1. Nagnino ty Jehovah ro nampitaha ty tegna’e amy ty rene mampinono?

“HAGNALIGNO ty ana’e mbe minono vao o ampelao?” Fagnonteneagne napetra i Jehovah tamy ty andro Isaia mpaminany io. Le hoe reke tamo o vahoa’eo: “Va’e hagnaligno ty ana iareo avao i ampela rey, fa izaho tsy mba hagnaligno azo.” (Isaia 49:15) Tsy le fatao i Jehovah ty mampitaha ty tegna’e amy ty rene faie nanao izay reke amo o andine’e iohoe. Ty anto’e, tea’e ho tsapa o mpanompo’eo fa tena ikokoa’e iareo. Hoe ty rahavave raike atao tihoe Jasmine: “Naho fa irehe mampinono ty ana’o, le manomboke misy fifandrambesagne manokagne ty ama’areo sady le lia’e mitohy avao zay.” Azo antoke fa mahatsapa hoe izay ty ankamaroa o reneo.

2. Ino ty tsapa i Jehovah naho misy mpanompo’e raike tsy mitory sasa?

² Ony i Jehovah soa naho fa misy mpanompo’e raike manjare tsy mivory naho tsy mitory sasa. Maro ty mpanompo i Jehovah manjare tsy mitory sasa * isan-taogne. Azo antoke fa tena mikoretse ty arofo’e naho fa mahavazoho izay.

3. Ino ty raha irie i Jehovah?

³ Tena fale tikagne naho fa miheregne indraike ty ankamaroa i rahalahy naho rahavaventikagne tsy mitory sasa rey. Toe izay ty tea i Jehovah hatao iareo, le hoe izay ka tika. (Zak. 1:3) Ino ty azontikagne atao mba hagnampeagne iareo? Aloha ty hamaleantikagne izay, le andao ho fantarentika hey ty  anto’e mahavy iareo tsy hivory naho tsy hitory sasa.

4. Ino ty voka’e naho fa ty asa ro manjare raha lahibey amy ty mpanompo i Jehovah ila’e?

⁴ Ty asa ro nanjare raha lahibey tamy ty fiaigna ty rahalahy naho rahavave ila’e. Hoe ty Hung *, rahalahy boake Azia agne: “Ty asa ro tena nandaniako ty fotoako naho ty heriko. Tsy nisaigne soa raho tamy izay, le nieretseretse tie ho afake hanompo i Jehovah soa naho fa manam-bola bey. Nampitomboeko areke ty lera niasako, le nanomboke nanapatapake fivoriagne raho. Tsy nivory sasa raho tamy ty fara’e. Tena natao i Satana hitarihagne ty mpanompo i Jehovah hiala ama’e tsikedetsikede ty tontolo toy.”

5. Ino ty nivoka’e naho fa nimaro ty olagne nanjò ty rahavaventika raike?

⁵ Kivy ka ty mpiara-manompo ila’e satria maro ty olagne manjò aze. Managn’anake lahilahy roe naho ampela telo ty Anne, rahavave a Grande-Bretagne agne. Hoe reke: “Manan-kandra ty raike amy i ana-dahikoy. Nivoaroake ty anak’ampelako raike naho fa nandeha ty fotoagne. Nanjare narare mafe ka i ana-dahiko raikey. Tena nikivy raho, le nanomboke tsy nivory naho nitory. Tsy niarake tamo o fiangonagneo sasa raho tamy ty fara’e.” Azo antoke fa tena mahaferenaigne antika ty Anne naho i ana’e rey vaho ty ndaty hafa miatreke raha sarotse hoe ireo.

6. Nagnino ty ndaty raike ro va’e tsy hiarake amo o fiangonagneo sasa naho tsy mahavita mampihatse ty Kolosianina 3:13?

⁶ Vakio ty Kolosianina 3:13. Boseke noho ty raha natao ty mpiara-manompo tama’e ka ty mpanompo i Jehovah ila’e. Nihay i apostoly Paoly soa tie va’e ‘hanagne anto’e hitaraignagne’ miomba ty ila’e tika. Va’e nisy mpiara-manompo ohatse nanao raha tsy rare’e tamantika. Naho tsy mitao tika, le va’e ho boseke mafe naho fa miseho zay. Va’e hahavy ty ndaty raike tsy hiarake amo o fiangonagneo sasa aza zay. Izay ty nanjò i Pablo, rahalahy boake Amerika Atimo agne. Nisy nirehake tie nanao raha raty reke, le nafahagne tama’e ty andraiki’e tagnivo o fiangonagneo satria nino ty reha i ndatỳ o androanavi-pagnahio. Niraty ty voka izay tama’e satria tena niboseke reke, le nanomboke tsy niarake tamo o fiangonagneo sasa.

7. Ino ty va’e ho voka’e naho mbe enjehe ty eretsere’e avao ty ndaty raike nanao fahotagne lahibey?

⁷ Ty ila’e ka enjehe ty eretsere’e avao noho ty fahotagne lahibey natao’e ndra tie fa nibebake. Va’e lava mieretseretse avao reke tie tsy ho tea aze sasa ty Jehovah sady tsy fagneva ty ho mpanompo’e sasa ka reke. Izay ty nitsapa i Francisco. Hoe reke: “Nijangajanga raho faie nibebake. Le mbe nagnatreke fivoriagne avao hey raho tafara izay. Faie tena nikivy raho sady nieretseretse tie tsy fagneva ty ho mpanompo i Jehovah sasa. Nagnenjeke ahy avao ty eretsereko, le tsy neké ty saiko tie namela ahy vata’e reke. Hafarako tsy niarake tamo o fiangonagneo sasa.” Ino ty tsapa’o naho fa nandineke ty raha sarotse nanjò o mpiara-manompo rehafegne ambone eo rehoe? Tsy mahaferenaigne azo vao iareo? Ino ka ty raha tsapa i Jehovah?

8. Haligno i Jehovah vao i mpanompo’e nanjare tsy nanompo aze sasa rey? Hazavao.

⁸ Tena tsy haligno i Jehovah i mpanompo’e nanjare tsy niarake tamy fiangonagne sasa rey. Azo antoke fa tsy haligno’e ty asa fanompoagne natao iareo ho aze. (Heb. 6:10) Nirehake fagnoharagne mampiseho ty fomba ikarakarà i Jehovah ty vahoa’e ty Isaia mpaminany. Hoe reke: ‘Manahake ty atao  o mpiarake agnondry mikarakara soa ty agnondri’eo ty atao’e, le mampiasa ty fità’e reke mba hamoriagne o anak’agnondrio, le hotrotroe’e an-tratra’e eo rey.’ (Isaia 40:11) Ino ty tsapa i Jehovah, i Mpiarake Agnondry Lahibeỳ naho fa misy mpanompo’e raike nanjare tsy nanompo aze sasa? Namale izay ty Jesosy naho fa nagnontane o mpiana’eo reke tie: “Akore ty heve’areo? Naho misy ndaty raike managne agnondry 100, le nimontso ty raike, tsy engà’e an-tendrombohitsey eo vao i 99 rey, le mandeha reke mipay i raike nimontsoy? Ie naho fa trea’e igne, le rehafeko ama’areo fa igne ro tena mahafale aze ambone i 99 tsy nimontso rey.”—Mat. 18:12, 13.

9. Akore ty fomba nikarakarà o mpiarake agnondry talohao ty agnondry iareo? (Henteo ty sare amy ty fogno ty gazete toy.)

⁹ Manahake o mpiarake agnondrio vata’e ty Jehovah. Ty anto’e, tena mikarakara soa ty agnondri’e o mpiarake agnondrio. Nialy tamy ty liona raike naho orsa raike ohatse ty Davida mba hiarovagne ty agnondri’e. (1 Sam. 17:34, 35) Le avy le hay ty mpiarake agnondry mahay ka zao naho tsy eo ty raike amy ty agnondri’e. (Jaona 10:3, 14) Le engà’e an-joloke ao i agnondri’e ila’e rey ndra ampiambene’e mpiarake hafa, le mandeha reke mipay i raike nimontsoy. Izao ty hamarenagne lahibey tea i Jesosy hampitaegne amo o fagnoharagne iohoe: “Tsy misy tean-dRaeko ho montso ty raike amy i madineke rey.”—Mat. 18:14.

10. Arake ty Ezekiela 34:11-16, ino ty raha nampitamae i Jehovah fa hatao’e amo o agnondri’e nimontsò?

¹⁰ Tea i Jehovah iaby tika tsikiraidraike agnisa izay i aze tsy miarake amo o fiangonagneo sasa rey. Tamy ty andro i Ezekiela mpaminany, le nampitamà ty Jehovah tie hipay i agnondri’e nimontso rey sady hagnampe iareo ho salama ara-pagnahy indraike. Nisaontsie’e ka tie manahake ty raha atao ty mpiarake agnondry nimontso agnondry ty hatao’e mba hagnavotagne iareo. (Vakio ty Ezekiela 34:11-16.) Izao ty raha atao ty mpiarake bey  hatea: Manokagne fotoagne naho hery reke mba hipaliagne ty tane misy i agnondry nimontsoy, le indese’e amy ila’e rey agne reke naho fa trea’e. Naho ohatse marare ndra keré i agnondrỳ, le tsaboe’e sady bandie’e ze fere ama’e ndra mei’e hanegne. Hoe ireo ka ty toko’e hatao o androanavi-pagnahio mba hagnampeagne ze ‘agnondry i Jehovah’ nimontso. Ty anto’e, iareo ty tinendre hiarake o agnondri’eo. (1 Petera 5:2, 3) Paliave o androanavi-pagnahio hey tie aia ty misy i agnondry nimontso rey, le ampea iareo mba hiarake amo o fiangonagneo indraike. Maneho hatea amy i agnondry rey ka iareo, le magnampe iareo mba ho salama ara-pagnahy. *

11. Ino ty raha ampoize ty mpiarake mahay?

¹¹ Fa ampoize ty mpiarake mahay tie va’e hisy ho montso ty agnondri’e. Naho misy agnondri’e raike areke tsy miarake amy i maroy sasa, le tsy demohe’e ty jera naho fa trea’e. Andao hodinehentika ty raha natao i Jehovah mba hagnampeagne ty mpanompo’e ila’e tsy nahavita nanao ty raha nitaké’e tama’e.

12. Ino ty natao i Jehovah naho fa tsy nankatò aze ty Jona?

¹² Tsy nankatò i Jehovah ty Jona mpaminany tie indraike. Faie tsy nafoe i Jehovah reke ndra tie teo zay. Naseho i Jehovah fa mpiarake mahay reke, le navota’e ty Jona sady nampea’e mba hanagne hery hamitagne ty asa nanendrea’e aze. (Jona 2:7; 3:1, 2) Nampiasa raha mitiry ty Jehovah naho fa tafara tatoy mba hagnampeagne i Jona hahatakatse tie sarobily ty fiay o ndatio. (Jona 4:10, 11) Ino ty lesogne? Tsy toko’e le avy le hieretseretse o androanavi-pagnahio tie fa tsy tamaegne hiheregne sasa i mpitory tsy mitory sasa rey. Toko’e hikezake aza iareo mba hahatakatse ty anto’e nahavy aze tsy hiarake amo o fiangonagneo sasa. Le naho fa miheregne reke, le mikezake iareo mba haneho hatea naho hikarakara aze.

13. Ino ty raha ianarantika boake amy ty raha natao i Jehovah tamy ty mpanoratse ty Salamo 73?

 ¹³ Nikivy ty mpanoratse ty Salamo 73 naho fa nahatrea tie hoe miadagne avao zay ty ndaty raty fagnahy. Nisalasala reke, le nieretseretse tie: ‘Tena mahasoa vata’e vao ty manao ty zoton’arofon’Andrianagnahare?’ (Sal. 73:12, 13, 16) Faie tsy nagnomey tsiny aze ty Jehovah. Nampanorate’e agnate Baiboly ao aza ty raha nirehafe o mpanao salamo iohoe. Nitaka’e avao tamy ty fara’e fa ty mifandrambe soa amy i Jehovah ro tena mahasoa ambone ze kila raha. (Sal. 73:23, 24, 26, 28) Ino ty lesogne? Va’e hisy ndaty hisalasala tie: ‘Mahasoa vata’e vao ty manompo i Jehovah?’ Tsy toko’e le avy le hagnomey tsiny ndra hitsaratsara ty ndaty hoe izay ty androanavi-pagnahy. Toko’e hikezake hahatakatse ty anto’e mahavy aze hisalasala iareo. Hahita andinin-teny mete soa mba hagnampeagne i mpitorỳ iareo naho manao izay.

14. Nagnino ty Elia ro nila fagnampeagne, le akore ty nagnampea i Jehovah aze?

¹⁴ Nilay i Jezebela Mpanjakavave ka ty Elia mpaminany tie indraike. Tena nikivy reke, le nirehake tie ndra aleo’e mate. Fa nagnino? Nieretseretse reke tamy izay tie nimate iaby ty mpaminany i Jehovah, le ie raike avao ty sisa’e, sady tsy nisy voka’e ty asa natao’e. (1 Mpanj. 19:1-4, 10) Faie nijanjigne aze ty Jehovah naho fa nirehake izay reke fa tsy nagnomey tsiny aze. Nimei’e toky aza ty Elia tie tsy irerike reke sady afake magnomey hery aze ka reke. Nisaontsy tama’e ka reke fa mbe  misy asa maro hampanoe’e aze. (1 Mpanj. 19:11-16, 18) Ino ty lesogne ho antika? Toko’e ho soa fagnahy amo o mpiara-manompò tika, lohotsie fa o androanavi-pagnahio. Naho fa misy ndaty raike ohatse mirehake ty raha mahaboseke aze ndra mieretseretse tie tsy namela heloke aze zao ty Jehovah, le toko’e hikezake iareo mba hitsanogne soa ty raha rehafe’e. Mila mey iareo toky i ndatỳ naho fa avy eo tie tena sarobily amy i Jehovah reke.

15. Akore ty nifihevera i Jesosy o agnondry i Jehovah-ò, arake ty Jaona 6:39?

¹⁵ Tea i Jehovah naho mihevetse i agnondri’e nimontso rey ho sarobily tika manahake ty natao i Jesosy. Nihai’e soa fa sarobily amy i Jehovah o agnondri’eo iaby. Izay ty nahavy aze nikezake mafe nagnampe ‘i agnondry i Jehovah nimontso tamy ty tarana Israely rey’ mba hiheregne ama’e. (Mat. 15:24; Lioka 19:9, 10) Mpiarake agnondry mahay ty Jesosy, le tsy nengà’e hisy ho montso ndra raike ty agnondry i Jehovah.—Vakio ty Jaona 6:39.

16-17. Toko’e hihevetse vao o androanavi-pagnahio fa tsy azo ampeagne hiheregne amy i Jehovah sasa ze ndaty nijanogne tsy nanompo aze? (Henteo ty efajoro tihoe “ Ino ty Va’e ho Tsapa o Agnondry Nimontsò?”)

¹⁶ Nirisihe i apostoly Paoly ty androanavi-pagnahy ta Efesosy agne mba hitsikombe i Jesosy. Ampeo’areo, hoe reke ze mila ampeagne sady tsiarovo i reha i Jesosy Tompo manao tihoey tie: ‘Mahasambatse vata’e ty magnomey ty amy tie mandrae.’ (Asa. 20:17, 35) Trea amy io fa tena managne andraikitse lahibey ty androanavi-pagnahy. Hoe ty Salvador, androanavi-pagnahy a Espaina agne: “Mandrisike ahy hagnampe o agnondry i Jehovah nimontsò ty fisaintsaignako ty fomba ikarakara’e iareo. Fantako boake amy izay fa tea i Jehovah hikarakara iareo raho amy ty maha androanavi-pagnahy ahy.”

¹⁷ Niheregne amy i Jehovah indraike i ndaty nirehafegne tato rey naho fa nahazo fagnampeagne. Faie mbe maro ka ty magniry hiheregne amy i Jehovah amy izao. Hodinehentikagne amy ty lahatsoratse magnarake ty raha azontikagne atao mba hagnampeagne iareo.