1. Ngbanga ti nyen la Jéhovah ahaka terê ti lo na mbeni mama so ayeke mû me na molenge ti lo?

“ESKÊ mbeni wali alingbi ti girisa molenge ti lo so lo yeke mû me na lo?” Jéhovah ahunda lani tënë so na ngoi ti prophète Ésaïe. Nzapa atene na azo ti lo, atene: “Même tongana awali so agirisa amolenge ti ala, mbi yeke girisa mo lâ oko pëpe.” (És. 49:15). Mingi ni, lo yeke haka ka terê ti lo na mbeni mama ape. Ye oko, ge lo sara ni. Jéhovah asara kua na kpengba songo so ayeke na popo ti mbeni mama na molenge ti lo ti fa tongana nyen la lo ye awakua ti lo mingi. Mingi ti amama ayeke na oko pensé so Jasmine, mbeni ita-wali, ayeke na ni, lo tene: “Na ngoi so mo yeke mû me na molenge ti mo, mo na lo ayeke duti na mbeni kpengba songo so ayeke ngbâ lakue lakue.”

2. Tongana mbeni oko ti amolenge ti Jéhovah ague yongoro na lo ayeke sara lo tongana nyen?

² Même tongana mbeni oko ti amolenge ti Jéhovah azia ti bungbi legeoko na congrégation nga ti fa tënë, lo yeke hinga ni. Tongaso, bâ tongana nyen la a doit ti sara lo vundu mingi ti bâ, ngu oko oko, awakua ti lo saki mingi azia ti fa tënë nga ti gue na bungbi. *

3. Nyen la Jéhovah aye?

³ Mingi ti aita so azia ti fa tënë nga ti gue na bungbi, so e ye ala mingi, akiri na yâ ti congrégation, na a nzere na e mingi so ala kiri. Jéhovah aye ti tene ala kiri, e nga kue (1 Pi. 2:25). Tongana nyen la e lingbi ti mû maboko na ala? Kozo ti kiri tënë  na hunda so, a yeke nzoni ti hinga ndani so ambeni ita azia ti ga na bungbi nga ti fa tënë.

4. Nyen la asi na ambeni ita ndali ti kua ti nginza ti ala?

⁴ Ambeni ita azia si kua ti ala aga ye so ayeke kota mingi na yâ ti gigi ti ala. Hung, * mbeni ita-koli so ayeke na sud-est ti Asie, atene: “Mbi mû ngoi nga na ngangu ti mbi mingi ti sara na kua ti nginza. Buba asara mbi na mbi tene so tongana mbi yeke na nginza mingi, mbi yeke wara lege ti sara na Jéhovah nzoni mingi. Tongaso, mbi zia ambeni l’heure na ndö ti l’heure ti kua ti mbi. Mbi komanse ti manke abungbi mingi ague ngbii mbi zia ti ga na abungbi. Satan ayeke sara kua na dunia so ti gboto lê ti azo tongaso si yeke yeke ala zia ti sara na Nzapa.”

5. Nyen la gbâ ti akpale asara na mbeni ita-wali?

⁵ Akpale ahon ndö ti ambeni ita. Anne, so ayeke zo ti Grande-Bretagne, so ayeke na amolenge oku, atene: “Mbi dü mbeni molenge ti mbi na angangu kpale ti seni. A si na mbeni ngoi, a bi mbeni molenge ti mbi ti wali na gigi ti bungbi nga mbeni molenge ti mbi ti koli awara kobela ti li. Vundu ahon ndö ti mbi asara si mbi zia ti gue na bungbi nga ti fa tënë. Yeke yeke, mbi zia ti fa tënë nga ti gue na bungbi biani biani.” Mawa ti Anne na sewa ti lo nga na ambeni ita so ayeke na mara ti kpale so asara e mingi.

6. Tongana nyen la tongana mbeni ita asara ye alingbi na aColossien 3:13 ape, lo lingbi ti gue yongoro na azo ti Jéhovah?

⁶ Diko aColossien 3:13. Bê ti ambeni wakua ti Jéhovah ason ndali ti ye so mbeni mba ti ala Chrétien asara na ala. Bazengele Paul ahinga lani so na ambeni ngoi e lingbi ti duti na mbeni “tënë ti dema na terê ti” mbeni ita so ayeke na lege ni. A lingbi même ti si so a sara ye na e na lege ni ape. Tongana e sara hange ape e lingbi ti bata tënë na bê ti e. Songo bê alingbi ti sara si yeke yeke mbeni ita ague yongoro na azo ti Jéhovah. Bâ ye so asi na Pablo, mbeni ita-koli na Amérique du Sud. A bi tënë ti mvene na li ti lo a tene lo sara mbeni sioni ye asara si a zi na maboko ti lo kua so lo yeke sara na yâ ti congrégation. Lo sara ye lani tongana nyen? Pablo atene: “Ngonzo asara mbi na yeke yeke mbi gue yongoro na congrégation.”

7. Tongana conscience ti mbeni ita angbâ ti fâ ngbanga na ndö ti lo, a lingbi ti sara nyen na lo?

⁷ Conscience ti mbeni ita so adoro ândö ndia ti Nzapa alingbi ti fâ ngbanga na ndö ti lo na asara lo nzoni ape nga asara si lo bâ so Nzapa alingbi ti ye lo encore ape. Même tongana lo changé lani bê ti lo nga a sara nzoni bê na lo, peut-être lo bâ so aye so lo yeke sara alingbi kue ape ti tene lo duti mbeni wakua ti Nzapa. Mbeni ita-koli, so iri ti lo ayeke Francisco, apensé lani tongaso. Lo tene: “Bungbi asuku na mbi lani ndali ti so mbi sara lango-sioni. Atâa so mbi ngbâ lani ti ga na bungbi, vundu asara mbi lani mingi nga mbi bâ so mbi kpa ape ti duti na popo ti azo ti Jéhovah. Conscience ti mbi angbâ lani ti fâ ngbanga na ndö ti mbi nga mbi pensé ti mbi biani so ade Jéhovah apardonné mbi ape. A si na mbeni ngoi, mbi zia ti fa tënë nga ti gue na bungbi.” Mo pensé nyen na ndö ti aita so awara akpale so e londo ti sara tënë ni so? Mawa ti ala asara mo? Kota ye ni, Jéhovah abâ ala tongana nyen?

8. Eskê Jéhovah agirisa azo ti lo so asara na lo ândö? Mû mbeni tapande ti fa ni.

⁸ Jéhovah agirisa ape azo ti lo so asara na lo ândö me so teti mbeni ngoi azia ti gue na  bungbi nga ti fa tënë; lo girisa nga ape kua so ala sara na lo lani (aHéb. 6:10). Prophète Ésaïe asara kua na mbeni pendere tapande ti fa tongana nyen la Jéhovah ayeke bâ lege ti azo ti lo. Ésaïe atene: “Tongana mbeni berger, lo yeke bâ lege ti ataba ti lo. Lo yeke sara maboko ti lo lo bungbi akete ni ndo oko, lo yeke yô ala na kate ti lo.” (És. 40:11). Tongana mbeni wakua ti Jéhovah azia ti sara na lo, a yeke sara Jéhovah so ayeke Kota berger tongana nyen? Jésus afa tënë ti bê ti Jéhovah na ngoi so lo hunda adisciple ti lo, lo tene: “Ala tene ti ala nyen? Tongana mbeni koli ayeke na ataba 100, na oko ti ala agirisa, lo yeke zia atanga ni 99 so na ndö ti ahoto ti gue ti gi oko ni so agirisa so ape? Tongana lo wara taba ni, ti tâ tënë ni, mbi tene na ala, terê ti lo ayeke nzere mingi ndali ti lo, ahon atanga ni 99 so agirisa pëpe.”—Mat. 18:12, 13.

9. Anzoni berger ti ândö asara ye lani na ataba ti ala tongana nyen? (Bâ foto ti couverture ni.)

⁹ Ngbanga ti nyen la e lingbi ti haka Jéhovah na mbeni berger? Ngbanga ti so ândö mbeni nzoni berger aye ataba ti lo mingi. Na tapande, David atiri na mbeni bamara nga na mbeni ours ti bata ataba ti lo (1 Sam. 17:34, 35). Même tongana gï taba oko la agirisa, mbeni nzoni berger ayeke hinga ni (Jean 10:3, 14). Mara ti berger tongaso ayeke zia ataba 99 na yâ ti gbagba wala lo yeke hunda na ambeni berger ti bâ lege ti ala na lo yeke gue ti gi lo so agirisa. Jésus asara lani kua na tapande so ti fa na e mbeni kota tâ tënë: “A nzere pëpe na Babâ ti mbi so ayeke na yayu tongana mbeni oko ti akete zo so agirisa.”—Mat. 18:14.

10. Ti gue oko na Ézéchiel 34:11-16, nyen la Jéhovah amû zendo ti sara ndali ti ataba ti lo so agirisa?

¹⁰ Jéhovah aye e oko oko kue mingi, lo ye nga “akete zo” so ague yongoro na kundu ti ataba ti lo. Na lege ti prophète Ézéchiel, Nzapa amû zendo so lo yeke gi peko ti ataba ti lo so agirisa nga lo yeke mû maboko na ala ti kiri ti duti na nzoni songo na lo. Nga, lo fa ambilimbili  ye so lo yeke sara ti sö ala, aye so mbeni vrai berger ti Israël ayeke sara tongana mbeni taba ti lo agirisa. (Diko Ézéchiel 34:11-16.) Kozoni, berger ni ayeke gi peko ti taba ni, ye so peut-être ahunda ti tene lo mû ngoi mingi nga lo sara ngangu mingi. Na pekoni, tongana lo wara taba ni awe, lo yeke kiri na lo na popo ti amba ti lo. Na ndö ni, tongana taba ni awara kä wala nzara asara lo mingi, na ndoye berger ni ayeke mû maboko na taba so awoko, lo yeke kanga akä ti lo, lo yeke yô lo nga lo yeke mû na lo kobe. A lingbi a-ancien so ayeke aberger ti “kundu ti ataba ti Nzapa” asara nga aye so ti mû maboko na azo so ague yongoro na congrégation (1 Pi. 5:2, 3). A-ancien ayeke gi peko ti ala, ala yeke mû maboko na ala ti kiri na yâ ti congrégation nga ala sara ye na ala na ndoye na lege so ala mû maboko na ala na lege ti yingo. *

11. Nyen la mbeni nzoni berger ahinga?

¹¹ Mbeni nzoni berger ahinga so ataba alingbi ti girisa. Nga tongana mbeni taba ague yongoro na amba ti lo, berger ni ayeke sara ye na lo na ngangu ape. Gbu li na ndö ti tapande ti Jéhovah na ngoi so lo yeke mû maboko na ambeni wakua ti lo so ague yongoro na lo teti mbeni ngoi.

12. Jéhovah asara ye lani na Jonas tongana nyen?

¹² Prophète Jonas ague lani yongoro na ndo so Nzapa atokua lo dä. Atâa so kue, Jéhovah ake Jonas ape. Legeoko tongana mbeni nzoni berger, Jéhovah asö lo nga lo mû maboko na lo ti wara ngangu so lo bezoin ni ti sara kua ti lo (Jonas 2:7; 3:1, 2). Na pekoni, Nzapa asara kua na mbeni keke ti kangu ti mû maboko na Jonas ti hinga so fini ti zo oko oko kue ayeke ye ti ngangu ngere (Jonas 4:10, 11). Nyen la e lingbi ti manda dä? A lingbi a-ancien azia hio ape lege ti mungo maboko na aita so azia ti fa tënë nga ti gue na bungbi. Me a lingbi a-ancien agi ti hinga ye so asara si mbeni taba ague yongoro na kundu ni. Nga na ngoi so taba ni akiri na Jéhovah, a-ancien ayeke ngbâ ti ye lo nga ti pensé na lo.

13. Nyen la e lingbi ti manda na lege ti sarango ye ti Jéhovah na mbage ti zo ti sungo Psaume 73?

 ¹³ Zo ti sungo Psaume 73 adécouragé lani na ngoi so lo bâ tongana nyen la na bango ni azo ti sioni ayeke maï. Lo hunda terê ti lo wala sarango ye so bê ti Nzapa aye aga na aye ti nzoni (Ps. 73:12, 13, 16). Jéhovah asara ye lani tongana nyen? Lo fâ ngbanga na li ti lo ape. Me Nzapa asara si a sû atënë ti lo na yâ ti Bible. Na nda ni, zo ti sungo psaume ni aga ti hinga so ti duti na nzoni songo na Jéhovah ayeke nzoni mingi ahon tanga ti aye kue, a sara si gigi ti zo aduti nzoni mingi (Ps. 73:23, 24, 26, 28). Nyen la e manda dä? A lingbi a-ancien afâ ngbanga hio ape na li ti azo so akomanse ti hunda terê ti ala wala ti sara na Jéhovah aga na aye ti nzoni. Ahon ti fâ ngbanga na li ti ala, a lingbi a-ancien agi ti hinga ye so apusu ala ti tene tënë nga ti sara ye tongaso. Na pekoni, a-ancien alingbi ti sara kua na Bible ti kpengba ala.

14. Ngbanga ti nyen la Élie abezoin lani mungo maboko? Jéhovah amû lani maboko na lo tongana nyen?

¹⁴ Prophète Élie akpe lani Gbia-wali Jézabel (1 aGbia 19:1-3). Lo pensé so mbeni prophète ti Jéhovah nde ayeke dä ape, gï lo oko, nga lo pensé so kua so lo sara ayeke gï senge senge. So vundu asara Élie mingi, lo ye lani ti kui (1 aGbia 19:4, 10). Ahon ti fâ ngbanga na li ti Élie, Jéhovah asara si lo hinga biani so lo yeke gï lo oko ape, so lo lingbi ti sara confiance na ngangu ti Nzapa nga so a ngbâ na lo gbâ ti kua ti sara. Na nzoni bê Jéhovah amä agingo bê ti Élie nga lo mû na lo afini kua (1 aGbia 19:11-16,  18). Nyen la e manda dä? A lingbi e kue, mbilimbili a-ancien, e sara ye na ataba ti Jéhovah na nzoni bê. Tongana mbeni zo atene so bê ti lo ason wala lo bâ so lo lingbi ape ti tene Jéhovah asara nzoni bê na lo, a-ancien ayeke mä lo na ngoi so lo yeke zi bê ti lo na ala. Na pekoni, ala yeke gi ti sara si lo hinga biani so Jéhovah andoye lo.

15. Ti gue oko na Jean 6:39, Jésus abâ lani ataba ti Babâ ti lo tongana nyen?

¹⁵ Jéhovah aye ti tene e bâ ataba ti lo so agirisa tongana nyen? Jésus azia na e tapande ni. Lo hinga so ataba ti Jéhovah kue ayeke ye ti ngangu ngere na lê ti Nzapa, tongaso Jésus asara lani ye kue so lo lingbi ti sara ti mû maboko na “ataba ti da ti Israël so agirisa” ti kiri na Jéhovah (Mat. 15:24; Luc 19:9, 10). So Jésus ayeke nzoni berger mingi, lo sara nga kue ti tene mbeni taba ti Jéhovah agirisa ape.—Diko Jean 6:39.

16-17. A lingbi a-ancien abâ mungo maboko na aita so ague yongoro tongana nyen? (Bâ encadré “ Mbeni taba so agirisa alingbi ti pensé nyen?”)

¹⁶ Bazengele Paul awa a-ancien ti congrégation ti Éphèse ti mû tapande ti Jésus. Lo tene: “A lingbi ala mû maboko na ala so awoko, nga ala girisa pëpe tënë ti Seigneur Jésus, so lo wani lo tene: ‘Mungo ye na zo aga na ngia mingi ahon warango ye na tïtî zo.’” (Kus. 20:17, 35). A yeke polele so laso a-ancien ayeke na kota kua ti bâ lege ti azo ti Jéhovah. Salvador, mbeni ancien na Espagne, atene: “Tongana mbi gbu li na ndö ti aye kue so Jéhovah ayeke sara ti bâ lege ti ataba ti lo so agirisa, a pusu mbi ti sara ye kue so mbi lingbi ti sara ti mû maboko na ala. So mbi yeke mbeni berger na lege ti yingo, mbi hinga na bê ti mbi kue so Jéhovah aye ti tene mbi bâ lege ti ala.”

¹⁷ Aita kue so e sara tënë ti ala na yâ ti article so, so ague yongoro na Jéhovah, a mû maboko na ala ti kiri na Jéhovah. Laso, aita mingi so ague yongoro na Jéhovah aye ti kiri na lo. Article ti peko ayeke fa ambeni nzene nzene ye so e lingbi ti sara ti mû maboko na ala ti kiri na Jéhovah.