1. Manino Jehovah ro nampitovy ty vatany amy reny mampinono?

“METY hanalino ty anakiny mbo minono va ty ampela?” Zay ty fanontanea napetrakini-Jehovah tamy androni-Isaia mpaminany. “Ndre ampela rey mety hanalino, fa zaho tsy hanalino anao”, hoasani-Jehovah amy vahoakiny reo. (Isa. 49:15) Kindraiky avao Jehovah ro nampitovy ty vatany amy reny. Fe zay ty nataony tamy ndraiky toy. Niresaky mikasiky ty fitiavani-reny ty anakiny Jehovah mba hanambarany ty fihetseham-pony mikasiky ty mpanompony. Mahatsapa manahaky ani-ranabavy Jasmine ty ankamaroani-reny. Hoy ty asany: “Lafa mampinono ty anakinao iha, le manjary misy fifandrambesa manoka sady maharitsy aminareo.”

2. Manao akory ty fihetseham-poni-Jehovah lafa miala aminy ty anakiny?

² Hitani-Jehovah lafa tsy mitory noho tsy mivory sasy ndre ty raiky amy anakiny reo aza. Mba eritsereto amy zay moa hoe manao akory ty alaheloni-Jehovah lafa mahita hoe manjary tsy mitory sasy * ty mpanompony an’arivony santao.

3. Ino ty teani-Jehovah?

³ Maro amy rahalahy noho anabavy teantsika rey ro nimpoly niaraky amy fiangona ndraiky. Tena falifaly tsika mandramby an-drozy! Teani-Jehovah himpoly ndraiky rozy, sady zay koa ty teantsika. (1 Pet. 2:25) Fe ino ty azontsika atao? Alohani-hamaleantsika ani-fanontanea zay, le soa laha haintsika tse hoe manino ro nanjary tsy avy amy fivoria noho fanompoa eny sasy ty olo sisany.

4. Ino ty vokatsini-asa fiveloma tamin’olo sisany?

⁴ Nanjary tandrena marè tamy asa fivelomany ty olo sisany. Nieky ho zao Hung, * rahalahy baka antimo antinanani-Azỳ any: “Fa maro marè ty fotoa noho hery laniko tamy asa. Tsy nandiniky soa aho ka nieritseritsy fa nao laha mahazo drala be aho, le vomaiky ho afaky hanompo ani-Jehovah soa. Nampeako amy zay ty lera niasako. Nanomboky tsy nivory matetiky aho, le nijano tanteraky lafa nandeha ty fotoa. Atao raha fa zay mihintsy ty ampiasani-Satana ani-tontolo toy, mba hitaomany olo hanalavitsy a Ndranahary tsikelikely.”

5. Ino ty vokany lafa nitratsini-fahasahirana nifanesisesy ty ranabavy raiky?

⁵ Tratsini-fahasahirana maro ty rahalahy noho anabavy sisany, farany kivy. Manan’anaky limy ranabavy Anne, baka Grande-Bretagne any. Nitantara ie hoe: “Vo nateraky anakilahiko farany iny le fa narary mafy. Lafa nandeha ty fotoa, le nivoaroaky ty anakampelako raiky, le nanjary narary say koa ty anakilahiko raiky hafa. Nikivy marè aho, ka tsy namonjy fivoria sady tsy nitory. Nanjary tsy nitory sasy aho tamy farany.” Mampangotsoky ty fontsika ty raha nahazo ani-Anne noho ty fianakaviany, voho ty olo miatriky fahasahirana manahaky ani-reo!

6. Manino ro mety tsy hiaraky amy vahoakini-Jehovah sasy ty olo sisany lafa tsy manoriky ty Kolosianina 3:13?

⁶ Vakio Kolosianina 3:13. Nisy mpanomponi-Jehovah sisany nalahelo vokatsini-raha nataoni-mpiara-manompo taminy. Tsapani-apostoly Paoly fa mety hana “antony hitaraina mikasiky” ani-rahalahy na anabavy raiky tsika. Mety ho nanao tsy rariny tamintsika ie. Laha tsy miamby soa tsika, le mety hitanjaky lolompo. Mety tsy hiaraky amy vahoakini-Jehovah sasy ty olo raiky amy farany laha meloky avao. Diniho moa ty tantarani-Pablo, rahalahy baka an’Ameriky Antimo any. Nasaran’olo ho nanao raha raty ie, farany nalà aminy ty tombontsoam-panompoany tamy fiangona eo. Nanao akory amy zay Pablo? “Neloky aho”, hoy ty asany, “ka nanjary niala tsikelikely tamy fiangona.”

7. Ino ty mety ho vokany lafa hiani-ty eritseritsiny ty olo raiky?

⁷ Misy koa nandika ty fitsipikini-Jehovah taloha, farany manea azy ty eritseritsiny, ka mahatsapa ie hoe tsy maeva hotiavi-Ndranahary. Ndre fa nibebaky noho nahazo famindram-po ie, le mety mbo hahatsapa hoe tsy maeva ho anatini-vahoaki-Ndranahary. Zay mihintsy ty raha nitsapani-rahalahy raiky atao hoe Francisco. Hoy ty asany: “Namea fananara aho satria nijangajanga. Nivory avao aloha aho tamy voalohany, fe nihakivy aho sady nahatsapa hoe tsy maeva hiaraky amy vahoakini-Jehovah. Tsy nilamy ty feoni-fieritseretako, sady niresy lahatsy aho hoe tsy nanenga ty hadisoako Jehovah. Tsy nandeha nitory noho nivory sasy aho tamy farany.” Manao akory ty fahitanao ty rahalahy noho anabavy miatriky ani-raha sarotsy niresahintsika teo rey? Tsapanao va ty raha mahazo an-drozy? Fa mbo vatan-draha marè, manao akory ty fahitani-Jehovah an-drozy?

8. Halinoni-Jehovah va olo fa nanompo azy rey? Hazavao.

⁸ Tsy halinoni-Jehovah ty olo fa nanompo azy fe nijano henanizao. Tsy halinony koa ty fanompoa nataon’olo iny ho azy. (Heb. 6:10) Niresaky fanohara soasoa raiky Isaia mba hampisehoa ty fomba ikarakarani-Jehovah ty vahoakiny. Nanoratsy Isaia hoe: “Manahaky mpiaraky aondry io ro hikarakarany ty  aondriny. Ty sandriny ro hamoriany ty anak’aondry, le hotrotroany an-tratrany eo rozy.” (Isa. 40:11) Ino ty tsapani-Mpiaraky Aondry Bevata iny lafa misy miala amy namany rey aondriny reo? Nambarani-Jesosy ty fihetseham-poni-Jehovah lafa nanontany ani-mpianatsiny reo ie hoe: “Akory ty hevitsinareo? Laha misy olo mana aondry zato ka niala ty raiky, tsy hengany am-bohitsy eo va sivampolo sivy amby rey ka handeha ie hila ani-azy nivio lala iny? Zaho mivola aminareo, fa lafa hitany raiky iny, le iny ro hahafalifaly azy marè mandilatsy ani-azy sivampolo sivy amby tsy nivio lala rey.”—Mat. 18:12, 13.

9. Akory ty ataoni-mpiaraky aondry soa fanahy lafa mikarakara ty aondriny? (Henteo sary amy fononi-gazety toy.)

⁹ Manino ro mety soa laha ampitovizy amy mpiaraky aondry Jehovah? Satria tena mikarakara ty aondriny ty mpiaraky aondry soa fanahy. Nialy tamy liona noho orsa, ohatsy, Davida mba hiarova ty aondriny. (1 Sam. 17:34, 35) Azo antoky fa ho ambini-mpiaraky aondry soa fanahy ndre raiky avao ty niala amy aondriny reo. (Jaona 10:3, 14) Ho zao amy zay ty hataony: Hapetrakiny amy pilasy voaaro tse ty aondry 99 na hampiambeniny ani-ze mpiaraky aondry namany, bakeo handeha ie hila ani-azy raiky trobo iny. Niresaky ani-fanohara io Jesosy mba hampianara antsika raha bevata raiky: “Tsy irini-Babako an-danitsy any iny hisy ho trobo ty raiky amy maliniky rey.”—Mat. 18:14.

10. Laha hentea ty Ezekiela 34:11-16, ino ty raha ampitamanini-Jehovah fa hataony amy aondriny trobo rey?

¹⁰ Tea antsika kiraidraiky Jehovah, anatini-zay koa azy “maliniky” niala tamy aondry namany rey. Nampitamà Ndranahary, tamy alalani-Ezekiela mpaminany hoe hila ani-aondriny trobo rey ie, le hanampy an-drozy hifandramby soa aminy ndraiky. Niresahiny hoe ino iaby ty hataony mba hisarombaha an-drozy. Manahaky ty raha hataoni-mpiaraky aondry israelita mana aondry trobo ty raha hataony. (Vakio Ezekiela 34:11-16.) Voalohany, hila ani-aondry iny ie. Mety handany fotoa  raha zay sady hila ezaky be. Bakeo, lafa hitany raiky nitrobo iny, le handesiny ho amy namany rey any. Laha malemy koa aondry iny satria maratsy na mosarè, le hokarakarani-mpiaraky aondry iny soa, ka hofeheny ty maratsy aminy, le handesiny ie sady hofahanany. Mpiaraky “ty aondri-Ndranahary” koa ty anti-panahy, ka mila manao ani-reo lafa manampy ani-ze tsy miaraky amy fiangona sasy. (1 Pet. 5:2, 3) Mila an-drozy anti-panahy reo, manampy an-drozy hiaraky amy ty namany ndraiky, le mikarakara an-drozy ka manampy an-drozy hifandramby soa amy Jehovah. *

11. Ino ty raha haini-mpiaraky aondry soa fanahy?

¹¹ Haini-mpiaraky ondry soa fanahy fa mety ho trobo ty aondry. Ka ndre nandehandeha lavitsy ani-namany rey aza ty aondry raiky, le tsy nasiaky aminy mpiaraky iny. Mba diniho moa ty fomba nanampeani-Jehovah ty mpanompony sisany, tamy fotoa nampivio lala an-drozy.

12. Akory ty nandaisani-Jehovah ani-Jona?

¹² Nilay lavitsy ani-iraky nampanaovy azy iny Jona mpaminany. Fe tsy nimora kivy taminy avao Jehovah. Mpiaraky aondry soa fanahy Jehovah, ka nanarombaky ani-Jona noho nanome hery azy mba hahavitany ty iraky nampanaovy azy. (Jona 2:7; 3:1, 2) Nampiasa hazo babàky Ndranahary tafarani-zay mba hanampea ani-Jona hahatakatsy hoe lafovily ty ain’olombelo kiraidraiky. (Jona 4:10, 11) Ino ty fianara ho antsika? Tsy tokony ho mora kivy amy azy tsy mitory sasy rey ty anti-panahy. Tokony hiezaky rozy mba hahay hoe nanino aondry iny ro nanalavitsy ty namany. Lafa mimpoly amy Jehovah koa aondry iny, le mbo soa fanahy aminy avao rozy sady mikarakara azy.

13. Ino ty ianarantsika baka amy ty raha nataoni-Jehovah tamy mpanoratsy ani-Salamo faha-73 iny?

¹³ Nikivy azy mpanoratsy ani-Salamo faha-73 iny lafa nahita hoe atao raha tafavoaky ty raty fanahy. Nanjary nisalasala ie hoe mahasoa vatany va ty manao ty raha tea-Ndranahary. (Sal. 73:12, 13, 16) Ino  ty nataoni-Jehovah? Tsy nanome tsiny azy ie. Nampanoratini-Jehovah amy Baiboly ao mihintsy aza ty raha nivolaniny. Nihaini-mpanao salamo iny avao tafara tatoy fa tsy misy raha lafovily mandilatsy ani-hoe namani-Jehovah. (Sal. 73:23, 24, 26, 28) Ino ty fianara ho antsika? Tsy tokony halisa hitsara ty anti-panahy laha misy misalasala hoe mahasoa va ty manompo ani-Jehovah. Tsy tokony hanome tsiny azy rozy, fa hiezaky hahatakatsy hoe nanino ie ro mivola na manao raha manahaky ani-zay. Afarani-zay ty anti-panahy vo hanome fampahereza baka amy Baiboly ao laha ilà.

14. Nanino Elia ro nila fanampea, le akory ty nanampeani-Jehovah azy?

¹⁴ Nilay ani-Jezebela Mpanjaka, Elia mpaminany. (1 Mpanj. 19:1-3) Nieritseritsy ie hoe ie raiky avao ty mpaminanini-Jehovah tavela, sady tsy nisy dikany ty asa nataony. Nikivy marè Elia le nainany ho maty. (1 Mpanj. 19:4, 10) Tsy nanome tsiny ani-Elia Jehovah, fa nampahery azy hoe tsy raiky avao ie. Afaky matoky ty heri-Ndranahary ie, sady mbo misy asa maro hampanaovy azy. Nijanjinini-Jehovah ty raha nampiasa loha ani-Elia, bakeo nameany fanendrea vaovao ie. (1 Mpanj. 19:11-16, 18) Ino ty fianara ho antsika? Tokony ho soa fanahy amy aondrini-Jehovah reo tsika, sirtò ty anti-panahy. Ndre mivola aza ie hoe meloky na mahatsapa hoe tsy hanenga ty hadisoany mihintsy Jehovah, le hijanjy azy avao ty anti-panahy lafa mampiboaky ty am-pony ao ie. Bakeo rozy hiezaky mba hanome toky ani-aondry trobo iny hoe lafovily amy Jehovah ie.

15. Manao akory ty fahitani-Jesosy ani-aondrini-Babany reo, laha hentea ty Jaona 6:39?

¹⁵ Ino ty teani-Jehovah ho tsapantsika amy aondriny trobo rey? Nanome modely ho antsika Jesosy. Hainy hoe lafovily amy Ndranahary iaby ty aondriny. Niezaky marè amy zay Jesosy mba hanampy “ty aondry trobo amy taranaky Israely” eo himpoly amy Jehovah. (Mat. 15:24; Lioka 19:9, 10) Mpiaraky aondry tena soa Jesosy, ka nanao ze farani-vitany mba tsy hisy ho trobo ty aondrini-Jehovah.—Vakio Jaona 6:39.

16-17. Ino ty tokony ho tsapani-anti-panahy lafa manampy olo tsy nanompo ani-Jehovah sasy? (Henteo ty efajoro hoe “ Ino ty Mety ho Tsapani-Aondry Trobo Rey?”)

¹⁶ Nampirisihini-apostoly Paoly ty anti-panahy tamy fiangona ta Efesosy ao mba hanahaky ty modelini-Jesosy. ‘Tsy maintsy ampeanareo azy mila fanampea reo, sady tiarovanareo ty safàni-Jesosy Tompo nanao hoe: “Mahasambatsy marè ty manome, tany ty amea.” ’ (Asa. 20:17, 35) Hita baka amy zay fa mana andraikitsy bevata ty anti-panahy henanizao. Hoy Salvador, anti-panahy an’Espaigny any: “Lafa mieritseritsy ty fomba ikarakarani-Jehovah ty aondriny trobo aho, le voatosiky hanao ze azoko atao mba hanampea an-drozy. Matoky aho hoe teani-Jehovah hikarakara an-drozy aho.”

¹⁷ Fa nampea himpoly amy Jehovah olo iaby nivio lala nivoaresaky tamy lahatsoratsy toy ato rey. Maro amy azy niala rey koa henanizao ro ta hanao manahaky ani-zay. Amy lahatsoratsy manaraky ao tsika handiniky tsipiriany maro mikasiky ty raha azontsika atao mba hanampea an-drozy himpoly amy Jehovah.