1. Fu san ede Yehovah e teki ensrefi gersi nanga wan mama di e gi en pikin bobi?

NA INI a ten fu a profeiti Yesaya Yehovah ben aksi: „Wan mama sa frigiti en pikin di de na bobi ete?” Baka dati Gado taigi en pipel: „Kande wan mama sa frigiti en pikin, ma noiti mi sa frigiti yu” (Yes. 49:15). A no e pasa furu taki Yehovah e teki ensrefi gersi nanga wan mama. Ma na ini a tekst disi a du en. Yehovah gebroiki a lobi di wan mama abi gi en yongu pikin fu sori o furu a lobi den anbegiman fu en. Furu mama e agri nanga a sani disi di wan sisa di nen Jasmin * taki: „Te wan mama e gi en pikin bobi, a e kisi wan tranga lobi gi en di e tan fu ala ten.”

2. Fa Yehovah e firi te wan fu den pikin fu en e tapu nanga a preikiwroko?

² Yehovah e si te wan fu den pikin fu en no e go moro na den konmakandra èn te a no e preiki moro. Sobun, Yehovah musu fu e sari te a e si fa ibri yari dusundusun anbegiman e tapu nanga a preikiwroko. *

3. San Yehovah wani?

³ Furu fu den brada nanga sisa disi di tapu nanga a preikiwroko e drai kon baka na a gemeente èn wi breiti te den e du dati! Yehovah wani taki den drai kon baka èn wi wani dati tu (1 Petr. 2:25). Fa wi kan yepi den? Fosi wi piki na aksi disi, wi musu kon sabi fu san ede den no e go moro na den konmakandra èn fu san ede den no e preiki moro.

4. Fa son sma e bigin si a wroko fu den èn san na a bakapisi?

⁴ Son sma meki a wroko fu den tron a moro prenspari sani na ini den libi. Hung, wan brada di e libi na ini Asia e taki: „Mi ben gebroiki ala mi ten gi a wroko fu mi. Mi ben kori misrefi taki efu mi ben abi moro moni, mi ben o man dini Yehovah moro bun. Dati meki mi bigin wroko moro nanga moro. Mi ben e misi furu konmakandra èn te fu kaba mi no ben e go moro. Satan e gebroiki a grontapu disi fu hari sma so taki safrisafri den e tapu fu dini Yehovah.”

5. San pasa nanga wan sisa di ben abi furu problema?

⁵ Son brada nanga sisa abi furu problema di e meki den lasi-ati. Anne fu Ingrisikondre abi feifi pikin. A e taki: „Wan fu den pikin fu mi malengri sensi a gebore. Bakaten wan fu den umapikin fu mi puru fu a gemeente. Wan tra manpikin fu mi kisi wan seryusu siki èn a abi furu sorgu fanowdu. Den sani disi meki mi lasi-ati so te, taki te fu kaba mi no ben go na den konmakandra moro èn mi no ben e preiki moro.” A e hati wi te wi e si san miti Anne nanga en famiri nanga ala den tra sma di e kisi den sortu problema disi!

6. San kan pasa efu sma no e du san skrifi na Kolosesma 3:13?

⁶ Leisi Kolosesma 3:13. Son anbegiman fu Yehovah atibron fu di wan brada noso wan sisa du wan hati sani nanga den. Na apostel Paulus ben sabi taki a sani disi ben kan pasa. A kan pasa tu taki wan tori fu wi no krutu na wan reti fasi. Efu dati pasa, dan wi musu luku bun taki wi no e hori sma na ati. A sani dati kan meki taki wi stop moksi nanga Gado pipel. Luku san miti Pablo, wan brada na ini Zuid-Amerika. Wan sma ben lei gi Pablo taki a ben du wan ogri. Den owruman bribi a sma èn Pablo lasi wan grani na ini a gemeente. San a du? Pablo e taki: „Mi ati ben bron so te, taki safrisafri mi stop go na den konmakandra.”

7. San kan pasa nanga wan sma te a abi konsensi fonfon?

⁷ Efu wan sma du wan seryusu sondu na ini a ten di pasa, dan a kan abi konsensi fonfon wan langa pisi ten. Kande a abi a firi taki Yehovah no lobi en moro. Awinsi so wan sma sori berow, toku a kan denki taki a no warti fu de wan anbegiman fu Gado. Na so wan brada di nen Francisco ben firi tu. A e taki: „Mi ben kisi piri-ai fu di mi ben du hurudu. Na a bigin mi ben tan go na den konmakandra, ma bakaten mi ben lasi-ati èn mi ben firi leki mi no warti fu de na mindri a pipel fu Yehovah. Mi ben abi konsensi fonfon ete èn mi ben de seiker taki Yehovah no ben gi mi pardon. Baka wan pisi ten mi no ben go na den konmakandra moro èn mi no ben preiki moro.” Fa yu e si den brada nanga sisa di miti den sortu sani disi? Yu man frustan fa den e firi? Ma a moro prenspari aksi na: Fa Yehovah e si den?

8. Yehovah e frigiti den sma di tapu fu dini en? Fruklari disi.

⁸ Yehovah no e frigiti den sma di ben dini en fosi, ma di tapu fu du dati wan pisi ten. Boiti dati, a no e frigiti a wroko di den du gi en (Hebr. 6:10). A profeiti Yesaya skrifi wan moi agersitori fu sori fa Yehovah lobi en pipel. Yesaya ben  skrifi: „Leki wan skapuman a o sorgu gi den skapu fu en. Nanga en anu a o tyari den pikin skapu kon na wán èn a o hori den na en borsusei te a e tyari den” (Yes. 40:11). Fa Yehovah e firi te wan fu den anbegiman fu en tapu fu dini en fu wan pisi ten? Yesus sori fa Yehovah e firi, di a aksi den disipel fu en a sani disi: „San unu e denki? Efu wan sma abi wán hondro skapu èn wan fu den lasi, dan a sma dati o libi den neigitenti na neigi skapu na tapu den bergi fu go suku a lasi skapu, a no so? Fu tru mi e taigi unu taki efu a feni en, a o prisiri moro nanga a skapu disi, leki nanga den neigitenti na neigi skapu di no ben lasi.”​—Mat. 18:12, 13.

9. San wan bun skapuman e du gi den skapu fu en? (Luku a fowtow na tapu a kafti.)

⁹ Fu san ede wi kan agersi Yehovah nanga wan skapuman? Fu di wan bun skapuman e sorgu bun gi den skapu fu en. Fu eksempre, David ben feti nanga wan lew èn nanga wan beer fu kibri den skapu fu en (1 Sam. 17:34, 35). Wan bun skapuman sabi te wan fu den skapu fu en lasi (Yoh. 10:3, 14). So wan skapuman o libi den tra 99 skapu fu en na ini wan skapupen noso nanga den tra skapuman èn a o go suku a skapu di lasi. Yesus ben fruteri na agersitori fu a lasi skapu fu leri wi wan prenspari sani: „Mi Tata na hemel no wani kwetikweti taki wan fu den pikinwan disi musu lasi libi.”​—Mat. 18:14.

10. San Yehovah pramisi fu du gi den lasi skapu fu en na ini Esekièl 34:11-16?

¹⁰ Yehovah lobi ala den anbegiman fu en, srefi den wan di de leki lasi skapu. A profeiti Esekièl e sori taki Yehovah pramisi taki a o suku den lasi skapu fu en èn taki a o yepi den fu tron mati fu en baka. Esekièl skrifi san Yehovah ben o du fu feni den. Den sani di Yehovah e du na den srefi sani di wan skapuman fu Israel ben o du efu wan fu den skapu fu  en ben lasi. (Leisi Esekièl 34:11-16.) A fosi sani di a skapuman ben o du na fu go suku a skapu. Dati ben o teki furu ten nanga muiti. Te a ben feni a skapu, dan a ben o tyari en go baka na den tra skapu. Efu a skapu ben kisi wan mankeri noso efu angri ben kiri en, dan a skapuman ben o dresi den soro fu en, a ben o syow en èn a ben o gi en nyanyan. Owruman di e luku „den skapu fu Gado” musu du den srefi sani fu yepi iniwan sma di tapu fu dini Yehovah fu wan pisi ten (1 Petr. 5:2, 3 ). Den owruman musu suku den, den musu yepi den fu drai kon baka na a gemeente èn na wan lobi-ati fasi den musu yepi den fu tron mati fu Yehovah baka. *

11. San wan bun skapuman ben sabi?

¹¹ Wan bun skapuman ben sabi taki wan skapu fu en ben kan lasi. Efu wan skapu ben waka gowe fu na ipi, dan a skapuman no ben o naki en. Meki wi go luku fa Yehovah yepi wan tu anbegiman fu en na ini Bijbel ten.

12. Fa Yehovah yepi Yona?

¹² A profeiti Yona trangayesi Yehovah èn a no go na Ninefei. Toku Yehovah no drai baka gi Yona. Leki wan bun skapuman Yehovah yepi en fu kisi a krakti fu du a wroko fu en baka (Yona 2:7; 3:1, 2). Bakaten Yehovah gebroiki wan krabasibon fu yepi Yona fu frustan o warti a libi fu wan libisma de gi en (Yona 4:10, 11). San disi e leri wi? Owruman musu tan yepi den wan di tapu nanga a preikiwroko. Den musu pruberi fu frustan fu san ede disi pasa. Èn te den brada nanga sisa disi drai kon baka na Yehovah, den owruman musu tan sori den taki den lobi den èn taki den e broko den ede nanga den.

13. San wi kan leri fu a fasi fa Yehovah yepi a skrifiman fu Psalm 73?

¹³ A skrifiman fu Psalm 73 ben lasi-ati  di a si taki sani ben e go bun nanga den ogrisma. A ben abi a firi leki na fu soso a ben e dini Gado (Ps. 73:12, 13, 16). San Yehovah du? Yehovah no krutu a psalm skrifiman disi. Fu taki en leti, Gado poti den wortu fu en na ini Bijbel. Te fu kaba a psalm skrifiman kon frustan taki a moro bun sani di wan sma kan abi, na wan bun matifasi nanga Yehovah (Ps. 73:23, 24, 26, 28). San disi e leri wi? Owruman no musu de gaw fu krutu den wan di e bigin denki taki a no e tyari wini fu dini Yehovah. Na presi fu krutu den, den owruman musu pruberi fu frustan fu san ede den e taki noso du son sani. Dan fosi den owruman o man gebroiki Bijbel fu gi den deki-ati.

14. Fu san ede Elia ben abi yepi fanowdu èn fa Yehovah yepi en?

¹⁴ A profeiti Elia ben lowe gi Kownu-uma Iseibel (1 Kow. 19:1-3). A ben denki taki nowan tra profeiti fu Yehovah ben de èn a ben abi a firi leki na fu soso a ben wroko so tranga gi Yehovah. Elia ben brokosaka so te, taki a ben wani dede (1 Kow. 19:4, 10). Yehovah no krutu Elia, ma a taigi en taki a no de en wawan. Yehovah taigi en tu taki a ben o gi en krakti èn taki furu wroko ben de fu du ete. Na wan switi fasi Yehovah arki fa Elia ben e fruteri san ben gi en broko-ede èn a gi en tra wroko fu du (1 Kow. 19:11-16, 18). San disi e leri wi? Wi alamala, spesrutu owruman, musu sori switifasi gi den skapu  fu Yehovah. Awinsi wan sma en ati e bron noso awinsi a feni taki Yehovah no gi en pardon, owruman o arki nanga pasensi te a sma e taki nanga den. Baka dati den o pruberi fu trowstu en èn fu sori en taki Yehovah lobi en.

15. Te wi e luku Yohanes 6:39, dan fa Yesus ben e si den skapu fu en Papa?

¹⁵ Fa Yehovah wani taki wi musu si den lasi skapu fu en? Wi kan leri furu fu na eksempre fu Yesus. A ben sabi taki ala den skapu fu Yehovah warti gi en. Dati meki a ben e du ala san a man fu yepi „den lasi skapu fu a pipel fu Israel” fu drai kon baka na Yehovah (Mat. 15:24; Luk. 19:9, 10). Leki wan bun skapuman Yesus ben e du ala san a man tu fu no meki nowan fu den skapu fu Yehovah lasi.​—Leisi Yohanes 6:39.

16-17. Fa owruman musu si a frantwortu di den abi fu yepi den lasi skapu? (Luku a faki „ Fa wan lasi skapu kan firi”.)

¹⁶ Na apostel Paulus ben gi den owruman fu a gemeente fu Efeise a deki-ati fu teki na eksempre fu Yesus. A taki: „Yepi den swakiwan. Tan prakseri den wortu di Masra Yesus srefi ben taki: ’Wan sma sa de moro koloku te a e gi sani, leki te a e kisi sani’” (Tori 20:17, 35). A tekst disi e sori taki owruman abi a bigi frantwortu fu sorgu gi a pipel fu Yehovah. Salvador, wan owruman na ini Spanyorokondre e taki: „Te mi e prakseri o furu Yehovah lobi den lasi skapu fu en, dan mi wani du ala san mi man fu yepi den. Mi sabi taki Yehovah wani taki mi sorgu bun gi den.”

¹⁷ Ala den sma di kari na ini na artikel disi èn di ben tapu nanga a preikiwroko, ben kisi yepi fu drai kon baka na Yehovah. Nownowde furu tra brada nanga sisa di no e kon na den konmakandra moro wani drai kon baka na Yehovah tu. A tra artikel o sori moro fini fa wi kan yepi den.