25. ARTIKJEL FA DAUT STUDIUM
“Ekj woa selfst no miene Schop sieekjen”
“Ekj woa selfst no miene Schop sieekjen un selfst fa dee oppkomen” (HES. 34:11)
LEET 105 “Gott es Leew”
WAUT WIE SEENEN WOAREN *
1. En waut fa Stekjen es Jehova soo aus eene leeftolje Mutta?
AUS de Profeet Jesaja läwd, fruach Jehova mol sien Volkj: “Kaun eene Fru äa Bäbe vejäten”? Un dan säd hee: “Wan daut uk soont kunn jäwen, ekj woa junt nich vejäten” (Jes. 49:15). Jehova vejlikjt sikj nich foaken met eene Mutta, oba ditmol deed hee daut. Hee brukt daut Jlikjnis von eene Mutta un äa Kjint toom wiesen, woo väl hee siene Deena räakjent. De mieeschte Mames jeit daut soo aus eene Sesta, waut Jasmin heet. See sajcht: “Wan eena eenem sien ieejnet Kjint besorcht, dan feelt eena sikj sien Läwen lank sea vebungen met daut.”
2. Woo feelt Jehova sikj, wan eent von siene Deena sikj von am trigjtrakjt?
2 Jehova woat daut en, wan eent von siene Deena nich mea no de Toopkomes wankt un nich mea prädjen deit. Stal die mol väa, woo truarich am daut moakt, daut jieda Joa dusende von siene Deena nich mea prädjen gonen. *
3. Waut wenscht Jehova sikj?
3 Väl von dise leewe Breeda un Sestren, waut nich mea prädjen doonen, komen wada trigj no de Vesaumlunk un wie freien ons sea doaräwa. Jehova wenscht sikj, daut dee trigjkomen, un wie uk (1. Pet. 2:25). Woo kjenn wie dee halpen? Ea wie ons daut unjastonen, mott wie weeten, wuarom eenje nich mea no de Toopkomes wanken un nich mea prädjen gonen.
WUAROM HIEREN EENJE OPP JEHOVA TO DEENEN?
4. Waut kaun de Oabeit aun eenje doonen?
4 Eenje schaufen too väl. Hung * es een Brooda, waut en Asien wont. Hee sajcht: “Ekj brukt eefach too väl Tiet un Krauft fa miene Oabeit. Ekj bild mie en, daut ekj Jehova bäta wudd deenen kjennen, wan ekj mea em tieteljen haud. Doawäajen schauft ekj emma lenja un vesiemd emma mea Toopkomes. Un met de Tiet wankt ekj doa goanich mea han. Daut späat sikj soo, daut dise Welt doatoo jemoakt es, ons soo bie sacht von Gott auftobrinjen.”
5. Waut deed daut aun eene Sesta, daut see soo väl Trubbels haud?
5 Eenje Breeda un Sestren woaren mootloos, wäajen dee soo väl Trubbels haben. Anne es von Enjlaunt un haft fief Kjinja. See sajcht: “Eent von onse Kjinja wia aul sea behindat, aus daut jebuaren wort. Lota wort dan eene von onse Mejalen utjeschloten un een Jung wort narfenkrank. Mie jinkj daut soo schlajcht, daut ekj nich mea no de Toopkomes un em Prädichtdeenst jinkj. Tolatst hieed ekj gaunz opp met prädjen.” Ons jaumat daut äwa Anne un äare Famielje un äwa aul dee, waut uk soone groote Trubbels haben.
6. Wuarom kaun eena von Jehova sien Volkj aufkomen, wan eena nich daut deit, waut Kolossa 3:13 sajcht?
6 Läs Kolossa 3:13. Eenje von Jehova siene Deena haben sikj äwa waut jeoajat, waut een Gloowesbrooda jedonen haft. Soo aus de Apostel Paulus sajcht, hab wie bieaun uk mol Uasoak fa “eene Kloag jäajen dän aundren”. Wan wie dan nich oppaussen, dan kjenn wie ons leicht vebetren un soo bie sacht von Jehova sien Volkj aufkomen. Daut beläwd een Brooda en Sied-Amerika, waut Pablo heet. Hee wort trajchtjewäsen, wäajen doa wäa Läajes äwa am vetald un de Eltestasch dan dochten, daut hee waut orrajchtet jedonen haud. Waut deed Pablo dan? Hee sajcht: “Ekj must mie sea oajren. Un met de Tiet trock ekj mie gaunz trigj von de Vesaumlunk.”
7. Waut kaun daut aun eenem doonen, wan eenem daut Jewessen baudat?
7 Wan eena mol eene schwoare Sind begonen haft, dan kaun eena sikj doa noch lang schlajcht äwa feelen. Woomäajlich denkjt eena dan, daut Gott eenem goanich mea leewen kaun. Soona feelt sikj daut veleicht goanich mea wieet, Poat von Gott sien Volkj to sennen, wan dän de Sind uk leet es un dän aul togood jehoolen wort. Soo jinkj daut eenen Brooda, waut Francisco heet. Hee sajcht: “Ekj wort wäajen Huararie trajchtjewäsen. Aum Aunfank wankt ekj noch no de Toopkomes, oba dan wort ekj mootloos un feeld mie daut nich mea wieet, mank Jehova siene Deena to sennen. Mie baudad mien Jewessen un ekj wia mie secha, daut Jehova mie nich vejäft haud. Tolatst deed ekj nich mea prädjen un fua uk nich mea no de Toopkomes.” Woo denkjst du äwa soone Breeda, waut sikj trigjetrocken haben? Hast du Metjefeel met dee? Un waut noch wichtja es: Woo denkjt Jehova äwa dee?
JEHOVA LEEFT SIENE SCHOP
Een israelitischa Hoad kjemmad sikj leeftolich om een veloarnet Schop (See Varsch 8-9) *
8. Vejat Jehova von deejanje, waut am mol jedeent haben? Laj daut ut.
8 Jehova vejat deejanje nich, waut am mol jedeent haben un sikj dan fa een Stoot trigjetrocken haben. Un hee vejat uk nich, waut dee aul fa am jedonen haben (Heb. 6:10). De Profeet Jesaja schreef een feinet Jlikjnis opp toom dietlich moaken, woo Jehova sikj om siene Deena kjemmad. Jesaja säd: “Hee woat siene Häad weiden soo aus een Hoad. De Lama woat hee em Oarm oppnämen un aun de Brost hoolen” (Jes. 40:11). Woo jeit dän grooten Hoad daut, wan eent von siene Schop von de Häad aufkjemt? Daut muak Jesus dietlich, aus hee siene Jinja fruach: “Waut denkj jie? Wan een Maun 100 Schop haud un eent von dee sikj velieren wudd, wudd hee nich dee 99 tochloten un en de Boaj gonen, om daut to sieekjen, daut sikj veloaren haud? Un wan hee daut finjt, ekj saj junt, hee woat sikj mea to daut eene freien, aus to dee 99, dee nich vebiestat wieren” (Mat. 18:12-13).
9. Woo kjemmaden de goode Hoads en de Bibeltiet sikj om äare Schop? (See daut Bilt oppe väaschte Sied.)
9 Wuarom kjenn wie sajen, daut Jehova soo aus een Hoad es? Wäajen een feina Hoad en de Bibeltiet sea om siene Schop bekjemmat wia. David biejlikj muak eenen Leiw un eenen Boa doot, om siene Häad to beschitzen (1. Sam. 17:34-35). Un wan doa uk bloos een Schop fäld, dan moakjt een gooda Hoad daut (Joh. 10:3, 14). Dee leet dan de 99 aundre Schop em Hock ooda bie de aundre Hoads un socht no daut eene, waut sikj veloaren haud. Jesus brukt dit Jlikjnis, om ons waut sea wichtjet to lieren. Hee säd: “Daut [es] uk nich mien Voda sien Wellen, daut von dise kjliene eent veloaren jeit” (Mat. 18:14).
Een israelitischa Hoad von ieeschtemma kjemmat sikj om een Schop, waut sikj vebeiselt haud (See Varsch 9)
JEHOVA SIEEKJT NO SIENE SCHOP
10. Waut wudd Jehova no Hesekiel 34:11-16 no fa siene veloarne Schop doonen?
10 Jehova leeft jiedrem eenen von ons, uk de “kjliene”, waut sikj vebiestat haben. Gott vespruak derch dän Profeet Hesekiel, daut hee no siene veloarne Schop sieekjen wudd un dee halpen wudd, em Gloowen jesunt to woaren. Un hee säd mau rajcht, woo hee dee raden wudd. Hee wudd daut biejlikj soo doonen aus een Hoad en Israel, wan een Schop sikj vebeiselt haud (läs Hesekiel 34:11-16). Daut ieeschte socht de Hoad no daut Schop, wan daut uk väl Tiet un Krauft brukt. Un wan hee daut ieescht jefungen haud, dan brocht hee daut trigj no de Häad. Un wan daut Schop velazt ooda sea hungrich wia, dan holp hee daut leeftolich. Hee bebunk daut un druach daut un jeef daut to fräten. De Eltestasch sent de Hoads äwa “Gott siene Häad” un dee doonen daut biejlikj soo, wan dee wäm halpen, waut sikj vebeiselt haft (1. Pet. 5:2-3). De Eltestasch sieekjen no dän un halpen dän trigjtokomen un jäwen dän leeftolich de Help, waut dän em jeisteljen fält. *
11. Waut wist een gooda Hoad?
11 Een gooda Hoad wist, daut Schop sikj vebiestren kunnen. Un wan een Schop von de Häad aufkjeem, dan deed hee daut nich hunjsch behaundlen. Well wie mol seenen, woo Gott eenje von siene Deena holp, waut fa een Stoot nich daut deeden, waut hee haben wull.
12. Woo jinkj Jehova met Jona om?
12 De Profeet Jona reisd nich doahan, wua Jehova am hanschekjt. Oba Jehova jeef nich fuaz opp met dän. Soo aus een gooda Hoad deed hee Jona raden un stunt am bie, daut dee siene Oppgow nokomen kunn (Jona 2:8; 3:1-2). Lota brukt Gott dan eene Plaunt aus Jlikjnis, daut Jona vestonen kunn, woo wieetvoll een Menschenläwen wia (Jona 4:10-11). Waut lia wie doavon? De Eltestasch sellen nich fuaz met deejanje oppjäwen, waut nich mea prädjen un nich mea no de Toopkomes komen. Dee proowen to vestonen, wuarom dee von de Häad aufjekomen sent. Un wan dee uk aul trigj no Jehova jekomen sent, dan sent dee uk wieda leeftolich om dee bekjemmat.
13. Waut lia wie von daut, woo Jehova met dän Schriewa von Psalm 73 omjinkj?
13 De Schriewa von Psalm 73 wort mootloos, aus hee sach, woo scheen de Gottloose daut jinkj. Hee beduad, aus sikj daut loond, Gott sienen Wellen to doonen (Psa. 73:12-13, 16). Waut deed Jehova met daut? Hee recht dän nich un leet dän siene Wieed mau rajcht en de Bibel oppschriewen. Tolatst wort de Psalmenschriewa dan en, daut et nuscht bätret jeef, aus met Jehova Frint to sennen (Psa. 73:23-24, 26, 28). Waut lia wie doavon? Wan doa wäa beduat, aus sikj daut loont, Jehova to deenen, dan sellen de Eltestasch dän nich too schwind rechten. Enne Städ daut sellen dee proowen to vestonen, wuarom deejanja jewesset sajcht ooda deit. Dan weeten de Eltestasch, woo dee dän met de Schreft Moot toospräakjen kjennen.
14. Wuarom wia Elia doljeschloagen, un woo holp Jehova am?
14 De Profeet Elia rand von de Kjennijin Isebel wajch (1. Kjen. 19:1-3). Am späad sikj daut soo, daut hee de eensja von Jehova siene Profeeten wia, waut äwajebläwen wia, un daut sien Deenst fa Dommheit wia. Hee feeld sikj soo doljeschloagen, daut hee stoawen wull (1. Kjen. 19:4, 10). Jehova deed Elia nich rechten. Hee leet dän weeten, daut hee sea väl Macht haud un daut Elia nich auleen wia un daut et noch väl fa dän to doonen jeef. Jehova horcht Elia jeduldich too, aus dee von siene Sorjen räd, un jeef dän fresche Oppgowen (1. Kjen. 19:11-16, 18). Waut lia wie doavon? Wie aula sellen met Jehova siene Schop leeftolich omgonen, besonda de Eltestasch. Dee horchen goot too, wan sikj doa wäa to dee utschett ooda dee vetalt, waut am oajat ooda daut dee sikj daut nich wieet feelt, daut Jehova am vejeft. Dee wellen dänjanjen dietlich moaken, daut Jehova dän väl räakjent.
WOO SELL WIE ÄWA GOTT SIENE SCHOP DENKJEN?
15. Woo docht Jesus äwa sienen Voda siene Schop, soo aus Johanes 6:39 sajcht?
15 Woo well Jehova, daut wie äwa siene Schop denkjen, waut sikj vebeiselt haben? Daut es aun Jesus to seenen. Hee wist, daut fa Jehova aule Schop wieetvoll wieren, un deed aules, waut hee kunn, daut “de veloarne Schop en Israel” trigj no Jehova kjeemen (Mat. 15:24; Luk. 19:9-10). Jesus wia een feina Hoad un deed sien bastet, daut kjeent von Jehova siene Schop sull veloaren gonen (läs Johanes 6:39).
16-17. Woo sellen de Eltestasch äwa de veloarne Schop denkjen? (See dän Kausten “ Woo een veloarnet Schop sikj feelen kaun”.)
16 De Apostel Paulus säd to de Eltestasch von de Vesaumlunk en Efesus, daut see Jesus nodoonen sullen. Hee säd: “Ekj [bewees] junt, daut wie derch schwoa oabeiden de schwake methalpen musten, un doaraun denkjen, daut de Har Jesus säd: Jäwen es seelja aus nämen” (Apj. 20:17, 35). Daut wiest, daut de Eltestasch de Veauntwuatunk haben, sikj om Jehova siene Deena to kjemren. Een Eltesta en Spaunien, waut Salvador heet, sajcht: “Wan ekj doaräwa nodenkj, woo sea Jehova om de veloarne Schop bekjemmat es, dan well ekj uk aules doonen, waut ekj kaun, om dee to halpen. Ekj weet, daut Jehova daut von mie haben well.”
17 Aul de Breeda, wua wie en disen Artikjel von räden, kjrieejen Help un kjeemen trigj no Jehova. Un een deel aundre, waut sikj vebeiselt haben, wellen nu uk trigjkomen. En dän näakjsten Artikjel woa wie seenen, woo wie dee krakjt halpen kjennen.
LEET 139 Stal die de niee Welt väa
^ Varsch 5 Wuarom trakjen eenje sikj von de Vesaumlunk trigj, waut Jehova aul joarenlank tru jedeent haben? Woo denkjt Gott äwa dee? Daut woa wie en disen Artikjel derchgonen. Un wie woaren uk seenen, woo Jehova en de Bibeltiet soone holp, waut sikj mol fa een Stootje von am trigjtrocken.
^ Varsch 2 WIEED UTJELAJCHT: Vekjindja, waut nich mea prädjen gonen, sent soone, waut aul sas Moonat ooda lenja nich mea met de Vesaumlunk toop jeprädicht haben. Oba daut sent doawäajen noch onse Breeda un Sestren un wie räakjnen dee väl.
^ Varsch 4 Eenje Nomes hab wie hia jeendat.
^ Varsch 10 En dän näakjsten Artikjel woa wie seenen, woo de Eltestasch daut krakjt doonen kjennen.
^ Varsch 60 BILTBESCHRIEWUNK: Een israelitischa Hoad socht no een Schop, waut sikj vebeiselt haud, un holp daut trigj no de Häad to komen. Vondoag dän Dach sent de jeistelje Hoads krakjt soo om äare Schop bekjemmat.
^ Varsch 64 BILTBESCHRIEWUNK: Eene Sesta, waut sikj von de Vesaumlunk trigjetrocken haft, sett aul enne Boss un sitt twee Zeijen, waut schaftich met eenen Bieekjakrota prädjen.
