1. Ahabw’enki Yehova naayegyeragyeranisa na nyina w’omwana orikwontsya?

“OMUKAZI naabaasa kwebwa omwana we ou arikwontsya?” Eki n’ekibuuzo eki Yehova yaabuurize omu biro bya nabi Isaaya. Ruhanga akagarukamu abantu be ati: “Nangwa bo [abakazi] nibabaasa kwebwa, kwonka nyowe tindikwebwa.” (Isa. 49:15) Yehova tarikukira kwegyeragyeranisa na nyina w’omwana. Kwonka aha murundi ogu akakikora. Akakoresa eky’okureeberaho kya rukundo ehami ey’omukazi n’omwana we kworeka oku arikuhamira aha baheereza be. Baanyina abaana baingi nibabaasa kwikirizana n’eki Jasmin arikugamba, naagira ati: “Ku orikuba nooreembesereza omwereere, noogira nawe omukago gw’omutaano ogw’obutwire.”

2. Yehova naayehurira ata omwe aha baana be yaahaba akamurugaho?

² Yehova naamanya n’obu omwe aha baana be arikurekyera aho kukwatanisa n’ekibiina nari obu yaaza kwejumba omu murimo gw’okubuurira. Teekateeka aha ku arikwehurira obukaikuru bw’abaheereza be buri mwaka baatwarwa nk’abatakibuurira *.

3. Yehova naayenda ki?

³ Baingi aha b’eishe-emwe aba abakundwa abatakibuurira bwanyima nibagaruka omu kibiina, kandi buzima nibaakiirwa! Yehova naayenda ngu bagarukye, kandi naitwe nikyo turikwenda. (1 Pet. 2:25) Nitubaasa kubahwera tuta? Tutakagarukiremu  ekibuuzo ekyo, ni kirungi kumanya ahabw’enki abamwe nibarekyera aho kwija omu nteerane n’okwejumba omu kubuurira.

4. Omurimo gw’okwebaisaho gureeteire bamwe kukora ki?

⁴ Abamwe nibaremesibwa emirimo y’okwebaisaho. “Nkaikiriza omurimo gwangye nkutwarira obwire n’amaani maingi,” nikwo ow’eishe-emwe Hung, * kuruga Asia arikugira. “Nkaba omushema kuteekateeka ngu naaba gye omu by’entaatsya, nikiija kumbaasisa kuheereza gye Yehova. Nkaba ninkora eshaaha nyingi. Nkatandika kwosha enteerane emirundi mingi kuhitsya obu naarekyera aho kukwatanisa n’ekibiina. Nooshusha oti ensi etebeekanisiibwe kureetera abantu kuruga ahari Ruhanga mporampora.”

5. Oburemeezi bukurataine bukareetera munyaanyazi-itwe omwe kutwaza ata?

⁵ Abakristaayo abamwe nibarengwa oburemeezi. Anne kuruga Britain aine abaana bataano. “Omwe aha baana bangye akazaarwa aine obumuga bw’emiringo mingi,” Anne nikwo arikushoboorora. “Ku haahingwireho obwire, omwe ahari bahara bangye akabingwa omu kibiina, kandi mutabani wangye yaarwara endwara y’omutwe. Nkagira amaganya maingi naarekyera aho kuza omu nteerane n’omu kubuurira. N’ekyarugiremu, nkarekyera aho kubuurira.” Nitushaasha na Anna n’eka ye na boona abaine oburemeezi bw’omuringo nk’ogwo!

6. Okutagyendera aha Abakolosai 3:13 nikubaasa kureetera kuta omuntu kwetaanisa aha baheereza ba Yehova?

⁶ Shoma Abakolosai 3:13. Bamwe aha baheereza ba Yehova nibagwisibwa kubi Abakristaayo bagyenzi baabo. Entumwa Paulo akeetegyereza ngu obumwe nitubaasa kuba twine ‘eki turikufa’ n’omw’eishe-emwe nari munyaanyazi-itwe. Nitubaasa kuba tutwariziibwe omu muringo gutari gw’oburingaaniza. Twaba tutegyendesereize, nitubaasa kubiika enziika. Ekiniga nikibaasa kureetera omuntu kwetaanisa aha bantu ba Yehova. Teekateeka aha ky’okureeberaho kya Pablo, omw’eishe-emwe kuruga omuri South America. Bakamubeiherera eki atakozire, n’ekyarugiremu akaihwaho obujunaanizibwa bwe omu kibiina. Akatwaza ata? “Nkagira ekiniga,” nikwo Pablo arikugira, “kandi mporampora nkaruga omu kibiina.”

7. Omuntu oine omutima ogurikweshinja naaba naayehurira ata?

⁷ Omuntu naabaasa kugira omutima ogurikweshinja ahabw’okuhenda ebiragiro bya Ruhanga atandikye kwereeba nk’otakikundwa Ruhanga. N’obu araabe yaayeteisize kandi akasaasirwa, naabaasa kwehurira nk’otahikire kukwatanisa n’abaheereza ba Ruhanga. Ow’eishe-emwe Francisco nikwo yaayehuriire atyo. “Nkahanwa ahabw’okushambana,” nikwo arikugira. “N’obu omu kubanza naagumire ninza omu nteerane, nkatandika kugira amaganya n’okwehurira nk’otashemereire kuba n’abaheereza ba Yehova. Omuntu wangye w’omunda akaba naanshinja, kandi obwo nkaba nimpamiza kimwe ngu Yehova taransaasiire. Bwanyima, nketaanisa aha kibiina.” Nooreeba ota ab’eishe-emwe na banyaanyazi-itwe abarikuraba omu mbeera ezaagambwaho? Nikikureetera kubagirira esaasi? Okukira byona, Yehova we naabareeba ata?

8. Mbwenu shi Yehova naayebwa abaamuheereizeho enyima? Shoboorora.

⁸ Yehova tarikweba abaabaire nibamuheereza kwonka bakeemereramu kukwatanisa  n’abantu be, kandi tarikwebwa ebi baakozire omu buheereza bwe. (Heb. 6:10) Nabi Isaaya akahandiika eky’okureeberaho kirungi ekirikworeka oku Yehova arikufayo aha bantu be. Isaaya akahandiika ati: ‘Nk’omuriisa, naija kukiikira abaana b’entaama ze omu mikono, abatwarire omu kifuba kye.’ (Isa. 40:11) Yehova Omuriisa Omukuru naayehurira ata omwe aha ntaama ze yaahaba akaruga omu busyo bwe? Yesu akooreka enyehurira za Yehova obu yaabuuza abeegi be ati: ‘Nimuteekateeka muta? Omuntu yaaba aine entaama igana, emwe aharizo yaarara, tarikutsiga ziri makumi mwenda na mwenda aha mugongo, akaza kusherura egyo erazire? Kandi yaagibona, buzimazima nimbagambira nti: Naagishemerererwa okukira ziri makumi mwenda na mwenda ezaaba zitarazire.”​—Mat. 18:12, 13.

9. Ira abariisa barungi bakaba baatwariza bata obusyo bwabo? (Reeba ekishushani ekiri aha kipampagare.)

⁹ Ahabw’enki kihikire kugyeragyeranisa Yehova n’omuriisa? N’ahabw’okugira ngu ira omuriisa murungi akaba naafayo munonga aha ntaama ze. Nk’eky’okureeberaho, Daudi kubaasa kurinda entaama ze akaita entare n’edubu ebyabaire nibyenda kuzirya. (1 Sam. 17:34, 35) Omuriisa murungi akaba naabaasa kumanya yaaba haine emwe aha ntaama ze ebuzire. (Yoh. 10:3, 14) Omuriisa w’omuringo nk’ogwo akaba naabaasa kutsiga entaama 99 omu kiju nari azitsigire omuriisa mugyenzi we, reero agyende kusherura emwe ebuzire. Yesu akakoresa ekitebyo ekyo kutwegyesa eishomo rikuru: ‘Tata ori omu iguru tarikwenda omwe ahari aba abato kuhwerekyerera.’​—Mat. 18:14.

10. Kurugiirira ahari Ezekieli 34:11-16, Yehova naaraganisa kukorera ki entaama ze ezibuzire?

¹⁰ Yehova naakunda buri omwe ahariitwe, otwariiremu n’abarikuba beetaaniise aha busyo bwe. Ruhanga arikukoresa nabi Ezekieli, akaraganisa ngu naija kusherura entaama ze ezibuzire kandi azihwere kugaruka kugira omukago murungi nawe. Kandi akagamba n’oku yaabaire naija kuzicungura, kushushana  n’eki omuriisa Omwisraeli yaabaire aine kukora entaama ye yaabura. (Shoma Ezekieli 34:11-16.) Eky’okubanza, omuriisa akaba aine kubanza kusherura entaama, kandi eki kikaba nikyetengyesa obwire n’amaani. Reero, ku yaabaire agibona, akaba agigarura omu busyo bwe. Okwongyera ahari ekyo, entaama ku yaabaire eba eine obuhuta nari eine enjara y’amaani, akaba agireeberera gye, arikugishemba, akagikiriza, kandi akagiha n’eby’okurya. Abareeberezi, abarikuriisa “obusya bwa Ruhanga,” baine kukuratira amadaara nigo gamwe baaba nibahwera weena orugire omu kibiina. (1 Pet. 5:2, 3) Abareeberezi nibabasherura entaama, bazihwera kugaruka omu kibiina, kandi booreka ngu nibazikunda barikuzihwera omu by’omwoyo. *

11. Omuriisa murungi w’entaama akaba naamanya ki?

¹¹ Omuriisa murungi akaba naamanya ngu entaama nizibaasa kuhaba. Kandi entaama ku yaabaire ehaba ekaruga omu busyo, omuriisa akaba atagitwariza kubi. Teekateeka aha ky’okureeberaho eki Yehova yaatuteeraireho omu kuhwera bamwe aha baheereza be abaabaire bamurugireho.

12. Yehova akatwariza ata Yona?

¹² Nabi Yona akahunga obujunaanizibwa obu yaahairwe. Kwonka Yehova tararahukire kumwihamu engaro. Nk’omuriisa murungi, Yehova akamujuna kandi yaamuhwera kugaruka kugira amaani g’okuhikiiriza obujunaanizibwa bwe. (Yon. 2:7; 3:1, 2) Bwanyima, Ruhanga akakoresa ekimera ky’omwongo kuhwera Yona kwetegyereza ngu amagara ga buri muntu n’ag’omuhendo. (Yon. 4:10, 11) Eki nikitwegyesa ki? Abareeberezi tibashemereire kurahuka kuhanika omu kuhwera abatakibuurira. Kureka baine kuteeraho kwetegyereza ekireetaire entaama kwetaanisa aha busyo. Kandi entaama egyo yaagarukira Yehova, abareeberezi nibagumizamu kworeka ngu nibagikunda kandi ngu nibagifaho.

13. Nitubaasa kwega ki aha ku Yehova yaatwariize omuhandiiki wa Zaaburi eya 73?

¹³ Omuhandiiki wa Zaaburi 73 akahwamu amaani ku yaareebire ababi bari nk’abari gye.  Akatandika kubanganisa yaaba nikigasha okukora ebi Ruhanga arikukunda. (Zab. 73:12, 13, 16) Yehova akatwaza ata? Taramucwereire rubanja. Nangwa, Ruhanga akahandiikisa ebi yaagambire omu Baibuli. Aha muheru, omuhandiiki wa Zaaburi akeetegyereza ngu omu kubaho kw’omuntu tihaine ekirikukira okugira omukago murungi na Yehova. (Zab. 73:23, 24, 26, 28) Eky’okwega? Abareeberezi tibashemereire kurahuka kucwera omuntu orubanja yaaba naabangaanisa ebirungi ebirikuruga omu kuheereza Yehova. Omu mwanya gw’ekyo, baine kuteeraho kwetegyereza ahabw’enki naagamba atyo kandi akatwaza omu muringo nk’ogwo. Obwo nibwo abareeberezi barikubaasa kumanya Ebyahandiikirwe ebi baraakorese kumugumya.

14. Ahabw’enki Eliya yaabaire aine kuhwerwa, kandi Yehova akamuhwera ata?

¹⁴ Nabi Eliya akahunga Omugabekazi Yezebeeli. (1 Bag. 19:1-3) Eliya akaba naateekateeka ngu niwe nabi wenka owaabaire naaheereza Yehova, kandi akaba naareeba ngu naahendekyera busha. Eliya akagira amaganya maingi kandi yaayenda ngu afe. (1 Bag. 19:4, 10) Omu mwanya gwa Yehova kumugirira ekiniga, akamuhamiza ngu naamukunda, ngu naabaasa kwesiga amaani ge, kandi ngu hakiriho omurimo muhango gw’okukora. Yehova omu muringo gw’embabazi akahurikiza Eliya, kandi yaamuha obujunaanizibwa busya. (1 Bag. 19:11-16, 18) Eky’okwega? Twena, na munonga abareeberezi, baine kutwariza entaama za Yehova omu muringo gw’embabazi. Yaaba  omuntu agamba obusaasi bwe nari akeereeba nk’otashemereire embabazi za Yehova, abareeberezi nibaija kumuhurikiza yaaba naabagambira ebiri omutima gwe. Reero nibaija kuteeraho kumuhamiza ngu Yehova naamutwara nk’ow’omuhendo.

15. Kurugiirira ahari Yohaana 6:39, Yesu akaba naatwara ata entaama za Ishe?

¹⁵ Yehova naayenda ngu tureebe tuta entaama ezibuzire? Yesu naatuteeraho eky’okureeberaho omu nshonga egi. Akaba naamanya ngu buri ntaama ya Yehova n’ey’omuhendo ahariwe, n’ahabw’ekyo akakora buri kimwe kuhwera ‘entaama z’oruganda rwa Israeli ezaabuzire,’ kugarukira Yehova. (Mat. 15:24; Luk. 19:9, 10) Yesu nk’omuriisa murungi, akakora nk’oku arikubaasa kugira ngu hatagira entaama n’emwe aha za Ishe eyaamuburaho.​—Shoma Yohaana 6:39.

16-17. Abareeberezi bashemereire kureeba bata obujunaanizibwa bwabo bw’okuhwera entaama ezibuzire? (Reeba akabokusi “ Oku Entaama Ebuzire Erikubaasa Kwehurira.”)

¹⁶ Entumwa Paulo akahiga abareeberezi b’omu kibiina kya Efeso kutooreza Yesu. Mwine “kukora mutyo emirimo, kuhwera abataine maani, n’okwijuka ebigambo ebi Mukama waitu Yesu yaagambire naagira ati: Okugaba” nikureeta okushemererwa okukira okuheebwa. (Byak. 20:17, 35) Buzima, obunaku obu abareeberezi baine obujunaanizibwa bw’omutaano omu nshonga egi. Salvador, omureeberezi kuruga Spain naagira ati: “Ku ndikuteekateeka aha ku Yehova arikufayo aha ntaama ze ezibuzire, eki nikimpiga kukora nk’oku ndikubaasa kubahwera. Nk’omuriisa omu by’omwoyo, nimmanya ngu Yehova naayenda ngu mpwere entaama ze.”

¹⁷ Boona abaagambwaho omu kicweka eki abaabaire bahabire bakahwerwa kugarukira Yehova. Kandi hati, baingi nabo abahabire nibenda kugaruka. Ekicweka ekirikukurataho nikiza kwongyera kugamba aha ki turikubaasa kukora kubahwera kugaruka kuheereza Yehova.