XIINXALLOTE BIRXICHO 25
“Ani Umiˈya Geˈreewoˈya Hasiˈreemmo”
“Ani umiˈya geˈreewoˈya hasiˈreemmo; seekke allaaˈleemmo.”—HIZ. 34:11.
FAARSO 105 “Maganu Baxilleho”
GUULCHO *
1. Yihowa isonooto qansidhanno ama ledo heewisiisinohu mayiraati?
“AMA qansidhannoha qaaqqose habbannoni?” Tini, Yihowa masaalaanchu Isayaasi waro xaˈmino xaˈmooti. Maganu mannasi, “Ise habbara dandiitanno; ani kayinni horonta dihaweemmoˈne” yiinonsa. (Isa. 49:15) Yihowa duucha woyite isonooto amate ledo diheewisiisanno. Hakkawaro kayinni heewisiisino. Yihowa soqqamaanosi mageeshshi geeshsha baxannoro leellishate, amatenna qaaqqu baxille lawishsha asse horoonsiˈrino. Jaazmiini yinanni rodoo, “Ama qansidhanno woyite, qaaqqise ledo baxxinohu geedote baxilli kalaqamanno” yitino; lowo amuuwi tini gara ikkitinota ammananno.
2. Yihowa oososi giddonni mittu nafa isiwiinni xeertiˈranno woyite mayi macciishshamannosi?
2 Yihowa oososi giddonni mittu nafa, Kiristaanu gambooshshe haˈranna sabbaka aguranno woyite afanno. Isi, diru kiiro kumunni kiirranni soqqamaanosi ayyaanaamittetenni qiiddanna * laˈˈanno woyite mageeshshi geeshsha xissiisiˈrannoro hanni hendo!
3. Yihowa hasatto maati?
3 Ayyaanaamittetenni qiiddino roduuwi giddo batinyu songo higganno; ninkeno anga fanne haaˈneemmonsa! Yihowano ninkeno insa songo higgara hasiˈneemmo! (1 Phe. 2:25) Ikkina insa kaaˈla dandiineemmohu hiittoonniiti? Tenne xaˈmora dawaro afiˈnammora albaanni, hanni mitu roduuwi gambooshshe haˈranna sabbaka agurtinohu mayiraatiro laˈno.
MITU RODUUWI YIHOWARA SOQQAMA AGURTANNOHU MAYIRAATI?
4. Mitoota loosu ma assino?
4 Mitoota loosu itinonsa. Hangi * yinannihu Iisiyaho heeˈranno rodii togo yiino: “Loosu qalxe amadinoe. Afiˈraamo ikkummoro, Yihowara roore soqqameemmo yee umoˈya dogoommo. Konnira lowo saate looseemmo. Hakkiinni gambooshshe hosa hanafummo; sunu sununni coˈonta haˈra agurummo. Sheexaanu alame, mannu sunu sununni Maganuwiinni xeertiˈranno gede assitannote.”
5. Mitte rodoo iillinosehu buutote qarri gawajjinosehu hiittoonniiti?
5 Mito roduuwanke qarru qalxe amadinonsa. Ane yinanniti Biritaaniyaho heedhannoti onte ooso ama togo yitino: “Qaaqquulliˈya giddo mittu ilami woyite bisu xeˈne noosiho. Gedensoonni mitte qaaqqoˈya songotenni bohantino; wolu qaaqqiˈya kayinni surre xissamino. Kade amadeemmari baeennae gambooshshe haˈranna soqqama agurumma. Sunu sununni ayyaanaamittetenni qiidumma.” Tenne rodoonna maatese, hattono togoo qarri tuncu yiinonsare wole manna lowo geeshsha mararreemmonsa!
6. Mittu Kiristaanchi Qolasiyaasi Sokka 3:13 noo amaale harunsa hoogiro, Yihowa manniwiinni xeertiˈrara dandaannohu hiittoonniiti?
6 Qolasiyaasi Sokka 3:13 nabbawi. Mite Yihowa soqqamaano ammanate roduuwinsa assitinorinni xissiisidhino. Soqqamaasinchu Phaawuloosi roduuwinke ‘koffi assitannonke’ woyiti heeˈrara dandaannota coyiˈrino. Wole agurina insa miiccankera nafa dandiitanno. Qoropha hoongummoro, tennera quwa saˈne giirammammora dandiineemmo. Tini, mittu rodii sunu sununni Yihowa manniwiinni xeertiˈranno gede assitasira dandiitanno. Hanni Wodiidi Ameerikira heeˈrannohu Pabilo yinanni rodii lawishsha laˈno. Isi gara ikkinokkire assino yine beebba kassansoonnisi daafira, songote giddo noosita soqqanshote qoosso hoogino. Ikkina isi hiitto ikkiyya? Pabilo “Tennera hanqe, sunu sununni songotewiinni xeertiˈroommo” yiino.
7. Mittu manchi tiiˈˈisi bushiishanni waadannosiha ikkiro, ma ikkara dandaanno?
7 Alba cubbo loosino mancho, tiiˈˈisi bushiishanni waadasiranna Maganu dibaxannoe yee hedanno gede assasira dandaanno. Cubbisira maaro eˈˈeenna Maganu gatona yiinosiha ikkirono, isi kayinni Maganoho soqqamate diˈˈikkoommoho yee hedara dandaanno. Firaansisko yinanni rodiino hatto yee hedino. Isi togo yiino: “Alba fooreenna seejjinoonnie. Umi qara gambooshshe haˈra aguroommokkiha ikkirono, lowo geeshsha yaadoommo daafira, Yihowa manni mereero heeˈrate diˈˈikkoommoho yee hedoommo. Tiiˈˈiˈya bushiishanni waadinoe; Yihowa horo gatona diyiinoe yeeno hedoommo. Gale hose sabbakanna gambooshshe haˈra agurummo.” Kuri roduuwi daafira hedatto woyite mayi macciishshamannohe? Insa mararattonsa? Roorenkanni Yihowara insa daafira mayi macciishshamannosi?
YIHOWA GEˈREEWOSI BAXANNO
Israeelaawichu allaalaanchira baˈino geˈrechosi lowo geeshsha huluullitannosi (Gufo 8-9 lai) *
8. Yihowa alba isira soqqantannore hawannoni? Xawisi.
8 Yihowa alba isira soqqantannore xa kayinni yannate geeshshano ikkiro mannisi ledo gamba yaa agurtinore dihawannonsa; qoleno isira soqqantino soqqansho dihawanno. (Ibi. 6:10) Yihowa mannasi mageeshshi geeshsha towaatannoro leellishate masaalaanchu Isayaasi kaajja lawishsha horoonsiˈrino. Isi togo yiino: “Allaalaanchu gede hoshshasi towatanno; wiliiˈle isiwa gamba asse hanqafanno.” (Isa. 40:11) Bayiru Allaalaanchi Yihowa hoshshasi giddonni mitte geˈrecho ballekkanno woyite hiitto ikkanno? Yesuusi coyiˈrino lawishshi Yihowara macciishshamannosire leellishanno; isi togo yiino: “Hanni ma heddinanni? Mittu manchira xibbu geˈreewi noosi; hakkuri giddonni mitte baˈuro, honsayina honse hakko ilaalu iima agure baˈinota mitticho hasiˈrara dihaˈranno? Halaale kuleemmoˈnena, afiˈranno yannara bainokkiri honsayina honsentenni roore baˈe leeltino geˈrecho daafira hagiidhanno.”—Mat. 18:12, 13.
9. Hundi waro danchu allaalaanchi geˈreewosi ma garinni towaatanno? (Aaniidi qoolira noo misile lai.)
9 Yihowa allaalaanchu gedeeti yaa garankolla. Mayira yiniro, hundi yannara danchu allaalaanchi geˈreewosi seekke towaatanno. Lawishshaho, Daawiti doobbichunna dibi yinanni moyichi ledo gaarame geˈreewosi gatisino. (1 Sam. 17:34, 35) Danchu allaalaanchi geˈreewisi giddonni mitte nafa ballekkannota afanno. (Yoh. 10:3, 14) Togoo allaalaanchi 99 geˈreewo hoowete giddoo agure woy wolu manchira wodhe baˈinota hasiˈranni haˈranno. Yesuusi konne lawishsha horoonsiˈre kaajja roso rosiisinonke; isi togo yiino: “Gordoho heeˈrannohu Anniˈneno kuri shiimmaaddu giddonni mittuno baˈˈara dihasiˈranno.”—Mat. 18:14.
Hundi waro Israeelaawicha allaalaancho, baˈino geˈrechosiri huluullannosi (Gufo 9 lai)
YIHOWA GEˈREEWOSI HASANNO
10. Hiziqeeli 34:11-16 kultanno garinni, Yihowa baino geˈreewosi ma asseemmo yee qaale eino?
10 Yihowa hoshshasi giddonni ballekkino ‘shiimmaaddano’ ikko ninke mitto mittonka baxannonke. Maganu masaalaanchu Hiziqeeli widoonni, baino geˈreewosi hasannotanna ayyaanaamittete hurre afiˈranno gede kaaˈlannonsata kule qaale eino. Yihowa insa kaaˈlate, mittu Israeelaawichu allaalaanchi geˈrechosi baˈuro assannore assannota coyiˈrino. (Hiziqeeli 34:11-16 nabbawi.) Allaalaanchu balaxe baˈino geˈrecho hasanno; togo assate lowo yannanna wolqa hasiissanno. Hakkiinni baˈino geˈrecho afihu gedensaanni, hoshshanniwa abbanno. Qoleno geˈrecho madidhinoha woy hudidhinoha ikkiro, allaalaanchu sununni asse irkise amade mada usurannose; hakkiinni hanqafe haaˈre masse itisanno. ‘Maganu hoshsha allaaltanno’ cimeeyyeno songotewiinni xeertidhinore hakko garinni kaaˈla hasiissannonsa. (1 Phe. 5:2, 3) Cimeeyye ballehinoha hasse hoshshanniwa higanno gede kaaˈlitanno; hattono ayyaanaamittetenni huranno gede kaaˈlite baxille leellishshanno. *
11. Danchu allaalaanchi maa afino?
11 Danchu allaalaanchi geˈreewisi baˈˈara dandaannota afino. Mitte geˈrecho hoshshatewiinni faffuro, allaalaanchu gananni beebba diassiˈranno. Hanni Yihowa hunda mite soqqamaasinesi yannate geeshshano ikkiro isiwiinni xeertidhu woyite kaaˈlinonsa gara laˈno.
12. Yihowa Yoonaasi kaaˈlinosihu hiittoonniiti?
12 Masaalaanchu Yoonaasi Yihowa assi yiinosire assa giwe wolewa xooqino. Ikkirono, Yihowa Yoonaasi facci asse diagurino. Yihowa danchu allaalaanchi gede Yoonaasi gatisinosi; hattono uyinosi looso loosa dandaanno wolqa oye kaaˈlinosi. (Yon. 2:7; 3:1, 2) Gedensoonni Maganu, Yoonaasi mittu mittunku manchi heeshsho lowo geeshsha muxxe ikkitinota huwatanno gede kaaˈlate, buqqiicho horoonsiˈrino. (Yon. 4:10, 11) Tenne xaggenni ninke maa ronseemmo? Songote cimeeyye mittu halashshaanchi ayyaanaamittetenni qiidiro hexxo dimudhitanno. Hatteentenni halashshaanchu songotewiinni xeertiˈranno gede assinosiri maatiro huwatate woˈnaaltanno. Halashshaanchu Yihowawa higanno woyite, cimeeyye iso baxanna marara diagurtanno.
13. Yihowa Faarso 73te borreessaancho kaaˈlino doogonni maa ronseemmo?
13 Faarso 73te borreessaanchi, bushuulleho faffinonsaha laweennasi hexxo mudhino. Isi, Maganu fajjo assa beebba daafurattella yee hedino. (Far. 73:12, 13, 16) Ikkina Yihowa maa assino? Isi dibushiishinosi. Isinni Maganu hakku faarsaasinchi coyiˈrinore Qaalisi giddo borreessinanni gede assino. Gedensoonni faarsaasinchu Yihowa ledo dancha jaalooma kalaqira sainori mitturino nookkita huwatino. (Far. 73:23, 24, 26, 28) Tennenni ninke maa ronseemmo? Songote cimeeyye mittu halashshaanchi Yihowara soqqama afidhino horo huluullama hanafiro, hakko halashshaancho bushiisha dihasiissannonsa. Hatteentenni, cimeeyye isi hatto yee heda hanafinohu mayiraatiro huwatate woˈnaala hasiissannonsa. Insa Qullaawa Borro horoonsidhe hakko halashshaancho kaaˈla dandiitannohu hatto assituro callaati.
14. Eeliyaasira kaaˈlo hasiissinosihu mayiraati? Yihowa kaaˈlinosihu hiittoonniiti?
14 Masaalaanchu Eeliyaasi Mootitte Elzaabeeli shitannoe yee xooqino. (1 Mot. 19:1-3) Isi ‘Ane agurranna Yihowara soqqamannohu wolu masaalaanchi dino; asseemmorino waaga diafiˈrinoreeti’ yee hedino. Isi lowo geeshsha yaadino daafira reyo halchino. (1 Mot. 19:4, 10) Yihowa Eeliyaasi dibushiishino; hatteentenni callichosi ikkinokkitanna Maganu wolqa addaxxa dandaannota, hattono loosannohu lowo loosi noota kule jawaachishinosi. Yihowa Eeliyaasi dhiwinosire hasaaphanna shaqqillunni macciishshino, hattono wole looso uyinosi. (1 Mot. 19:11-16, 18) Tennenni ninke maa ronseemmo? Baalunku, roorenkanni songote cimeeyye Maganu geˈreewo shaqqillunni towaata hasiissannonke. Mittu halashshaanchi caacceessinosire kuˈlanno woyite woy Yihowa maaro hasiissannoeha diˈˈikkoommo yee giddosita fushshe hasaaphanno woyite, cimeeyye seekkite macciishsha hasiissannonsa. Hakkiinni songotewiinni xeertiˈrino halashshaanchi Yihowa baxannosita huwatanno gede kaaˈlitannosi.
BALLEHINOHA MAGANU GEˈREEWO MA GARINNI LAˈˈA HASIISSANNONKE?
15. Yohaannisi 6:39 kultanno garinni, Yesuusi Annisi geˈreewo ma garinni laˈˈanno?
15 Yihowa ballehino geˈreewosi ma garinni laˈnammora hasiˈranno? Yesuusi tennera dancha lawishsha ikkinonke. Isi baalunku geˈreewi Maganu albaanni muxxe ikkinota afino daafira, “Israeelete giddonni geˈreewu gede ikke ballehino manni” baalu Yihowawa higanno gede kaaˈlate dandaamisire baala assino. (Mat. 15:24; Luq. 19:9, 10) Yesuusi dancha allaalaancho ikkino daafira, Yihowa geˈreewi giddonni mitte nafa baˈannokki gede assate sharramanno.—Yohaannisi 6:39 nabbawi.
16-17. Cimeeyyete Yihowawiinni xeertidhinore kaaˈlate daafira mayi macciishshamannonsa? (“ Songotewiinni Xeertidhinorira Mayi Macciishshamannonsa?” yitanno saaxine lai.)
16 Soqqamaasinchu Phaawuloosi Efesooni songo cimeeyye Yesuusi lawishsha harunsitanno gede amaalinonsa. Isi togo yiinonsa: “Mootichu Yesuusi, ‘Adhannonkunni aannohu baˈraaˈrinoho’ yiinonte gede, angankenni loonse wolqa hoogginore kaaˈla hasiissannonke.” (Soq. 20:17, 35) Xaa yannara cimeeyyete Yihowa manna towaatate baxxino qeechi noonsa. Ispeenete heeˈrannohu Salvaadoori yinanni cimeessi togo yiino: “Yihowara ballehino geˈreewisiti mageeshshi geeshsha huluullitannosiro hedeemmo woyite, insa kaaˈlate danduummore baala assate kaeemmo. Ayyaanaamittete allaalaancho ikkoommo daafira, Yihowa hoshshasi towaatammora hasiˈrannota wodanchoommo.”
17 Konni birxichira kulloonnihu Yihowawiinni xeertiˈrino manni kaaˈlineennansa isiwa higino. Xaano Yihowawa higa hasiˈrannohu lowo manni no. Aananno birxichira insa Yihowawa higganno gede kaaˈlate maa assa dandiineemmoro ronseemmo.
FAARSO 139 Haaro Alamera Heeˈratto Heeshsho Hedi
^ GUFO 5 Yihowara lowo diro ammaname soqqaminohu mitu manni songotewiinni xeertiˈrannohu mayiraati? Insa daafira Maganoho mayi macciishshamannosi? Konni birxichira kuri xaˈmuwara dawaro afiˈneemmo. Qoleno, Yihowa hunda yannate geeshshano ikkiro isiwiinni xeertidhinore kaaˈlino doogonni maa ronseemmoro laˈneemmo.
^ GUFO 2 HARANCHO XAWISHSHA: Mittu halashshaanchi ayyaanaamittetenni qiidino yinannihu, lee agana woy hakkuyi ale ikkitanno yanna qanchu soqqansho rippoorte qolinokkiha ikkirooti. Ikkirono ayyaanaamittetenni qiiddinorino roduuwankeeti, qoleno banxeemmonsa.
^ GUFO 4 Mite suˈmuwa soorrinoonni.
^ GUFO 10 Aananno birxichira cimeeyye hatto assa dandiitanno doogga ronseemmo.
^ GUFO 60 MISILLATE XAWISHSHA: Mittu Israeelaawichu allaalaanchi baˈino geˈrechosi huluullitannosi daafira, hase abbe hoshshanniwa qolanno. Xaa yannara cimeeyyeno hatto assitanno.
^ GUFO 64 MISILLATE XAWISHSHA: Mitte ayyaanaamittetenni qiiddino rodoo, otobisete giddo heedhe lamu roduuwi gudumaaleho hagiirrunni farcidhanna laˈanni no.
