1. Faandi mbei Jehovah tei hënseei maaka ku wan mama di abi miii a bobi?

„WAN mujëë sa fëëkëtë di mii fëën di dë a bobi ö?” Di soni aki Jehovah bi hakisi a di pisiten di di tjabukama Jesaaja bi dë a libi. Jehovah bi piki dee sëmbë fëën taa: „Kandë wan mama sa fëëkëtë di mii fëën, ma nöiti mi o sa fëëkëtë unu” (Jes. 49:15). Jehovah an lo’ u maaka hënseei ku wan mama. Ma di pasi aki sö a du ën. Jehovah bi taki u di fasi fa wan mama ta lobi di mii fëën, u lei unfa a lobi dee dinima fëën tjika. Gaansë u dee mama sa fusutan di soni di wan sisa de kai Jasmine bi taki. A bi taki taa: „Te i abi miii a bobi, nöö i ku ën ta ko abi wan apaiti fii da unuseei.”

2. Unfa Jehovah ta fii te wan u dee mii fëën go disëën?

² Jehovah ta sabi te wan mii fëën an nango a di peleikiwooko möön, söseei te an nango a dee komakandi möön. Pakisei unfa Jehovah ta tjali te a ta si unfa hiniwan jaa dusudusu dinima fëën an ta peleiki möön *.

3. Andi Jehovah ta kë?

³ Sömëni u dee baaa ku dee sisa dee an bi ta peleiki möön, ta toona ko a di kemeente baka, nöö u ta tei de ku wai te de ko! Jehovah kë taa de musu ko baka, nöö useei kë u de ko tu (1 Pet. 2:25). Unfa u sa heepi de u de ko baka? Ufö u piki di hakisi aki, nöö u musu ko sabi faandi mbei so sëmbë an nango a dee komakandi möön, söseei faandi mbei de an ta du di peleikiwooko möön.

4. Andi wooko soni bi du ku so baaa ku sisa?

⁴ So baaa ku sisa mbei wooko ko dë di möön fanöudu soni a de libi. Wan baaa di ta libi a Asia de ta kai Hung *, bi taki taa: „Mi bi ta tei gaansë u di ten u mi da wooko soni. Mi bi ta biibi taa te mi o abi möön möni, nöö mi bi o sa dini Jehovah möön bunu. Fëën mbei mi bi bigi wooko möön hia. Möönmöön mi bi ta misi dee komakandi, u te kuma ma bi nango a dee komakandi möön seei. Pikipiki Saatan ta wooko ku dee soni u di goonliba aki u puu i a di dini di i ta dini Jehovah.”

5. Unfa wan sisa bi du soni di sömëni fuka bi ta miti ën?

⁵ Sömëni fuka ta miti so u dee baaa ku dee sisa fuu, nöö de ta fii bookosaka. Wan sisa u Ingisiköndë de kai Anne, abi feifi mii. A bi taki taa: „Wan u dee mii u mi bi abi wan gaan suwaki sensi di mi pai ën. Baka wan pisiten, hën wan u dee mujëë mii u mi kumutu a di biibi, söseei wan womi mii u mi ko siki a hedi. Mi bi fii bookosaka sö tee taa ma bi nango a dee komakandi möön, söseei ma bi nango a di peleikiwooko möön.” Wë u ta fii ku Anne ku dee sëmbë fëën wosudendu, söseei ku wotowan di dee seei fuka aki ta miti tu!

6. Unfa a sa pasa taa wan sëmbë go disa dee sëmbë u Jehovah pikipiki ee an ta du di soni di sikifi a Kolosën 3:13?

⁶ Lesi Kolosën 3:13. So u dee dinima u Jehovah hati bi ko boonu u di wan baaa nasö wan sisa bi du wan soni ku de di hati de. Apösutu Paulosu seei bi piki taa so juu a sa pasa taa u abi leti u taki taa wan baaa nasö wan sisa ’du wan soni di hati u’. A kan taa wan baaa nasö wan sisa an kuutu u a wan leti fasi. Ma ee wa köni, nöö u sa ko ta hoi di sëmbë dë a bëë. Te wan sëmbë ta hoi wan baaa nasö wan sisa a bëë, nöö di soni dë sa mbei a go disa dee sëmbë u Jehovah. Buta pakisei a di woto u wan baaa de kai Pablo, di ta libi a Zuid-Amerika. De bi mindi soni dëën taa a du wan gaan zöndu. Te u kaba fëën, dee gaanwomi bi ko biibi taa sö soni dë, hën a lasi dee gaandi dee a bi abi a di kemeente. Andi Pablo bi du? Pablo taki taa: „Hati u mi bi boonu, hën pikipiki ma bi nango a dee komakandi möön.”

7. Andi sa pasa te wan sëmbë háti ta fon mën?

⁷ Ee wan sëmbë hati ta fon mën u di a bi du wan gaan zöndu a di ten di pasa, nöö di soni dë sa mbei a fii kuma Gadu an o sa lobi ën möön. Aluwasi ee a bi tjali u di soni di a du, hën de dëën paadon, tökuseei a sa fii jeti kuma an bunu tjika u dë wan dinima u Gadu. Wan baaa de ta kai Francisco, bi ta fii sö tu. A bi taki taa: „De bi bë wojo da mi u di mi bi libi fanafiti a di së u manu ku mujëë soni. Hii fa mi bi ta ko a dee kemeente komakandi jeti, tökuseei mi bi ta fii bookosaka, nöö ma bi ta fii taa mi fiti u dë a dee sëmbë u Jehovah mindi möön. Mi háti bi ta fon mi, nöö mi bi ta hoi taa Jehovah an da mi paadon. Baka wan pisiten, hën ma bi nango a dee komakandi möön, söseei ma bi ta du di peleikiwooko möön tu.” Unfa i ta fii te i ta lesi woto u baaa ku sisa di ta miti soni di dë kuma dee u taki u de aki? I ta fii da de u? Unfa Jehovah seei ta fii te a ta luku dee lö sëmbë aki?

8. Jehovah ta fëëkëtë dee sëmbë dee bi ta dini ën u?

⁸ Jehovah an ta fëëkëtë dee dinima fëën dee bi ta dini ën. Söseei an ta fëëkëtë dee soni di de bi du a di diniwooko fëën (Heb. 6:10). Di tjabukama de kai Jesaaja bi sikifi wan woto di ta lei unfa Jehovah ta luku dee sëmbë fëën tjika. Jesaaja bi sikifi taa: „A o sölugu dee sikapu fëën kuma wan sikapuma. A o buta de nëën hati mindi te a o ta tja de” (Jes. 40:11).  Unfa Jehovah di dë di gaan Sikapuma ta fii te wan u dee dinima fëën an ta dini ën möön? Jesosi bi taki unfa hën Tata ta fii, di a bi hakisi dee bakama fëën taa: „Ee wan sëmbë abi wan höndö sikafu ta kiija, nöö hën wan u de kumutu a dee otowan dendu lasi go te a go pii, nöö unfa i mëni? Na a o disa dee nëigiteni-ku-nëigi ka de ta njan a di sabana dë, nöö a go suku di lasi sikafu dë tee a feni ën nö? Aai, sö a o du. Nöö mi taki da unu, taa te a feni di wan kodo di bi lasi go dë, nöö a o wai ku ën gaanfa seei möön leki dee nëigiteni ku nëigi dee an bi go lasi.”​—Mat. 18:12, 13.

9. Unfa wan bunu sikapuma fu awooten bi ta libi ku dee sikapu fëën? (Luku di peentje u di kafiti.)

⁹ Faandi mbei u sa taki taa a fiti fuu tei Jehovah maaka ku wan sikapuma? Wë u di wan bunu sikapuma fu awooten bi ta booko hën hedi gaanfa ku dee sikapu fëën. Dafiti bi dë wan u dee bunu sikapuma aki. A bi feti ku wan lëun ku wan beer u tjubi dee sikapu fëën (1 Sam. 17:34, 35). Wan bunu sikapuma o sabi te wan sikapu fëën lasi (Joh. 10:3, 14). Dee lö sikapuma aki ta disa dee 99 sikapu u de a wan peni, nasö de o hakisi woto sikapuma u de luku de da de, u de sa go suku di wan kodo sikapu u de di lasi. Jesosi bi konda di woto u di sikapu di lasi, u di a bi kë lei u wan fanöudu soni. Jesosi bi taki taa: „Söseei wë mi Tata di dë a liba ala dë tu e, dee sëmbë. Biga an kë na wan kodo sëmbë fëën musu lasi, te dou ku dee piki mii kuma disi aki seei. Sö a ta kai de gaan soni tjika.”​—Mat. 18:14.

10. Andi Jehovah paamusi u taa a o ta du da dee sikapu fëën dee lasi, te u luku Ezekiëli 34:11-16?

¹⁰ Jehovah lobi hiniwan fuu, te kisi hii dee sëmbë dee an ta dini ën möön. Jehovah bi mbei di tjabukama Ezekiëli sikifi wan soni di ta lei taa a o go suku dee sikapu fëën dee lasi, nöö a o heepi de u de ku ën ko bunu baka. Jehovah taki andi a o du u heepi dee sëmbë fëën. Di fasi fa a o heepi dee sëmbë fëën, dë kuma di soni di wan sikapuma u Isaëli bi o du te wan sikapu fëën lasi. (Lesi Ezekiëli 34:11-16.) Di fosu soni di wan sikapuma o du, hën da a o suku di sikapu fëën. Di soni aki sa tei  sömëni ten, söseei a musu mbei taanga möiti u feni ën. Baka di dë, di sikapuma musu tja di sikapu go baka a di hipi. Ee di sikapu kisi makei, nasö ee hangi kisi ën, nöö di sikapuma o heepi ën, a o kula dee kasikaasi fëën, söseei a o dëën soni u njan tu. Dee gaanwomi, dee dë kuma sikapuma u „dee sëmbë u Gadu”, musu du di wan seei soni u de sa heepi dee baaa, nasö dee sisa dee an ta peleiki möön, nasö dee an ta ko a dee komakandi möön (1 Pet. 5:2, 3). Dee gaanwomi musu suku dee sëmbë aki baka, de musu heepi de u de toona ko a di kemeente, söseei de musu lei de taa de lobi de, u di de o heepi de u de ku Jehovah toona ko dë mati baka. *

11. Andi wan bunu sikapuma bi ta fusutan?

¹¹ Wan bunu sikapuma bi ta fusutan taa dee sikapu fëën sa lasi. Nöö ee wan sikapu bi lasi, di sikapuma an bi ta sitaafu ën te a toona feni ën baka. Luku unfa Gadu bi heepi so u dee dinima fëën dee an bi ta dini ën möön u wan pisiten.

12. Unfa Jehovah bi libi ku Jona?

¹² Di tjabukama Jona, an bi go du di wooko di Jehovah bi mandëën faa go du a Ninifei. Hii fa a bi dë sö, Jehovah an bi disa Jona. Jehovah bi tjubi Jona, nöö a bi heepi ën faa feni kaakiti baka, sö taa a bi sa du di wooko di a bi dëën faa du (Jona 2:7; 3:1, 2). Bakaten, Jehovah bi wooko ku wan kuja pau u heepi Jona faa ko fusutan unfa di libi u wan sëmbë dë gaan soni dëën tjika (Jona 4:10, 11). Andi u ta lei a di soni aki? Dee gaanwomi an musu disa wan sëmbë hesi poi di an ta peleiki möön, nasö di an nango a dee komakandi möön. Ma de musu mbei möiti u ko fusutan faandi mbei di sëmbë go disa di kemeente. Nöö te a toona ko a Jehovah, dee gaanwomi musu lei ën taa de lobi ën, söseei taa de ta booko de hedi ku ën.

13. Andi u ta lei u di fasi fa Jehovah du soni, di di Psalöm sikifima bi taki di soni di dë a Psalöm 73?

¹³ Di sikifima u Psalöm kapitë 73, bi ko fii bookosaka di a bi ko ta si kuma hii juu soni ta waka bunu da dee hogihati sëmbë. A bi ko ta hakisi hënseei ee di dini di a bi ta dini Gadu bi  ta tja wini ko dëën (Ps. 73:12, 13, 16). Andi Jehovah bi du? Wë an bi kuutu di womi aki. Ma a bi mbei soni fëën ko dë sikifisikifi a di Bëibel. Te u kaba fëën di Psalöm sikifima aki bi ko si taa di dë di wan sëmbë dë mati ku Jehovah, bunu möön hiniwan woto soni a di libi (Ps. 73:23, 24, 26, 28). Andi u ta lei a di soni aki? Wë dee gaanwomi an musu kuutu dee sëmbë dee bigi ta hakisi deseei ee a ta tja wini ko te u ta dini Jehovah. Ka u de du ën sö, de musu mbei möiti u ko fusutan faandi mbei de ta fan sö, nasö faandi mbei de ta du soni sö. Baka di dë ufö dee gaanwomi sa tei di Bëibel u da de taanga.

14. Faandi mbei Elia bi abi heepi fanöudu, nöö unfa Jehovah bi heepi ën?

¹⁴ Di tjabukama Elia, bi kule da di könu mujëë de kai Iseibëli (1 Kön. 19:1-3). Elia bi pakisei taa na wan woto sëmbë bi ta dini Jehovah kuma tjabukama fëën, nöö a bi pakisei taa u sösö a bi ta du di wooko fëën. Elia bi lasi hati sö tee taa a bi kë dëdë (1 Kön. 19:4, 10). Jehovah an bi kuutu Elia, ma a bi mbei a ko sabi taa an dë hën wanwan. A mbei a ko fusutan taa a o dëën kaakiti, söseei a lei ën taa wooko hia di a kë faa du. Jehovah bi haika Elia di a bi ta konda dee fuka fëën dëën, nöö a bi dëën njunjun wooko faa du (1 Kön. 19:11-16, 18). Andi u ta lei u di soni aki? Hiniwan fuu musu ta libi bunu ku dee sikapu u Jehovah, möönmöön dee gaanwomi. Aluwasi wan sëmbë hati boonu, nasö aluwasi a ta taki taa Jehovah an o dëën paadon nöiti u soni di a du, tökuseei dee gaanwomi musu haikëën te a ta taki unfa a ta fii. Baka di dë ufö de o sa heepi ën faa si taa Jehovah lobi ën jeti.

15. Unfa Jesosi bi ta si dee sikapu fëën Tata, te u luku Johanisi 6:39?

¹⁵ Unfa Jehovah kë fuu ta si dee sikapu fëën dee lasi? Jesosi bi lei u unfa u musu ta si de. Jesosi bi sabi taa Jehovah ta kai hii dee sikapu fëën gaan soni. Fëën mbei Jesosi bi ta mbei hii möiti di a bi sa mbei faa heepi dee „lasilasi sikafu” u Isaëli u de toona ko a Jehovah (Mat. 15:24; Luk. 19:9, 10). Jesosi da di bunu sikapuma. Fëën mbei hënseei bi ta mbei hii möiti di a sa mbei u na wan u dee sikapu u Jehovah lasi go.​—Lesi Johanisi 6:39.

16-17. Unfa dee gaanwomi musu ta si di heepi di de musu heepi sëmbë di go disa di kemeente? (Luku di pisi „ Unfa wan sikapu sa ta fii te a lasi?”)

¹⁶ Apösutu Paulosu bi ta da dee gaanwomi u di kemeente u Efeise taanga u de djeesi Jesosi. A bi taki taa: „Un musu wooko taanga ta heepi dee otowan dee suwaki möön unu. Un musu ta mëni nöömö fa Masa Jesosi bi taki taa dee sëmbë ta da sëmbë soni, de dë waiwai möön leki dee sëmbë ta feni” (Tjab. 20:17, 35). Di tëkisi aki ta lei taa dee gaanwomi abi di gaan faantiwöutu u luku dee sëmbë u Jehovah. Wan baaa de kai Salvador, di dë gaanwomi u kemeente a Sipanjöluköndë bi taki taa: „Te mi ta pakisei unfa Jehovah ta booko hën hedi ku dee lasi sikapu fëën tjika, nöö a ta da mi taanga u mi du hii soni di mi sa du u heepi de tu. Mi sabi taa Jehovah kë u mi heepi dee sikapu fëën dee lasi.”

¹⁷ Hii dee sëmbë dee u taki soni u de a di woto aki, di bi go disa di kemeente, bi feni heepi u de toona ko a Jehovah baka. Nöunöu seei sömëni sëmbë di bi disa di dini di de bi ta dini Jehovah, kë toona ko a Jehovah baka tu. Wë a di woto di ta ko, woo taki möön fini unfa u sa heepi dee lö sëmbë aki u de toona ko a Jehovah.