1. ¿Imaynanpitaq taytanchik Jehovaqa chay kutipi nirqa mamanchik hina kasqanta?

ÑAWPAQ tiempopim taytanchik Jehova yupaychaqninkunata nirqa: ‘¿Yaqachu ñuñusqan wawata maman qunqarunman? [...] Ichapas mamanqa wawanta qunqarunman, ñuqam ichaqa mana qunqasqaykichikchu’, nispa (Is. 49:15). ¿Imaynanpitaq taytanchik Jehovaqa chay kutipi nirqa mamanchik hina kasqanta? Anchata kuyawasqanchikraykum. Imaynam mamapas ñuñusqan wawachanta ancha-anchata kuyan, chaynam taytanchik Jehovapas kuyawanchik. Iñiqmasinchik Yasminpas ninmi: “Wawachanchiktaqa ñuñusqanchikraykum ancha-anchata kuyakunchik”, nispa.

2. ¿Imaynam tarikun taytanchik Jehovaqa pipas chiriyaruptinqa?

² Taytanchik Jehovaqa yachanmi ñuqanchikmanta huk kaqninchik manaña willakusqanchikta, manaña huñunakusqanchikta. Chayraykum taytanchik Jehovaqa pipas chiriyaruptinqa ancha-anchata llakikun. *

3. ¿Imatam taytanchik Jehovaqa munan?

³ Chiriyaruq iñiqmasinchikkuna kaqllamanta ñuqanchikwan huñunakuptinkuqa ancha-anchatam kusikunchik. Taytanchik Jehovapas ancha-anchatam munan chiriyaruq iñiqmasinchikkuna payman kutirikamunankuta, ñuqanchikpas chaytam munanchik (1 Ped. 2:25). ¿Imaynatam yanapachwan chiriyaruq iñiqmasinchikkunata taytanchik Jehovaman kutirikamunankupaq?  Kaymanta manaraq yachaykuchkaspa puntata qawaykusun imanasqa achka iñiqmasinchikkuna chiriyasqankumanta.

4. ¿Imamanmi chayanku llamkayllamanña qukuruq iñiqmasinchikkunaqa?

⁴ Wakin iñiqmasinchikkunaqa chiriyarunku llamkayllamanña qukurusqankuraykum. Iñiqmasinchik Julianpas * ninmi: “Llamkayllamanñam qukururqani. Ñuqaqa nirqani achka qullqiyuq kaspayqa astawanmi taytay Jehovamanta willakusaq nispay. Chayraykum astawan llamkayta qallaykurqani, ichaqa manañam huñunakuykunamanqa rirqanichu. Pisi-pisimantam iñiqmasinchikkunamanta karunchakururqani. Kay pachapi imapas kaqkunaqa pisi-pisimantam taytanchik Jehovamanta karunchawasqanchik”, nispa.

5. ¿Imamanmi chayarurqa iñiqmasinchik Anatolia sasachakuypi kasqanrayku?

⁵ Wakin iñiqmasinchikkunaqa sasachakuypi tarikusqankuraykum chiriyanku. Iñiqmasinchik Anatoliapas ninmi: “Warmachaytam wachakururqani qalaypaq unquqta. Chaymantañataqmi warmi warmay taytanchik Jehovamanta karunchakururqa, qari warmayñataqmi umanwan llumpayta unqururqa. Chaykunawan llumpa-llumpayta hukmanyarusqayraykum manaña huñunakurqanichu nitaq willakurqanichu. Qalaypaqmi chiriyarurqani”, nispa. Ñuqanchikpas ancha-anchatam llakikunchik kay iñiqmasinchik Anatolia hina llakipi tarikuqkunamanta.

6. ¿Imamanmi chayaruchwan Colosenses 3:13 nisqanta mana kasukuspaqa?

⁶ (Qaway Colosenses 3:13). Wakin iñiqmasinchikkunaqa piwanpas piñanakurusqankuraykum chiriyanku. Apostol Pablopas nirqam wakinpiqa hukmanyanakunanchikmanta. Piwanpas hukmanyanakuruspa mana pampachanakuspaqa, iñiqmasinchikkunamantam karunchakuruchwan. Iñiqmasinchik Emiliotapas chaynam pasarurqa. Paytaqa yanqamantam niykurqaku mana allinta ruwarusqanta. Chayraykum paytaqa punta apaqkuna niykurqaku manaña imapipas yanapakunanpaq. ¿Imaynam chayrayku Emilio tarikurqa? Paymi willakun: “Llumpa-llumpaytam piñakururqani, chayraykum iñiqmasinchikkunamanta karunchakururqani”, nispa.

7. ¿Imamanmi chayaruchwan imapas ruwasqanchikta hinalla yuyarayaspaqa?

⁷ Wakin iñiqmasinchikkunañataqmi ñawpaqpi imapas ruwarusqankuta yuyarayasqankurayku chiriyanku. Paykunaqa huchankumantam anchata ñakakunku. Taytanchik Jehova pampachaykuptinñapas hinallaraqmi hukmanyasqa tarikunku. Chayrayku ichapas karunchakuyta qallaykunmanku. Iñiqmasinchik Franciscopas ninmi: “Huchallikurusqayraykum ancha-anchata hukmanyarurqani. Chaywanpas rirqaniraqmi huñunakuykunamanqa, ichaqa llumpa-llumpayta hukmanyarusqayraykum manaña munarqanichu iñiqmasinchikkunawan kaytaqa. Nikurqanim taytanchik Jehovaqa mana pampachawasqanmanta. Chayraykum manaña willakurqaniñachu nitaq huñunakuykunamanpas rirqaniñachu”, nispa. ¿Imatam nichwan chayna sasachakuypi tarikuq iñiqmasinchikkunamanta? ¿Llakipayanchikchu paykunata? ¿Taytanchik Jehovaqa yuyanraqchu paykunata?

8. ¿Imaynatam yachanchik chiriyaruq iñiqmasinchikkunata taytanchik Jehova mana qunqarusqanta?

⁸ Taytanchik Jehovaqa manam qunqanchu chiriyaruq iñiqmasinchikkunataqa (Heb. 6: 10). Payqa llapallan yupaychaqninkunamantam nanachikun. Paymanta willakuq Isaiaspas nirqam: “Ovejankunata michinanpaqmi hamunqa, uñachankunatam marqayninpi apanqa, chayllaraq wachakuq ovejakunatam allillamanta pusanqa”, nispa (Is. 40:11). ¿Imaynam taytanchik Jehova tarikun huk kaqnin iñiqmasinchik chiriyaruptin? Taytanchik Jehova imayna tarikusqanmanta yachanankupaqmi qatiqninkunaman Jesus kaynata nirqa: “¿Ima ninkichiktaq? Pachak ovejayuq runapa huknin ovejan chinkaruptinqa, ¿manachu isqun chunka isqunniyuq ovejanta urqupi saqiykuspan chay chinkasqa ovejanta maskaq rinqa? Tariruspanmi ichaqa isqun chunka isqunniyuq mana chinkasqa ovejankunamantapas aswanqa kusikun chinkaruq ovejanta tarirusqanwan”, nispa (Mat. 18:12, 13).

9. ¿Imaynam kanku oveja michiqkunaqa? (Qaway qaranpi kaq dibujota).

⁹ ¿Imaynanpitaq taytanchik Jehovaqa oveja michiq hina? Michiqkunaqa allintam harkanku ovejankuta. Davidpas ovejankunatam allinta harkaq leonmanta hinaspa ukumarimanta (1 Sam. 17:34, 35). Michiqqa yachanmi mayqin ovejan chinkarusqanta (Juan 10:3, 14). Chayraykum chaylla wakin ovejankunata kanchanman qaykuykuspan utaq pimanpas saqipakuykuspan chinkaq ovejanta maskaq pasan. Chaynam taytanchik Jehovapas. Jesusmi nirqa: “Taytay Jehovaqa manam munanchu kay uchuychakunamanta hukllanpas chinkarunantaqa”, nispa (Mat. 18:14).

10. Ezequiel 34:11-16 nisqanman hinaqa, ¿imatam taytanchik Jehova nirqa Ezequielman?

¹⁰ Taytanchik Jehovaqa ancha-anchatam llapallanchikta kuyawanchik. Chiriyaruq iñiqmasinchikkunatapas manam qunqanchu. Taytanchik Jehovaqa paymanta willakuq Ezequielmanmi nirqa chinkaruq churinkunata maskamuspa yanapananmanta. Chaytaqa ruwanan karqa michiq chinkaruq ovejanta maskachkaq hinam (qaway Ezequiel 34:11-16). Michiqqa chinkaruq ovejantam tarinankama  maskan, tariruspanñataqmi kanchanman kutichin. Umpuruptinpas kuyakuywanmi hampiykun, yarqaymanta kaptinpas mikuykachinmi. Punta apaqkunapas michiqkuna hinam yanapananku chiriyaruq iñiqmasinchikkunata taytanchik Jehovaman kutirikamunankupaq (1 Ped. 5:2, 3). Michiqpas imaynam chinkaruq ovejanta maskan, chaynam maskananku chiriyaruq iñiqmasinchikkunata. *

11. ¿Imatam yachanku michiqkunaqa?

¹¹ Michiqqa yachanmi ovejankuna chiqirunanta, chaymi allinta harkan. Chiqiruptinpas allinllatam huñun. Chaynatam taytanchik Jehovapas ñawpaq tiempopi hukmanyaruq yupaychaqninkunata yanaparqa.

12. ¿Taytanchik Jehovaqa saqirurqachu Jonasta?

¹² Taytanchik Jehovamanta willakuq Jonasqa, taytanchikta mana kasukuspanmi huk lawman pasakurqa. Chaywanpas taytanchik Jehovaqa manam saqirurqachu, aswanqa hinallam yanaparqa kamachisqanta ruwananpaq (Jon. 2:7; 3:1, 2). Huk kutipim taytanchik Jehovaqa Jonasta yachachirqa, runakunapa kawsakuyninqa imamantapas aswan allin kasqanmanta (Jon. 4:10, 11). ¿Imatam yachachwan taytanchik Jehovamanta? Punta apaqkunaqa manam saqirunankuchu chiriyaruq iñiqmasinchikkunataqa, aswanmi kallpanchakunanku imaynanpi chiriyarusqankuta yachanankupaq. Chiriyaruq iñiqmasinchikkuna taytanchik Jehovaman kutirikamuptinkupas hinallam kuyakuywan yanapananku.

13. ¿Imatam yachachwan salmo qillqaqwan taytanchik Jehova mana chaylla piñakurusqanmanta?

¹³ Salmo qillqaqkunamanta huk kaqninpas llumpa-llumpaytam hukmanyarurqa mana allin ruwaqkuna allin kawsakusqanta qawaspan, chayraykum niyta qallaykurqa taytanchik Jehovata kasukuyqa yanqa kasqanta (Sal. 73:12, 13, 16). ¿Taytanchik Jehovaqa piñakurqachu chaynata nisqanwan? Manam. Aswanqa nirqaraqmi imayna tarikusqanmanta bibliapi qillqananpaq. Chaymanta qipamanmi  salmo qillqaqqa musyakurqa taytanchik Jehovata kasukuyqa allin kasqanta (Sal. 73:23, 24, 26, 28). ¿Imatam yachachwan kaymanta? Punta apaqkunaqa manam chayllachu piñakunanku chiriyasqa iñiqmasinchikkuna taytanchik Jehovata yupaychay yanqa kasqanta niptinkuqa. Chaylla piñakurunankumantaqa kallpanchakunankum imaynanpi chayna nisqankuta yachaykunankupaq. Chaypaq kallpanchakuspallankum yanapaytaqa atinqaku.

14. ¿Imaynanpitaq taytanchik Jehovaqa Eliasta yanapaykurqa, imaynatam yanapaykurqa?

¹⁴ Diosmanta willakuq Eliaspas llumpa-llumpaytam hukmanyarurqa Jezabel wañurachinanpaq maskaptin (1 Rey. 19:1-3). Eliasqa sapallanña Diosmanta willakuq kasqanpaqmi hapikurqa, nikurqataqmi Diospaq imapas ruwasqanqa yanqa kasqanta, chayraykum wañuyllataña munarqa (1 Rey. 19:4, 10). Chaynata nikuptinpas taytanchik Jehovaqa manam chayllachu piñakururqa, aswanqa kallpanchaykurqam mana sapallan kasqanmanta nispan. Taytanchik Jehovaqa imayna tarikusqanmanta Elias willakuptinmi, sumaqta uyariykurqa, hinaspapas hinalla ruwanankunata ruwananpaqmi kallpanchaykurqa (1 Rey. 19:11-16, 18). ¿Imatam kaymanta yachachwan? Llapallanchikmi chiriyaruq iñiqmasinchikkunata kuyakuywan yanapananchik, aswanraqmi punta apaqkunaqa. Chiriyaruq iñiqmasinchikkunaqa, wakinpiqa hawanpi-ukunpim imatapas rimarunmanku, chaywanpas punta apaqkunaqa sumaqtam uyariykunanku. Sumaqta uyariykuspankuñam  taytanchik Jehovaman kutirikamunankupaq yanapananku.

15. Juan 6:39 nisqanman hinaqa, ¿imatam Jesusqa ruwarqa?

¹⁵ ¿Saqirunanchikchu chiriyaruq iñiqmasinchikkunata? Manam. Taytanchik Jehovaqa llapallanchiktam kuyawanchik, chayraykum Jesuspas kay allpa pachapi kachkaspan tukuyta ruwarqa chiriyaruq iñiqkunata yanapananpaq (Mat. 15:24; Luc. 19:9, 10). Jesusqa ovejankunamanta nanachikuq hinam mana saqirqachu mayqillanpas chinkarunantaqa (qaway Juan 6:39).

16, 17. ¿Imaynatam punta apaqkunaqa yanapanmanku chiriyaruq iñiqmasinchikkunata? (Qaway “¿Imaynataq tarikunku chiriyaruq iñiqmasinchikkunaqa?” niqta).

¹⁶ Efeso llaqtayuq punta apaqkunatam apostol Pablo nirqa Jesusta qatipakunankupaq. Rimapayarqam allinta kallpanchakuspanku chiriyasqakunata yanapanankupaq, hinaspa Jesuspa nisqata mana qunqanankupaq. Jesusmi nirqa: “Imapas quqmi aswan kusisqaqa imapas chaskiqmantaqa”, nispa (Hech. 20:17, 35). Chaynaqa, punta apaqkunaqa chaypaqmi anchata kallpanchakunanku. Punta apaq iñiqmasinchik Aureliopas ninmi: “Taytanchik Jehovaqa chiriyaruq iñiqmasinchikkunatapas anchatam kuyan, chaymanta yachayniymi ñuqataqa yanapawan chiriyaruq iñiqmasinchikkunata mana saqiruspay hinalla yanapanaypaq. Taytanchik Jehovaqariki munan paykunata yanapananchiktam”, nispa.

¹⁷ Kaypi rimamusqanchik iñiqmasinchikkunaqa llapallankum chiriyasqa karqaku, ichaqa punta apaqkuna yanapaykusqanraykum kaqmanta taytanchik Jehovaman kutirikamurqaku. Paykuna hinam achka chiriyasqa iñiqmasinchikkuna taytanchik Jehovaman kutirikamuyta munachkanku. ¿Imaynatam paykunata yanapaykuchwan? Hawantam kaymanta astawan yachachkasun.