1. Oñgeni Siovaa elifwa na ina yovana?

“OKUTI omukai upondola okulimbwa olukembe lwae?” Siovaa walingile epulo olio mononthiki mbomuuli Isaiya. Apopila ovanthu vae okuti ‘namphila ovakai vapondola okulimbwa ovana vavo, ame himemulimbwa.’ (Isa. 49:15) Siovaa ha apeho ankho ulieleka na ina yovana. Mahi pomuvo opo, welielekele na ina yovana opo alekese okuti uhole unene ovaumbili vae. Ovo ina yovana ovanyingi velitehelele nga Jasmin wapopia okuti: “Tyina ove unyamisa, uhumba unene omona wove monkhalelo ihevilwa okuyapulwa.”

2. Oñgeni Siovaa atala ovana vae vayekapo okuivisa nokuenda komaliongiyo?

² Siovaa utyimona tyina umwe povana vae ayekapo okuivisa nokuenda komaliongiyo. Pahe soka oñgeni elitehelela omanima atyo aeho tyina amona ovaumbili vae ovanyingi vayekapo okuenda movilinga viokuivisa no komaliongiyo! *

3. Oityi Siovaa ahanda?

³ Ovanyingi povakuatate ovo, vakondoka ku Siovaa. Tyina valinga ngotyo, onthue tuvetambula nawa! Siovaa uhanda aveho vayekapo okuivisa nokuenda komaliongiyo, vakondoke kwe. No onthue otyo tuhanda. (1 Pet. 2:25) Mahi oñgeni tupondola okuvekuatesako? Tyina tuhenekumbulule epulo  olio, tutalei omokonda yatyi vamwe vayekelapo okuivisa nokuenda komaliongiyo.

4. Oityi tyihole okumoneka novakuatate vamwe mokonda yovilinga?

⁴ Vamwe, omokonda yokupaka ovilinga pomphangu yo tete. Otyo tyaendele nomukuatate umwe utiwa Hungi * ukala ko Asia. Wati: “Ankho ndyiundapa unene. Ankho ndyisoka okuti inkha ndyikala novipuka ovinyingi, mandyityivili okuumbila vali nawa Siovaa. Katutu-katutu, andyihimbika okulañga komaliongiyo, atee nayeka-ko umwe. Namona okuti ouye wa Satanasi walingwa opo utuyapule katutu-katutu ku Siovaa.”

5. Oñgeni ovitateka viakalesile Anne?

⁵ Ovakuatate vamwe no nomphange, vayekapo Siovaa mokonda yovitateka. Omphange umwe una ovana vetano ukala ko Gra-Bretanha utiwa o Anne, wati: “Umwe povana vange watyitwa otyilema. Omukuavo apolwa mewaneno. Mukuavo avele komutwe. Andyisoyo unene, andyiyekepo okuenda komaliongiyo, nokuivisa.” Otyitateka otyo tya Anne nombunga yae, tyituihama unene. Tupu tuetesila okankhenda aveho vana vekahi nokulambela motyitateka ngotyo.

6. Oityi tyipondola okutumonekela inkha katuendela monondongwa mbukahi mu Ova Kolosu 3:13?

⁶ Tanga Ova Kolosu 3:13. Vamwe valingwa otyipuka tyiveihama novakuatate. Apositolu Paulu wapopia okuti pamwe ovakuatate vetu no nomphange mavetulingi otyipuka tyitunumanesa. Pamwe vapondola umwe okutulinga onya. Pahe inkha katulunguka tupondola okuvepakela onkhongo. Tyina omunthu amapake onkhongo, katutu-katutu upondola okuhondovoka ku Siovaa no kovanthu vae. Otyo tyaendele nomukuatate umwe utiwa Pablo ukala ko Amelika do Sul. Vamwe mewaneno vemutendelenyine okuti walinga onkhali. Ovakulu vewaneno navo avasoko okuti otyili umwe, avemupolo ovilinga vimwe. Oñgeni Pablo akala? Wapopia okuti wanumanene unene, iya katutu-katutu ahimbika okuhondovoka ku Siovaa, no kovakuatate.

7. Oñgeni omunthu wokulivela onombei apondola okukala?

⁷ Pamwe omunthu wokualingile onkhali kohale, upondola okukala nomutima walema, elitehelela okuti katelemo okupandwa na Siovaa. Atee umwe tyina elivela, akuatesuako novakulu vewaneno, upondola okulitehelela okuti katelemo okukala pokati kovaumbili va Huku. Ongotyo omukuatate umwe utiwa o Francisco elitehelele. Wati: “Nakuatele onkhali, andyipolwa ovilinga. Ponthyimbi ankho ndyenda umwe komaliongiyo, mahi andyisoyo mokonda ankho ndyisoka okuti hatelemo okukala pokati kovaumbili va Siovaa. Omutima wange ankho walema vala, ankho hityii inkha Siovaa wandyevela umwe. Katutu-katutu, andyiyekepo okuivisa nokuenda komaliongiyo.” Oñgeni welitehelela konthele yovitateka viovakuatate tuapopia mono palagrafu ombu? Okuti weveetesila-mo okankhenda? Pahe soka, oñgeni Siovaa akala?

8. Okuti Siovaa ulimbwa ovaumbili vae vemuyeka-po? Hangununa.

⁸ Siovaa kalimbwa ovaumbili vae vayekapo okuivisa nokuenda komaliongiyo. Tupu kalimbwa ovipuka vemulingila. (Heb. 6:10) Omuuli Isaiya wapopile onthengele-popia na  ahangunune etyi Siovaa alinga ovanthu vae. Wati: “Ngomunthita, makalisa otyunda tyae. Makaongolola onongi mbae nokuoko kwae, embutyindi ponkhondo.” (Isa. 40:11) Oñgeni Siovaa, Omunthita Omunene, elitehelela tyina imwe ponongi mbae ivomba? Ekumbululo tulivasa muetyi Sesusi apopilile ovalongwa vae okuti: “Oityi onwe musoka? Okuti inkha omunthu umwe una onongi 100, apavombo ike, kasi-po 99 monomphunda, akaovola ike yokuavomba? Iya ndyimupopila okuti, tyina ameivasi, mahambukilwa vali ongi oyo tyipona onongi 99 mbahavombele.” — Mat. 18:12, 13.

9. Oñgeni ovanthita ankho valinga onongi mbavo kohale? (Tala olutalatu lwo kondye.)

⁹ Tyikahi nawa okueleka Siovaa nomunthita. Omokonda yatyi? Omokonda kohale omunthita ankho usuka unene nonongi mbae. Mongeleka, Daviti waipaele onkhulika, nehunyu opo aamene onongi mba tate yae. (1 Sam. 17:34, 35) Atee umwe tyina pamakambe vala ongi ike, omunthita ukahi nawa ankho utyimona. (Suau 10:3, 14) Omunthita ngoo, ankho upondola okusapo onongi 99 motyunda ine okumbuhila mukuavo, opo akaovole vala ina yokuavomba. Sesusi wapopia onthengele-popia oyo opo etulongese otyipuka tyimwe konthele ya Siovaa. Wati: “Tate yange ukahi keulu kahande povatutu ava pavombe nii vala wike.” — Mat. 18:14.

10. Ngetyi tyipopia Ezequiel 34:11-16, oityi Siovaa alaa okukalingila onongi mbae mbavomba?

¹⁰ Siovaa uhole kese umwe povaumbili vae, okukutikinyamo vana vekahi ngonongi mbavomba. Momukanda wa Ezekiele Siovaa wapopia okuti maovola ongi yae yokuavomba, eikuatesako okukala vali noupanga omuwa nae. Wapopia ovipuka vimwe ankho malingi pokuovola ongi yae opo eivase. Ovipuka Siovaa apopia, ovio ankho vilinga omunthita omu Isilayeli tyina amavombesa ongi. (Tanga Ezequiel 34:11-16.) Tete, omunthita  ankho wovola ongi. Otyo ankho tyesukisa omuvo, nononkhono. Vali, tyina ameivasi, ankho uyeeta motyunda ine ohambo. Tatu, inkha ongi yaliwa nondyala ine yeliveta, omunthita ankho wiityinda ponkhondo, akutu povipute, eiyavela etyi ilia. Ovanthita ‘votyunda tya Huku, ovakulu vewaneno, navo otyo vesukisa okulinga tyina vahanda okukuatesako omukuatate wayekapo okuivisa nokuenda komaliongiyo. (1 Pet. 5:2, 3) Tete, vaovola omunthu, atee vemuvasa. Vali, vemukuatesako okukondoka mewaneno. Tatu, vemukuatesako okupameka vali oupanga wae na Siovaa. *

11. Oityi omunthita ukahi nawa ankho ahinangela?

¹¹ Omunthita ukahi nawa ankho utyii okuti ongi ipondola okuvomba. Tyina ameyovola, eivasi, ankho keivete. Tala etyi Siovaa alingile opo akuateseko vamwe povaumbili vae vasoyele kapii moupanga wavo nae.

12. Oñgeni Siovaa alingile Sona?

¹² Siovaa watumine Sona ko Ninive, ngwe ehetavela. No ngotyo, ahapopi okuti Sona kesilivila vali. Siovaa omunthita ukahi nawa. Emuhupisa, emuavela ononkhono opo etyivile okulinga etyi emutuma. (Jonas 2:7; 3:1, 2) Konyima, emukuatesako okunoñgonoka okuti omuenyo ukola, etyi amenesa olunthanga. (Jonas 4:10, 11) Otyo tyitulongesa-tyi? Ovakulu vewaneno kavapondola okusoka okuti vana vayekapo okuivisa nokuenda komaliongiyo kavesilivila vali. Etyi vena okulinga, okuovola okunoñgonoka omokonda yatyi vayekelapo Siovaa, novanthu vae. Pahe tyina ongi yamakondoka ku Siovaa, ovakulu vewaneno vena okutualako okumulekesa okuti vesuka nae.

13. Oityi tupondola okulilongesila konkhalelo Siovaa alingile omuhoneki wo Salmo 73?

¹³ Omunthu wokuahoneka o Salmo 73, wasoyele etyi amona okuti onondingavivi ngoti vena omuenyo ukahi nawa. Ankho wangwangwana,  asoko okuti okuumbila Huku katyisilivila. (Sal. 73:12, 13, 16) Oityi Siovaa alingile? Ehemupopi omapita. Atee umwe, atumu onondaka mbae mbuhonekwe mo Mbimbiliya. Konyima aimbuka okuti petupu vali otyipuka otyiwa tyipona okukala epanga lya Siovaa. (Sal. 73:23, 24, 26, 28) Otyo tyitulongesa-tyi? Ovakulu vewaneno kavapondola okutala omapita omunthu wehimbika okusoka okuti okuumbila Siovaa tyitupu-ale esilivilo nalike. Vena okutala nawa ovipuka alinga nevi apopia, avaovola okunoñgonoka omokonda yatyi alingila ngotyo. Tyina vametyinoñgonoka, pahe vapondola okumutangela ono tesitu mambumukuatesako.

14. Omokonda yatyi Eliya ankho esukisila okukuatesuako, iya oñgeni Siovaa etyilingile?

¹⁴ Omuuli Eliya wakahatekele omukai hamba Sesabele. (1 Reis 19:1-3) Wasokele okuti hamwe povaumbili va Siovaa, oe vala wesalapo aike. Tupu wasokele okuti hamwe ovilinga alingilile Siovaa, ononkhono-puila vala. Asoyo unene, apeleya okunkhia. (1 Reis 19:4, 10) Okuti Siovaa wemutalele omapita? Au. Wemupopilile okuti kesalele vala aike. Emupopila vali okuti memukuatesako, iya nkhele ankho una ovipuka ovinyingi ena okulinga. Siovaa wemutehelele nawa etyi ankho ekahi nokupopia etyi tyikahi momutima wae, emuavela vali ovilinga. (1 Reis 19:11-16, 18) Otyo tyitulongesa-tyi? Tyitulongesa okuti atuho tuna okulinga nawa ongi ya Siovaa yavomba. Mahi haunene ovakulu vewaneno.  Ovakulu vewaneno vena okutehelela nawa tyina apopia onkhalelo elitehelela. Tyilinge upopia okuti una ou anumanena mewaneno, tyilinge upopia okuti usoka okuti Siovaa kamemuevela. Tyina vamemutehelela nawa, pahe vena okumulekesa okuti Siovaa wesuka unene nae.

15. Ngetyi tyipopia Suau 6:39, oñgeni Sesusi ankho atala onongi mba Tate yae?

¹⁵ Oñgeni Siovaa ahanda tutale onongi mbae mbavomba? Tupondola okulilongesila kongeleka ya Sesusi. Ankho utyii okuti Siovaa usuka nonongi mbae ambuho. Otyo alingilile ononkhono mbokukuatesako “ovanthu vekahi ngonongi mbavomba mbelongo liova Isilayeli.” Ankho uhanda vakondoke ku Siovaa. (Mat. 15:24; Luka 19:9, 10) Sesusi tupu ankho kahande okuvombesa ongi naike ya Siovaa, mokonda ankho omunthita omuwa. — Tanga Suau 6:39.

16-17. Oñgeni ovakulu wewaneno vena okutala vana vayekapo okuivisa nokuenda komaliongiyo? (Tala okakasa kati:  “Oñgeni Ongi Yavomba Hamwe Ilitehelela?”)

¹⁶ Apositolu Paulu walundile ovakulu vewaneno lyo Efesu opo vahetekele Sesusi. Wevepopilile okuti: “Muna okukuatesako vana vasoya, nokuhinangela onondaka mba Tatekulu Sesusi, etyi ati: ‘Okuava tyihambukiswa vali tyipona okupewa.’” (Ovil. 20:17, 35) Onondaka ombo mbulekesa okuti ovakulu vewaneno vena otyilinga otyinene. Omukulu umwe wewaneno utiwa o Salvador ukala ko Espanha, wati: “Okuhinangela okuti Siovaa wesuka unene nonongi mbae, tyimpha ondundo yokuvekuatesako. Ndyityii okuti otyo Siovaa ahanda ndyilinge mokonda ndyimunthita.”

¹⁷ Aveho vapopiwa monthele ei okuti vahondovokele ku Siovaa, vakondoka. Pahetyino ñga, ovakuatate ovanyingi vayekapo okuivisa nokuenda komaliongiyo, navo vahanda okukondoka ku Siovaa. Monthele mailandulako, matupopi oñgeni tupondola okuvekuatesako okukondoka.