SEMANA 25
“Ji mismu jirinhantauaka juchiti karichichani”
“Ji mismu jirinhantauaka juchiti karichichani ka kuájchakuauaka” (EZEQ. 34:11).
PIREKUA 105 Tata Diosï jindesti uékperakua
AMBE ENGACHI EXEAKA *
1. ¿Andisï Jeoba terukukuarhintapi nándi ma jingoni?
JIÁNISÏ enga Isaiasi irekapka, Jeoba arhispti imeri iretani: “¿Uá uarhiiti ma mirikurhini imeri charhakuni [...]? Nájkirukaksï i uarhiiticha mirikurhipiringa, jíkini no méni mirikurhipirhinga tʼunguini” (Is. 49:15). Jeoba no káni terukukuarhintasïndi nándi ma jingoni, peru jiáni ísï uandaspti. Para xarhatani na enga xáni xénchaajka imeri marhuarichani, úraspti ambe enga pʼikuarherajka nándi ma imeri uájpa jimbo. Uánikua nándichaksï májkueni uandasïndi eska pirenchi ma enga Jasmín arhinhajka: “Engari tʼirerajka chíti charhakuni, niárasïngari pʼikuarherani ambe ma enga no méni kʼamakurhijka”.
2. ¿Néna pʼikuarherasïni Jeoba enga imeri uájpa ma jarharijka?
2 Jeoba exesïndi enga imeri uájpa ma nóteru uérajkia aianhpini ni tánguarhikuecharhu nirani. Jiájkani, ¿úsïnchi eranhaskani na enga xáni no sési pʼikuarherajka Jeoba enga exejka eska mándani uéxurhini uánikua erachichaksï jarharisïnga kúnguarhikuani? *
3. ¿Ambe uékasïni Jeoba?
3 Uánikua i erachichaksï kʼuanhatsentasïndi kúnguarhikuarhu ka juchachi tsípikua jingoni eroantasïnga. Jeoba uékasïndi eskaksï kʼuanhatsentaaka ka juchajtu ísï (1 Ped. 2:25). ¿Nénachi uá jarhuataani? Parachi ini ambe mókuntani, jatsiskachi para míteni andiksïsï máru nóteru tánguarhijkia ni uérani aianhpini.
ANDIKSÏSÏ MÁRU ERACHICHA JARHARIJKI KÚNGUARHIKUANI
4. ¿Máruksï ambe niárasïni úkuarhinchani ánchikuarhita jimbo?
4 Máruksï jukari ánchikuarhisïndi. Asia anapu erachi ma enga Hung arhinhajka, * uandantasïndi: “Uénaspka jukari ánchikuarhini. Eratsespka eska, engani sánderu andapiringa, sánderuni sési marhuakupiringa Jeobani. Ísï jimbo, uénaspka sánderu ánchikuarhini ka ístuni sánhani arhispka kueratani tánguarhikuecharhu. Tátsekua méntkuni jarharispka kúnguarhikuani. Ísï xarharasïndi enajki parhakpini úkata jaki para úni eska kʼuiripu sánhani arhiaka jarharini Tata Diosïni”.
5. ¿Ambe niáraspi úni pirenchi ma uandanhiatecha jimbo?
5 Máteru erachichaksï niárasïndi kánikua no sési pʼikuarherani kʼérati uandanhiatecha jimbo. Ju je exeni ambe enga nitamakuarhika Anne enga Gran Bretaña anapueka ka enga sinku sapiichani kánguarhiaka. Pirenchi uandantasïndi: “Juchiti sapi ma, pʼamenchakua ma jingoni andajpenusti enga jimbo no újka uánikua ambe úni. Tátsekua, juchiti uátsï ma ekspulsarinhaspti ka máteru juchiti uájpanksï pʼamenchakua ma exekuntaspti éjpurhu. Kánikua no sési pʼikuarheraspka ka niáraspka jarharini kúnguarhikuani”. Kánikuachi no sési pʼikuarherasïnga engaksï erachicha ka pirenchicha xáni no sési jásï ambe nitamakuarhijka ísï eska Anne ka imeri familia.
6. ¿Ambechi úpirini úkuarhinchani engachi no úska ambe enga Kolosasi 3:13 uandajka?
6 (Arhinta je Kolosasi 3:13). Jarhastiksï máru Jeobaeri marhuaricha engaksï no sési pʼikuarherajka jimbokaksï eratsesïnga eska máteru erachi no sési pʼikuastaaska. Ísïsti, apostuli Pablu uandaspti eska ménisï jauaka ambe ma engachi jimbo uáka uandani eskajtsïni máteruecha no sési pʼikuastaska. Jamberichi no jurhimbikua jingoni kánhaka. Peru engachi no jingontku jámaska, úpiringachi jatanhikuani jarhani erachichani ka sánhani arhinchi jurajkuni Jeobaeri iretani. Ju je exeni ambe enga nitamakuarhipka erachi ma enga Sudamérica anapueka ka enga Pablo arhinhajka. Ískuksï jatini arhispti eska no sési ambe niátaspka ka indeni ambe jimbo, nóteru úsptia úni ánchikuarhita ma Jeobaeri kúnguarhikuarhu. ¿Ambe úspi? Erachi uandasïndi: “Kánikua ikiaxapka ka sánhani arhispka jarharini kúnguarhikuani”.
7. ¿Ambechi úpirini úni engajtsïni útasï no sési pʼikuastajka ima ambe engachi úka?
7 Imecha engaksï ióntki kʼéri kʼamanharhintskua ma úpka, jamberiksï útasï no sési pʼikuarherajti ka eratsenksï eskaksï no jukanchaska eska Tata Diosï xénchauaka. Ka nájkirukaksï moantapkia ka pʼamojperakua xarhataminhani, jamberiksï ísï pʼikuarherajti eskaksï nóteru jukanchaskia Tata Diosïri iretarhu jarhani. Ísïsï pʼikuarherapti erachi ma enga Francisco arhinhajka. Ima uandantasïndi: “Jurhimberanhantaspka ísku jándikua ambe jimbo. Nájkirukani uénani jámani útasï nirani japka tánguarhikuecharhu, tátsekua kánikua no sési pʼikuarheraspka ka eratsesïrenga eskani no jukanchaspka Tata Diosïri iretarhu jarhani. Kánikuareni no sési pʼikuastasïrendi ima ambe engani úpka ka seguru jarhaspka eskarini Jeoba no puáchentaxapka. Tátsekua, nóteruni niraspkia aianhpini ni tánguarhikuecharhu”. ¿Ambechi eratsesïni erachicheri ambe engaksï i jásï ambe nitamakuarhijka? ¿Niárasïnchi kurhangukuani? Ka sánderu jukaparhakua ambe, ¿néna exeasïni Tata Diosï imechani?
JEOBA XENCHAASÏNDI IMERI KARICHICHANI
Ióntki jini Israeli, karichi erangutichaksï kánikua uandanhiasïrendi enga karichi ma tsïnchipiringa. (Exe je párrafu 8 ka 9). *
8. ¿Nénachi míteski eska Jeoba no mirikurhiasïnga imechani engaksï ióntki marhuakupka?
8 Jeoba no mirikurhiasïndi imechani engaksï ióntki marhuakupka peru engaksï jarharika ma tiempu ka no mirikurhisïndi na engaksï sési marhuakupka (Ebr. 6:10). Profeta Isaiasi, sési jásï ma ejemplu úraspti para xarhatani na enga Jeoba kuájchakujka imeri iretani: “Komueska karichi eranguti ma, kuidariuauati imeri karichichani. Imeri jájki jimbo tánantaauati karichi sapirhatichani; ka kamanharhitini páuati” (Is. 40:11). ¿Néna pʼikuarherasïni Jeoba, Kʼéri karichi Eranguti, enga imeri karichi ma jarharijka? Jesusi xarhataspti na enga pʼikuarherajka Jeoba enga i ambe kurhamarhiapka imeri chúxapatichani: “¿Nájtsï exesïni cha? Enga ma acheeti kaapiringa ma sientu karichichani, ka enga maechakuani tsïtapiringa, ¿no jurajkuapirini máteru nobentainuebe karichichani korralirhu para nirani juátarhisï jirinhantani imani enga tsïtapiringa? Ka enga exentapiringuia, jíksïni sési jimbo arhisïnga eska sánderu tsípepiringa exeni imani enga tsïnchipka ka eska máteru nobentainuebe engaksï no méni tsïnchipka” (Mat. 18:12, 13).
9. ¿Néna kaasïreni karichichani ambakiti karichi eranguti ma? (Exe je dibujuni enga uénakuarhu jaka).
9 ¿Andisï sési jaki terukutantani Jeobani, karichi eranguti ma jingoni? Jimboka ambakiti karichi eranguti ma kánikua uandanhiasïrenga imeri karichichani jimbo. Por ejemplu, Dabidi ataspti leonini ka osuni ma para imeri karichichani kuájchakuani (1 Sam. 17:34, 35). Ambakiti karichi eranguti ma, kuenta íntskukuarhisïndi enga karichi ma tsïnchijka (Juanu 10:3, 14). Ónhaasïndi máteru 99 karichichani o máteru karichi erangutini arhisïndi para eranguani para ima úni nirani jirinhantani imani enga tsïnchika. Jesusi úraspti ini ejempluni parajtsïni ambakiti ambe jorhendani imeri Tátiri ambe: Ima no “uékasïndi eska ma ini jásï sapichu tsïnchiaka” (Mat. 18:14).
Israeli anapu karichi eranguti ma kuidarixati karichini ma enga tsïnchipka. (Exe je párrafu 9).
JEOBA JIRINHANTAASÏNDI IMERI KARICHICHANI
10. Eska na arhijka Ezequiel 34:11-16, ¿ambe aiatspespi Jeoba eska úpiringa para jarhuataani imeri karichichani engaksï tsïnchipiringa?
10 Jeobajtsïni kánikua xénchasïndi ka ístu imechani engaksï jarharika kúnguarhikuani. Profeta Esekieli jimbo, Tata Diosï aiatspespti eska jirinhantaapiringa imeri karichichani engaksï tsïnchipka ka eska jarhuataapiringa paraksï ménderu úni ambakiti pájperakua ma jatsini imani jingoni. Ka uandaspti ambe enga xáni úpiringa para jarhuataani. Májkueni úpirindi eska Israeli anapu karichi eranguti ma enga karichini ma tsïtenga (arhinta je Ezequiel 34:11-16). Orheta, karichi eranguti jirinhantapirindi imeri karichini, jamberi ióndapirindi ka kánikua jánguarhintani. Enga exentapiringuia, ménderu pántapirindi máteru karichicha jingoni. Ístu, enga karichi atakuarhipiringa o kʼarhimani jarhani, uékperakua jingoni jarhuatapirindi, irhimakupirindi jima enga atakuarhika, kamanharhitini pántapirindi ka tʼirerani. Kúnguarhikuarhu anapu orhejtsïkuticha engaksï kuidariuajka Tata Diosïri karichichani, ístuksï jatsisti para ini ambe úni engaksï jarhuataani jauaka imechani engaksï jarharika kúnguarhikuani (1 Ped. 5:2, 3). Orhejtsïkutichaksï jirinhantaasïndi, jarhuataasïndiksï paraksï kʼuanhatsentani kúnguarhikuarhu ka xarhatakuasïndiksï na engaksï xáni xénchaajka jarhuatapariani paraksï ménderu ambakiti pájperakua ma jatsini Jeoba jingoni. *
11. ¿Ambe mítesïreni ambakiti karichi eranguti ma?
11 Ambakiti karichi eranguti ma mítesïrendi eskaksï karichicha úpiringa tsïnchini. Ka enga i ambe úkuarhienga, nóksï no sési kaasïrendi. Ju je exeni ambe enga úpka Jeoba engaksï máru imeri marhuaricha no úpka ambe enga ima uékenga.
12. ¿Néna kámaspi Jeoba, Jonasini?
12 Profeta Jonasi no kurhajchaspti Jeobani ka no niraspti Nínibe. Peru Jeoba no xukaspti. Ísï eska na úpiringa ambakiti karichi eranguti ma, Jeoba jarhuataspti ka íntskuspti uinhapikua paraka ima úpiringa úni imeri ánchikuarhitani (Jon. 2:7; 3:1, 2). Tátsekua, úraspti purhueri planta ma para jorhendani eska mándani kʼuiripu kánikua jukaparhakueska para Jeoba (Jon. 4:10, 11). ¿Ambechi jorhenguarhisïni? Eskaksï orhejtsïkuticha no jatsiska para eratseni eska ima erachicha engaksï jarharika kúnguarhikuani, nóteru uákia Jeobani marhuakuni. Sánderu sési, jatsistiksï para kurhanguni andiksïsï jarhari kúnguarhikuani. Ka engaksï i erachicha kʼuanhatsentaaka Jeoba jingoni, jatsistiksï para uékperakua jingoni kaani ka pendienti jarhani imecha jimbo.
13. ¿Néna exespi Jeoba imani enga Salmo 73 karaka ka ambechi jorhenguarhisïni?
13 Ima enga Salmo 73 karaka, niáraspti no sési pʼikuarherani enga exepka enajki ambe no sési úrichani sési nikuani japi. Niáraspti eratseni eska no ma ambe marhuasïrenga úni ambe enga Tata Diosï uéjka (Sal. 73:12, 13, 16). ¿Néna exespi Jeoba inde ambe? No xukaspti. Sánderu sési, úspti eskaksï imeri uandakuecha karakata pakarapiringa Bibliarhu. Tátsekua, ima karari niáraspti kurhanguni eska no jarhaska sánderu ambakiti ambe eska Jeobaeri amigueni (Sal. 73:23, 24, 26, 28). ¿Ambechi jorhenguarhisïni? Eskaksï orhejtsïkuticha no jatsiska para tʼuini no sési ambe eratseni jarhania imani erachiri enga no seguru jarhajka sini jukaparhakueski marhuakuni Jeobani o nómbe. Jatsistiksï para jánguarhintani kurhangukuani andiksïsï ima erachicha ísï eratsejki ka jámani. Engaksï ísï úska, uátiksï sési úrani Bibliani para uinhaperantaani.
14. ¿Andisï Eliasi uétarhinchani japi jarhuajperata ka néna jarhuataspi Jeoba?
14 Profeta Eliasi sïpakuarhikuxapti reina Jesabelini (1 Rey. 19:1-3). Eratsespti eska nóteru ma jarhaspkia Jeobaeri profeta ka eska no marhuaxapka ambe enga ima úni japka. Xáni no sési pʼikuarheraspti enga jamberi uékenga uarhini (1 Rey. 19:4, 10). Jeoba no xukaspti Eliasini. Sánderu sési, arhispti eska no jandiajku jarhaspka, eska Jeoba jarhuatapiringa ka eska útasï uánikua ambe jarhaspka para úni. Pʼamojperakua jingoni kurhajchaspti enga Eliasi aiangukuarhini japka ambe enga uandanhiatenga ka Jeoba arhispti eska máteru ambe úpiringa (1 Rey. 19:11-16, 18). ¿Ambechi jorhenguarhisïni? Eskachi iáminduecha ka sánderia orhejtsïkuticha, jatsiska para pʼamojperakua jingoni kaani Jeobaeri karichichani. Enga nema niáraska ikiatku uandani ambe ma o uandani eska ísï pʼikuarherasïnga eska Jeoba no méni puákuntaaka, orhejtsïkutichaksï jatsisti para kurhajchani enga ima uandani jauaka ambe enga pʼikuarherajka. Tátsekua, jánguarhintaatiksï exerani eska Jeoba kánikua jukaparharasïnga.
¿NÉNACHI JATSISKI PARA EXEANI JEOBAERI KARICHICHANI ENGAKSÏ TSÏNCHITINI JAKA?
15. Eska na arhijka Juanu 6:39, ¿néna exeasïreni Jesusi imeri Tátiri karichichani?
15 ¿Néna uékasïni Jeoba eskachi exeauaka imeri karichichani engaksï tsïnchitini jaka? Jesusijtsïni jorhendasti imeri ejemplu jingoni. Ima mítespti eska Jeoba kánikua jukaparharaasïnga iámindu imeri karichichani. Ísï jimbo, kánikua jánguarhintaspti para jarhuataani “Israeli anapu karichichani engaksï tsïnchitini” japka paraksï Jeobani andarhientani (Mat. 15:24; Luk. 19:9, 10). Jimboka Jesusi jindeska sánderu ambakiti karichi eranguti, ístu jánguarhintaspti na enga xáni úpka para no ma karichi tsïtakuni Táti jembani (arhinta je Juanu 6:39).
16, 17. ¿Nénaksï jatsiski para exeni orhejtsïkuticha ini ánchikuarhitani para jarhuataani imechani engaksï jarharika kúnguarhikuani? (Exe je rekuadruni “ Na enga pʼikuarherajka nema enga Jeobaeri iretani jarharika”).
16 Apostuli Pablu arhiaspti orhejtsïkutichani engaksï Efesu anapu kúnguarhikuarhu japka eskaksï jatsispka para májkueni úni eska Jesusi. Arhiaspti eskaksï ánchikuarhipiringa para “jarhuataani imechani engaksï no uinhapitika, miántsparini tata Jesukristueri uandakuechani”, enga uandapka: “Sánderu sésisti intsïmpini, ka eska intsïmbinhani” (Uku. 20:17, 35). Eskachi na exekia, orhejtsïkutichaksï kʼéri ánchikuarhita ma jatsisti. España anapu orhejtsïkuti ma enga Salvador arhinhajka, ísï uandasïndi: “Engani eratsentajka na enga xáni jukaparharaajka Jeoba imeri karichichani engaksï tsïnchitini jaka, úsïndi eskani uékaaka jarhuataani na engani xáni uáka. Sési mítetixaka eska Jeoba uékasïnga eskani kuájchakuauaka imeri karichichani”.
17 Iámindu i erachicha engachi ini jorhenguarhikua jimbo uandaaka, jarhuatanhastiksï ka ménderuksï kʼuanhatsentasti Jeoba jingoni. Peru iáiasï útasïksï jarhasti uánikuecha engaksï uéjka kʼuanhatsentani. ¿Nénachi uá jarhuataani? Máteru jorhenguarhikua jimbochi exeaka ini ambe.
PIREKUA 139 ¿Eranhaskasïndi jimbanhi parhakpinini?
^ párr. 5 ¿Andiksïsï nóteru nirajkia kúnguarhikuarhu máru engaksï ióni páni japkia sési marhuakuni Jeobani? ¿Néna exeasïni Tata Diosï imechani? Exeantauakachi mókuntskuechani ini jorhenguarhikua jimbo. Ístuchi exeaka na enga Jeoba jarhuataapka máru engaksï ma tiempu jimbo no úpka ambe enga Jeoba uékenga ka ambechi uá jorhenguarhini.
^ párr. 2 JUKAPARHAKUA AMBE: Nema enga jarharika kúnguarhikuani, jindesti ima enga seisi kutsï o sánderu páni jakaia enga nóteru íntspintakia informi ni Bibliaeri ambe jorhendaani kʼuiripuechani. Peruksï útasï jindesti juchari erachicha ka xénchaasïngachi.
^ párr. 4 Máru nombrichaksï mójtakurhisti.
^ párr. 10 Máteru jorhenguarhikua jimbochi exeaka nénaksï uá orhejtsïkuticha ini tanimu ambe úni.
^ párr. 60 AMBE ENGA XARHATAJKA IMAJENI: Ióntki anapu karichi eranguti ma, nirasïndi jirinhantani karichini ma enga tsïnchika ka pántasïndi máteru karichicha jingoni. Iásïksï orhejtsïkuticha májkueni úsïndi.
^ párr. 64 AMBE ENGA XARHATAJKA IMAJENI: Pirenchi ma enga jarharika kúnguarhikuani, autobusirhu uératini exeaxati tsimani Testiguechani engaksï tsípikua jingoni aianguni jaka Tata Diosïri ambe acheetini ma.
