Nkhani Yakupfunza 25
‘Nin’dzanyang’ana Mabira Yangu’
‘Nin’dzanyang’ana mabira yangu na kuyasamalira.’—ZAKIYERI 34:11.
NYIMBO 105 ‘Mulungu ni Lufoyi’
BZOMWE TIN’PFUNZA *
1. Thangwe ranyi Yahova adabzindendemezera na mai?
‘KODI mkazi angayebwe mwana wace?’ Umweyu ni mbvunzo omwe Yahova adaucita mu ntsiku za mpolofeta Zaiya. Iye adatsimikizira wanthu wace kuti: ‘Napo akaziwa angayebwe, ine cipo ningakuyebweni lini.’ (Zaiya 49:15) Ni nthawe lini zentse zomwe Yahova ambabzindendemezera na mai, koma pa nthaweyi iye adacita bzimwebzo. Mwakuphatisa basa lufoyi lomwe liripo pakati pa mai na mwana wace, Yahova akhafuna kulatiza kuti lufoyi lomwe analo kuna atumiki wace ndikulu kwene-kwene. Azimai azinji an’tawiriza mafala yomwe mpfumakazi Jasmine idalewa, iyo idati: “Mai akakhala na mwana, lufoyi lace kwa mwanayo limbakhala lamphanvu kwene-kwene.”
2. Kodi Yahova ambabzibva tani akawona kuti m’bodzi wa wana wace aleka kutsonkhana?
2 Yahova ambadziwa bzikakhala kuti m’bodzi wa wana wace aleka kutsonkhana na kupalizira, ndipo bzimwebzi bzimbamusunamisa kwene-kwene. Tenepo, kumbukirani momwe iye ambabvera akawona bzulu na bzulu bza atumiki wace akudjedjera mwauzimu * pa gole liri-lentse.
3. Kodi Yahova akufuna ciyani?
3 Abale na mpfumakazi zizinji zomwe zimbadjedjera mwauzimu ambabwerera m’gwere ndipo ifepano timbawatambira na manja mawiri! Yahova akufuna kuti iwo abwerere m’gulu lace, ndipo ifepano tikufunambo bzimwebzo. (1 Pedru 2:25) Tsono tingawathandize tani kuti iwo abwerere? Tikanati kutawira mbvunzoyu, cakuyamba tin’funika kudziwa thangwe lomwe limbacitisa abale winango kuleka kutsonkhana na kupalizira.
THANGWE RANYI ABALE WINANGO AMBALEKA KUTUMIKIRA YAHOVA?
4. Kodi n’ciyani comwe cimbacitika na abale omwe ambawona basa kukhala cinthu cakufunika kwene-kwene pa moyo wawo?
4 Abale winango ambawona basa kukhala cinthu cakufunika kwene-kwene pa moyo wawo. M’bale Hung, * omwe ambakhala kummwera kwa Ásia, adalewa kuti: “Ndikhamala nthawe izinji ndikuphata basa. Ndidabzinamiza mwakukumbuka kuti ndikakhala na kobiri zizinji ni pomwe ningakwanise kutumikira bwino Yahova. Tenepo ndikhaphata basa mwakupitirira malire. Ndipo pang’ono na pang’ono ndidayamba kumbalova ku mitsonkhano ndipo pakumalizira pace ndidadzasiyiratu kumbayenda ku Nyumba ya Umambo. Bzikuwoneka ninga kuti dzikoli lidakonzedwa kuti limbatazise wanthu kukhala pa uxamwali na Mulungu pang’ono na pang’ono.”
5. Kodi n’ciyani comwe mpfumakazi inango idacita pomwe idagumana na mabvuto?
5 Abale na mpfumakazi zinango ambagumana na mabvuto yakusiyana-siyana yomwe yambawasunamisa. Anne, omwe ambakhala ku Grã-Bretanha, ana wana axanu. Iye adalewa kuti: “M’bodzi mwa wana wangu adabadwa na matenda yakusiyana-siyana. Na kupita kwa nthawe, mwana wangu wacikazi adacosedwa m’gwere ndipo winango wacimuna adayamba kuduwala kwene-kwene. Bzimwebzi bzidandiwawa kwene-kwene mwakuti ndidaleka kutsonkhana na kupalizira. Ndipo ndidadzadjedjera mwauzimu.” Mpsakupasa ntsisi kuti Anne pabodzi na banja lace kuphatanidzambo abale winango, akugumana na mabvuto yakusiyana-siyana.
6. Thangwe ranyi munthu omwe ambakwanisa lini kuphatisa basa malango ya pa Wakoloso 3:13, ambakhala pa ngozi yakutalikirana na gulu la Yahova?
6 Werengani Wakoloso 3:13. * Atumiki winango wa Yahova ambasunama m’bale ayai mpfumakazi ya m’gwere ikacita bzinthu bzakuphonyeka. Mpostolo Paulo adazindikira kuti nthawe zinango timbakhala na mathangwe yakubveka ‘yakudandaulira’ m’bale ayai mpfumakazi. Napo kuti tidacitiridwa bzinthu bzakusaya cirungamo, koma tikasaya kusamala, tingayambe kukoya bza mu mtima. Ndipo na kupita kwa nthawe, ukali bungacitise munthu kutalikirana na gulu la Yahova. Onani bzomwe bzidacitika na Pablo m’bale omwe ambakhala ku América do Sul. Napo kuti akhalibe mulandu, iye adanamiziridwa kuti adacita cinthu cakuphonyeka ndipo adaluza udindo bomwe akhanabo m‘Gwere. Kodi Pablo adacita ciyani? Iye adati: “Bzidandiwawa kwene-kwene, ndipo pang’ono na pang’ono ndidaleka kutsonkhana.”
7. Kodi n’ciyani comwe cimbacitika na abale omwe ambabzipasa mulandu thangwe ra pikado zomwe adacita kale-kale?
7 Abale winango ambabzipasa mulandu thangwe ra pikado zomwe adacita kale-kale. Iwo ambakumbuka kuti ambafunidwa lini na Mulungu. Napo kuti adakungula ndipo Yahova adawalekerera, iwo ambabzibva kuti an’themera lini kukhala atumiki wa Yahovayo. Bzimwebzi ni bzomwe m’bale Francisco akhakumbukambo. Iye adati: “Inepano ndidatsimulidwa thangwe rakuti ndidacita upombo. Pakuyamba ndikhapitiriza kuyenda ku mitsonkhano, koma na kupita kwa nthawe ndidadzasunama thangwe ndikhawona kuti nin’themera lini kukhala pakati pa atumiki wa Yahova. Ndipo mtima wangu ukhandiboneresa thangwe ndikhadatsimikiza kuti Yahova alibe kundilekerera. Na kupita kwa nthawe, ndidadzaleka kumbayenda ku mitsonkhano.” Kodi imwepo mumbawawona tani abale na mpfumakazi omwe akugumana na mabvuto ninga yomwe yalewedwa mu ndime 4 mpaka 7? Kodi mumbakwanisa kubvesesa momwe iwo ambabvera? Ndipo kuposa bzentse, kodi Yahova ambawawona tani?
YAHOVA AMBAFUNA ATUMIKI WACE
Makabusa wa mu nthawe ya Ajirayeri akhacita thupo kwene-kwene bira akataika (Onani ndime 8-9) *
8. Kodi Yahova ambayebwa atumiki wace omwe adaleka kutsonkhana? Fotokozani.
8 Yahova ambayebwa lini atumiki wace omwe adaleka kutsonkhana. Ndipo iye ambayebwambo lini mabasa yentse yomwe atumikiwo akhamucitira. (Wahebereu 6:10) Mpolofeta Zaiya adanemba ciratizo cabwino kwene-kwene comwe cimbalatiza kuti Yahova ambafuna wanthu wace. Zaiya adati: ‘Ninga momwe ambacitira makabusa. Iye an’dzatsonkhanisa wana wa mabira, ndipo an’dzanyamulira mabirayo pa cifuwa.’ (Zaiya 40:11) Kodi Yahova omwe ni m’Busa Mkulu, ambabzibva tani m’bodzi wa atumiki wace akasiya kumutumikira? Jezu adalatiza momwe Yahova ambabvera pomwe adabvunza anyakupfunza wace kuti: ‘Kodi imwepo munti tani? Penu munthu ana mabira 100 ndipo m’bodzi mwa mabirayo watayika, kodi iye angasiye lini mabira 99 ku mapiri aciyenda kukanyang’ana omwe watayikayo? Tsono ndikukuuzani kuti akamugumana, iye an’dzakomedwa kwene-kwene na bira wakutayikayo kuposa na mabira 99 yomwe yakhalibe kutayika.’—Mateu 18:12, 13.
9. Kodi makabusa wabwino wa mu nthawe zakale-kale akhasamalira tani mabira yace? (Onani cithunzi-thunzi pa tsamba lakuyamba.)
9 Thangwe ranyi tingandendemezere Yahova na makabusa? Thangwe makabusa wabwino wa mu nthawe zakale-kale akhasamalira bwino mabira yace. Mwa ciratizo, Davide adamenyana na mphondolo na cimbalangondo kuti akhotcerere mabira yace. (1 Samuweri 17:34, 35) Makabusa wabwino akhadziwa kuti mabira yace yakuperewera napo akakhala akusala m’bodzi. (Juwau 10:3, 14) Iye angadasiya mabira yace 99 pa mbuto yakukhotcerereka ayai angadakumbira amakabusa anzace kuti ayalindire, iye aciyenda kukanyang’ana omwe wataikayo. Jezu adaphatisa basa ciratizoci kuti atipfunzise cadidi cakufunika ici: ‘Baba wangu omwe ali kudzulu akufuna lini kuti m’bodzi wa ang’onowa atayike.’—Mateu 18:14.
Makabusa wa mu nthawe ya Ajirayeri akhacita thupo kwene-kwene bira akataika (Onani ndime 9)
YAHOVA AMBANYANG’ANA ATUMIKI WACE OMWE ATAIKA
10. Mwakubverana na Zakiyeri 34:11, 14, 16, kodi n’ciyani comwe Yahova adalewa pakulewa bza mabira yace yakutaika?
10 Yahova ambafuna ali-wentse wa ifepano, kuphatanidzambo ‘ang’ono’ omwe ataika. Mwakuphatisa basa mpolofeta Zakiyeri, Mulungu adalewa kuti an’nyang’ana mabira yace yakutaika aciyathandiza kukhala naye pomwe pa uxamwali. Ndipo iye adalewa bzomwe angadacita kuti ayagumane. Bzomwe iye angadacitabzo mpsibodzi-bodzi na bzomwe makabusa wa ku Jirayeri akhacita bira wace m’bobzi akataika. (Werengani Zakiyeri 34:11, 14, 16. *) Cakuyamba, makabusayo akhayenda kukanyang’ana birayo, bzomwe bzikhafunika nthawe izinji na nyongo. Tenepo makabusayo akam’gumana birayo, akham’nyamula aciyenda naye kuna mabira yanzace. Ndipo birayo akakhala na cironda ayai na njala, makabusayo akhamusamalira mwalufoyi, kum’nyamula, kumanga bzironda bzace na kum’pasa cakudya. Tenepo amakabusa wa ‘mabira ya Mulungu,’ ayai kuti akulu, an’funika kucita bzibodzi-bodzibzi kuti athandize wale omwe aleka kutsonkhana. (1 Pedru 5:2, 3) Akulu ambanyang’ana mabirayo, ambayathandiza kuti yabwerere m’gwere mwa kuyathandiza kuti yakhale pomwe pa uxamwali na Yahova. *
11. Kodi makabusa wabwino akhadziwa ciyani?
11 Makabusa wabwino akhadziwa kuti mabira yangataike. Ndipo makabusa akagumana bira wakataikayo, akham’menya lini. Mbatiwoneni momwe Mulungu adakhalira ciratizo cabwino pomwe adathandiza atumiki wace winango omwe akhabonera.
12. Kodi Yahova akhamuwona tani Djona?
12 Mpolofeta Djona adathawa pomwe Yahova adamuuza kuti ayende ku Ninive. Koma Yahova adapitiriza kumuwona kukhala wakufunika. Ninga makabusa wabwino, Yahova adapulumusa Djona ndipo adamupasa mphanvu zomwe akhafunikira kuti akacite basa lomwe akhadamuuza. (Djona 2:7; 3:1, 2) Na kupita kwa nthawe, Mulungu adaphatisa basa kamuti kuti athandize Djona kubvesesa kuti moyo wa munthu ali-wentse ngwakufunika kwene-kwene kwa iye. (Djona 4:10, 11) Kodi tikupfunza ciyani? Akulu wa gwere an’funika lini kuthamangira kuwona kuti abale omwe adjedjera mwauzimu mbakufunika lini pomwe. Koma iwo ambafufudza kuti abvesese bzomwe bzacitisa abalewo kudjedjera. Ndipo abalewo akabwerera kwa Yahova, akuluwo ambapitiriza kuwalatiza lufoyi.
13. Kodi n’ciyani comwe tingapfunze na momwe Yahova adacitira bzinthu na nyakunemba kapitulo 73 ya bukhu la Psalymo?
13 Nyakunemba kapitulo 73 ya bukhu la Psalymo adasunama kwene-kwene pomwe adawona ninga kuti wanthu wa makhalidwe yakuipa bzinthu bzikhawafambira bwino. Ndipo iye adafika pakukumbuka kuti kutumikira Mulungu kulibe phindu. (Psalymo 73:12, 13, 16) Kodi n’ciyani comwe Yahova adacita? Yahova adabvesesa makumbukidwe yace. Ndipopa iye adacitisa kuti mafala ya nyakunemba Psalymoyo yanembedwe m’Bibliya. Pakumalizira, nyakunembayo adadzazindikira kuti kukhala pa uxamwali na Yahova kuli bwino kwene-kwene kuposa cinthu ciri-centse, ndipo bzimwebzi bzimbacitisa kuti moyo ukhale na cakulinga. (Psalymo 73:23, 24, 26, 28) Kodi tikupfunza ciyani? Akulu an’funika lini kuthamangira kuyeruza munthu omwe ayamba kukumbuka kuti kutumikira Yahova kulibe phindu. M’mbuto mwakumuyeruza, akuluwo an’funika kubvesesa thangwe lomwe lamucitisa kulewa ayai kukumbuka tenepo. Akuluwo akacita bzimwebzi, an’dzakwanisa kuphatisa basa Bibliya kuti alimbikise munthuyo.
14. Thangwe ranyi Eliya akhafunika kuthandizidwa, ndipo Yahova adamuthandiza tani?
14 Mpolofeta Eliya adathawa Mambo-mkazi Jezabeli. (1 Wamambo 19:1-3) Iye adakumbuka kuti pa apolofeta wentse wa Yahova, ndiye yekha omwe akhadasala na moyo ndipo basa lomwe akhadacita likhadayenda papezi. Eliya adasunama kwene-kwene mpaka adafika pakukumbuka kuti kuli bwino kufa. (1 Wamambo 19:4, 10) Yahova adabvesesa makumbukidwe yace. Ndipo adamutsimikizira kuti akhali lini yekha, akhafunika kukhulupira mphanvu za Mulungu nakuti pakhana basa lizinji lomwe angadacita. Mwakudeka mtima Yahova adatetekera Eliya pomwe akhafotokoza makumbukidwe yace ndipo adamupasa basa linango kuti acite. (1 Wamambo 19:11-16, 18) Kodi tikupfunza ciyani? Tentsenefe, maka-maka akulu wa gwere tin’funika kumbasamalira mabira ya Yahova mwakudeka mtima. Munthu akalewa kuti adakalipa ayai akalewa kuti an’themera lini kulekereredwa na Yahova pa cinthu comwe aphonya, akulu wa gwere an’funika kumucitisa kukhala wakutsudzuka kufotokoza makumbukidwe yace acimutetekera. Akamala amuthandize kuwona kuti iye ngwakufunika kwene-kwene kwa Yahova.
KODI TIN’FUNIKA KUMBAWAWONA TANI ATUMIKI WA MULUNGU OMWE ADATAIKA?
15. Mwakubverana na Juwau 6:39, kodi Jezu ambayawona tani mabira ya Baba wace?
15 Kodi Yahova akufuna kuti timbawawone tani atumiki wace omwe adataika? Tingapfunze na ciratizo ca Jezu. Iye akhadziwa kuti Yahova ambawona atumiki wace wentse kuti mbakufunika. Ndipopa iye adacita ciri-centse kuti athandize ‘mabira yakutaika ya m’nyumba ya Jirayeri’ kuti yabwerere kwa Yahova. (Mateu 15:24; Luka 19:9, 10) Ninga makabusa wabwino, Jezu adacita ciri-centse kuti paleke kutaika ne bira m’bodzi wa Yahova.—Werengani Juwau 6:39. *
16-17. Kodi akulu an’funika kubzibva tani pa nkhani yakuthandiza atumiki wa Mulungu omwe adataika? (Onani kwadru yakuti “ Kodi Bira Wakutaika Ambabzibva Tani?”)
16 Mpostolo Paulo adalimbikisa akulu wa gwere la ku Efezo kuti atewezere ciratizo ca Jezu. Iye adanemba kuti: ‘Muthandize wanthu wakutepa, mucikumbukira mafala ya Mbuya Jezu, pomwe adati: “Kupasa kumbabweresa cikondweso cikulu kuposa kutambira.”’ (Mabasa 20:17, 35) Kulewa mwakusaya kupenukira, ntsiku zino akulu wa gwere akucitambo basa libodzi-bodziri. Mkulu winango wa gwere ku Espanha, wakucemeredwa Salvador, adati: “Ndikakumbukira momwe Yahova ambacitira thupo na mabira yace yakutaika, nimbalimbikisidwa kucita ciri-centse kuti ndithandizembo mabirayo. Inepano nimbadziwa kuti Yahova akufuna kuti ndiyasamalire.”
17 Wentse wakudjedjera mwauzimu omwe afotokozedwa mu nkhani ino adathandizidwa ndipo adabwerera kwa Yahova. Ndipo tikulewa pano, abale wathu azinji omwe adasiya kutsonkhana akufunambo kubwerera. Kodi tingacite ciyani kuti tiwathandize? Nkhani yakutewera in’dzafotokoza bzomwe tingacite kuti tiwathandize abwerere kwa Yahova.
NYIMBO 139 Bziyezezereni Kuti Muli M’paraizo
^ ndi. 5 Thangwe ranyi abale winango omwe ambatumikira Yahova mwakukhulupirika kwa magole mazinji ambadzasiya kutsonkhana? Kodi Mulungu ambawawona tani abalewo? Mu nkhani ino tiniwona mitawiro ya mibvunzo imweyi. Ndipo tiniwona pomwe bzomwe tingapfunze na momwe Yahova adathandizira atumiki wace winango wakale-kale omwe adagumana na mabvuto.
^ ndi. 2 KAFOTOKOZEDWE KA MAFALA YANANGO: Mpalizi wakudjedjera mwauzimu ni ule omwe ambapalizira lini kwa minyezi 6 ayai kuposa. Napo bziri tenepo, iwo ni abale na mpfumakazi zathu, ndipo timbawafuna kwene-kwene.
^ ndi. 4 Madzina yanango yacinjidwa.
^ ndi. 6 Wakoloso 3:13 Pitirizani kupirirana na kulekererana na mtima wentse napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wentse, imwepo mucitembo tenepoyo.
^ ndi. 10 Zakiyeri 34:11 ‘Pakuti Yahova Mbuya Mkululetu walewa kuti: “Ndiri pano ine, ndipo nin’dzanyang’ana mabira yangu na kuyasamalira. 14 Mabirayo nin’dzayadyesera ku mbuto za mauswa yabwino, ndipo zin’dzakhala m’mapiri matali-matali ya ku Jirayeri. Kumweko iyo yan’dzagona pansi pa mbuto zabwino kwene-kwene, ndipo yan’dzadya mauswa yakupsipirira bwino m’mapiri ya ku Jirayeri.’ 16 ‘Nin’dzanyang’ana bira wakutaika, ndicidzabweresa bira wakutaika. Bira wakutcoka mwendo nin’dzalimbisa mwendo wakutcokayo; wakuduwala, nin’dzam’poza; tsono bira wakunenepa na wamphanvu nin’dzam’pfudza. Nin’dzam’pasa ciyeruzo ninga cakudya cace.’
^ ndi. 10 Nkhani yakutewera in’dzafotokoza momwe akulu angacitire bzinthu bzitatu bzomwe bzafotokozedwabzi.
^ ndi. 15 Juwau 6:39 Ule omwe adandituma, an’funa kuti inepano ndileke kuluza na m’bodziyo pa wentse omwe iye wandipasa, koma ndidzawalamuse pa ntsiku yakumalizira.
^ ndi. 63 BZOMWE BZIKUCITIKA PA CITHUNZI-THUNZI: Makabusa wa mu nthawe ya Ajirayeri akhacita thupo bira akataika. Iye akhayenda kukamunyang’ana ndipo akam’gumana akhayenda naye kuna mabira yanzace. Akulu wa gwere ambacitambo bzibodzi-bodzibzi ntsiku zino.
^ ndi. 67 BZOMWE BZIKUCITIKA PA CITHUNZI-THUNZI: Mpfumakazi yakudjedjera mwauzimu iri mu kanderendere. Mpfumakaziyo ikuwona Mboni ziwiri zikucita upalizi bwakangolo mwakukondwa.
