1. ¿Piwanmi Jehová Dios tupanachikun? ¿Imarayku?

PROFETA Isaiaspa tiempopin Jehová Diosqa llaqtanta niran: “¿Warmiqa ñuñusqan wawata qonqanmanchu? [...] Mamanña qonqapunqa chaypas, manan ñoqaqa qonqasaqchu”, nispa (Is. 49:15). Chaypi nisqan jina, imaynan juj warmi wawanta munakun chhaynatan Jehová Diosqa serviqninkunata anchata munakuwanchis. Chaymanta rimaspan Jasmin sutiyoq hemananchis niran: “Ñuñukusqayki wawachaykitaqa manan jayk’aqpas qonqakuwaqchu. Imamantapas astawanraqmi wawaykitaqa munakunki”, nispa.

2. ¿Llakikunchu Jehová Dios chiriyapuq iñiqmasinchiskunamanta?

² Jehová Diosqa yachanmi mayqen iñiqmasinchischá manaña juñunakuykunaman jamushanchu, manaña paymanta willaqpas lloqsishanchu chaytaqa. Sapa watanmi pachantimpi waranqa más iñiqmasinchiskuna iñiyninkupi chiriyapunku, chaymi Jehová Diosqa anchata llakikun, sonqonraqmi nananpas. *

3. ¿Imatan Jehová Diosninchis munashan?

³ Jehová Diosqa munashanmi chiriyapuq iñiqmasinchiskuna llaqtanman kutimpunankuta, chaymi kutimpuqtinkuqa anchata kusikun (1 Ped. 2:25). ¿Imaynatan chiriyapuq  iñiqmasinchiskunata yanapasunman? Chaymantan kaypi yachasunchis, ñaupaqtan ichaqa yachasunchis imaraykus wakin iñiqmasinchiskuna iñiyninkupi chiriyapunku chayta.

4. ¿Iman pasanman nishuta llank’ayllaman qokuqtinchis?

⁴ Wakin iñiqmasinchiskunaqa llank’aymanmi nishuta yuyayninkuta churanku. Asia ladopi tiyaq Jhon * sutiyoq iñiqmasinchismi nin: “Nishutan llank’anallaman qokurani. Piensaranin askhata qolqeta ganaspa Jehová Diosta aswan allinta servinaypaq. Chaymi sapa p’unchay ch’isiyaqta llank’ayta qallarirani, jinan juñunakuykunaman manaña ripuranichu. Qhepamanqa Jehová Diospa llaqtanmantan t’aqakapurani. Chaykunapi piensaspan reparani: ‘kay pachapi kaqkunaqa facil-llatan Jehová Diosmanta t’aqasunkiman”, nispa.

5. ¿Iman pasaran Anne iñiqmasinchiswan sinchi llakikuykunapi tarikusqanrayku?

⁵ Wakin iñiqmasinchiskunaqa sinchi sasachakuykunapi tarikuspan iñiyninkupi chiriyapunku. Chaymi pasasqa Gran Bretaña nacionmanta iñiqmasinchis Anawan. Payqa pisqa wawayoqmi, paymi nin: “Juj kaq wawaymi mana allinchu naceran, chayta yachaspan sinchita llakikurani. Chaymantapas juj kaq ususiymi Diospa llaqtanmanta lloqsipuran, tiempowanqa juj kaq wawaypipas juj onqoytan tariranku. Chaykunawanmi sinchita llakikurani jinan pisi-pisimanta manaña juñunakuykunaman riqchu kani, Diosmanta willaqpas manañan lloqsipuranichu, chhaynapin iñiyniypi chiriyapurani”, nispa. May llakikunapaqmi iñiqmasinchis Ana jina, askha iñiqmasinchiskunapas sinchi sasachakuykunapi tarikusqankuta yachayqa.

6. ¿Iman pasanman Colosenses 3:13 nisqanta mana kasukuqtinchis?

⁶ (Leey Colosenses 3:13). Wakin iñiqmasinchiskunaqa k’irisqan sientekunku, chaymi Jehová Diospa llaqtanmanta t’aqakapunku. Apóstol Pabloq nisqan jina, mayninpiqa razonwanpaschá iñiqmasinchiskunapaq phiñakusunman. Wakinqa yaqapaschá mana chaninta imatapas ruwawasunman jinaspa sientepakuspa Diospa llaqtanmanta t’aqakapusunman. Chaymi cuidakunanchis ama phiñasqalla kananchispaq. Sudamérica ladomanta iñiqmasinchis Pablomanta yachasun. Paytaqa yanqamantas juj iñiqmasinchis tumpasqa, chaysi iñiq t’aqapi manaña yanapakuyta atisqachu. ¿Imatan iñiqmasinchis Pablo ruwaran? Paymi nin: “Sinchi phiñasqan kasharani, chaymi Diospa llaqtanmanta pisi-pisimanta t’aqakapurani”, nispa.

7. ¿Iman pasanman nishuta juchachakuqtinchis?

⁷ Wakin iñiqmasinchiskunaqa juchamanmi urmaranku, ichaqa pesapakusqankuraykun Jehová Diosqa paykunata perdonaran. Chaywanpas juchachakuspan ninku: “Manan Jehová Diosqa perdonawanmanchu karan”, nispa. Chaymi pasasqa iñiqmasinchis Franciscowan, paymi nin: “Qhelli juchaman urmasqayraykun umalliqkunaqa anyawaranku. Jehová Dios mana perdonawananpaqmi piensaq kani, chaymi sinchita concienciay mat’ipayawaq. Kallpachakusharaniña juñunakuykunaman rinaypaq chaypas, nishutan pesapakuq kani, chayraykun qhepamanqa manaña juñunakuykunaman riqchu kani, nitaq Diosmanta willaqpas lloqsiqchu kani”, nispa. ¿Imaynatan qhawarinanchis chhaynapi tarikuq iñiqmasinchiskunata?  ¿Khuyapayanchischu? ¿Imatan Jehová Dios piensan paykunamanta?

8. Jehová Diosqa manan qonqanchu serviqninkunataqa ¿Imaynatan chayta yachanchis?

⁸ Jehová Diosqa yuyashallanmi serviqninkunataqa, t’aqakunkumanña paypa llaqtanmanta chaypas manan paykunataqa qonqanchu (Heb. 6:10). Jehová Diosqa munakuywanmi cuidawanchis, chaymanta rimaspan profeta Isaiasqa niran: “Uywa michiq jinan llaqtanta michin”, nispa (Is. 40:11). Chhaynaqa, ¿imaynatan Jehová Dios sientekun ovejankuna llaqtanmanta t’aqakuqtinku? Chayta rikuchinanpaqmi Jesusqa qatikuqninkunata tapuran: “¿Ima niwaqchistaq? Juj runaqsi kanman pachaj ovejankuna, chaykunamanta jujnin chinkarunman chayri, ¿manachu payqa isqon chunka isqonniyoq ovejankunata orqopi saqeykuspa chay chinkasqa ovejanta maskhaq puririnman? Cheqaqtan niykichis: Tariruspaqa anchatan kusikunqa, mana chinkasqa isqon chunka isqonniyoq ovejankunamantapas astawanraq”, nispa (Mat. 18:12, 13).

9. ¿Imaynatan ñaupa tiempopi oveja michiqkuna ovejankuta cuidaqku? (Tapanpi kaq dibujota qhaway).

⁹ ¿Imaynapin Jehová Dios ñaupa tiempopi oveja michiqkuna jina? Ñaupa tiempo oveja michiqkunaqa allintan uywankuta cuidaqku. Davidpas allintan ovejankunata cuidaq. Chaymi ukumariwan leonwan ima maqanakuran ovejankunata cuidananpaq (1 Sam. 17:34, 35). Ñaupa tiempopi allin michiqqa reparaqpunin mayqen ovejanpas chinkaqtinqa (Juan 10:3, 14). Jesuspa nisqan jina, pachaq ovejankunamanta jujnin chinkaqtinqa, isqon chunka isqonniyoq ovejankunata corralpi saqespan chinkasqa ovejanta maskhaq kutiran. Chay willasqanwanmi Jesusqa nisharan: ‘Yayayqa manapunin munanchu kay juch’uykunamanta jujnillanpas chinkananta’, nispa (Mat. 18:14).

10. Ezequiel 34:11-16 nisqan jina, ¿imatan Jehová Dios chinkasqa ovejankunarayku ruwan?

¹⁰ Jehová Diosqa anchatan munakuwanchis,  munakullantaqmi llaqtanmanta t’aqakuq iñiqmasinchiskunatapas. Chaymi profeta Ezequielwan willachiran chinkasqa ovejankunata maskhananta, tarispataq llaqtanman pusamunanta, jampinanta ima. Chaytan ñaupa tiempopi oveja michiqkunapas ruwaqku (leey Ezequiel 34:11-16). Oveja michiqqa chinkasqa ovejantan tarinankama maskhaq. Tarispataq wakin ovejankunaq kasqanman apaq, k’irisqa kaqtintaq munakuywan jampiq mijuchiq ima. Umalliqkunapas Jehová Diospa ovejankunatan michishanku. Chaymi kallpachakunanku iñiyninkupi chiriyapuqkunata yanapanankupaq (1 Ped. 5:2, 3). ¿Imaynatan chayta ruwankuman? Chiriyapuq iñiqmasinchiskunatan maskhananku. Tarispataq yanapananku Jehová Diospa llaqtanman kutimpunankupaq, jinaspapas munakuywanmi yanapananku iñiyninkupi allin kanankupaq. *

11. ¿Imatan oveja michiqkuna yacharanku?

¹¹ Ñaupa tiempopi oveja michiqqa yacharanmi mayninpiqa ovejankuna chinkarunanta. Chaymi ovejankuna chinkaqtinqa mana phiñakuqchu aswanpas munakuywanmi maskhaq. Chhaynatan Jehová Diospas ñaupa tiempopi paymanta t’aqakuq serviqninkunata yanaparan. Chaymantan astawan yachasunchis.

12. ¿Imatan Jehová Dios ruwaran Jonás mana kasukuqtin?

¹² Juj kutinmi profeta Jonasqa mana Jehová Diospa kamachikuyninta kasukuranchu, chaywanpas Diosqa manan saqerpariranchu, aswanmi yanaparan profetallan kashananpaq (Jon. 2:7; 3:1, 2). Chaymantapas Jehová Diosqa juj calabazawanmi Jonasta rikuchiran runakunata khuyapayasqanta munakusqanta ima (Jon. 4:10, 11). ¿Imatan chaymanta yachasunman? Umalliqkunaqa manan ninankuchu: “Manañan chay chiriyapuq iñiqmasiqa kutimpunmanñachu” nispaqa. Aswanmi entiendenanku imaraykuchus Diospa llaqtanmanta karunchakuranku  chayta. Kutimpuqtinkutaq munakuywan iñiyninkupi yanapananku.

13. ¿Juzgaranchu Jehová Dios Salmos 73 qelqaqta? ¿Imatan chaymanta yachasunman?

¹³ Salmos 73 capitulota qelqaqmi khaynata qelqaran: “Millay runakunaqa, chutarayaspallankun astawan qhapaqyaykunku. Yanqan sonqoyta ch’uyayachini, makiytapas tukuy mana allinmanta mayllikuni”, nispa (Sal. 73:12, 13, 16). ¿Phiñakuranchu Jehová Dios chay nisqanwan? Manan. Aswanmi rimasqanta Bibliapi qelqachiran. Chaymantan chay qelqaqqa entienderan Jehová Dioswan amigontin kay ancha allinpuni kasqanta (Sal. 73:23, 24, 26, 28). ¿Imatan chaymanta yachasunman? Yaqapaschá mayqen iñiqmasipas ninman: “Yanqapaqmá Diosta serviyqa”, nispa. ¿Imatan umalliqkuna ruwananku pipas chhaynata piensaqtin? ¿Phiñakunankuchu chaywan? Manan. Aswanmi kallpachakunanku imaraykuchus chhaynata piensanku chayta entiendenankupaq, chhaynapin allinta Bibliawan kallpachanqaku.

14. ¿Imaynapin Elías tarikusharan? ¿Imaynatan Jehová Dios yanaparan?

¹⁴ Profeta Eliasqa reina Jezabel wañuchinanmantan ayqekusharan (1 Rey. 19:1-3). Jinaspapas piensaranmi pay sapallanña profeta kananpaq, Jehová Diosrayku ruwasqanpas yanqapaq kasqanta, chaymi wañuytaraq mañakuran (1 Rey. 19:4, 10). Jehová Diosqa manan juchacharanchu Eliasta, aswanmi willaran paywan kashasqanta, ruwasqanpas mana yanqapaqchu kasqanta, paypi confianantapas. Jehová Diosqa tukuy yuyaywanmi Eliaspa willakusqanta uyariran,  jinaspa juj llank’aytawan qoran (1 Rey. 19:11-16, 18). ¿Imatan chaymanta yachasunman? Llapanchismi munakuywan iñiqmasinchiskunata qhawarinanchis, astawanqa umalliqkunan. Sichus mayqen iñiqmasipas phiñasqa Jehová Diosmanta rimanman otaq Jehová Dios mana perdonananpaq piensanman chayqa, umalliqkunan tukuy yuyaywan uyarinanku. Chaymantataq kallpachananku, jinaspa Jehová Diospa ancha munakusqanta willananku.

15. Juan 6:39 nisqan jina, ¿imaynatan Jesús qhawariran Jehová Diospa ovejankunata?

¹⁵ ¿Imaynatan Jehová Diospa chinkasqa ovejankunata qhawarinanchis? Jesús jinan qhawarinanchis. Payqa imaymanatan ruwaran Israelpi ‘chinkasqa ovejakunata’ yanapananpaq, Jehová Diospa llaqtanman kutimpunankupaqpas (Mat. 15:24; Luc. 19:9, 10). Jesusqa allin michiqmi karan, chayraykun kallpachakuran Jehová Diospa ovejakunata ama chinkachinanpaq (leey Juan 6:39).

16, 17. ¿Imatan umalliqkuna ruwananku? ¿Imaraykun chay ruway ancha importante? (Qhaway “ ¿Imaynapin tarikunku chiriyapuq iñiqmasinchiskuna?” nisqata.)

¹⁶ Apóstol Pablon Éfeso llaqtapi umalliqkunata niran Jesús jina Jehová Diospa ovejankunata qhawarinankupaq. Paykunatan niran: “Tukuy kallpawan llank’aspa necesitaqkunata yanapanaykichis [...] yuyashanallaykichistaqmi Señor Jesuspa nisqantapas, paymi niran: ‘Qoypin aswan kusikuyqa kan, manan chaskiypichu’”, nispa (Hech. 20:17, 35). Chaypin Pablo rikuchisharan umalliqkunaqa tukuy yuyaywan iñiqmasinchiskunata yanapananku kasqanta. España nacionmanta Salvador sutiyoq umalliqmi nin: “Jehová Diosqa anchatan chinkasqa ovejankunata munakun, chaymi noqapas tukuy atisqayta kallpachakuni iñiyninkupi chiriyapuqkunata yanapanaypaq, cuidanaypaq ima”, nispa.

¹⁷ Kay yachachikuypi rimamusqanchis iñiqmasinchiskunaqa iñiyninkupin chiriyapuranku, ichaqa umalliqkunaq yanapayninwanmi kutimpuranku. Chaywanpas kashanraqmi Jehová Diospa llaqtanman kutimpuyta munaq iñiqmasinchiskuna. Ichaqa ¿Imaynatan paykunata yanapasunman? Chaymantan astawan qatimuq yachachikuypi yachasunchis.