1. ¿Tleka okijto Jehová ika yejua yeskia kentla se nantli?

IJKUAK nemiya teotlajtoketl Isaías, Jehová okijli ikalpan: “¿Ueli sen nantli kelkaua ikoneu? [...] Tla sen nantli ueli kelkaua ikoneu, nejua ka, xnimitselkauas” (Is. 49:15). Jehová xmiyekpa kijtoua ika yejua yeskia kentla se nantli, san ika, nikan kema ijkon kijtoua. Jehová okiteneuj kenon se nantli melak kitlasojtla ikoneuj niman ijkon kimititis itekipanojkauan ika yejua noijki ijkon kintlasojtla. Miyekej nantin noijki nomachiliaj ijkon ken se tokniuj akin itoka Jasmín, yejua kijtoua: “Yejon tlasojtlalistli tlen se nantli kimachilia ipampa ikonetsin más ueyiya ijkuak peua kichichitia”.

2. ¿Kenon nomachilia Jehová ijkuak se ikoneuj kitlalkauiya?

² Jehová kita ijkuak se ikoneuj kikajkaua ika tenojnotsa niman ijkuak xok yauj tlanechikoltin. ¿Uelis tiknemiliskej kenon noyolkokoua ijkuak kita ika nochi xiujtin miyekej itekipanojkauan xok tenojnotsaj? *

3. ¿Tlenon kineki Jehová?

³ Miyekej itech yejuin tokniuan oksejpa uajnokuepaj ipan tlanechikojli, niman tejuamej ika toyojlo tikinseliaj. Jehová kineki oksejpa mauajnokuepakan, niman tejuamej noijki (1 Ped. 2:25). ¿Kenon uelis tikinpaleuiskej? Kachtopa, kuajli yeskia tla tikasikamatij tleka sekimej kikajkauaj ika yauej tlanechikoltin niman xok tenojnotsaj.

4. ¿Tlenon uelis inpan nochiuas akin melak tekitij?

⁴ Sekimej peuaj kinemiliaj ika intekiyo melak ueyi kijtosneki xijkon ken itlaj okse, ika yejon, melak tekitij. Se tokniuj akin itoka Hung, * akin chanti Asia kijtoua: “Melak xkuajli ken onikchiuj. Oniknemili ika tla miyek nikpiaya tomin, más kuajli niktekichiuiliskia Jehová. Kuakon, más opeuj nitekiti niman xok más niaya tlanechikoltin. Sakin, xok keman oniaj tlanechikojli. Kuajli nesi ika Satanás kitekitiltia yejuin tlaltikpaktli niman ijkon ika yolik matiktlalkauijtiakan toTajtsin”.

5. ¿Tlenon ipan onochiuj se tokniuj ipampa nochi tlen okixnamik?

⁵ Oksekimej tokniuan melak najmanaj ipampa nochi tlen kixnamiktokej. Matikitakan tlen ipan onochiuj Anne, akin ualeua Gran Bretaña niman kinpiya makuijli ikoneuan. Yejua kijtoua: “Se nokoneuj san kokoxki desde ijkuak ouajtlakat. Sakin, se nochpoch okikixtijkej itech tlanechikojli niman okse nokoneuj okajsik se kokolistli tlen kichiuaya maka kuajli matlanemili. Melak oninajman niman hasta onikajkauj ika nitenojnotsa niman xok oniaj tlanechikoltin”. Melak techyolkokoua tikmatiskej ika miyekej tokniuan ken Anne niman ichanejkauan kixnamikij tlen ouijtika.

6. ¿Tlenon ueliskia panos tla xtiktlakamatij tlen kijtoua Colosenses 3:13?

⁶ (Xpoua Colosenses 3:13, TNM). * Sekimej tokniuan kimachiliaj ika se tokniuj yokinyolkoko. Apóstol Pablo okijto ika kemantika xtikuelitaskej tlen kichiuaj oksekimej tokniuan. Kanaj otexchiuilijkej tlen xkinamiki, san ika, tla xtotlajpiyaj, kanaj san tikualantinemiskej niman kanaj hasta tiktlalkauiskej ikalpan Jehová. Matikitakan tlen ipan onochiuj Pablo, se tokniuj akin chanti Sudamérica. Yakaj okitlajtolchijchiuili tokniuj Pablo niman, ipampa yejon, okikuilijkej se tekitl tlen kipiaya ipan tlanechikojli. ¿Kenon onomachili? Yejua kijtoua: “Melak onikualan niman opeuj niktlalkauiya tlanechikojli”.

7. ¿Tlenon uelis panos tla melak totlajtlakoltiaj?

⁷ Akin yeuejkaui okichiujkej se ueyi tlajtlakojli kanaj ok notlajtlakoltiaj niman hasta kinemiliaj ika toTajtsin xkinamiki makintlasojtla. Maski onoyolkuepkej niman Jehová yokimikneli, kanaj kinemiliaj ika xok kinamiki nemiskej ipan ikalpan. Ijkon nomachiliaya se tokniuj akin itoka Francisco. Yejua kijtoua: “Onexchikaujkanotskej pampa oniauilnen. Maski kachtopa ok niaya tlanechikoltin, sakin melak oninajman niman oniknemili ika xok nechnamikiya ninemis ipan ikalpan Jehová. Melak ninotlajtlakoltiaya niman kuajli nikmatstoya ika Jehová xonechtlapopoluijka. Sakin, onikajkauj ika nitenojnotsa niman xok niaya tlanechikoltin”. ¿Tlenon tiknemiliaj intech tokniuan akin noijki ijkin nomachiliaj? ¿Tikimasikamatij? Niman, tlen más ueyi kijtosneki, ¿tlenon kinemilia Jehová intech yejuin tokniuan?

8. ¿Kenon tikmatstokej ika Jehová xkimilkaua akin yeuejkaui okitekichiuilijkaj?

⁸ Jehová xkimilkaua akin yokitlalkauijkej ikalpan, yejua kilnamiki kenon chikauak okitekichiuilijkej yeuejkaui (Heb. 6:10). Matikitakan tlenon okiteneuj teotlajtoketl Isaías niman ijkon kiteititis kenon Jehová kitlajpiya ikalpan, yejua okijto: “Yejua uajlau ken sen tlajpixki yejuan kincuidaroua iborregos,  yejuan kiminnapaloua iborreguitos niman kinuika ipan iyelpan” (Is. 40:11). ¿Kenon nomachilia Jehová, toUeyitlajpixkauj, ijkuak se iborreguito kintlalkauiya okseki borreguitos? Jesús okiteasikamachilti yejuin ijkuak okintlajtolti inomachtijkauan: “¿Ken nenkinemiliaj? ¿Tlinon kichiua sen tlakatl yejuan kipiya se ciento iborreguitos ijkuak se kipoloua? Yejua tej, kajteua on noventa y nueve ne ipan tepetl niman yau kontejtemoua on yejuan okipoloj. Niman tla yejua kinextia, ika tlen melauak nemechijlia ika yejua más sanoyej paki iuan on sentetl borreguito yejuan okipolojka xken inuan on noventa y nueve yejuan xokimpoloj” (Mat. 18:12, 13).

9. ¿Kenon se tlajpixketl kintlajpiya iborreguitos? (Xkita tlaixkopinajli tlen onka ixpan yejuin revista).

⁹ ¿Tleka kinamiki manoijto ika Jehová ken se tlajpixketl? Pampa se kuajli tlajpixketl nochipa kineki kuajli manemikan iborreguitos. San matikonnemilikan tlen okichiuj David, yejua okixnamik se león niman se oso pampa kinekiya kintlajpiyas iborreguitos (1 Sam. 17:34, 35). Se kuajli tlajpixketl kita ijkuak poliui se iborreguito (Juan 10:3, 14, 15). Ijkuak ijkon panoua, yejua komintsakua on 99 borreguitos ipan corral noso kitlajtlanilia okse tlajpixketl makintlajpiya chika yejua kontejtemoua iborreguito akin yopoliuj. Jesús okitekitilti yejuin neskayotl niman ijkon techititis tlenon xkineki Jehová, yejua okijto: “NemoTajtsin iluikak chanej [...] xkineki para semej yejuamej in konetsitsimej ma poliuikan” (Mat. 18:14).

10. Ken kijtoua Ezequiel 34:11, 12, 15, 16, ¿tlenon yokijto Jehová kichiuas inpampa iborreguitos akin yopoliujkej?

¹⁰ Jehová toseselti techtlasojtla, hasta tokniuan akin yokitlalkauijkej tlanechikojli. Itechkopa teotlajtoketl Ezequiel, toTajtsin okijto ika kintejtemoskia iborreguitos akin yopoliujkej niman kinpaleuiskia oksejpa kuajli makipiyakan intlaneltokil. Noijki okijto tlenon kichiuaskia niman ijkon kinpaleuis. Yejua kichiuaskia ken se tlajpixketl israelita akin kipolouaya iborreguito (xpoua Ezequiel  34:11, 12, 15, 16, TNM). * Se tlajpixketl israelita kachtopa kitejtemouaya iborreguito maski kanaj uejkauiskia niman nonekiskia melak nokojtilis. Sakin, ijkuak yokinexti, kuikaya kampa nemiyaj okseki iborreguitos. Niman tla yejon borreguito tlakokojlo katka noso apismikiya, kipaleuiaya ika tlasojtlalistli, kisalouiliaya ika se tlakentli kampa onokoko, kinapalouaya niman kitlakualtiaya. Tlayekankej, akin kintlajpiyaj iborreguitos toTajtsin, noneki kichiuaskej yejuin ijkuak kinpaleuiskej akin yokitlalkauijkej tlanechikojli (1 Ped. 5:2, 3). Tlayekankej kintejtemouaj, kinpaleuiyaj manokuepakan ipan tlanechikojli niman kimititiaj ika kintlasojtlaj ijkuak kinpaleuiyaj oksejpa kuajli manouikakan iuan Jehová. *

11. ¿Tlenon kimatstoya se kuajli tlajpixketl?

¹¹ Se kuajli tlajpixketl kimatstoya ika iborreguitos ueliskiaj poliuiskej. Kuakon, tla ijkon panouaya, xkinchiuiliaya tlen xkuajli. Matikitakan tlenon okichiuj Jehová ijkuak sekimej itekipanojkauan xnochipa okitlakamatkej.

12. ¿Tlenon okichiuj Jehová ijkuak Jonás xokichiuj tlen okinauatijka?

¹² Teotlajtoketl Jonás oksekan ika oyaj pampa xkinekiya kichiuas tlen Jehová okinauatijka, san ika, Jehová xnimantsin okinemili ika Jonás xok ueliskia noyektlalis. Ijkon ken kichiuaskia se kuajli tlajpixketl, Jehová okimakixti niman okimakak kojtilistli tlen kipaleuiskia makichiua itekiyo (Jon. 2:7; 3:1, 2). Sakin, okitekitilti se ayojkijli niman ijkon kititis ika melak ueyi kijtosneki inemilis se tlaltikpakchane (Jon. 4:10, 11). ¿Tlenon tiuelij? Ika tlayekankej xnoneki kinemiliskej ika akin yokitlalkauijkej tlanechikojli xok keman uelis  uajnokuepaskej, yej noneki kasikamatiskej tleka okitlalkauijkej tlanechikojli. Niman ijkuak yejuin tokniuan oksejpa uajnokuepaskej ipan tlanechikojli, tlayekankej noneki ok kimititijtoskej ika kintlasojtlaj niman ika kinekij kinpaleuiskej.

13. ¿Tlenon okichiuj Jehová ijkuak okitak kenon nomachiliaya akin okijkuilo Salmo 73, niman tlenon techmachtia yejuin itech Jehová?

¹³ Akin okijkuilo Salmo 73 onoyolajman ijkuak okitak ika akin xkuajkualtin nesiya ika más kuajli nemiyaj. Hasta okinemili ika xitlaj ika tepaleui tiktlakamatis toTajtsin (Sal. 73:12, 13, 16). ¿Tlenon okichiuj Jehová? Xokinemili tlen xkuajli itech. Hasta okichiuj ika itlajtoluan manoijkuilokan ipan Biblia. Sakin, salmista okasikamat ika timouikas iuan Jehová yejon tlen más ueyi kijtosneki (Sal. 73:23, 24, 26, 28). ¿Tlenon tiuelij itech yejuin? Ika tlayekankej xnoneki nimantsin kinemiliskej tlen xkuajli intech akin kinemiliaj ika xitlaj ika kinpaleuis tla kitekichiuiliaj Jehová, yej noneki kasikamatiskej tleka yejuin tokniuan ijkon kijtouaj niman tleka ijkon tlanemiliaj. San ijkon uelis kinyolchikauaskej ika Biblia.

14. ¿Tleka Elías nonekiya makipaleuikan, niman kenon okipaleui Jehová?

¹⁴ Teotlajtoketl Elías ocholoj pampa Jezabel kinekiya kimiktis (1 Rey. 19:1-3). Okinemili ika xok nemiyaj oksekimej iteotlajtokauan Jehová niman ika tlen kichiujtoya xitlaj ika tepaleuiskia. Melak onajman niman hasta kinekiya mikis (1 Rey. 19:4, 10). Jehová xokinemili tlen xkuajli itech Elías, yej okijli ika xsan iselti nemiya, ika yejua kipaleuiskia niman ika nonekiya kichiuas okseki tlemach. Jehová kuajli okikak  Elías ijkuak okijli tlen kajmanaya, niman okimakak okseki tekitl (1 Rey. 19:11-16, 18). ¿Tlenon tiuelij itech yejuin? Ika tlayekankej melak noneki makinchiuilikan tlen kuajli iborreguitos Jehová, niman ika tejuamej noijki ijkon noneki tikchiuaskej. Tla yakaj kijtoua ika tlauelmiki noso kimachilia ika xkinamiki ika toTajtsin makitlapopolui, tlayekankej kikakiskej chika yejua kimijlia nochi tlen kajmana. Sakin, kiyejyekoskej kasikamachiltiskej ika Jehová melak kitlasojtla.

15. Ken kijtoua Juan 6:39, ¿tlenon kinemiliaya Jesús itech iborreguitos iTajtsin?

¹⁵ ¿Kenon kineki Jehová matikimitakan iborreguitos akin yopoliujkej? Jesús melak kuajli otechititi ika Jehová melak kintlasojtla iborreguitos. Yejua melak onokojtili kinpaleuis israelitas oksejpa mauajnokuepakan itech Jehová (Mat. 15:24; Luc. 19:9, 10). Pampa Jesús se kuajli tlajpixketl, noijki onokojtili xkipolos nion se iborreguito iTajtsin (xpoua Juan 6:39).

 16, 17. ¿Kenon tlayekankej noneki kitaskej intekiyo tlen Jehová yokinmakak? (Xkita recuadro “ ¿Kenon nomachilia se borreguito akin yopoliuj?”).

¹⁶ Apóstol Pablo okimijli tlayekankej akin nemiyaj ipan tlanechikojli Éfeso ika nonekiya kichiuaskej ijkon ken Jesús, okimijli: “Noneki nentekitiskej niman nenkimpaleuiskej on yejuan mayankej. Niman xkelnamikikan on itlajtoltsin toTEKO Jesús ken yejua okijtoj: ‘Más paki yejuan kitemaka xken on yejuan kiselia’” (Hech. 20:17, 35). Kuajli nesi ika tlayekankej kipiyaj se ueyi tekitl. Se tokniuj tlayekanketl akin chanti España niman itoka Salvador, kijtoua: “Ijkuak nikita kenon Jehová melak kintlasojtla iborreguitos akin yopoliujkej, más nikneki nikinpaleuis. Kuajli nikasikamati ika Jehová kineki manikintlajpiya”.

¹⁷ Ipan yejuin tlamachtijli, otikinteneujkej sekimej tokniuan akin yokitlalkauijkaj tlanechikojli, san ika, pampa okinpaleuijkej, aman yejuamej oksejpa nemij ipan ikalpan toTajtsin. Maka matikilkauakan ika ok nemij miyekej tokniuan akin kuelitaskiaj uajnokuepaskej ipan ikalpan Jehová. ¿Kenon uelis tikinpaleuiskej? Yejuin más kuajli tikasikamatiskej ipan okse tlamachtijli.