LONGO DIA 25
‘Ame Hakhami Mbangukamba Imeme Yami’
‘Ame hakhami mbangukamba imeme yami, nu mbanguyibamba.’—EZEK. 34:11.
LUNGIMBO 105 « Dieu est amour »
NDAGA JIDI MU LONGO EDI *
1. Luholo lutshi Yehowa gadi gifua mama?
MU TANGUA dia profete Yeshaya, Yehowa wahudile egi: “Mukhetu wajiya gubuita mutshima gudi mun’enji ya gitebe yadi muwamuesa ba?” Gungima, Nzambi wawambelele athu enji egi: “Ngatshima mama wajiya gubuita mun’enji mutshima, uvi ame mbangumibuitshigo mutshima ndo.” (Yesh. 49:15) Nzambi gajiyilego gudifuanesa nu mama. Uvi mu verse eyi, udi gudifuanesa nu mama. Yehowa wafuanesele guzumba guakhala nago mama gudi mun’enji nu guzumba guenji guakola gakhala nago mukunda nu akombeledi enji. Amama avula ajiya guzuela gifua muazuelele phangi wa mukhetu mu jina dia Jasmin egi: “Gusansa mona guana gutukuatesa ha gukuata ufuta wakola n’enji lujingu luagasue.”
2. Luholo lutshi Yehowa wana gudivua gula mukombeledi wenji waleba mu nyuma?
2 Yehowa wana jiya muabonga tangua akombeledi enji ana bemba guza mu gudibungisa gua mu hungu, nu guya mu mudimo wa gulongesa. Nzambi wana guvua gikenene giavula tangua akombeledi enji avula ana guleba mu nyuma * givo nu givo.
3. Ndaga itshi Yehowa gana tshigina?
3 Gula aphangi a mala nu akhetu anyi alebele gale mu nyuma avutugila luko gulongesa nu guza mu hungu, tuana guayamba nu gusuanguluga guagasue! Yehowa wana tshigina egi aphangi ene avutuge, esue nji tuana tshigina ngenyi. (1 Phet. 2:25) Luholo lutshi tuajiya guakuatesa ha guvutuga? Gutuama egi tuhete mvutu ya muhu owu, tudi naye gujiya thomo mukunda natshi aphangi ako ana bemba guza mu gudibungisa gua mu hungu nu guya mu mudimo wa gulongesa.
MUKUNDA NATSHI ATHU AKO ANA BEMBA GUKOMBELELA YEHOWA?
4. Mudimo wana tuma aphangi ako ha gutshita itshi?
4 Aphangi ako ana bemba egi mudimo wawo ana tshita uzule fundo dia thomo mu monyo wawo. Phangi mumoshi gu Asie mu jina dia Hung, * udi muzuela egi: “Ngakhalele mubalegesa tangua diami diavula gu mudimo. Ngakhalele gudihuiga egi, gula ngaheta makuta avula, gungima mbangukalegele giwa Yehowa. Hene ngakhalele mutshita matangua avula gu mudimo. Ngasendesele guvutuga mu gudibungisa gua mu hungu mage-mage, gungima ngabembelele diago guya. Mavu awa a Satana akhala hehi ha gubolesa ufuta wetu nu Yehowa mage-mage.”
5. Itshi phangi mumoshi wa mukhetu gakalegele tangua gatagenele nu malamba avula?
5 Aphangi ako a mala nu a akhetu ana gutagana nu milonga iko yavula yana guasagesa. Phangi mungoshi wa mukhetu gu Angleterre mu jina dia Anne, wakhala nu ana mutano. Udi muzuela egi: “Mun’ami mumoshi wavualewe nu gifu mu muila. Muko wa mukhetu wazolewe mu hungu, muko wa yala wakatele misongo ya matangi (dépression). Ngasendesele gudisagesa muavula, hene ngabembele guya mu gudibungisa gua mu hungu nu guya mulongesa. Ngalebele diago mu nyuma.” Tuana guvuila diago Anne nu fami yenji khenda nu aphangi ako adi mutagana nu malamba a luholo lumoshi!
6. Luholo lutshi gutuna gukalegela ndaga jidi mu Kolosai 3:13 guajiya gutuma muthu ha gubemba gudibungisa nu akombeledi a Yehowa?
6 Tanga Kolosai 3:13. Akombeledi a Yehowa ako ana guvua khabu mukunda nu ndaga jiana gukalagala aphangi a mu hungu. Mupostolo Phaula wazuelele egi, matangua ako tuajiya ‘gukhala nu ndaga’ nu phangi wa yala nga wa mukhetu. Ajiya gutukagela ndaga jiabola. Gula tuatemelego, tuajiya gubamba khabu mu mutshima. Gubamba khabu mu mutshima guajiya gutuma muthu ha gubemba gudibungisa nu akombeledi a Yehowa. Tutadile gifezegeselo gia phangi mumoshi gu Amérique du sud mu jina dia Pablo. Amumbidile mambo egi watshitshi ndaga imoshi yabola, hene gatotesele inemo yenji mu hungu. Itshi gatshitshile gungima? Udi muzuela egi: “Ngavuile khabu jiakola, nu ngabembele guya mu gudibungisa gua mu hungu nu gulongesa.”
7. Itshi yajiya gubuila muthu udi nu gikenene giakola mukunda nu gubola gakalegele?
7 Gula muthu watshitshile gubola mualeha, mutshima wenji wajiya gumusagesa, wajiya gusendesa gutangiza egi Yehowa mbagashigo gumuzumba luko. Ngatshima wabalumuine gale mutshima nu wamonesewe gale khenda jia Nzambi, uvi wajiya gulandula gutangiza egi gashigo watagana ha gukhala mukombeledi wa Nzambi. Phangi mumoshi mu jina dia Francisco wadivuile nji ngenyi. Udi muzuela egi: “Angubalediele mu hungu handaga ngakalegele uthambi. Ngakhalele muya mu gudibungisa, uvi gungima ngasendesele gudisagesa nu gutangiza egi ngushigo ngatagana ha gukhala mukatshi dia Matemue a Yehowa. Ngakhalele muvua gikenene tangua diagasue, nu gutangiza egi Yehowa mbagashigo gungutotesela. Gungima, ngabembele guya mu gudibungisa gua mu hungu nu gulongesa.” Luholo lutshi wana gudivua mukunda nu aphangi adi mutagana nu ndaga gifua eji tuazuelela haha? Wana guavuila khenda ba? Yehowa wana gudivua gikuatshi mukunda nu aphangi ene?
YEHOWA WANA ZUMBA IMEME YENJI
Muenya Isalele mumoshi udi mubamba muabonga gimeme ginyi giatotele (Tala paragrafe 8-9) *
8. Yehowa wana buita mutshima wa athu anyi amukalegele mudimo ba? Kotelesa.
8 Yehowa gana jimbila ndo akombeledi enji anyi akhalele gumukombelela uvi mu tangua dimoshi ngenyi abemba gumukombelela; gana buitago mutshima gu mudimo amukalegele. (Heb. 6:10) Profete Yeshaya wasonegele gifezegeselo giabonga ha gumonesa luholo Yehowa gana gubamba akombeledi enji. Wasonegele egi: “Muene mbawukhala gifua mubambi wa imeme. Muene mbawubungisa imeme yenji fundo dimoshi, mubambi mbawuzangula ana imeme ha mago enji.” (Yesh. 40:11) Luholo lutshi Yehowa mubambi wakoma wa imeme gana gudivua gula gimeme gienji gimoshi giatungagana? Yesu wamonesele luholo Yehowa gana gudivua tangua gazuelele egi: “Itshi mudi mutangiza? Gula muthu udi nu imeme 100, gimoshi giatota mbagabembigo imeme 99 mu mulundu ha guya mukamba gimoshi giatotshi ba? Gula wagimona, giamatshidia ngudi gumiwambela egi gusuanguluga guenji gu gimeme ginyi gudi mubalega gua imeme 99.”—Mat. 18:12, 13.
9. Luholo lutshi mu tangua dikulu abambi a imeme abonga akhalele mubamba imeme yawo? (Tala gifuanesa holu dia gizula.)
9 Mukunda natshi tudi naye gufuanesa Yehowa nu mubambi wa imeme? Handaga mu tangua dikulu, mubambi wa imeme wabonga wakhalele mubamba kiawaha imeme yenji. Ha gufezegesa, Davidi washiyile khoshi nu uluse ha gubamba imeme yenji. (1 Sam. 17:34, 35) Mubambi wa imeme wabonga wana jiya gula gimeme gimoshi giatota. (Yone 10:3, 14) Mubambi wa imeme wa luholo elu wajiya gubemba imeme 99 mu fundo dia ubambi nga ha mago a mubambi muko, ha guya mukamba gimoshi giatotshi. Yesu wahanele gifezegeselo giene ha gulongesa longo edi dia ndando: ‘Tata udi mu dilu gashigo mutshigina egi nga mun’enji mungoshi wazonda atote.’—Mat. 18:14.
Mubambi mumoshi wa imeme wa gu Isalele ikulu udi mukuatesa gimeme gienji giatotele (Tala paragrafe 9)
YEHOWA WANA KAMBA IMEME YENJI
10. Ha gutadila Ezekiele 34:11-16, itshi Yehowa gatendelele mukunda nu imeme yenji yatotele?
10 Yehowa wana gutuzumba mukut’etu agasue, ikhale anyi adi gifua ‘gimeme giazonda’ giatotele. Mu njila ya profete Ezekiele, Nzambi watendelele egi mbawukamba imeme inyi yatotele nu mbawuyikuatesa ha guvutula ufuta wabonga n’enji mu nyuma. Wamonesele ndaga gadi naye gutshita ha guyihuluisa, gifua muakhalele mutshita abambi a imeme a gu Isalele gula gimeme gienji giatotshi. (Tanga Ezekiele 34:11-16.) Thomo, mubambi wa imeme wakhalele naye gukamba gimeme, nu yakhalele naye gumuzula tangua nu ngolo jiavula. Gula wamona gimeme giene, wakhalele muvutuga nagio mu dinda. Gula gimeme giene gianamana nga gula gidi nzala, mubambi udi naye gugikuatesa nu guzumba guagasue, gagijitshiga gibanji ha phuta, gagihanyi ima ya gudia. Akulu, mudi abambi a “imeme ya Nzambi,” mudi naye gutshita luholo lumoshi ha gukuatesa imeme inyi yawungagana. (1 Phet. 5:2, 3) Akulu adi naye guyikamba, guyikuatesa ha guvutuga mu hungu, nu guyimonesela guzumba tangua adi guyihana ukuateshi watagana mu nyuma. *
11. Ndaga itshi mubambi wabonga wa imeme wana gujiya?
11 Mubambi wabonga wa imeme wana jiya egi gimeme giajiya gutota. Gula gimeme gimoshi giatungagana, mubambi muene gajiyilego gugihana lamba. Tutadile luholo Nzambi gakhalele mukuatesa akombeledi enji anyi atunyile gumukombelela mu tangua dimoshi ngenyi.
12. Luholo lutshi Yehowa gakalegele Yona ndaga?
12 Profete Yona walengele mudimo wamuhanele Yehowa. Uvi, Yehowa gamutunyilego. Wamuhuluishile, wamukuatesele ha guheta ngolo gakhalele najio funu ha gutagenesa ginemo gienji, gifua muana tshita mubambi wabonga wa imeme. (Yona 2:7; 3:1, 2) Gungima, Nzambi wazolele gamutshi ga mudio ha gukuatesa Yona ha gujiya egi monyo wa athu udi nu ndando. (Yona 4:10, 11) Longo ditshi tuajiya guzula? Akulu ashigo naye gutuna aphangi anyi adi muleba mu nyuma. Uvi, adi naye gukamba gujiya ndaga idi mutuma gimeme ha guleba mu nyuma. Gula gimeme giene giavutuga gudi Yehowa, akulu adi naye gulandula gugimonesela guzumba.
13. Longo ditshi tuajiya guzula mu luholo Yehowa gakalegele ndaga gudi muyimbi wa Ngimbo 73?
13 Muyimbi wa Ngimbo 73 walebele muila tangua gakhalele mumona luholo athu abola akhalele mubinga mu lujingu. Wadihudile gula gukalegela Nzambi gudi diago nu ndando. (Ngi. 73:12, 13, 16) Itshi Yehowa atshitshile? Gamubelelego. Uvi watshitshile egi mbimbi jiene jisonegewe mu Biblia. Gungima, muyimbi wa ngimbo muene wakotelesele egi gukhala nu ufuta wabonga nu Nzambi guabalega ima iko yagasue ndando. (Ngi. 73:23, 24, 26, 28) Longo ditshi tuajiya guzula? Akulu ashigo naye gusophesa muphushi aphangi anyi adi gudihula gula gukombelela Yehowa gudi diago nu ndando. Ha fundo dia guabela, akulu adi naye gukamba gujiya mukunda natshi aphangi ene adi muzuela nga adi mukalagala ndaga jia luholo elu. Gungima adi naye gukalegela Biblia ha guahana gikhesa adi nagio funu.
14. Mukunda natshi Eliya gakhalele nu funu ya ukuateshi, nu luholo lutshi Yehowa gamukuatesele?
14 Profete Eliya wakhalele mulenga Yezabele Fumu wa mukhetu. (1 Maf. 19:1-3) Wakhalele mutangiza egi gushigo nga muthu muko wakhalele mukalegela Yehowa gifua phofete, wakhalele luko mutangiza egi mudimo wenji wakhalelego nu ndando. Eliya wavuile gikenene giavula nu watogele egi nga wafua genji. (1 Maf. 19:4, 10) Uvi Yehowa gabelelego Eliya, wamukuatesele ha gujiya egi gashigo hakhenji, ha guhaga mutshima gu ngolo jia Nzambi, nu ha gujiya egi wakhalele luko nu mudimo wavula wa gutshita. Yehowa wategelele Eliya muabonga tangua gakhalele muzuelela malamba enji, nu wamuhanele inemo ihe-ihe. (1 Maf. 19:11-16, 18) Longo ditshi tuajiya guzula? Nu akulu, nu esue, mukut’etu agasue, tudi naye gukalegela imeme ya Nzambi ndaga nu gisemo. Akulu adi naye gutegelela muabonga phangi yonu udi nu khabu, nga yonu udi muzuela egi Yehowa mbagashigo gumutotesela tangua gadi muzola ndaga jidi mu mutshima wenji. Gungima, adi naye gukamba gumukuatesa ha gujiya egi udi nu ndando gu meso a Yehowa.
LUHOLO LUTSHI TUDI NAYE GUDIVUA MUKUNDA NU GIMEME GIATOTELE?
15. Ha gutadila Yone 6:39, luholo lutshi Yesu gakhalele mutadila imeme ya Sh’enji?
15 Yehowa wana tshigina egi tudivue gikuatshi mukunda nu imeme inyi yatotele? Yesu watubembele gifezegeselo gu ndaga eyi. Wakhalele mujiya egi imeme yagasue idi nu ndando gu meso a Nzambi, hene Yesu gatshitshile yagasue ha gukuatesa “imeme ya gutota ya giphuta gia Isalele” ha guvutuga gudi Yehowa. (Mat. 15:24; Luka 19:9, 10) Yesu wakhalele mubambi wabonga, wakalegele yagasue hagula nga gimeme gimoshi gia Yehowa gitotshigo.—Tanga Yone 6:39.
16-17. Luholo lutshi akulu adi naye gukuatesa athu anyi abembele gale gukombelela Yehowa? (Tala galuanda “ Luholo Gimeme gia Gutota Giana Gudivua.”)
16 Mupostolo Phaula watogele akulu a mu hungu dia Efeso ha gulandula gifezegeselo gia Yesu. Waawambelele egi: “Mudi nayo ya gutshita mudimo ngenyi ha gukuatesa adi uphutu nu guwunguluga mbimbi jia Fumu Yesu hazuelele muene egi: ‘Gusuanguluga guavula gudi nu muthu udi muhana gubalega muthu udi mutambula.’” (Makal. 20:17, 35) Verse eyi idi mumonesa egi akulu adi nu ginemo giakola gia gubamba imeme ya Yehowa. Mukulu mumoshi gu Espagne mu jina dia Salvador udi muzuela egi: “Gula ngatangiza luholo Yehowa gana kuatesa imeme yenji yatotele, yana gungutuma ha gutshita yagasue ngajiya gutshita ha guyikuatesa. Ngudi mujiya egi Yehowa wana tshigina egi ngubambe imeme yenji.”
17 Aphangi agasue ambelele gukombelela Yehowa anyi atangewa mu longo edi, ahetele ukuateshi ha guvutuga gudi Yehowa. Hene, aphangi anyi abembele gale gukombelela Yehowa, adi naye nji guvutuga. Longo dialandula mbadizuelela muavula ndaga tuajiya gutshita ha guakuatesa ha guvutugila Yehowa.
LUNGIMBO 139 Imagine-toi dans le monde nouveau
^ par. 5 Mukunda natshi akombeledi a Yehowa ako akhalele gumukombelela sendese mualeha ana bemba gumukombelela? Nzambi wana gudivua gikuatshi mukunda nu akombeledi ene? Tumuza muheta mvutu jia mihu eyi mu longo edi. Tuza mumona nji malongo tuajiya guzula luholo Yehowa gakuatesele akombeledi enji a mu tangua dikulu anyi atunyile gukalagala ndaga jiaatogele muene.
^ par. 2 UKOTELESHI WA MBIMBI: Muklisto wa guleba mu nyuma udi mulongeshi yonu wabembele gale gulongesa mbeji jisamano nga nu holu. Ikhale aphangi awa a mala nu a akhetu alebele gale, uvi esue tuana guazumba.
^ par. 4 Mu longo edi, majina ako asombegesewe.
^ par. 10 Longo dialandula mbatuzuelela luholo akulu ajiya gukalegela ndaga eji thathu tuazuelela.
^ par. 60 UKOTELESHI WA IFUANESA: Mubambi mumoshi wa imeme gu Isalele wavua gikenene mukunda nu gimme giatotele, wagikamba nu wagikuatesa ha guvutuga mu dinda. Mangino, abambi a imeme a mu nyuma adi naye nji gutshita ngenyi.
^ par. 64 UKOTELESHI WA IFUANESA: Phangi mumoshi wa mukhetu yonu walebele gale mu nyuma udi mu bus, wamona Matemue a Yehowa mbadi adi mulongesa nu gusuanguluga guagasue ha fundo dia athu avula.
