1. Parché che Geovà el ga dito che lu l’è come una mare?

“SARÀ che una dona la pol desmentegarse del so bambin?” Geovà el ga fato questa domanda nei giorni del profeta Isaia. Lu el ga dito al pòpolo: “Anca se queste done se desmenteghesse, mi mai me desmentegaria de ti.” (Isa. 49:15) No l’è sempre che Geovà el dise che Lu l’è come una mare. Questa la ze una dele ocasion che Geovà el se ga comparà con una mare. El volea mostrar che l’è tanto grando el amor che el ga par i so servi. Tante dele mare le ze de acordo con una sorela che se ciama Jasmin. Ela la ga dito: “La relassion che te ghè con un fiol la dura tuta la vita.”

2. Come che Geovà el se sente quando che un fiol el resta inativo?

² Geovà el sa quando un dei so fioi el assa de ndar ale riunion o de predicar e el resta tanto disgustà. Alora imagina el dolor che Geovà el sente quando el vede miliari dei so servi deventar inativi * tuti i ani.

3. Cossa che Geovà el vol?

³ Geovà el vol tanto che questi fradei inativi i ritorne ala congregassion e anca noantri. Alora quando questi fradei i ritorna li ricevemo con tanta alegria. (1 Pie. 2:25) Ma come che podemo giutarli a ritornar? Vanti de risponder a questa domanda ndemo veder parché che lori i ga assà de ndar ala riunion e ala predicassion.

4. Cossa che sucede con arquanti par causa del laoro?

⁴ Par tanti fradei el laoro l’è deventà la roba pi importante  nela vita. Un fradel che el se ciama Hung *, che l’è de star nela Àsia el dise: “Mi me go sbalià de pensar che se mi gavesse de pi soldi, podea far de pi par Geovà. Alora go scominsià a laorar de pi. No ndea pi a tute le riunion e dopo me go fermà de ndar. Me par che el mondo el fà le persone restar cada volta pi distante de Dio.”

5. Cossa che ga sucedesto con una sorela che la ga infrontà tante dificoltà?

⁵ Arquanti fradei i ga de infrontar problemi tanto difìcile che li assa sensa forsa par ndar avanti. Anne dela Inglatera la ga sinque fioi, e ela la conta: “Un dei me fioi l’è nassesto con una defissiensa fìsica e pi tardi una dele me fiole la ze stata desassossiada. Quel altro fiol el ga bio una malatia tanto bruta che el gavea bisogno de aiuto. Mi go bio depression e me go fermà de ndar ale riunion e nela predicassion. Par fin son restada inativa.” Ne despiase tanto de saver che come Anne e la so fameia, tanti altri fradei i ga de soportar questi problemi difìcile!

6. Cossa che pol suceder con una persona che no la mete in pràtica Colossensi 3:13?

⁶ Ledi Colossensi 3:13. * Arquanti servi de Geovà i ze restadi disgustadi par causa de qualcossa che i altri i ghe ga fato. El apòstolo Paolo el ga dito che ndaria suceder de ‘qualchedun gaver rason par brontolar contra nantra persona’. Pol esser che qualchedun ne ga tratà sensa giustìssia. Ghemo de star atenti par nò seitar disgustadi coi nostri fradei. Col tempo questi sentimenti pol farne restar distante de Geovà. Ndemo veder cossa ga sucedesto col fradel Pablo dela Amèrica del Sud. Anca se lu no’l gavesse colpa l’è stà acusà de far una roba sbaliada e el ga perso un privilègio nela congregassion. Cossa che lu el ga fato? Lu el ga dito: “Son restà tanto inrabià e poco a poco son restà distante dela congregassion.”

7. Cossa che pol suceder con una persona che la ga sentimenti de colpa?

⁷ Arquanti fradei i ga sentimenti de colpa par causa dei pecati che i ga fato nel passà. Lori i pensa che no i mèrita el amor de Dio. Lori fin i se ga ciamà grami, ma i pensa che no i mèrita esser intrà el pòpolo de Dio. Questo l’è quel che Francisco el sentia: “Mi go fato imoralità sessual e son stà dissiplinà. Nel scomìnsio ancora mi ndea ale riunion, ma son restà tanto desanimà e pensea che no meritea esser in meso del pòpolo de Dio. Mi gavea sentimenti de colpa e pensea che Geovà no me gavea perdonà. Dopo de un tempo me go fermà de ndar ale riunion.” Cossa che te senti par i fradei e sorele che i passa par queste situassion? Sito bon de capir quel che lori i infronta? E el pi importante, cossa che Geovà el pensa sora lori?

8. Sarà che Geovà el se desméntega de quei che i lo ga servio? Spiega.

⁸ Geovà no’l se desméntega de quei che i ga servio a lu e quei che i ze distante de lu. Geovà el se ricorda de tuto el laoro che questi fradei i ga fato a lu. (Ebr. 6:10) El profeta Isaia el ga fato una ilustrassion tanto bela che mostra come Geovà el ama el so pòpolo. Isaia el ga scrito: “Come un pastor lu el va tender dele so piégore. Coi so brassi ndarà riunir i piegoreti e el va portarli in brasso.” (Isa. 40:11) Come Geovà, el Grando Pastor, el resta quando una dele so piégore la resta distante dele altre? Gesù el ga mostrà cossa che Geovà el sente  quando el ga domandà ai dissìpoli: “Cossa che valtri pensé? Se un omo el ga 100 piégore e una de lore la se perde, no’l assaria le 99 nel monte e el ndaria in serca de quela che la se ga perso? E se lu la cata, sicuro che el restarà pi contento con quela de che con quele 99 che no le se ga mia perso.” — Mat. 18:12, 13.

9. Nei tempi bìblichi, come un bon pastor el tendea dele so piégore? (Varda la ilustrassion nela capa dela revista.)

⁹ Parché che la ze bona la comparassion intrà Geovà e el pastor? Parché el bon pastor dei tempi bìblichi el se preocupea tanto cole so piégore. Davi fin el ga copà un leon e un orso par proteger le so piégore. (1 Sam. 17:34, 35) Sicuro che un bon pastor el savea quando che ghe manchea una dele so piégore. (Gioani 10:3, 14) Lu el assea le 99 nte un posto sicuro o ndove qualche altro pastor el podesse tenderle e alora ndea in serca de quela che la era persa. Gesù el ga doperà questa ilustrassion par insegnarne una verità importante: “Dela medèsima maniera, la voia del me Pare, che l’è nel cielo, la ze che gnanca un de questi pìcoli i se perde.” — Mat. 18:14.

10. Cossa che Geovà el fà par tender dele piégore perse de acordo con Ezechiel 34:11-16?

¹⁰ Geovà el ama tuti noantri, anca quei pìcoli che i ze distante de lu. (Ledi Ezechiel 34:11-16. *) Par meso del profeta Ezechiel, Dio el promete ndar in serca dele piégore perse e  giutarle a esser amighe de lu nantra volta. Lu el ga dito che robe che Lu ndea far par giutar la persona a far questo, robe che un pastor israelita el fea par giutarghe una piégora persa. In primo posto, el pastor ndea in serca dela piégora persa, e questo ghe metea tanto tempo e sforso. Se la piégora la se gavea fato mal, el pastor la tendea con tanto amor, el metea le fasse e la portea nei brassi. E se la gavea fame el ghe dea de magnar. I pastori dele piégore de Dio, o sia, i ansiani i ga de far le medèsime robe par giutar quei che i ze distante dela congregassion. (1 Pie. 5:2, 3) I ansiani i va in serca de queste piégore e le ghe giuta a star insieme de quele altre e i mostra amor par lore e i ghe dà el aiuto spiritual che lore le ga de bisogno. *

11. Cossa che un bon pastor el savea?

¹¹ Un bon pastor el savea che una piégora la pol pèrderse. El pastor no la ghe fea mal parché la se gavea persa. Geovà el ga dato un bel esémpio quando el ga giutà i so servi a infrontar le dificoltà.

12. Come Geovà el ga giutà Giona?

¹² El profeta Giona el ga scampà via dela so designassion. Ma Geovà el ga mia desistio de lu. Come un bon pastor lu l’è ndato in serca e el ga salvà Giona. Lu el ga giutà a compir cola so designassion. (Giona 2:7; 3:1, 2) Dopo, Geovà el ga doperà un cabassero par insegnar una importante lession a lu. (Giona 4:10, 11) Cossa che imparemo de questo esémpio? I ansiani i ga mia de desister dei inativi. Lori i ga de sforsarse par capir parché che questa piégora la ga restà distante dele altre. E quando questa piégora la ritorna par Geovà, i ansiani i va continuar a mostrarghe amor e interesse par ela.

13. Cossa che imparemo dela maniera che Geovà el ga giutà el scritor del Salmo 73?

¹³ El scritor del Salmo 73 l’è restà desanimà quando el ga visto che ndea tuto ben cole persone rugne. Lu el se ga domandà se la meio roba l’era servir a Dio. (Sal. 73:12, 13, 16)  Cossa Geovà el ga fato? Lu no’l ghe ga dito su. Invesse, Geovà el ga assà le so parole scrite nela Bìblia. Par fin, el salmista el ga capio che la roba pi importante la ze la amicìssia con Geovà, e l’è questo che fà la vita gaver valor. (Sal. 73:23, 24, 26, 28) Cossa che imparemo de questo esémpio? I ansiani i ga mia de giulgar la persona che la scomìnsia a gaver dubi se servir a Geovà la ze la meio roba. Invesse de dir che la ze sbaliada, i ansiani i ga de capir parché che la ze drio far o parlar de quela maniera. Cossita lori i sarà boni de doperar la Bìblia par incoraiar quela persona.

14. Parché che Elia gavea bisogno de aiuto e come Geovà lo ga giutà?

¹⁴ El profeta Elia el ga scampà via dela Regina Gezabel. (1 Rè 19:1-3) Lu el pensea che ghen’era sol lu come profeta de Geovà e che el so laoro no’l gavea valor. Elia l’è restà tanto triste e disgustà che el volea morir. (1 Rè 19:4, 10) Ma invesse de criticar Elia, Geovà el ghe ga fato capir che Lu l’era insieme de Elia e che ancora el gavaria tanto laoro avanti. Geovà el ga scoltà Elia parlar sora quel che el pensea con tanta bontà e ga dato a lu altri laori. (1 Rè 19:11-16, 18) Cossa che imparemo del esémpio de Geovà? Tuti noantri, prinsipalmente i ansiani i ga de tratar con tanta bontà le piégore de Geovà. Stesso che la persona la dise che la ze inrabiada o che no la mèrita el perdon de Geovà, i ansiani i ga de scoltar tuto quel che ela la pensa e la sente. Alora, i ansiani i podarà farla sicura che Geovà dà tanto valor a ela.

15. Cossa Gesù el pensea sora le piégore del so pare de acordo con Gioani 6:39?

¹⁵ Cossa Geovà el vol che pensemo sora le piégore perse? Gesù el ga dato el esémpio par noantri. Gesù el savea che par Geovà tute le piégore le era pressiose. Par quela, lu el ga fato tuto che el podea par giutar le piégore perse dela casa de Israel a ritornar a Geovà. (Mat. 15:24; Luc. 19:9, 10) Come un bon pastor, Gesù el ga fato tuto quel che el podea parché no se perdesse gnanca una piégora de Geovà. — Ledi Gioani 6:39. *

16-17. Cossa che i ansiani i ga de pensar sora le piégore perse de Geovà? (Vedi el quadro “ Cossa che la piégora persa la pol sentir.”)

¹⁶ El apòstolo Paolo el ga insentivà i ansiani in Èfeso a imitar el esémpio de Gesù. Lu el ga dito: “Gavé de giutar quei che i ze fiachi e gavé de ricordar le parole del Signor Gesù, quando lu pròpio el ga dito: ‘Ghen’è de pi felicità in dar che in ricever.’” (Ati 20:17, 35) Sicuro che i ansiani de ancoi i ga de far compagno. Salvador, un ansiano dela Spagna el ga dito: “Quando penso come Geovà el varda le so piégore perse, mi me sento motivà a far tuto quel che posso par giutarle. Mi sò che Geovà el vol che mi tendo ben de lore.”

¹⁷ Tuti i inativi che ghemo parlà in questo stùdio, i ga ricevesto el aiuto de Geovà e i ga ritornà a Lu e ancora ghen’è tanti fradei che i ze distanti de Geovà che i vol ritornar a Lu. Nel pròssimo stùdio ndemo veder come podemo giutarli.