ARTIKULO YUʼUN ESTUDIO 25
«Hoʼon nix ya jle te tuminchijetic cuʼun»
«Hoʼon nix ya jle te tuminchijetic cuʼun soc ya jcanantay» (EZEQ. 34:11).
KʼAYOJIL 105 Jkʼuxul oʼtanil te Diose
¿BIN YA KILBEYTIK SKʼOPLAL? *
1. ¿Bin yuʼun te la spaj sba ta jtul mamail te Jehovae?
TA SKʼAJKʼALEL te j-alwanej Isaías, te Jehová jich la yalbey te lum yuʼune: «¿Ya bal xchʼay ta yoʼtan te ants te yal te la yaʼbe schuʼ [...]? ¡Aunque ya xchʼay ta yoʼtan te yale, mayuc bin ora ya xchʼayat ta coʼtan te haʼate!» (Is. 49:15). Te Jehová maba bayal buelta la spajbey sba skʼoplal sok jtul mamail, pero la spas ta yorail-abi. Swenta ya yakʼ ta naʼel te kʼax kʼux ta yoʼtan te j-abatetik yuʼune, la yalbey skʼoplal te bitʼil kʼax lek ya yil sbaik te jtul mamail sok te yale. Jteb ma spisil te mamailetik jich ya yaʼiy sbaik te bitʼil ya yaʼiy sba te Jasmín te jich la yal: «Kʼalal ya achuʼuntes te awale, ya yakʼ te spisil-ora jun ya awaʼiy aba soke».
2. ¿Bin yaʼiyel ya yaʼiy sba te Jehová kʼalal jtul yal snichʼan ya xnamaj ta stojol?
2 Te Jehová ya yil kʼalal jtul yal snichʼan ma xlokʼix ta scholel te skʼop Diose sok te ma xkʼotix ta tsoblejetike. Jaʼ yuʼun, ¿yabal xkʼot ta koʼtantik te jayebto ya smel yoʼtan kʼalal ya yil te jujun jaʼbil bayal ta mil j-abatetik yuʼun inaktibo ya xkʼotik? *
3. ¿Bin ya skʼan te Jehovae?
3 Bayal ta tul te kermanotaktik-abi ya sujtik tal ta kongregasion sok tseʼel koʼtantik yuʼun te ya sujtik tale. Te Jehová ya skʼan te yakuk sujtik tale, jaʼnix jich ya jkʼantik-euk (1 Ped. 2:25). ¿Bin-utʼil ya xjuʼ ya jkoltaytik? Swenta ya kakʼbeytik sujtib te jojkʼoyel-abi, ya skʼan ya jnaʼtik bin swentail te ya skom sbaik ta scholel skʼop Dios sok ta tsoblejetik.
¿BIN YUʼUN TE AY ERMANOETIK TE INAKTIBO YA XKʼOTIK?
4. ¿Bin ya spasik chaʼoxtul ta swenta te yaʼtelike?
4 Ay machʼatik te jaʼ kʼax mukʼ skʼoplal ya xkʼot ta yoʼtanik te yaʼtelike. Jtul ermano te Hung sbiil, * te kuxinem ta Asia, jich la yal: «Jaʼ bajt ta koʼtan-a te kaʼtele, ma lek te bin la jpase, la jkuy te jaʼ lekxan ya x-abatinon ta stojol Jehová teme ya jta bayal takʼine. Ta swenta-abi, bayalxan kajon ta aʼtel jich yuʼun bayal kaj chʼay te tsoblejetike. Ta patil, jkʼaxel ma boonix ta tsoblejetik-a. Spisil te bin ay ta balumilal jaʼ ya yakʼ te kʼunkʼun ya xnamajotik ta stojol te Diose».
5. ¿Bin la spas jtul ermana ta swenta te bayal te swokole?
5 Ay yantik ermanoetik te ya spasik tulan yuʼun ya xkujch yuʼunik te swokolik te bayal ya x-akʼbotik mel-oʼtan yuʼune. Kiltik te bin kʼax ta stojol te Anne te ay joʼtul yalatak te kuxinem ta Gran Bretaña. Jich la yal: «Ay jtul alal kuʼun te ay schamel ayin. Ta patil, jtul kantsil-al la yichʼ lokʼesel ta kongregasion sok te yan kale la stabeyik jun chamel ta sjol. Bayal la jmel koʼtan yuʼun, ma boonix ta tsoblejetik sok ta scholel skʼop Dios, jich inaktiba kʼoon». Bayal ya jmel koʼtantik yuʼun te ay kermanotaktik jich bitʼil te Anne sok te sfamilia te yak ta kʼaxel bayal swokolike.
6. ¿Bin ya xjuʼ ya xkʼot ta pasel teme ma jchʼuuntik te bin ya yal Colosenses 3:13?
6 (Kʼopona Colosenses 3:13 te ay ta nota). * Ay j-abatetik yuʼun Jehová te jich ya yaʼiyik te ejchentesbotik yoʼtan yuʼun jtul ermano. Te jpuk-kʼop Pablo la yal te ay baeltik te ayniwan rason kuʼuntik te ya x-ilinotik ta stojol te yantik ta skaj te ay bin maba lek la spasbotike. Teme maba ya jkanantay jbatike ya xjuʼ ya jkʼej kilinbatik sok te ya kijkitaytik te lum yuʼun te Jehovae. Kiltik te bin kʼot ta pasel ta stojol jtul ermano ta Sudamérica te Pablo sbiile. Ay bin akʼbot smulin te manix spasoj-ae, jich yuʼun chʼay te yaʼtel yichʼoj ta kongregasione. ¿Bin la spas yuʼun? Jich la yal: «Kʼax ilinon, jaʼ yuʼun kʼunkʼun kaj kijkitay te tsoblejetike».
7. ¿Bin ya xkʼot ta pasel teme maba lek ya awaʼiy aba yuʼun te ay bin chopol la apas te ayix tal tiempoe?
7 Jaʼnix jich te machʼatik ay bin chopol la spasik te ayix tal tiempoe, maniwan lek ya yaʼiy sbaik yuʼun te smulik sok ya skuyik te ma snujpʼ te ya xkʼuxultayotik yuʼun te Diose. Manchukme la sujtesix yoʼtanik sok pasbotikix perdon yuʼun te Diose, jichniwan ya yaʼiyik te ma snujpʼuk te ayik ta lum yuʼun te Jehovae. Jaʼ jich la yaʼiy sba jtul ermano te Francisco sbiile. Jich la yal: «La kichʼ pasel sensurar yuʼun te yalon ta mulile. Ta patil-abi boontonix ta tsoblejetik, pero la jmel koʼtan sok jich la kaʼiy te ma snujpʼuk te ayon ta lum yuʼun te Jehovae. Ma lek te bin ya yalbon-a te koʼtane, jich la kaʼiy te maba spasojbon perdon te Jehovae. Ta patil la jkom jba ta scholel skʼop Dios sok ta tsoblejetik». ¿Bin ya jnoptik ta stojol te ermanoetik te ay swokolik jich te bitʼil la kiltikixe? ¿Yabal xkʼot ta koʼtantik te bitʼil ya yaʼiy sbaike? Sok ¿bin yilel ya x-ilotik yuʼun te Jehovae?
TE JEHOVÁ KʼUX TA YOʼTAN TE TUMINCHIJETIK YUʼUNE
Ta namey Israel, te jkanantuminchijetik ya spasik tulan ta sleel teme ay xchʼay jkojt tuminchije. (Ilawil te parrafo 8 sok 9). *
8. ¿Bin yuʼun jnaʼojtik te maba chʼayem ta yoʼtan Jehová te machʼatik abatinemik ta stojole?
8 Te Jehová maba ya xchʼay ta yoʼtan te machʼatik abatinemik ta stojol sok te yaʼtel spasojik manchukme ay namajemik ta stojol (Heb. 6:10). Te j-alwanej Isaías la yalbey skʼoplal ta swenta jun tʼujbil ejemplo te bitʼil te Jehová kʼux ta yoʼtan sok ya skanantay ta lek te lum yuʼune, jich la yal: «Hich te bin utʼil jcanan-tuminchij ya scanantay te tuminchijetic yuʼune; ya stsac hahchel ta scʼab te tut tuminchijetic, ya spet bahel ta stahn» (Is. 40:11). ¿Bin yaʼiyel ya yaʼiy sba te Jehová te jaʼ Mukʼul Jkanantuminchij kʼalal jkojt tuminchij ya xnamaj ta stojol te sjoʼtake? Te Jesús la yakʼ ta naʼel te bin yaʼiyel ya yaʼiy sba te Jehová kʼalal jich la yalbey te jnopojeletik yuʼune: «¿Bin xchihex yuʼun? Teme ay machʼa ay hoʼwinic (100) ta coht stuminchij, teme ay jcoht ya xhowiy bahel, ¿ma bal yacuc yihquitay hilel ta wits te balunlajuneb yoʼwinic (99) ta coht, ya xbaht sle te jcoht chʼayem hilel? Teme la stahe, ya calbeyex te cʼax hich yutsil yoʼtan yuʼun a te bin utʼil yutsil yoʼtan yuʼun te balunlajuneb yoʼwinic (99) ta coht te ma ba chʼayic stuquelic» (Mat. 18:12, 13).
9. ¿Bin-utʼil ya skanantay te stuminchij jtul jkanantuminchij? (Ilawil te dibujo ta yelaw te rebista).
9 ¿Bin yuʼun snujpʼ te ya jpajtik sok jkanantuminchij te Jehovae? Melel te jkanantuminchij ya skanantay sok skʼuxul yoʼtan te tuminchijetik yuʼune. Jun ejemplo jaʼ te bin la spas te David te la smil jkojt leon sok jkojt oso yuʼun ya skanantay te tuminchijetik yuʼune (1 Sam. 17:34, 35). Teme ay chʼay jkojte, te lekil jkanantuminchij yananix sta ta ilel-a (Juan 10:3, 14). Ya yijkitay te 99 ta kojt ta korral o ay machʼa ya yakʼbey skanantay jilel yuʼun ya xbajt sle talel te jkojt chʼayeme. Te Jesús la stuuntes te ejemplo-abi yuʼun ay bin mukʼ skʼoplal ya yakʼ jnoptik ta swenta te sTate, jich la yal: «Ma scʼan te ya xchʼay jtuhluc haʼi alaletic ini» (Mat. 18:14).
Jtul jkanantuminchij ta namey Israel ya skanantay jkojt tuminchij te chʼayem-ae. (Ilawil te parrafo 9).
TE JEHOVÁ YA SLE TE TUMINCHIJETIK YUʼUNE
10. Jich bitʼil ya yal Ezequiel 34:11-16, ¿bin ya spas te Jehová ta stojol te stuminchij te chʼayeme?
10 Te Jehová kʼuxotik ta yoʼtan ta jujuntul soknix kʼux ta yoʼtan te machʼatik namajemik ta stojole. Ta swenta te j-alwanej Ezequiel te Dios la yal te ya sle te stuminchij te chʼayem sok te ya skoltay yuʼun ya xlekub te schʼuunel yoʼtane. Soknix la yal te jich ya skoltay te bitʼil ya spas jtul jkanantuminchij ta lum Israel teme ay chʼay jkojt stuminchije (kʼopona Ezequiel 34:11-16). Ta nail, ya sle te tuminchij manchukme yaniwan xwoklaj sok yaniwan xjalaj ta sleel. Kʼalal la staix-ae, ya yikʼ bael te banti ay te yantik tuminchije. Soknix teme ay yejchen o swiʼnale sok skʼuxul yoʼtan ya yakʼbey te bin ya xtuun yuʼun, ya spotsbey te yejchen, ya spet bael sok ya yakʼbey sweʼel. Te ansianoetik te jich kʼoemik bitʼil jkanantuminchijetik te ya yilik te «tuminchijetic yuʼun Dios», jichme ya skʼan ya spasik kʼalal ya skoltayik te machʼatik yijkitayojik te kongregasione (1 Ped. 5:2, 3). Te ansianoetik ya sleik, ya skoltayik yuʼun ya sujtik tal ta kongregasion, jaʼnix jich ya skoltayik sok skʼuxul yoʼtanik swenta ya yamigoin sbaik sok te Jehovae. *
11. ¿Bin snaʼoj jtul lekil jkanantuminchij?
11 Jtul lekil jkanantuminchij ta namey, snaʼoj-a te ya xjuʼ ya xchʼay te tuminchijetike. Jich yuʼun teme ay chʼayike maba ya yakʼbey kastigo. Kiltik te bin la spas te Jehová kʼalal chaʼoxtul j-abatetik yuʼun ay maba la spasbeyik te bin ya skʼan yoʼtane.
12. ¿Bin yilel la yil Jehová te Jonase?
12 Te j-alwanej Jonás ma la schʼuunbey smantal te Jehová te ya skʼan ya xbajt ta Ninivee. Pero te Jehová ma la snop te maba ya xtojobixe. Jich bitʼil ya spas jtul lekil jkanantuminchij, la skoltay sok la yakʼbey yip yoʼtan swenta ya spas te yaʼtele (Jon. 2:7; 3:1, 2). Ta patil la stuuntes chʼupak teʼ yuʼun ya yakʼbey snop te kʼax mukʼ skʼoplal skuxlejal te ants winiketike (Jon. 4:10, 11). ¿Bin ya jnoptik yuʼun? Te ansianoetik mame skʼan te oranax ya snopik te maba ya xtojobix te machʼatik inaktibo ayike. Ya skʼan ya spasik tulan yuʼun ya xkʼot ta yoʼtanik te bin yuʼun la yijkitayik te kongregasione. Kʼalal ya sujtik tal te tuminchijetik-abi yame skʼan te yato skanantayik ta lek sok skʼuxul yoʼtanik.
13. ¿Bin ya jnoptik ta swenta te bin la spas te Jehová yuʼun te bin la yal te machʼa la stsʼibay te Salmo 73?
13 Te machʼa la stsʼibay te Salmo 73 chebaj yoʼtan yuʼun te kʼalal la yil te jaʼ lekxan skuxlejalik yilel te machʼatik chopol stalelike. La snop te ma mukʼuk skʼoplal te spasbeyel skʼanojel yoʼtan te Jehovae (Sal. 73:12, 13, 16). ¿Bin la spas te Jehovae? Maba ilin ta stojol. La yakʼ ta tsʼibayel jilel ta Biblia te bin la yale. Ta patil te salmista kʼot ta yoʼtan te jaʼ kʼax mukʼxan skʼoplal te ya kamigointik te Jehovae (Sal. 73:23, 24, 26, 28). ¿Bin ya yakʼ jnoptik? Te ansianoetik mame skʼan te oranax ay bin chopol ya yalik ta stojol te machʼatik ya xkaj snopik teme yuʼun-nix mukʼ skʼoplal-a te ya x-abatinotik ta stojol te Jehovae. Ya skʼan ya spasik tulan yuʼun ya xkʼot ta yoʼtanik bin yuʼun te jich ya snopike. Teme kʼot ta yoʼtanike, yame xjuʼ ya stuuntesik te Biblia yuʼun ya yakʼbeyik smukʼul yoʼtan.
14. ¿Bin yuʼun la skʼan koltayel te Elías sok bin-utʼil koltayot yuʼun te Jehovae?
14 Te j-alwanej Elías bajt ta anel ta skaj te ajwalil ants Jezabel (1 Rey. 19:1-3). La skuy te maʼyukix yantik j-alwanej yuʼun Jehová sok la skuy te maʼyuk swentail te aʼtelil yak ta spasele. Bayal la smel yoʼtan, jich yuʼun la skʼan slajel (1 Rey. 19:4, 10). Te Jehová ma chopoluk la yil te Eliase, la yalbey te maba stukele, te ya xkoltayot sok te ayto bayal aʼtelil ya skʼan pasele. Te Jehová la schʼam yaʼiy sok yutsil yoʼtan te bin la yal te Elías sok la yakʼbeyxan spas yantik aʼtelil (1 Rey. 19:11-16, 18). ¿Bin ya yakʼ jnoptik? Te ansianoetik soknix-euk te joʼotike ya skʼan ya kiltik sok yutsil koʼtantik te tuminchijetik yuʼun te Jehovae. Teme ay machʼa ya yal te ay bin ilinem yuʼun o ya yal te maʼyuk bin-ora ya xpasbot perdon yuʼun te Jehovae, te ansianoetik yame skʼan ya schʼam yaʼiyik ta lek te kʼalal ya sjam te yoʼtanike. Ta patil, yame yalbey yaʼiyik te mero kʼux aʼiybil yuʼun te Jehovae.
¿BIN-UTʼIL YA SKʼAN YA KILTIK TE TUMINCHIJETIK YUʼUN DIOS TE CHʼAYEMIKE?
15. Jich bitʼil ya yal Juan 6:39, ¿bin yilel la yil Jesús te tuminchijetik yuʼun te sTate?
15 ¿Bin-utʼil ya skʼan Jehová te yakuk kiltik te tuminchijetik yuʼun te chʼayemike? Te Jesús la yakʼ jun lekil ejemplo ta swenta-abi. Snaʼoj-a te mukʼ skʼoplal ta yoʼtan Dios spisil te tuminchijetik yuʼune. Jaʼ yuʼun la spas tulan ta skoltayel swenta ya sujtik ta stojol Jehová te «tuminchijetic yuʼun Israel» te chʼayemik-ae (Mat. 15:24; Luc. 19:9, 10). Jich bitʼil jaʼ lekil jkanantuminchij te Jesuse, jaʼnix jich la spas tulan yuʼun maba ya xchʼay jkojtuk te tuminchijetik yuʼun te sTate (kʼopona Juan 6:39).
16, 17. ¿Bin yilel ya skʼan ya yilik te ansianoetik te skoltayel te machʼatik inaktibo ayike? (Ilawil te rekuadro « ¿Bin yaʼiyel ya yaʼiy sba jkojt tuminchij te chʼayeme?»).
16 Te jpuk-kʼop Pablo la yalbey te ansianoetik ta kongregasion te ay ta Éfeso te ya skʼan ya stʼunik te ejemplo yuʼun te Jesuse. Jich la yal: «Teme hich ya xʼaʼtejex, ya xhuʼ yac acoltayic te machʼatic mayuc bin ay yuʼunic. Soc naʼahic me te bin la yal te Cajwaltic Jesús: Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hech. 20:17, 35). Jich yuʼun, tulanme te aʼtelil ay ta swentaik te ansianoetike. Jtul ansiano te Salvador sbiil te kuxinem ta España, jich la yal: «Kʼalal ya jnop te kʼux ta yoʼtan Jehová te tuminchijetik yuʼun te chʼayemike, ya stijbon koʼtan te yakuk jpas tulan bantito kʼalal ya xjuʼ kuʼun ta skoltayel te tuminchijetik-abi. Jnaʼoj ta lek te jaʼ ya skʼan Jehová te yakuk jkanantay ta leke».
17 Spisil te machʼatik inaktibo ayik te la kalbeytik skʼoplal ta artikulo ini, la yichʼik koltayel sok sujtik tal ta stojol te Jehová. Pero jaʼnix jich ta ora ini ayto tsobol te machʼatik ya skʼan ya sujtik ta stojol te Jehovae. ¿Bin-utʼil ya xjuʼ ya jkoltaytik? Yame kilbeytikxan skʼoplal ta yan artikulo.
KʼAYOJIL 144 Jtʼojan jsitik ta majtʼanil
^ parr. 5 ¿Bin yuʼun te ay machʼatik ya yijkitayik te kongregasion manchukme bayal jaʼbil jun yoʼtan la yakʼ sbaik ta stojol te Jehovae? ¿Bin yilel ya x-ilotik yuʼun te Jehovae? Ta artikulo ini yame kilbeytik te sujtibe. Jaʼnix jich ya kiltik bitʼil te Jehová la skoltay te j-abatetik yuʼun ta namey te ay ma la spasik te aʼtelil la yakʼtiklanbey spas sok ya kiltik te bin ya yakʼ jnoptik te bin la spase.
^ parr. 2 TE BIN MUKʼ SKʼOPLAL: Jtul publikador inaktibo jaʼ te machʼa ayix wakeb u te ma xyakʼ te s-informe swenta scholel skʼop Dios. Manchukme ay machʼa inaktibo ay, kermanotiktome sok kʼuxme ta koʼtantik.
^ parr. 4 Ay yichʼoj jelel te biililetike.
^ parr. 6 Colosenses 3:13, TNM: «Talel kʼaxel tsʼikbeya abaik sok pasbeya abaik perdon sok yutsil awoʼtanik manchukme yuʼun-nix ay bin maba lek la awichʼik pasbeyel-a. Jich bitʼil sok yutsil yoʼtan la spasbeyex perdon te Jehová, jaʼnixme jich xa apasbey abaik perdon».
^ parr. 10 Ta yan artikulo yame kiltik te bitʼil ya xjuʼ ya spasik-abi te ansianoetike.
^ parr. 61 TE BIN YA XCHIKNAJ TA DIBUJOE: Jtul jkanantuminchij ta namey Israel ya spas tulan ta sleel te tuminchij te chʼayeme sok ya yikʼ sujtel te banti ay te yantik tuminchijetike. Jich ya spasik-euk te ansianoetik ta kʼajkʼal ini.
^ parr. 65 TE BIN YA XCHIKNAJ TA DIBUJOE: Kʼalal ay ta karro jtul ermana te inaktiba aye, ya yil chaʼtul Testigoetik te ayik ta scholel skʼop Dios sok stseʼelil yoʼtanik.
