DJAMBA DJƐ WEKELO 25
‘Langotshɔ lem’ɔmɛlɛ ntahone ɛnkɔkɔ wɛmi’
‘Langotshɔ lem’ɔmɛlɛ ntahone ɛnkɔkɔ wɛmi ko langaalama.’—EZK. 34:11.
YEEMBO 105 ‘Ndjambe nde ngandji’ (lá Otetela)
LA YOPASƐ *
1. Lamo Yehova nyoyawɛdjɛ la omoto wɔlɔmɛ wɔna wɔ dambi?
‘WOMOTO nkoka mvungɛ wɔnande wɔlɔmɛnde?’ Yehova opolaka owila wɔnde woopó wɔsɔ l’eleko kɛ ɔprɔfɛta Izaya. Nde akotshɛka etepela wɛnɛ ante: ‘Ayale kaanga iwɔ wango vungɛ, lemi mpákovungɛki lotshinda lotshinda.’ (Iza. 49:15) Mbala efula Yehova atayawɛdjɛki la wale wɔ omoto. Koko lanɛ, nde ambokamba la ndjɔmbɔmba kɛ djokanelo djeyalaka la wale wɔ omoto nya wɔnande djɛ nyɛnyɛ ngandji kokande ankambi wɛnde. Efula kɛ wale w’amato wakoka djawola etepela wɛ nkaana kɛmɔtshi k’etawɔ Jasmine wɛnɛ: ‘Mama kɛ lɔmɛ wɔnande ntateyɛka ndjala la ngandji k’efula te wɔnande, edjinge ngandji kɛsɔ ntshikalaka lotshinda lotshinda la lowiko lɔnde lonkfumɔ.’
2. Yehova oyawokande ngetemo ntsha wɔ wɔnande ɔmɔtshi ambɔhɔla lá nyuma?
2 Wina wɔ wɔna wɔnde ɔmɔtshi apoyingela la nsanghanyɛ yɛ l’otshumano edjinge apotshɔ tá olemo wipoposanyɛ, Yehova nyɛnaka. Kokanela wopo wɔ Yehova okande djoo l’oloko wina wɛnande nunu djɛ ankambi wɛnde ɔhɔlawɔ lá lonyuma * ɔnɔnyi onkfumɔ!
3. Yehova okombolande nge?
3 Efula kɛ wananyɔ l’ankaana yɛso yɛ ngandji yɛmbɔhɔlaka lá lonyuma, ndokalɔka ndjingela l’otshumano. Iso ndaalongolaka la ɛwɔ epe! Yehova nkombolaka djɛ iwɔ nkalɔ tende, edjinge iso nkombolaka. (1 Pɛ. 2:25) Wopo wɔkɔnge oyɛso ladjɛ ndaakotshɛ? La ntondo kɛ iso nkadjimola la woopó wɔsɔ, tokolenda ladjikɛnge anto amɔtshi iyotshikaka ndjingela nsanghanyɛ la mpoposanyɛ.
ANTO AMƆTSHI OTSHIKAKAWƆ NKAMBELA YEHOVA LAMO?
4. Okakasano wɔkɔnge wowaka anto amɔtshi wayapɛyɛka tshɛ l’olemo?
4 Anto amɔtshi ndaapɛyɛka efula l’olemo. Hung, * kanga lolekɔ l’Asie wa Sidɛ-Ɛstɛ, awola ante: ‘Mpɛyɛka wina la wolo wɔmi onkfumɔ lá olemo wɔmi. Nkanelaka ngete nyama ente: ntsha lambowa mfalanga efula angoyala wodju le lemi djɛ nkambela Yehova. Djɛko ndeke mátateyɛ nkamba efula. Ntateyɛka mpetshɛ nsanghanyɛ mbala la mbala, l’ekomo ekomo, ntshikaka ndjingela nsanghanyɛ inkfumɔ. Ɛnama ngete andja wanɛ wananghemaka djɛ ntowangoyɛ ndambo ndambo la Ndjambe kɛso.’
5. Nkaana kɛmɔtshi, ndananghe nge wina ndapomana la ekakasano wetshikitanyi?
5 Wananyɔ l’ankaana efula wambodjingamaka la ekakasano. Anne, l’intatshɛ la Angleterre, lolekɔ la wana atano, atepela ante: ‘Wɔnami ɔmɔtshi awotshɔka la ɛkɔmɔ k’ekekete. Ndambo m’ɔkɔngɔ, wɔnami onkina wɔ omoto aposaka ma otshumano, edjinge wɔna onkina wɔ mpame ambootata olando lá wɔɔngɔ. Ndjalaka nsɔsɔlɔ la okiyano w’efula, ndeke mootshika ndjingela nsanghanyɛ la mpoposanyɛ. Ekomo ekomo ndjɛka ndɔhɔla lá lonyuma.’ Isankfumɔ ndakiyanyɛka lá ekakasano wɛ nkaana kɛso Anne la nkfumbo kɛnde wɛsɔ, la koko wɛ wananyɔ la wa nkaana inkina lombombe, wapomaná l’ekakasano etengo wɛsɔ!
6. Ntsha onto apakambisa la n’dako djɛla la Kɔlɔsɛ 3:13, wopo wɔkɔnge n’kambo n’tshɔ okakawɔ ndokomɛ djɛ ntshika nsangana la owila wɔ Yehova?
6 Wala Kɔlɔsɛ 3:13. Anto amɔtshi l’anteyi kɛso wambowaka etepela wɛ lɔlɛngɔ me winawɔ akristo. Ɔpɔstɔlɔ Pɔɔlɔ awolaka ante: Tokoka mba ‘donga djɛ nkiyanela’ w’ɔnanyɔ kana nkaana kɛ mɔtshi. Mbala imɔtshi wambotonanghela akambo wapalekɔ sii. Ntsha topayalisa la ndaakota tokoka namá enkomba. Nama onkomba l’oloko nkoka ntshinda anto amɔtshi djɛ ntshika nsanghana la ankambi wɛ Yehova. Tɔkɔsa ndjɔmbɔmba kɛ Pablo, wɔnanyɔ wela Amérique wa Sidɛ. Wotonghanyɛka n’kambo mɔtshi nghotoko, ko ma n’kambo djɛkɔ, nde atshutshɛka edjito wɛnde. Ndélolá mo? Atepela ante: “Ndjokaka nkɛlɛ efula, ko ndambo ndambo momowangɔ otshumano.”
7. Nkfum’oloko kelekɔ la lowo, ndjalaka la eposelo wɛkɔnge te onto?
7 Nkfum’oloko yɛ anto amɔtshi nkindjɛka ndawɛmbɛ odjito ko, wambóyawoká djɛ, wapakoke ndjokama ngandji mee Ndjambe ladjikɛnde wapendolaka ɔlɛmbɛ wɔ Ndjambe l’etsho wembohetá,. Kaanga iyoyapɛla ma evunga wɛwɔ la iyawimeyɛ evunga wɛkɔ, iwɔ ntepelaka ambɔ wapakoke ndjala leteyi kɛ owila wɔ Ndjambe. Wɔnanyɔ wetawɔ Francisco akanelaki ngo nghɔsɔ ante: “Ndjalaka la ekfumbo kɛ mbindo kɛ wayi wa n’tshɛngi, ko momowa ikako. Ma bango, nkindjɛka ndjingela nsanghanyɛ koko ndjɛka ndopekɔ ladjikɛnde nyɛnaka ente mpafɛnɛ ndjala lanteyi kɛ owila wɔ Yehova. Ndjawokaki ente ndekɔ la lowo. Ndjawolaki ente Yehova atanyimeyɛ ovunga wɔmi. Mɔkɔngɔ w’etsho ɛmɔtshi ntshikaka ndjingela nsanghanyɛ la mpoposanyɛ.” Oyawokɛ ngete mo lá n’kambo djɛ anto wopomana la akambo ngete wisombowala wasɔ? Ongawokelake djandji? Iyakoko Yehova oyawokande ngete mo la n’kambo djɛwɔ?
YEHOVA NKƆPAKA ƐNKƆKƆ WƐNDE
Onami w’ɛnkɔkɔ w’ose Isariyɛlɛ ewaki nama ɔnkɔkɔ wɔnde wombovunga (Lenda etenyi 8-9) *
8. Yehova angovungɛ anto wokambelisa lá etsho wemboheta? Pakisola.
8 Yehova apavungɛ onto wookambelisá lá etsho wɛ ntondo, koko woopoyingela winɔsɔ lá nsanghanyɛ y’owila wɔnde. Nde apavungɛ itshinda itshinda akambo ankfumɔ wiyombonangha l’olemo wɔnde. (Heb. 6:10) Ɔprɔfɛta Izaya akambaka la ndjɔmbɔmba kekota oloko djɛ nyɛnyɛ wopo wɔkɔnge Ndjambe olamande ankambi wɛnde. Nde afunaka ante: ‘Etengo olami w’ɛnkɔkɔ, Yehova angolama oloyi wɔnde w’ɛnkɔkɔ. Nde angotshumanyɛ wana wande w’ɛnkɔkɔ l’ɛwɔ wɛnde edjinge angaawɛmba lá ikole yɛnde.’ (Iza. 40:11) Onami w’ɛnkɔkɔ Wekekete oyawokakande mo ntsha ɔnkɔkɔ wɔnde ɔmɔtshi ambowangɔ m’oloyi? Yeso atɛnyɛka wina wɔ ndashimela ambeki wande ante: ‘Okanelanyo ente mo? Ntsha onto ɔmɔtshi alekɔ la ɛnkɔkɔ 100 ko ɔmɔtshi wombotshɔ, nde apangotshika enkina 99 l’onkoko ko nde ntshɔ ntahone ɔmɔ wɔkɔ wombotshɔ? Ntsha ambɔwɛna, nyoshimela nsɔsɔlɔ ente, nde angoyala l’osasa efula lá n’kambo djɛnde oleki djɛ 99 watavunga.’—Mat. 18:12, 13.
9. L’etsho wefunamaki Bible, wopo wɔkɔnge onami w’ɛnkɔkɔ ndananghelaka ɛnkɔkɔ wɛnde akambo? (Lenda n’tshango djela loposo.)
9 Ladjikɛnge Yehova ɛlamande la onami w’ɛnkɔkɔ? Ladjikɛnde, l’etsho wefunamaki Bible onami w’ɛnkɔkɔ wɔ wɔlɔ alamaki ɛnkɔkɔ wɔlɔ efula. Ndjɔmbɔmba, Davidɛ, ananaka nya kibwe edjinge nya lɔɔwondo ngo djɛnde nama oloyi wɔnde w’ɛnkɔkɔ. (1 Sa. 17:34, 35) Ntsha kaanga ɔnkɔkɔ wɔnde ɔmɔ toko wombima, onami w’ɛnkɔkɔ wɔ wɔlɔ ayalaki ladjɛ ndjisola. (Dj. 10:3, 14) Ntsha nde alekɔ la ɛnkɔkɔ 100 ko ɔmɔ wombotshɔ ngo nde ntshika enkina 99 lá lopango kana ntshikela onami onkina konde ntshɔ ntawohone. Ntsha Yeso akambaka la ndjɔmbɔmba kɛsɔ ndé, djɛ ntolakanyɛ nsɔsɔlɔ kɛ djonyi efula kɛnɛ: ‘Papa kɛmi ke l’olongo apakɔpɛ kaanga wɔnande ɔmɔ wɔ dambi mvɔ.’—Mat. 18:14.
Onami woyalaki lʼIsariyɛlɛ yɛ ntondo akanelaki djɛ Ɔnkɔkɔ wɔnde wombovunga (Lenda etenyi 9)
YEHOVA MPONAKA ƐNKƆKƆ WƐNDE WEMBOVUNGA
10. Lá nkilika Ezekiyɛlɛ 34:11-16, kɛkɔnge kɛ Yehova ndombolaka djɛ nanghela ɛnkɔkɔ wɛnde wembovunga?
10 Yehova nkɔpaka onto onkfumɔ wɔ l’a nteyi kɛso ndjila edjinge ‘dɛngɛ’ djembowangɔka m’oloyi w’anto wande. Má lotshimbo l’ɔprɔfɛta Ezekiɛlɛ, nde alakaka ante angohona ɛnkɔkɔ wɛnde wembovunga edjinge angakotshɛ djiwɔ ndjala la djokanelo djɛ wɔlɔ nyawɔ. Atopakisolaka lonkina yopo yɛ ndongonangha djɛ ndaawikɛ. Lá nsɔsɔlɔ, nde angonangha ngo ngete onami wɔ wɔlɔ w’ɛnkɔkɔ w’ose Isariyɛlɛ ndananghaka ntsha, ambotshutshɛ ɔnkɔkɔ wɔnde. (Wala Ezekiyɛlɛ 34:11-16.) Ntondotondo, onami w’ɛnkɔkɔ atshɔki ntahone ɔnkɔkɔ wɔnde, n’kambo n’tshɔ djɔwɔsɛlaki wina edjinge weelo efula. K’epe, ntsha ambotowisola nde oyakalaki lá oloyi wɔ ɛnkɔkɔ ekina. L’ekomo, ntsha ɔnkɔkɔ wɔkɔ wohotalaka kana koko wolekɔ la ndjala, nde okotshɛki la ngandji k’efula. Ladjikɛnde nyama kɛkɔ kɛmbɔlɛmba, nde angolama: Nde angosola ampota yɛnde, nde angɔwɛmba l’ɛwɔ wɛnde kana lá apɛka wande, ko nde angɔpɛyɛ n’kete djɛ ndɛ. Tokokolo tɔ l’otshumano walekɔ anami ‘w’oloyi w’ɛnkɔkɔ wɛ Ndjambe.’ (1 Pɛ. 5:2, 3) Ngo la toopo tosato tonyi ndeke oyɛwɔ ladjɛ nanghela ɛnkɔkɔ wembowangɔ la otshumano akambo: Iwɔ ladjɛ ntshɔ ntawahone, ndaakotshɛ djiwɔ nkalɔ l’oloyi wɛ ankambi wɛ Ndjambe, la ndawɛnyɛ ngandji lá ndapɛyɛ okotshɔ wɔ lonyuma woyɛwɔ djonyi. *
11. Onami w’ɛnkɔkɔ wɔ wɔlɔ ndewaka nge?
11 Onami wɔ wɔlɔ w’ɛnkɔkɔ éwaki ante ɔnkɔkɔ akokaki mvunga. Djɛko ndeke wina w’ɔnkɔkɔ ɔmɔtshi ovungande, nde atonanghelaka akambo la enkfukfulu. Tolende wopo wɔ Ndjambe ndakotshɛ ankambi yɛnde imɔtshi yowangwisa la itenyi yɛ wina.
12. Wopo wɔkɔnge Yehova ndananghela Yɔna akambo?
12 Ɔprɔfɛta Yɔna alotaka olemo wɔnde. Koko Yehova atɔhɔnyɔla. Ngete onami w’ɛnkɔkɔ wɔ wɔlɔ, nde owikɛka ma n’kambo djokomelisa edjinge okotshɛka djɛnde mba wolo woyalaki lande djonyi djɛ nkotshɛ olemo wɔnde. (Yɔna 2:7; 3:1, 2) Ndambo m’ɔkɔngɔ nde akambaka la otamba ɔmɔtshi djɛ ndokotshɛ djɛnde ndembetela ante lowiko lonkfumɔ l’onto lolekɔ la djonyi efula. (Yɔna 4:10, 11) Olakanyelo wɔkɔnge wowaso ma ɔkɔndɔ wɔsɔ? Tokokolo wapakoke ladjɛ nyimɛ anto wambɔhɔlaka lá lonyuma yimba. Lá nangha nghɔsɔ, iwɔ ladjɛ mpona djɛ ndjewa donga djembákomɛ djiwɔ mbangɔ oloyi w’akristo. Ko wina wokalɔ ɔnkɔkɔ wonyi te Yehova, iwɔ ladjɛ nkindjɛ ndowila yimba la ndɔwɛnyɛ ngandji.
13. Olakanyelo wɔkɔnge wowaso la wopo wɔ Yehova nd’elola lá etepela wɛ onfunyi wɔ Yeembo 73?
13 Onfunyi wɔ Yeembo 73 alɛmbaka oloko laa ndɛnyi wopo w’anto wa nyɛtshi iyalongaka l’akambo ankfumɔ wiyananghaka. Nde ɛnaka ngete lako wapɔ lá nangha ɛkɔpa kɛ Ndjambe. (Yee. 73:12, 13, 16) Yehova ndélola ngete mo? Nde atapangola onkambi wɔnde, koko nde awolaka djɛ etepela wɛ onkambi wɔnde wɛsɔ nfunama lá Bible. L’ɔkɔngɔ, ontshumbi wɔ yeembo ayɛka ndjosipisoyɛ ante lako ekete kelekɔ djonyi lá lowiko keleka ndjala la Yehova ilongo. (Yee. 73:23, 24, 26, 28) Olakanyelo wɔkɔnge wowaso ma ɔkɔndɔ wɔsɔ? Tokokolo wapakoke ndomboyɛ lankeke lankeke onto wilá ehamo lá wapɔ woyɛ má nkambela Yehova. Lá ntondo kɛ ndɔpɛla, tokokolo ladjɛ mpemba nsawola la nde djɛ ndjewa ladjikɛnge okanelande la onanghande nghɔsɔ. Masɔ ndeke okokawɔ ndosepa yambalo yɛnde lá alako wele lá Bible wakeketshɛ woyɛnde la djonyi.
14. Ladjikɛnge Elidja ndayalaka la djonyi djɛ okotshɔ, ko wopo wɔkɔnge Yehova ndookotshɛ?
14 Ɔprɔfɛta Elidja alotaka owadji wɔ omoto Jezabɛlɛ. (1 Nkfumi yɛ n’kanga 19:1-3) Nde afɛnyɛka ante ngo nde toko ndeke lokambela Yehova edjinge wayi ankfumɔ windananghe watayala la djonyi. Nde alɛmbaka oloko ko ahonaka djɛ nde mvɔ. (1 Nk. 19:4, 10) Yehova atopangola koko, oshikikɛka laa ndóshimelá ante apalekɔ ngo nde toko ndeke lokambela, oshimelaka lonkina djɛnde ndjila oloko wɔnde lá nkfulu kɛnde kɔkɔpande ndɔpɛyɛ ladjikɛnde nde akɔpa ndɔpɛyɛ elemo enkina wɛ nde nangha. La wɔlɔ onkfumɔ, nde owekamɛyɛka wina wɔ ndoshimelaka donga djotshindisa djɛnde ndɛmba oloko, edjinge ɔpɛyɛka elemo enkina wɛ n’tato. (1 Nk. 19:11-16, 18) Olakanyelo wɔkɔnge wowaso ma ɔkɔndɔ wɔsɔ? Isankfumɔ, pekapeka tokokolo, ladjɛ nanghela ɛnkɔkɔ wɛ Yehova akambo la wɔlɔ w’oloko. Wina wɔ ɔnkɔkɔ wombovunga oshimelande tokokolo kɛnɛ kelekɔ l’oloko wɔnde, iwɔ ladjɛ ndowekamɛ wɔlɔ wɔlɔ ayale kaanga nde alekɔ la ekiyano kana angokanelake djɛ Yehova apakoke ndoowimeyɛ evunga. Masɔ ndeke oyɛwɔ ndɔwɛnyɛ djɛ nde alekɔ la djonyi lá wiso wa Ndjambe.
WOPO WƆKƆNGE WOYƐSO LA DJƐ NDƆSA ƐNKƆKƆ WEMBOVUNGA?
15. Lankilika Djɔanɛ 6:39, wopo wɔkɔnge Yeso ndɔsaka ɛnkɔkɔ wɛ papa kɛnde?
15 Wopo wɔkɔnge Yehova okombolande dj’iso ndɔsa ɛnkɔkɔ wɛnde wembovunga? Ndjɔmbɔmba ketotshikelisa Yeso ntɛnyɛka. Yeso ewaki ante Yehova ndɔsaka ɛnkɔkɔ wɛnde la djonyi. Djɛko ndeke ndanaghe kekfumɔ kindakoke nangha djɛ nkotshɛ ‘ɛnkɔkɔ wembovunga wɛ owila w’Isariyɛlɛ’ dj’iwɔ nkalɔ te Papa kɛnde. (Mat. 15:24; Luka 19:9, 10) Ngete oyɛnde onami w’ɛnkɔkɔ w’ɔwɔlɔ, nde ananghaka kɛnɛ kindakoke nangha djipande ntshutshɛ kaanga ɔnkɔkɔ ɔmɔ wɔ Yehova.—Wala Djɔanɛ 6:39.
16-17. Kɛkɔnge kɛ tokokolo oyɛwɔ la djɛ djawola lá n’kambo djɛ nkotshɛ waambowangɔka m’otshumano? (Lenda ipapango “ Wopo wokoka ɔnkɔkɔ wombovunga ndaawoka.”)
16 Ɔpɔstɔlɔ Pɔɔlɔ akembɛka tokokolo toyalaki l’otshumano w’ase Ɛfɛsɛ djiwɔ ndjokola Yeso. Nde ashimelaka ante: ‘Nyo ladjɛ nsuka anto walekɔ la wɔdju, edjinge mvungɔ etepela wɛ Nkfumi Yeso, ndatepela nyɔmɛlɛ ante: Osasa wóyɛka ma mpɛyɛ ndekola wɔ ndongola.’ (Elemo 20:17, 35) Vɛrse yɛnɛ ɛnyɛ papoo ante tokokolo walekɔ l’odjito w’ekekete edjinge wɔ djonyi efula. Salvador, ikokolo yela Espagnɛ, apakisola ante: ‘Wina wokanelami ngadji k’enkfumɔ kɛ Yehova te ɛnkɔkɔ wɛnde wembovunga, n’kambo n’tshɔ ntshindaka lemi djɛ lemi nangha k’enkfumɔ koyɛmi ladjɛ nangha djɛ ndaakotshɛ. Ngo ngete oyɛmi onami w’ɛnkɔkɔ, ngo lemi ndaalama. Lemi ndjawolaka ente kɛsɔ ndeke Yehova ɔkɔpande.’
17 Wananyɔ l’ankaana yɛmbɔhɔla la lonyuma wisolumolaki la djamba djɛnɛ wambokalɔka te Yehova mpeyi ma okotshɔ w’iyawa. Koko ankina wákombolá nkalɔ te Yehova walekɔ efula! Djamba djeyaye ngɔtɛnyɛ lá lotshimola wopo woyɛso ladjɛ nangha djɛ ndaakotshɛ.
YEEMBO 139 Kokanela wopo w’isongoyala l’andja wa bango (lá Otetela)
^ par. 5 Lamo anto amɔtshi owangɔkawɔ otshumano mɔkɔngɔ wɔ nkambela Yehova la n’kɔmano ɛnɔnyi efula? Yehova oyaawokande ngete mo lá n’kambo djɛwɔ? Djamba djɛnɛ ngokadjimola weepó wɛsɔ. Tɛɛna lonkina elakanyelo efula wokokaso mba má wopo wɔ Yehova ndakotshɛ ankambi yɛnde imɔtshi yowangwisa ndambo l’etsho wefunamaki Bible.
^ par. 2 DJƐ NDJOKA WƆLƆ: Wɔnanyɔ wɔmbɔhɔla lá lonyuma nde kangombonangha ngɔndɔ isamalo kana ndekana apingela lá nsanghanyɛ la koko apapose tá olemo w’ipoposanyɛ, koko alekɔ ngo wɔna nyɛnghɛso kana nkaana kɛso kɔkɔpaso.
^ par. 4 Nkombo imɔtshi imbotshikitana.
^ par. 10 Lá djamba djeyaye tongeka la lotshimola wopo wɔkɔnge tokokolo oyɛwɔ ladjɛ nkamba la toopo tosato tɔsɔ.
^ par. 60 NSAKISO Y’ASANGO N’KISHI: Onami w’ɛnkɔkɔ wotshutshisa ɔnkɔkɔ ayakiyanyɛ lá n’kambo djɛwɔ. Atohone edjinge okotshɛ djɛnde nkalɔ l’oloyi. Anami w’ɛnkɔkɔ we lá nyuma nanghaka ngo wop’ɔkɔ.
^ par. 64 NSAKISO Y’ASANGO N’KISHI: Nkaana kɛmɔtshi kɛmbɔhɔla lá nyuma, alekɔ leteyi kɛ bisi l’itena yemalá etuka ko alenda Ewakɛ epe wapoposanyɛ akambo wa nsɔsɔlɔ l’ɔmɔnɔmɔnɔ lá ntshandjawala.
