1. Akin ya inkompara nen Jehova so sarili to ed manpapasuson ina?

“NALINGWANAN kasi na ina so mansususon anak to?” Ontan so intepet nen Jehova diad panaon nen propeta Isaias. “Makalingwan man irayan bibii, agta kan balot lingwanan,” so kuan nen Jehova ed saray totoo to. (Isa. 49:15) Matalag ya ikompara nen Jehova so sarili to ed sakey ya ina. Balet diad saya et ontan so ginawa to ta labay ton natalosan na saray lingkor to ya talagan inar-aro to ra, no panon ya inar-aro na sakey ya ina so mansususon anak to. Seguradon nalilikna met na saray nanay iyan imbaga nen Jasmin: “No papasusoen na nanay so anak to, onaapit so liknaan da ed sakey tan sakey, tan say aroan da et mansiansia legay bilay.”

2. Antoy nalilikna nen Jehova no makaarawi so sakey ya anak to?

² Amta nen Aman Jehova no walay anggan sakey ed saray ananak to ya agla mimiaral tan agla manpupulong. Kanian isip mo pay ermen ya nalilikna to no nanenengneng to ya nilibo ed saray lingkor to so magmamaliw ya inaktibo * kada taon.

3. Antoy labay nen Jehova?

³ Dakel ed saray inaktibon agagi tayo so ompapawil ed kongregasyon tan malikeliket tayo ta nakakaiba tayo lamet ira! Labalabay nen Jehova ya ompawil iray inaktibo tan ontan met so labay tayo. (1 Ped. 2:25) Panon tayo ran natulongan? Antis tayon ebatan itan ya tepet, pantongtongan tayo ni no akin ya wala ray agagi tayon agla makakapiaral tan agla makakapampulong.

4. Antoy nagagawa ed arum lapud trabaho da?

⁴ Wala ray akatunda ed panlilingkor da lapud trabaho da. “Busy ak ya maong ed trabahok,” so kuan nen Hung, * sakey ya brother ed Southeast Asia. “Say amtak mas makapanlingkor ak ed si Jehova no dakel so kuartak, kanian trabaho ak lan trabaho. Balet lapud trabahok, matalag ak lan makapiaral ya anggad agak lan balot mimiaral. Uusaren nen Satanas iyan mundo pian kalkalnan iyarawi ed Dios iray totoo.”

5. Antoy epekto ed sakey ya sister nen nantatabonan so problema to?

⁵ Wala ray agagi tayo ya akatunda ed panaglingkor lapud nantatabonan iray problema da. Si Anne ya taga England et limaray anak to. “Amay bolirek ko et walay graben sakit to manlapu la nen inyanak ko,” so imbaga nen Anne. “Ag-abayag, adispelo may komatlon ana’ko, insan awalaan na sakit ed isip may komapat ya ana’ko. A-depress ak ya maong kanian tinmunda ak lan miaral tan manpulong. Lapud satan, nagmaliw ak ya inaktibo.” Naeermenan tayo ed pakaskasin kipapasen nen Anne tan say pamilya to, ontan met ed arum nin agagi tayo ya ondadalan ed mair-irap iran subok.

6. Akin ya nayarin onarawi ed organisasyon nen Jehova so sakey no agto iyaplika so Colosas 3:13?

⁶ Basaen so Colosas 3:13. Wala ray lingkor nen Jehova ya tinmunda ed panlilingkor da lapud binmarong ira ed ginawa na sakey ya agi. Imbaga nen apostol Pablo ya no maminsan et ‘walan talagay rason tayo ya ireklamo so arum.’ Ompan singa inagrabiado da itayo. Balet no pinunuyan tayoy barong tayo, ompan makaarawi tayo la ed organisasyon nen Jehova. Imanoen so eksperiensya nen Pablo, sakey ya brother ed South America. Sikatoy apalsaan ya nanggaway aliwa tan lapud satan et nakal ed pribilehyo tod kongregasyon. Antoy reaksion to? “Mansyodot ak,” so kuan nen Pablo, “tan agko aliklikas ya akaarawi ak la ed kongregasyon.”

7. Antoy epekto ed sakey a too no nakokonsiensian maong?

⁷ Saray arum et akatunda ra ed panlilingkor da lapud anggad natan et nakokonsiensia ni ran maong ed kasalanan da nensaman. Say pakalikna ra et agla ra makanepegan ed panangaro nen Jehova. Anggano say sakey et nagbabawi la tan pinerdona la nen Jehova, nayarin isipen to ya kababaing imay ginawa to tan mas maong no onarawi la ed organisasyon na Dios. Ontan so alikna na sakey ya brother ya si Francisco: “Abaat ak lapud akagawa ak na seksual ya imoralidad,” so inkuan to. “Nen unaan et mimiaral ak met ni, balet a-depress ak tan nababaingan ak lan miulop ed saray agagi. Lanang ak ya nakokonsiensia tan lapud satan et inisip ko ya agak ni pinerdona nen Jehova. Ag-abayag, agak la mimiaral tan manpupulong.” Antoy naliliknam ed saratan ya dadalanen na saray agagi tayo ya akatunda ed panaglingkor? Kasin nakakasian mo ira tan labay mo ran tulongan? Si Aman Jehova ey, anto kasi nalilikna to?

8. Kasin nilingwanan la nen Jehova iramay akatunda ed panlilingkor da? Ipaliwawa.

⁸ Aglilingwanan nen Jehova iramay akatunda ed panlilingkor da ed sikato. Tan agton balot lingwanan so impanlingkor da ed sikato. (Heb. 6:10) Insulat nen propeta Isaias so sakey ya balibalin ilustrasyon no panon ya aasikasoen nen Jehova iray lingkor to. “Asikasoen  toy pulok to a singa sakey a managpastol. Tiponen to iray kordero diad panamegley na taklay to, tan awiten to ra diad pagew to.” (Isa. 40:11) Si Jehova so Sankamaongan ya Managpastol, kanian antoy nalilikna to no walay abalang ya karnero to? Naamtaan tayoy ebat ed sayan imbaga nen Jesus ed saray disipulo to: “Antoy nikuan yo? No say sakey a too et walaay 100 a karnero tan abalang so sakey, agto kasi itilak ed kapalandeyan so 99 tan anapen to imay sakey a nababalang? Tan no naromog to, ibagak ed sikayo, lalon panliketan to itan nen say 99 ya ag-abalang.”​—Mat. 18:12, 13

9. Antoy gagawaen na sakey a managpastol ed panaon na Biblia pian naasikaso to iray karnero to? (Nengnengen so litrato ed apis.)

⁹ Akin et dugaruga so impangikompara ed si Jehova ed sakey ya managpastol? Ta nensaman diad panaon na Biblia, saray maong ya managpastol et aasikasoen tan proprotektaan da ray karnero da. Singa bilang, si David et makpel ton nilabanan so sakey ya leon tan sakey ya oso pian iyagel iray karnero to. (1 Sam. 17:34, 35) Say sakey ya maong a pastol et seguradon napansin to no walay anggan sakey ya karnero ton nababalang. (Juan 10:3, 14) No ontan so nagawa, taynanan toy arum a karnero to ed pukokan odino paasikaso to ed arum a managpastol insan to anapen imay nababalang. Inusar nen Jesus itan ya ilustrasyon pian ibangat iyan importantin katuaan: “Aliwan makapaliket ed Amak a walad tawen no nabalang so anggan sakey ed sarayan angkekelag.”​—Mat. 18:14.

10. Base ed Ezequiel 34:11-16, antoy insipan nen Jehova ya gawaen to no walay abalang ya karnero to?

¹⁰ Inar-aro nen Jehova so kada lingkor to pati saray “angkekelag” ya akaarawi ed pulok to. Diad panamegley nen propeta Ezequiel, insipan na Dios ya anapen to ray abalang ya karnero to tan tulongan to ran ombiskeg lamet ed espiritual. Tan sansakey ton binitla iray gawaen to pian napapawil to ra ed pulok. Ontan met so gagawaen na saray pastol ed Israel  nensaman no walay nababalang ya karnero da. (Basaen so Ezequiel 34:11-16.) Unona, anapen na managpastol so karnero to. Siempre aliwa itan ya mainomay tan agto naromog ya tampol. No nalmo to la, iyulop tod saray karnero to. Balet siempre no apiley, asugat, odino narasan imay karnero, asikasoen to ni, berberan to ray sugat to, ebaen to, tan pakanen to. Ontan met so kaukolan ya gawaen na saray elder no walay inmarawi ed kongregasyon ta sikara so manpapastol ed “pulok na Dios.” (1 Ped. 5:2, 3) Anapen da iray akaarawi, tulongan da ran makapawil ed kongregasyon, tan tuloytuloy da ran asikasoen pian ombiskeg lamet irad espiritual. *

11. Antoy amta na maong a managpastol ya nayarin nagawa ed karnero to?

¹¹ Amta na maong ya managpastol ya nayarin nabalang so sakey ya karnero tan makaarawi ed pulok. Balet no naalmo to, agto dusaen. Amtaen tayo no antoy ginawa na Dios pian natulongan to iray lingkor to nensaman ya akaarawin agano ed sikato.

12. Antoy ginawa nen Jehova ed si Jonas anggano imbatikan toy asainmin to?

¹² Si propetan Jonas et imbatikan toy asainmin ya ipapagawa nen Jehova. Balet anggano ontan so ginawa nen Jonas, ag-inisip nen Jehova ya aglan balot manguman. Singa sakey a maong ya managpastol, inliktar nen Jehova si Jonas tan tinulongan ton manpakpel pian nagawaan toy asainmin to. (Jon. 2:7; 3:1, 2) Insan inusar nen Jehova so tanaman a tabyayong pian natalosan nen Jonas ya mabmabli so bilay na kada too. (Jon. 4:10, 11) Antoy naaralan tayo? Agnepeg ya isipen na saray elder ya agla manguman so sakey ya inaktibo. Kaukolan dan talosan no akin ya sikatoy akaarawi ed kongregasyon. Tan no ompawil lad si Jehova, sikatoy tuloytuloy ya maaron tulongan na saray elder.

13. Antoy naaralan tayo ed reaksion nen Jehova ed samay imbaga na nansulat ed Salmo 73?

¹³ Kinmapuy so liknaan na nansulat ed Salmo 73 nen akaibeg ed iyaasenso na saray  mauges. Inisip to ya singa anggapoy gunggona na panlilingkor tod Dios. (Sal. 73:12, 13, 16) Antoy reaksion nen Jehova? Ag-imbaga nen Jehova ya anggapoy kanepegan ton manreklamo. Diad tua, impaisulat na Dios ed Biblia so alikna na sayan salmista. Atalosan lanlamang na salmista ya say sankaimportantian ed bilay to et say relasyon tod si Jehova. Atan so agnabayaran ya gunggona na panlilingkor tod Dios. (Sal. 73:23, 24, 26, 28) Antoy naaralan tayo? Agtampol husgaan na saray elder so sakey ya agi no ibaga ton singa anggapoy gunggona na panlilingkor tod si Jehova. Kaukolan ya talosan na saray elder no akin ya ontan so ibabaga tan nalilikna to. Makatulong itan pian makaisip iray teksto odino salaysay ed Biblia ya sarag dan usaren pian nanengneng to ray bendisyon ed panlilingkor tod Dios.

14. Antoy situasyon nen Elias tan panon ya tinulongan nen Jehova?

¹⁴ Binmatik si propetan Elias ta natatakot ed si Reyna Jezebel. (1 Ara. 19:1-3) Inisip to ya bukbukor to lay atilak ya propeta nen Jehova tan say pakalikna to et anggapo lanlamang so kana na ginawa to. A-depress ya maong si Elias tan labay to lay ompatey. (1 Ara. 19:4, 10) Imbes ya ibaga nen Jehova ya payakot si Elias tan makapuy so pananisia to, pinaseguroan to ya agto bukbukor, ikdan toy pakapanyari, tan amayamay ni nagawaan to. Maaron dinmengel si Jehova nen ibabalikas nen Elias iray kapagaan to tan inikdan to ni ingen na balon asainmin. (1 Ara. 19:11-16, 18) Antoy naaralan tayo? Amin tayo, nagkalalo la ed saray elder, et kaukolan ya maaro so pantrato tayo ed saray agagi. Anggano ibalikas na sakey ya agi so  amin ya sakit na linawa to odino say pakalikna to et aglan balot naperdona nen Jehova, importante ya sikatoy maaron dengelen na saray elder tan gawaen day anggaay nayarian da ya ipaliknad sikato ya inar-aro nen Jehova.

15. Base ed Juan 6:39, panoy impantrato nen Jesus ed saray karnero nen Ama to?

¹⁵ Antoy labay nen Jehova ya pantrato tayo ed saray abalang ya karnero to? Makaaral tayo ed alimbawa nen Jesus. Amta to ya inar-aro nen Jehova so kada karnero To. Kanian ginawa nen Jesus so anggaay nayarian to ya anapen iray “abalang a karnero ed sankaabungan na Israel,” tan tinulongan to ran ompawil ed si Jehova. (Mat. 15:24; Luc. 19:9, 10) Lapud maong ya pastol si Jesus, ginawa to met so anggaay nayarian to pian anggapoy anggan sakey ya nabalang ed saray karnero nen Jehova.​—Basaen so Juan 6:39.

16-17. Antoy nepeg ya nalikna na saray elder ed responsabilidad dan tulongan iramay akaarawi ed kongregasyon? (Nengnengen so kahon ya “ No Antoy Nalilikna na Abalang ya Karnero.”)

¹⁶ Binilin nen apostol Pablo iray elder ed kongregasyon na Efeso ya aligen day alimbawa nen Jesus. “Nepeg yon tulongan iray makapuy tan nepeg yon tandaan iray salita na Katawan a Jesus, sanen inkuan to: ‘Mas makapaliket so mangiter nen say mangawat.’” (Gawa 20:17, 35) Idadanet na sayan teksto ya responsabilidad na saray elder ya asikasoen a maong iray karnero nen Jehova. “No dadalepdepen koy panangaro nen Jehova ed kada karnero to ya nababalang, mas desidido ak ya gawaen koy anggaay nayarian kon tulongan ira,” so inkuan nen Salvador ya elder ed Spain. “Si Jehova so anuro ed saray elder ya manpastol ed saray karnero to, tan amtak ya labay ton asikasoen ko ran maong.”

¹⁷ Amin ya abitla ed sayan artikulo ya akatunda ed panlilingkor da ed si Jehova et aktibo la ra natan. Ontan met so labay ya gawaen na dakel nin akaarawi ed si Jehova. Diad onsublay ya artikulo, aralen tayon mas detalyado no panon tayo ran natulongan ya makapawil.