ARTÍCULO NEMA NATALIKGALHTAWAKGA 25
«Akit xlikana nakkaputsa kiborregos»
«Akit xlikana nakkaputsa kiborregos chu nakkakuentajtlawa» (EZEQ. 34:11).
TAKILHTLIN 105 «Dios tapaxkit»
TUKU NATALICHUWINAN *
1. ¿Tuku xlakata Jehová tamalakxtumikan chatum tse?
KXKILHTAMAKU palakachuwina Isaías, Jehová wanilh xkachikin: «¿Tlan chatum tse nialh nalakapastaka kskgata [...]? Asta maski uma lakpuskatin nialh nalakapastakkgo, akit putum kilhtamaku naklakapastakan» (Is. 49:15). Ni putum kilhtamaku Jehová tamalakxtumikan chatum tse pero uma kilhtamaku chuna tlawalh. Lichuwinalh la chatum tse chu kskgata latalalin xlakata nalimasiya la kapaxki kskujnin. Lhuwa natsetni nachuna makgkatsikgo la wa chatum tala puskat nema wanikan Jasmín: «Akxni matsikiya miskgata, wi tuku la nema tlawa pi nikxni nalamakgxtakgputunatit chu uma makgapala putum kilhtamaku».
2. ¿La makgkatsi Jehová akxni chatum kskgata tamakgatlini?
2 Jehová akxilha akxni chatum kskgata nialh tsuku lichuwinan chu nialh an ktamakxtumit. ¿Tlan nalakpuwanaw la makgkatsi Jehová akxni akxilha pi akgatunu kata lhuwa kskujnin tamakgatlinikgo? *
3. ¿Tuku lakaskin Jehová?
3 Lhuwa umakgolh natalan taspitparakgo kcongregación, chu lu tlan kamakgamakglhtinanaw. Jehová lakaskin pi kataspitkgolh chu akinin nachuna lakaskinaw (1 Ped. 2:25). ¿La tlan nakamakgtayayaw? Xlakata tlan nakgalhtiyaw uma takgalhskinin, pulana kilikatsitkan tuku xlakata makgapitsi nialh ankgo ktamakxtumit chu nialh lichuwinankgo Dios.
TUKU XLAKATA MAKGAPITSI TAMAKGATLINIKGO DIOS
4. ¿Tuku kaʼakgspula amakgapitsin xlakata taskujut?
4 Makgapitsin lu xlakaskinka akxilhkgo xtaskujutkan. Chatum tala chixku tiku wanikan Hung, * tiku xala kxsureste Asia, wan: «Lu xlakaskinka xakakxilha kintaskujut. Nitlan tapuwan xakkgalhi, klakpuwa pi komo tlakg lhuwa tumin xaktlajalh tlakg tlan xakskujnanilh Jehová. Wa xlakata tlakg lhuwa horas ktsukulh skuja chu nialh lu xakan ktamakxtumit. Alistalh, ktamakgatlinilh congregación. Satanás limaklakaskin kakilhtamaku xlakata latamanin tsinu tsinu natamakgatlinikgo Dios».
5. ¿Tuku akgspulalh chatum tala puskat xlakata taʼakglhuwit nema xkgalhi?
5 Makgapitsi natalan lilakgaputsakgo xtaʼakglhuwitkan. Kaʼakxilhwi tuku titaxtulh Anne, tiku xalak Gran Bretaña chu kgalhi kgalhkitsis kamanan. Xla wan: «Akxni lakachilh chatum kinkgawasa lu xtatatla. Titaxtulh kilhtamaku chatum kintsumat tamakxtuka kcongregación chu atanu kinkgawasa wanika pi xkgalhi akgtum tajatat kxtalakapastakni. Lu klilipuwa chu asta nialh kalh ktamakxtumit chu nialh kalh lichuwinan Dios». Lu nitlan limakgkatsiyaw pi makgapitsi natalan chuna la Anne chu xfamilia titaxtukgo tuku tuwa.
6. ¿Tuku xkitaxtulh komo ni xtlawaw tastakyaw nema wi kColosenses 3:13?
6 (Kalikgalhtawakga Colosenses 3:13). Wilakgolh kskujnin Jehová tiku lakpuwankgo pi nitlan tuku katlawaninit chatum tala. Apóstol Pablo lichuwinalh pi max namin kilhtamaku naʼanan tuku tlan nalimawakayaw achatum. Max asta kinkatlawanikanitan tuku ni xlilat. Pero komo ni kuenta natlawayaw max nasitsiniyaw chu asta natamakgatliniyaw xkachikin Jehová. Kaʼakxilhwi tuku titaxtulh chatum tala xalak Sudamérica nema wanikan Pablo. Limawakaka pi xtlawanit tuku nitlan chu uma tlawalh pi xmakglhtika tuku xlakgaya kcongregación. ¿Tuku tlawalh? Xla lichuwinan: «Lu xaksitsinit chu asta ktsukulh tamakgatlini congregación».
7. ¿Tuku nakitaxtu komo lakpuwanaw pi chuntiyaku linaw kuenta?
7 Tiku tlawakgolh akgtum lanka talakgalhin makgasa max lakpuwankgo pi chuntiyaku linkgo kuenta chu asta lakpuwankgo pi ni kalakgchan pi Dios nakapaxki. Asta maski nitlan limakgkatsikgolh xtalakgalhinkan chu kalimasiyanika talakgalhaman max lakpuwankgo pi nialh xlilat namakgtapakgsikgo xkachikin Dios. Wa uma tuku xmakgkatsi chatum tala tiku wanikan Francisco. Xla lichuwinan: «Akxni palha kistakyawaka xlakata ktlawalh talakgxtumit xalimaxana. Maski xapulana chuntiya xakan ktamakxtumit, lu klilipuwa chu kmakgkatsilh pi ni xkilakgchan chuntiya nakmakgtapakgsi kxkachikin Jehová. Nitlan xkimamakgkatsini kintalakapastakni chu xaklakpuwan pi Jehová nitu xkintapatinit. Titaxtulh kilhtamaku, nialh kalh lichuwinan Dios chu nialh kalh ktamakxtumit». ¿Tuku lakpuwanaw xpalakata natalan tiku nachuna titaxtukgo? ¿Makgkatsiyaw tuku makgkatsikgo? Chu tuku tlakg xlakaskinka, ¿tuku lakpuwan Dios?
JEHOVÁ KAPAXKI XBORREGOS
Kxamakgan Israel, mapuchwayananin lu xkalilakgaputsakgo xborregos nema xtsankgakgonit (Kaʼakxilhti párrafo 8 chu 9). *
8. ¿Tuku xlakata katsiyaw pi Jehová putum kilhtamaku kalakapastaka tiku skujnanikgonit makgasata?
8 Jehová ankgalhin kalakapastaka tiku skujnanikgonit chu tamakgatlinikgonit xkachikin (Heb. 6:10). Palakachuwina Isaías tamalakxtumilh la kapaxki Jehová chu la kuentajtlawa xkachikin akxni maklakaskilh akgtum lu xatlan liʼakxilhtit. Xla tsokgwililh: «La chatum mapuchwayanina nakamapuchwayani xborregos. Xmakxpan nakalimastokga borregos; chu nakachaxlin. Chu ni lakapala kalin tiku matsikinamakgolh» (Is. 40:11). ¿La makgkatsi Jehová, xaLanka Mapuchwayanina, akxni chatum kskujni tamakgatlini? Jesús masiyalh tuku makgkatsi Jehová akxni kakgalhskilh kstalaninanin: «¿Tuku lakpuwanatit? Komo chatum chixku kgalhi akgtum ciento borregos chu tantum akgtsankga, ¿ni katikamakgxtakgli tatipuxamakunajatsa ksipi chu naʼan putsa nema akgtsankgapula? Chu komo natekgsa, xlikana kkawaniyan pi lu nalipaxuwa xpalakata uma, nixawa tatipuxamakunajatsa nema ni tsankgakgonit» (Mat. 18:12, 13).
9. ¿La kalikatsini xborregos chatum tlan mapuchwayanina? (Kaʼakxilhti xmakni revista).
9 ¿Tuku xlakata tlan tamalakxtumikan Jehová chatum xmapuchwayanina borrego? Xlakata chatum tlan mapuchwayanina kalilakgaputsa xborregos. Akgtum liʼakxilhtit, David makgnilh tantum león chu tantum oso xlakata nitu xkaʼakgspulalh xborregos (1 Sam. 17:34, 35). Komo tantum borrego tsankga, chatum tlan mapuchwayanina tunkun katsi uma (Juan 10:3, 14). Kamakgxtakga 99 xborregos anta niku kamakikan o skini atanu mapuchwayanina pi kakakuentajtlawalh akxni xla an putsa tiku tsankganit. Jesús maklakaskilh uma liʼakxilhtit xlakata tlan xkinkamasiyanin pulaktum tuku xaxlikana xlakata xTlat, lichuwinalh: «Xla ni lakaskin pi naniy maski kaj chatum kistalanina tiku xtachuna laktsu kamanan litaxtukgo» (Mat. 18:14).
Chatum xmapuchwayanina borrego xalak makgan Israel kuentajtlawa xborrego nema xtsankganit (Kaʼakxilhti párrafo 9).
JEHOVÁ KAPUTSA XBORREGOS
10. Chuna la wan Ezequiel 34:11-16, ¿tuku malaknulh Jehová pi xʼama tlawa xpalakata xborregos nema tsankgakgonit?
10 Jehová kinkapaxkiyan kinchatunukan, asta umakgolh «laktsu kamanan» tiku tamakgatlinikgonit. Dios maklakaskilh palakachuwina Ezequiel, xlakata xmalaknulh pi xʼama kaputsa xborregos tiku xtsankgakgonit chu xʼama kamakgtaya xlakata tlan xtawilapa xtakanajlakan. Chu lichuwinalh tuku xʼama tlawa xlakata tlan xtaspitparakgolh. Chuna la xtlawalh chatum mapuchwayanina israelita komo xmakgatsankgalh tantum xborrego (kalikgalhtawakga Ezequiel 34:11-16). Pulana, mapuchwayanina putsa xborrego, nema max lhuwa kilhtamaku chu litliwakga limaxtu. Alistalh, akxni natekgsa, namaspitpara niku kamakikan. Nachuna, komo borrego lanilh tuku nitlan o lu tsinksma xatapaxuwan namakgtaya, naswitni niku laninit tuku nitlan, nachaxlin chu namawi. Xlakata xmapuchwayaninanin «xborregos Dios», lakgkgolotsin na wa uma tuku xlitlawatkan akxni namakgtayakgo tiku tamakgatlinikgonit congregación (1 Ped. 5:2, 3). Lakgkgolotsin kaputsakgo, kamakgtayakgo xlakata tlan nataspitparakgo kcongregación chu kalimasiyanikgo tapaxkit akxni kamakgtayakgo xlakata tlan natawilapara xtakanajlakan. *
11. ¿Tuku liwana xkatsi chatum tlan mapuchwayanina?
11 Chatum tlan mapuchwayanina liwana xkatsi pi borregos tsankgakgo. Wa xlakata, komo chuna xla, ni xkawilini. Kaʼakxilhwi tuku tlawalh Jehová akxni makgapitsi xlakskujnin ni tlawakgolh tuku xla xlakaskin.
12. ¿La likatsinilh Jehová Jonás?
12 Palakachuwina Jonás tsalalh xlakata ni xmakgantaxtiputun tuku xlakgayawakanit. Pero Jehová ni tunkun lakgmakgalh. Chuna la chatum xatlan mapuchwayanina, Jehová makgtayalh chu maxkilh litliwakga nema xmaklakaskin xlakata tlan namakgantaxti tuku xlakgayawanit (Jon. 2:7; 3:1, 2). Alistalh, Jehová limaklakaskilh mayak nema xtachuna la xla puwa xlakata nalimasiyani pi xlatamatkan chatunu chatunu latamanin lu lanka xtapalh (Jon. 4:10, 11). ¿Tuku kinkamasiyaniyan uma? Pi lakgkgolotsin ni tunkun nalakpuwankgo pi tiku tamakgatlinikgonit Dios nialh katitaspitkgolh. Wata talakaskin nakatsi tuku xlakata tamakgatlinikgolh xkachikin Jehová. Chu akxni xborregos Jehová nalakgtaspitparakgo, talakaskin pi chuntiya tlan nakalikatsiniyaw chu nakalimasiyaniyaw tapaxkit.
13. ¿Tuku kinkamasiyaniyan chuna la lakpuwa Jehová xlakata tuku lichuwinalh tiku tsokgwililh Salmo 73?
13 Tiku tsokgli Salmo 73 lu taxlajwanilh akxni akxilhli pi tiku nitlan xlikatsikgo xtasiya pi lu tlan xkakitaxtunima. Lakpuwa pi ni lu xlakaskinka xwanit natlawakan xtalakaskin Dios (Sal. 73:12, 13, 16). ¿Tuku lakpuwa Jehová? Ni lakgmakgalh. Wata tlawalh pi tuku xlakpuwan xtatsokgtawilalh anta kBiblia. Titaxtulh kilhtamaku salmista akgatekgsli pi ni anan tuku tlakg tlan nixawa xʼamigo Jehová nawana (Sal. 73:23, 24, 26, 28). ¿Tuku kinkamasiyaniyan? Pi lakgkgolotsin ni lakapala nakalakpuwanikgo tuku nitlan tiku lakpuwankgo komo xlakaskinka naskujnanikgo Jehová. Wata talakaskin, naliskujkgo xlakata naʼakgatekgskgo tuku xlakata chuna lakpuwankgo. Chu alistalh tlan nalimaklakaskinkgo Biblia xlakata nakamaʼakgpuwantinikgo.
14. ¿Tuku xlakata xmaklakaskin tamakgtay Elías, chu la makgtayalh Jehová?
14 Palakachuwina Elías tsalanilh mapakgsina Jezabel (1 Rey. 19:1-3). Xlakpuwan pi nialh xʼanan palakachuwinanin chu pi tuku xtlawama nialh xlakaskinka xwanit. Lu nitlan makgkatsilh chu asta xniputun (1 Rey. 19:4, 10). Jehová ni lakgmakgalh Elías. Wata liwana wanilh pi ni xʼakstu xwi, pi tlan xlipawa xlimakgatliwakga Jehová chu tlakg xʼanan tuku xʼama tlawa. Liwana kgaxmatnilh akxni Elías xwanima tuku xlilakgaputsama, chu wi tuku lakgayawapa (1 Rey. 19:11-16, 18). ¿Tuku kinkamasiyaniyan? Pi putum akinin, chu nachuna lakgkgolotsin, tlan nakalikatsiniyaw kskujnin Jehová. Komo chatum tala xatasitsi nawan tuku makgkatsi o lakpuwan pi ni lakgchan xtalakgalhaman Jehová, lakgkgolotsin liwana nakgaxmatnikgo akxni uma tala nawan tuku makgkatsi. Chu alistalh namalakpuwanikgo pi Jehová lanka xtapalh akxilha.
¿LA NAKA’AXILHAW KSKUJNIN DIOS TIKU TAMAKGATLINIKGONIT?
15. Chuna la wan Juan 6:39, ¿la xkaʼakxilha Jesús xborregos xTlat?
15 ¿La lakaskin Jehová pi nakaʼakxilhaw xborregos tiku tamakgatlinikgonit? Jesús kinkawilinin xaliʼakxilhtit. Xla xkatsi pi Dios lanka xtapalh kaʼakxilha putum xborregos. Wa xlakata, lu liskujli nakamakgtaya «tiku xalak Israel, tiku litaxtukgo xtachuna xaʼakgtsankgan borregos» xlakata nalakgtaspitkgo Jehová (Mat. 15:24; Luc. 19:9, 10). Xlakata Jesús wa xatlan mapuchwayanina, nachuna liskujli xlakata ni nakamakgatsankga xborregos xTlat (kalikgalhtawakga Juan 6:39).
16, 17. ¿La natlawakgo lakgkgolotsin xlakata nakamakgtayakgo tiku tamakgatlinikgonit Dios? (Kaʼakxilhti recuadro « La makgkatsi tiku tamakgatlininit Jehová»).
16 Apóstol Pablo kawanilh lakgkgolotsin xalak Éfeso pi xtalakaskin nastalanikgo xliʼakxilhtit Jesús. Kawnanilh: «Palha naliskujatit xlakata nakamakgtayakgoyatit tiku maklakaskinkgo tamakgtay chu na mililakapastakatkan tuku tilichuwinalh Malana Jesús, akxni xla wa: “Tlakg anan tapaxuwan akxni mastakan nixawa akxni makglhtinankan”» (Hech. 20:17, 35). Chuna la akxilhaw, lakgkgolotsin lu lanka taskujut lakgayakgolh. Chatum kgolotsin xalak España tiku wanikan Salvador chuna lichuwinan: «Akxni klilakpuwan pi Jehová lu kapaxki xborregos tiku tamakgatlinikgonit, kimakgpuwantini naktlawa putum tuku kmatlani xlakata nakkamakgtaya. Liwana kkatsi pi Jehová lakaskin nakkakuentajtlawa».
17 Putum tiku xtamakgatlinikgonit Dios tiku kalichuwinaw kʼuma artículo kamakgtayaka chu lakgtaspitparakgolh Jehová. Pero uku nachuna wilakgolh lhuwa tiku lakgtaspitputunkgo Jehová. ¿La tlan nakamakgtayayaw? Kʼatanu artículo tlakg liwana naʼakxilhaw.
TAKILHTLIN 139 ¿Akxilhkana kxasasti kakilhtamaku?
^ párr. 5 ¿Tuku xlakata makgapitsi tiku makgasata kskujnanimakgolh Jehová tamakgatlinikgonit congregación? ¿Tuku lakpuwan Dios xpalakatakan? Kʼuma artículo natekgsaw xatakgalhtin. Na naʼakxilhaw la kamakgtayalh Jehová makgapitsi kskujnin xala makgasa tiku milh kilhtamaku ni tlawakgolh tuku Jehová xkawaninit chu tuku tlan nakatsiniyaw xpalakatakan.
^ párr. 2 TUKU LU XLAKASKINKA: Tiku tamakgatlini Dios wa tiku lin akgchaxan papaʼ o liwaka nialh lichuwinan Dios chu nialh makgalhtawakgenan. Maski chuna, xlakan chuntiyaku kinatalankan litaxtukgo chu kapaxkiyaw.
^ párr. 4 Kalakgpalikanit makgapitsi tukuwani.
^ párr. 10 Kʼartículo nema stala naʼakxilhaw tuku tlan natlawakgo lakgkgolotsin xlakata tlan nastalanikgo uma pulaktutu tuku tlawa chatum mapuchwayanina.
^ párr. 60 TUKU TASIYA KDIBUJO: Chatum mapuchwayanina xalak Israel lilakgaputsa natekgsa xborrego nema tsankganit chu makgtaya xlakata nataspita niku kamakikan.
^ párr. 64 TUKU TASIYA KDIBUJO: Chatum tala puskat tiku tamakgatlininit Jehová tanuma kʼautobús, ka’akxilha chatiy natalan tiku xatapaxuwan lichuwinamakgolh Dios niku lhuwa titaxtukan.
