NGEREN U TIMEN SHA MI 25
“Mo Iyol Yam, Me Ker Iyôngo Yam”
“Mo iyol Yam, Me ker iyôngo Yam, man Me tôv i hwange [shin Me nenge sha i doo doo]”—ESEK. 34:11.
ICAM 105 “Aôndo Ka Dooshima”
KWAGH U I TIM SHA MI KEN NGEREN NE YÔ *
1. Yehova ngu er ngô u nengen sha anikyundan nahan nena?
YEHOVA yange pine mpin ugen sha ayange a profeti Yesaia la ér: “Wan u man atumba una hungul ngô na je kpa”? Aôndo maa kaa a ior nav ér, “Shin ve yô, á hungul ve, kpa Mo yô, ú hungur Mo ga.” (Yes. 49:15) Yehova fe tôôn iyol na karen sha ngô ga, nahan kpa kwa ne yô er nahan. Yange tôô er ka i lu un ken ishima a mbacivir un la kar sha dooshima u ngô a wan. Ungô kpishi vea lan kwagh u anmgbian u kwase ugen u i yer iti na ér Jasmin yange ôr ne ga. A kaa ér, “Ka wea yese wan wou yô, u hingir u lun a nan kôôsôô sha ayange a uma wen cii.”
2. Wan u Yehova môm ka nana mem u civir un nahan, ka i lu un ken ishima nena?
2 Wan u Yehova môm tseegh ka nana de u kohol a tiônnongo u Kristu civir un shi duen kwaghpasen kpa ngu a fa. Sha nahan yô, hanma inyom mbacivir un dubu imôngo ka vea mem u civir un * yô i vihi un tsung.
3. Ka nyi Yehova a soo?
3 Anmgbianev mba ve mem u civir Yehova sha gbashima mban kpishi, ka ve va hide ken tiônnongo her, shi ka vea hide yô i doo se kpen kpen je! Yehova soo ér ve hide, shi se kpa sar se nahan. (1 Pet. 2:25) Kpa se wase ve nena? Cii man se na mlumun sha mpin la yô, a doo u se hii fan ityôkyaa i ka ve va de u van mbamkombo shi duen kwaghpasen la.
ER I HII VE MBAGEN KA VE VA DE U CIVIR YEHOVA YÔ
4. Tom u uke ua fatyô u danen mbagen nena?
4 Mbagen gema uma ve cii na sha tom uke u ve eren yô. Anmgbian ugen u a lu ken veghertar u Ashia u i yer un ér Hung * yô, kaa ér: “Yange m uve ityough ken tom u uke u m eren la; m lu bumen iyol yam mer aluer m ngu a inyaregh kpishi yô, me hemba civir Yehova sha ishima yam. Kwagh ne na yô, m seer shighe wam u tom. Ica i gbe ga yô, m hii u bunden mbamkombo man kwagh ne lu hemban gban a gba kera. Ken masejime yô, m de a de kuaa. Ka inja er Satan ngu eren tom a tar ne u danen ior kure kure sha er ve de u civir Yehova nahan.”
5. Yange mbamzeyol va ta sha anmgbian u kwase ugen nena?
5 Anmgbianev mba nomso man mba kasev mbagen tagher a mbamzeyol mba ganden ve vanger nahan iyol kpe ve. Ngô ugen ken tar u Britain ngu a mbayev utaan, mba yer iti na ér Anne. A kaa wener: “Yange m mar wan wam ugen la je due a iwan. Shighe kar yô, i dugh wan wam u kwase ugen ken tiônnongo sha, maa shi kwagh hii u zan wan wam u nomso ugen iyol ken ityo. Yange m ure kpishi nahan m de u zan mbamkombo shi duen kwaghpasen. Maa m hila mem u civir Yehova.” Mhôônom kôr se a anmgbian u kwase Anne man tsombor na kua anmgbianev mbagen mba ve lu tagher a ambaakaa ne la tsung!
6. Aluer se dondo kwaghwan u ken Mbakolose 3:13 la ga yô, se fatyô u undun ior mba Yehova nena?
6 Ôr Mbakolose 3:13. Mbacivir Yehova mbagen yô, yange anmgbian nan er kwagh u vihin ve nahan kwagh la vihi ve pev. Apostoli Paulu kpa yange fa er ashighe agen se lu a ityôkyaa i injaa i vihin ishima yô, sha ci u alaghga anmgbian u nomso shin u kwase nan “er kwagh” a vese ‘doo ga.’ Gayô, alaghga i er kwagh a vese sha mimi ga. Aluer se wa ikyo ga yô, kwagh la una na se hingir u wan kwagh shon ken ishima. Ishima ia vihin se yum yô, kwagh la una na se hingir u undun Yehova. Nenge ase kwagh u yange er anmgbian ugen ken South America, u i yer iti na ér Pablo yô. Yange i wa un aie iyol ér a er isholibo, maa i dugh un sha iantom i lu sha mi ken tiônnongo la kera. Nahan Pablo er nena? A kaa ér: “Yange ishima gbam awambe; kure kure maa m hingir u undun tiônnongo.”
7. Aluer ishima ngi nan or ibo kpishi yô, kwagh shon una er a nan nena?
7 Kwagh ugen yô, aluer yange or per tindi u Aôndo, nan er isholibo yô, alaghga kwagh la una za imoshima i nan iyol zan zan nana nenge ér nan kera kuma u Yehova una soo nan ga. Aluer yange nan gema ishima shi i zungwe nan mhôônom je kpa, alaghga a lu nan inja er nan kera kuma u lun imôngo a ior mba Yehova ga nahan. Ka kwagh u yange er anmgbian ugen u i yer iti ér Francisco yô, je la. A kaa ér: “Yange m er idya nahan i kôôm mo. Er sha hiihii la m za hemen u van mbamkombo her nahan kpa, m va ure kpishi shi m nenge mer m kera kuma u lun imôngo a ior mba Yehova ga. Ishima lu nan mo ibo her zan zan nahan m kure ikyaa mer Yehova dem a isholibo la ga. Shighe kar yô, m de u kohol a tiônnongo kuaa.” Ka wea nenge a anmgbianev mba nomso man mba kasev mba ve kpa ve lu tagher a mbamzeyol er mba i ter sha heen ne nahan i lu u ken ishima a ve nena? Kunya ka u kôr u a ve kpa? Man u hemban cii je yô, ka i lu Yehova ken ishima a ve nena?
IYÔNGO I YEHOVA DOO UN ISHIMA
Orkuranilev u ken Iserael wa iyôngo na i i saa la ikyo tsung (Nenge ikyumhiange i sha 8-9) *
8. Yehova ngu a hungur a ior mba yange ve civir un kpa ve va mem laa? Ta iwanger.
8 Yehova hungur a mba yange ve civir un kpa ve va mem u kohol a ior nav la ga. Shi tom u yange ve er un la kpa hungur un ga. (Heb. 6:10) Profeti Yesaia yange nger injakwagh igen i doon tsung i i tese er Yehova a nengen sha ior nav doo doo yô. A nger ér: “Una kohol ônovmbaiyôngov sha uwegh Nagh, Una tôô ve Una wa sha ikum Na.” (Yes. 40:11) Yehova Orkuranilev u Hemban la ka una nenge iyôngo na i môm ia tsume ia undu ikyumile nahan ka i lu un nena? Yesu yange pase er ka i lu Ter na la; a pine mbahenen nav ér: “Ne nenge nena? Aluer or ngu a iyôngo 100 man iyôngo i môm ker tsume yô, nana kera undu i 99 la sha iwo, nana yem a za ker i môm i̱ i̱ tsum la gaa? Man aluer nan za zua a i̱ yô, mimi je me kaa ne, nana hemba ember sha kwagh u i̱, a i 99 i i tsum ga la”—Mat. 18:12, 13.
9. Sha ayange a i ngeren Bibilo la, orkuranilev u dedoo yange nan er a iyôngo i nan nena? (Nenge foto u sha igbende.)
9 Se fatyô u tôôn Yehova karen sha orkuranilev sha ci u nyi? Sha ci u sha ayange a i ngeren Bibilo la, orkuranilev u injaa yange nan nenge sha iyôngo i nan doo doo. Ikyav i tesen yô, Davidi yange nôngo kwagh a begha kua dwem sha u kuran iyôngo na. (1 Sam. 17:34, 35) Ka a lu iyôngo i môm tseegh ia undu ikyumuile kpa, orkuranilev u injaa yô, ngu a fa. (Yoh. 10:3, 14) Imba orkuranilev la ka nan za ver iyôngo i nan i 99 i i lu her la ken ityôr shin nan wa i sha ikyev i orkuranilev u dedoo ugen, nahan nan hide nan za ker iyôngo i môm i i saa la. Yesu yange ôr injakwagh la sha u tesen se mimi u injaa ne, ér: “Kape Terem u a lu sha la kpa i sar un u or môm ken mba hiden a iyol ijime mban tsô kpa nana tim ga je la.”—Mat. 18:14.
Orkuranilev u ken Iserael u sha ayange a tsuaa la za zua a iyôngo na i i saa yô, nahan ngu nengen sha i doo doo (Nenge ikyumhiange i sha 9)
YEHOVA NGU A KER IYÔNGO NA
10. Sha kwagh u Esekiel 34:11-16 a er yô, Yehova yange tôndozwa ér una er a iyôngo na i i saa la nena?
10 Hanma wase cii nan doo Yehova ishima, kua “mba hiden a iyol ijime” mba ve tsume ve undu ikyumile na la kpaa. Yehova yange tsengaôron sha zwa u profeti Esekiel ér una ker iyôngo na i i saa yô, shi una wase i ia hide a sôr ikyar i ve ye a na la. Yange ôr akaa jighilii a una er sha u yiman i la sha adondo a adondo. Lu akaa a yange Oriserael u kuran ilev nan er zum u iyôngo i nan i saa yô. (Ôr Esekiel 34:11-16.) Hiihii yô, orkuranilev la yange nan za ker iyôngo i i saa la, man i lu tom u kiriki ga, shi i tôô nan shighe kpaa. Nana za zuan a i yô, nan kôr iyôngo la nan hide a mi ape ikyumile i lu la. Heela tseegh ga, yange kwagh a er iyôngo la shin ia lu ijen yô, orkuranilev nan eren a i sha ue, nan kange i avav, nan kôron i shi nan naan i kwaghyan. Mbatamen mba ve lu kuran “ikyumile i Aôndo” la kpa gba u vea er kwagh nahan sha er vea wase anti or u nan undu tiônnongo cii yô. (1 Pet. 5:2, 3) Mbatamen ka ve ker ve, ve wase ve u hiden va kohol ikyumile i Aôndo shi ve er a ve sha dooshima sha u wasen ve er vea hide a taver ijende ve a Yehova yô. *
11. Ka nyi i gbe u orkuranilev u dedoo nana fa?
11 Orkuranilev u dedoo ka nan fa wang ér iyôngo i nan ia fatyô u saan. Shi iyôngo ka ia tsume a undu ikyumile kpa, orkuranilev la nan eren a i sha tswam ga. Nenge ase ikyav i Aôndo iyol na a ver shighe u lu wasen mbacivir un mba ve va mem u civir un sha anshighe kpuaa yô.
12. Yehova yange er a Yona nena?
12 Profeti Yona yange yevese ityom i Yehova tindi un yô. Nahan kpa, Yehova maa de kwagh na fese ga. Yehova yange yima un vough er orkuranilev u dedoo ka nan er a iyôngo nahan, shi wase un hide zua a agee a zan ityom i Aôndo tindi un la. (Yona 2:7; 3:1, 2) Shighe kar yô, Aôndo er tom a ishilajôngo u tesen Yona er uma u or a gbe kwagh yô. (Yona 4:10, 11) Kwagh la tese se nyi? Doo u mbatamen vea vôr u wasen mba ve mem u civir Aôndo la ga. Hemba doon u vea nôngo a fa kwagh u a ne ve iyôngo i undu ikyumile la. Shighe u iyôngo la i za hide hen Yehova yô, gba u mbatamen vea za hemen u tesen i dooshima man ikyo i wan.
13. Gbenda u Yehova er kwagh a orngeren Pasalmi 73 la tese se nyi?
13 Shighe u lu orngeren u Pasalmi 73 la inja er mbaaferev mba hemban zan ikyura yô, iyol kpe un. Yange lu un er ka a inja u eren ishima i Aôndo ga nahan. (Ps. 73:12, 13, 16) Yehova yange er nena? Yange puu un ga cii. Jighilii yô, Aôndo na i nger kwagh u orpasalmi ne ôr la ken Bibilo. Shighe kar yô, orgeren pasalmi la va kav er kwagh môm kpa a hembe u yan ikyar kôôsôô a Yehova ga yô. (Ps. 73:23, 24, 26, 28) Ka nyi se hen ken kwagh ne? Shighe u or u civir Aôndo nan hii u henen ér ka a inja u civir Yehova ga yô, doo u mbatamen vea kure nan ijir fese ga. Hemba doon u mbatamen vea tôv a fa er i hii ve nan ôr shin nan er kwagh nahan yô. Aluer ve er nahan yô, a hemba lun ve zange u fan iwasen i i doo u vea na imbaor la ken Bibilo yô.
14. Yange gba u a wase Eliya sha ci u nyi, man Yehova wase un nena?
14 Profeti Eliya yange yevese Torkwase Yesebel. (1 Utor 19:1-3) Yange hen ér or môm kpa nan ngu eren tom u profeti u Yehova ga, shi hen ér tom na kpa ngu a inja ga. Yange Eliya ule je yô, a tôm ku. (1 Utor 19:4, 10) Yehova Yange na Eliya ibo ga, kpa gema taver un ishima ér ngu tswen ga. A kaa a na ér a suur sha agee a Aôndo shi kaa a na kpaa ér tom shi her kpishi u i gbe u una er yô. Yehova yange kegh ato a Eliya ungwa akaa a a lu nan un ishimanyian la, shi na un ityom igen kpaa. (1 Utor 19:11-16, 18) Ka nyi se hen ken kwagh nee? Gba u se cii se eren a iyôngo i Yehova kundu kundu man ka mbatamen je i gbe u vea hemba eren kwagh ne ye. Aluer ishima i vihi or ker shin nan hen ér nan kuma u Yehova a zungwe nan mhôônom ga kpa, gba u mbatamen vea kegh ato a nan vea ungwa er ishima i lu nan ker la. Gba u vea wase iyôngo i i saa la u lun a vangertiôr ér i doo Yehova ishima her.
DOO U SE NENGE IYÔNGO I YEHOVA I I SAA LA NENA?
15. Sha kwagh u Yohane 6:39 a er yô, Yesu yange nengen iyôngo i Ter na nena?
15 Yehova soo ér se nenge ma iyôngo na i i saa la nena? Yesu yange ver se ikyav i se fatyô u henen kwagh ker yô. Yange fa er hanma iyôngo i Yehova cii i doo un ishima tsung yô. Sha nahan yô, Yesu yange a nôngo sha afatyô na cii sha er una wase “iyôngo i ya u Iserael i i saa la” i hide hen Yehova yô. (Mat. 15:24; Luka 19:9, 10) Shi er Yesu a lu orkuranilev u dedoo yô, yange a nôngo sha afatyô na cii sha er iyôngo i Yehova i môm kpa ia saa ga yô.—Ôr Yohane 6:39.
16-17. Doo u mbatamen vea nenge tom u wasen mba ve tsum ve undu tiônnongo la nena? (Nenge ngeren u kiriki u a lu a itinekwagh ér “ Er Alaghga Ishima Ia Lu Iyôngo i I Saa la Ker Yô”) la.
16 Apostoli Paulu yange taver mbatamen mba ken tiônnongo u ken Efese ishima ér ve dondo ikyav i Yesu la. A kaa a ve ér: ve “Wase mba ve keren iwasen la. . . . Shi umbur nen [ve] mkaanem ma Ter Yesu iyol na lu ôr ne, ér: ‘Or u nan ne kwagh la ka i hemba saan nan iyol a or u nan ngohol la.’ ” (Aer. 20:17, 35) Kwagh ne tese wang ér nyian ne mbatamen mba a tom u vesen u i gbe u vea er yô. Ortamen ugen ken tar u Ishpania, mba yer iti na ér Salvador, a kaa wener: “Ka mea hen er Yehova a we iyôngo na i i saa la ikyo tsung yô, kwagh la a mgbegham u eren kwagh u m fetyô cii u wasen ve. Er m lu orkuranilev u sha injakwagh yô, m ngu a vangertiôr mer Yehova soo ér m nengen sha ilev nav doo doo.”
17 Ior mba i ter kwagh ve ken ngeren ne ér yange ve mem u civir Yehova la cii, i wase ve ve hide hen a na. Kpa ka cii la ga, ior mbagen kpishi mba ve tsum ve undu Yehova la soo u hiden hen a na. Nahan ngeren u a dondo ne una seer timen sha akaa a se fatyô u eren sha er se wase ve u hiden hen Yehova yô.
ICAM 139 Tôô Wer u Ngu ken Tar u He
^ par. 5 Mbagen civir Yehova sha mimi ica i gba, nahan kpa er nan ka ve va undu tiônnongo? Aôndo nengen ve nena? Ngeren ne una na mlumun sha mbampin mban. Shi una time sha kwagh u se fatyô u henen hen Yehova sha gbenda u ngise wase mbacivir un mbagen mba ve mem u civir un sha anshighe kpuaa sha ayange a i ngeren Bibilo la yô.
^ par. 2 ISHEMBER I I TE IWANGER SHA MI YÔ: Or u nan mem kwaghpasen yô, ka u nan kera ne ripoti i kwaghpasen ga i kom iwer ateratar shin i hembe nahan yô. Nahan cii kpa, mbapasenkwagh mba ve mem tom ne mba anmgbianev asev her, shi ve doo se ishima kpaa.
^ par. 4 I yila mbagenev ken ngeren ne sha ati a ve kpôô kpôô ga.
^ par. 10 Ngeren u a dondo la una time sha igbenda jighilii i mbatamen vea fatyô u eren kwagh ne yô.
^ par. 60 NGEREN U PASEN FOTO: Yange iyôngo i orkuranilev u ken Iserael sha ayange a tsuaa la ia saa yô, ishima i za nan iyol kpishi nahan nan za ker i, nan hide a mi hen ikyumile. Kape nyian kpa mbakuranilev mba ken jijingi ve eren je la.
^ par. 64 NGEREN U PASEN FOTO: Kwase ugen u a mem u civir Yehova yô tile ape nyôron mato, ngu keghen ér mato na a mough. Ngu kenger Mbashiada uhar mba ve dugh kwaghpasen yô.
