OCIPAMA CELILONGISO 25
“Ame Muẽle, Sanda Olomeme Viange”
“Ame muẽle, sanda olomeme viange loku vi vanjiliya.”—ESEK. 34:11.
OCISUNGO 105 “Suku Eye Ocisola”
OVINA TU LILONGISA *
1. Momo lie Yehova a li sokisila la ina umue?
“UKÃI nga, ivala omõlãye o nyama?” Eli epulilo limue Yehova a linga koloneke viuprofeto Isaya. Eye wa likuminya kafendeli vaye hati: “Oco muẽle, ci tava okuti ava va ivala, ame, puãi siu ku ivala.” (Isa. 49:15) Halonjanja viosiko Yehova a li sokisa lonjali yimue yukãi, pole vonjanja eyi eye wa ci linga. Yehova poku tukula ocisola ina a kuetele omõlaye, eye wa situlula ocisola cocili a kuetele afendeli vaye. Olonjali vialua vi tava kolondaka via manji umue ukãi o tukuiwa Jasmin, wa popia hati: “Eci ove o kuata omõlaye umue, ocisola u kuatela cilua kuenda ci kala otembo yosi.”
2. Yehova o liyeva ndati eci umue pokati kafendeli vaye o liwekapo oku endaenda kolohongele kuenda kupange woku kunda?
2 Yehova o ci lete eci umue pokati kafendeli vaye a liwekapo oku endaenda kolohongele kuenda kupange woku kunda kuenje eci cu sumuisa calua. Sokolola esumuo Yehova a pondola oku kuata, eci a mola valua afendeli vaye oku liwekapo oku kunda * unyamo lunyamo.
3. Nye Yehova a yongola?
3 Valua pokati ka vamanji okuti va liwekelepo oku kunda, va tiuka vali vekongelo kuenje tu va yolela eci ovo va ci linga! Yehova o yongola okuti ovo va tiuka kuenda letuvo. (1 Pet. 2:25) Pole, tu pondola oku va kuatisa ndati oco va tiuke? Osimbu ka tua tambuluile epulilo eli ciwa oku kũlĩhĩsa tete esunga lieci vamanji vamue va liwekelapo oku endaenda kolohongele kuenda kupange woku kunda.
MOMO LIE VAMUE VA LIWEKELAPO OKU VUMBA YEHOVA?
4. Upange woku sanda eteku u pondola oku kokela vamue oku linga nye?
4 Vamanji vamue va ecelela okuti upange woku sanda eteku, u velapo komuenyo wavo. Manji umue ulume o tukuiwa Hung, * o kasi Kombuelo yo Asia, wa popia hati: “Ame nda velisilepo calua upange wange woku sanda eteku. Nda kuata ovisimĩlo ka via sungulukile viokuti, nda nda kuatele olombongo vialua nda nda tẽla oku vumba ciwa Yehova. Omo liaco, ndaenda oku talavaya olowola vialua. Kuenje nda fetika oku laña kolohongele olonjanja vialua noke nda liwekapo oku enda Konjango Yusoma. Ci molẽha ndu ovina vi kasi voluali via pangiwa locimãho coku vetiya omanu oku tinduka ku Yehova.”
5. Manji Anne ovitangi vipi a liyaka lavio?
5 Vamanji vamue va lemelelua lovitangi vialua. Manji Anne wo ko Bretanya, ina yomãla vatãlo. Eye hati: “Umue pokati komãla vange wa citiwa lovitangi vialua. Noke yotembo yimue, omõla wange wukãi wa tundisiwa vekongelo kuenda omõla ulume wa kuatiwa luvei wowoño. Nda sumuile calua okuti nda fetika oku hongua kespiritu. Kuenje nda liwekapo oku endaenda kolohongele kuenda kupange woku kunda.” Ci sumuisa oku kũlĩha okuti manji Anne lepata liaye kuenda vamanji vakuavo va kasi oku liyakavo lovitangi vialua!
6. Momo lie tu popela okuti omanu vana ka va kuama elungulo li sangiwa ku Va Kolosai 3:13, va kasi kohele yoku liwekapo oku likongela lafendeli va Yehova?
6 Tanga Va Kolosai 3:13. Afendeli vamue va Yehova va siata oku sumuisiwa la vamanji vakuavo. Upostolo Paulu wa kũlĩhĩle okuti olonjanja vimue citava okuti tu ‘kuatela ondaka’ manji umue. Kuenda citava okuti tua tatiwa lekambo liesunga. Nda ka tua kuatele utate, tu fetika oku kuata ocikumbiti. Kuenje vokuenda kuotembo, onyeño yi pondola oku kokela omunu oku liwekapo oku likongela la fendeli va Yehova. Kũlĩhĩsa eci ca lipita la manji Pablo, o kasi ko Amerika do Sul. Ndaño okuti ka kuatele eko, eye wa lundiliwa okuti wa linga ovina ka via sungulukile kuenje wa pumba ovikele viaye vekongelo. Eye wa liyeva ndati? Eye hati: “Nda temẽle calua kuenda kamue kamue nda fetika oku siapo ekongelo.”
7. Nye ci pita nda owanji utima u vetela evelo omunu umue?
7 Vamanji vamue va li vetela evelo omo liakandu va linga kosimbu. Kuenje va sima okuti ka va sesamẽla ocisola ca Suku. Ndaño okuti va likekembela ale kuenda Yehova wa ecela akandu avo, handi lopo va litenda okuti ka va sesamẽla oku kala pokati kafendeli va Suku. Manji umue o tukuiwa Francisco oco a liyeva. Eye wa popia hati: “Ame nda sombisiwa lakulu vekongelo omo lioku linga ukahonga. Kefetikilo nda endaenda kolohongele, pole, noke nda yuliwa lesumuo lialua. Nda liyeva okuti si sesamẽla oku kala pokati kafendeli va Yehova. Owanji wutima wange handi wa kala oku mbetela evelo kuenje nda kuata ovisimĩlo viokuti Yehova ka ecelele akandu ange. Vokuenda kuotembo, nda liwekapo oku endaenda kolohongele.” Nye ove o yeva vutima catiamẽla ku vamanji vana va lipita lovitangi via tukuiwa ndeti? Anga hẽ o lekisa ohenda kokuavo? Ca velapo vali, nye Yehova a sima catiamẽla kokuavo?
YEHOVA O SOLE OLOMEME VIAYE
Ungombo umue u Isareli wa enda oku lekisa esakalalo lialua eci omeme yimue yi nyelela (Tala ovinimbu 8-9) *
8. Yehova ivalako hẽ vana vo vumbile? Ci lombolola.
8 Yehova ka ivalako vana vo vumbile, pole, cilo va liwekapo. Kuenda eye ka ivalako upange ovo vo lingila ale. (Va Hev. 6:10) Uprofeto Isaya wa tukula ocindekaise cimue ciwa ci lekisa ndomo Yehova a sole afendeli vaye. Eye wa soneha hati: “O lisa ocunda caye ndungombo, ongolola otumeme vovoko aye, o tu ambatela ponete.” (Isa. 40:11) Ndamupi Yehova, Ungombo Wavelapo a liyeva eci umue pokati kolomeme viaye, a tunda vocunda? Yesu wa lekisa ndomo Yehova a liyeva eci a pulisa olondonge viaye hati: “Nye vu sima? Nda ulume umue o kuete 100 kolomeme kuenje pa nyelela yimosi, ka si hẽ 99 vemehi liomunda kuenda o ka sandiliya yimosi ya nyelela? Kuenda nda wa yi sanga, ndu sapuili siti, eye o sanjukila vali yimosi okuti 99 ka via nyelile ci sule.”—Mat. 18:12, 13.
9. Angombo kosimbu va enda oku tata ndati olomeme viavo? (Tala ociluvialuvia koñoño.)
9 Momo lie ca sungulukila oku sokisa Yehova lungombo umue? Momo ungombo uwa kosimbu, wa enda oku lekisa esakalalo lialua kolomeme viaye. Ndeci, Daviti wa yaka lohosi kuenda okanyani, oco a teyuile ocunda caye. (1 Sam. 17:34, 35) Ungombo uwa, wa ponduile oku limbuka nda pa kamba omeme yimue. (Yoa. 10:3, 14) Ungombo wa ponduile oku sia 99 kolomeme viaye pocitumãlo cimue ca koka, ale oku vi sila angombo vakuavo kuenje eye enda o ka sandiliya yina ya nyelela. Yesu wa tukula olusapo olu, oco a tu longise ocili cimue ci kuete esilivilo hati: “Isiange o kasi kilu ka sanjuka eci pokati kava vatito pa nyelela umue.”—Mat. 18:14.
Ungombo umue u Isareli kosimbu o tata omeme yimue ya nyelile (Tala ocinimbu 9)
YEHOVA O SANDILIYA OLOMEME VIAYE
10. Ndomo ca tangiwa kelivulu lia Esekiele 34:11-16, nye Yehova a likuminya oku lingila olomeme vina via nyelela?
10 Yehova o sole calua omunu lomunu pokati ketu oku kongelamo vana “vatito” okuti va siapo ocunda caye. Pocakati cuprofeto Esekiele, Yehova wa likuminya okuti wa laikele oku sandiliya olomeme viaye loku vi kuatisa oku tumbulula uhayele wavo kespiritu. Yehova wa tukula onjila eye a ponduile oku kuama, oco a kuatise olomeme viaye kuenda ungombo u Isareli wa ponduilevo oku kuama onjila yaco, nda okuti omeme yimue ya nyelela. (Tanga Esekiele 34:11-16.) Tete, ungombo wa sukilile oku tunda oco a sandiliye omeme ya nyelela kuenje ca sukilile otembo kuenda a likolisilo alua. Noke, eci ungombo a sanga omeme yaco, o yi tuala vocunda. Nda omeme ya lemehĩwa, ale yi kasi lonjala, ungombo wa ponduile oku yi tata locisola, oku tata apute aco, oku yambata kuenda oku yi lisa. Akulu vekongelo okuti va lava “ocunda ca Suku,” va sukilavo oku kuama onjila yimuamue poku kuatisa vana va siapo ekongelo. (1 Pet. 5:2, 3) Akulu vekongelo va sandiliya vosi vana va tunda vocunda, va va kuatisa oku tiuka vekongelo kuenda locisola va eca kokuavo ekuatiso va sukila konepa yespiritu. *
11. Nye ungombo uwa a kũlĩha?
11 Ungombo uwa wa kũlĩha okuti olomeme pamue vi nyelela. Kuenda eci omeme yi tunda vocunda ungombo ka yi veta. Kũlĩhĩsa ongangu Yehova a eca poku kuatisa vamue afendeli vaye okuti va lipita lovitangi vialua.
12. Yehova wa tenda ndati Yona?
12 Onjanja yimue uprofeto Yona wa tilile ocikele caye. Ndaño ndoco, Yehova ka popele okuti Yona ka kuete vali esilivilo. Ndeci ci linga ungombo uwa, Yehova wa tambula vali Yona kuenda wo kuatisa oku kuata utõi oco a tẽlise ocikele caye. (Yona 2:7; 3:1, 2) Noke, Yehova pocakati colungu lumue wa kuatisa Yona oku limbuka okuti omuenyo womanu wa velapo vali. (Yona 4:10, 11) Eci ci tu longisa nye? Akulu vekongelo va sukila oku sandiliya lonjanga vana va liwekapo oku kunda. Ovo va sukilavo oku kũlĩha eci ca koka omeme oku tunda vocunda. Kuenje eci omeme yi tiuka ku Yehova, akulu vekongelo vamamako oku kuatisa kuenda oku lekisa kokuayo ocisola cocili.
13. Nye tu lilongisa konjila ndomo Yehova a tenda olondaka viusonehi Osamo 73?
13 Usonehi Osamo 73 wa sumuile poku mola okuti olondingaĩvi via kala ndu okuti vi kuete ekalo liwa. Eye wa lipula nda okuti oku linga ocipango ca Suku ci kuete muẽle onima. (Osa. 73:12, 13, 16) Nye Yehova a linga? Eye ka pisile ukualosamo. Kuenje Yehova wa tuma oku soneha olondaka viukualosamo Vembimbiliya. Noke ukualosamo wa kuata elomboloko liokuti oku kuata ukamba uwa la Yehova oco ocina ca velapo kuenda ci nena esanju komuenyo. (Osa. 73:23, 24, 26, 28) Eci ci tu longisa nye? Akulu vekongelo va sukila oku yuvula oku pisa vana va kuete atatãhãi nda okuti oku vumba Yehova ci kuete muẽle esilivilo. Pole, ovo va sukila oku kũlĩha esunga lieci omunu waco a popela, ale a lingila ovina lonjila ndeyi. Noke akulu vekongelo oco lika va pondola oku talavaya Lembimbiliya oco va ece kokuavo ekuatiso li sukiliwa.
14. Momo lie Eliya a sukililile ekuatiso kuenda Yehova wo kuatisa ndati?
14 Uprofeto Eliya wa kala oku tĩla Nasoma Isevele. (1 Olos. 19:1-3) Eye wa simĩle okuti eye lika wa supilepo nduprofeto wa Yehova kuenda wa liyeva okuti upange waye wa kala ño elivova. Kuenje Eliya wa sumuile calua okuti wa yonguile oku fa. (1 Olos. 19:4, 10) Yehova ka pisile Eliya. Pole, Yehova wo sapuila uprofeto Eliya okuti ka kasi lika liaye kuenda wa ponduile oku kolela kunene wa Suku momo, handi kua kala upange walua eye a sukilile oku linga. Yehova lohenda wa yevelela asakalalo a Eliya kuenje wa eca kokuaye ocikele cikuavo. (1 Olos. 19:11-16, 18) Eci ci tu longisa nye? Vosi yetu ca piãla enene akulu vekongelo, tu sukila oku tata olomeme via Yehova locisola. Nda omunu umue wa popia okuti o kasi lonyeño yalua, ale o sima okuti ka sesamẽla ongecelo ya Yehova, akulu vekongelo va sukila oku u yevelela loku kapako asakalalo aye. Noke va pondola oku kuatisa manji yaco oku limbuka okuti Yehova u sole calua.
TU SUKILA OKU TENDA NDATI OLOMEME VIA SUKU VINA VIA NYELELA?
15. Ndomo ca tangiwa ku Yoano 6:39, Yesu wa tata ndati olomeme via Isiaye?
15 Yehova o yongola okuti olomeme viaye vina via nyelela tu vi tata hẽ ndati? Yesu wa tu sila kongangu. Eye wa kũlĩhĩle okuti Yehova o tenda olomeme viosi okuti vi kuete esilivilo kokuaye. Omo liaco, Yesu wa linga cosi ci tava oco a kuatise ‘olomeme via nyẽlela vionjo ya Isareli,’ oco vi tiuke ku Yehova. (Mat. 15:24; Luka 19:9, 10) Yesu, omo okuti ungombo uwa, wa likolisilako oku teyuila olomeme via Yehova okuti layimue yi nyelela.—Tanga Yoano 6:39.
16-17. Akulu vekongelo va liyeva ndati eci va kuatisa vana va siapo ekongelo? (Tanga okakasia losapi hati, “ Ndomo Omeme ya Nyelela Pamue yi Liyeva.”)
16 Upostolo Paulu wa vetiya akulu vekongelo vo ko Efeso oku setukula ongangu ya Yesu. Paulu wa popia hati: “Vu kuatisi vana va hongua kuenda ivaluki olondaka via Ñala Yesu, eci eye muẽle a popia hati: ‘Esanju li tunda koku eca olio lia velapo, li tunda koku tambula li sule.’” (Ovil. 20:17, 35) Ocili okuti akulu vekongelo koloneke vilo, va kuete ocikele cimuamue. Ukulu umue wekongelo wo ko Espanya o tukuiwa Salvador, wa popia hati: “Eci ndi sokolola ndomo Yehova a tata ciwa olomeme viaye via nyelela, ame ndi linga cosi citava oco ndi vi kuatise. Nda kũlĩha okuti Yehova o yongola okuti ndi tata olomeme viaye.”
17 Vamanji vosi va tukuiwa vocipama cilo, okuti va liwekelepo oku kunda loku endaenda kolohongele, va tambula ekuatiso kuenje va tiuka ku Yehova. Vepuluvi lilo, etendelo lialua lia vamanji vana va siapo ocisoko ca Yehova, va yongolavo oku tiuka. Nye tu sukila oku linga oco tu va kuatise? Eci oco tu ka konomuisa vocipama cikuãimo.
OCISUNGO 139 Sokolola Ndomo o ka Kala Voluali Luokaliye
^ tini. 5 Momo lie vamue va vumbile Yehova lekolelo vokuenda kuanyamo alua, va silapo ekongelo? Vamanji vaco Suku o va tenda hẽ ndati? Ocipama cilo, ci ka tambulula apulilo a-a. Handi vali, tu ka lilongisavo ndomo Yehova a kuatisa afendeli vamue kosimbu okuti va liyaka lovitangi.
^ tini. 2 ONDAKA YA LOMBOLUIWA: Ukundi wa liwekapo oku kunda, omunu una okuti kaeci ulandu waye wupange woku kunda vokuenda kuolosãi epandu, ale ceci ci pitahãla olosãi epandu. Pole, omanu vaco handi vamanjetu kuenda tu va sole.
^ tini. 4 Olonduko vimue vocipama cilo via pongoluiwa.
^ tini. 10 Ocipama cikuavo ci ka lombolola olonjila vi lekisa ndomo akulu vekongelo va pondola oku tẽlisa ovikele viavo vioku kuatisa olomeme.
^ tini. 60 OVILUVIALUVIA: Ungombo umue u Isareli, o lekisa esakalalo nda omeme ya nyelela. Eye o yi sandiliya toke a yi sanga kuenje o yi tuala vocunda. Akulu vekongelo koloneke vilo, va lingavo cimuamue.
^ tini. 64 OVILUVIALUVIA: Manji umue ukãi okuti wa liwekapo oku kunda, o kasi vokalela. Pole, osimbu a kasi vokalela o lete Olombangi vivali okuti lesanju vi kasi oku kunda.
