1. Ke ka baka la’ng Jehofa a ile a ipapetša le mosadi yo a amušago?

MEHLENG ya moporofeta Jesaya, Jehofa o ile a botšiša potšišo ye: “Na mosadi a ka lebala ngwana wa gagwe yo a amušwago”? Jehofa o ile a botša batho ba gagwe gore: “Gaešita le ge basadi ba ba ka lebala, fela nna nka se go lebale.” (Jes. 49:15) Ga se gantši ka Beibeleng Jehofa a ipapetša le mosadi yo a nago le ngwana. Bjale ke ka baka la’ng lekgeng le a ile a dira bjalo? Jehofa o ile a dira bjalo e le go bontšha batho ba gagwe gore o ba rata go swana le ka tsela yeo mosadi yo a nago le ngwana a ratago ngwana wa gagwe. Bomma ba bantši ba ikwa go swana le kgaetšedi Jasmin. O itše: “Ge o dutše o amuša ngwana wa gago, o aga tswalano yeo go se nago yeo e swanago le yona yeo e tlo bago gona bophelo ka moka.”

2. Jehofa o ikwa bjang ge yo mongwe wa bahlanka ba gagwe a tlogela go mo hlankela?

² Jehofa o a tseba ge yo mongwe wa bahlanka ba gagwe a se sa botša ba bangwe ditaba tše dibotse e bile a tlogela go tla dibokeng. Ka gona o kwa bohloko kudu ge bahlanka ba gagwe ba bantšintši ba fola moyeng * ngwaga le ngwaga.

3. Jehofa o nyaka’ng?

³ Bana babo rena le dikgaetšedi ba bantši bao ba kilego ba fola moyeng ba feleletša ba boile ka phuthegong, gomme seo se dira gore re thabe kudu. Jehofa o nyaka gore ba boe ka phuthegong. Le rena re ikwa go swana le yena. (1 Pet. 2:25) Re ka ba thuša bjang gore ba boe ka phuthegong? Pele re ka araba potšišo yeo, re swanetše go thoma pele ka go tseba gore ke ka baka la eng ba  bangwe ba tlogetše go tla dibokeng le go ya tšhemong.

4. Go ile gwa direga’ng ka Bakriste ba bangwe ka baka la mošomo wa boiphedišo?

⁴ Bakriste ba bangwe ba ile ba etiša pele mošomo wa boiphedišo. Ngwanabo rena Hung * yo a dulago Asia o itše: “Ke be ke fetša nako e ntši kudu ke le mošomong. Ke be ke iphora ka gore ge nka dira tšhelete e ntši, ke be ke tlo kgona go hlankela Jehofa gabotse. Go be go nyakega gore ke šome diiri tše dintši gore ke kgone go hwetša tšhelete e ntši. Ke ile ka thoma go lofa diboka gantšintši, mafelelong ka se sa ya dibokeng. Sathane o diriša dilo tša lefase gore batho ba tlogele go hlankela Jehofa ganyenyane-ganyenyane.”

5. Go ile gwa direga’ng ka morago ga gore kgaetšedi yo mongwe a welwe ke mathata a mantši ka go latelana?

⁵ Bana babo rena le dikgaetšedi ba bangwe ba na le mathata a mantši ao a ba fetšago matla. Ka mohlala, nagana ka Anne wa kua Britain yoo a nago le bana ba bahlano. Anne o re: “Yo mongwe wa bana ba ka o belegwe a golofetše kudu. Ge nako e dutše e eya, yo mongwe wa barwedi ba ka o ile a kgaolwa gomme morwa wa ka yo mongwe yena a thoma go ba le bolwetši bja monagano. Ke ile ka fela matla gomme ka se sa ya dibokeng le tšhemong. Mafelelong ke ile ka fola moyeng.” Re kwela Anne le lapa la gagwe bohloko gotee le bohle bao ba nago le mathata a swanago le a bona.

6. Ge motho a ka se diriše keletšo yeo e lego go Bakolose 3:13, seo se ka dira bjang gore a feleletše a tlogetše go hlankela Jehofa?

⁶ Bala Bakolose 3:13. Bahlanka ba bangwe ba Jehofa ba sa kwele bohloko ka ge ba ile ba kgopišwa ke Mokristegotee le bona. Moapostola Paulo le yena o ile a dumela gore ka dinako tše dingwe re ka ba “le lebaka la go ba le pelaelo” ka ngwanabo rena goba kgaetšedi. Goba mohlomongwe re ka ba re ile ra swarwa ka go hloka toka. Ge e ba re sa itlhokomele, seo se ka dira gore re galefe. Ge motho a ka dula a galefile, a ka feleletša a tlogetše go hlankela Jehofa. Nagana ka seo se ilego sa diragalela ngwanabo rena Pablo wa kua Amerika Borwa. Motho yo mongwe o ile a bolela maaka ka Pablo. Ka manyami, bagolo ba ile ba tshepa motho yoo gomme ba tšeela Pablo ditokelo. Pablo o ile a dira’ng? O itše: “Ke ile ka galefa gomme ganyenyane-ganyenyane ka tlogela phuthego.”

7. Go ka direga’ng ge e ba motho a ikwa a le molato kudu?

⁷ Ge e ba motho a kile a dira sebe se segolo, a ka tšea nako e telele a ikwa a le molato, e bile a ka ba a nagana gore Modimo a ka se tsoge a mo ratile gape. Motho yoo a ka ba a itshotše e bile Jehofa a mo lebaletše, eupša yena a ka ikwa eka ga a sa swanelega go ba ka phuthegong. Ngwanabo rena Francisco le yena o ile a ikwa ka tsela yeo. O itše: “Ke ile ka kgalemelwa ka morago ga gore ke dire bootswa. Mathomong ke ile ka kgona go tšwela pele ke eya dibokeng, eupša ge nako e dutše e eya ke ile ka fela matla ka ba ka ikwa ke se sa swanelega go ba ka phuthegong. Ke be ke dula ke ikwa ke le molato e bile ke kg odišegile gore Jehofa ga se a ntebalela. Mafelelong ke ile ka tlogela phuthego.” O ikwa bjang ka bana babo rena le dikgaetšedi bao ba lebeletšanego le mathata ao a swanago le a Bakriste ba re boletšego ka bona go dirapa 4 go ya go 7? Na o ba kwela bohloko? Sa bohlokwa le go feta, Jehofa o ikwa bjang ka bona?

8. Na Jehofa o lebala batho bao ba kilego ba mo hlankela? Hlalosa.

⁸ Jehofa ga a lebale batho bao ba kilego ba mo hlankela bao ga bjale ba fodilego moyeng.  E bile ga a le lebale le modiro woo ba o dirilego go mo hlankela. (Baheb. 6:10) Moporofeta Jesaya o ile a ngwala papišo e kgahlišago yeo e bontšhago kamoo Jehofa a hlokomelago batho ba gagwe. Jesaya o ngwadile gore: “O tla diša mohlape wa gagwe bjalo ka modiši. O tla kgoboketša dikwana ka letsogo la gagwe; o tla di rwala sehubeng sa gagwe.” (Jes. 40:11) Jehofa e lego Modiši yo Mogolo, o ikwa bjang ge e nngwe ya dinku tša gagwe e timela? Jesu o ile a bontšha gore Jehofa o ikwa bjang ka dinku tša gagwe tšeo di timetšego ge a be a botšiša barutiwa ba gagwe gore: “Le nagana’ng? Ge e ba motho yo mongwe a eba le dinku tše lekgolo gomme e tee ya tšona ya timela, na a ka se tlogele tše masomesenyane-senyane dithabeng a ya go nyaka yeo e timetšego? Ge go ka direga gore a e hwetše, ruri ke a le botša, o e thabela kudu go feta tše masomesenyane-senyane tše di sego tša timela.”—Mat. 18:12, 13.

9. Mehleng ya Beibele badiši ba babotse ba be ba swara dinku tša bona bjang? (Bona seswantšho sa letlakala la ka ntle.)

⁹ Ke ka baka la’ng re swantšha Jehofa le modiši? Ka gobane mehleng ya Beibele modiši yo mobotse o be a tloga a hlokomela dinku tša gagwe. Ka mohlala, Dafida o ile a lwa le tau le bere gore a šireletše mohlape wa gagwe. (1 Sam. 17:34, 35) Modiši yo mobotse o kgona go bona le ge nku e tee e se gona mohlapeng. (Joh. 10:3, 14) Modiši yo bjalo a ka tlogela dinku tše 99 ka lešakeng goba le badiši ba bangwe gore a yo nyaka nku e tee yeo e timetšego. Jesu o ile a diriša papišo ya nku yeo e timetšego go re ruta thuto ye e bohlokwa, gore: “Tate yo a lego legodimong ga a rate gore gaešita le yo mongwe wa ba banyenyane ba a lobe.”—Mat. 18:14.

10. Go ya ka Hesekiele 34:11-16, Jehofa o tshepišitše gore o tla dira’ng ge dinku tša gagwe di timetše?

¹⁰ Jehofa o rata yo mongwe le yo mongwe wa rena, go akaretša le “ba banyenyane ba” bao ba tlogetšego go mo hlankela. Jehofa o ile a diriša moporofeta Hesekiele go re tshepiša gore o tla nyaka dinku tša gagwe tšeo di timetšego le go di thuša gore di boele di be le tswalano e botse le yena. O ile a bolela le dilo tšeo  a bego a tla di dira ge nku e be e ka timela, e lego dilo tšeo di bego di dirwa ke modiši wa Moisiraele ge nku e be e timetše. (Bala Hesekiele 34:11-16.) Sa pele, modiši o be a nyaka nku yeo e timetšego, e lego seo se bego se nyaka nako le maiteko. Ge a e hweditše o be a e bušetša mohlapeng. Ge e ba nku yeo e be e gobetše goba e swerwe ke tlala, modiši o be a e thuša ka go e tlema mo e gobetšego, go e kuka le go e fepa. Bagolo bao e lego badiši ba “mohlape wa Modimo,” le bona ba swanetše go dira dilo tšeo go thuša bao ba tlogetšego phuthego. (1 Pet. 5:2, 3) Bagolo ba a ba nyaka, ba ba thuša go boela ka phuthegong e bile ba ba thuša gore ba boele ba be le segwera se sebotse le Jehofa. *

11. Modiši yo mobotse o be a kwešiša’ng?

¹¹ Modiši yo mobotse o be a kwešiša gore go a kgonega gore nku e timele. Ka gona, ge e ba nku e be e ka timela modiši o be a sa e otle. Nagana ka mohlala o mobotse woo Jehofa a re beetšego wona wa kamoo a ilego a thuša ba bangwe ba bahlanka ba gagwe bao ba ilego ba tlogela go mo hlankela ka nakwana.

12. Jehofa o ile a swara Jona bjang?

¹² Moporofeta Jona o ile a tšhaba ge Jehofa a be a mo roma. Na Jehofa o ile a hlapa Jona diatla? Aowa. Bjalo ka modiši yo mobotse, Jehofa o ile a thuša Jona le go mo nea matla a gore a kgone go phetha kabelo yeo a mo neilego yona. (Jona 2:7; 3:1, 2) Ka morago Jehofa o ile a diriša sehlare sa mokhure go thuša Jona go kwešiša gore bophelo bja motho yo mongwe le yo mongwe bo bohlokwa kudu. (Jona 4:10, 11) Re ithuta’ng tabeng ye? Bagolo ga se ba swanela go kitimela go tlogela go thuša motho yo a fodilego moyeng. Eupša ba swanetše go leka go kwešiša gore ke eng seo se dirilego gore motho yo a tlogele phuthego. Ge motho yo a boa ka phuthegong bagolo ba swanetše go tšwela pele ba bontšha gore ba a mo rata le gore ba na le taba le yena.

13. Re ithuta’ng tseleng yeo Jehofa a ilego a arabela ka yona go seo mongwadi wa Psalme 73 a ilego a se bolela?

¹³ Mongwadi wa Psalme 73 o ile a nyama kudu ge a be a bona eka batho ba babe dilo di ba sepelela gabotse bophelong. O ile a thoma  go nagana gore mohlomongwe go hlankela Modimo ke go itshenyetša nako. (Ps. 73:12, 13, 16) Jehofa o ile a arabela bjang go seo Mopsalme yo a se boletšego? Ga se a ka a mo ahlola. Go e na le moo, o ile a laela gore mantšu a mopsalme yoo a ngwalwe ka Beibeleng. Mafelelong mopsalme yoo o ile a lemoga gore ga go na selo se se phalago go ba le tswalano e botse le Jehofa. (Ps. 73:23, 24, 26, 28) Re ithuta’ng tabeng ye? Ge motho a thoma go nagana gore mohlomongwe go hlankela Jehofa ke go itshenyetša nako, bagolo ga se ba swanela go kitimela go mo ahlola. Eupša ba swanetše go leka ka gohle go kwešiša gore ke eng seo se ka bago se dira gore motho yoo a nagane ka tsela yeo. Ge ba dirile bjalo, ke gona moo ba tla kgonago go mo thuša le go mo kgothatša ba diriša Beibele.

14. Ke ka baka la’ng Eliya a be a hloka thušo, gona Jehofa o ile a mo thuša bjang?

¹⁴ Moporofeta Eliya o ile a tšhaba, o be a tšhaba Mohumagadi Isebele. (1 Dikg. 19:1-3) Moporofeta yoo o be a nagana gore ke yena a nnoši e lego moporofeta wa Jehofa le gore mošomo wo a o dirago ga o na mohola. Eliya o ile a nyama kudu moo a bego a duma eka a ka hwa. (1 Dikg. 19:4, 10) Jehofa ga se a ka a ahlola Eliya eupša o ile a mo kgonthišetša gore ga se yena a nnoši a mo hlankelago. Le gona o ile a mmotša gore a mo tshepe le gore go sa dutše go na le mošomo o montši woo a swanetšego go o dira. Jehofa o ile a theetša Eliya gabotse gomme a mo nea dikabelo tše difsa. (1 Dikg. 19:11-16, 18) Re ithuta’ng tabeng ye? Ka moka ga rena, kudukudu bagolo, re swanetše go swara dinku tša Jehofa ka botho. Le ge motho a galefile  e bile a nagana gore Jehofa a ka se tsoge a mo lebaletše, bagolo ba swanetše go mo theetša gabotse ge a dutše a hlalosa maikwelo a gagwe. Le gona ba swanetše go mo kgonthišetša gore Jehofa o a mo rata.

15. Go ya ka Johane 6:39, Jesu o be a ikwa bjang ka dinku tša Tatagwe?

¹⁵ Jehofa o nyaka gore re ikwe bjang ka dinku tša gagwe tšeo di timetšego? Jesu o re beetše mohlala wa gore re swanetše go swara bjang dinku tšeo di timetšego. Jesu o be a tseba gore Jehofa o rata dinku tša gagwe ka moka, ka gona o ile a dira sohle se a se kgonago gore a thuše “dinku tše di timetšego tša ntlo ya Isiraele” gore di boele go Jehofa. (Mat. 15:24; Luka 19:9, 10) Ka ge Jesu e le modiši yo mobotse, o ile a dira sohle seo a se kgonago gore a se ke a lahlegelwa le ke e tee ya dinku tša Tatagwe.—Bala Johane 6:39.

16-17. Bagolo ba swanetše go ikwa bjang ka go thuša bao ba tlogetšego go hlankela Jehofa? (Bona lepokisi leo le rego “ Nku Yeo e Timetšego e ka ba e Ikwa Bjang?”)

¹⁶ Moapostola Paulo o ile a kgothaletša bagolo ba phuthego ya Efeso gore ba ekiše Jesu. O ile a re: “Le swanetše go thuša bao ba fokolago gomme le gopole mantšu a Morena Jesu, ge yena ka noši a be a re: ‘Go na le lethabo le legolo go neeng go feta go amogeleng.’” (Dit. 20:17, 35) Temana ye e bontšha gore bagolo ba na le boikarabelo bjo bogolo bja go hlokomela batho ba Jehofa. Salvador e lego mogolo wa kua Spain o re: “Ge ke nagana kamoo Jehofa a ratago dinku tša gagwe tšeo di timetšego, seo se ntlhohleletša gore ke dire sohle se ke se kgonago gore ke di thuše. Ka ge ke le modiši wa phuthego, ke a tseba gore Jehofa o nyaka gore ke di hlokomele.”

¹⁷ Batho ka moka bao re boletšego ka bona sehlogong se bao ba kilego ba tlogela Jehofa, ba ile ba thušwa gore ba boele go yena. Gona bjale batho ba bantši bao ba tlogetšego Jehofa ba nyaka go boela go yena. Sehlogong se se latelago re tlo kwa gore ke dilo dife tšeo re ka di dirago go ba thuša go boela go Jehofa.