1. Eaa a Iehova i akaaite ei Iaia ki tetai metua vaine te tu?

“E TIKA ainei i te vaine kia akangaropoina i tana tamaiti kai u?” Ui a Iehova i teia uianga ki te peroveta ko Isaia. “E tika ia ratou kia akangaropoina, kare ra au e akangaropoina ia koe,” i akakite ei Aia ki tona iti tangata. (Isa. 49:15) Kare aia e akaaite ana iaia ki tetai metua vaine. I teia atianga kua pera aia. Te akaari maira a Iehova i te pirianga mou i rotopu i te mama e tana tamaiti, tona inangaro akaperepere i tona au tavini. Kite te au mama i teia tu, karanga a Jasmin e, “Me utuutu koe i taau tamaiti, tupu rai te pirianga mutu kore.”

2. Eaa to Iehova manako me akamutu tetai o tana tamariki i te tavini iaia?

² Kite maira a Iehova me akamutu tetai o tana tamariki i te kapiti ki te putuputuanga Kerititiano e te rave i te angaanga tutu aere. Akamanako ana i tona mamae i te kite e tauatini ua atu tavini kua paruparu te akarongo * i te au mataiti ravarai.

3. Eaa ta Iehova e inangaro ra?

³ Maata anga o teia au taeake e te au tuaine akaperepere tei paruparu te akarongo kua oki mai ki te putuputuanga e kua āriki pumaanaia ratou! Inangaro a Iehova ia ratou kia oki mai e tatou katoa. (1 Pete. 2:25) Akapeea tatou me tauturu? Mua ake ka pauia teia uianga, e mea meitaki kia kite i  te tumu i akamutu ei tetai pae i te aere uipaanga e te rave i te angaanga tutu aere.

4. Akapeea te angaanga moni i te tavarenga anga i tetai pae?

⁴ Tetai pae kua riro ta ratou angaanga ei tavarenga ia ratou. “Kua pou ua toku tuatau no taku angaanga i te pae moni,” karanga ai a Hung, * e taeake i Southeast Asia. “Tuatua au kiaku me meitaki au i te pae moni, ka meitaki rai au i te tavini ia Iehova. No reira kua angaanga maata au. Kua varavara rai au i te aere ki te au uipaanga e kua akamutu takiri. I te akaraanga kua riro teia oraanga ei tavarenga i tetai kia kore e tavini i te Atua.”

5. Eaa tei tupu ki te tuaine no te maata i tona manamanata?

⁵ Tetai pae taeake e te au tuaine kua rokoia ratou e te manamanata, e kua akaparuparu ia ratou. Ko Anne tetai e metua vaine e rima tamariki no Peritane. “Anauia mai tetai o taku tamariki ma te maki kino,” karanga ai a Anne. “Muri mai, kua akaateaia tetai o taku tamaine mei te putuputuanga, tetai tamaiti kua tupu te maki manako kiaia. Taitaia tikai au kua akamutu au i te aere ki te uipaanga e te tutu aere. Aere ua rai kua paruparu toku akarongo.” Ka tangi tatou ia Anne e tona ngutuare e tetai ua atu taeake e na roto ra i teia manamanata!

6. Kare i aru ia Kolosa 3:13, akapeea tetai e kore ei e kapiti ki to Iehova iti tangata?

⁶ E tatau ia Kolosa 3:13. Kua mamae tetai pae tavini o Iehova i tetai taeake. Kite te apotetoro ko Paulo i tetai taime kua tau rai ta tatou “tapepeanga [i] tetai” taeake e tetai tuaine. Penei kare i tau ta ratou akono anga ia tatou. Me kare tatou e matakite, ka tupu te akamoupuku. Akakeu atura te reira i tetai kia kore e kapiti ki to Iehova iti tangata. Akamanako ana i te akaraanga o Pablo, e taeake i Marike Tonga. Kua tarevake tona akaapaia anga no te reira kua ngere aia i tana apainga i roto i te putuputuanga. Eaa tona manako? “Kua riri au,” karanga ai a Pablo, “e aere ua rai kua akamutu au i te kapiti atu ki te putuputuanga.”

7. Eaa te ka tupu ki tetai no te akava ngakau kino?

⁷ Penei ka akaapa te akava ngakau kino i tetai tangata tei aati i te ture a te Atua, kia manako kare te Atua e akaperepere ana iaia. Noatu kua tataraara aia e kua akaaroaia, penei ka manako aia kare rai e tau kia kapiti ki to te Atua iti tangata. I manako akapera ana te taeake ko Francisco. “Kua akoia au no te rave i te ainga tau kore,” karanga ai aia. “Noatu te reira kua aere ua au ki te uipaanga, kua ngakau taitaia au kua manako e kare e tau i te kapiti ki to Iehova iti tangata. Kua koko mai toku akava ngakau iaku, e kua irinaki au kare a Iehova i akakore i taku ara. Muri mai ra kua akamutu au i te kapiti ki te putuputuanga.” Eaa toou manako i teia au taeake e te au tuaine e na roto ra i teia turanga? Te akaaroa ra ainei koe ia ratou? Mea maata, eaa to Iehova manako ia ratou?

8. Ka ngaropoina ainei ia Iehova te aronga tei tavini ana iaia? Akamārama mai.

⁸ Kare a Iehova e ngaropoina i te aronga tei tavini ana iaia, teianei kua akamutu i te kapiti ki tona iti tangata; kare katoa e ngaropoina iaia ta ratou angaanga. (Ebe. 6:10)  Tata te peroveta ko Isaia i tetai akatutuanga manea no te akaari mai i to Iehova akaperepere. “E angai aia i tana anana mei te tiaki mamoe ra,” tata ai a Isaia. “E akaputu aia i te au punua i tona rima, e ei runga ratou i tona umauma kia apai.” (Isa. 40:11) Eaa to te Tiaki Mamoe Maata manako me ngaro tetai o tana mamoe? Akakite maira Iesu i to Iehova manako i te ui anga aia ki tana pipi: “Eaa to kotou manako? kia anere te mamoe a tetai tangata, kia aere ke ra tetai, kare aina aia e vaoo i te iva ngauru e iva ara, ka aere ei ki runga i te maunga, e kimi i tei aere ke ra? E kitea atura e ia, koia mou taku e karanga atu kia kotou na, e rai tona rekareka i te reira, i te au mamoe e iva ngauru e iva ara te kore i aere ke ra.”—Mata. 18:12, 13.

9. Akapeea te au tiaki meitaki i te tuatau Pipiria me akono i ta ratou mamoe? (Akara i te tutu i te kapi mua.)

⁹ Eaa ra i tau ei kia akaaiteia a Iehova ki tetai tiaki mamoe? No te mea e akono meitaki ana tetai tiaki mamoe i tana mamoe i te tuatau Pipiria. Ei akaraanga kua ta a Davida i te riona e te daba no te paruru i tana anana. (1 Samu. 17:34, 35) Ka kite rai tetai tiaki mamoe me ngaro tetai o tana mamoe. (Ioa. 10:3, 14) Ka akaruke aia i tana 99 mamoe ki roto i te koro me kore ki tetai tiaki mamoe e ka aere ka kimi i te mamoe ngaro. Akakite mai a Iesu i te reira akatutuanga kia apii i teia apiianga mou: “To kotou Metua i te ao ra, kare ïa i inangaro e kia mate tetai o teianei au tangata rikiriki.”—Mata. 18:14.

10. Kia tau kia Ezekiela 34:11-16, eaa ta Iehova i taputou ka rave no tana mamoe ngaro?

¹⁰ Akaperepere a Iehova ia tatou tataki tai, kapiti mai te “au tangata rikiriki” tei aere mamao mei tana anana. Na roto i te peroveta ko Ezekiela, taputou te Atua e ka kimi aia i tana mamoe ngaro e ka akamaroiroi ia ratou i te pae vaerua. Akakite mai aia i te au takainga ka rave aia no te akaoki mai ia ratou, matauia e te au tiaki mamoe Iseraela  me ngaro te mamoe. (E tatau ia Ezekiela 34:11-16.) Takainga mua, ka kimi te tiaki mamoe i te mamoe, ka pou te ora e te maroiroi. Me kitea te mamoe ngaro, ka akaoki mai te tiaki mamoe i te reira ki te anana. Me kinokino te mamoe e kua matepongi, ka mou maru te tiaki i te mamoe kinokino, ka tākaikai, ka apai e ka angai atura. Ka anoanoia te aronga pakari, te tiaki mamoe i “te anana a te Atua,” kia rave i teia takainga no te tauturu i tetai ua atu tei akaruke i te putuputuanga. (1 Pete. 5:2, 3) Ka kimi te aronga pakari ia ratou, ka akamaroiroi ia ratou kia oki mai ki te anana, e ka tauturu aroa ua ia ratou i te pae vaerua. *

11. Eaa ta te tiaki mamoe meitaki i mārama?

¹¹ Mārama meitaki te tiaki mamoe e ka ngaro te mamoe. Me aere ke te mamoe mei te anana, kare te tiaki e akono kino i te reira. Akamanako ana i te akaraanga ta te Atua i akaari mai i te tauturu anga i tona tavini tei aere ke mei ia Iehova.

12. Akapeea a Iehova i te akono anga ia Iona?

¹² Kua oro te peroveta ko Iona e kare i rave i tana angaanga. Noatu te reira kare a Iehova i kopae ana ia Iona. Mei te tiaki mamoe meitaki, akaora a Iehova iaia kua tauturu iaia kia maroiroi akaou i te rave i tana angaanga. (Iona 2:7; 3:1, 2) Muri mai, kua akatupu te Atua i tetai kikiona no te tauturu ia Iona kia tangi i te tangata. (Iona 4:10, 11) Te apiianga? Eiaa te aronga pakari e viviki i te tuku i te au me tauturu i te aronga paruparu te akarongo. Mari ra, ka aruaru ratou kia mārama i te tumu i aere ke te mamoe mei te anana. Me oki mai te mamoe kia Iehova, ka aroa te aronga pakari iaia.

13. Eaa ta tatou ka apii mei to Iehova manako no te tata o Salamo 73?

¹³ Taitaia maata te tata o Salamo 73 tona kite anga e kua manuia te aronga kino. Manako aia me puapinga rai i te rave i to te Atua anoano. (Sala. 73:12, 13, 16) Eaa to  Iehova manako? Kare aia i akakino i te reira tangata. Kua tata aia i tona manako i roto i te Pipiria. I te openga ra kua kite mai te tata salamo e puapinga maata te pirianga meitaki kia Iehova i tetai ua atu angaanga. (Sala. 73:23, 24, 26, 28) Te apiianga? Eiaa te aronga pakari e viviki i te akava i te aronga tei ekoko i te tavini ia Iehova. Kare e akakino ia ratou, ka tauta te aronga pakari i te kite i te tumu i tuatua akapera ratou. E rauka ai i te aronga pakari i te akaari i te Irava akamaroiroi kia ratou.

14. Eaa a Elia i anoano ei te tauturu, akapeea a Iehova te tauturu anga iaia?

¹⁴ Kua oro te peroveta ko Elia mei te Ariki Vaine ko Iezebela. (1 Ari. 19:1-3) Manako aia koia anake te peroveta e tavini ra ia Iehova, e kare e puapinga ana tana angaanga. Taitaia maata a Elia kua inangaro aia i te mate. (1 Ari. 19:4, 10) Kare i akakino ia Elia, akamaroiroi a Iehova iaia kare koia anake ua te tavini ra, kia irinaki i to te Atua mana ririnui, e e maata tana angaanga ka rave. Akarongo marie a Iehova i to Elia manako e kua oronga i tetai angaanga ou nana. (1 Ari. 19:11-16, 18) Te apiianga? Ka akono maru tatou katoatoa e te aronga pakari i ta Iehova mamoe. Me akakite mai aia i tona manako kare e tau ana ki to Iehova aroa, e akarongo te aronga pakari, iaia e akakite maira i tona manako. Ka akapumaana te aronga pakari i te mamoe ngaro e ka tuatua e te akaperepere ra a Iehova iaia.

15. Kia tau kia Ioane 6:39, eaa to Iesu manako i te mamoe a tona Metua?

¹⁵ Akapeea tatou me akono i ta Iehova mamoe ngaro? Akaari mai a Iesu i te akaraanga. Kite aia te akaperepere maata ra a Iehova i tana mamoe, no reira kua aruaru a Iesu i te tauturu i “te au mamoe i ngaro i te ngutuare o Iseraela” kia oki mai kia Iehova. (Mata. 15:24; Luka 19:9, 10) Ei tiaki mamoe meitaki, kua kimi maroiroi a Iesu kia kore ta Iehova mamoe e ngaro.—E tatau ia Ioane 6:39.

16-17. Eaa to te aronga pakari manako me tauturu ratou i tei paruparu te akarongo? (Akara i te pia “ Te Manako o te Mamoe Ngaro.”)

¹⁶ Akamaroiroi te apotetoro ko Paulo i te aronga pakari i te putuputuanga Ephesia kia aru i te akaraanga o Iesu. “E turu atu oki kotou i te aronga apikepike, e tikaʼi, e kia maara oki i te tuatua a te Atua ra a Iesu, ko tana oki i tuatua maira e, ‘E mea meitaki i te oronga atu i te rave mai.’” (Anga. 20:17, 35) Taka meitaki e apainga manea ta te aronga pakari no te akono i te iti tangata o Iehova. “Me kite au i te maata i to Iehova akaperepere i tana mamoe ngaro, akakeuia au kia aruaru i te tauturu ia ratou,” karanga ai a Salvador, e tangata pakari i Paniora. “Ei tiaki mamoe i te pae vaerua, irinaki au e te inangaro maira a Iehova iaku kia akono meitaki ia ratou.”

¹⁷ Kua tauturuia te katoatoa tei paruparu te akarongo i roto i teia atikara e kua oki mai kia Iehova. Teianei, e maata tei paruparu te akarongo te inangaro ra i te oki mai. Ka uriuri te atikara ka aru mai i ta tatou ka rave no te tauturu ia ratou kia oki mai kia Iehova.