1. Yehovha u fana ni manana loyi a an’wisaka hi ndlela yihi?

 “XANA wansati a nga rivala n’wana loyi a n’wi an’wisaka?” Lexi i xivutiso lexi Yehovha a xi vutiseke enkarhini wa muprofeta Esaya. Yehovha u byele vanhu va yena a ku: “Vavasati lava va nga rivala, kambe mina a ndzi nge [mi] rivali.” (Esa. 49:15) A swi talanga ku va Yehovha a ti fanisa ni manana. Kambe laha u swi endlile. U tirhise vuxaka lebyi manana ni n’wana va nga na byona, ku kombisa ndlela leyi a ma rhandzaka hayona malandza yakwe. Vamanana vo tala va nga pfumelelana na Jasmin loyi a nga te: “Loko u an’wisa n’wana, vuxaka bya wena na yena bya kula swinene naswona byi ta tshama hilaha ku nga heriki.”

2. Yehovha u titwa njhani loko un’wana wa vana va yena a tshika ku n’wi tirhela?

² Yehovha wa swi vona loko un’wana wa vana va yena a tshika ku ya etinhlengeletanweni ta vandlha ni le nsin’wini. Ehleketa hi ku vava loku a ku twaka loko lembe ni lembe a vona magidi ya malandza ya yena ma tshika ku n’wi tirhela. *

3. I yini leswi Yehovha a swi lavaka?

³ Vamakwerhu vo tala lava a va tshike ku tirhela Yehovha va tlhela va vuya evandlheni, laha va fikaka va amukeriwaka hi mandla mambirhi! Yehovha u lava leswaku va vuyela eka yena, na hina hi lava sweswo. (1 Pet. 2:25) Hi nga va pfuna njhani? Hi nga si hlamula xivutiso lexi, a hi rhangeni hi tiva xivangelo lexi endleke va tshika ku ta etinhlengeletanweni ta vandlha ni ku ya ensin’wini.

4. Ntirho wa ku tihanyisa wu nga va khumba njhani van’wana?

⁴ Van’wana va sungule ku teka ntirho wa ku tihanyisa wu ri wa nkoka ku tlula swilo hinkwaswo. Makwerhu Hung, * loyi a tshamaka eDzongavuxa bya Asia u ri: “Ndzi sungule ku tirhisa matimba ni ku heta nkarhi wo tala ndzi ri entirhweni wa ku tihanyisa. A ndzi tixisa hi ku vula leswaku loko ndzi ri ni mali yo tala, ndzi ta kota ku tirhela Yehovha ku antswa. Ndzi sungule ku tirha tiawara to tala. Swi nga si ya kwihi, ndzi sungule ku xwa etinhlengeletanweni ta vandlha ku fikela laha ndzi tshikeke ku ya hi ku helela. Sathana u tirhisa misava leyi leswaku a tshikisa vanhu ku tirhela Yehovha hakatsongotsongo.”

5. Swiphiqo swi n’wi khumbe njhani makwerhu un’wana wa xisati?

⁵ Vamakwerhu van’wana va langutana ni swiphiqo leswi hetaka matimba. Anne wa le Britain loyi a nga mana wa vana va ntlhanu, u ri: “Un’wana wa vana va mina u velekiwe a lamarile. Hi ku famba ka nkarhi, yin’wana ya tintombhi ta mina yi susiwile evandlheni, loko ndza ha ku i switsongo sweswo, un’wana wa majaha ya mina u sungule ku hlangana nhloko. A ndzi tshikileleke ngopfu lerova ndzi kale ndzi tshika ku ya etinhlengeletanweni ta vandlha ni le nsin’wini. Eku heteleleni, ndzi tshike ku tirhela Yehovha.” Hi rila na yena Anne swin’we ni ndyangu wa yena, ku katsa ni van’wana lava langutaneke ni swiphiqo leswi fanaka!

6. Ku honisa leswi Vakolosa 3:13 yi swi vulaka, swi nga endla munhu a tshika ku tihlanganisa ni vanhu va Yehovha hi ndlela yihi?

⁶ Hlaya Vakolosa 3:13. Malandza man’wana ya Yehovha ma tshike ku tirhela Yehovha hikwalaho ko khunguvanyisiwa hi vapfumerikulobye. Muapostola Pawulo, u swi xiyile leswaku mikarhi yin’wana hi ta va ni “xivangelo xa ku vilerisiwa” hi vamakwerhu. Swi nga endleka hi nga khomiwanga kahle. Loko hi nga tivoneli, hi nga tikuma hi hlundzukile. Mahlundzu ma nga hetelela ma endle leswaku munhu a tshika ku tihlanganisa ni vanhu va Yehovha. Twana leswi endlekeleke makwerhu Pablo, wa le Amerika-Dzonga. U phyarhekiwe mavunwa ya leswaku u endle swilo swo biha naswona hikwalaho ka sweswo, u tekeriwe vutihlamuleri lebyi a ri na byona evandlheni. Xana u angule njhani? U ri: “A ndzi hlundzuke ngopfu naswona hakatsongotsongo ndzi tshike ku ya etinhlengeletanweni ta vandlha.”

7. Xana ku titwa nandzu swi nga n’wi khumba njhani munhu?

⁷ Ku titwa nandzu ku nga endla munhu loyi a tshameke a tlula nawu wa Xikwembu, a tivona a nga faneleki ku rhandziwa hi Xikwembu. Hambiloko a hundzukile naswona a kombiwe tintswalo, a nga tivona a nga ha faneleki ku va un’wana wa malandza ya Xikwembu. Makwerhu Francisco a a titwa tano. U ri: “A ndzi soriwile hikwalaho ka leswi a ndzi tikhome ku biha hi swa masangu. Hambileswi eku sunguleni a ndzi ya etinhlengeletanweni ta vandlha, ndzi sungule ku tshikileleka lerova ndzi tivona ndzi nga ha faneleki ku va exikarhi ka vanhu va Yehovha. Ripfalo ra mina a ri ndzi kingindza naswona a ndzi tibyela leswaku Yehovha a nga ndzi rivalelanga. Hi ku famba ka nkarhi, ndzi tshike ku tirhela Yehovha.” Xana u titwa njhani hi vamakwerhu lava langutanaka ni swiphiqo swo fana ni leswi ha ha ku bulaka hi swona? Xana wa va twela? Xa nkoka swinene, xana Yehovha u titwa njhani hi vona?

8. Xana Yehovha wa va rivala vanhu lava tshameke va n’wi tirhela? Hlamusela.

⁸ Yehovha a nga va rivali vanhu lava tshameke va n’wi tirhela kambe sweswi va tshikeke ku n’wi tirhela; ni ntirho lowu va tshameke va  n’wi endlela wona a nga wu rivali. (Hev. 6:10) Muprofeta Esaya u tsale xikombiso xa kahle ngopfu lexi kombisaka ndlela leyi Yehovha a khathalaka hayona hi vanhu vakwe. U te: “U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena.” (Esa. 40:11) Xana Murisi Lonkulu u titwa njhani loko yin’wana ya tinyimpfu ta yena yi lahleka? Yesu u kombise ndlela leyi Yehovha a titwaka hayona loko a vutisa vadyondzisiwa va yena a ku: “Mi swi vonisa ku yini? Loko munhu wo karhi a ri ni tinyimpfu ta 100 kutani ku lahleka yin’we, xana a nge ti siyi leta 99 etintshaveni kutani a ya lava leyi lahlekeke? Naswona loko swo endleka a yi kuma, ndzi tiyisile ndzi ri eka n’wina, u tsaka ngopfu hayona ku tlula leta 99 leti nga lahlekangiki.”—Mat. 18:12, 13.

9. Varisi lavanene va le mikarhini ya ku tsariwa ka Bibele, a va ti khoma njhani tinyimpfu ta vona? (Vona xifaniso lexi nga eka xifunengeto.)

⁹ Hikwalahokayini swi fanela ku fanisa Yehovha ni murisi? Murisi lonene wa le mikarhini ya ku tsariwa ka Bibele, a a khathala ngopfu hi tinyimpfu ta yena. Hi xikombiso, Davhida u lwe ni nghala ni bere leswaku a sirhelela ntlhambi wakwe. (1 Sam. 17:34, 35) Murisi lonene a a swi vona hi ku hatlisa hambiloko ku lo lahleka nyimpfu yin’we. (Yoh. 10:3, 14) Murisi yoloye a ta siya tinyimpfu ta yena ta 99 endhawini leyi hlayisekeke kumbe a ti siya ni murisi un’wana kutani a famba a ya lava leyi lahlekeke. Yesu u tirhise xikombiso xexo leswaku a hi dyondzisa dyondzo ya nkoka, u te: “Tata wa mina la nge tilweni a nga naveli leswaku un’wana wa lava lavatsongo a lova.”—Mat. 18:14.

10. Hi ku ya hi Ezekiyele 34:11-16, Yehovha u tshembise ku endla yini hi tinyimpfu ta yena leti lahlekeke?

¹⁰ Yehovha wa hi rhandza hinkwerhu, ku katsa ni lava tshikeke ku n’wi tirhela. Hi ku tirhisa muprofeta Ezekiyele, Yehovha u tshembise leswaku u ta lavisisa tinyimpfu ta yena leti lahlekeke kutani a ti pfuna ti tlhela ti va ni vuxaka na yena. U vule magoza lawa a nga ta ma teka leswaku a ponisa tinyimpfu ta yena, ku nga magoza lawa varisi va le Israyele a va ma  teka loko va lahlekeriwe hi nyimpfu. (Hlaya Ezekiyele 34:11-16.) Xo sungula, leswaku murisi a kota ku famba a lava nyimpfu leyi lahlekeke, a swi lava nkarhi ni matshalatshala. Loko a yi kumile, a yi tlherisela entlhambini. Ku engetela kwalaho, loko nyimpfu yo va yi vavisekile kumbe yi khomiwe hi ndlala, a yi tlakula hi ndlela ya rirhandzu, a yi bandicha a tlhela a yi nyika swakudya. Vakulu, ku nga varisi va “ntlhambi wa Xikwembu,” va fanele endla hilaha ku fanaka leswaku va pfuna vanhu lava tshikeke ku ta etinhlengeletanweni ta vandlha. (1 Pet. 5:2, 3) Vakulu va lavisisa vanhu volavo, va va pfuna va tlhelela evandlheni, va va komba leswaku va va rhandza ni ku va pfuna va lulamisa vuxaka bya vona na Yehovha. *

11. I yini leswi murisi lonene a a swi tiva?

¹¹ Murisi lonene a a swi tiva leswaku tinyimpfu ti nga lahleka. Loko nyimpfu yo tshuka yi tihambanisa ni ntlhambi, murisi a a nga yi fumbuteli. Xiya xikombiso lexi Yehovha a hi vekeleke xona, loko a pfuna malandza man’wana ya yena lama tshameke ma tshika ku n’wi tirhela.

12. Yehovha u n’wi khome njhani Yonasi?

¹² Muprofeta Yonasi u baleke ntirho lowu a nyikiwe wona. Nilokoswiritano, Yehovha a nga n’wi tsan’wanga. Ku fana ni murisi lonene, Yehovha u ponise Yonasi a tlhela a n’wi nyika matimba yo endla ntirho lowu a n’wi nyike wona. (Yon. 2:7; 3:1, 2) Hi ku famba ka nkarhi, Yehovha u tirhise ximila xa xikutsu leswaku a pfuna Yonasi a twisisa ndlela leyi vutomi bya vanhu byi nga bya nkoka hayona. (Yon. 4:10, 11) Hi dyondza yini? Vakulu a va fanelanga va hatla va tsan’wa vanhu lava tshikeke ku tirhela Yehovha. Kurinasweswo, va fanele va tikarhatela ku tiva lexi endleke vanhu volavo va tshika ku tirhela Yehovha. Loko munhu yoloye a tlhelela eka Yehovha, vakulu va fanele va ya emahlweni va n’wi khoma hi ndlela ya rirhandzu.

13. Hi dyondza yini eka ndlela leyi Yehovha a anguleke hayona eka leswi vuriweke hi mutsari wa Pisalema 73?

¹³ Mutsari wa Pisalema 73, u hele matimba loko a vona vanhu vo homboloka swilo swi va fambela kahle. U sungule ku tivutisa loko  ku endla ku rhandza ka Xikwembu swi ri swa nkoka. (Ps. 73:12, 13, 16) Xana Yehovha u angule njhani? A nga n’wi solanga wanuna yoloye. U endle leswaku leswi wanuna yoloye a swi vuleke swi tsariwa eBibeleni. Eku heteleleni, mupisalema u swi xiyile leswaku ku va ni vuxaka lebyinene na Yehovha, i swa nkoka ku tlula swilo hinkwaswo. (Ps. 73:23, 24, 26, 28) Hi dyondza yini? Vakulu a va fanelanga va tsutsumela ku avanyisa vanhu lava sungulaka ku kanakana loko swi ri swa nkoka ku tirhela Yehovha. Kurinasweswo, va fanele va tikarhatela ku tiva xivangelo lexi endlaka va titwa tano. Loko vakulu va endla tano, swi ta va olovela ku pfuna vanhu volavo hi ku tirhisa Matsalwa.

14. Hikwalahokayini Eliya a a lava ku pfuniwa naswona Yehovha u n’wi pfune njhani?

¹⁴ Muprofeta Eliya u baleke Hosikati Yezabele. (1 Tih. 19:1-3) Eliya a ehleketa leswaku a ku nga ri na muprofeta un’wana wa Yehovha handle ka yena naswona ntirho lowu a wu endla a wu nga pfuni nchumu. A a tshikilelekile swinene lerova a navela ni ku fa. (1 Tih. 19:4, 10) Ematshan’wini yo va Yehovha a sola Eliya, u n’wi byele leswaku a nga yexe naswona a tshembe matimba ya Xikwembu hikuva ka ha ri ni ntirho wo tala lowu a faneleke a wu endla. Yehovha u yingisele Eliya hi rirhandzu, a tlhela a n’wi nyika ntirho wun’wana. (1 Tih. 19:11-16, 18) Hi dyondza yini? Hinkwerhu hi fanele hi khoma tinyimpfu ta Yehovha hi ndlela ya rirhandzu, ngopfungopfu vakulu. Swi nga ri na mhaka leswaku munhu wa kona u kwatile kumbe u ti vona a nga faneleki ku va Yehovha a nga n’wi komba tintswalo, vakulu va ta n’wi yingisela loko a ri karhi a ti phofula. Va ta tiyisekisa  nyimpfu yoleyo leyi lahlekeke leswaku Yehovha wa yi rhandza.

15. Hi ku ya hi Yohane 6:39, Yesu a a titwa njhani hi tinyimpfu ta Tata wa yena?

¹⁵ Yehovha u lava hi titwa njhani hi tinyimpfu ta yena leti lahlekeke? Yesu u hi vekele xikombiso lexinene emhakeni leyi. A a swi tiva leswaku Yehovha u teka tinyimpfu ta yena hinkwato ti ri ta risima hikwalaho Yesu u endle matshalatshala yo pfuna “tinyimpfu leti lahlekeke ta yindlu ya Israyele” leswaku ti tlhelela eka Yehovha. (Mat. 15:24; Luka 19:9, 10) Leswi Yesu a ri murisi lonene, a a nga lavi ku lahleka ni nyimpfu ni yin’we ya Yehovha.—Hlaya Yohane 6:39.

16-17. Vakulu va fanele va titwa njhani hi ku pfuna vanhu lava tshikeke ku tirhela Yehovha? (Vona bokisi leri nge “ Ndlela Leyi Nyimpfu Leyi Lahlekeke Yi Nga Titwaka Hayona.”)

¹⁶ Muapostola Pawulo u hlohlotele vakulu va le vandlheni ra Efesa leswaku va tekelela xikombiso xa Yesu. U te: “Mi fanele ku pfuna lava tsaneke, naswona mi fanele ku tsundzuka marito ya Hosi Yesu, loko yena a te, ‘Ku nyika swi tisa ntsako lowukulu ku tlula ku amukela.’” (Mint. 20:17, 35) Handle ko ba mariri, vakulu va ni vutihlamuleri bya nkoka lebyi va faneleke va byi byarha emhakeni leyi. Makwerhu Salvador, wa le Spain naswona a nga nkulu, u ri: “Loko ndzi ehleketa hi ndlela leyi Yehovha a khathalaka hayona hi tinyimpfu takwe leti lahlekeke, swi endla ndzi hisekela ku ti pfuna. Leswi ndzi nga nkulu, ndza swi tiva leswaku Yehovha u lava ndzi khathalela tinyimpfu takwe leti lahlekeke.”

¹⁷ Hinkwavo lava ku vulavuriweke hi vona eka nhlokomhaka leyi, lava a va tshike ku tirhela Yehovha va pfuniwile leswaku va tlhelela eka yena. Sweswi hi vulavulaka, vo tala lava tshikeke ku tirhela Yehovha, va lava ku pfuniwa leswaku va tlhelela eka yena. Nhlokomhaka leyi landzelaka, yi ta hi byela swo tala mayelana ni ndlela leyi hi nga va pfunaka hayona va tlhelela eka Yehovha.