña̱ va̱ása xíniñúʼuka kundika̱i̱ ti̱xin ñuu Jehová. Ña̱ xínitúni̱i̱ xi̱sandíʼi̱níña-inii̱, ta xi̱ndakanixi̱níi̱ ña̱ va̱ása ní ixakáʼnu-ini Jehová xa̱ʼíi̱. Tá ni̱ya̱ʼa tiempo, sa̱ndákoi̱ ña̱ ku̱ʼi̱n natúʼi̱n xa̱ʼa̱ Ndióxi̱ ta saátu ña̱ ku̱ʼi̱n reunión”. ¿Ndáaña ndákanixi̱níyó xa̱ʼa̱ na̱ hermano na̱ yáʼa nu̱ú táʼan ña̱yóʼo? ¿Á kúndáʼvi-iniyó xíniyóna ta kúnda̱a̱-iniyó xíʼin ña̱ ndóʼona? Ta, ¿ndáaña ndákanixi̱ní Ndióxi̱ xa̱ʼa̱ na̱yóʼo?
KÚʼVI̱NÍ-INI JEHOVÁ XÍNIRA NDIKACHI SA̱NA̱RA
Na̱ pastor ña̱ ñuu Israel xi̱ndi̱ʼi̱ní-inina xa̱ʼa̱ ndikachi sa̱na̱na tá xi̱ndañúʼurí. (Koto párrafo 8 xíʼin 9). *
8. ¿Nda̱chun va̱ʼa kúnda̱a̱-iniyó ña̱ va̱ása nándósó Jehová xa̱ʼa̱ na̱ ka̱chíñu nu̱úra?
8 Va̱ása nándósó-ini Jehová xa̱ʼa̱ na̱ ku̱xíka nu̱ú na̱ ñuura, ta ni va̱ása nándósóra xa̱ʼa̱ chiñu ña̱ ke̱ʼéna nu̱úra (Heb. 6:10). Ta̱ profeta Isaías xi̱niñúʼura iin ejemplo, ña̱ va̱ʼa ka̱ʼa̱nra xa̱ʼa̱ ki̱ʼva ña̱ ndáa Jehová na̱ ñuura ta kúʼvi̱-inira xínirana. Ka̱ʼyíra ña̱yóʼo: “Kundaara ndikachi sa̱na̱ra nda̱a̱ táki̱ʼva kéʼé iin pastor. Ta xíʼin ndaʼa̱ra ndakiʼinrarí, ta numindaararí ku̱ʼu̱n xíʼinra” (Is. 40:11). ¿Ndáaña ndóʼo Jehová tá kúxíka iin ndikachi sa̱na̱ra nu̱ú inkakarí? Xíʼin ña̱ ni̱nda̱ka̱tu̱ʼun ta̱ Jesús na̱ discípulora ni̱na̱ʼa̱ra ndáaña ndóʼo Jehová, ka̱chira: “¿Ndáaña ndákanixi̱níndó? Tá iin ta̱a kúúmiíra 100 ndikachi ta iin tíyóʼo nda̱ñúʼurí, ¿á va̱ása túvindó ña̱ sandákoora tí 99 chí yuku̱ ta ku̱ʼu̱nra nandukúra tí nda̱ñúʼu? Ta, tá nda̱ni̱ʼírarí, mií ña̱ nda̱a̱ káʼi̱n xíʼinndó ña̱ kusi̱íníka-inira xa̱ʼa̱ tíyóʼo, nu̱ú tí 99 tí va̱ása níndañúʼu” (Mat. 18:12, 13).
9. ¿Ndáa ki̱ʼva ndáa iin ta̱ va̱ʼaní kúú pastor ndikachi sa̱na̱ra? (Koto na̱ʼná ña̱ va̱xi chí sa̱tá tutu yóʼo).
9 ¿Nda̱chun chítáʼanyó Jehová xíʼin iin ta̱ pastor? Saáchi iin ta̱ va̱ʼaní kúú pastor kúʼvi̱-inira xínira ndikachi sa̱na̱ra. Tá kúú, ta̱ David xa̱ʼníra iin león ta saátu iin oso ña̱ va̱ʼa kundaara ndikachi sa̱na̱ra (1 Sam. 17:34, 35). Iin ta̱ va̱ʼaní kúú pastor, kiʼinra kuenta tá nda̱ñúʼu iin ndikachi sa̱na̱ra (Juan 10:3, 14). Sandákoora tí 99 ini corral á ka̱ʼa̱nra xíʼin inka ta̱ pastor ña̱ ná kundaararí, nani xíkara nándukúra tí nda̱ñúʼu. Ta̱ Jesús xi̱niñúʼura ejemplo yóʼo, ña̱ sa̱náʼa̱ra miíyó iin ña̱ ndáyáʼviní xa̱ʼa̱ yivára, ka̱chira: “Va̱ása kúni̱ra ña̱ ná ndañúʼu nda̱a̱ ni iin na̱yóʼo” (Mat. 18:14).
Iin ta̱ pastor ña̱ ñuu Israel ta̱ ni̱xi̱yo tá tiempo xi̱naʼá ndáara ndikachi sa̱na̱ra tí nda̱ñúʼu. (Koto párrafo 9).
JEHOVÁ NÁNDUKÚRA NDIKACHI SA̱NA̱RA
10. Nda̱a̱ táki̱ʼva káchi Ezequiel 34:11-16, ¿ndáaña ni̱ka̱ʼa̱n Jehová keʼéra xa̱ʼa̱ ndikachi sa̱na̱ra tí nda̱ñúʼu?
10 Jehová kúʼvi̱ní-inira xínira iin tá iinyó, ta saátu nda̱a̱ na̱ ku̱xíka nu̱ú na̱ ñuura. Ta̱ profeta Ezequiel ni̱ka̱ʼa̱nra, ña̱ mií Ndióxi̱ nandukúra na̱ ku̱xíka nu̱ú na̱ ñuura, ta chindeétáʼanra xíʼinna ña̱ ndakutáʼan viína xíʼinra. Ta ni̱ka̱ʼa̱nra xa̱ʼa̱ ña̱ keʼéra ña̱ va̱ʼa sakǎkura na̱yóʼo. Ta táʼan ña̱yóʼo kúú ña̱ xi̱keʼé na̱ pastor ña̱ ñuu Israel tá xi̱ndañúʼu iin ndikachi sa̱na̱na (kaʼvi Ezequiel 34:11-16). * Siʼna ku̱ʼu̱n ta̱ pastor nandukúra ndikachi sa̱na̱ra tí nda̱ñúʼu, ta sana kuniñúʼura ku̱a̱ʼá tiempo xíʼin ndee̱ra. Ta, tá xa̱a̱ nda̱ni̱ʼírarí kuniʼirarí ku̱ʼu̱n xíʼinra chí nu̱ú ñúʼu tí inkaka. Ta saátu, tá tu̱kue̱ʼe̱ tí ndikachi yóʼo á kúni̱ kuxurí, viíní chíndeétáʼanra xíʼinrí ta súkúndáara iin ti̱ko̱to̱ nu̱ú tu̱kue̱ʼe̱rí, númindaararí ku̱a̱ʼa̱n xíʼinra ta táxira ña̱ kuxurí. Na̱ anciano nda̱a̱ táki̱ʼva íyo iin pastor saá íyona, ta ndáana ndikachi sa̱na̱ Ndióxi̱, ña̱kán xíniñúʼu keʼéna táʼan ña̱yóʼo tá chíndeétáʼanna xíʼin iin na̱ ku̱xíka nu̱ú na̱ congregación (1 Ped. 5:2, 3). Na̱ anciano nándukúna na̱yóʼo, ta chíndeétáʼanna xíʼinna ña̱ ndandikóna ti̱xin congregación, ta saátu náʼa̱na ña̱ kúʼvi̱-inina xíninana tá chíndeétáʼanna xíʼinna ña̱ ndakutáʼan viína xíʼin Ndióxi̱. *
11. ¿Ndáaña xi̱kunda̱a̱-ini iin ta̱ va̱ʼaní xi̱kuu pastor?
11 Iin ta̱ va̱ʼaní xi̱kuu pastor xi̱kunda̱a̱-inira ña̱ kivi ndañúʼu ndikachi sa̱na̱ra. Ña̱kán tá xi̱ndañúʼu iinrí, va̱ása ní ixandi̱va̱ʼara xíʼinrí. Ná kotoyó ña̱ ke̱ʼé Jehová, tá ni̱xi̱yo iin tiempo ña̱ va̱ása níkeʼé sava na̱ xi̱kachíñu nu̱úra ña̱ xi̱kuni̱ra.
12. ¿Ndáa ki̱ʼva ke̱ʼé Jehová xíʼin ta̱ Jonás?
12 Ta̱ profeta Jonás xi̱nura chi va̱ása níkuni̱ra keʼéra ña̱ ni̱ka̱ʼa̱n Jehová xíʼinra. Soo Jehová kǒo níndakanixi̱níra ña̱ va̱ása kivika keʼé ta̱ Jonás ña̱ chiñu yóʼo. Nda̱a̱ táki̱ʼva kéʼé iin na̱ va̱ʼaní kúú pastor, saá ke̱ʼé Jehová chi sa̱kǎkura ta̱ Jonás ta ta̱xira ndee̱ ndaʼa̱ra ña̱ va̱ʼa saxínura ña̱ chiñu yóʼo (Jon. 2:7; 3:1, 2). Tá ndi̱ʼi, xi̱niñúʼura iin yiki̱n ña̱ va̱ʼa sanáʼa̱ra ta̱ Jonás ña̱ ndáyáʼviní ña̱ táku iin tá iin na̱ yiví (Jon. 4:10, 11). ¿Ndáaña sákuaʼayó xíʼin ña̱yóʼo? Ña̱ kǒo xíniñúʼu ndakanixi̱ní na̱ anciano ña̱ va̱ása kivika ndikó na̱ ku̱xíka, nu̱ú Jehová. Chi ña̱ xíniñúʼu keʼéna kúú ña̱ chika̱a̱na ndee̱ ña̱ kunda̱a̱-inina nda̱chun ku̱xíkana nu̱ú na̱ congregación. Ta, tá ná ndandikó na̱yóʼo nu̱ú Jehová, na̱ anciano xíniñúʼu ndakundeéna na̱ʼa̱na ña̱ kúʼvi̱-inina xíninana ta ndíʼi̱-inina xa̱ʼa̱na.
13. ¿Ndáaña sákuaʼayó xíʼin ña̱ ke̱ʼé Jehová tá ku̱nda̱a̱-inira xa̱ʼa̱ ña̱ ni̱ka̱ʼa̱n ta̱ ka̱ʼyí ña̱ Salmo 73?
13 Ta̱ ka̱ʼyí ña̱ Salmo 73 nda̱kavaní-inira tá xi̱nira ña̱ va̱ʼaníka táku na̱ kéʼé ña̱ va̱ása va̱ʼa. Ni̱xa̱a̱ra nda̱kanixi̱níra ña̱ kǒo ña̱ va̱ʼa ndakiʼinra xa̱ʼa̱ ña̱ kéʼéra ña̱ kúni̱ Ndióxi̱ (Sal. 73:12, 13, 16). ¿Ndáaña ke̱ʼé Jehová? Va̱ása nísa̱a̱ra xíʼinra. Chi ta̱xira ña̱ ná ka̱ʼyi̱ ña̱ ni̱ka̱ʼa̱nra nu̱ú Biblia. Tá ni̱ya̱ʼa tiempo, ta̱ salmista yóʼo ku̱nda̱a̱-inira ña̱ va̱ʼaníka kúú ña̱ koora migo Jehová (Sal. 73:23, 24, 26, 28). ¿Ndáaña sákuaʼayó xíʼin ña̱yóʼo? Ña̱ va̱ása xíniñúʼu sa̱a̱ kama na̱ anciano xíʼin na̱ xíka-ini á ndáyáʼvi ña̱ kachíñuna nu̱ú Jehová. Nu̱úka ña̱ keʼé na̱ anciano ña̱yóʼo, xíniñúʼu chika̱a̱na ndee̱ ña̱ kunda̱a̱-inina nda̱chun káʼa̱nna á kéʼéna sava ña̱ʼa. Ta saá kúú ña̱ kivi kuniñúʼuna Biblia ña̱ chika̱a̱na ndee̱ xíʼinna.
14. ¿Nda̱chun xi̱niñúʼu chindeétáʼanna xíʼin ta̱ Elías, ta ndáa ki̱ʼva chi̱ndeétáʼan Jehová xíʼinra?
14 Ta̱ profeta Elías xi̱nura nu̱ú ñá reina Jezabel (1 Rey. 19:1-3). Nda̱kanixi̱níra ña̱ kǒoka na̱ profeta Jehová íyo, ta saátu ña̱ va̱ása ndáyáʼvika chiñu ña̱ kéʼéra. Nda̱kavaní-inira ta nda̱a̱ xi̱kuni̱ra kuvira (1 Rey. 19:4, 10). Soo va̱ása nísa̱a̱ Jehová xíʼin ta̱ Elías. Chi ni̱ka̱ʼa̱nra xíʼinra ña̱ va̱ása íyo iinlá miíra, ta kivi kandíxara ña̱ chindeétáʼanra xíʼinra ta saátu íyo ku̱a̱ʼáka chiñu ña̱ keʼéra. Viíní xi̱niso̱ʼora tá na̱túʼun ta̱ Elías xíʼinra xa̱ʼa̱ ña̱ sándi̱ʼi̱-inira, ta ta̱xira inkaka chiñu ndaʼa̱ra (1 Rey. 19:11-16, 18). ¿Ndáaña sákuaʼayó xíʼin ña̱yóʼo? Ña̱ ndiʼi miíyó ta saátu na̱ anciano xíniñúʼu viíní keʼéyó xíʼin na̱ káchíñu nu̱ú Jehová. Tá xíʼin ña̱ suchí-ini káʼa̱n iinna á túvina ña̱ va̱ása xíniñúʼu ixakáʼnu-ini Jehová xa̱ʼa̱na, na̱ anciano xíniñúʼu viíní kuniso̱ʼona ña̱ káʼa̱nna. Ta saátu xíniñúʼu ka̱ʼa̱nna xíʼinna ña̱ ndáyáʼvinína nu̱ú Jehová.
¿NDÁA KI̱ʼVA XÍNIÑÚʼU KOTOYÓ NDIKACHI SA̱NA̱ NDIÓXI̱ TÍ NDA̱ÑÚʼU?
15. Nda̱a̱ táki̱ʼva káchi Juan 6:39, ¿ndáa ki̱ʼva xi̱xito ta̱ Jesús ndikachi sa̱na̱ yivára?
15 ¿Ndáa ki̱ʼva kúni̱ Jehová ná kotoyó ndikachi sa̱na̱ra tí nda̱ñúʼu? Va̱ʼaní yichi̱ chi̱núu ta̱ Jesús nu̱úyó. Ta̱yóʼo xi̱kunda̱a̱-inira ña̱ ndiʼi ndikachi ndáyáʼvinírí nu̱ú Ndióxi̱. Xa̱ʼa̱ ña̱yóʼo, chi̱ka̱a̱ra ndee̱ ña̱ chi̱ndeétáʼanra xíʼin na̱ ñuu Israel ña̱ nda̱ndikóna nu̱ú Jehová (Mat. 15:24; Luc. 19:9, 10). Ta̱ Jesús va̱ʼaní pastor kúúra, ña̱kán chi̱ka̱a̱ra ndee̱ ña̱ va̱ása nísandáñúʼura nda̱a̱ ni iin ndikachi sa̱na̱ yivára (kaʼvi Juan 6:39). *
16, 17. ¿Ndáa ki̱ʼva xíniñúʼu koto na̱ anciano chiñu ña̱ kúúmiína ña̱ chindeétáʼanna xíʼin na̱ ku̱xíka nu̱ú Jehová? (Koto recuadro “ ¿Ndáaña ndóʼo na̱ ku̱xíka nu̱ú Jehová?”).
16 Ta̱ apóstol Pablo ni̱ka̱ʼa̱nra xíʼin na̱ anciano ña̱ congregación ña̱ ñuu Éfeso, ña̱ xíniñúʼu kundiku̱nna yichi̱ ta̱ Jesús. Ni̱ka̱ʼa̱nra ña̱yóʼo xíʼinna: “Xíniñúʼu chika̱a̱níndó ndee̱ ña̱ kachíñundó ña̱ va̱ʼa chindeétáʼanndó xíʼin na̱ kǒo ndee̱, ta xíniñúʼu ndakaʼánndó xa̱ʼa̱ ña̱ ni̱ka̱ʼa̱n tátayó Jesús: ‘Tá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóñaʼ” (Hech. 20:17, 35). Nda̱a̱ táki̱ʼva xi̱niyó, na̱ anciano kúúmiína iin chiñu ña̱ ndáyáʼviní. Iin ta̱ anciano ta̱ naní Salvador ta̱ íyo chí España káchira: “Tá ndákanixi̱níi̱ xa̱ʼa̱ ña̱ kúʼvi̱ní-ini Jehová xínira na̱ ku̱xíka nu̱úra, chíka̱a̱ña ndee̱ xíʼi̱n ña̱ chindeétáʼi̱n xíʼinna. Kúnda̱a̱ káxi inii̱ ña̱ kúni̱ní Jehová ña̱ kundai̱na”.
17 Ndiʼi na̱ ku̱xíka nu̱ú Jehová na̱ ni̱ka̱ʼa̱nyó xa̱ʼa̱ nu̱ú artículo yóʼo, chi̱ndeétáʼanna xíʼinna ta nda̱ndikóna nu̱úra. Ta saátu tiempo vitin íyo ku̱a̱ʼáníka na̱ kúni̱ ndandikó nu̱ú Jehová. ¿Ndáa ki̱ʼva kivi chindeétáʼanyó xíʼinna? Nu̱ú ña̱ inka artículo kunda̱a̱ka-iniyó xa̱ʼa̱ña.
YAA 139 ¿Á koún ñuyǐví xa̱á?
^ párr. 5 ¿Nda̱chun kúxíka savana nu̱ú na̱ congregación, ni xa̱a̱ ku̱a̱ʼání ku̱i̱ya̱ káchíñuna nu̱ú Jehová? ¿Ndáaña ndákanixi̱ní Ndióxi̱ xa̱ʼa̱ na̱yóʼo? Nu̱ú ña̱ artículo yóʼo kunda̱a̱-iniyó xa̱ʼa̱ña. Saátu kotoyó ndáa ki̱ʼva chi̱ndeétáʼan Jehová xíʼin sava na̱ ka̱chíñu nu̱úra tá ya̱chi̱, soo ni̱xi̱yo iin tiempo ña̱ va̱ása níkeʼéna ña̱ xi̱kuni̱ra, ta ndáaña sákuaʼayó xíʼin ña̱yóʼo.
^ párr. 2 ÑA̱ KÚNI̱ KACHIÑA: Iin na̱ publicador inactivo, kúú iin na̱ xa̱a̱ yáʼaka i̱ñu̱ yo̱o̱ va̱ása ndátaxika informe ña̱ xáʼa̱nna nátúʼunna xa̱ʼa̱ Ndióxi̱. Soo ni saá, kúúkavana hermanoyó ta kúʼvi̱ní-iniyó xíniyóna.
^ párr. 4 Na̱sama sava ki̱vi̱na.
^ párr. 6 Colosenses 3:13: “Kundeé-inindó xíʼin ña̱ kéʼéna xíʼinndó ta xíʼin ndinuʼu-inindó koo káʼnu-inindó xa̱ʼa̱ táʼanndó tá íyo iin xa̱ʼa̱ kúú ña̱ sáa̱ndó xíʼin inkana. Nda̱a̱ táki̱ʼva ke̱ʼé Jehová ña̱ xíʼin ndinuʼu-inira i̱xakáʼnu-inira xa̱ʼa̱ndó, saá xíniñúʼu koo káʼnu-inindó xa̱ʼa̱ táʼanndó”.
^ párr. 10 Ezequiel 34:11-16: “Saáchi ña̱yóʼo kúú ña̱ káʼa̱n táta káʼnu Jehová: ‘Yóʼo íyoi̱, ta yi̱ʼi̱ nandukúi̱ ndikachi sa̱na̱i̱ ta kundai̱rí. 12 Kundai̱ ndikachi sa̱na̱i̱ nda̱a̱ táki̱ʼva kéʼé ta̱ pastor tá nda̱ni̱ʼíra ndikachi sa̱na̱ra tí nda̱ñúʼu ta táxira ña̱ kaxírí. Ku̱ʼi̱n sakǎkui̱rí lugar nu̱ú nda̱ñúʼurí tá ni̱xi̱yoní vi̱kó. 13 Ndatavái̱rí ñuu xíʼin país nu̱ú xi̱ñuʼurí, ta ku̱ʼi̱n ndakai̱rí chí nu̱ú ñuʼú ña̱ xi̱ndoorí, ta taxii̱ ña̱ kaxírí chí yuku̱ ña̱ ñuu Israel, yatin nu̱ú íyo ti̱kui̱í ta saátu yatin nu̱ú íyo na̱ yiví. 14 Ta nina ku̱ʼu̱ ña̱ va̱ʼa taxii̱ kaxírí, ta chí yuku̱ súkún ña̱ ñuu Israel kúú nu̱ú koo ña̱ kaxírí. Ta kundoorí kán, nu̱ú íyo ku̱ʼu̱ ña̱ va̱ʼaní, ta kaxírí ku̱ʼu̱ ña̱ va̱ʼaní ña̱ íyo chí yuku̱ ña̱ ñuu Israelʼ. 15 ‘Ta yi̱ʼi̱ taxii̱ ña̱ kaxí ndikachi sa̱na̱i̱ ta yi̱ʼi̱ taxii̱ ña̱ ná kundoorí ndakindee̱rí, káchi táta káʼnu Jehová. 16 Ta tí nda̱ñúʼu ku̱ʼi̱n nandukúi̱, ta tí ni̱ta̱ni̱ ku̱ʼi̱n ndakiʼi̱nrí ta sukúndai̱ iin ti̱ko̱to̱ nu̱ú tu̱kue̱ʼe̱rí ta chika̱i̱ ndee̱ xíʼin tí ku̱vitá. Soo sandíʼi-xa̱ʼíi̱ tí nduʼú xíʼin tí ndakú. Ta ndatii̱n ku̱a̱chi xíʼin tíyóʼoʼ”.
^ párr. 10 Nu̱ú ña̱ inka artículo kunda̱a̱-iniyó ndáaña kivi keʼé na̱ anciano ña̱ kundiku̱nna iin tá iin ña̱yóʼo.
^ párr. 15 Juan 6:39: “Ña̱yóʼo kúú ña̱ kúni̱ mií ta̱ chi̱ndaʼá yi̱ʼi̱: ña̱ ná va̱ása sandáñúʼi̱ nda̱a̱ ni iin na̱ nda̱taxira ndaʼíi̱, chi ña̱ xíniñúʼu keʼíi̱ kúú ña̱ sandátakui̱na ki̱vi̱ nu̱ú ndíʼi”.
^ párr. 63 ÑA̱ KÁʼA̱N XA̱ʼA̱ NA̱ʼNÁ: Iin ta̱ pastor ña̱ ñuu Israel ndíʼi̱-inira xa̱ʼa̱ ña̱ nandukúra ndikachi sa̱na̱ra tí nda̱ñúʼu, ta chíndeétáʼanra xíʼinrí ña̱ ndandikórí nu̱ú tí inkaka. Ta ki̱ʼva saá íyo ña̱ kéʼé na̱ anciano tiempo vitin.
^ párr. 67 ÑA̱ KÁʼA̱N XA̱ʼA̱ NA̱ʼNÁ: Tá ndíka̱a̱ iin ñá hermana ñá ku̱xíka nu̱ú Jehová ini iin autobús, xítoñá ña̱ xíʼin ña̱ si̱í-ini nátúʼun u̱vi̱ na̱ hermano nu̱ú íyo ku̱a̱ʼá na̱ yiví.
