1. Ngenyi Jehovha wakajiezanisa na mai vanotaja mwana wavo?

“BZINGAITA here kuti mwanakaji akanganwe mwana wake wo pa mavero?” Uu i muvhunjo wakaita Jehovha mu njiku jo muporofita Isaia. Mwari wakati kuno vandhu vake: “Nokunyati vanakaji vanokanganwa, inini andizokukanganwi.” (Isaia 49:15) Asipi kazinji Jehovha anojiesanisa na mai. Asi, pa vhaza iyi, iyena wakazviita. Jehovha wakaezanisa mazwiro ake kuno vashandiri vake no rudo wakavanga uno mai ku mwana wavo, ngokuti anoda kuti vashandiri vake vazive kuti iyena anovada maningi. Majimai mazinji angatenderana no zvakananga hambzaji Jasmini, pavakati: “Pamunotaja ushoni mwana wenyu, munova no rudo hwakavanga maningi naye, mu upenyu hwenyu hwese.”

2. Jehovha anozwa kudini paanovona mushandiri wake aciguma pa kuva acikacaiti basa?

² Jehovha anovona kudari mushandiri wake akaima kucumaera kana kuima kwenda ku musongano. Ngo kudaro, iyena anosuruvara maningi paanovona zviuru zvo vashandiri vake vaciguma pa kuva vacikacaiti basa * pa gore ngo gore.

3. Jehovha anodenyi?

³ Hama no hambzaji zinji jakamboguma pa kutama kuita basa, pajinohwirira mu ungano tinodakara maningi. Jehovha anoda kuti ivona vahwirire zve itusu tinodavo zvondhozvo. (1 Pedru 2:25) Tingavabeseresa kudini kuti vahwirire? Ticito  tadavira muvhunjo uu, zvaizova zvaushoni kuziva kuti ngenyi vamweni vanoima kuviya ku musongano no kwenda kocumaera.

4. Zvicinyi zvinoitika no vamweni ngo ndava yo basa ravo?

⁴ Vamweni vanosiya kuti basa ravo rive ciro cinosisira maningi mu upenyu hwavo. Hama imweni inodanwa Huni, * inogara kanjikazi ko Azia, yakati: “Ndaipeja nguva yakawanda maningi no simba pa basa rangu. Ndaijicengeja ndega, ndairangarira kuti kudari ndikava no mare yakawanda, ndaizokwanisa ushoni kushandira Jehovha. Ngo kudaro, ndaishanda nguva jakawanda. Ndakatanga kuruza musongano muzinji, ndopejisira ngo kutama kwendazve ku musongano. Sathana anoshandisa nyika kuti iphingaije vandhu kuti vaime kushandira Jehovha padoko ngo padoko.”

5. Hambzaji Ana vakapsaswa kudini ngo zvineso zvovakasongana nazvo?

⁵ Hama no hambzaji jimweni, jino zvineso zvizinji zvinovarembesa. Imwe hambzaji inodanwa Ana, inogara Britishi, ino vana vashanu, yakati: “Mwana wangu wo cipiri wakabahwa no zvineso zvakati kuti. Pa kufamba ko nguva, mwana wangu wokaji wakajingwa zve mwana wangu wokutanga wakava no ndhendha yo mu musoro. Ndakasuruvara maningi zvokuti ndakaima kwenda kumusongano no kucumaera. Ndopejisira ngo kuva umwe acikacaiti basa.” Tinozwira maningi pena hambzaji Ana no mbhuri yavo pomwe no hama jimweni jiri kusongana no zvineso zvakafanana.

6. Ngenyi mundhu angaima kwenda kumusongano kudari akatama kushandisa mazano anowanika pana VaKolosi 3:13?

⁶ Verenganyi VaKolosi 3:13. Vashandiri vamweni va Jehovha vakaguma pa kusuruvara ngo kuti hama kana hambzaji jo mu ungano jakananga zviro zvovacikazivi kudakarira. Mupostori Pauro wakazwisisa kuti nguva jimweni tino thangwe ringatiita kuti tinyangajwe ngo hama no hambzaji jedu. Kangaije tatajwa mu njira icikazivi kurungama. Kudari tikatama kungwarira, tinozoguma pa kuviga bundu. Mundhu paanonga wakanyangajwa, iyena angatosia kusonganira no vandhu va Jehovha. Vonanyi muezaniso wa hama Pablo, vanogara ku Amerika yo Kakusi. Vakanyepehwa no kupumbhwa kuti vakaita ciro cakashata, kuveni vainga vacina ndava. Asi vakuru vakatenda kuti hama Pablo vainga no ndava, ngo iyo ndava vakaruza mabasa ovaiita mu ungano. Waro, vakaitenyi? Ivona vakati: “Ndakasuruvara maningi zve padoko ngo padoko ndakaima kwenda ku musongano.”

7. Zvicinyi zvinoitika no mundhu anojizwa ano ndava?

⁷ Kudari mundhu kareko wakaita cishaishi cikuru, angajizwa ano ndava ko mukuvo wakareba. Iyena angajizwa kuti Mwari aacamudi. Pikija wakhaunya no kuregerehwa, angajizwa kuti aafaneri kuva umwe wo vashandiri va Mwari. Hama imweni inodanwa Fransisko, vakava no mazwiro ondhoo. Ivona vakati: “Ndakapangihwa ngo kuita uhure. Pakutanga, ndaienda kumusongano asi ndakaguma pa kusuruvara maningi, ndojizwa inga kuti andifaneri kuva pondhopo no vashandiri va Jehovha. Ndaijizwa ndino ndava basi zve ndaivona kuti Jehovha aazondiregereri. Pa kufamba ko nguva, ndakazoima kwenda ku musongano no kocumaera.” Munozwa kudini ngo pamusoro po hama no hambzaji jiri kusongana no zvineso zvotapera kubhuya? Munojizwira pena here? Cinosisira maningi pa zvese, Jehovha anozwa kudini ngo pamusoro pavo?

8. Kunanga kuti Jehovha anokanganwa vaya vakambomushandira here? Sananguranyi.

⁸ Jehovha aakanganwi vashandiri vake vaya vakamboima padoko kumushandira. Cimwenizve, aatokanganwi basa rese ravakamuitira. (Vaheberi 6:10) Muporofita Isaia wakashandisa muezaniso wakanaka maningi pa kuda kukhombija matajiro anoita Jehovha vandhu vake. Isaia wakati: “Inga muhavisi, yena anohavisa muxambi wake, ngo mukono wake anokwengweneja bzimabvuta, anobzidira pa mavero ake.” (Isaia 40:11) Muhavisi wedu Mukuru anozwa kudini kudari umwe wo mushandiri wake akaima kumushandira? Jesu wakavonesa mazwiro a Jehovha paakavhunjisa vajiji vake, kudari: “Munorangarira kudini? Mundhu umwe kudari no zana ro mabvuta, rimwe rikapsejeka, aazosii, kani, makumapfumbamwe na mapfumbamwe amweni, wozoenda kopsanga iro rapsejeka? Inini ndinomubvunja kuti akariwana, anodakara ndirona kupinda makumapfumbamwe na mapfumbamwe acikazivi kupsejeka.”​—Mateu 18:12, 13.

9. Muhavisi wakanaka wo mu nguva jo Bhaibheri waitaja kudini mavhuta ake? (Vonanyi pikica yo pakapa.)

⁹ Ngenyi tingaezanisa Jehovha no muhavisi? Ngokuti muhavisi wo mu nguva jo Bhaibheri wainasa kukorondha mavhuta ake. Inga muezaniso, Dhavhidhi wakatakana no mbhondoro no urso kuti angwarire mushambi wake. (1 Samueli 17:34, 35) Muhavisi waushoni anokwanisa kuvona dangani cinyama cimwe ciri kucota. (Johani 10:3, 14) Muhavisi wakadaro, anokwanisa kusiya 99 pa ndau yakangwaririka kana no muhavisi umweni kuti aende koopsaka vhuta rimwe rapsejekaya. Jesu wakashandisa muezaniso uu kuti atijijise cokwadi cinosisira maningi, paakati: “Ndibzona kuda ka Baba wangu vo mugore kokuti citame kupsejeka na cimwe co bzivana ibzi.”​—Mateu 18:14.

10. Mukuzwirana na Ezekieli 34:11-16, Jehovha wakagondesa kuitenyi ku vhuta rakapsejeka?

¹⁰ Jehovha anoda umwe nga umwe wedu, kubatanijavo no “bzivana” zviri ndhambo no mushambi wake. Ecishandisa muporofita Ezekieri, Mwari wakagondesa kuti anozopsaka  vhuta rake rakapsejeka no kuribesera kuti rivezve no ushamwari wakanaka naye. Cimwenizve iyena wakananga zvaaizoita kuti avanunure. Zvaaizoita zvakaezana no zvaizoitwa ngo muhavisi wo Iziraeri, paaivona kuti pano vhuta rapsejeka. (Verenganyi Ezekieli 34:11- 16.) Cokutanga, muhavisi waizopsaka vhuta, basa ro kuti raizopeja simba no nguva. Paaizowana vhuta rakapsejeka, waizorivisa pa mushambi. Paaizoriwana rakakhuvazika kana no njara, waizoritaja ngo rudo ngokuti rakarembejeka, worirapa, worikorondha zve woripa zvokuha. Vakuru, inga vahavisi vo “muxambi wo makapuwa ndi Mwari” munodikana kuita zviro zvakafanana kuti mubesere mundhu wambosiyana kusonganirana no ungano. (1 Pedru 5:2, 3) Vakuru vanovapsaka, vovabesera kuti vahwirire ku ungano no kuvakhombijira rudo ngo kuvabesera kuti vavezve shamwari ja Jehovha. *

11. Muhavisi wakanaka anozwisisenyi?

¹¹ Muhavisi wakanaka anozwisisa kuti vhuta ringapsejeka. Kudari vhuta rikabuda pa mushambi, muhavisi aaripanici. Vonanyi muezaniso wakatigajira Mwari paakabesera vashandiri vake vakasiya kumushandira.

12. Jehovha wakatajisa kudini Jona?

¹² Muporofita Jona, aazivi kuzwira Jehovha zve wakaramba kwenda Ninivhe. Pikija zvakadaro, Jehovha aazivi kumusiya akadaro. Inga muhavisi waushoni Jehovha wakamubesera kuti awanezve simba rokuita basa raakagajwa. (Jona 2:7; 3:1, 2) Pakufamba ko nguva, Mwari wakashandisa muti kuti abesere Jona kuzwisisa kusisira ko upenyu hwo vandhu. (Jona 4:10, 11) Tinojijenyi? Vakuru avadikani kukasika kusiya vese vaya vacikacaiti basa. Kusiapo izvo, vakuru vanoeja kuzwisisa zvaitisa kuti mundhuwo asiye kuviya kumusongano. Vhuta parinohwirira kuna Jehovha, vakuru vanoenderera mberi vecikhombija rudo kwariri.

13. Tinojijenyi ngo matajire akaita Jehovha, mutari wo Nduyo 73?

¹³ Mutari wo Nduyo 73 wakasuruvara maningi paakavona kubudirira ko vandhu  vakashata. Wakatoguma pakunanga kuti kuita kuda ka Mwari akubesi ciro. (Nduyo 73:12, 13, 16) Jehovha wakaitenyi? Iyena aazivi kumupanica. Kunasa kunanga, Mwari wakaita kuti magama ake atahwe mu Bhaibheri. Ngo kukasika, mutari wo nduyo wakazwisisa kuti kuva no ushamwari wakanaka na Jehovha kunosisira maningi kupinda ciricese haco mu upenyu. (Nduyo 73:23, 24, 26, 28) Tinojijenyi? Vakuru avadikani kukasika kutonga vaya vanotanga kukana-kana ngo makomborero anovepo ngo kushandira Jehovha. Kusiyapo kuvapangira, ivona vanodikana kueja kuzwisisa zvinovaitisa kuti vaverekete no kuita zvondhozvo. Kuvha pondhopo vangashandisa Bhaibheri kuitira kuvavangisa.

14. Ngenyi Eria waida besero zve Jehovha wakamubeseresa kudini?

¹⁴ Muporofita Eria wakatiza vahosi Jezabheri. (1 Majimambo 19:1-3) Iyena wairangarira kuti akucaingazve no ari wese waishanda inga muporofita wa Jehovha zve waijizwa inga kuti basa raaita aricainga no cinangwa. Eria wakaguma pa kusuruvara zvokuti waida kufa. (1 Majimambo 19:4, 10) Kusiyapo kupanica Eria, Jehovha wakamugondesa kuti aacainga ega. Izvo zvakamuita kuti athembe simba ra Mwari no kuziva kuti acino basa rakawanda rokuita. Jehovha no kunaka mwoyo, wakanasa kupurukira zvineso zva Eria zve wakamupa basa rimweni. (1 Majimambo 19:11-16, 18) Tinojijenyi? Tese, maningi-ningi vakuru, vanodikana kutaja mavhuta a Jehovha no kunaka mwoyo.  Azvinenyi dangani mundhuwo akananga kuti ndakanyangajwa kana kuti akajizwa kuti Jehovha narini aazomuregereri, vakuru vanozonasa kumupurukira paanonga ecinanga mazwiro ake. Perapo ivona vanozoeja kumugondesa kuti Jehovha anomuda maningi.

15. Mukuzwirana na Johani 6:39, Jesu waivona kudini mavhuta a Babake?

¹⁵ Jehovha anoda kuti itusu tizwe kudini ngo pamusoro po mavhuta akapsejeka? Tingajija ngo muezaniso wa Jesu. Iyena waizviziva kuti mavhuta a Jehovha anosisira kuna Jehovha. Ngo kudaro, Jesu wakaita zvese zvaaikwanisa kuti abesere “mabvuta akapsejeka o nyumba yo vaIsraeli” ahwirire kuna Jehovha. (Mateu 15:24; Luka 19:9, 10) Inga muhavisi waushoni, Jesu wakaita zvese zvaaikwanisa kuti atame kuruza mavhuta a Jehovha.​—Verenganyi Johani 6:39.

16-17. Vakuru vanozwa kudini ngo pamusoro po kubesera vaya vamboima kushandira Jehovha? (Vonanyi bhokiso rinoti: “ Vhuta Rakasvejeka Kangaije Ringajizwa Kudini?”)

¹⁶ Mupostori Pauro wakavangisa vakuru vo ungano yo Efeso kuti vatevejere muezaniso wa Jesu. “Ndakamujijisa kuti mubate basa kudaro, mubese vatami, mecirangarira mazwi a Tenji, wakati: ‘Anodakara anopa, kupinda wiya anopuwa.’” (Maitiro o Vapostori 20:17, 35) Vhesi iyi inokhombija kuti vakuru nyamasi uno vano basa rinosisira maningi ro kutaja mavhuta a Jehovha. Mukuru umweni anodanwa Sarvadhori, wo Espanya, wakati: “Pandinorangarira ngo matajire anoita Jehovha vhuta rakapsejeka, zvinondindundira kuti ndiite zvese zvandinokwanisa kuti ndivabesere. Ndinozviziva kuti Jehovha anoda kuti ndivakorondhe.”

¹⁷ Vese vanangwa mu musoro uu, kuti vakamboima kushandira Jehovha vakabesehwa kuti vahwirire kwaari. Wari, vazinji vakamboimavo vanoda kuita zvakafanana. Musoro unotevera, unozosanangura zviro zvatingaita kuti tibesere vandhu vondhovo kuti vahwirire kuna Jehovha.